شي غريب و تصرف اغرب صراحه ماتوقعتها

[مرحوم قطر]

السلام عليكم ورحمة الله وبركاته

الدنيه تشوف فيها اشكال و الوان من الناس

بس في ناس اتسوي اشياء ممكن العقل يستوعبها و في ناس تسوي اشياء تستاهل عليه مابي اقول



وهلشي يكون في تربية الابناء

فعلى سبيل المثال مره من المرات قريت موضوع اخت من خواتنه في المنتدى تطلب نصيحه

وهي انها مدخله ولدها مدرسه انقليزيه و دوم عندهم امتحانات و حياته دراسه في دراسه



و ماعتقد ان في حد يخالفني الراي اذا قلت هلشي غلط 100%

لان الطفل محتاج انه يلعب و غيره


وخلوني اتكلم بالعربي الفصيح صحيح ان انا مب متزوج و ماعندي عيال

بس ربيت اخواني الاصغار و علمتهم و الحمدلله على كل حال


ترى يا شباب لحد يوهم نفسه ان الولد اذا كان صغير لازم يشغل نفسه بالدراسه ولازم مايتهاوش

و مايتشيطن و و و و الخ الخ لان هلشي بياثر عليه بعدين و بيخليه بليد و مايعرف يتصرف


الطفل لازم يلعب عشان يمرن نفسه و ينمي قدراته

ولازم يطلع يلعب مع عيال الفريج عشان يتعرف على العالم الخارجي و يعرف يعيش بنفسه

وهلشي ينمي فيه القدره على التصرف باستقلاليه و و يخليه يقدر لو ابشكل بسيط

يعتمد على نفسه

انا ماقول ان تخلونها سايبه بس ساعتين او ساعه في اليوم يطلع مع عيال الجيران يلعب

معاهم قريب من البيت و تحت العين في مكان امين ماتضر الا تنفع


يمكن بعضكم يشوف ان هواش اليهال مشكله كبيره و هذا هو اساس موضوعي

ترى هواش اليهال مشكله بسيطه و حلها يكون بينهم مب ابتدخل الاهل



انا استغرب من الناس الي كاتمين على عيالهم مايخلونهم يعرفون الشارع

ولا يخلونهم يكلمون احد ولا يخلونهم يرافجون احد

حدهم الحوش و ان قربو الباب اظربوهم عشان مايقربونه

واستغرب من الناس الي يعدون ان اذا ولدهم تهاوش مع واحد في سنه مشكله اكبيره

ممكن انها توصل للشرطه اذا كبر الموضوع


و استغرب من رجال نقدر انقول ان سنه مب صغير اذا قلنه عمره فوق 35

ويتصرف كانه بزر عمره 11


و هلشي صادفني اليوم و حنى طالعين من المسجد بعد صلاة المغرب

حيث ان صارت مشكله عند المسجد كانت بتوصل للشرطه لول ان تدخلنه عشان انحل الموضوع



و المشكله ابكل بساطه ان في يهال في فريجنه شياطين و اباليس

مايخلون حد في حاله و كله اهواش و شطانه (( يعني شطانة بزارين ))

و هليهال في مدرسه وحده وهي مدرسه ابتدائيه و بنخص اثنين من عيال جيرنه

في صف ثاني ابتدائي تهاوشو في المدرسه مشكله بسيطه و ماعتقد ان فيها شي

اتصير بين كل اليهال وللعلم ان هلاثنين عيال جيران و ربع و شطانتهم مع بعض

و ماعتقد ان في حد بينه ماتهاوش في المدرسه


اما ان ايي ابو واحد من هلاثنين و للعلم ولده كلمة ابليس اشوي عليه الدرجه

انه يحذف بيوت الجيران ابحصا

ايي ابوه مع اخوانه يروحون يهاوشون البزر الثاني وعمره 7 سنين و اشوي ويكفخه

عند باب المسجد وقدام كل الناس

ولما ابوه يشوف المنظر يروح يسالهم عسى ماشر يهدون عليه و معصبين ويبغون يتهاوشون

و بنتصل حق الشرطه و مادري شعندهم

و حجتهم ليش ولدكم يظرب ولدنه

:yawn:


تخيلو معاي الموقف اشبتكون ردة فعلك لما اييك واحد معاه اخوانه يقولك ليش ولدك

الي عمره مايتجاوز 7 سنين يظرب ولدي الي عمره مايتجاوز 7 سنين ؟.؟


والله انا يوم شفت المنظر يعني انصدمت من الي شفته

و الرجال تم ساكت مكانه من صدمته و يوم استوعب الموقف بغا يمسك الرجال و يرضه

لول انه كنه موجودين و قدرنه انحل المشكله




حبيت اسمع تعقيبكم على هلموضوع الي بصراحه قمنه انشوف منه وايد في هلايام

و ماذكر انه كنه نسمع عنه قبل

على ايامنه لو تذكرون كان عيب عندا حد ينادي ابوه اذا يتهاوش :threaten:


بس الحين انقلبة الاياه قامو الاكبار يتدخلون في مشاكل الاصغار و يكبرونها

و تقبلو كامل تحياتي و اسمحولي على الاطاله

[نبـــــراس]

والله يا اخوي انا معاك في الكلام اللي قلته ..
ويا مكثر هواش اليهال ,, بالعكس هالشي ينمي عنده الاحساس بالمسؤليه ,, انت غلطت انت تصلح غلطتك ..
انت بديت انت تتحمل العواقب ,,
ولين يكبر بيحس عقب بمسؤلية نفسه ,, ومع الايام بينموالجانب الرجولي عنده لين يكبر ويصير رجال ..
اما لين تهاوش قال بنادي ابوي ويقوم الابو ويفزع حق ولده ,, ما اعتقد انه هالمشاجرات اللي بين الاطفال تستدعي تدخل الاباء .. الا اذا فيه شي جايد وكبير ممكن ..
لان الاطفال قلوبهم نظيفه لو تهاوشوا اليوم بكرة بينسون .. وبتم العداوه بين الكبار .

هذا رايي ,, وقد يحتمل الصواب والخطا

[التيما]

اتفق معاك اخووي صاروا الكبار يتدخلون في مشاكل اليهال ويكبرون الموضوع .. صج نقص عقل .. اذكر في سنه من سنوات شغلي تهاوشو طالبين في المدرسه وعادي يهال .. ثاني يوم الا ام واحد منهم يايه من فجر الله وتنطر وتتحبل للياهل في الصف لين دش قبل الطابور وهات يا ضرب ؟؟ تخيل !! هاي مره عاقله ؟ .. ومره ولي امر طالب بعد تحبل حق ياهل في الصف الرابع ويهاوشه جدام باب المدرسة ويضربه على طلعتي من الدوام .. واروح له اقوله انت ما تستحي .. ويرد علي بعد ويهاوشني !! قلت له لو يا ابو الولد وشاف ولده وتحبل لولدك باجر شبتسوي ؟؟ ناس مو صاحيه صراحه وقله عقل ..

المشكله ان اليهال ينسون لكن الكبار ما ينسون .. اصلا فشيله والله وعيبه عالشنب ..

[مرحوم قطر]

كلامك سليم اخوي 100%

وكلامك كله صح

وهذا هو هذولا يهال يامكثر مايتهاوشون و في نفس الوقت يلعبون مع بعض

بس اقولك الكبار تدخلو و كانت بتصير مشكله كبيره لول ان الله ستر

[ورقــة أمــل]

احنا اهلنا ما كانو يخلونا نطلع لين عند الباب
ولا كنا نروح مع رفيجاتنا ولا مع اي احد اهلنا ما يعرفونه عدل
وتقريبا طفولتنا كلها راحت في الدراسة.. لدرجة ان حتى بنات عمي وخالي ماكنا نروح لهم عشان خوف اهلنا منهم لانهم كسلانين واحنا شطار يمكن هالشي ياثر علينا ويمكن يعلمونا شي غلط وبيخربون عقولنا..
الحين يوم كبرنا قمنا نحس ان احنا ورا والناس قدام كنا احنا عايشين في الثمانينات والعالم في 2007
اي مشكلة تصير نستغرب ونقول شلون جذي صج الدنيا فيها هالنوعية من الناس؟ ولا يمكن طيبتا زايده واخلاقنا ما تسمح..
اكيد هالشي من خوف الاهل وحبهم لمصلحة عيالهم بس مايدركون ان هالشي يبعدهم عن المجتمع يكبرون ونفسهم ضعيفة مايقدرون يواجهون الدنيا لو عندهم مشكلة كبيرة..يعيشون على الافكار اللي يتعلمونها من امهم وابوهم وبس ولا يتعلمون شي من برىى البيت لان اللي برى البيت مايبون مصلحتهم ويمكن ياثرون على اخلاقهم وتربيتهم....

[مسكين قلبي]

جزاك الله كل خير بصراحه كلامك صح

ويعطيك العافيه عالموضوع

[الطرف الأغر]

السلام عليكم ورحمة الله وبركاته أخوي مرحوم قطر
انا الأخت صاحبة موضوع الطفل والدراسه ،، والموضوع للحين موجود فيه افاده كثيره للمتزوجين و أولياء الأمور الي عندهم اعيال بالمدارس ،، يمكن لان عندهم خبرة وتجارب واعيالهم بالمدارس حاسين بالأزمه الدراسيه أكثر ونظرتهم ممكن تكون قريبه أكثر من أي شخص ينظر للموضوع بمنظار بعيد عن واقع التجربه الشخصيه ،، وفي نفس الوقت أقدر لك مشاركتك لأني طرحت المشكله عشان أشوف ارائكم و وجهات النظر ولولا اختلاف وجهات النظر ما كنا استفدنا شي وتعلمنا الجديد والمعاكس ،،

أما بالنسبه لهواش اليهال وحكرته في البيت انا ما أشوف ان في رابط في كبير بينهم ،، يعني مثلا انا صج متعبه ولدي في الدراسه بس مثل ماذكرت ( تقدر ترجع للموضوع ) ان الولد ذكي ما شاء الله وكلامه تغير وشخصيته تغيرت ،، و وقت الاجازات والعطل دايما مع خواله في البر و البحر وحتى سفرات للعمره يروح معاهم مب مرتبط فيني كأن ماله الا انا ،،
وحتى في مشاكله وهواشه مع اليهال صج صاير فرعون ومحد يسلم منه ( اذا حد داس له على طرف ) مايسكت الا وهو ماخذ حقه ،، وانا علمته على هالشي :) ،، ادري في ناس بيقولون غلط ،، لكن من صغره أقوله ما بيك اتيني و اشوفك اتصيح تقولي فلان ضربني انا مالي خص ،، تاخذ حقك بايدك ،، انا ما اتدخل ،، لكن مستحيل حد يغلط عليه صاير شري بس يعجبني انه مايخلي حقه ،، لو من يوقف جدامه ،،

نقطه ثانيه أخوي ،، اي نعم ما أخلي اعيالي يطلعون برا البيت ولا بحش ريلهم حش
الدنيا اخوي تغيرت مب أمان مثل قبل ،، الحين اليهال بو 12 و 14 مالهم أمان
ولو انا ما اعرف ان سالفه صج صايره لجارتنا مع ولدها بو 7 سنوات من ولد جيرانا الي عمره 12 سنه بقول كلام غير ،، لدرجه ان معلمتهم ان مايكلمون حد ولا يردون على حد في حال وقفو عند باب الحوش ،، واذا حد تصرف معاهم تصرف مشكوك فيه خذو رقم سيارته
وصارت على فكره شباب يتحرشون عند اليهال الي عند بيت جيرانه ،، لان اعيالهم كله في السكه مهملين ،، واعيالنا مب سبيل ولي فات الفوت ما ينفع الصوت وغلطه مثل ذي ممكن تدمر حياه طفل واسره بأكملها ،، الله يحفظهم ان شاء الله

يبون يلعبون عندهم اعيال خوالهم وعمامهم و ربعهم الي انا اعرف امهاتهم واباءهم من ؟ واشلون اخلاقياتهم ،، واشلون اخلاق رفيجه واذا كلامه لبق ولا لأ ،،
زمن الهياته بالشوارع وهاي ولد فريجنا انتهى ( انتهى زمن العصر الجميل )
اما تدخل الكبار في مشاكل الصغار اشوفه قلة عقل ،، هم صغار يتصافون مع بعض ولا يشيلون بقلوبهم ،، احنا انتدخل ليش ؟

ومع ذلك الكل يسعى للمثاليه في تربية أبناءه ،، البعض عندهم القدره ان يكون ورا ولده في كل صغيره وكبيره عشان يكون رجل بمعنى الكلمه ينمي اسلوبه وشخصيته ويكون رفيجه ولزيمه ،، والبعض مخلين عيالهم تربية البركه مع انها ماتنفع هالايام ،، يسوي الي عليه والباقي على الناس والناس أجناس ،،
فلا تستغرب أخوي من الموضوع الي طرحته ،، الي يهتم في اعياله ويتمنى انهم يكون الأحسن والأفضل بيفكر مثل تفكيري و أكثر عشان مصلحتهم

تقبل رأيي أخوي مرحوم قطر بصدر رحب ،، وشكري وتقديري لك

أختك / الطرف الأغر

[امـ حمد]

كلامك كله صح يعطيك العافيه