يا أهل الخبره ..... ممكن رأيكم ومشورتكم في موضوعي ؟؟؟

[غنيمه]

السلام عليكم ورحمة الله وبركاته

أخواني الأعزاء أعضاء منتدى شبكة الأسهم القطرية

أنا بصراحة موظفة وصار لي أللحين تقريبا خمس سنوات ماقدرت أوفر ريال واحد من المعاش :confused:


لاتقولون ان هذا كله بسبب التبذير لا والله ولكن بسبب المسؤوليات الملقاة على عاتقي وبسبب السلفيات التي اضطرتني الظروف للاقتراض من البنوك وهذا الراتب كله ضايع بين مصروف البيت والسلفه ومايبقى الا القليل اللي ممكن يكون مصروف يمشي حالي حتى آخر الشهر .

المهم أنا فكرت وقلت لابد من وجود حل .... أنا ماأتخيل عمري كله يروح وأنا مثل الطاحونة اللي مايبقى لها شي .. علشان كذا قلت ليش مااحاول اشوف لي مشروع صغير يكون مصدر ثاني للدخل ... لأن الراتب مايكفي ..... أنا أشوف الناس طايحين في الشاحنات وهي بتكون مصدر ثابت للدخل من غير مايكون علي أي شي لان بعض الشركات تتكفل بالسائق وتصليح الشاحنة وكل مستلزماتها .

فقلت لو ضغت على نفسي شوي وقدرت أوفر قيمة شاحنة ..... هناك بعض الأشياء التي أجهلها مثل النوعية المطلوبة من الشاحنات ، والموديلات المرغوبة ، وحتى لو وفرت هذا الشاحنة ... ماهو الضمان إني راح أحصل شركة تشغل الشاحنة ؟؟؟؟

صدقوني اتعبني التفكير وقلت مافيه إلا استشارة أخواني في المنتدى .... والله يجعل في مشورتهم كل خيرر .


والله يعطيكم العافية ..... وأنا في انتظار ردودكم .

[البطرانة]

احسن شي اتسوينه انج اتفكرين فشي يزيد مدخولج...

وانشالله الشباب بساعدونج...

وبالتوفيق انشالله...

[غنيمه]

مشكوووووووووووووره أختي البطرانه وماقصرتي


انا أفكر أني أزيد مدخولي .... بس وشلون ؟؟؟؟


انا أنتظر أهل الخبره وان شاء الله مايقصرون :nice:

[ورقــة أمــل]

الشاحنة يبيلها مبلغ كبيرر
وحد علمي ان انتي ماعندج شي
بالتالي بتاخذين سلفه ثانيه
وبتزيد ديونج
وغير ان الشاحنة يبيلها متابعه
انا ماشوفها شغله تصلح حق بنات
ممكن تتاجرين في اشياء بسيطة مثل بعض الحريم
عطورات وساعات وهالشغلات وبعدين تشوفين شي اكبر
والله يعينج حاولي انج ما تقترضين الديون تكسر الظهر

[مستثمر 999]

اختي الكريمه فكري في اي مشروع يخص النساء اما الشاحنات صارت موضه قديمه ومب بالسهوله الي تتوقعينها وخاص نوع الشاحنه وموديلها الخ الخ .

وبكل سهوله يمكن ينظحك عليج ويبيعونج شاحنه مقلوبه لان خلاص الشاحنه اذا صار عليها حادث ما اترقع ولا تصلح للاستخدام ترد تنقلب وبدون سبب .

واذا عندج 300 الف ريال انا اقترح عليج تبيعين اي شي وعلى الحريم مثل الاكسسوارات او الملابس الداخليه الراقيه والمثيره او على الاقل صالون نسائي

وتحياتي

[غنيمه]

مشكوووووووور أخوي q44_على النصيحة


كلامك صحيح أني أبي أخذ سلفه ثانيه على السلفة الأوليه :looking:


على الاقل العائد اللي ممكن تدخله الشاحنة راح يسدد أقصاد السلفية واذا زاد شي خيررر وبركة .


وحتى البضاعه اللي تختص بالحريم يبيلها فلوس :D

يعني السلفيه شر لابد منه :looking:

[غنيمه]

مشكووووووووووور أخوي مستثمر ... وان شاء الله منت مقرود :app:


أما عاد يبعوني شاحنة مقلوبة :looking:


طيب البضاعه النسائية يبيلها محل .... والمحل أجاره مايحتاج .... ويبيله عامل بمعاش ... هذا غير الكهرباء والماء <<<< إذا كان فيه ماي :D


تدرون الظاهر إني ممكن اشتري بضاعه وابيعها في بيتنا :app:

[كيان]

اختي السلام عليكم اولاا بعدين ترى اذا بتأجرينها على شركه ولا شي ترى العقد مب اكثر من 3 سنوات بس ومعظم الشركات يبون شاحنات جداد وانتي احسبي اذا بتاخذين سلفه حق الشاحنه كم فوايدها وكم وكم غير انها عقب تقدرين ادخلينها مكان ثاني ؟؟؟؟ ...

[غنيمه]

جزاك الله خيرررر أخوي كيان


ياربييييييييييييه هذي كلها عيوب الشاحنات :looking:


طيب ليش كل الشباب جازفوا واشتروا شاحنات .... ويدورون لها بالحلاوه ويالله يحصلونها ؟ :con2:


وخصوصا الشاحنات اللي تعرض للبيع مع عقودها ..... مع اني اشوف الشاحنات اللي معروضه للبيع مع العقود في المنتدى مدخولها أقل بكثير من المدخول اللي اسمع عنه برى المنتدى ..... زميلاتي يقولون بعض الشاحنات تدخل خمسين ألف في الشهر :looking:


ماادري صج والا مبالغ فيه هالرقم ..... يوم قالوا لي خمسين ألف انصرعت من المبلغ :eek2:

وقلت معقوله هذا مدخول الشاحنات ؟؟؟؟ :looking:


علشان كذا قلت اسأل الرجال اللي ممارسين لهذا المجال .... والحريم اللي عندي أكيد يقولون هذا الكلام وهم مايدرون إذا كان صج والا لاء .

[بطران]

سئليني انا تبهدلت ابي ادش مشروع بالشاحنات ...

في مليون الف موديل للشاحنات سطحه وقلاب وراس وشويل ومدري شو وغير الدناكر الي تيج مقاسات لا صارت ولا استوت صراحه عوار راس ...وغير الاسعار الخاليه يعني عاادي الراس ب 250 الف .. واذا وفرتي هالمبلغ فكري من وين بتيبين العقود الي تناسبج !!

انتي تبين تاجرين اكيد وكلشي عليهم ..صيانة الشاحنه الحوداث مسؤوليتهم السايق عليهم ...
ومن كلامج ان صعبه ف اقولج وخري عن هالمشروع لان خسايره اكثر من منافعه لازم الواحد يدخل عنده كااااااااش وعالاقل اربع شاحنات ويكون ضامن العقد يعني يشتري ويوقع ويقبض:)

سوي مثلي ريحت مخي البيزات الي ابي اشتري فيهم شاحنات ..رحت شريت لي استيديو من مشروع اللؤلؤه ب 621 الف مساحتها 50 تقريبا ... واذا ابي ابيعها بتوصل مليون تقريبا ... اشوف العقار اضمن واريح للبال ... واذا حالتج صعبه وتبين تدشين استثمار اللؤلوه لا تاخذين بروحج وتحطين ديون على عمرج ...حطيه.. عيالج اخوانج عيال عمج الي هو تشترون وتنسون وبيعوها ووزعوها بالنص بعد مايرتفع سعرها

[غنيمه]

مشكوووووووووووووور اخوي البطران


وجزاك الله كل خيررررر


بصراحة اسأل مجرب ولا تسأل طبيب ..... انت معك حق ان العقار اضمن بس أللحين مايقدر
على العقار الا الهواميررر :app:

الله ماكتب لي اني اشتري قبل لا ترتفع الأسعار يوم كانت الأراضي بالثلاثينات والخمسينات والارض الكبيره توصل الميه ألف:confused:

علشان كذا اشوف العقار من سابع المستحيلات crazy

طيب ماعندكم مشاريع بسيطة ورأس مالها بسيط ممكن يستفيد منها ؟؟؟ :app:

انتواماقصرتوا ... ذكرتوا لي البضاعة النسائية <<<< وانا افكر فيه حاليا :con2:

أما بالنسبة للصالون <<<< ماعندي خبره أبدا في مجال الصالون :funny:


وننتظر المزيد من أرائكم الغالية :app:

[الحلال فقط]

يقولون المطابخ الشعبية ارباحها جيدة خاصة بعد فترة من العمل وكسب سمعة بشرط يكون الطباخ جيد

[غنيمه]

مشكوووووووووووووور اخوي الحلال فقط :dance


يا عيني على الفكرة :strong


تدري ماجات على بالي فكرة المطابخ والاكلات :looking:


جزاك الله كل خيررررر ..... هذا مشروع وانضم لقائمة المشاريع اللي ممكن افكر فيها :nice:

[بو عمــــــر]

اختي انتي الحين سمعتي نصايح الشباب وانشالله يفيدونج بس باقي عليج انج تصلين استخاره اذا عزمتي الدخول في هذا المجال والله يوفق الجميع

[غنيمه]

بوعمر الله يجزاك كل خيرررر وماقصرت :shy:


الحمد لله رب العالمين ... الإستخاره في كل الأمور .... والخيرة فيما يختاره الله .


أنا أللحين أدرس كل مشروع يطرح وامكانية تنفيذه والارباح اللي ممكن احصل عليها منه .... والله يقدم اللي فيه الخيررر ....


بصراحة وبشكل عام ... انا فرحانه بإهتمامكم وردكم على موضوعي .... وإن دل هذا شي فإنه يدل على محبتكم لكل الأعضاء .... والنصيحة للكل .... سواء عرفتوه من خلال المنتدى أم لم تعرفوه ..... ما أقول إلا الله يعطيكم العافيه ولا يحرمني من أخوتكم ومن نصحكم .