المساعد الشخصي الرقمي

مشاهدة النسخة كاملة : ودي بالكيان اس 2008 ..انصحوني شباب((اهل الخبره))


بطران
13-09-2007, 02:07 PM
سلام عليكم يالربع..

شي ينرفز صراحه وكالة الرنج ... سئلت مال المبيعات هناك ... ليش عارض الرنج بهاذي القيمه 330 الف..اقنعني اني اشتري رنج؟ .... تم يلف ويدور وما اقنعني بالاجابه .. تم يتكلم عن التاريخ وسياره عريقه وكلام مايوكل عيش ... صراحه قلبت ويهي ورحت وكالة البورش ...

يالربع صراحه موتر ... اشوفه بالجلد البرتقالي اشرح من الرنج بوايد ...والمقصوره سهله ومو رفيعه مثل الرنج ... وجد موتر تحسه اون روود ... ومو ضيق من قدام نفس الرنج وسيته اريح ..

بغيت استفسر عن قطع غيار البورش يالربع اشلون ؟؟؟ غاليه ؟؟ يعني الاشيا المهمه ... سفايف درام ويل والتواير..ياريت تقدرون تسعرون لي القطع ؟؟ اشقد تاخذ او عمرها الافتراضي الي مابدلها مره ثانيه ...

وانواع الخرابات الي اواجها عباره عن شنو ؟؟

في دفعه جايه للبورش كيان اس 2008 ... واذا اقتنعت ودرست الموضوع عدل ... انشالله بعزم على واحد .. ودي ابدل من بعد الامريكي والياباني على الماني هههههههههههههه :strong

ناطر ردودكم يالربع ومبارك عليكم الشهر
skyjacker
13-09-2007, 04:59 PM
هلا اخوووووووووي

بختصار الرنج رزته غير واكشخ من الكيان بمراحل هذا رايي الشخصي .. وبعدين ترى قطع الغيار ضوووووووووو بالنسبه للبورش والرنج.

ولله يوفقك
ALRAYYAN
13-09-2007, 05:03 PM
بصراحه الرنج غييييييييييييييييييييير .. سواء سواقه او منظر

خصوصا السبورت ... واذا على الوسع عليك بالفوج بعد بالنسبه لي اكشخ بوايد من الكيين
بطران
13-09-2007, 06:09 PM
يالربع انتو مافدتوني بشي هههههههههههه غير الرنج والرنج .... عدوني غير ماودي اركب رنج موتر مستهلك ..الي يسوه والي مايسوه اركبه ...

يعطيكم العافيه ... ودي من يفيدني بالبورش
مستثمر-قطر
13-09-2007, 06:45 PM
انا عندى بورشات 2 القديم والجديد وفي نفس الوقت افضل الرنج الفوج سوبر جارج لنه خفيف ومريح
ANONYMOUS
13-09-2007, 07:51 PM
والله اذا نويت تركب رنج وبورش لاتسأل عن قطع الغيار.. لان هالمواتر تبي لها واحد ماعنده مشاكل بالفلوس....


زين ماسألت عن صرفية البترول :)
بطران
13-09-2007, 10:48 PM
بعد محد رد بالاجابه الي ابيها ... انا ماهمني اذا عندكم او لا ... ابي كل واحد يقولي تجربته بالسواقه والسيرفز وهشكل ... البيزات مب عتبه ... بس بالنفس الوقت البيزات مب محصلينها على السيف !!! الواحد ماوده يتحسف.. وطبعي جذي ما اشتري شي الا لما افصله برغي برغي ... ف استحملوني شباب ههههههههههههههه
الـخـور
13-09-2007, 11:37 PM
انا ما انصحك بالبورش .. اذا كنت راعي خطوط طويله
وانت دامك تستعمل الامريكي بتحس بفرق كبير خصوصا ان الامريكي مريح جدا في الخطوط الطويلة
والمكيف بارد

اما بالنسبة للبورش فهو وعر شوي تحس بمطاباته نوعا ما
طبعا في اوبتش يخله مريح اذا طلبت الهدرلوك والبورش داينمك شاسي كنترول يمكن تحس براحه اكثر
لكن يضل مافي وجه مقارنة بين الامريكي والبورش من حيث الراحة في القيادة

لذالك انصحك تبتعد عن البورش
ahn
14-09-2007, 12:22 AM
توكل على الله وخذ الكايين والسساره مافيها مشاكل وممتازه واثبت واقوى من الرنج اما بخصوص السيرفس اكيد غالي شوي يعني تغير الايل والفلتر 700 ريال وهذا بعد عشرين الف كيلو البريكات حوالي 2500 يمكن كل سنتين او سنه ونصف وفعلا متعبه خاصه على الخطوط الطويله وهذا لكونها سياره رياضيه وبالتوفيق
راعى Sl
14-09-2007, 01:12 AM
اخوى لا تحتار خذلك الكيان العادى مو تاخذ التيربو وبعدين تقول السباب قالوا لى اخذ تيربو خذ العادى وهذا انا اقول خذ العادى مو التيربو


وان شاء الله بتدعيلى ويا ليت لو الشكل القديم لانى شايفه احلى ارخص

اما بالنسبه للسيرفس تراه على كل 16000 كيلو يدفعونك حول 800 بالكثير
انا اللى عندى غيرت مره السفايف والدرامويلات اطلعوا على الاربع تواير ب 3500 ترى سفايف ودرامويلات
وان حبيت تستفسر اكئر ترانى حاضر وبالخدمه

وكل عام والجميع بالف خير ان شاء الله
BURBERRY
14-09-2007, 01:24 AM
اعرف واحد من الشباب ما يشتري إلا بورش تيربو ...

و يمدح فيها و في شركة البراق
ANONYMOUS
14-09-2007, 03:40 AM
من الواضح ان محد بالمنتدى عنده بورش ولا رنج الا ثنين بس

ومصمخينا الشباب رنج ورنج بورش وبورش

يالله سمعونا اصواتكم
وحيد-الشوق
14-09-2007, 09:28 AM
من رايي خذلك بورش احسن من الرنج بمليون مره
وطن
14-09-2007, 10:28 AM
الصراحة ما جربت سواقة الكيان اس
جربت السبورت السوبر جارج والعاديه وكلهم اوكى
مشكلة الرنج مثل ما قلت اخوي كلٍ قام يسوقه ومنتشر بطريقة مو طبيعية
انت اذا رحت وكالة البورشه خلهم يعطونك وحده تجرب سواقتها شلون

ومن ناحية أسعار قطع الغيار
يتهيأ لي البورش والرنج والبي ام والمرسيدس كلها أسعارها متقاربة
وعالية ...


أهم شي اسأل عن الكيان راح يتغير شكلها ولا لا
لان الخوف تشتري السيارة ويغيرون موديلها بعد سنة !!


وتغيير السفايف والدرم ويل يعتمد على سواقتك انت شلون
اذا كنت راعي بريكات خشنه
اكيد يبيلك تبدلهم كل شوي :)

وغيار الزيت مادري بس احتمال يكون عندهم على كل 10 او 15 الف مثل المرسيدس
بطران
14-09-2007, 12:59 PM
الصراحة ما جربت سواقة الكيان اس
جربت السبورت السوبر جارج والعاديه وكلهم اوكى
مشكلة الرنج مثل ما قلت اخوي كلٍ قام يسوقه ومنتشر بطريقة مو طبيعية
انت اذا رحت وكالة البورشه خلهم يعطونك وحده تجرب سواقتها شلون

ومن ناحية أسعار قطع الغيار
يتهيأ لي البورش والرنج والبي ام والمرسيدس كلها أسعارها متقاربة
وعالية ...


أهم شي اسأل عن الكيان راح يتغير شكلها ولا لا
لان الخوف تشتري السيارة ويغيرون موديلها بعد سنة !!


وتغيير السفايف والدرم ويل يعتمد على سواقتك انت شلون
اذا كنت راعي بريكات خشنه
اكيد يبيلك تبدلهم كل شوي :)

وغيار الزيت مادري بس احتمال يكون عندهم على كل 10 او 15 الف مثل المرسيدس

سؤال جوهري ...انت واحد ولا وحده ؟؟؟

المشكله اني طلبت ابي تجربة الكيان اس ... قالولي جرب 911 نفس الاحساس ههههههههههههه قلت لا يبا مابي انربش بموتر قيمته نص مليون :funny:

لان كل الكيان باعوهم ...وفي دفعه بتجي قريب .. ف ودي اتأكد قبل ...

سويت مقارنات بالنت ... وجدت ان الكيان بشكل عااام ..احسن من الاكس فايف باكبر مكاينه ... والكيان ..تماسكه على الطريق احسن من الام ال تضبيط اي ام جي!!!

واحسن من الرنج من ناحية مقصورة القياده ...وجد ترى ..اشوفها اشرح بوايد من الرنج سبورت ... :strong
بطران
14-09-2007, 01:01 PM
من الواضح ان محد بالمنتدى عنده بورش ولا رنج الا ثنين بس

ومصمخينا الشباب رنج ورنج بورش وبورش

يالله سمعونا اصواتكم


مستغرب مثلك اخوي ... وايد ناس يعرضون بورشات اهني والمشكله مع كتات سبورت ومدري شنو ... هل هالاشيا من صنع خيالهم !! والي يبط جبدك اكثر النوعيه الي يبيعون بنتلي بمنتدى !!! :con2: وبموضوع ثاني يبي نيسان باب واحد ههههههههههههه
وطن
14-09-2007, 01:23 PM
سؤال جوهري ...انت واحد ولا وحده ؟؟؟

المشكله اني طلبت ابي تجربة الكيان اس ... قالولي جرب 911 نفس الاحساس ههههههههههههه قلت لا يبا مابي انربش بموتر قيمته نص مليون :funny:

لان كل الكيان باعوهم ...وفي دفعه بتجي قريب .. ف ودي اتأكد قبل ...

سويت مقارنات بالنت ... وجدت ان الكيان بشكل عااام ..احسن من الاكس فايف باكبر مكاينه ... والكيان ..تماسكه على الطريق احسن من الام ال تضبيط اي ام جي!!!

واحسن من الرنج من ناحية مقصورة القياده ...وجد ترى ..اشوفها اشرح بوايد من الرنج سبورت ... :strong




يعني ما يصير البنات يفهمون في هالمواضيع :anger2:

صارت حكراً على الرياييل يعني crazy
ahn
14-09-2007, 01:31 PM
تبي كايين اس لون رصاصي موديل 2004 فل ابشن قاطعه 150000 كم وسعرها ماراح يزيد عن 150000
مفلوز
14-09-2007, 02:01 PM
السلام عليكم ... اللي أقدر أقوله لك هو إني سافرت في ها لسيارة من الدوحة إلى لندن ورجعت والحمدلله لا خراب ولا بنشر ولا تبديل زيت حتى مشوار الروحة بس 6900 كلم
عبودقطر
14-09-2007, 02:06 PM
انا صراحه توني ماخذ بورش 2008 والله خوش سياره وترا سامانها ارخص من الرنج
وعلى فكره ترا البورش اقوى من الرنج من ناحيه الاستعمال والناس كلن وذوقه
Bin Hood
14-09-2007, 02:50 PM
السلام عليكم ورحمة الله وبركاته

الصراحة بعض الاعضا مصخوها وهم يتكلمون عن الرنج وميزاته وو ووو وكأن الموضوع عن الرنج

انا الصراحة وايد عاجبني الكاين الله يرزقني

قبل شهر رحت الوكالة عندنا بالبحرين وسألت عن سعر الكاين قال ب 29 الف دينار

والدفعة اليايه يتيي ويا "سمارت كي " , بس اللي ما عجبني فيه ان من داخل ما تغير

هذا اللي عندي وكان ودي اخدمك اكثر

الله يوفقك
راعى Sl
14-09-2007, 03:15 PM
اخوى لا تحتار خذلك الكيان العادى مو تاخذ التيربو وبعدين تقول السباب قالوا لى اخذ تيربو خذ العادى وهذا انا اقول خذ العادى مو التيربو


وان شاء الله بتدعيلى ويا ليت لو الشكل القديم لانى شايفه احلى ارخص

اما بالنسبه للسيرفس تراه على كل 16000 كيلو يدفعونك حول 800 بالكثير
انا اللى عندى غيرت مره السفايف والدرامويلات اطلعوا على الاربع تواير ب 3500 ترى سفايف ودرامويلات
وان حبيت تستفسر اكئر ترانى حاضر وبالخدمه

وكل عام والجميع بالف خير ان شاء الله
بطران
14-09-2007, 03:18 PM
تبي كايين اس لون رصاصي موديل 2004 فل ابشن قاطعه 150000 كم وسعرها ماراح يزيد عن 150000


ماقصرت طويل العمر ..ودي بالشكل الجديد
الاصيـل
14-09-2007, 03:19 PM
والله انا مثلك اخوي الكايين داشه خاطري
انا كان عندي رنج بس بعته بصراحه صار منتشر بصوره غريبه
واكثر موتر اشوفه في الشوراع المهم
انا مخطط على كياين تيربو الشكل الجديد ترى يالغالي يختلف 180 درجه عن الكيايين الاس
من الداخل والخارج مع انه اشوف الاخوان ما ينصحون به
لكن والله غير في كل شي
بطران
14-09-2007, 03:19 PM
:eek2:
السلام عليكم ... اللي أقدر أقوله لك هو إني سافرت في ها لسيارة من الدوحة إلى لندن ورجعت والحمدلله لا خراب ولا بنشر ولا تبديل زيت حتى مشوار الروحة بس 6900 كلم

من صجك ؟؟؟ ههههههههههههههه
بطران
14-09-2007, 03:23 PM
والله انا مثلك اخوي الكايين داشه خاطري
انا كان عندي رنج بس بعته بصراحه صار منتشر بصوره غريبه
واكثر موتر اشوفه في الشوراع المهم
انا مخطط على كياين تيربو الشكل الجديد ترى يالغالي يختلف 180 درجه عن الكيايين الاس
من الداخل والخارج مع انه اشوف الاخوان ما ينصحون به
لكن والله غير في كل شي


الله يوفقق... بس مشاكل التيربو وااايد على ماسمعة نفس السوبر جارج بالرنج :)
بطران
14-09-2007, 03:24 PM
السلام عليكم ورحمة الله وبركاته

الصراحة بعض الاعضا مصخوها وهم يتكلمون عن الرنج وميزاته وو ووو وكأن الموضوع عن الرنج

انا الصراحة وايد عاجبني الكاين الله يرزقني

قبل شهر رحت الوكالة عندنا بالبحرين وسألت عن سعر الكاين قال ب 29 الف دينار

والدفعة اليايه يتيي ويا "سمارت كي " , بس اللي ما عجبني فيه ان من داخل ما تغير

هذا اللي عندي وكان ودي اخدمك اكثر

الله يوفقك

290 الف ؟؟ ليش ...وايد على الاس صراحه .... هنا 250 الف بالضبط ...
بطران
14-09-2007, 03:29 PM
انا صراحه توني ماخذ بورش 2008 والله خوش سياره وترا سامانها ارخص من الرنج
وعلى فكره ترا البورش اقوى من الرنج من ناحيه الاستعمال والناس كلن وذوقه

:nice: :nice:
Bin Hood
14-09-2007, 03:34 PM
290 الف ؟؟ ليش ...وايد على الاس صراحه .... هنا 250 الف بالضبط ...

250 الف ريال كاين S ؟؟

بس انا اشوف شباب يعرضون الكاين S في اللمنتدى على 270 الف طبعا مستعمل !!
مستثمر-قطر
14-09-2007, 03:43 PM
والله يالبطران انا توى بايع الى عندى كيان اس

لن بصراحه مللنى عندى 2006 و2008 نفس الشي من الداخل ماغيرو برغى

والبورش ضمانه تعيس بس سنتين شدعوه ماخذ تاتا

والحين افتريت علا الرنج وتوى مطلع واحد جديد فوج سوبر شارج والله انه مريح وهادى ماهب مثل الكيان سيته جامد وماهب مريح

قبل كنت امدح الكيان اما الحين كرهته

وكنت غافل احسب الكيان افضل واحسن طلع الفوج افضل وفرق السما والارض وحتى فالقيمه مايصف عنده الفوج علا 370 والكيان ب 260

فوجهت نضرى تغيرت بالكيان 180 درجه

وانصحك بالرنج وانا عجبنى ان ضمانه خلوه 5 سنوات يعنى تكرفه 5 سنين وانت مرتاح ماهب مثل التاتا الى هى البورش سنتين

واقولك الكلام ياخوى من واقع تجربه
ahn
14-09-2007, 04:32 PM
الكاين اس حسب الواصفات وسعره يبداء من 280000 الف ريال ويوصل 320000 الف الاا اذا شلت بعض الواصفات سواء الاسيات او الطابلون او الشاشه او النفقيشن او التبترونك او التحكم من الاسترنيق او الاكزوزات ونوعية الجلد وكذلك الخشب....

الرنج روفر سياره ممتازه ما فيه كلام بس عطني رايك فيه بعد 6 شهور والب ام اكس فايف بعد روعه وكل سياره لها ايجابيات وسلبيات
بطران
14-09-2007, 05:13 PM
والله يالبطران انا توى بايع الى عندى كيان اس

لن بصراحه مللنى عندى 2006 و2008 نفس الشي من الداخل ماغيرو برغى

والبورش ضمانه تعيس بس سنتين شدعوه ماخذ تاتا

والحين افتريت علا الرنج وتوى مطلع واحد جديد فوج سوبر شارج والله انه مريح وهادى ماهب مثل الكيان سيته جامد وماهب مريح

قبل كنت امدح الكيان اما الحين كرهته

وكنت غافل احسب الكيان افضل واحسن طلع الفوج افضل وفرق السما والارض وحتى فالقيمه مايصف عنده الفوج علا 370 والكيان ب 260

فوجهت نضرى تغيرت بالكيان 180 درجه

وانصحك بالرنج وانا عجبنى ان ضمانه خلوه 5 سنوات يعنى تكرفه 5 سنين وانت مرتاح ماهب مثل التاتا الى هى البورش سنتين

واقولك الكلام ياخوى من واقع تجربه

الرنج والتيوتا ..ضارب عليهم اكس والسبب استهلاكهم الزايد... وين ماتلتفت يا رنج يا كروزر ... لو ثلاث وكالات بالدوحه بس... الرنج ..وعبدالغني وتاتا ...

اختار تاتا وكلي فخر ههههههههههههههه شفت الدعايه الي تقول التاتا جاي التاتا جاي :d ومن ناحية الضيق ترى السبورت ورا .. اذا قعدت اركبي تدخل في جبدي !!! واذا قعدت جدام راسي بالسقف ومرتز ....
الزلزال
14-09-2007, 09:28 PM
بالتوفيق

تحياتي
مفلوز
15-09-2007, 01:24 PM
:eek2:

من صجك ؟؟؟ ههههههههههههههه


أي والله إني صادق ... سافرت من الدوحة إلى لندن على بورش كايين أس .. وماشاء الله عليها من سيارة ... والحمدلله لا خراب ولا بنشر ولا حتى تبديل زيت ... والله ما غير تشييكت الوكالة سفايف وبس وطلعت حول ال 3000 ريال.
RJ83
15-09-2007, 04:13 PM
هلا اخوي بطران اتوقع يهمك اتعرف عن البورش Gt اللي قوته بين الاس والتيربو .. وشكله من برع نفس التيربو بالضبط .. قال لي الريال في الوكالة انها بتنزل مع الدفعات الجاية .. بس انا خايف يكون لها مشاكل مثل التيربو ..
لذلك اتمنى من اللي عنده خلفيه عن الكيان Gt يفيدنا قبل ما احجز علما بأن سعرها 280 حسب ما قال لي

وشكرا
بطران
15-09-2007, 06:05 PM
هلا اخوي بطران اتوقع يهمك اتعرف عن البورش Gt اللي قوته بين الاس والتيربو .. وشكله من برع نفس التيربو بالضبط .. قال لي الريال في الوكالة انها بتنزل مع الدفعات الجاية .. بس انا خايف يكون لها مشاكل مثل التيربو ..
لذلك اتمنى من اللي عنده خلفيه عن الكيان Gt يفيدنا قبل ما احجز علما بأن سعرها 280 حسب ما قال لي

وشكرا

اي موديل جي تي اس ... ياخوي شكله له قطع غيار سبورت او شي من هالقبيل .. انشالله واحد من الخبره يفيدنا
ANONYMOUS
15-09-2007, 10:06 PM
مستغرب مثلك اخوي ... وايد ناس يعرضون بورشات اهني والمشكله مع كتات سبورت ومدري شنو ... هل هالاشيا من صنع خيالهم !! والي يبط جبدك اكثر النوعيه الي يبيعون بنتلي بمنتدى !!! :con2: وبموضوع ثاني يبي نيسان باب واحد ههههههههههههه

تعجبني.. انت اللي فاهمني..

خلك دقيق في الاسئله..

كل كم كيلو التشييك.. وبكم التشييك.. كم تبديل الايل والفلتر.. كم تبديل السفايف.. كم تبديل الدرام ويلات..

اشلون الموتر في السرعه مثلا.. وشلون الموتر في الرمل.. هل الدبل ينفع ولا خرطي..

وين تسوون صيانه في اي فرع..

كم الضمان.. ومتى يروح الضمان

شلون نظرة الناس لك ونت تسوق.. هل توسع لك.. ولا لازم تدق هرن ولا تكبس ليتات..

خلك دقيق واتحداك حد يجاوب عليك..

بس اسأل بكم سفايف الكروزر.. بتلاقي الموضوع وصل 300 صفحه :D
بطران
15-09-2007, 11:27 PM
تعجبني.. انت اللي فاهمني..

خلك دقيق في الاسئله..

كل كم كيلو التشييك.. وبكم التشييك.. كم تبديل الايل والفلتر.. كم تبديل السفايف.. كم تبديل الدرام ويلات..

اشلون الموتر في السرعه مثلا.. وشلون الموتر في الرمل.. هل الدبل ينفع ولا خرطي..

وين تسوون صيانه في اي فرع..

كم الضمان.. ومتى يروح الضمان

شلون نظرة الناس لك ونت تسوق.. هل توسع لك.. ولا لازم تدق هرن ولا تكبس ليتات..

خلك دقيق واتحداك حد يجاوب عليك..

بس اسأل بكم سفايف الكروزر.. بتلاقي الموضوع وصل 300 صفحه :D

ههههههههههههه يعطيك العافيه ... صج ترى هالاسئله تدور في بالي :app:

وبالنسبه للاند كروزر ... ماعطه اكس بالبنط العريض ...ونفسه الرنج ... الي مسوين عليه هليله ..وماتم حد ما اركبه crazy
رآعي موآجيب
16-09-2007, 07:27 PM
اخوي الغالي

السيرفس وقطع الغيار الاستهلاكيه اسعارها معقوله مقارنة بباقي اسعار الشركات الفخمه مثل الفردان وناصر بن خالد والدوحه وغيرها من الشركات , يعني اذا دفعت على السياره كل سنه او سنه ونص مابين 3000 الى 5000 ترى الموضوع عادي جدآ لأن هالنوع من السيارات مالها الا الشركه الشي الثاني هالمبلغ معقول في السيرفس مقابل انك راكب { بورش } بالقيمه الفلانيه , انا الصراحه اشوف ان شركة البورش اسعرها جدآ مناسبه ومدروسه وتحاول انها تستقطب اكبر قدر من العملاء لأني عندي بورش ومجرب السيرفس عندهم كم مره { الصراحه ما عليهم كلام } وارحم من الفردان وتعامل موظفينه وارتفاااااااااع سعر السيرفس وقطع الغيار عنده
عليك بالبورش وعسى الله يوفقك (وعليك بلأستخاره ).

.. تحياتي ..
رآعي موآجيب
16-09-2007, 07:38 PM
والبورش ضمانه تعيس بس سنتين شدعوه ماخذ تاتا



كلامك صحيح اخوي الغالي بس الي ماتعرفه الله يسلمك انك تقدر تثبت ضمانه لين 7سنوااااااات

يعني سنتين + سبع سنوات = 9 سنوات وموترك تحت الضمان من الأف للياء

بس تفدع على كل سنه زياده 3900 ريال ;)

شرايك للحين البورش يقارن بالتاتا :con2:

:D

.. تحياتي لك ..
المخفي
17-09-2007, 01:59 AM
من كثر الرنجات في الدوحة شايف هندي راكب رنج مع رفيجه الكوري
RJ83
17-09-2007, 05:22 PM
من كثر الرنجات في الدوحة شايف هندي راكب رنج مع رفيجه الكوري

ههههههههههههههه:eek2:
بطران
17-09-2007, 06:01 PM
من كثر الرنجات في الدوحة شايف هندي راكب رنج مع رفيجه الكوري

هههههههههههههه حلوه ... الرنج مارده بيسونه موتر توصيل طلبات :funny:
RJ83
17-09-2007, 07:20 PM
هلا اخوي .. بصراحة انا رحت من يومين وكالة البورش وحجزت الكيان GTS هو فئة جديدة نفس ما قيل لي.. 8 سلندر ، رنجات 21 ، شاشة ،وحساسات ، ..الخ وتقدر اتضيف عليه اللي تبيه .. انا طلع ي بعد الاضافات ب305 .. يعني لو عندك كيان الاس وزدت عليه هالمواصفات يطلع اغلى.. يقول لك الناس لين الحين ما اعرفوه يعني بيكون شي جديد .. وGTSشكله نفس التيربو بالضبط من برع بس اختلاف بسيط .. ايجيك معاه السبورت بكج ومن داخل سبورت ..

بعطيك الموقع وانت شوف ..واللي عنده ملومات اكثر يفيدنا
http://www.porsche.com/microsite/cayennegts/usa.aspx
بطران
18-09-2007, 12:03 AM
هلا اخوي .. بصراحة انا رحت من يومين وكالة البورش وحجزت الكيان GTS هو فئة جديدة نفس ما قيل لي.. 8 سلندر ، رنجات 21 ، شاشة ،وحساسات ، ..الخ وتقدر اتضيف عليه اللي تبيه .. انا طلع ي بعد الاضافات ب305 .. يعني لو عندك كيان الاس وزدت عليه هالمواصفات يطلع اغلى.. يقول لك الناس لين الحين ما اعرفوه يعني بيكون شي جديد .. وGTSشكله نفس التيربو بالضبط من برع بس اختلاف بسيط .. ايجيك معاه السبورت بكج ومن داخل سبورت ..

بعطيك الموقع وانت شوف ..واللي عنده ملومات اكثر يفيدنا
http://www.porsche.com/microsite/cayennegts/usa.aspx

طيب جي تي اس من غير اضافات ...؟ ابيه شد بلاده لا رنجات ولا غيره..اشقد يطلع
RJ83
18-09-2007, 11:01 PM
هلا اخوي بطران سعره يبدأ ب280 قبل الخصم .. لأنه هو قال لي ان في خصم بس ما ادري كم بالضبط.. ويجيك مع رنجات 21 وشاشة وحساسات بدون ما اتضيفها انا ضفت اشياء ثانية غير هذي .. واذا قررت تاخذ احجز لك بسرعه علشان ما تتأخر عليك في الوصول .. اللي حجزتها يبي لها لين شهر 2 او3 لين توصل .. ومتوفر منها الالوان غير اللي شفتهم في الموقع ..
وبشرني عاد اذا اتخذت اي خطوة في الموضوع.. :)
بوسيف الهاجري
18-09-2007, 11:08 PM
مرحبا انا بتوصلني سيارتين Gts شهر 12 وحده حمرا و وحده نحاسيه

الي يبي يحجز يدز خاص
سعود
19-09-2007, 04:41 AM
صراحة انا كنت اشترى موتر كنت محتار بين المرسدس والرنج والبورش وابى ام

لاكن صراحة انا اشوف البورش عندى احسن الكيان اس 2008 لانة مغيرين شوى الشكل والمكينة

اقوى من القديمة وانا صراحة حاجز لى وحدة وطلعت على مع المواصفات الى طالبها 311 الف وبتوصل شهر 2 ....
RJ83
19-09-2007, 08:28 PM
مرحبا انا بتوصلني سيارتين Gts شهر 12 وحده حمرا و وحده نحاسيه

الي يبي يحجز يدز خاص

هلا اخوي اذا عندك خلفية جيدة عن هالفئة ياليت تفيدنا اكثر:)

يا اخوي انت مقنتع بها اللونين الاحمر والنحاسي ؟؟ انا ما اقدرت اقتنع فيهم ..:con2:
" روح قطر "
20-09-2007, 01:07 AM
وسعو شوى البطرانة وصلت :)

أخوى الكيان أس 8سلندر أو 6 سلندر موتر مبروك والله يوفق لك فية وتوكل على الله وأخذة

بس فية عيببين أولا مكيفة شوى حار

وثانيا السيرفس ماله مايقل عن 6500 ريال كل مرة تشيك فيها الموتر

لاكن الكيان تيربو فية مشاكل كثيرة يحرق أيل ومكيفة حار والموتر وعر لانة سبورت ومثلك عارف

وسيرفسة مايقل عن 10000 ريال ( عشرة الالف ريال ) اذا مافية خرابات

لاكن ماشاء الله موتر حلو وعجيب ...والله يبارك لك فية

(( لاكن بعد عن الرنج )) لانة سار سيكل في الشارع كل ماتلتفت يمين وشمال حصلت رنج
,,,,,,,,,,,,,,,,طالع يمينك الحين شرط بتشوف رنج


أذا بغيت موتر العمر اللي يمد ويكد ويبض الوجة ويرز وسعرة فية مهما طال الزمن

وتبدل أيل وفلتر ب110 ريال ((أخذ عطايا الله :nice: ال في أكس أر ..أو الكزس فيرويل ..أو الجي أكس أر ))

واذا انت فعلا بطران وفلوسك زايد وعندك فلوس البورش الله لايهينك زيدها 20000 الف
على قيمة البورش:con2: واخذ لك بنتلي 2006 ارز واكشخ وتكسر الرقاب :nice:


وأن شاء الله أكون أفدتك
بطران
20-09-2007, 01:51 AM
وسعو شوى البطرانة وصلت :)

أخوى الكيان أس 8سلندر أو 6 سلندر موتر مبروك والله يوفق لك فية وتوكل على الله وأخذة

بس فية عيببين أولا مكيفة شوى حار

وثانيا السيرفس ماله مايقل عن 6500 ريال كل مرة تشيك فيها الموتر

لاكن الكيان تيربو فية مشاكل كثيرة يحرق أيل ومكيفة حار والموتر وعر لانة سبورت ومثلك عارف

وسيرفسة مايقل عن 10000 ريال ( عشرة الالف ريال ) اذا مافية خرابات

لاكن ماشاء الله موتر حلو وعجيب ...والله يبارك لك فية

(( لاكن بعد عن الرنج )) لانة سار سيكل في الشارع كل ماتلتفت يمين وشمال حصلت رنج
,,,,,,,,,,,,,,,,طالع يمينك الحين شرط بتشوف رنج


أذا بغيت موتر العمر اللي يمد ويكد ويبض الوجة ويرز وسعرة فية مهما طال الزمن

وتبدل أيل وفلتر ب110 ريال ((أخذ عطايا الله :nice: ال في أكس أر ..أو الكزس فيرويل ..أو الجي أكس أر ))

واذا انت فعلا بطران وفلوسك زايد وعندك فلوس البورش الله لايهينك زيدها 20000 الف
على قيمة البورش:con2: واخذ لك بنتلي 2006 ارز واكشخ وتكسر الرقاب :nice:


وأن شاء الله أكون أفدتك

شكلي باتم على الفتك والهمر ابرك لي .. فكرت فيها الالماني مب لي ... تراني راعي طعوس وبحر وهالسياره ماتتحمل دقيقه من استعمالي ... سيرفسهم غالي وااايد والواحد يكد على عمره ولا على سيارته !! باوخر عن الرنج والبورش ... مواتر دلع وطربتهم ست شهور بالكثير وتنصف بالمعرض... ننطر الاتش تو 2008 والجي الجديد ونشوف اي احسن ...

الاتش تو بيكون 6.2 وسته جير ... وكله غير من داخل ..و 6200 سي سي ... وقطع غيار ولا شي ...
CH Engineer
20-09-2007, 02:22 AM
بطران خذلك في اكس ار وخلك من الم؟؟؟؟ السيرفس انت ادرى بشركه عبدالغني بس كل شي رخيص
وسالفة تكبس رزه برقم...
بس تبي الصراحه الكيان اس موتر ولا تقارنه ابدا بالرنج كفايه انه البورش القديم اقوى من الرنج مع السوبر شارج والكيان الاس الجديد اقوى من القديم ب 50 حصان تقريبا
وعندك الكيان Gts رزه ولا احلى....
واذا تتكلم عن الموتر من داخل والله البورش احسن من الرنج ب 17 مليون مره
واذا خاطرك فموتر مب موجود مع غيرك بيع الهمر والنيسان وزيد فوقهم 4مليون ونص وخذلك بوغاتي :p لو صج خذيتها دق علي اعلمك شلون تسوقها << اخوك خبرة بوغاتي بجميع الوانها :funny::funny::funny: