الله يا زين حياتنا اول

[دلة الرسلان]

صبحكم الله بالخير جميعا
اخواني واخواتي حبيت اتذكر حياتنا اول بصوت عالي يعني نتشارك في ذكر المواقف اللي صادفتنا في المدرسة ,مع الربع, مع الجيران ,اللعب حتى الدكان ايش البضاعه اللي كانت تسلب اللب وبعض الاحيان ما نقدر نشتريها لانها بنص ريال .
كم تودي معك المدرسة مصروف. وين كانت مدرستكم؟
من المدرس الحليو في مدرستكم ؟ ومن الشري ؟ اشلون كان العقاب؟
واشلون كانت ردة فعل الاهل ؟
اذا بغيتوا تونسون وين تروحون؟ الامراض اللي صادتكم واشلون عالجوها؟
عندكم سيارة .ايش كان موديلها ؟ وكم واحد يركب فيها؟
الصبيان كم مرة يغيرون ثوبهم بواحد جديد ؟ وايش احسن لعبة عندهم ؟
البنات ايش كانوا يلبسون ؟ شنهي العابهم؟
شي تحبون تضيفونه في هالسياق ترى تامرون :deal:

[ضوى]

اختي الطيبة

موضوع شيق واحب اتكلم فيه وباكتب لج قصص ومغامرات كثيرة بس لي رجعة بعد ما اخلص اللي بايدي

[دلة الرسلان]

علشانه موضوعي باغرد الاول:dance كانت دلة الرسلان شويطينه اخذ الفريج من اول السيد ايلين اخره في لمح البصر وما كان عيب ولا باب مسكر واذا مسكر نتعلبش الطوف انا وبنت عمي . نلعب مع الصبيان وما فيه خرابيط تحرشات ولا غيره .
الملابس ايام لبنان قصير للركبه وتحته بنطلون هذا الزي الرسمي للمستشفى (بنات النور) ونحرق اقلوب البنات بكشختنا (قولو الحمد لله ما وصلنا التصوير)
مدرساتنا ايام الابيض والاسود وحدة اسمها ست عايدة تذكرني بفيروز يوم تغني نسم علي الهوا
وحفظونا اغنية طياره طيري في السما العالي (تشوفنا فاجين احلوجنا ونسمعها كل اشوي)
وما انسى ست فخريه الله !! كل ما اتذكرها ينقطع شريط الذكريات الجميله:eek3:

[صمت القلوب]

مـــــــوضوع مايتفوت ..
بس ماعندي افكـــــارا حاليا ...
لي رجعه باذن الله ...
وتسلمين دله الرسلان عالموضوع الحلو

[دلة الرسلان]

شكرا ضوى والعنيده يالله نبغي ذكرياتكم ترا ماسكة يدي واتثيقل :shy: بس خايفة لاانهد وبعدين يصير مسلسل دلة الرسلان

[البركان]

أذكـــــــــــــــــر أستاذ سامى مدرس الرياضيات يمسك شعرى ويسحبنى

خرب شعرى

كان يطقنى طق لاصار ولااستوى

كنت من اشوفه ابكى

كنت اخـــــــــــــــــــــــــاف من هالمدرس خوف

من زيادة خوفى حفظت جداول الضرب والطرح والقسمه والجمع

حفظت نظريه قيثاغورث

حفظت الاعداد العربيه والانقليزيه والهنديه حفظت جميع اعداد العالم


بس للامانه والحق يقال


خلانى اسبق الاله الحاسبه بالجمع والطرح والقسمه والضرب

ربــــــــــــــــــانى عدل


ولو اشوفه الحين احب راسه واشكره

واتمنى من الله العلى القدير يرزقه ان كان حى ويغفر له ويتجاوز عنه ان كان ميت


كان يطقنى ويرفسنى وكنت احس ان هالرجال خايف على والحمد لله جميع الاصابات سطحيه





الموقف الثانى


مدرس العربى واسمه استاذ عونى كان ساكن فى عمارة الوالد جيته وقلت له الوالد يسلم عليك

ويقول لك اذا مانجحتنى راح يزيد الايجار عليك او انه بيطردك من العماره

قالى صحيح ابوك يقول هالكلام

قلت انا : اى

وهو يكلمنى اشوفه طلع حزام البنطلون

قال : بس ابوك يقول الولد ولدكم لكم اللحم ولنا العظم

ونزل على ضرب بالحزام وكان يضربنى حيــــــــــــــل ويقول شايفنى طفل تضحك على

رحت للبيت وقلت للوالد اللى صار

فاجابنى ببرود

تستاهل المدرس مايضربك الا انت غلطان


واستاذ عونى الى الان موجود بالكويت ويزورنا من مده الى مده ويذكرنى بهالموقف

ويقول : من ليس له حيله فليحتال بس على مين تلعبها





شكرا دله الرسلان على هالموضوع

[دلة الرسلان]

يا هلا يالبركان ذكرتني بست ناديه مدرسة الرياضيات كنت طالبة حمصيه وشاطرة بس ما حفظت جدول الضرب عطتنا قصاص 100 مره كل الاعداد واقعد اكتبها من الظهر لين خلصتها بس فعلا للحين حافظتها .

[ضوى]

عدنا
اختي مدري شاقول وشاخلي براسي اشياء وايد بطفولتي كنت شقية جدا شيطانة بشكل لا يصدق بس كنت شاطرة الحمد لله
اتذكر كنت اجي من المدرسة واقط ثيابي على امي الله يرحمها والبس ملابس البيت وركضة عالشارع نتسابق انا واخوي واختي وبنات الجيران اللي كانوا بسني ويوم اخوي يحتر علي اذا سبقته كان يقول جملة عجيبة وكنت اخاف منه واتخشب من الخوف كان يقول الذبح الموت العرق :con2: للحين وربي ما اعرف شنو يعني ؟؟ بس كنت اموت من الرعب والله لا ومخوف بنات الفريج كلهم بهالجملة ، المهم الظهر احوط بالشارع لين صرت سوده من الشمس واللواهيب اللي حرقتني وكثر ما ابيو كان يطقني ما في فايدة ، واحلى شئ اني كنت مرسال الغرام حق حبايب الفريج هذي تطرش رسالة لفلان وفلان يطرش رسالة لفلانة بس يشهد الله علي اني ما قد شفتهم مع بعض كله برسايل لا وحضرنا عرسهم بعد :D ، اذكر مرة طق المطر جامد ويوم جيت اروح المدرسة والا اذكر في الاذاعة يقولون اجازة طبعا ما نحب قعدة البيت تجمعنا شباب وبنات وسوينا تمثيلية فيها مشهد عرس يالله اشكثر كانت حلوة البراءة ، كان جنب بيتنا مخبز فلسطين القديم اللي برميلة كنت احب اروح اخذ من عنده زعتر :) ، اتذكر ولد جيرانا احمد كان كبير اكبر مني يمكن ب 25 سنة ، كنت اطلب منه يرسم لي نشاط للعلوم كان يساومني يقول لي روحي يبي لي تحت القاعة من طباخ امج وبعدين ارسم لج وكان كل مرة يساوم باكلة يقول اكل امج ما يتفوت الله يرحمها يارب
اذكر مرة دخلنا بيت من البيوت الاجانب برميلة ويتسكر علينا الباب ويطلع لنا ذاك الكلب السلوقي يخرع تبريدنا بمكانا انا واختي وصديقتي واختها وصارخنا صراخ لحد ما جا اخوي وطلعنا وضربنا ضرب ، كنا نحب نحوس ليش ما ادري بدون هدف ، اتذكر كان جدام بيتنا تريب رمل كنت شاسوي ؟؟ اركب فوق السطح وانط عالرمل الحين لو يعطوني فلوس ما سويتها من الخوف اشلون كنت اسويها ما ادري :con2:
اخوي الشرير صاحب الجملة المعتادة كان يجمع قواطي الروب الداندي ويسوي فيهم فيمتو ويبيعهم علينا بنص ريال بس الصراحة كان لذيذ والحين احاول اسويه ما اعرف اضبطه
وكان شاري سينما صغيره وحاط غترة بيضا عالطوفة ويشغل لنا افلام اجنبية مرعبة وياخذ علينا وعلى عيال الفريج نص ريال بعد شرير :court:

ابوي الله يرحمه لما كنت بالابتدائية يعطيني نص ريال اخبر البيبسي كان بريع وسندويش الفلافل بربع يا الله ما الذهم كنت احس بلذه غير طبيعية وانا اكل الحين حتى الاكل ما له طعم
لما رحت الاعدادية والثانوية كان يعطني ريالين بس ولا عمري اخذت اكثر والحمد لله كانت عندنا قناعة عجيبة ما عمرنا طلبنا زيادة ولا عمرنا تذمرنا

المدرسة كنت شاطرة بس شطانتي تخرب علي بس بعد ما راحت الثانوية عقلت وركدت
والله اتذكر الوقت اللي مضى اتحسف على عيالي وزمانهم الحين ، صرت اخاف عليهم يطلعون الحوش بروحهم

شكرا لج يا اختي واذا تذكرت شئ بارجع لج اذا سمحتي لي :D

[مليت]

انا كنت عمدة االصف والوحيد الي يدخن في المدرسة وياكل فلفل قدام المدير
ولكن في الاخير اي مشكله تصير يقطونها في راسي حتا لو مالي ذنب وتفنشت بسبب مدرس اسمه سامي نفس اسم مدرس البركان وعطوني حرمان من جميع المدارس والحمدالله وبعد طول عناء خلصت الجامعه مع وجود الكثير من العقبات في ذالك الوقت ادري دخلت بسالفه ثانيه لكن هذي مذكراتي بنسبه للماضي

[دلة الرسلان]

وي ياقلبي اشلون اسمح الا اسمح واسمح بعد .اتذكر اختي تخرم قواطي العنصنص وتربطها بخيط حقها بس انا ما احصل الا قواطي صلصل احشرتني .
على طاري تريب الرمل النكال يروس واحنا نعطيه اشارة يريوس وهو يكب الرمل كم واحد من الانتحاريون دشوا تحت الرمل وكنه العيد.:strong

[دلة الرسلان]

ياهلا مليت شري هاه :p بس ما يكفي نبغي ذكريات اكثر وحياك الله

[دلة الرسلان]

واحنا بعد ياضوى المصروف نص ريال حق الببسي والسندويش اذكر مرة قعدت انا واختي نفرك بها الانات علشان تصير نص:funny:
كان معانا بنت فيها الحصبه غابت وجاتنا لابسة بخنق استغربنا بس بعدين عرفنا انها محسنه شعرها ومخلين لها قذلة تطلعها من البخنق .

[مليت]

بااااااااااااااااااااااااال انتو على ايام النص ريال يعني مواليد 1960 لين 1968

omen

[ضوى]

بااااااااااااااااااااااااال انتو على ايام النص ريال يعني مواليد 1960 لين 1968

omen


اخوي مليت ما اتحرج ابدا اني اقول اني مواليد 1970 هذا عمري ولا يمكن اخفيه

[دلة الرسلان]

بااااااااااااااااااااااااال انتو على ايام النص ريال يعني مواليد 1960 لين 1968

omen
ياشينك يا مليت هذي مب ذكرياتك المطلوب اتحطهاcrazy

[دلة الرسلان]

:con2: بل فهمت الحين ليش العرب يقرون وما يشاركون يعني بجهههههههه يا بوي ترا ما احد يعرف شخصياتكم الاصليه فضفضوا ما عليكم .

[غريب احساس]

:con2: بل فهمت الحين ليش العرب يقرون وما يشاركون يعني بجهههههههه يا بوي ترا ما احد يعرف شخصياتكم الاصليه فضفضوا ما عليكم .


يعني اوول:D

[البركان]

اخوي مليت ما اتحرج ابدا اني اقول اني مواليد 1970 هذا عمري ولا يمكن اخفيه


:D صغيره

انا اكبر منج :dance

[دلة الرسلان]

:D صغيره

انا اكبر منج :dance
اشوه :court:

[ضوى]

:D صغيره

انا اكبر منج :dance


بركان يا بركان

عمري ما احسبه بالسنين عمري احسبه بلحظات الفرح فيه ولحظات السعادة ولحظات اللايمان وهذا هو اهم شئ;)

[دلة الرسلان]

شكله بيسير مسلسل دلة الرسلان
اتذكر ابوي الله يرحمه اول واحد شرى تلفزيون في الفريق(الفريج) وكان ليليا يجتمعون في بيتنا الرجاجيل الصف الامامي وبعدين الصبيان والصف الاخير الحريم والبنات.
عاد الشيخة دله تستفيد من ها الموقف لتصفية الحسابات وطرد المغضوب عليهم, واتجاوز اذا كان مع البزر امه (ايه لازم بعد نحترم ضيوفنا ):D
نسيت اقول ها التجمع كان في الحوش والبرنامج يا الشيخ الطهطاوي يا المهابيل الثلاثة

[دلة الرسلان]

بركان يا بركان

عمري ما احسبه بالسنين عمري احسبه بلحظات الفرح فيه ولحظات السعادة ولحظات اللايمان وهذا هو اهم شئ;)
خطيرة ياضوى حد كان يتخيل ها الرومانسية وانت تخترقين الفرجان .

[ضوى]

خطيرة ياضوى حد كان يتخيل ها الرومانسية وانت تخترقين الفرجان .


ايييييييييييييه والله ، بس فرجان الا علوووووووووووم يا دلة الصراحة ايااااااااااااااام عجيبة ، اتذكر يوم تسكر عندنا الكهرباء ركضة عالسطح فوق الدري الخشب اللي يخوف وياما طحنا منه وتكسرنا :looking:

[قطرية عسل]

ايييييييييييييه والله ، بس فرجان الا علوووووووووووم يا دلة الصراحة ايااااااااااااااام عجيبة ، اتذكر يوم تسكر عندنا الكهرباء ركضة عالسطح فوق الدري الخشب اللي يخوف وياما طحنا منه وتكسرنا :looking:


:eek2: :funny:

انا كنت اشطن منج أختي ضوى .. لكن تعالي شوفيني الحين :shy:
:p

متابعــــــــــــــة .. وتحياتي لصاحبة الموضوع :)

[البركان]

بركان يا بركان

عمري ما احسبه بالسنين عمري احسبه بلحظات الفرح فيه ولحظات السعادة ولحظات اللايمان وهذا هو اهم شئ;)


ضوى

بما اننى اكبر منج فانا افهم منج :)

والمثل يقول

اكبر منك فيوم افهم منك بسنه :funny:


وانا افهم منج ب 720 سنه :eek2: عاد حليها انتى

[دلة الرسلان]

:eek2: :funny:

انا كنت اشطن منج أختي ضوى .. لكن تعالي شوفيني الحين :shy:
:p

متابعــــــــــــــة .. وتحياتي لصاحبة الموضوع :)
ياهلا عزيزتي .... نبغي بعض من انشطتج السابقة .

[قطرية عسل]

ياهلا عزيزتي .... نبغي بعض من انشطتج السابقة .

:looking:

[دلة الرسلان]

ضوى

بما اننى اكبر منج فانا افهم منج :)

والمثل يقول

اكبر منك فيوم افهم منك بسنه :funny:


وانا افهم منج ب 720 سنه :eek2: عاد حليها انتى
يعني مواليد 68:dance
بس نقعد نحسب ياخوان والله تخربون الموضوع وتشردون الزبائن:eek3:

[دلة الرسلان]

:looking:
يامه اسم الله عليج ياعسوله اقصد ذكرياتج .

[قطرية عسل]

يامه اسم الله عليج ياعسوله اقصد ذكرياتج .

:shy:

[M.D.Luffy]

أذكـــــــــــــــــر أستاذ سامى مدرس الرياضيات يمسك شعرى ويسحبنى

خرب شعرى

كان يطقنى طق لاصار ولااستوى

كنت من اشوفه ابكى

كنت اخـــــــــــــــــــــــــاف من هالمدرس خوف

من زيادة خوفى حفظت جداول الضرب والطرح والقسمه والجمع

حفظت نظريه قيثاغورث

حفظت الاعداد العربيه والانقليزيه والهنديه حفظت جميع اعداد العالم


بس للامانه والحق يقال


خلانى اسبق الاله الحاسبه بالجمع والطرح والقسمه والضرب

ربــــــــــــــــــانى عدل


ولو اشوفه الحين احب راسه واشكره

واتمنى من الله العلى القدير يرزقه ان كان حى ويغفر له ويتجاوز عنه ان كان ميت


كان يطقنى ويرفسنى وكنت احس ان هالرجال خايف على والحمد لله جميع الاصابات سطحيه





الموقف الثانى


مدرس العربى واسمه استاذ عونى كان ساكن فى عمارة الوالد جيته وقلت له الوالد يسلم عليك

ويقول لك اذا مانجحتنى راح يزيد الايجار عليك او انه بيطردك من العماره

قالى صحيح ابوك يقول هالكلام

قلت انا : اى

وهو يكلمنى اشوفه طلع حزام البنطلون

قال : بس ابوك يقول الولد ولدكم لكم اللحم ولنا العظم

ونزل على ضرب بالحزام وكان يضربنى حيــــــــــــــل ويقول شايفنى طفل تضحك على

رحت للبيت وقلت للوالد اللى صار

فاجابنى ببرود

تستاهل المدرس مايضربك الا انت غلطان


واستاذ عونى الى الان موجود بالكويت ويزورنا من مده الى مده ويذكرنى بهالموقف

ويقول : من ليس له حيله فليحتال بس على مين تلعبها





شكرا دله الرسلان على هالموضوع



هههههههههههههه موتني ضحك :funny: :funny: كله ولا استاذ عوني تستاهل :funny:

[M.D.Luffy]

اهم شي لا حد يضحك :funny: :funny: :funny: كنت بالصف الخامس والمدرس طلب اسم برنامج تعليمي مشترك لدول مجلس التعاون غير افتح ياسمسم هذا الشي الوحيد الله كنت اعرفهcrazy crazy لين وصل الدور عندي وقعدت :con2: :con2: عامل فيها :strong :strong وبكل ثقه قلت له عالم الحيوان :D :D قالي قوم اطلع بره ياحيواااااااااااااااااان :looking: :looking: :funny: :funny: وشك للسبوره ايديك فوق ورجل فوق وطول الحصه كل مايقرب صوبي :court: :court: يعطيني بالخيزران :eek3: :eek3: هههههههههههههههههه يوم:dance :dance

[غريب احساس]

اهم شي لا حد يضحك :funny: :funny: :funny: كنت بالصف الخامس والمدرس طلب اسم برنامج تعليمي مشترك لدول مجلس التعاون غير افتح ياسمسم هذا الشي الوحيد الله كنت اعرفهcrazy crazy لين وصل الدور عندي وقعدت :con2: :con2: عامل فيها :strong :strong وبكل ثقه قلت له عالم الحيوان :D :D قالي قوم اطلع بره ياحيواااااااااااااااااان :looking: :looking: :funny: :funny: وشك للسبوره ايديك فوق ورجل فوق وطول الحصه كل مايقرب صوبي :court: :court: يعطيني بالخيزران :eek3: :eek3: هههههههههههههههههه يوم:dance :dance


هههههههههههههههههههههههههههههههههههههههه

الله يقطع ابليسك لا انا اشوى منك اجل:looking:

[دلة الرسلان]

[QUOTE=M.D.Luffy]
اهم شي لا حد يضحك :funny: :funny: :funny: كنت بالصف الخامس والمدرس طلب اسم برنامج تعليمي مشترك لدول مجلس التعاون غير افتح ياسمسم هذا الشي الوحيد الله كنت اعرفهcrazy crazy لين وصل الدور عندي وقعدت :con2: :con2: عامل فيها :strong :strong وبكل ثقه قلت له عالم الحيوان :D :D قالي قوم اطلع بره ياحيواااااااااااااااااان :looking: :looking: :funny: :funny: وشك للسبوره ايديك فوق ورجل فوق وطول الحصه كل مايقرب صوبي :court: :court: يعطيني بالخيزران :eek3: :eek3: هههههههههههههههههه يوم:dance :dance [/QUOTE
بس والله ماخبر غير هالبرنامج فيه غيره:o

[أمة الله]

اللــــــــه على ذكريات لوّل

كنت أيمّع مصروفي نص على نص و ريال على ريال وأروح الدكان أشتري عصير الملوك (بو نص) و ربيان وأحياناً أشتري فيهم علوج...عاد كان يجيني وااايد فكنت أروح أنخش ورا البيت وأقعد على دجّة الميلس وآكل العلوج حبه ورا الثانيه عشان محّد من اخواني يقول عطيني :p

وكان عندي سيكل أحمر كنت أحوط فيه بعّز القايله في الفريج مع اختي و ولد الجيران....وكنّا مسمين الأماكين بأسماء سريه عشان يا بلفيت محّد يعرف وين بنروح :strong

ولمن كانت فيه حفريات كنا نطّب في الحفرة ونسوي عزيمه اللي هي ربيان وعصير بو نص وفلفل ونقعد نآكل ونسولف ومتى ما طاب خاطرنا نطلع :D

وكانت عندي معاناة الصراحه وياما صحت دم منها.....كنت أنام وآنا مآكله علوج وأنسى....ما أقوم الصبح إلاّ والعلوج متلزق في ظهري وشعري وهااااااااات هوااش من أمي وضحك وشماته من خواتي وصياااااح مني.......كانت أمي تمسكني غصب وتقعدني عند باب الصاله وتشلّه من ظهري وشعري وآنا صياااااااااح من العوار والخوف بعد :eek3:

ومرّه الوالده كانت تخيّط وتركت المكينه ومدري وين راحت....قومي يا أمة الله وحطي صبعج مكان الإبره و دوووسي على المكينه شغليها والإبره انغرزت في الظفر واللحم وهااااااااااات يا صرااااخ وصيااااااااح :eek3:

الذكريات وااااايده والله وأحلى شي ان الواحد يسولف عنها ويضحك على نفسه ويستغرب اشلون سوّى هالسوالف والأشياء اللي مالها مكان من الإعراب :D

[دلة الرسلان]

يا هلا يامة الله بس احس ما رحتي المستشفى علشان الاصابه :)

[الراقية]

يعطيج العافية وذكرتينا بأيام الأول

بالنسبة لي :
الفريج :

1- كان فريجنا الداخل مفقود والخارج موعود ...قبيلة وحدة على قولتهم ( هذا ولد عم وهذا ولد خال ) يعني يا ويل اللي يمر وماله سالفةomen .

2- من صغري لي شخصيتي القيادية يعني تقديم الولاء والاحترام واجب من الجميع:nice: .

3- يغريني اللبن المثلج لين يشقق شفايفي وتنزل بلاعيمي لين معدتي :eek2: .

4-احب السياكل واللعب كان مختلط ماعندنا مشاكل اي لعبة تكون جماعية شباب وبنات .

5- العب في اي رمله محطوطة جدام اي بيت يبنونة وكاني صج من الارض منه والية واتم احفر فيه مدري شادور :looking: .

6-احب الجمعه والحفلات يعني ماتمر السنة الا خمس اعياد ميلاد لي:deal: صارت .

المدرسة :

1- بنت بوفلص omen ولكني شيطانه في الباص كرسي محجوز:strong ويا ويل من يقعد عليه حتى عند انتقالي للمرحلة الاعدادية سلمته حق اختي الصغيرة omen .

2- شعر ناعم وعنقوزين اتذكر مدرسة( الله يعطيها العافية ابلة عايدة) نسيت لها واجب امسكت عنقوز وتمت تكلمني وهي تشد فيه لين رجعت البيت واحد فوق وواحد تحت .

السيارة :1- كابريس يلم فيه الوالد الله يعطيه الصحة :nice: عباس على دباس عشان نروح المنتزة .

هذي بعض من ذكرياتي ...تقبليها مني ورجعتيني 5 سنوات وراء :looking: لاني لو قلت الصدق بيفضحني مليت في المنتدى

[دلة الرسلان]

ذبحتيني يالراقيه ضحك , بس العنغوز كان فيه شريطه .
سيارتكم كابرس لا كشخة احنا بيجو مجنح والوالد الله يرحمه ايلم فيه البنات من المدرسه بس ماعرف العدد تعرفين فوق بعض .تشوفين رجل مني ومناك راس ؟

[التيما]

ههههههههههههههههههههههه صراحه موووتتوني من الضحك وذكرتوني بايام الطفوله :funny: الطفوله يا مليت سمعت مو الشباب يهالو يعني:court: انا كنت وااااااااااااايد هاديه جدا جدا جدا مالي حس يمكن لو ما ابوي يعدنا كل ما طلعنا بالسياره ينسوني :shy: كان عندنا سياره جي وكان ابوي يعطينا كل يوم ريالين وركيض عالدكان نشتري فيهم عصير او بيبسي او كندادراي وتيم وربيان وغيره والبيوت كانت احذا بعض وهات يا نط من بيت لبيت واذكر مره وانا انط بين البيوت الا اشوف حبيبه اثنين :looking: مسويين فلم رومانسي :funny: عاد انا ابي اركض انادي اختي الا طاخ طيخ طوخ من فوق السطح الا انا في حضن الريال :rolleyes: عادي ياهل شفيكم :court: ويقول لي لا تعلمين عفيا عليج زين قلت له ابي عصير :funny: ياب لي عصير وكل ما خاطري في شي ييبه لي ذليته :funny: بس للامانه من دخلت الجامعه تغيرت 180 درجه :looking: صرت شيطوووووونه طلعت شيطانه اليهال في الجامعه كنت مشهوره على مستوى الشيطانه :shy: بس كنت شاطره ايام الثانويه انا العاشره على الدوله :shy: بس مارضوا هلي اروح بعثه للكويت ادرس القانون :eek3: جان انا الحين محاميه :eek3: :eek3: والبقيه تاتي اول ما اتذكر موقف لي عوده ماكو ماااااااكو مااااااااكو فكه :funny:

يسلموووووووووووو دله عالموضوع يجنن صراحه

[دلة الرسلان]

يا هلا التيما ناطرينك .

[دلة الرسلان]

مغامرة خطيرة لا انصح الصغار بتقليدها
الله يسلمكم هذه المغامرة اذا تذكرتها احس بضيقة في النفس:eek3: وتعود الى السبعينيات بس متى مادري :D المهم دله كانت طفلة رياضية جدا واحب كل انواع الرياضة وخاصة السباحة , وكان عندنا درام ماي حديد ومن الزهق طبت فيه اتسبح ويالله شوط سباحة ظهر وراده سباحة فراشة , ومع الحركات يتحرك قاع الماي[ وتطلع اشياء غريبة ,طحالب,بوك البتاني راعي الدنكر, تيل واشياء واجد
المهم سمعت اصوات غريبة .. ررفعت راسي الا امي الحبيبة (وما ادراك ما امي) وبيدها مضراب الهريس العملاق(مجداف) وجنبها اختي الفتانه المعصقله حاطة يدها على خاصرتها
المهم انضربت ضرب وزعلت وقعدت على السطح ابغي هلي يراضوني .:eek3:
استسلمت عند المغرب وتنازلت عن السباحة وكرهتها لو مخليني اتدرب كان الحين عندي كم ميدلية ذهبية
هاة حد قدر يسوي مثلي

[الراقية]

على طاري الدرام :looking:

كان جنب بيتنا بيت يبنونه وفيه درام كبير اللي مفتوح المستطيل...

وقبل نشوف بالتيلفزيون في الافلام وافلام الكارتون يسووون رغوة في الحوض ...

كان نقوم أنا واختي واخوي ونحط في الدرام قوطي صابون ناعم( من صغري احب الزين والحركات )

وهات يا تسبح في الرغوة :dance

وطبعا عيال الفريج شاركونا ....فرحة حمام السباحة مع الرغوة :dance


النتيجة crazy

1- ضرب من عند الوالد حق اخوي :anger2: طبعا لانه الولد ولان احنا قلنا ان هو المخطط للعملية .

2- احنا وعيال الفريج في المستشفى للعلاج من الحساسية ( صابون مواعييين ):eek3:

تحياتي لك يا دلة رسلان

[دلة الرسلان]

زين ماحد سألنا ايش كان المايوه بتاعنا:rolleyes:

[دلة الرسلان]

ليش وين الاعضاء:anger1: بل حتى مواليد الثمانينات عندهم ذكريات .

[دلة الرسلان]

هذه السالفة اهداء لاختي ام محمد في لندن
كانت الوالدة الله يمد بعمرها على طاعته (لازم) تطرشني اجيب الخبز الايراني والجبن الراميك الاصفر وفي الطريق تبسط دله وتقعد تقرض في اطراف الخبز (عقدة نفسية مادري ) المهم احرص ان اشكال الخبزة كاملة الاستدارة ,وبعدين اكمل المشوار للبيت .
ترى عرفت ليش كنت انا وبنت عمي دايم ركيض من اول الفريق لين اخره , بيت عمي اخر الفريق وبيتنا اوله
اروح صوبهم اناديها تلعب معاي ونرجع كانحن زهبة ولازم انشغل التيربو لان فيه صبي شري واخته من قرادتنا بيتهم في النصف وباين ماكنا عاجبين
المهم يتم يحذفنا بالحصى ونسمع صوت الحصى وهو يضرب اضلوعنا وله دوي ويالله يالله
نوصل البيت . بس من صبح نعيد المغامرة وجروح امس مازالت مورمة:funny:

[المخباط]

اللة علىزمان راح باشارككم ببعض الذكريات القوايل الوقت المفضل عندنا ماعرف ليش امي عجزت فينا عشان ما نطلع كانت تقفل باب الصالة تعرفون نظام بيوت الشعبية ثلاث غرف بينهم حمام فانا وخواتي اصغر مني كنا نطلع من دريشة الحمام طبعا يطلعون بسهولة وانا اشير عشان راسي كبير شوي طبعا انا وحظي يمكن اطلع بحركات بهلوانية قبل لا تصيدني امي او اسمع صدى الزنوبة على ظهري:eek2:

[المخباط]

بعد اتذكر حركة انتشرت في المدارس الاشتراك في احضار الريوق كنت مشاركة بقوطي فول اذا طلعنا فرصة كل وحدة اتطلع اللي جابتة اللي جايبة بيض مفيوح واللي جايبة طماط واللي خبز المهم اذا التفتوا علي عشان مشاركتي طلعت القوطي وقلت اوة نسيت اجيب الفتاحة اليوم الثاني نفس القصة مشوها لي بس الثالث غضبوا علي واطردوني مع قوطيي شااسوي امي مهيب فاضية تطبخ لي عندها غيري 5 وعندها بقر تحلبة على الصبح والباص ما يعطي اختيارات

[المخباط]

:con2: اشكرك اختي دلة الرسلان عجبني الموضوع تذكرين الدوار او شيط شيط

[أمة الله]

اللة علىزمان راح باشارككم ببعض الذكريات القوايل الوقت المفضل عندنا ماعرف ليش امي عجزت فينا عشان ما نطلع كانت تقفل باب الصالة تعرفون نظام بيوت الشعبية ثلاث غرف بينهم حمام فانا وخواتي اصغر مني كنا نطلع من دريشة الحمام طبعا يطلعون بسهولة وانا اشير عشان راسي كبير شوي طبعا انا وحظي يمكن اطلع بحركات بهلوانية قبل لا تصيدني امي او اسمع صدى الزنوبة على ظهري:eek2:


:funny: :funny: :funny: :funny: :funny:

رهييييييييب تعبيرج

[دلوعه امها]

ليت الشباب يعودو يوما لاخبره بما فعل المشيب هههههه

[دلة الرسلان]

:con2: اشكرك اختي دلة الرسلان عجبني الموضوع تذكرين الدوار او شيط شيط
ياهلا ياختي ومشكورة على المشاركة اكيد من القوايل حصلت على لون البرنزواج اللي تسعين له بس الوالدة ما كانت عارفة:funny:

[دلة الرسلان]

ليت الشباب يعودو يوما لاخبره بما فعل المشيب هههههه
ياهلا حبيبتي تقصدين الطفولة بس خانج التعبير ماعليه :eek2: بس يادلوعة والله ازعل على حياةالحكرة اللي عايشينها اطفالنا الحين انتي ايش رايك؟

[دلة الرسلان]

ياهلا امة الله تدرين الزنوبة (اعزكم الله) كان لها فوائد شتى :funny:

[_QTR_]

almaw'9oooooo3 7eloooooo

i will be back after my work

o bagolekom kam salfaaaaaaaah betmootooon mn al'9e7ek

[الطرف الأغر]

احم احم

فتحتي سوالف يا دلة ما كانت على البال :D ،، على أيامي او بالأحرى يات علي انا بس ما كانو يخلوني العب مع اصبيان الفريج :eek3: ،،اختي العبت واشقحت اسطوح انا لأ ،، بس كنت اشرد من البيت الصبح انروح الخباز مع اعيال الفريج نشتري عين ( عجين ) من عند البتاني الله ستر :looking: ونقعد نلعب فيه ونسوي تشكيلات عبالنا معجون ،، عقب مانلعب فيه لعب ويتغير لونه ناكله :funny: ،، وامي اتهاوش بيصير في بطنكم دود


واذا صار بنيان قريب منا وفيه رمله ،، كل الفريج مسوي هجوم على الرمل ونسوي غار الفار ،، والي يبي يسوي نفسه بطل من الصبيان يركب فوق الطوفه ويربط ثوبه برقبته ويطير ( ينط عالرمله ) الحمدالله مافي اصابات :nice:

السياره كدلك :strong ولا سوبربان ،، وكلنا نندعس انروح فيها البر


لي عوده :nice:

[دلة الرسلان]

almaw'9oooooo3 7eloooooo

i will be back after my work

o bagolekom kam salfaaaaaaaah betmootooon mn al'9e7ek
ياهلا ومرحبا َQTR ناطرين السوالف نبغي نتونس :dance

[دلة الرسلان]

احم احم

فتحتي سوالف يا دلة ما كانت على البال :D ،، على أيامي او بالأحرى يات علي انا بس ما كانو يخلوني العب مع اصبيان الفريج :eek3: ،،اختي العبت واشقحت اسطوح انا لأ ،، بس كنت اشرد من البيت الصبح انروح الخباز مع اعيال الفريج نشتري عين ( عجين ) من عند البتاني الله ستر :looking: ونقعد نلعب فيه ونسوي تشكيلات عبالنا معجون ،، عقب مانلعب فيه لعب ويتغير لونه ناكله :funny: ،، وامي اتهاوش بيصير في بطنكم دود


واذا صار بنيان قريب منا وفيه رمله ،، كل الفريج مسوي هجوم على الرمل ونسوي غار الفار ،، والي يبي يسوي نفسه بطل من الصبيان يركب فوق الطوفه ويربط ثوبه برقبته ويطير ( ينط عالرمله ) الحمدالله مافي اصابات :nice:

السياره كدلك :strong ولا سوبربان ،، وكلنا نندعس انروح فيها البر


لي عوده :nice:
مرحبا يالطرف الاغر لاتبطين :nice:

[المخباط]

الدوار او الشيط شيط عبارة عن السوق يعني الوحدة ما اتعنى:confused: السوق يجي لحد عندها:app: انا واخواتي نكون حرس شرف نزفة من بيت لبيت لحد ما نوصلة بيتنا طبعا مشوار مهب بسيط من اول الفريج لاخرة نكون سوينا فحص للبضاعة لا تخلو بعض المرات من الفحص التجريبي يعني بعد اسبوع اذا درت الوالدة ناخذ كم طراق وتدفع الفلوس حق البتاني عشان الحرام بس واللة ما كنا فاهمين شالسالفة ايية البضاعة تكون ثياب بناتي وولادي وحق حريم كل البضاعة تكون في بقشة على ظهر بتاني اللي يدور في فريجنا ما يتعب حن نصارخ بدالة بس بعد التجربة العملية ماعاد جااء بيتنا مع ان حنا كنا نسوي لة دعاية ونلبس البضاعة اول ما تشتريها امي اللة يسامحة الظاهر ما عجبناة:confused:

[خاربه خاربه]

:dance :strong :dance

موضوع روعه ومستانسه بالقراءه وإن شاء الله بكتب لكم كم شي حلو :dance

[دلة الرسلان]

الدوار او الشيط شيط عبارة عن السوق يعني الوحدة ما اتعنى:confused: السوق يجي لحد عندها:app: انا واخواتي نكون حرس شرف نزفة من بيت لبيت لحد ما نوصلة بيتنا طبعا مشوار مهب بسيط من اول الفريج لاخرة نكون سوينا فحص للبضاعة لا تخلو بعض المرات من الفحص التجريبي يعني بعد اسبوع اذا درت الوالدة ناخذ كم طراق وتدفع الفلوس حق البتاني عشان الحرام بس واللة ما كنا فاهمين شالسالفة ايية البضاعة تكون ثياب بناتي وولادي وحق حريم كل البضاعة تكون في بقشة على ظهر بتاني اللي يدور في فريجنا ما يتعب حن نصارخ بدالة بس بعد التجربة العملية ماعاد جااء بيتنا مع ان حنا كنا نسوي لة دعاية ونلبس البضاعة اول ما تشتريها امي اللة يسامحة الظاهر ما عجبناة:confused:
ليش حبيبتي بس بتاني بعد فيه تاجرات شنطة (بقشة) تحمل الفقيرة كل شي على ظهرها هذي عاد سوبر لها شرف دخول البيت الداخلي , لو عادها موجودة كان كل ما نبغي نروح السنتر يقول ابو العيال :توها الدوارة عندكم البارحة !!!!,بس زين انقطع الوارد .:funny:

[دلة الرسلان]

:dance :strong :dance

موضوع روعه ومستانسه بالقراءه وإن شاء الله بكتب لكم كم شي حلو :dance
اي والله يا خروبه خلينا نشوف الجانب الخفي لخروبه ومرررررررررحبا

[الخيميائي]

عجبني الموضوع

ممتع جدا

لي عودة بس اعصر الذاكرة شوي

[دلة الرسلان]

عجبني الموضوع

ممتع جدا

لي عودة بس اعصر الذاكرة شوي
ياهلا اخوي ....... بعد العصر:p

[السنافي]

lموضوع حلو يا دلة الرسلان ويالله على القوة

اما الذكريات فحدث ولا حرج بس اخاف تخرب صورتي عندكم اذا عرفتو بعض ذكرياتي ...:nice:
لكن حاضرين للطيبين بس خلنا نبدأها بذكريات على الخفيف الله يرحم ايام البرازيلي وابراهيم (كولي الوالد الخاص) والدريول كان راعي اسمه عبدالسلام (سمم البقر وحل عليه الغضب..:funny: ) وانا في النص وكنت متين وابيض omen والمدرسه جنب البيت بس خبركم لازم شوي دلع..

وان شاء الله يا دله الرسلان لنا متابعة وسرد لخفايا الزمن وذكريات البراءة (القلاعة..)


معليه بس كان لازم اشارك باسمي التراثي (السنافي) ...:strong

[دلة الرسلان]

lموضوع حلو يا دلة الرسلان ويالله على القوة

اما الذكريات فحدث ولا حرج بس اخاف تخرب صورتي عندكم اذا عرفتو بعض ذكرياتي ...:nice:
لكن حاضرين للطيبين بس خلنا نبدأها بذكريات على الخفيف الله يرحم ايام البرازيلي وابراهيم (كولي الوالد الخاص) والدريول كان راعي اسمه عبدالسلام (سمم البقر وحل عليه الغضب..:funny: ) وانا في النص وكنت متين وابيض omen والمدرسه جنب البيت بس خبركم لازم شوي دلع..

وان شاء الله يا دله الرسلان لنا متابعة وسرد لخفايا الزمن وذكريات البراءة (القلاعة..)


معليه بس كان لازم اشارك باسمي التراثي (السنافي) ...:strong
مرحبا يالسنافي وخليتني احذف ردي عليك لانك غيرت الاسم:)

[_QTR_]

السلام عليكم جميع واشكلر الاخت دلة على هذا الموضوع اللي يجدد الذذكريات الحلوة

على العموم في سوالف وايد والله بس بذكر لكم سالفة في ايام اول ثانوي

طبعا كنا بس 6 قطريين في الصف والباقي جنسيات عربية
وكان عندنا استاذ سوري اسمه اسماعيل وكان دووووم يهزأ القطريين طبعا كنا حاسين ان احنا مضطهديين .. المراد قلت في خاطري لازم نعلمه السنع واقول لواحد من الربع يالله جهز عمرك ان بنروح في الفسحه منطقة المحرقه لاني كنت ادرس في مدرسة الدوحة الثانوية.. ورجنا نصيد ضبان ومن ضمن غنائم الصيد كان الكبير والصغير .. المهم وادخل الصف ضب طوله تقريبا شبرين وارتب الطاولات من عند طاولة المدرس لين طاوليتي اللي وراء عند الدريشه .. وطبعا طلعت ذاك الضب الاليف وابدأ اجك ظهره مع الاستعانة ببعض اشعة الشمس .. زبدة الكلام ان الضب استن مره وحده من الحرارة وبدأ يركض بأتجاه المدرس المذكور اعلاه ... واول ما شاف المدرس الضب مقبل عليه حاول يرجع بالكرسي وراء وطبعا من الصدمة الحبيب اندبغ على ظهره وهو يصارخ ويقول (( ايش هااااد ديناصووور)) ويطلع من الصف ويجيب المشرف والوكيل وما قصر يوم جاب المدير ... طبعا وتم فصلي اسبووووووووووووع ومع حب الخشووووووم رجعوني ...



والسالفة اللي بعدها يمكن باسبوعين المدرس نفسه رجع يهزأ القطريين ويضطهدهم وما كان يجي صوبي او يكلمني وربع بصراحة اطلبوا مني الفزعه ... قعدت افكر وافكر وقلت مافي غير ام خيشة بتحل الموضوع وثاني يوم جبت ام خيشة وطولت فتيلتها حوالي مترين وشوي ... وطبعا رحت وعبيت الزباله كرمكم الله اوراق وقراطيس وفي قاع الزبالة وانتوا بكرامه ام خيشة وعلقت الفتيله في الطوفه وولعت وجيت ابي استأذن عشان اطلع والحبيب مايبي يطلعني واقعد اتهاوش واقول له لازم اطلع يا استاذ ((حصران)) قالي روووووووح راحت روحك .. وانا طالع اقووووووول والله انت اللي روحك بتتعلق بالمروحة ...اول ما طلعت قعدت اراقب من دريشة الصف واسمع ذاك الانفجار اللي حطم مستقبلي هههههههههههههههههههه اذكر انهم يوم حققوا في الموضوع على طوووووووول قالوا الطلبه هذا _qtr_ وطبعا افصلوني من المدرسة وقالوا لي رووووووح شوف لك مدرسة ثانية وقمت وكلمت اخووووي ويالله طلع لك واسطة من الوزارة برجووووووووعي للمدرسة بس مب في نفس الصف طبعا .... هههههههههههههه

بس الحمدالله طبعا خلصنا الثانوية والجامعه والهندسة والاحين داخلين على الماجستير
الله يوفقنا جميييييييييع بس بصراحة كانت ايام روعه

[دلة الرسلان]

حياك الله QTRزين ما كانت فيه خسائر في الارواح:funny:

[_QTR_]

تسلمين اختي دلة


وانا متابع من بعيد

[السنافي]

عاجبتني سوالف الذكريات تراني صغير بس اتذكر الوالد موديني البر وانا الدلوع في البيت
اخر العنقود وكان فيه حمار عزكم الله اشوف الصبيان يحذفونه قلت اسوي مثلهم واحذفة
بس طلع فعلا حمار ومادري ايش اللي حصل الا انه عضني عضة ولا عضة الاسد وما زالت اثارها معلمة في ذراعي