المساعد الشخصي الرقمي

مشاهدة النسخة كاملة : الأرملة والزواج


هسلان
09-09-2007, 09:43 PM
السلام عليكم ورحمة الله وبركاته

حبيت أناقش معكم قضية مهمة تهم شريحة كبير بالمجتمع وهي الأرمله والزواج
لنفترض أن هناك أمرأة عاشت معى زوجها حياة جميلة وكان الزوج نعم الزوج لم يظلمها يوماً أو يحرمها يعني امدللها . وقدر الله علية وتوفاه وترك لها خمسة أبناء كبيرهم شاب 18 سنة وصغيرهم 4 سنوات وترملت وهي في سن الأربعين

هل من حق هذه المرأة الأرملة الزواج برجل أخر
هل للابناء حق الرفض أو القبول
هل المجتمع يتقبل هذا النوع من الزيجات

طبعاً لا نختلف من الناحية الشرعية بأن لها الحق
نحن نتحدث عن قضية إجتماعية فقط
أسئلة تحتاج لنقاشكم المثري

تقبلو تحياتي
al_lord
09-09-2007, 10:02 PM
اعتقد انه من حق العيال الرفض لانه معلوم انها ستنشغل عنهم
كلاسيك للبيع
09-09-2007, 10:05 PM
من حقها ... وفي نفس الوقت مب من حقها.


انا برايي انه من حقها تاخذ رجال من العائله نفسها او من اصدقاء الزوج المقربين , واعتقد ان هالشي جائز في مجتمعنا .

ولكن مب من حقها اجتماعيا وضمن الاعراف التي قد تكون متعارف عليها ضمن جزء من المجتمع ان تتزوج احدا من خارج اطار المعرفه.
وما اعتقد ان اهلها وعيالها بيقبلون , الا اذا كانوا مب من القبائل الخليجية المعروفة, يعني ذوي اصول عربية او فارسيه.

وجهة نظر و رأي شخصي
مليت
09-09-2007, 10:07 PM
عموماً اكيد راح تلاقي شخص ما يبي اعيال من سنها او اصغر ولا مانع ان كانت ارمله ولديها اعيال بلعكس اريح له وخاصه لو كانت زوجه ثانية
هسلان
09-09-2007, 10:14 PM
من حقها ... وفي نفس الوقت مب من حقها.


انا برايي انه من حقها تاخذ رجال من العائله نفسها او من اصدقاء الزوج المقربين , واعتقد ان هالشي جائز في مجتمعنا .

ولكن مب من حقها اجتماعيا وضمن الاعراف التي قد تكون متعارف عليها ضمن جزء من المجتمع ان تتزوج احدا من خارج اطار المعرفه.
وما اعتقد ان اهلها وعيالها بيقبلون , الا اذا كانوا مب من القبائل الخليجية المعروفة, يعني ذوي اصول عربية او فارسيه.

وجهة نظر و رأي شخصي

أحترم وجهة نظرك
تقبل تحياتي
هسلان
09-09-2007, 10:16 PM
عموماً اكيد راح تلاقي شخص ما يبي اعيال من سنها او اصغر ولا مانع ان كانت ارمله ولديها اعيال بلعكس اريح له وخاصه لو كانت زوجه ثانية

حل من الحلول ليش لأ
شكراً لمرورك
هسلان
09-09-2007, 10:18 PM
اعتقد انه من حق العيال الرفض لانه معلوم انها ستنشغل عنهم

بس هي في الأربعين يعني في قمة العطاء ألا ترى أن الأولاد بيكونون أنانيين في قرار الرفض

تقبل تحياتي
التيما
09-09-2007, 10:34 PM
ليش شلي يمنع ؟؟ حتى عيالها حرام يمنعوها .. ليش هي مو بني ادم .. ليش هالطبع الاناني ؟؟ ياترى هالأنانية لانهم ما يبون بديل للأب ؟ ولا عشان المجتمع ما يرحم ؟ في كل الحالات .. في ذمتهم .. ياريت الواحد قبل ما يقول مايجوز ومن حقهم يمنعونها .. يحطون في بالهم ان في رب .. والله يحاسبنا .. لين اكبرت وكلهم تزوجو .. مع من بتم ؟

ليش تمنعون ما احله الله لا لسبب الا الأنانية .. استغفر الله العظيم صج ان القلوب تحجرت .. شمدخلني هالموضوع اللي يعصب مادري ..
هسلان
09-09-2007, 10:43 PM
ليش شلي يمنع ؟؟ حتى عيالها حرام يمنعوها .. ليش هي مو بني ادم .. ليش هالطبع الاناني ؟؟ ياترى هالأنانية لانهم ما يبون بديل للأب ؟ ولا عشان المجتمع ما يرحم ؟ في كل الحالات .. في ذمتهم .. ياريت الواحد قبل ما يقول مايجوز ومن حقهم يمنعونها .. يحطون في بالهم ان في رب .. والله يحاسبنا .. لين اكبرت وكلهم تزوجو .. مع من بتم ؟

ليش تمنعون ما احله الله لا لسبب الا الأنانية .. استغفر الله العظيم صج ان القلوب تحجرت .. شمدخلني هالموضوع اللي يعصب مادري ..

التيما أشربي ماي بارد وهدي ألأعصاب الموضوع مطروح للنقش بنشوف عدد المؤيدين والمعارضين وبنستشف الرأي الأقلب من الردود
تقبلي تحياتي
خالد العمادي
09-09-2007, 10:45 PM
من حقها ... وفي نفس الوقت مب من حقها.


انا برايي انه من حقها تاخذ رجال من العائله نفسها او من اصدقاء الزوج المقربين , واعتقد ان هالشي جائز في مجتمعنا .

ولكن مب من حقها اجتماعيا وضمن الاعراف التي قد تكون متعارف عليها ضمن جزء من المجتمع ان تتزوج احدا من خارج اطار المعرفه.
وما اعتقد ان اهلها وعيالها بيقبلون , الا اذا كانوا مب من القبائل الخليجية المعروفة, يعني ذوي اصول عربية او فارسيه.
وجهة نظر و رأي شخصي

انا اتفق معك يالعزيز في كل ماقلته ولكن اعتقد بأنك اخطأت بالنسبه لذوو الأصول الفارسيه لأن ذوو الأصول الفارسيه هم اهل قطر وهم العائلات المعروفه في البلاد وهم الأغلبيه ولهم اسمهم ومكانتهم في البلاد ولا اظن انهم يقبلوا بأي شي غلط لأنهم اكثر المحافظين والعارفين بالأصول واعتقد انك تقصد بعض القبائل العربيه التي جاءت الى قطر من الدول المجاوره هم اللي ممكن ان يرضوا بهذا الشي لأن اصلهم عربي مع مصري وسوري وغيره حيث ان اكثر هذه القبائل هجين الأب ماتعرف اساسه من اين والأم في الغالب مصريه والله اعلم
واتمنى ان نتقبل الحقيقه والواقع ولا نضحك على انفسنا
ملاحظه : انا كتبت بعض عشان افهمك ان اصابعك مش مثل بعض وانت عممت على كل ذوو الأصول العربيه غير الخليجيه وذوو الأصول الفارسيه .. وانا اقولك هذا لايجوز لأني لا استطيع ان اعمم على ناس لا اعرفهم
التيما
09-09-2007, 10:47 PM
التيما أشربي ماي بارد وهدي ألأعصاب الموضوع مطروح للنقش بنشوف عدد المؤيدين والمعارضين وبنستشف الرأي الأقلب من الردود
تقبلي تحياتي

والله اني قاعده اشرب عصير عشان اهدا.. المشكلة اني مو عارفة ليش معصبة :con2: يمكن لاني ماحب الظلم ولا ارضاه لحد :eek3: اسفه اني عصبت :p
هسلان
09-09-2007, 11:04 PM
والله اني قاعده اشرب عصير عشان اهدا.. المشكلة اني مو عارفة ليش معصبة :con2: يمكن لاني ماحب الظلم ولا ارضاه لحد :eek3: اسفه اني عصبت :p

طالما أنتي روقتي بسال سوأل
الأولاد طبعاً مش من حقهم الأعتراض . لكن ما تعتقدين أن الأم إذا تزوجة بتقصر فيهم خصوصاً إنها أصبحت الأم والأب في نفس الوقت
ما تعتقدين إنها بتكون أنانية تفكر بنفسها فقط

طبعاً هذا مش رأيي لكنه مطروح للنقاش
هسلان
09-09-2007, 11:09 PM
انا اتفق معك يالعزيز في كل ماقلته ولكن اعتقد بأنك اخطأت بالنسبه لذوو الأصول الفارسيه لأن ذوو الأصول الفارسيه هم اهل قطر وهم العائلات المعروفه في البلاد وهم الأغلبيه ولهم اسمهم ومكانتهم في البلاد ولا اظن انهم يقبلوا بأي شي غلط لأنهم اكثر المحافظين والعارفين بالأصول واعتقد انك تقصد القبائل العربيه التي جاءت الى قطر من الدول المجاوره هم اللي ممكن ان يرضوا بهذا الشي لأن اصلهم عربي مع مصري وسوري وغيره حيث ان اكثر هذه القبائل هجين الأب ماتعرف اساسه من اين والأم في الغالب مصريه والله اعلم
واتمنى ان نتقبل الحقيقه والواقع ولا نضحك على انفسنا

العائلات الفارسية تمتلك كم كبير من العادات والتقاليد الحميد ة
ولدي أصدقاء من هذه العائلات وأعتز بصداقتهم

أشكرك على مرورك الكريم
التيما
10-09-2007, 01:48 AM
طالما أنتي روقتي بسال سوأل
الأولاد طبعاً مش من حقهم الأعتراض . لكن ما تعتقدين أن الأم إذا تزوجة بتقصر فيهم خصوصاً إنها أصبحت الأم والأب في نفس الوقت
ما تعتقدين إنها بتكون أنانية تفكر بنفسها فقط

طبعاً هذا مش رأيي لكنه مطروح للنقاش

عمر الام ما تكون انانيه .. وعمرها ما تفكر بنفسها بس .. حتى في زواجها فكرت في اعيالها .. وليش تقصر اصلا الزوج اكيد عارف انها ارمله وعليها اعيال .. ويتامى .. انا ضد حرمان الانسان يقضي عمره .. وانها لازم تدفن روحها مع ريلها بس هي بالحيا .. نفس الهنود اللي يحرقون المره مع ريلها .. لانها لازم تموت معاه .. نفس الموته لكن نفسية ..
امـ حمد
10-09-2007, 02:42 AM
من حقها ان تتزوج لان الزواج ستر لها من كلام الناس
قطري في لندن
10-09-2007, 04:43 AM
انا اوافق في حاله وحده اذا عينت له زوج صالح مايفرق بين اعياله وعيالها ويسالوي بينهم
بوخالد2
10-09-2007, 06:24 AM
اختى موضوع جميل

بالعكس من حقها الزواج احسن من انها اتم بدون زوج (( والنفس اماره بالسوء ))

لكن زواجها يكون بشرط رجل من العائله نفسهااا او مقرب من الاهل اذا كان من بعيد هذى مشكله للاطفال مثل مانسمع ونشوف من ظلم زوج الام للابناء لاانه مب عياله مايهمونه


نسال الله ان يستر على كل ارمله ومطلقه
hasss1969
10-09-2007, 06:33 AM
من يريد المساعدة في ايجاد شريك الحياة ارجو مراسلتي على الخاص ...لعلي استطيع ذلك ...
على قد حالها
10-09-2007, 08:26 AM
من فتره طرح موضوع فالمنتدى عن ..
شنو ردة فعلك لو ابوك تزوج على امك(طبعا والعيال كل واحد كبر الباب يعني مش بزران)؟
انا ماشاركت في ذاك الموضوع لان رايي كان مؤيد للاخوات اللي رفضوا زواج الاب خاصه ان اللي ذكر الموضوع قال ان الزواج ممكن يكون نزوه!!!!!!!

لكني وقتها تناقشت مع وحده من ربعي وقلت لها عن هالموضوع وراي الشباب اللي كلهم قالوا اي عادي وبنحضر عرسه وبنرزف والبعض قال بدفع له تكاليف العرس وامنا على عينا وراسنا بتهدا مع الايام...دون اي اهتمام لمشاعرها المسكينه!!!!!!!!!!!!!!!!!!!!!!!!!!!!! الحمدالله والشكر

وووالله اني حزتها قلت حق رفيجتي لو انا طرحت موضوع اخر عن زواج الام فهل الشباب هذول بالذات اللي شاركوا بيوافقون؟؟؟؟؟؟؟ اكيد رايهم بيكون عكس رايهم بما يختص لابوهم لان سالفة الزواج جايه لمصلحتهم اما لامهم واللي اصلا هي ارمله مابيرضون لها الزواج ويحرمونها من متع الحياة وكأنها مب آدميه مثلهم!!!

وفعلا شوفوا الردود الحين البعض راااااااااااااااااااافض الفكره واللي يتشرط اذا تبي تتزوج لازم من العايله ولا حد من المقربين.......وكأن القريب الحين واثقين منه وان ماعليه قصور. يمكن يطلع مب شي!!؟؟!

طيب اذا لا في من ذي ولا من ذاك وفي شخص اخر ويبي يتزوجها خلاص ماتوافقون؟؟؟؟؟ والله عجييييب
وبعدين مب شرط ان القريب بيحسن معاملة العيال يمكن يطلع اخس منه مافيه وهم مب شرط الغريب يطلع زين..

اذا المسأله مش فالقرب ولا البعد المسأله فالشخص نفسه واخلاقياته ومدى احترامه لنفسه ولغيره...


عالعموم انا من رايي انها لو تبي تتزوج على سنة الله ورسوله تاخذ اللي تبيه واللي تحس انه فعلا بيريحها وبيحترم عيالها وبيعاملهم نفس عياله بغض النظر اذا كان حد معروف للعايله او غريب ....

وعجبيييييييييييييييي عاللي يتحكمون وبسسسسسسسسسسسسسسسسسسسسسسسسسسسسس!!!


التيما حبة بندول الله يخلييييييييييييييييييييييييج!
ANONYMOUS
10-09-2007, 10:56 AM
الله يهنيهم ان شالله اللي بيتزوجون

بس الرسول ( ص ) وصانا بالودود الولود
التيما
10-09-2007, 11:01 AM
من فتره طرح موضوع فالمنتدى عن ..
شنو ردة فعلك لو ابوك تزوج على امك(طبعا والعيال كل واحد كبر الباب يعني مش بزران)؟
انا ماشاركت في ذاك الموضوع لان رايي كان مؤيد للاخوات اللي رفضوا زواج الاب خاصه ان اللي ذكر الموضوع قال ان الزواج ممكن يكون نزوه!!!!!!!

لكني وقتها تناقشت مع وحده من ربعي وقلت لها عن هالموضوع وراي الشباب اللي كلهم قالوا اي عادي وبنحضر عرسه وبنرزف والبعض قال بدفع له تكاليف العرس وامنا على عينا وراسنا بتهدا مع الايام...دون اي اهتمام لمشاعرها المسكينه!!!!!!!!!!!!!!!!!!!!!!!!!!!!! الحمدالله والشكر

وووالله اني حزتها قلت حق رفيجتي لو انا طرحت موضوع اخر عن زواج الام فهل الشباب هذول بالذات اللي شاركوا بيوافقون؟؟؟؟؟؟؟ اكيد رايهم بيكون عكس رايهم بما يختص لابوهم لان سالفة الزواج جايه لمصلحتهم اما لامهم واللي اصلا هي ارمله مابيرضون لها الزواج ويحرمونها من متع الحياة وكأنها مب آدميه مثلهم!!!

وفعلا شوفوا الردود الحين البعض راااااااااااااااااااافض الفكره واللي يتشرط اذا تبي تتزوج لازم من العايله ولا حد من المقربين.......وكأن القريب الحين واثقين منه وان ماعليه قصور. يمكن يطلع مب شي!!؟؟!

طيب اذا لا في من ذي ولا من ذاك وفي شخص اخر ويبي يتزوجها خلاص ماتوافقون؟؟؟؟؟ والله عجييييب
وبعدين مب شرط ان القريب بيحسن معاملة العيال يمكن يطلع اخس منه مافيه وهم مب شرط الغريب يطلع زين..

اذا المسأله مش فالقرب ولا البعد المسأله فالشخص نفسه واخلاقياته ومدى احترامه لنفسه ولغيره...


عالعموم انا من رايي انها لو تبي تتزوج على سنة الله ورسوله تاخذ اللي تبيه واللي تحس انه فعلا بيريحها وبيحترم عيالها وبيعاملهم نفس عياله بغض النظر اذا كان حد معروف للعايله او غريب ....

وعجبيييييييييييييييي عاللي يتحكمون وبسسسسسسسسسسسسسسسسسسسسسسسسسسسسس!!!


التيما حبة بندول الله يخلييييييييييييييييييييييييج!

:funny::funny:



هدي اعصابج على قولة اخوي هسلان .. شفتي الأنانية ؟؟ والظلم بعينه وعلمه ؟؟ يتحججون انها ماراح تهتم بعيالها .. والسالفه وما فيها أنانية وصورتهم جدام الناس :anger2: هدي اعصابج وانا اختج والبندول ياييج عصير بداله .. في عندي دلفري :rolleyes:
القطوة
10-09-2007, 11:06 AM
كلام ولا اروع منه اختي على قد حالها....

بس انا من راي دام انه زوجها الله يرحمه كان زين في حقها في الدنيا تصبر وتحتسب عند رب العالمين عشان يتلاقون في الاخرة في جنة الخلد بإذن الله...بدل ماتكون زوجة لشخص آخر وتنحرم من لقياه في دار الخلود....(وايد عاطفية!!!)
شكرا
ANONYMOUS
10-09-2007, 11:11 AM
كلام ولا اروع منه اختي على قد حالها....

بس انا من راي دام انه زوجها الله يرحمه كان زين في حقها في الدنيا تصبر وتحتسب عند رب العالمين عشان يتلاقون في الاخرة في جنة الخلد بإذن الله...بدل ماتكون زوجة لشخص آخر وتنحرم من لقياه في دار الخلود....(وايد عاطفية!!!)
شكرا

ليش لو خذت ريل ثاني مابتلاقي الريل القديم ؟
القطوة
10-09-2007, 11:32 AM
حلوة ...خخخ اشلون ؟!!! اكيد ماتلاقيه لانها بتكون على ذمة رجل اخر في الدنيا...على حسب علمي
ANONYMOUS
10-09-2007, 11:39 AM
حلوة ...خخخ اشلون ؟!!! اكيد ماتلاقيه لانها بتكون على ذمة رجل اخر في الدنيا...على حسب علمي





نشكر فضيلة سماحتكم
القطوة
10-09-2007, 11:41 AM
العفو خخخ :)
ANONYMOUS
10-09-2007, 11:43 AM
العفو خخخ :)



خذتي ورقتج في الموضوع الثاني:looking:
السديم
10-09-2007, 11:52 AM
اخ هسلان كانك تتكلم عن امي اتصدق :con2:

ماعلينا .. انا ابوي توفى وكان اكبرنا في عمر ال 17 سنه واصغرنا 4 سنوات واحنا خمسه والوالده الله يطول بعمرها كانت صغيره للحين شابه ..

تتوقع اذا الوحده تحب زوجها وعاشت معاه حياة هانئة وسعيده تتوقع تقدر مجرد تفكير انها تفكر بشخص ثاني !!!

اكيد لا اللي تحب زوجها تكون وفيه له في حياته وبعد مماته !!

ممكن نقول حريم اول الوحده اذا توفى زوجها تلجأ للزواج من شخص ثاني لان الحياه كانت صعبه ووجود الرجل ضروري في حياتها لقضاء احتياجاتها ..

بس بوقتنا الحالي لا .. الزوجه تشتغل وتربي وتقضي امور البيت فماتفكر بالزواج نهائياً..

طبعا هذا كله في حالة حبها لزوجها ..

انا اتكلم من واقع تجربة مب من مجرد فرضيات ..
القطوة
10-09-2007, 12:01 PM
وراي وراي....بسم الله علي!!!!
على قد حالها
10-09-2007, 12:15 PM
:funny::funny:



هدي اعصابج على قولة اخوي هسلان .. شفتي الأنانية ؟؟ والظلم بعينه وعلمه ؟؟ يتحججون انها ماراح تهتم بعيالها .. والسالفه وما فيها أنانية وصورتهم جدام الناس :anger2: هدي اعصابج وانا اختج والبندول ياييج عصير بداله .. في عندي دلفري :rolleyes:

تسلمين لي عمري ......ترا بس يخربطون ومايدرون شسالفه واذا السالفه لهم برروا لج بألف تبرير crazyعيارتهم:looking:......

المهم حبيبتي ترا ابي عصير موز:eek2:
على قد حالها
10-09-2007, 12:19 PM
كلام ولا اروع منه اختي على قد حالها....

بس انا من راي دام انه زوجها الله يرحمه كان زين في حقها في الدنيا تصبر وتحتسب عند رب العالمين عشان يتلاقون في الاخرة في جنة الخلد بإذن الله...بدل ماتكون زوجة لشخص آخر وتنحرم من لقياه في دار الخلود....(وايد عاطفية!!!)
شكرا



اشكرج قطوو والحمدالله كلامي عجبج ...

بس انا حبيبتي ماقلت انها شرط تتزوج ... الراي الاول والاخير يرجع للأرمله اذا حبت تتزوج ولقت واحد يحشمها هي وعيالها بكيفها والشرع حلل ...واذا تبي تعيش وتربي عيالها من غير زواج هم بكيفها وراجع لها :D

اما انهم يتدخلون في حياتها ويزوجونها ولا مايزوجونها هذي مصاااااخه :anger2:

التيييييييييييييما تأخرتي كله من القطوه ماصدقت هدت اعصابي :court:
القطوة
10-09-2007, 12:30 PM
شفتي مفعولي اقوى من البندول :) وعصير التيما
هسلان
10-09-2007, 12:42 PM
اختى موضوع جميل

بالعكس من حقها الزواج احسن من انها اتم بدون زوج (( والنفس اماره بالسوء ))

لكن زواجها يكون بشرط رجل من العائله نفسهااا او مقرب من الاهل اذا كان من بعيد هذى مشكله للاطفال مثل مانسمع ونشوف من ظلم زوج الام للابناء لاانه مب عياله مايهمونه


نسال الله ان يستر على كل ارمله ومطلقه

مش شرط يكون زوج الأم ظالم هناك رجال محترمين يخافون الله في اليتامى

على العموم شرفني مرورك وأنا أخوك
هسلان
10-09-2007, 12:48 PM
اخ هسلان كانك تتكلم عن امي اتصدق :con2:

ماعلينا .. انا ابوي توفى وكان اكبرنا في عمر ال 17 سنه واصغرنا 4 سنوات واحنا خمسه والوالده الله يطول بعمرها كانت صغيره للحين شابه ..

تتوقع اذا الوحده تحب زوجها وعاشت معاه حياة هانئة وسعيده تتوقع تقدر مجرد تفكير انها تفكر بشخص ثاني !!!

اكيد لا اللي تحب زوجها تكون وفيه له في حياته وبعد مماته !!

ممكن نقول حريم اول الوحده اذا توفى زوجها تلجأ للزواج من شخص ثاني لان الحياه كانت صعبه ووجود الرجل ضروري في حياتها لقضاء احتياجاتها ..

بس بوقتنا الحالي لا .. الزوجه تشتغل وتربي وتقضي امور البيت فماتفكر بالزواج نهائياً..

طبعا هذا كله في حالة حبها لزوجها ..

انا اتكلم من واقع تجربة مب من مجرد فرضيات ..

الله يخليلكم الوالدة
بالفعل إختي هناك نساء ضحين بأنفسهن ورفضن الزواج خوف على الاطفال ووفاء لزوج المرحوم
تقبلي تحياتي
الـدانـه
10-09-2007, 12:58 PM
ليش لو خذت ريل ثاني مابتلاقي الريل القديم ؟



:funny::funny::funny:
هسلان
10-09-2007, 01:20 PM
عمر الام ما تكون انانيه .. وعمرها ما تفكر بنفسها بس .. حتى في زواجها فكرت في اعيالها .. وليش تقصر اصلا الزوج اكيد عارف انها ارمله وعليها اعيال .. ويتامى .. انا ضد حرمان الانسان يقضي عمره .. وانها لازم تدفن روحها مع ريلها بس هي بالحيا .. نفس الهنود اللي يحرقون المره مع ريلها .. لانها لازم تموت معاه .. نفس الموته لكن نفسية ..


:app::app::app::app::app:
هسلان
10-09-2007, 01:21 PM
من حقها ان تتزوج لان الزواج ستر لها من كلام الناس

كلام سليم
شكراً على المرور
التيما
10-09-2007, 01:24 PM
شفتي مفعولي اقوى من البندول :) وعصير التيما

:eek2:










:court::court:
ضوى
10-09-2007, 01:28 PM
الشرع اباح لها الزواج فليش احنا نحرمه ؟؟ بس بوقتنا الحاضر صعبة المراة تفكر بالزواج من اخر ، تخاف على عيالها انها تظلمهم بواحد يعذبهم ، شخصيا ما افكر بواحد غير زوجي الله يطول بعمره ولا افكر اجيب ريل ام لعيالي بعيد الشر عن قلب بو عيالي ، بس كمبدأ ما في اي نص شرعي او قانوني يحرم ارتباط الارملة بعد زوجها بواحد اخر

تحياتي
هسلان
10-09-2007, 01:56 PM
انا اوافق في حاله وحده اذا عينت له زوج صالح مايفرق بين اعياله وعيالها ويسالوي بينهم

عين العقل
تقبل تحياتي
هسلان
10-09-2007, 02:00 PM
الشرع اباح لها الزواج فليش احنا نحرمه ؟؟ بس بوقتنا الحاضر صعبة المراة تفكر بالزواج من اخر ، تخاف على عيالها انها تظلمهم بواحد يعذبهم ، شخصيا ما افكر بواحد غير زوجي الله يطول بعمره ولا افكر اجيب ريل ام لعيالي بعيد الشر عن قلب بو عيالي ، بس كمبدأ ما في اي نص شرعي او قانوني يحرم ارتباط الارملة بعد زوجها بواحد اخر

تحياتي


الله يخلي أبو العيال ويسعدكم لين تشيبون جميع

طبعاً الشرع ما حرم الزواج بس هناك أطراف أخرى وهم الأولاد يجب مراعات شعورهم ومصلحتهم قبل أتخاذ القرار

تقبلي تحياتي
هسلان
10-09-2007, 02:07 PM
من فتره طرح موضوع فالمنتدى عن ..
شنو ردة فعلك لو ابوك تزوج على امك(طبعا والعيال كل واحد كبر الباب يعني مش بزران)؟
انا ماشاركت في ذاك الموضوع لان رايي كان مؤيد للاخوات اللي رفضوا زواج الاب خاصه ان اللي ذكر الموضوع قال ان الزواج ممكن يكون نزوه!!!!!!!

لكني وقتها تناقشت مع وحده من ربعي وقلت لها عن هالموضوع وراي الشباب اللي كلهم قالوا اي عادي وبنحضر عرسه وبنرزف والبعض قال بدفع له تكاليف العرس وامنا على عينا وراسنا بتهدا مع الايام...دون اي اهتمام لمشاعرها المسكينه!!!!!!!!!!!!!!!!!!!!!!!!!!!!! الحمدالله والشكر

وووالله اني حزتها قلت حق رفيجتي لو انا طرحت موضوع اخر عن زواج الام فهل الشباب هذول بالذات اللي شاركوا بيوافقون؟؟؟؟؟؟؟ اكيد رايهم بيكون عكس رايهم بما يختص لابوهم لان سالفة الزواج جايه لمصلحتهم اما لامهم واللي اصلا هي ارمله مابيرضون لها الزواج ويحرمونها من متع الحياة وكأنها مب آدميه مثلهم!!!

وفعلا شوفوا الردود الحين البعض راااااااااااااااااااافض الفكره واللي يتشرط اذا تبي تتزوج لازم من العايله ولا حد من المقربين.......وكأن القريب الحين واثقين منه وان ماعليه قصور. يمكن يطلع مب شي!!؟؟!

طيب اذا لا في من ذي ولا من ذاك وفي شخص اخر ويبي يتزوجها خلاص ماتوافقون؟؟؟؟؟ والله عجييييب
وبعدين مب شرط ان القريب بيحسن معاملة العيال يمكن يطلع اخس منه مافيه وهم مب شرط الغريب يطلع زين..

اذا المسأله مش فالقرب ولا البعد المسأله فالشخص نفسه واخلاقياته ومدى احترامه لنفسه ولغيره...


عالعموم انا من رايي انها لو تبي تتزوج على سنة الله ورسوله تاخذ اللي تبيه واللي تحس انه فعلا بيريحها وبيحترم عيالها وبيعاملهم نفس عياله بغض النظر اذا كان حد معروف للعايله او غريب ....

وعجبيييييييييييييييي عاللي يتحكمون وبسسسسسسسسسسسسسسسسسسسسسسسسسسسسس!!!


التيما حبة بندول الله يخلييييييييييييييييييييييييج!

ماشاء الله عليج متعصب لبنات جنستج

أنا بصراحة مع زواجها بس بظوابط يعني لازم تتخذ القرار بعقلها وليس بعاطفتها
نعم المرأة بحاجة لرجل وكذلك الرجل بحاجة لمرأة بس لا يكون الأولاد الضحية
اما بخصوص الزواج من شخص بعينة ويكون من العائلة أنا مأتفق معاهم لأن الرجل الظالم لن يفرق بين القريب والبعيد

تقبلي تحياتي
هسلان
10-09-2007, 02:08 PM
شفتي مفعولي اقوى من البندول :) وعصير التيما

omenomenomen
tarek
10-09-2007, 08:44 PM
السلام عليكم
انا غير قطري وحبيت رد علي الموضوع اذا بتتقبلو انا متزوج من ارملة وللعلم هذه زوجتي الاولي وعندها اولاد ولم اكن متزوج من قبل كما ذكرت (ولا اعرفها من قبل ما رايتها الي يوم الزفاف )
وللحق الحمد لله اني سعيد ومرتاح والموضوع كله كما يقال قسمة ونصيب وما حد يعرف ايش مكتوب علية
ولكني احث الشباب ان يتقبلو هذا الشيء ويجب ان يكون امر عادي ولكن ما زالت مجتمعاتنا للاسف لا تتقبل هذا الشيء وبراي ان شاء الله الامر يكون له شان عند الله عز وجل في جبر الخواطر في متل هذه الحالات وان شاء الله يطول باعمار كل الرجال حتي لا يترملو اخواتنا (امين ) والمعذرة من الشباب ان كنت قد تدخلت في ما لا يعنيني فقط احببت ابداء الراي والسماح منكم
الطرف الأغر
10-09-2007, 09:03 PM
أعتقد ان الأرمله اذا فكرت تتزوج بتفكر بعقلانيه وتحسب حساب لكل شي ،،
وبتراعي شعور أبناءها و أهلها ،،
يعني ما بتتزوج زيجه عشوائيه كأن الي مات مب ريلها وبتاخذ أي حد عشان اتعبي الفراغ الي هي فيه ،،بالعكس بتكون حريصه اكثر و اكثر

والأهم انها تكون نفسيا مستعده لزواج اخر في حال تواجد أبناء و أهل و و و و


والزوجه تكون في الجنه مع اخر زوج كان لها في الدنيا اذا تزوجت اكثر من زوج
هسلان
10-09-2007, 09:11 PM
السلام عليكم
انا غير قطري وحبيت رد علي الموضوع اذا بتتقبلو انا متزوج من ارملة وللعلم هذه زوجتي الاولي وعندها اولاد ولم اكن متزوج من قبل كما ذكرت (ولا اعرفها من قبل ما رايتها الي يوم الزفاف )
وللحق الحمد لله اني سعيد ومرتاح والموضوع كله كما يقال قسمة ونصيب وما حد يعرف ايش مكتوب علية
ولكني احث الشباب ان يتقبلو هذا الشيء ويجب ان يكون امر عادي ولكن ما زالت مجتمعاتنا للاسف لا تتقبل هذا الشيء وبراي ان شاء الله الامر يكون له شان عند الله عز وجل في جبر الخواطر في متل هذه الحالات وان شاء الله يطول باعمار كل الرجال حتي لا يترملو اخواتنا (امين ) والمعذرة من الشباب ان كنت قد تدخلت في ما لا يعنيني فقط احببت ابداء الراي والسماح منكم


أشكرك أخوي على المداخلة القيمة والله يثيبك وجزاك خير على شعورك الطيب إتجاه الأطفال اليتامى
هسلان
10-09-2007, 09:13 PM
أعتقد ان الأرمله اذا فكرت تتزوج بتفكر بعقلانيه وتحسب حساب لكل شي ،،
وبتراعي شعور أبناءها و أهلها ،،
يعني ما بتتزوج زيجه عشوائيه كأن الي مات مب ريلها وبتاخذ أي حد عشان اتعبي الفراغ الي هي فيه ،،بالعكس بتكون حريصه اكثر و اكثر

والأهم انها تكون نفسيا مستعده لزواج اخر في حال تواجد أبناء و أهل و و و و


والزوجه تكون في الجنه مع اخر زوج كان لها في الدنيا اذا تزوجت اكثر من زوج


التفكير الصح قبل الاقبال على الزواج هو قمة العقل
وبخصوص الزوج بالأخرة فأنا سمعت إنها تخير بينهم والله أعلم
تقبلي تحياتي
الطرف الأغر
10-09-2007, 09:30 PM
التفكير الصح قبل الاقبال على الزواج هو قمة العقل
وبخصوص الزوج بالأخرة فأنا سمعت إنها تخير بينهم والله أعلم
تقبلي تحياتي


الله أعلم اذا كانت تخير بس اعتقد اني سمعت مره انها تكون مع اخر زوج

اذا حد ممكن يتأكد لنا ؟

شكرالك أخوي هسلان
هسلان
10-09-2007, 09:50 PM
الله أعلم اذا كانت تخير بس اعتقد اني سمعت مره انها تكون مع اخر زوج

اذا حد ممكن يتأكد لنا ؟

شكرالك أخوي هسلان


أيما امرأة توفي عنها زوجها فتزوجت بعده فهي لآخر أزواجها

‏[‏أي يكون هو زوجها

‏(‏ولا يعارض هذا الحديث بالحديثين التاليين لضعفهما‏:‏ ورد في حديث طويل‏:‏ ‏"‏يا أم سلمة إنها تخير فتختار أحسنهم خلقا‏"‏ - بضم الخاء واللام - ، قال الهيثمي‏:‏ رواه الطبراني وفيه سليمان بن أبي كريمة ضعفه أبو حاتم وابن عدي‏.‏ وورد حيث مثله عن أنس، خاطب فيه النبي صلى الله عليه وسلم أم حبيبة، وقال الهيثمي‏:‏ رواه الطبراني والبزار باختصار وفيه عبيد بن إسحاق وهو متروك وقد رضيه أبو حاتم، وهو أسوأ أهل الإسناد حالا‏.‏‏.‏‏.‏ ويمكن الجمع بين الأحاديث الثلاثة بأنها تكون لآخر أزواجها إذا تساووا في الخلق، وإلا فتختار أحسنهم خلقا‏؟‏‏؟‏، والله أعلم‏.‏


المصدر
http://al-eman.com/islamlib/viewchp.asp?BID=246&CID=23
ANONYMOUS
10-09-2007, 09:54 PM
هناك رجال محترمين يخافون الله في اليتامى





يا أخي لاتحرجنا..

:strong
هسلان
10-09-2007, 11:58 PM
يا أخي لاتحرجنا..

:strong

ما فيك حيلة
:con2::con2: