المخالفات والتجاوزات المرورية

[بن لادن]

السلام عليكم ورحمة الله

كلنا نعلم بأن دولة قطر تشهد مشاريع ضخمه لم تسبق لها في تاريخ الدوله ، ومن الواضح بأن هذه الطفره ضاعفت عدد سكان قطر 4 او 5 اضعاف في الخمس السنوات الماضيه ، ومالم تعلمه معظم المؤسسات والهيئات والادارات ووضعها في الحسبان هي كيفية التعامل مع هذا الكم الهائل من الناس وفي نظري اكبر مشكلة هي المخالفات المرورية التي تؤدي الى حوادث مميته اولا ، وثانياً الازدحام الشديد في شوارع الدولة ، وثالثاً الخدمات الطبية وازدحام المستشفيات ، ورابعاً توفير السكن لهذا العدد الهائل من العاملين والمقيمين مما ادى الى زيادة الطلب وارتفاع الاسعار ، ولنجعل هذا الموضوع عن المخالفات المرورية التي تغضب الكثير منا بسبب الغيره على هذا الوطن والخوف على ابنائة ، وفي نظري السبب الاول الذي يؤدي الى هذه المخالفات هو الازدحام الشديد والهدف من الوصول السريع الى المكان المطلوب ، والسبب الثاني وهو السبب الرئيسي الذي جعل الكثيرين من الاجانب من التمادي والتهور هو عدم وجود الرادع لهذه المخالفات والتجاوزات ، ومن الافضل ان يتم النقاش في السبب الثاني لان السبب الاول لاحل له الا بعد عدة سنوات وهي مسألة وقت والموضوع يرجع الى (هيئة اشغال ) والتي مازالت تحت (التدريب) .

ادارة المرور وشرطة النجدة وقسم التحريات ، كل هذه الاقسام كانت تلعب دورا فعالا في الماضي وخصوصا في الشوارع العامه ، اما في وقتنا الحالي لانراها الا في المواقف العامه فقط مثل مواقف مستشفى حمد وسوق واقف ومطار الدوحة الدولي وتقوم بتسجيل مخالفة الوقوف في مكان غير مخصص للوقوف وهي ابسط مخالفة من حيث انها لاتؤدي بحياة الاخرين للخطر .

انا لا انكر الدور الفعال في تسيير الزحام ، لكن لا رادع للمخالفين وخصوصا مخالفة رمي المخلفات في الشوارع العامه ولا حتى مخالفة تجاوز من اليمين ولا حتى مخالفة تعريض حياة الاخرين للخطر وغيرها الكثير الكثير من المخالفات التي اراها تتكرر مئات المرات في اليوم الواحد من قبل المقيمين الاجانب ، وكلنا نعرف المثل الذي يقول ( ياغريب كن اديب ) ، ولكن للأسف لارادع لكل هذه التجاوزات القانونية ، والأمر لايقتصر فقط على المقيمين .

لا يسعني الا ان اختم هذا الموضوع واقول واردد بان وزارة الداخليه لم تحسب حساب هذا الكم الهائل من الوافدين ولم تقم بتوظيف وتجنيد عدد كاف من رجال الامن والشرطة لتحقيق النظام والاستقرار المروري .


واترككم مع الصور اللي سنحت لي الفرصة وصورتها بنفسي ، واسف اذا ماكانت واضحه لأن التصوير تم عن طريق التلفون :

هذه الصور لباص مجنون يتسابق مع الشوارع والأرصفه وحتى الحفريات لم تسلم منه
http://www.doha-qatar.net/doha2006//Qatar/DSC00231.jpg

http://www.doha-qatar.net/doha2006//Qatar/DSC00235.jpg

http://www.doha-qatar.net/doha2006//Qatar/DSC00236.jpg


وهذه الصورة لسيارة لكزس فورويل رقمه سبشل في اللاند مارك وواقف في مواقف المعوقين الحمدلله والشكر ( معوق نفسي ) مع العلم ان نص المواقف في ذاك اليوم فاضيه واللكزس ماعليه ستيكر المعوقين وانا شفت الرجال لما وقف ونزل هو وربعه وكلهم مافيهم الا العافيه والرقم ماطلع في الصورة بسبب الفلاش .
http://www.doha-qatar.net/doha2006//Qatar/DSC00150.jpg

وهذا الحادث صار امامي في منطقة سيلين ، بين مقيم ومواطن في عز شبابه وكان المقيم يحاول تقليد الشباب المتهورين ، وبينما كان يحاول يستعرض عضلاته دعم الشاب اللي كان واقف في سبحانيته
http://www.doha-qatar.net/doha2006//Qatar/DSC00179.jpg

http://www.doha-qatar.net/doha2006//Qatar/DSC00180.jpg

والاخ هذا كان يحسب ان السيارات اللي سعرهم فوق المليون ريال ثابتين في المطر ، وهو سعيد لوقوع الحادث لان ابوه شرا له بنتلي 2007 من بدال الـ 2005 .
http://www.doha-qatar.net/doha2006//Qatar/DSC00027.jpg

واخيراً بيك اب قاطع اشارات السودان وكان قادم من اتجاه استاد خليفة الدولي ، وكان السائق والراكب مصريان الجنسيه ومستجعلان لان كانوا معزومان على حفل زفاف احد اقاربهما حسب كلامهم للشرطة ،، للأسف الشرطه منعوا التصوير في ذاك اليوم لكن صورت السياره عند حجز سيارات بوهامور
http://www.doha-qatar.net/doha2006//Qatar/Untitled-1.jpg

مع تمنياتي للجميع بالوصول الى منازلهم سالمين

واسمحوا لي على الاطالة

[ارستقراطي]

السلام عليكم

اولا احييك على اختيار الاسم لانه لشيخ ومجاهد من مجاهدين هذه الامه نسأل الله ان ينصره ويحفظه

ثانيا شكراً لك على هذا الموضوع والصور

بالنسبه لصلب الموضوع التجاوزات كثيره وشهدتها البلاد في الثلاث سنوات الاخيره اقصد كثرت في الثلاث سنوات الاخيره بشكل ملحوظ نسأل الله السلامه

ومن هذه الاسباب واهمها التطور الحاصل في البلد من مشاريع ووو الخ

لكن وبكل اسف بالنسبه لرخص القياده هي سهله عندنا بعكس الدول المجاوره يعني عندك واسطه تمشي هنديك وغيره من مكفوليك وهذا مايتسبب في التجاوزات والحوادث

يعطيك العافيه على الموضوع

[لمت داون111]

لاحول ولا قوه الا بالله علي هالحوادث المرعبه .. والله يحفظنا وياكم يالغالي

بدايه اخوي .. اشكرك علي طرح هالمشكله الي فعلا اصبحت هاجس لنا في مشوارينا اليوميه

والمشكله مب في المرور والتحريات بس .. مع العلم انهم ماعادو نفس قبل .. المشكله بسواقه واخلاق شبابنا .. او بالاحري عدم وجود الاخلاق بأغلب بشبابنا !!

اصبح التهور والطيش من افضل الصفات في شبابنا وللأسف صار في بناتنا بعد !!

لدرجه انه حزات اكون طالع من البيت بحالي .. شوي الا واحد جاي جنبي يبي يسابق .. والله علي طول اوقفه اقوله انت شايفني مسرع ؟ شايفني مركب هيدرزات وخرابيط عشان تبي تسابق؟ يقول اسمحلي الشيخ ويروح .. ياخي انا مابي اسمحلي مالتك هذي .. ليش ماتحترم نفسك وتكون بحالك بدال ماتجيك كلمتين تهزء وتجيب الكلام لنفسك؟:con2:

طبعا وعلي طبع البنات الجديد الي تعودو لما يشوفون واحد جاي مسرع علي الخط اليسار .. يناحسون ولا يوخرون له وهم يطالعونه بالمنظره .. طيب الي مسرع وجاي طيران وبالقطري الفصيح ( اثول ) ليش هي تصير مثله وتناحسه ؟ فرضا دعمها ؟ او شطف لها ؟ او دخلها رصيف ؟ في شباب وايد منعدمين الرجوله وعادي عندهم يسوون هالحركات وشوفت عيني يسونها في بنات .. والبنت بتخاف وبتفتر عليها السياره ويصير لها حادث او شي لاسمح الله .. يعني هم ماخذين لياسين عشان يناحسون بعضهم ويتافخرون في قله الادب مابينهم !! والله مايسوي علي البنت هالنحاسه انها تتعامل مع واحد منحط جذي:court:

ومرورنا حدث ولا حرج .. شاطرين بس عند الدواوير تسجل ارقام بألي رابط حزام وألي مركب مخفي .. ولين مرت عليهم سياره مسرعه او حد مركب هيدرز خلوه بحاله وسجلو رقمه .. والمفروض يلحقونه ويوقفونه ويسحبون سيارته نفس النظام القديم .. والله يتأدبون ويتعلمون الادب حتي لو شوي !!

واخيرا .. الله يكافينا واياكم الشر ويحفظنا من كل مكروه ..

وتسلم علي طرح هالموضوع اخوي العزيز بن لادن :)

[السديم]

لاحول ولا قوة الا بالله العلي العظيم ..

صور الحوادث جد تعور القلب نسأل الله السلامة ..

اما بخصوص التجاوزات اخي بن لادن فحدث ولا حرج .. ومثل ماقلت اكبر فئة هم الاجانب والمقصود بهم السائقين والعمال وفئة الشباب المراهقين .. طيب والشباب عرفنا لهم تهور وطيش وجنون السرعه ..
والهنود والعمال يبي يخلص شغله وبس ماعليه السيارة تكسرت تكنسلت الرصيف احترق هو مب دافع من جيبه شي والله لو يدفعون كل واحد يخالف المبلغ الفلاني ولو يصير تطبيق قانون انك يا فلان شفت مخالفة بعينك صورها بكاميرا جوالك وجيبها لنا احنا المرور وبنتصرف ويتخذون اجراء تأديبي بنشوف العالم تسنعت ..

ارجع واقول عندنا نهضه كبيرة وعندنا تطوير هائل ولكن للأسف بشكل عشوائي :confused:

اسمح لي على الاطالة ..

[alwahesh]

يعطيك العافيه على الموضوع

[شقردي قطر]

تسلم على الموضوع

[ANONYMOUS]

الموضوع ذو شجون

[أحمد اليافعي]

حبيت اضيف شي ان نسبة الوفيات العام الماضي تجاوزت الميتين وفيه ... بسبب حوادث السيارات
يعني تقريبا حالة وفاة كل يوم ونص ... :)

[khaldoon]

لاحول ولا قوة الا بالله العلي العظيم ..

[التيما]

يسلمووووووووووو عالموضوع فعلا ومع اني اول ويمكن الوحيده المخالفه لقوانين المرور في المنتدى لكن هاي ما يمنع اقول للغلط غلط وصورك ابلغ دليل يسلمووو عالصور

[لمت داون111]

يسلمووووووووووو عالموضوع فعلا ومع اني اول ويمكن الوحيده المخالفه لقوانين المرور في المنتدى لكن هاي ما يمنع اقول للغلط غلط وصورك ابلغ دليل يسلمووو عالصور
الله يحفظج والله يا التيما

[أحمد اليافعي]

الاحصائية بالضبط 270 حالة وفاة العام الماضي 2006م في قطر .. اغلبهم من الشباب مب حراااااااااااااااااااااام اللي قاعدين يسوونه شبابنا بسبة السرعه والاهمال وعدم الالتزام بقوانين المرور ؟؟

[وطن]

لي عودة لقرآة الموضوع والردود :)


متابعة

[بن لادن]

مرحبا اخواني وتسلمون على المشاركة في الموضوع


السلام عليكم
اولا احييك على اختيار الاسم لانه لشيخ ومجاهد من مجاهدين هذه الامه نسأل الله ان ينصره ويحفظه
ثانيا شكراً لك على هذا الموضوع والصور
بالنسبه لصلب الموضوع التجاوزات كثيره وشهدتها البلاد في الثلاث سنوات الاخيره اقصد كثرت في الثلاث سنوات الاخيره بشكل ملحوظ نسأل الله السلامه
ومن هذه الاسباب واهمها التطور الحاصل في البلد من مشاريع ووو الخ
لكن وبكل اسف بالنسبه لرخص القياده هي سهله عندنا بعكس الدول المجاوره يعني عندك واسطه تمشي هنديك وغيره من مكفوليك وهذا مايتسبب في التجاوزات والحوادث
يعطيك العافيه على الموضوع

اخوي دمعة العاشق انا احييك على مشاركتك الفعاله وانا معاك في موضوع ان رخص القيادة صارت تنعطى بالواسطة وخصوصاً للبنات ، والاختبار النهائي ينحصر على الاختبار العملي وليست على الاختبارات النظرية ، مع ان الاختبارات النظرية اهم من العملية لان السائق يتعلم فيها سلوك وقوانين ومخالفات المرور ، وبالذات للوافدين ياخوي ، لان معظمهم ماركبوا سيارات ولا ساقوا في حياتهم ، اما بالنسبة لدول الخليج الثانية فاختبارات السواقة فيتم التركيز على الاختبارات النظرية قبل اختبار السواقه العملي ، وفي الامارات العربية المتحدة وبالذات في امارة دبي فيعطون اسألة عن المناطق ومخارجها وكيفية الوصول اليها ، لان الشخص اللي مايعرف وجهته ، يفقد التركيز في الشارع مما يؤدي الي الانعطافات المفاجئة .



لاحول ولا قوه الا بالله علي هالحوادث المرعبه .. والله يحفظنا وياكم يالغالي

بدايه اخوي .. اشكرك علي طرح هالمشكله الي فعلا اصبحت هاجس لنا في مشوارينا اليوميه

والمشكله مب في المرور والتحريات بس .. مع العلم انهم ماعادو نفس قبل .. المشكله بسواقه واخلاق شبابنا .. او بالاحري عدم وجود الاخلاق بأغلب بشبابنا !!

اصبح التهور والطيش من افضل الصفات في شبابنا وللأسف صار في بناتنا بعد !!

لدرجه انه حزات اكون طالع من البيت بحالي .. شوي الا واحد جاي جنبي يبي يسابق .. والله علي طول اوقفه اقوله انت شايفني مسرع ؟ شايفني مركب هيدرزات وخرابيط عشان تبي تسابق؟ يقول اسمحلي الشيخ ويروح .. ياخي انا مابي اسمحلي مالتك هذي .. ليش ماتحترم نفسك وتكون بحالك بدال ماتجيك كلمتين تهزء وتجيب الكلام لنفسك؟:con2:

طبعا وعلي طبع البنات الجديد الي تعودو لما يشوفون واحد جاي مسرع علي الخط اليسار .. يناحسون ولا يوخرون له وهم يطالعونه بالمنظره .. طيب الي مسرع وجاي طيران وبالقطري الفصيح ( اثول ) ليش هي تصير مثله وتناحسه ؟ فرضا دعمها ؟ او شطف لها ؟ او دخلها رصيف ؟ في شباب وايد منعدمين الرجوله وعادي عندهم يسوون هالحركات وشوفت عيني يسونها في بنات .. والبنت بتخاف وبتفتر عليها السياره ويصير لها حادث او شي لاسمح الله .. يعني هم ماخذين لياسين عشان يناحسون بعضهم ويتافخرون في قله الادب مابينهم !! والله مايسوي علي البنت هالنحاسه انها تتعامل مع واحد منحط جذي:court:

ومرورنا حدث ولا حرج .. شاطرين بس عند الدواوير تسجل ارقام بألي رابط حزام وألي مركب مخفي .. ولين مرت عليهم سياره مسرعه او حد مركب هيدرز خلوه بحاله وسجلو رقمه .. والمفروض يلحقونه ويوقفونه ويسحبون سيارته نفس النظام القديم .. والله يتأدبون ويتعلمون الادب حتي لو شوي !!

واخيرا .. الله يكافينا واياكم الشر ويحفظنا من كل مكروه ..

وتسلم علي طرح هالموضوع اخوي العزيز بن لادن :)

مرحبا اخوي لمت داون 111 ، اشكرك على مشاركتك في الموضوع ، وموضع ان في شباب يلفون على البنات ذكرتني بقصة حدثت سنة 2000 على طريق الوكرة لما كانوا بنات قطريات راجعين بيوتهم على الساعه 10 فالليل وكان في جيب شيروكي يتحرش فيهم وفالنهايه تجاوزهم بسرعه وخافت الأم اللي كانت اتسوق وحاولت تتحاشاه وادعمت الرصيف وانقلبت سيارتهم وانا كان بيني وبينهم حوالي 300 متر ، لكن للأسف ولين اليوم اذكر الحادث كأني اشوفه الحين جدامي ، الخلاصه ان الأم توفت مع ثلاث من بناتها واللي اسلمت وعاشت بنت وحده فقط . ولين اليوم محد قدر يعرف من هو اللي لف عليهم وتسبب في قتلهم ، وانا حاولت الحقة لكن سيارته كانت اسرع من سيارتي وبعدين ضيعته وفي نفس الوقت كنت افكر في الكامري واللي فيها ايش صار فيهم ، يوم رجعت كان عدد اللي واقفين حوالي 4 اشخاص يجهلون مايفعلونه ومنصدمين من الحادث ، وكانت جثة احدى البنات على الشارع ، وانا شهدت على الحادث وعطيت معلومات عن السياره اللي كانت جيب شيروكي موديل 1999 او 2000 لونه احمر ، لكن للأسف ماقدرت اسجل رقمه . مع العلم ان في ذاك الوقت كان الوقت متأخر ومن الساعه 9 تبتدي تنقرض السيارات من الشوارع وكانوا الأباء ينطرون اولادهم بخيازرين عند الباب اذا مارجعوا قبل الساعه 10 ، لكن صج كان حادث مروع راح ضحيته أم لأرمع ثلاث من بناتها في سن الزهور ، وراحوا بسبب شخص منحط اخلاقيا وأهله ماربوه . ( لكن الطريف في الموضوع اني توقفت من قبل شرطة المرور لأشتباههم فيني ولأني الوحيد اللي شاهد على الحادث ، ولكن الحمدلله ان البنت رجعت للوعي في نفس اليوم وبعد ساعتين من الحادث وقالت كل التفاصيل للشرطة وتم اخلاء سبيلي بعد الحادث بثلاث ساعات ) :) .



لاحول ولا قوة الا بالله العلي العظيم ..

صور الحوادث جد تعور القلب نسأل الله السلامة ..

اما بخصوص التجاوزات اخي بن لادن فحدث ولا حرج .. ومثل ماقلت اكبر فئة هم الاجانب والمقصود بهم السائقين والعمال وفئة الشباب المراهقين .. طيب والشباب عرفنا لهم تهور وطيش وجنون السرعه ..
والهنود والعمال يبي يخلص شغله وبس ماعليه السيارة تكسرت تكنسلت الرصيف احترق هو مب دافع من جيبه شي والله لو يدفعون كل واحد يخالف المبلغ الفلاني ولو يصير تطبيق قانون انك يا فلان شفت مخالفة بعينك صورها بكاميرا جوالك وجيبها لنا احنا المرور وبنتصرف ويتخذون اجراء تأديبي بنشوف العالم تسنعت ..

ارجع واقول عندنا نهضه كبيرة وعندنا تطوير هائل ولكن للأسف بشكل عشوائي :confused:

اسمح لي على الاطالة ..

هلا اخوي السديم ، واشكرك للمشاركة في الموضوع ، اخوي مثل ماتفضلت الاجانب مب دافعين شي من جيوبهم ولاتهمهم أملاك الدولة ، ولالالالا تحاول انك اتنبهه ، قسم بالله انه مستعد ينزل لك ويتناشب معاك ومستحيل تقنعه انه غلطان وابسط رد يعطيك اياه ( ياخي مافي غيري فالشارع ) ، يقصد ان انا مالقيت غيره اتبلى عليه ... ولاتتصل حق الشرطة واتبلغ عنه ، لأن راح يضيع عليك اليوم والدورية لين الحين مب حولك وهي في بلاد وانت في بلاد ثانيه ، وفالنهاية راح يقولون لك خله يروح وتعال المركز واكتب فيه تقرير واحنا راح نتصرف معاه ، طيب ولين متى مع التقارير ورايح جاي من مركز لين مركز ؟ ليش مايكون في كل منطقة دوريتين او سيارة تحريات واتطبق القوانين واللوائح المرورية ؟



حبيت اضيف شي ان نسبة الوفيات العام الماضي تجاوزت الميتين وفيه ... بسبب حوادث السيارات
يعني تقريبا حالة وفاة كل يوم ونص ... :)

الاحصائية بالضبط 270 حالة وفاة العام الماضي 2006م في قطر .. اغلبهم من الشباب مب حراااااااااااااااااااااام اللي قاعدين يسوونه شبابنا بسبة السرعه والاهمال وعدم الالتزام بقوانين المرور ؟؟

اخواني تسلمون على المشاركة واعطاء هذه الأحصائيات ، كم منا فقد قريب او صديق في حادث أليم وشارك في دفنة وشاف سيارته والدم ملطخ فيها ؟ أتمنى ان هالارقام اتقل ويخف تهور الشباب ، ومن شهر تقريبا اتصل رجل ( لوطني الحبيب صباح الخير ) وكان يشتكي على ادارة المرور ، تتوقعون ايش كانت الشكوى ؟ ( يقول ان ولده كان يشاهد استعراض للسيارات وكان هو احد الجماهير فقط ولم يشارك فالاستعراض ، وان المرور احجزوا سيارة ابنة شهر ) ،،، ياخي من بدال لاتمسك ولدك وتنصحه واتعلمه الصح والغلط جاي يشتكي عليهم !!! ياخي خله يتأدب ويستاهل ،، يمكن يتعض والله يهديه ويخاف ويعرف عواقب التجمهر ،، انا حطيت صور لواحد كان في سبحانيته واندعم أثر استعراض في منطقة سيلين وهو واقف ..




يعطيك العافيه على الموضوع


تسلم على الموضوع

الموضوع ذو شجون

لاحول ولا قوة الا بالله العلي العظيم ..

لي عودة لقرآة الموضوع والردود :)

متابعة

alwahesh ، شقردي قطر ، شنو يعني سعر الدعم ، khaldoon ، وطن
شاكر لكم على مروركم .



يسلمووووووووووو عالموضوع فعلا ومع اني اول ويمكن الوحيده المخالفه لقوانين المرور في المنتدى لكن هاي ما يمنع اقول للغلط غلط وصورك ابلغ دليل يسلمووو عالصور

مرحبا وتسلمين على المرور لكن للأسف مب فاهم شتقولين ، شنو يعني ( لقوانين المرور في المنتدى ) ؟؟ المنتدى فيه قوانين مرور ؟ وشنو يعني ( صورك ابلغ دليل ) تقصدين اكبر دليل ؟ :confused:

مع تحياتي للجميع