بعنا وشرينا (9) حياكم [الأرشيف] - منتديات شبكة الأسهم القطرية

قطر

10-03-2005, 11:29 AM

السلام عليكم

اشحالكم

اليوم ماشركتكم وايد لاني ماحبيت احرق اعصابي بالاسعار

خصوصا ان اليوم ثالث يوم لمت داون لبعض البنوك :mad:

المهم

اللي لاحظته مقاومة العقارية مع اقتراب موعد الجمعية

والمتحده مع بيع اكثر من مليون سهم ... لم يتأثر بالمضاربة ظل يقاوم

السلام هذا السهم مقاوم بالفعل مع محاولات التنزيل ظل يجاهد :rolleyes:
ولازال اخضر اللون

في حين نرى الصناعات جريحه مع اكثر من 900 الف قتيل واكثر من 200 الف جريح انقذوا بأعجوبه
ولا يعرف مصيرهم الى الاحد

حشى معركة :D

ونرى وقود تتبعها في الكميات

ونرى الصمود وعدم التأثر في القطاع المحايد الا وهو التـــــــــــــــأمين

لاحظوا العامه للتأمين بتكسر حاجز 500 في هدووووووووووء

لانها بتوزع 50% اسهم مجانيه

زين المصرف بيوزع 50% اسهم واسلامي :confused: ليش ايحاولون اينزلونه

اقول تعبت من الموجز

نبدأ مع المستثمرين

من ايقولي عن اخباره ..... وعقب اذا حب يستفسر يسأل عادي

بس اول شي اخباره

تفضلوا المايك

boabdullah

10-03-2005, 11:37 AM

قطر ,,,,,أخوي مراحب ماشفتك اليوم ( على العموم أخوك بعد اليوم عنده كان صعب شوية ) المهم أنا شريت في المواشي باللمت داون ,,,,ومنتظرها الأسبوع الجاي أنشاءالله راح ترتفع ,,,,أخوي عندي أستفسار عن النقل ووقود شرايك فيهم بالمظاربة والأجل الطويل ,,,,,,,, أخوكم بوعبدالله

بوناصر1

10-03-2005, 11:39 AM

بصراحه انا عندي في العقاريه والله يشهد اني كنت حاس انه بيوصل لمت اب وبعت بلمت اب ومستاني اشتريه انشا الله يوم الاحد لاني حاس انه ما بيصك لمت اب من اول التداول وبعدين اغلاق اليوم الضاهر انه اقل من 171 يعني اذا وصل لمت اب يوم الاحد ما راح يوصل اكثر من السعر الي بعت فيه اليوم والحمد لله مره ثانيه على كل حال

THE END

10-03-2005, 11:40 AM

بشرى ساره تم شراء تقربيا 7500سهم من الصناعات واتوقع اللي يشتري بالسعر يعني بيكون هامور ولا انا غلطان ارجو التصحيح

نوكيا

10-03-2005, 11:43 AM

انا عن نفسي شريت في العقارية بسعر 169.50 لكن كميه قليله نحاول نعوض فيها
وبالتوفيق للجميع

THE END

10-03-2005, 11:48 AM

الله يوفقك انشاء الله نوكيا

المتحد

10-03-2005, 11:49 AM

انا كالعاده في المواقف المشبوهه.... اتم اتفرج بس

بس الي مونسني... المتحده تمت صاامده وبالنهايه انتفضت بعد :rolleyes:

هذا سؤالي لك اخوي قطر ...

شسالفتها ؟؟
وهل هذا الي توقعته لها من كلامك امس من ان مضاربين خليجيين يبون ينزلونها؟
انا مااعتقد هالشي...

صدقني .. وراها شي هالمتحده :cool:

العنان

10-03-2005, 11:52 AM

انا عن نفسي شريت في مواشي ب51 ريال تقريبا في بداية التداول وانشاء الله ترتفع الاسبوع الجاي احتى عقب شهر.. اشعنده المقاوم :)

boabdullah

10-03-2005, 11:57 AM

العنان ,,,,,,,,,,,,,,,أخوي,,, المواشي فيها طلب من أمس وحتى اليوم ,,بس اللي صار اليوم شي طبيعي لأن السوق نازل ,,,,,,أتوقع يوم الأحد في طلوع للمواشي ,,,,,,,,,,,ووتحياتي

قطر

10-03-2005, 11:58 AM

ماشالله منور المكان بمشاركاتكم

نبدا باسم الله

بوعبدالله

هلا بك والله اليوم انشغلت+ ماححبيت احرق اعصابي يااخي لي كم شركة اسعارها لمت داون وانا شاريهم بغالي :( الله كريم

مبروك على مواشي واتوقع يوم الاحد اتكون متذبذبه والله اعلم ... الا اذا ركدت نفوس الناس من الذعر ولم تقم بالبيع...

بالنسبة للنقل ... انا مااشوفه انلم مثل مايقولون ... لكن النقل كاستثمار قصير (أقل من شهرين جيد جدا)
خصوصا مع الاكتتاب المخفض اللي قالوا عنه ولاتنسى ان نسبة الاكتتاب فقط 17% من قيمة اسهمك الاجمالية يعني حط هذه النقطه في الاعتبار .... وعلى اساسها حدد الكمية المحتاجها... وعندك طريقة انك تكتتب بالربح اللي بتحققه كيف ؟؟ .. وهو انك تقوم ببيع بعض الاسهم التي تغطي تكلفة الاكتتاب بعد تاريخ استحقاقك للاكتتاب واعتقد بيكون يوم الجمعية ... وتكتتب به ... وبعدها تتخذ قرارك في الباقي...يعني مايحتاج اتخلي سيولة راكده عندك على عشم الاكتتاب.

بالنسبة لوقود لوتسأل الكل بدون منازع بيقولك سهم قوي .. وراجع قوائمه المالية وقارن بينه وبين الصناعات وضع نقطة ان وقود شركة لحالها في حين ان الصناعات مشتركة...

وقود باذن الله راح يرتفع ... وخصوصا ان العين عليه من كل صوب..

وياهلا بك

boabdullah

10-03-2005, 12:06 PM

قطر,,,,,,,,أخوي تسلملي على هذه النصائح ,,,,وصدقني أنا عيني على الوقود خاصة هذه الأيام بس أنتظر أستقرارها,,,,,,,,,وتحياتي

نوكيا

10-03-2005, 12:09 PM

جزاك الله خيييير اخوي قطر على توضيحك
بسألك عن العقارية؟؟
انا ناوي ادخل فيها وماطلع منها الا بعد دخول الاجانب شرايك
او انت تختار طريقه فيها للخروج منها
وكم تتوقع يوصل السهم بعد فتح السوق؟

قطر

10-03-2005, 12:09 PM

بوناصر1
مبروك على البيعه

بس ليش الله ايهداك خلاص جمعية العقارية مابقى عليها شي :confused:

باقي 5 ايام شيل منها الجمعة والسبت ويومين تداول الاحد والاثنين..ويوم ايقاف تداول الثلاثاء

لو كان السعر مثل ماتقول يوم الاحد هل تتوقع ان بيكون في عرض؟؟

لو نطرت يومين الله ايهداك لكن الخيرت فيما اختاره الله ... والحمدلله على كل حال..

هلا بك

المبتدئ :confused:
من وين هالاخبار؟
حتى لو شرا 7500 جريح من بشتري المليون اقصد 900 الف وشويات

ماقلت لنا اليوم ايش سويت؟؟

نوكيا

ممتاز ممتاز.... سعر جيد حاول اتزيد الكمية...

والله ايبارك لك فيه

المتحد
مركز على المتحده انت ايش قصتك كم مليون عندك فيها :D
امزح معاك

سالفتها مجموعة اشاعات .... وهي اللي اخر شي سمعته اليوم 100% راس المال .. طبعا انا مااصدق..

وسالفتها الله ايسلمك ان المتحده خذت لها مشروعات كبيره يعني جيده للاستثمار الطويل لو بتغمض عينك عن المضاربات..

ومجلس اذارتها على حد علمي مااجتمع ؟؟ طبعا انا مش من متابعينها الا من اسبوع لان مضارباتها خطرة

واذا جاني خبر ابلغك عنها على طول تامر...

العنان

مبروك الشراء... بس اكيد شريت في العشر الدقائق الأولى للسوق

ودائما يحذرون من هالوقت في الشراء خصوصا اذا كان السوق فيه توقعات نزول..

بس باذن الله ترتفع

وهلا بكم كلكم

قطر

10-03-2005, 12:18 PM

بوعبدالله

ترى سعر وقود اليوم كان حلوووو

واذا بينزل اكثر احلا والله

نوكيا
تسلم وحاضرين لكم

بالنسبة للعقارية

والله توقعاتي للسعر بعد السوق مااقدر اتوقع ومافي حد يقدر يعطيك توقع

سوقنا خالف كل التوقعات الفترة الماضية

بيع البعض واذا كان لك نظره في شركة اخرى بيع اللي ايناسبك وخل اسهم الاكتتاب لاستثمار طويل هذا رايي

:)

واشكركم على ثقتكم

العنان

10-03-2005, 12:24 PM

الله يبارك فيك اخوي قطر ,, ومشكور على تشجيعك :)

قطر

10-03-2005, 12:27 PM

حاضرين يا العنان وهلا بك

THE END

10-03-2005, 12:40 PM

انا متفرج اليوم لما يعتدل الوضع انشاء الله ونلحق على العقاريه باذن الله

قطر

10-03-2005, 12:44 PM

المبتدئ

الله ايوفقك يارب :)

THE END

10-03-2005, 12:45 PM

وياك وبفضل الله وتوجيهاتكم

نوكيا

10-03-2005, 01:05 PM

شكرا اخوي قطر على التوضيحات :)

THE END

10-03-2005, 01:10 PM

والاخ نوكيا ما نستغى عن خبراتك

ابوعلي اليافعي

10-03-2005, 01:56 PM

اخوي قطر ابشرك انا اليوم شريت فالمصرف عال438والدولي على ال389وكميه زينه..ابشرك اني ولله الحمد عمري ماخسرت فهالبنكين واتوقع يبدا طلوعهم القوي من يوم الاحد انشالله..اما عن سهم المتحده فالمتوقع انه يسوي اكتتاب والكلام انه بيكون 100%بس مافي شي مؤكد..بس في خبر عن المتحده مب حلو خلوني اتاكد منه الليله وراح اخبركم عنه..وشكرا للجميع

المسكين

10-03-2005, 02:05 PM

مرحبا شباب

ان عن نفسي شريت مواشي 3000 سهم على داون اليوم وناطرها يوم الاحد اذا داون شريت 3000 واذا ارتفعت بعت والا اشرايكم

إنتعاش

10-03-2005, 02:20 PM

والله بالنسبة لي

موقف الحقيقه

وقلت ياريتني بايع المصرف على 496 وارجع اخذه الحين

لكن مثل ما يقولون . . ارزاق والحمدلله على كل حال . .

وبغيت اخذ بالتحويليه اكثر لأنها اكثر عائد تقريبا على السعر السوقي بعد نزولها الحين

لكن شفت العرض كبير ولا في طلب

ففيه يعني اشاره إلى احتمال مواصلة النزول

ومن بعدها ناخذ لنا شوي

على فكره التحويليه بتوزع 20 % نقدا ً

المايك للي بعدي

الوهم

10-03-2005, 04:27 PM

انا شرريت المتحده اليوووم على 72

والحمدلله على كل حااال

قطر

10-03-2005, 07:12 PM

ابو علي اليافعي

بشرك الله بالخير وان شالله دخولك في السهمين بداية ارتفاعهم

بالنسبة للمتحده اذا كان الكلام صحيح بلغني تكفا ...

والخبر السيء بعيد ان شالله بس ايش هو؟

اقول بو علي الحين انتعاش بيفرح بدخلتك في السهمين واذا ارتفعوا لك حلاوة من انتعاش هههههه

دبسته فيه

====

المسكين هلا بك

اختيار جيد .... لكن لو خذت السلام كان افضل لك
وبالنسبة للافرج يعتمد هل تشتري الاحد او لا
اذا كان العرض كبير اعرف ان الاثنين بينزل وخلك معانا على الهواء في استوديونا يوم الاحد بتوقيت البورصة

وان شالله نفيدك يارب
عن البيع ماايد حد ايبيع شي الحين

==============

انتعاش انت قلت لو ... ولو تفتح باب الشيطان هههههههههههه
قول الحمدلله وموقعك سليم باذن الله بعد توزيع الاسهم

بس اللي شرا المصرف ب 495 ايش مسوي الحين ؟؟

الله ايكون بعونه

================

الوهم سعر جيد وكانت فرص لان تاخذ بسعر اقل

بس ان شالله فيها خير
ولاتبيع .... امسكها عندك نصيحه لين تستجد امور

:)

هلا بكم

من ايحب ايتكلم ؟؟

المايك معاك

قـطـريـه

10-03-2005, 10:34 PM

قطر

11-03-2005, 12:06 AM

السلام عليكم قطرية
اشحالج

ممكن اخذ المايك قبل بوعلي؟
دامج صابره كملي صبرج:)

او انج بيعي واشتري بالعقاريه خصوصا ان جمعيتها يوم الاثلاثا

والاختيار اولا واخيرا لج

هلا بك

ابوعلي اليافعي

11-03-2005, 12:17 AM

اخواني قطر وقطريه..الخبر الي سمعته اليوم لا تخافون ماله علاقه بنتايج الشركه بس واحد من الاخوان اتصل فيني وذكر ان الدكتور الغرداغي محرم التعامل في المتحده بسبب ان الفوايد الربويه عالشركه كبيره انا اليوم بعد المغرب اتصلت فيه للتاكد من تاريخ الخبر لان الشركه فعلا كانت فالماضي ممنوعه من التداول في الشركه الاسلاميه للاوراق الماليه وبعد ذالك تم السماح بتداولها فالشركه ..واتصلت فاحد الاخوان في الشركه الاسلاميه للتاكد من الخبر وذكر انهم لازالوا يتعاملون فالمتحده ولم يرد اليهم شي جديد..اعتقد بان تاريخ تحريم الشركه من الدكتور الغرداغي قديم .بس اتمنى اذا حد عنده رقم الدكتور يفيدنا بالاتصال به والتاكد من ذالك..ودمتم

قـطـريـه

11-03-2005, 12:25 AM

قطر مايسرك الحال من امس وانا فنجان قهوه رايح وفنجان جاي الحاله كسيفه
ماحب اللون الاحمر مع اني ريانه ماله علاقه :mad:

والعقاريه ان شاءالله الحق اشتريها قبل ماطير
تسلم على النصيحه
ابو علي جزاك الله كل خير على المعلومه والله يبعد عنا الحرام
لكن يجب على علماء الدين عند التحريم يقلون لنا ليش حرمو ويفندون لنا الاسباب
حتى نصل لدرجه القناعه,,,,,,,,,
ونهايه اسبوع جميله على الكل,,,,,,,,,,

الوهم

11-03-2005, 01:44 AM

خرعتني يابووعلي

نبي اخباره اتسر عن المتحده .. عشان ترتفع معنويااتي :)

_________________________________________________

ولايهمك اخووي قطر مانييب بايع

THE END

11-03-2005, 08:24 AM

ارجو الافادة عن المتحدة ويكون مصدر موثوق وين سمو الاخلاق بيعطينا الخبر الاكيد

classic2004

11-03-2005, 09:10 PM

السلام ..

انا شريت في المتحدة
السلام
مواشي
العقارية
الاجارة
مخازن

بس مدري احس اني تسرعت .. وخايفة

ابوعلي اليافعي

11-03-2005, 11:34 PM

السلام والمتحده والعقاريه لاتخافين منهم سيواصلون الارتفاع انشالله..الاجاره سهم استثمار ممتاز خاصه بعد اعلان ان الشركه حققت في شهري يناير وفبراير الي حققته طول العام الماضي من ارباح..واتوقع ان الشركه راح تواصل توزيع الاسهم المجانيه خلال العامين القادمين لحاجتها زيادة راس المال..بس فالقريب العاجل ممكن تنزل شوي..المواشي والمخازن لم يعلنوا حتى الان عن نتايجهم ولا يتوقع منهم الكثير...

قطر

12-03-2005, 12:20 AM

هلا بكم

ومساكم الله بالخير جميعا

بوعلي تسلم على معلوماتك ....

كلاسك ماشالله بس لوحطيتي ثقلج في شركتين ارباحهم معلنه اعتقد ان افضل

مثلا السلام والعقارية خصوصا في الوقت الحالي

:)

classic2004

12-03-2005, 01:17 AM

بو علي اليافعي ..

مشكور طمنتي الله يطمنك ..

يعني انت من رايك ابيع المخازن والمواشي ؟؟

اممممممم .. طيب انا وحدة مب مستعيلة على الربح كلش

يعني عادي عندي انطر شوي .. اي احسن ابيعهم لو ارتفعوا شوي واشتري فيهم السلام او المتحدة ؟؟

ولا اخليهم يمكن عل وعسى ..

قطر ...

انا توني مبتدئة وما مدري حسيت اني لو وزعت على كذا شركة بتكون خسارتي اقل
بس يوم دشيت المنتدى قريت موضوع الاخ عبد الله الهاجري عن ان المفروض الواحد يركز في شركتين او ثلاث بس عورني قلبي .. وقعدت اوسوس ..

ما اقول غير الله يستر .. :)
بالنسبة للعقارية انا خذت فيها كمية زينه ..
بس تحسفت اني ما خذت اكثر ان شاء الله الاحد باقدم لي على طلب

بس الصناعات سعرها قاعد ينزل فشاسوي
.. احط في الصناعات ولا في العقارية اي احسن ..؟؟؟

قطر

12-03-2005, 01:27 AM

هلا بج اختي

انا من احساسي العقاريه حاليا احسن
خصوصا عشان الاكتتاب الموجود بها

وسعرها بالنسبه للصناعات افضل

:)

classic2004

12-03-2005, 01:33 AM

مشكور اخوي ..

شورك وهداية الله .. العقارية :rolleyes:

:)

اللورد

12-03-2005, 02:10 PM

أخوي قطر وكل الأخوان الكرام
حبيت بكره اشتري ألإيجارة بسعر 67 للإستثمار الطويل والوقود 129 للإستثمار القريب يعني بعد 3 أسابيع ناوي ابيعه؟

مارأيكم؟

قطر

12-03-2005, 02:16 PM

اللورد مرحبا بك

اولا بالنسبة للاجاره انا اتوقع انها تنزل اكثر (مجرد توقع قد لايصدق)...
لان توزيعاته بسيطه جدا
لكن اذا بتاخذه وبتغمض عينك عنها اذا انزلت خذ ... وارى ان تنتظر لي ثبات السوق واخذها
لان الاجارة ارتفعت كثيرا.. واعتقد انها بترجع لاقرب حد من اسعارها سابقا..انتظر يوم الاحد وكن معانا على الهواء في برنامجنا الصباحي وكلنا بنشوف والاخوان اكيد بينصحونك هل تشتري او لا..

بالنسبة لوقود نعم انصحك ....
حتى لو كانت توزيعاته مش ولا بد لكن املنا في ارتفاعه كبير

والله ايوفقك:)

اللورد

12-03-2005, 02:22 PM

تسلم على الرد العقلاني المفيد وأشكرك عليه

طيب اخوي بالنسبة للعقارية هل تنصحني ببيعها حيث أني سعر الشراء كان 109 ريال ولا أنتظر الإكتتاب بالأسهم الجديدة يكون أفضل.

قطر

12-03-2005, 03:42 PM

حاضرين لك

سعراء الشراء عندك ممتاز جدا

فلماذا الاستعجال والبيع ؟؟ والارباح بعد يومين ؟؟

افضل انك تحتفظ بهم

وتحصل على الاسهم المجانية

واتبيع بقدر المخصص لك بالاكتتاب عشان تشتري بهم اسهم الاكتتاب

يعني ربحك بيجيب لك اسهم (الاكتتاب كاسهم مجانيه) ان شالله.

احتفظ بها فالجمعية يوم الثلاثاء

الا اذا كان الربح هذا يقنعك قول الحمدلله وبيع بس هل عندك هدف ثاني؟
:)

هلا بك

بوناصر-قطر

12-03-2005, 04:25 PM

الله يوفكم جميعاً ان شاء الله

اللورد

12-03-2005, 04:40 PM

مشكوووور اخوي قطر

ومانستغني عن مجهوداتك الطيبه في هذا المنتدى.

اللورد

12-03-2005, 05:20 PM

جبتها اخوي قطر
خلاص انا قررت انفذ كلامك وبكره بابيع جزء من اللي عندي اللي يغطي قيمة الأسهم للأكتتاب علشان تطلع عليي ببلاش......

يعطيك ألف عافيه ياخبرة المنتدى

إنتعاش

13-03-2005, 12:40 AM

هلا في الجميع في

موقع الجميع

وبرنامج الجميع :)

نظرا ً لأن المذيع العزيز وهقني في الاستوديو بروحي

ونظرا ً لاننا دخلنا في يوم جديد

الله يجعله خير علينا وعليكم اللهم آمين

و و و و

فيعني

شاكر لكم هالتفاعل الطيب

والتحاور الجميل

ونلقاكم في حلقتنا القادمه

ويالله

تصبحون على ألف خير :)