أبغي النصيحة يا مسلمين

[KHALID1]

ارغب في افتتاح روضة اطفال في منطقة تفتقر لمثل هالمشروع وبصراحة ان مستعد يعني عندي فيلا ملك وعملت دراسة صار لي شهرين فالرجاء اللي عنده نصيحة تخص هالمشروع من بعيد او قريب الرجاء كتابتها مع جزيل الشكر للجميع :con2: :deal:

[التيما]

شوف اخوي صرااااحه احييك على هالشي اذا تبي رايي وانا اتكلم من منطلق ام ومدرسه افضل بالنسبه لليهال ان يكون في تخصص بالغرف بمعنى مكان للمطعم يتعلمون فيه اليهال اداب الطعام والجلوس ... غرفه للدين يتعلمون فيها القرآن ... صف للتلفزيون يعتبر زي الاستراحه يشوفون فيها قصص مثل افتح يا سمسم او المناهل وغيره ... صف للانجليزي خاص لتعليم اللغه الانجليزيه وعلى هالشكل ... ثاني شي ياريت يكون في حزم في اكل اليهال يعني ممنوع الشوكلاته والشيبس وهالاشياء ... ثالثا يكون في تطبيق للرحلات والدروس يعني في الحساب يودونهم سوبر ماركت يكون فيه اتفاق معاه ويعلمون اليهال شلون يشترون ويحسبون الباقي ...واللغه الانجليزيه يروحون زياره لمدرسه انجليزيه وغيره ... في المناسبات الوطنيه والشعبيه مثل القرقيعان ياريت يودون اليهال في رحله للمدارس الحوميه يقرقعون عليهم ... يا ريت يكون في رحلات مرتين او اكثر في فتره العصر وتاخذون موافقه الاهل عليها بشرط الامهات يروحون مع اليهال فكره احبها وايد ... وياريت يكون فيه رياضات مثل الكراتيه وغيره كمثال طبعا ... انا افكر فعلا افتح روضه وعشان كذا افكر بقوانين واشياء وايد للروضه .. وبالتوفيق مقدما

[alwahesh]

اخوي العزيز خالد

قبل ما تفكر في المشروع اعمل دراسة جدوى للمشروع مثل

عدد المدرسات ورواتبهم والخامات واسايق الباص واهم من هاي كله الناطور والمعدات اللازمه من كتب والعاب واجهزه مثل البروجكتر والخ الخ
وحاول تنزل اعلان او تشهر الروضه وتشوف رد الفعل

لان بيني وبينك ويشهد علي ربي اني ابي لك الخير مب حسد او غيره
المهم غيرك الناس الي فتحوا روض قبلك من اكثر من 10 سنين شافو ان تقسيم البيت وتأجيره اربح واربح واربح من الروضه الي ما وراها الا عوار راس ومشاكل الا فلان باطين راسه الا الولد ملابسه وصخه ولا متعور وهو يلعب وانتو مب بشر ما تخافون الله ..الخ الخ الخ هذا غير الباص الي كل يوم فيه عله ولا داعم ولا عليه مخالفه

اللهم هل بلغت اللهم فاشهد ؟

[KHALID1]

شكرا اخوي الوحش على النصيحة بس انشالله انا ناوي عليها وتقريبا عملت دراسة جدوى وانا جاهز ... بس ايش رايك اول سنة اخليها بدون باصات...

[KHALID1]

شكرا اختي التيما على المرور وافكارك وايد حلوووة بس قولي لي دامك مدرسة كم اقدر اعطي المدرسات رواتب وكم عاملة محتاج وهل محتاج باص اول سنة بس وبعدين ايش الاشياء اللي ممكن اضيفها في الروووضة وتصير مميزة عن غيرها وكيف اقدر احط رسوم الكورسات يعني على اي اساس وهل بيكون على فصلين او ثلاثة فصول ؟؟؟

[rashid700]

اترك منك عوار الراس
(نصيحه)

[التيما]

شكرا اختي التيما على المرور وافكارك وايد حلوووة بس قولي لي دامك مدرسة كم اقدر اعطي المدرسات رواتب وكم عاملة محتاج وهل محتاج باص اول سنة بس وبعدين ايش الاشياء اللي ممكن اضيفها في الروووضة وتصير مميزة عن غيرها وكيف اقدر احط رسوم الكورسات يعني على اي اساس وهل بيكون على فصلين او ثلاثة فصول ؟؟؟

شوف اخوي الكريم اللي يقولك الروضه ماتربح غلطان وانت هدفك تعليمي ربحي مو عيب اعداد المعلمين حسب مساحه الروضه والغرف يعني لازم تشوف كم عدد الفصول والطلاب على اكثر شي يفضل وهاي رايي ما يزيدون عن 12 او بالكثير كثير 15 بس ويكون لكل فصل مدرسه ومدرسه مساعده والمدرسه ماتاخذ بالتقريب اكثر من 3 او 4 الاف والمساعده 2800 او 3000 والعاملات حسب طبيعه الروضه يعني عاملات للتنظيف تقريبا مو اقل من 3 ورواتبهم مو اكثر من 1500 وعامله للباص وانا رايي يكون في باص من اول سنه باص صغير مو متوسط اقصد صغير كتجربه ورسوم الكورس مو اقل من 4000 واذا فيها لبس وباص بتوصل الى 5000 او 6000 ولا تقولي وايد والله اني دورت لولدي روضه السنه وطلعت روحي ومالقيت وكنت مستعده احط 12 الف مو 6000 بس وكله عالويتينج والكورس فصلين الا اذا تبيها تدريس ونظام اجنبي 3 كورسات واذا تبي زياده ممكن افيدك وتقبل تحياتي

[مواطن]

السلام عليكم حبيت أشارك في الموضوع مشروع الروضه مشروع رابح بإذن الله ولكن :
1- أن يكون تعليمي بالدرجه الأولى
2- إختيار منهج أجنبي و تدريس المواد الدينيه (القرآن الكريم , الشريعه, ....الخ)
3-الأثاث
4- لاتفكر بربح كبير في أول سنه
5- الموقع الموقع الموقع إحرص على مكان لايوجد به روضات أو على الأقل مب نفس المستوى.
وصدقني الناس تدفع حق عيالها إذا كانت الروضه تستاهل
والله يوفقك

[KHALID1]

اختي التيما الرجاء مراسلتي على ايميلي almasa321@hotmail.com

[qq_qz]

السلام عليكم
اخوي يقولون
اسال مجرب ولا تسال طبيب ، ومن جرب المجرب حلت به الندامة
اتمنالك التوفيق والخير
لكن ادرس الموضوع مضبوط ، يعني
تقول اول سنه بدون باص ماينفع
تقولي مافي عوار راس ماينفع
لازم تختار المدرسات صح
لازم تتحمل مصاريف اول سنه وماتسال عن الارباح
وبعدين تاكد من موضوع الفلا لاني سمعت ان الجهات المختصة تفضل البيت الارضي كسيفتي للاطفال
على العموم الله يوفقك واذا تبغي تشتري شي جاهز ترا موجود وفي منطقة تفتقر لمثل هذا النشاط واهل الروضة يبغون يتحولون للعقارات وتقدر تجي وتشوف وتعاين وتشوف النظام
طبعا بعد ما اسال اهل الحلال
للتواصل qq_qz_zq@yahoo.com

[alwahesh]

[quote=التيما]شوف اخوي الكريم اللي يقولك الروضه ماتربح غلطان وانت هدفك تعليمي ربحي مو عيب اعداد المعلمين حسب مساحه الروضه والغرف يعني لازم تشوف كم عدد Quote]

اخوي العزيز الي يقول لك ان مشروع الروضه مشروع مربح ما يبي لك الخير ويبي يقطك البحر ويتشمت فيك ...

اخوي العزيز خلينا نسوي دراسة جدوى مع بعض ونستشير اهل الخبره قول بيتك كم غرفه
وقبل الغرف عندك حوش واسع ومدخلين ومكان للباص الخ الخ ؟؟؟

هل رحت البلديه واستفسرت عن المتطلبات وهل يسمحون لك بالروضه ولا لا؟؟؟

وخلنا نحسب اذا اجرت كل غرفتين او كل غرفه كم الدخل .؟؟

وانا تحت امرك ...واعتقد اني قلت لك انا اعرف اصحاب الخبره في هالمجال صار لهم اكثر من 10 سنين وفي النهايه قرروا انهم يأجرون الفيلا نظام شقق او استديوهات وافتكو
والباص شرط اساسي لرخصة البلديه

[KHALID1]

شكرا أخوي الوحش على النصيحة بس تراني اخذت الموافقة من البلدية والتخطيط العمراني وانتظر موافقة التعليم الاهلي وصدقني انا مب قصدي الربح ولكن الهدف تعليمي بالدرجة الاولى ... يعني مديرة الروضة بتكون وحدة من الاهل وعندها باع طويل في التربية والتعليم وهي تربوية ما يقارب 12 سنة وبعدين اهل المنطقة اللي انا عايش فيها محتاجين روضة تكون على مستوى واسعارها معقولة جدا والستاف اللي مختارينهم كلهم خريجات من جنسيات عربية مختلفة وذو خبرة للتعامل مع الاطفال والباص مدبر انشالله والعاملات والمنهج والموقع الحمدلله كل شيء جاهز لاني قاعد اتعامل مع انسانة تربوية عندها علم بكل هالامور واهم شي التمييز عن الروض الاخرى من ناحية طريقة التعليم والمكان والتأثيث والاسعار في متناول الجميع هذا كله تم تحديده بعد دراسة الجدوى اللي سويناها وبنتوكل على الله انشالله...

[قطري عصامي]

الله يوفقكم