سؤال بخصوص privilege club... نادي الامتياز في القطريه

[100$]

السلام عليكم

انا كنت مسافر مع واحد من الربع ... وهو عضو في نادي الامتياز

وانا اسمع عن العضويه بس ماعطيتها اهميه


بس بعد ما ذكرلي صديقي عن التذاكر المجانيه وبعض المميزات شاركت فيها

على الاقل استفيد اشوي منهم

سؤالي اهو لاعضاء نادي الامتياز.

ماذا ستفدت من هذي العضويه ؟

وهل افظل انك تدرج اسماء عائلتك تحت اسمك او تخلي كل واحد بروحه ؟

وهل افراد العائله يحصلون على نفس المستوى بمجرد ادراجهم معي ( الفضيه او الذهبيه )
؟


وشكرا للجميع

[قطري هامور]

اخوي 100%
بالنسبة لي استفدت من البرنامج اذا كان الحجز انتظار يكون لك اولوية بالتأكيد لكن اذا تريد معلومات اكثر هذا العنوان بس مب رابط www.qmiles.com

[100$]

قطري هامور

تسلم اخوي على الرد وعلى العنوان

بس انا ابي اعرف من تجاربكم ... لان خبرك في الموقع الكلام مبهر ومعدل

احنا نبي الواقع ...

يعني مثلا مكتوب عنهم ... اولويه في صعود الطياره ... لرجال الاعمار والدرجه الولى

وانا كنت على رجال العمال ....ولما حبيت ادخل الطياره قالوا لي لحظه المكان مب جاهز

والدرجه السياحه ركبوا الطياره قبلنا ...

[قطري هامور]

اخوي 100%

انا عضو بالنادي من 2003 م وما شفت اي شي مميز بالبرنامج غير الميزة اللي قلت لك عنها وانت اخوي تقول ان مسافري الدرجة السياحية ركبو قبلك هذه معروفة اخوي اذا انت مسافر درجة اولى او رجال اعمال اولا يركبون مسافري الدرجة السياحية ثم الدرجة الأولى ورجال الأعمال كنوع من التميز لا أقل ولا أكثر وبالنسبة للتذاكر المجانية لها شروط :اول شي: لازم يكون عندك عدد من النقاط مب بس الأميال حتى تاخذ تذكرة مجانية واذا اخذت تذكرة مجانية ترجع لنقطة البداية وتجمع نقاط واميال من جديد . ثانيا : سواء كنت عضو بالنادي او مب عضو ماراح يفرق شئ . آسف اخوي ع الإطالة بس قلت اشرح اكثر عن النادي

[100$]

اخوي قطري هامور مشكور وبالعكس انا مستمتع بردك وبنقاشنا

انا الي فهمته من البرنامج

ان النقاط الي اهي" الكيو بوينت"
50 العنابيه
150 الفضيه
300 الذهبيه

هذي على عدد الكيو بوينت الي تحصله في سنه وحده

وكل بدايتة سنه يرد رصيدك من الكيو بوينت صفر

يعني اذا وصلت في سنه الى 150 راح تحصل على الفضيه

ويرجع رصيدك صفر ..السنه القادمه وتحتفض بدرجتك نفس الشي


اما "الكيو ميلز"

فهذي الخاصه بتذاكر المجانيه ..وكل دوله على حسب موقعها

يعني دول الخليج كلها تحتاج الى 6000 كيو ميلز لسفره الوحده

انا عندي حاليا 30 الف كيو ميلز:)

وهذي تنتهي كل خمس سنوات من تاريخ الحصول عليها

[قطري هامور]

اخوي بالنسبة لأميالك تقدر تسأل مركز خدمة اعضاء نادي الإمتياز بس اخوي انت بأي مستوى ؟

[100$]

انا سجلت معاهم شهر 1 هذي السنه

وحاليا ً وصلت 160 كيو بوينت

يعني الفضيه


والاميالي اقدر اطلع عليها من خلال موقهم

طرشولي يوزر نيم وباسورد

ادخل وجيك على الرصيد من الكيو بوينت والاميال


بكره بتصل فيهم بسالهم عن بعض الاشياء الي مب مواضحه لي

[ANONYMOUS]

انا عضو في الاماراتيه.. وعندي الفضيه..

الاستفاده..

ادش صالتهم.. خدمه راقيه في الترانزيت.. مكان محترم.. انترنت.,. بوفيه..

يسوون لي ابقريد احيانا.. على حسب الزحمه..

مره سافرت لبنان.. بالتذكره المجانيه.. :)

ماجربت موضوع ان لي اولويه بالحجز.. او الاوزان..

وشكرا..

[قمرهم كلهم.]

يعطيك العافية يا 100$ على الموضوع الجيد
وياريت تعطينا معلومات اكثر عن النادي يعني كيفية الاشتراك وشروطه والرسوم وفوائده
ويصلح للكل او لفئة معينة ممن يسافرون بكثرة

تحياتي

[100$]

انا عضو في الاماراتيه.. وعندي الفضيه..

الاستفاده..

ادش صالتهم.. خدمه راقيه في الترانزيت.. مكان محترم.. انترنت.,. بوفيه..

يسوون لي ابقريد احيانا.. على حسب الزحمه..

مره سافرت لبنان.. بالتذكره المجانيه.. :)

ماجربت موضوع ان لي اولويه بالحجز.. او الاوزان..

وشكرا..

اخوي حتى صالة القطريه المنى الجديد ..مستقل عن المطار وراقيه انترنت وكوفي شوب وبوفيه

جلست فيها 1 ونص وما حسيت في الوقت

سؤال اخوي .. هل امتلاكك لعضوية الاماراتيه يدخلك صالت القطريه الجديده؟

ولا القديمه الي في المبنى القديم؟

[100$]

يعطيك العافية يا 100$ على الموضوع الجيد
وياريت تعطينا معلومات اكثر عن النادي يعني كيفية الاشتراك وشروطه والرسوم وفوائده
ويصلح للكل او لفئة معينة ممن يسافرون بكثرة

تحياتي

اختي الشتراك مجاناً وبدون رسوم

عن طرق هذا الموقع

http://www.qmiles.com

جسلي الاسم ورقم البطاقه الشخصيه وباقي المعلومات

ورقم صندوق البريد وراح توصلج البطاقه خلال اسبوعين

[Chambray]

والله انا عضو في نادي الامتياز من زمااااان
الصراحة احلى مافيها إذا كانت عندك الذهبية او الفضيه
اما العنابية ماتسوى بريال

[بـ فيصل ـو]

كلامكم كله زين وحلو عن القطرية .. ولكن للأسف مهب مثل الإماراتيه!!!

مثال..
إذا لقيت زحمة على الطيارة وإنت بالدرجه الأولى فإن القطرية تعتذرك بكلمة (سوري/نأسف للإزعاج) وتطلب منك تأجيل رحلتك (يعني بطاقتك الإمتيازية مالتك ، بلها وإشرب مايها) صارت معاي..

أما على الإماراتيه يعطونك أكثر من خيار كأعتذار يليق بشخصك:
(تأجيل الرحله + إعطائك إمتيازات وخدمات إضافيه كأعتذار .. مثل خدمات توصيلك للمنزل بعدما تخرج من المطار في ليموزين فاخر ذهاباً وإياباً للمطار إضافة للسيارة الخاصه إللي تنتظرك على أرض المطار)
أو
( تنزل لمستوى أقل من الدرجة الأولى مع إعطائك كل خدمات الدرجة الأولى ماعدا الكرسي+ تذكرة مجانية مفتوحه لمدة عام كامل على نفس الدرجة إللي كنت عليها)
أو
(الأعتذارات إللي تناسبك دون مبالغات أو تعقيدات)
صارت مع واحد من الربع..

بذمتكم من أحسن ناس تحترم مسافرينها وتعتذر بالأفعال.. وليس بالأقوال وكلمة (سوري/نأسف للإزعاج)..

وإنت إختار:
بطاقات لنادي الإمتياز بقليل من إمتيازات + حسب نوع بطاقتك (هذي على القطرية)
أو بطاقة إمتياز بكل ماتحمله الكلمة من معنى وماتهتم إن كانت عضويتك ذهبية أو بلاستيكيه حتى تعمل لك حساب = يكفيها إنك عضو عندها وبس (هذي على الإماراتيه)

بصراحه .. أتمنى من القطرية إنها تسمع من جمهورها (ماتعطيهم الطرشى) وراح تلاقيها في قمة الإمتيازات .. لأن جمهورها راح يعطونها كل الأفكار الجيده إللي ممكن إنها ترفع من إسم القطرية للقمه..

[abo rashid]

بالنسبه لي وانا كثير السفر ما فيها اي امتياز

الشئ الوحيد هو تجميع النقاط و الحصول على تذاكر نصف بلاش لانك تدفع الضربيه و هي كبيرة

[Chambray]

بالنسبه لي وانا كثير السفر ما فيها اي امتياز

الشئ الوحيد هو تجميع النقاط و الحصول على تذاكر نصف بلاش لانك تدفع الضربيه و هي كبيرة
والله صدقت

[وطن]

أخوي الميزات اللي مذكوره في الموقع كلها تقدر تستفيد منها
ومو كلام ع الفاضي

عن تجربه

انا معاهم من أول ما سوو البطاقة
ما اذكر اي سنة
2000 او قبلها !!!

الشي السلبي بس !!
ان لو مرت سنة وانت ما سافرت وجمعت نقاط تنزل بطاقتك من الذهبية للدرجة اللي انت مجمع نقاطها!!

كنت ذهبية
رجعت فضية
والحين ع العنابية مره ثاني

هذا الشي اللي يبط الجبد
!!

[وطن]

كلامكم كله زين وحلو عن القطرية .. ولكن للأسف مهب مثل الإماراتيه!!!

مثال..
إذا لقيت زحمة على الطيارة وإنت بالدرجه الأولى فإن القطرية تعتذرك بكلمة (سوري/نأسف للإزعاج) وتطلب منك تأجيل رحلتك (يعني بطاقتك الإمتيازية مالتك ، بلها وإشرب مايها) صارت معاي..

أما على الإماراتيه يعطونك أكثر من خيار كأعتذار يليق بشخصك:
(تأجيل الرحله + إعطائك إمتيازات وخدمات إضافيه كأعتذار .. مثل خدمات توصيلك للمنزل بعدما تخرج من المطار في ليموزين فاخر ذهاباً وإياباً للمطار إضافة للسيارة الخاصه إللي تنتظرك على أرض المطار)
أو
( تنزل لمستوى أقل من الدرجة الأولى مع إعطائك كل خدمات الدرجة الأولى ماعدا الكرسي+ تذكرة مجانية مفتوحه لمدة عام كامل على نفس الدرجة إللي كنت عليها)
أو
(الأعتذارات إللي تناسبك دون مبالغات أو تعقيدات)
صارت مع واحد من الربع..

بذمتكم من أحسن ناس تحترم مسافرينها وتعتذر بالأفعال.. وليس بالأقوال وكلمة (سوري/نأسف للإزعاج)..

وإنت إختار:
بطاقات لنادي الإمتياز بقليل من إمتيازات + حسب نوع بطاقتك (هذي على القطرية)
أو بطاقة إمتياز بكل ماتحمله الكلمة من معنى وماتهتم إن كانت عضويتك ذهبية أو بلاستيكيه حتى تعمل لك حساب = يكفيها إنك عضو عندها وبس (هذي على الإماراتيه)

بصراحه .. أتمنى من القطرية إنها تسمع من جمهورها (ماتعطيهم الطرشى) وراح تلاقيها في قمة الإمتيازات .. لأن جمهورها راح يعطونها كل الأفكار الجيده إللي ممكن إنها ترفع من إسم القطرية للقمه..

لقيت زحمة على الطيارة وإنت بالدرجه الأولى

يعني شلون زحمة اخوي وانت حاجز ما فهمت
تقصد ان يتكنسل كرسيك بالغلط
او تصير مشكله ع الطيارة مثل اللي صارت معاي ؟؟


مره صارت معاي ع القطرية
كنت حاجزة اولى والحجز مأكد بس لما رحت المطار قالوا الطيارة الكبيرة خربانة وحطوا صغيرة بدالها !!
و اللي لحق وجا بدري طااار واحنا راحت علينا !!

ووزعوا علينا كلنا تذاكر مجانية لمدة سنة
ذهاب وعوده لنفس البلد ونفس الدرجة اللي كنا عليها !!

وبعد كانو يبون يحطوني في رحلة ثانية ودرجة غير الأولى بس رفضت
لحد ماطلعوا لي كرسي على الدرجة الأولى :strong
وسافرت في نفس اليوم

[بدور]

انا عندي الاشتراك من اول تواجد طيران القطريه

ماشفت عندهم مميزات الا كلام فاضي ومعامله زفته وعند الحجوزات مالنا اولويه

ويحطونا عالانتظار وربي كل سفراتنا فيرست وبعد ما استفدنا

ولا عطونا تذاكر مجانيه يقولون في المواسم مافيه تذاكر مجانيه

تجينا الذهبيه وترجع فضيه وترجع عنابيه على كيفهم

نادي الامتياز نادي سيء للغايه وما استفدنا منهم مثل باقي الطيران

[abo rashid]

الشي السلبي بس !!
ان لو مرت سنة وانت ما سافرت وجمعت نقاط تنزل بطاقتك من الذهبية للدرجة اللي انت مجمع نقاطها!!

كنت ذهبية
رجعت فضية
والحين ع العنابية مره ثاني

هذا الشي اللي يبط الجبد
!!

حصل معاي نفس الشئ

كنت فضيه و رجعت عنابيه و الحين فضيه

السبب 6 اشهو ما سافرت معاهم

[abo rashid]

ابي احجز لجده عن طريق الاميال ما فيه امل

[100$]

بصراحه هذي الحركه

تنزيل درجة العضويه .. اول مره ادري عنها

مع ان مكتوب في الموقع .. كل سنه يتم تصفير الكيو بوينت مع الحتفاظ بنفس المستوى

اما اذا كلامكم صحيح

كل سنه يبون 300 كيو بوينت .. لازم بعد كل ست شهور اسافر

بيبطووون

[بـ فيصل ـو]

لقيت زحمة على الطيارة وإنت بالدرجه الأولى

يعني شلون زحمة اخوي وانت حاجز ما فهمت
تقصد ان يتكنسل كرسيك بالغلط
او تصير مشكله ع الطيارة مثل اللي صارت معاي ؟؟


مره صارت معاي ع القطرية
كنت حاجزة اولى والحجز مأكد بس لما رحت المطار قالوا الطيارة الكبيرة خربانة وحطوا صغيرة بدالها !!
و اللي لحق وجا بدري طااار واحنا راحت علينا !!

ووزعوا علينا كلنا تذاكر مجانية لمدة سنة
ذهاب وعوده لنفس البلد ونفس الدرجة اللي كنا عليها !!

وبعد كانو يبون يحطوني في رحلة ثانية ودرجة غير الأولى بس رفضت
لحد ماطلعوا لي كرسي على الدرجة الأولى :strong
وسافرت في نفس اليوم

إشلون زحمة = مدري (لأن هذا كلامهم) المفروض إن الشخص يجي قبل الرحلة بساعه أو ساعتين .. وآنه كنت جاي قبل الرحلة بثلاث ساعات .. ومع ذلك قالوا زحمة ومافي مكان فاضي .. مع العلم إن تذاكر الدرجة الاولى ودرجة رجال الاعمال مايحتاج تأكيد الحجز (عالمياً وليس فقط على الخطوط القطريه) لأنه اوكيه وبدون مشاكل.. ولكن القطريه تضرب رأيك ورأي القانون العالمي بعرض الحائط!!!

وممثل القطريه حب يلف الموضوع يومها ويستخف بي فقال (إنت جاي متأخر) تصور!!
ولي قلت له إني جيث قبل الرحله بثلاث ساعات (كيف بكون متأخر.. إكتشف غبائه وسرعان ماغير رايه وقال (حجزك غير مؤكد عليه)!!! إستخفاف آخر (لأن تذكرتي ما كانت سياحيه عشان يقول لي هالكلام ولا أول مرة أسافر بطيارةقطريه) تصور كيف كان يحاول إن يرمى باللغط علي المسافر ولا كأنه غلطة القطريه!!!

وللأسف كان يحتاج الموضوع واسطه حتى أركب الطيارة .. وركبت الطيارة بالواسطه .. يعني البطاقة ماعطتني أي أولويه إلا بتلفون..

[بـ فيصل ـو]

أخوي الميزات اللي مذكوره في الموقع كلها تقدر تستفيد منها
ومو كلام ع الفاضي

عن تجربه

انا معاهم من أول ما سوو البطاقة
ما اذكر اي سنة
2000 او قبلها !!!

الشي السلبي بس !!
ان لو مرت سنة وانت ما سافرت وجمعت نقاط تنزل بطاقتك من الذهبية للدرجة اللي انت مجمع نقاطها!!

كنت ذهبية
رجعت فضية
والحين ع العنابية مره ثاني

هذا الشي اللي يبط الجبد
!!

البطاقه أصلها جات بفكره لخدمات أفضل للمسافرين ..
يعني إذا كنت تريد خدمات مميزة عن باقي المسافرين فعليك بالإنتساب لعضوية القطريه ..
ولكل إنتساب أو بطاقه لها خدماتها إللي تمتاز عن غيرها.. وتستمر البطاقه لمده عام كامل .. وتستمر العضويه لمده 5 أعوام فقط .. وتستمر الاميال معاك لعام واحد ..

ومثل ما تفضلت ياخوي عن قضية الأميال السنويه.. وهالشي يخليك تنزل بمرور سنه من إشتراكك ..
وإن كنت تريد تحتفظ بالذهبيه لأعوام كثيره .. فعليك بالآتي:
بعد مرور سنه بتكون ةجمعت نقاط كثيره .. وأول ماتشوف نفسك بتنزل للفضيه .. إكتب كتاب لهم إنك بتتبرع بـ 150 نقطه حتى تحافظ على مستواك الذهبي ..

تتبرع .. يعني (تستبدل) في لغة أهل الحضاره..

وأحب إني أذكر الأخوان إن التذاكر الممنوحه (التذكرة المجانيه) يعطونك إياها إذا طلبتها منهم فقط بعد أن تدفع لهم شوية كيلو مايل من حسابك + رسوم .. وهذي تعطى لحاملي البطاقة الذهبيه فقط..

وإذا دققت في الموضوع بتلاقي إن (سعر النقاط) + (الرسوم) = سعر التذكرة إللي طلبتها..
ولحد يسألني اللحين .. كيف التذكره مجانيه وإنت تدفع ثمنها بنقاط + رسوم !!!
يمكن يكون إستخفاف آخر بالمسافر ولكنه من نوع ثاني.. وإنت يالعضو إما ترضى تاكل المقلب أو إضرب راسك بالطوفه crazy

[قناص قطر]

السلام عليكم

رقمي 108 بالقطرية

يعني بالعربي من الاوائل اللي خذو البطاقة تكريم و و شهادات ووو ورسايل


المهم الزبده مامنها فايده

اذا كنت تسافر درجة اولى مالك نصيب بشيء

يعني انك بتستخدم الصاله بدون البطاقة

الوزن اضافي ما منه فايده

بالعربي تصلح للدرجة السياحية فقط

للعلم عندي 400 الف كيلو مايلز على الفاضي

كلها تذكرتين لشرق اسيا وسياحية

بالعربي ماتسوى

[بوخالد911]

هلا
استفدت من التالي :

تذاكر مجانية !!
مثلا ؛ لدول الخليج انت بحاجة الى 4000 نقطة فقط !!

والأعضاء لما يسافرون ؛ انت بينضاف لك نص النقاط
مثلا : دوحة - بحرين = 300 نقطة
بحرين - دوحة = 300 نقطة
المجموع = 600
انت بتاخذ نصهم ؛ يعني 300 نقطة
اشترك ما بتخسر شي

[HADi]

هلا
استفدت من التالي :

تذاكر مجانية !!
مثلا ؛ لدول الخليج انت بحاجة الى 4000 نقطة فقط !!

والأعضاء لما يسافرون ؛ انت بينضاف لك نص النقاط
مثلا : دوحة - بحرين = 300 نقطة
بحرين - دوحة = 300 نقطة
المجموع = 600
انت بتاخذ نصهم ؛ يعني 300 نقطة
اشترك ما بتخسر شي


دول الخليج تحتاج الى 6000 نقطه على الدرجه السياحيه

وافراد العائله ... ينضاف لك 50% اذا انت درجتك العنابيه

75% اذا فضيه

100% اذا ذهبيه

[الشاه بندر]

السلام عليكم
انا خذت تذكره دوحه لندن دوحه عن طريق الاميال
وخذو 25000 ميل + ضريبه 790 ريال قطري
وهذا كان في شهر فبراير 2007

[HADi]

السلام عليكم
انا خذت تذكره دوحه لندن دوحه عن طريق الاميال
وخذو 25000 ميل + ضريبه 790 ريال قطري
وهذا كان في شهر فبراير 2007


اخوي استفسار .. لما خذيت عن طريق الاميال

هل تحصل على كيو بوينت ؟ و كيو ميل

مثل ما تسافر بفلوس؟

[الشاه بندر]

السلام عليكم
بخصوص سؤالك اخوي هادي
طبعا لا
هم ياخذون اميالك ومايعطونك شيء