المواقف المحرجة والمحرجة جدا" [الأرشيف] - منتديات شبكة الأسهم القطرية

مشاهدة النسخة كاملة : المواقف المحرجة والمحرجة جدا"

بوناصر-قطر

19-06-2007, 10:27 PM

السلام عليكم ورحمة الله وبركاته
الله يصبحكم بالخير
والله يمسيكم بالخير جميعا"

لابد ان يكون في حياة أي انسان مواقف محرجة وبعضها محرجة جدا" جدا"
ياريت نسمع ونشوف المواقف المحرجة اللي مرت على الأعضاء ونشوف شلون العضو او العضوة تصرفوا معاها

شرايكم في الموضوع؟

البداية من عندي آنا

بوناصر-قطر

19-06-2007, 10:27 PM

بسم الله

في سنة 1988 سافرت في رحلة علاجية مع الوالد الله يرحمه ويغفر له الى الإتحاد السوفيتي قبل الإنهيار الرحلة اجمالا" كانت زينة الا من الموقف اللي صادني

سافرنا الى الكويت لأخذ تأشيرة دخول للاتحاد السوفيتي المهم انه التأشيرة كانت عبارة عن دفتر يتكون من أربع صفحات من هالصفحات صفحة تحتوي على الصورة الشخصية لطالب التأشيرة

عطونا التأشيرات والأمور سارت على مايرام
سافرنا من الكويت لألمانيا قعدنا كم يوم ومنها انطلقنا الى موسكو
وصلنا موسكو ودخلنا مبنى المطار وعند الجوازات بدأت الأحداث
كوني متكلم زوين في اللغة الانجليزية خذت الجوازين والتأشيرتين وأعطيتهم للضابط اللي على الكاونتر على أساس انه بيسأل عن شيء او ماشابه
آشوفه حذف جوازي على صوب وختم جواز الوالد الله يرحمه وقال له يتحرك كونه خلصت اجراءاته
قمت هاجمته بسؤال وهو: وآنا؟ شنو وضعي
قال لي: I no speak English. wait a minute
قلت الله يستر شصاير بعد
قلت للوالد انت توكل على الله صوب الشنط لين آجيك
راح الوالد صوب لشناط ومن جهة ثانية جاني واحد يتكلم انجليزي وقال لي: تأشيرتك ناقصها ختم على الصورة ولازم جوازك ودفتر المرور يروحون للخارجية الروسية علشان يختمون على الصورة ومنها تقدر تدخل البلاد
قلت له شكثر وثت ياخذ هالموضوع. رد علي غير معروف احنا علينا نوديهم وعليك الانتظار
سألته وين بانتظرهم
رد علي انه يوجد فندق بقرب المطار ولازمني انتظر فيه لين تجي أوراقي
رجع لي الوالد مع المترجم اللي كان ينتظرنا وقال ان الأمور سهالات يروح الجواز والتأشيرة وتنرضخ الصورة بالختم المطلوب ويرجعون الأوراق بسرعة لاتخاف
قلت يالله أمري لله. يا يباه انت توكل على الله روح فندق وأنا آبشرك بيحطوني في فندق لين ترجع الأوراق
الوالد تحرك مع المترجم وآنا نادولي باص واثنين حرس معاي ركبوني الباص وتحرك الباص
تحرك الباص الى أن وصلنا الى مبنى عبارة عن 15 طابق تقريبا" أشر لي السايق وقال لي انزل
استقبلني شرطي من المبنى وركبني الأصنصير وخذني الى الدور اسلابع تقريبا"
وصلت الا ريسبشن وحذا الريسبشن مايقارب من 15 شخص من جنسيات متفرقة قاعد يطالعون تلفزيون واحد لكل طابق
عطوني المفتاح ورحت للغرفة ... حسيت بكتمه في الغرفة قلت بابطل الدريشة علشان تتهوى الغرفة
ايش تتوقعون صاير بالدريشة؟؟
مسكرينها بقفل كأنه مال الدكاكين هذولاك الحليين علشان الواحد مايفتح الدريشة
هنيه جاني الاعتقاد بل الجزم اني في سجن وليس في فندق
بدلت ثيابي وطلعت آفرج عن عمري وآشوف التلفزيون مع البقية
جاء وقت العشاء وعرفته بالصفارة اللي كأنه صفارة حكم كورة سألت اللي قاعد حذاي ايش السالفة قال لي العشاء

رحت العشاء وكان الحمدلله على النعمة شيء ماينأكل بالمرة .. شربت السوب وماي وقلت الحمدلله
رحت الغرفة ومن القهر نمت من الساعة 8:30 بتوقيتهم وماصحيت الا قريب الفجر
صليت العشاء وانتظرت الفجر وصليتها وقلت بارجع ارقد لأن الوضع ممل لآخر آخر درجة
عصرت عمري وبازوور نمت مرة ثانية
جينا للريوق
اول مانزلت قلت باشرب لي شاي يقند راسي حطيت سكر وكان عبارة عن قند سكر مكعبات جيت باحوس الشاي الا مكعبات السكر كأنها حجارة موب راضي تتكسر
قلت ياربي شهالحالة اللي آنا فيها وايش جايبني هالبلاد الكجرة هذي
قعت آحوس الشاي لين برد وآخرتها شربته وهو بارد ثلج ورحت فوق للعنبر:) قصدي الدور اللي آنا فيه
سألت الريسبشن ماوصلت أوراقي؟ قالوا لي لا ليلحين
أعلنوا عن رحلة الى موسكو بالباص واللي يبي يسجل اسمه فقفزت أول المساهمين في اعطاء اسمي جان يرضخون الباب في وجهي ويقولون انت لا
لأن أوراقك في أي لحظة ممكن توصل قلت معاليه راضي انها توصل وآنا برى قالوا لي لا يعني لا
فسويت للخلف دور وعلى التلفزيون امتع نفسي
لين جات الساعة 12:30 الظهر يالله يالله ياني الافراج وطلعت من عمارة بوزعبل على فندق كوزموس اللي آعتقد انه أكبر فندق في الدنيا

وتوتا توتا خلصت الحدوته

اسمحوا على الإطالة قلت أبي آحمسكم معاي علشان تشاركون أكثر

يالله من عليه الدور؟

الجني

19-06-2007, 10:49 PM

سنه من السنين تولعت بالنجارة و اشتريت عدة نجارة من مكينة تقطع الخشب و رندة صغيرة و خلافة

و سويت شوية ديكورات حلوة في البيت

و في يوم طلب ولدي مني اسوي له قفص طيور

قلت غالي و الطلب رخيص

و كان الوقت قيظ (صيف)

و اشتغلت على القفص في غرفة السايق وما كان عندي سايق ذاك الوقت

و يوم قربت اخلص القفص داخل الغرفة

ناداني الولد : يبه شلون بتطلع القفص برع الغرفة

طاحت المطرقة و المسامير من يدي و طحت على الأرض

في حياتي كلها ما ضحكت كثر ذاك اليوم

:D :D :D

بوناصر-قطر

19-06-2007, 11:17 PM

بوناصر-قطر

23-06-2007, 09:53 AM

شدعوه مافي المنتدى ناس طاحوا في مواقف محرجة غيري آنا والجني؟؟

والا انكم مستحيين

التيما

23-06-2007, 10:20 AM

اذكر مره في سفره من السفرات رحت الهند .. وانا طبع فيني احب البس لبس البلد الشعبي لو كان لبسهم يناسب .. والبس لكم بنجابي خخخخخخخخخخخخخ ويوم ردينا المطار هني الا ابوي ماخذ جوازي وجوازه وصوب الدخول واوقف مع ابوي ههههههههههههه الا يقول لي الشرطي نو نو مافي مني .. طالعته معصبه .. ويطرش لي هندي يفهمني .. قعدت اضحك انا وابوووووووي وقلت له لا اخوي انا هني انا قطريه خخخخخخخخخخ ويطالعني جنه يتحمد بعيونه شمسويه بنفسج ؟؟ وانحررررررررررررررررررررررررررررررررررررررررر ج من قلب ..وما كفاني اللي صار الا اخواني وخواتي قطعووووووووني من قلب يالهنديه يالهنديه .. شفيكم خلكم ايزي ههههههههههههههههههههه

يسلمووووووو عالموضوع