محطات في حياة الجني (6) الدراسة و الواجبات

[الجني]

بسم الله و الحمد لله و الصلاة و السلام على رسول الله
و على اله و صحبه اجمعين

الجني مع الدراسة و الواجبات

كنت اعود الى البيت محملاً بالواجبات بين حفظ و نسخ و حساب ,

صحيح ان الحاجة ام الاختراع , فلم يكن مصطلح الدروس الخصوصية معروف

على الأقل في معظم الفرجان و كان الكثيرون من الاولاد يعيدون الصف ,

سنه و سنتين و ثلاثة و اكثر , لذا كان الكثير من الناس يخشون على اولادهم

الرسوب في المدرسة و اعادة السنة , كما توجد الكثير من البيوت

من لا يهتم بدراسة ابنائهم , و هذا الوضع كان يضع عبئا كبيرا على الاهالي

الذين يخشون على اولادهم الرسوب بسسب ميول و رغبة ابنائهم

للعب مع الاولاد من لا يهتمون بدراسة ابنائهم .

و اعجب من الدراسة في ايامنا هذه مع المدارس الخاصة حيث ان جميع الطلبة

ينجحون سواء درسوا ام لم يدرسوا طالما ان الرسوم المدرسية تدفع .


نرجع لبطلة الفلم امي .

اعطتني قوطي صلصل فيه 100 حبة نخي ني (غير مطبوخ)

و علمتني الحساب و هي لا تقراء و لا تكتب .

كانت تعلمني 5 + 3 =

فتخرج 5 حبات نخي من القوطي و تحطها في صوب ,

ثم تخرج 3 حبات اخرى من القوطي ايضأً و تحطها في صوب ,

و تعلمني احسب مجموع 5 و 3

ليكون الناتج 8

و تعمل نفس الشي مع عملية الطرح ,

فتخرج 10 حبات نخي من القوطي

و تأخذ منها 4 حبات و تضعها على جنب

و تكون قد اوجدت المعادله لـ 10 – 4 = 6


و عندما دخل و لدي المدرسة اعطيته قوطي فيه 100 حبة نخي

و علمته نفس الشيء و استانس على الطريقة و سألني عن من

علمني الطريقة فقلت له البروفسوره امي


اما بالنسبه للحفظ فقد كنت اذهب الى جدي رحمه الله

و كان ضريراً و حافظاً للقرآن و كان منظر مضحك ,

كيف رجل اعمى يسمّع لولد يقرأ ,

و كنت عندما اغلط في القرآءة كان يردني و يصححني


و لما نجحت اعطتني امي 5 ريالات لكي اشتري 10 غراش بيبسي

لكي اوزعها (حلاوة النجاح) ,

لكل غرشة ربع ريال قيمة البيبسي و ربع ريال تأمين على الغرشة قابله للاسترداد

و ثاني يوم انترس البيت بما لذ و طاب من الاكل من بيوت الجيران

ابتهاجاً بنجاح الجني و كأن ولدهم اللي نجح


كنت احن على سيكل و كان صعب المنال و لكن دبروا لي سيكل مستعمل

ابو 3 تواير اللي فيه سله جدام و كان منه لونين احمر و ازرق و كان نصيبي الاحمر ,

مشمخ شوي بس ماشي حاله . و كنت طاير من الفرحه بالسيكل .

بس مشكلته انه كل شوي يطيح الصنقل (الجنزير) و

ارفع و ركب الصنقل على البكرة و لف البيدر (Pedal)

شوي شوي ليما يركب الصنقل على البكرة , و اعاود الاستمتاع بركوب السيكل .

بس السله سوت لي مشكله مع امهاتي نسوان الفريج

صرت خدمة مطراش , اروح اجيب اغراض من الدكان و توصيل المنازل

و اذ تأخرت قالت لي احداهن

"شبلاك يا الجني , وراك بطيت عليه "

"طاح الصنقل مرتين و قعدت اركبه"

استعملت السيكل كم يوم و بعدين اختفى

علشان اعرف ان السيكل كان اعاره للجني كم يوم عن خاطره

لتبدأ عيارة عيال الفريج لي "وين سيكلك"

و انا اللي كنت كاشخ عليهم بالسيكل


و ما هي الا كم يوم و عاد ابوي من دخان

فركضت و بشرته بانني نجحت فاستانس

و طلبت منه سيكل فوافق

و العصر يودني من يدي و رحنا نشتري السيكل

الام تعطي الاحساس بالحنان و العطف و الرأفه

و الاب يعطي الاحساس بالقوة و الكبرياء و الشموخ

و عقب ما اشتريت السيكل

و اخترت اللون الازرق

بخلاف الاحمر المستعمل

و كان ابوي يمشي عائداً الى البيت

و انا اسوق السيكل وراه و ادور جدامه

و الجني كان في تلك اللحظات يسوق السيكل فوق السحاب

و صلى الله على سيدنا محمد و على اله و صحبه و سلم



محطات في حياة الجني (5) الجني و التلفزيون
http://www.qatarshares.com/vb/showthread.php?t=142812

محطات في حياة الجني (4)
http://www.qatarshares.com/vb/showthread.php?t=142592

محطات في حياة الجني (3)
http://www.qatarshares.com/vb/showthread.php?t=142272

محطات في حياة الجني (2)
http://www.qatarshares.com/vb/showthread.php?t=142031

محطات في حياة الجني (1)
http://www.qatarshares.com/vb/showthread.php?t=141863

[بدور]

انا اول وحده أرد بس عشان تعرف اني متابعه جيده لذكريات الجني


وناااااااااسه وربي حياة ما تتعوض وماضي لايمكن نسيانه


عساك عالقوه ويعطيك العافيه ومبروك عليك السيكل الازرق :nice:

[AL-ZAINA]

روووووووووعه محطاتك يالجني

ذكرتنا بايام اول وايام السياكل <<<<< هالبنت تموووت عالسياكل

مب الحيت سكوتر وسكيتنج وسوالف ماعرفنا لها

يعطيك العافيه اخوي وكثر علينا من محطاتك الحلوه

[سهم طايش]

لله درك يا الجني على كتاباتك

الف شكر لك

اهم شي الصنقل ما عض الثوب و طبع الآيل على الثوب

[قطر]

:strong:strong:strong

متااااااااااابع وبقوة


جزاك الله خير :nice:

[% ام فهد %]

الله يعطيك الف عافية اخوي الجني

على هذا السرد الرائع

[miss-qatr]

تسلم ايدك على هالسرد الراقي من انسان راقي بافكاره :)


خلني الهمك بالموضوع الجاي :nice: تكلم اكثر عن المدارس وشلون كنتو اتروحون وطبعا انعرف ان اوقات المدارس اتكون بعيده


اخبر ابوي قبل كان يقول ان بعض العيال مايقدرون يكملون الثانوي أو الاعدادي لان المدرسه تكون بعيده عن المنطقه !!!!



يعطيك الف عافيه

[على قد حالها]

اللللللله عليك يالجني والللللللله على بطلة فيلمك اقصد محطاتك وانا مثلك كنت اطحن ابي سيكل لين طلعت من الاوائل واخوي العود شرالي سيكل اخضر بو كراكيش ملونه وكان يومها عيد عندي ...طبعا ماكنت ادري انه شرالي اياه لما قمت من النوم اون امي قالت لي روحي جوفي الحوش شنو فيه؟ وانا عيوني مغمصه وحالتي حاله استغربت من الطلب لكني رحت وجاااااااااااااااان اتفاجأ بالاخضر مرتز حذا الطوفه وجان اركبه وانا متشققه العب فالحوش ...وعقب سندته عالطوفه ورحت اغسل ويهي والبس الجينز لزوم الكشخه وذاك البوت اللي مافوقه فوق وعلى طووووول عالسكه اتفلسلف على عيال الجيران وانا اسوق ورافعه خشمي وهم يطالعوني بتشفق لان سيكلي يديد والعصر طرنا مثل العصابات رحنا دكان محمد سالم الله يرحمه وشرينا ذيج اللزاقات الملونه وكلن قعد في صوب يلزق سيكله الللللللله اياااااااااام حلوووه والله ماتنعاد وماظنتي عيال الحين يفرحون بأي لعبه كثر فرحتنا قبل!

[الجني]

انا اول وحده أرد بس عشان تعرف اني متابعه جيده لذكريات الجني


وناااااااااسه وربي حياة ما تتعوض وماضي لايمكن نسيانه


عساك عالقوه ويعطيك العافيه ومبروك عليك السيكل الازرق :nice:

الله يعافيج يا بدور و شرفني مرورك

روووووووووعه محطاتك يالجني

ذكرتنا بايام اول وايام السياكل <<<<< هالبنت تموووت عالسياكل

مب الحيت سكوتر وسكيتنج وسوالف ماعرفنا لها

يعطيك العافيه اخوي وكثر علينا من محطاتك الحلوه

الله يعافيج و الصراحه المحطات القادمه يبيلها مواضيع الله يجيبها


لله درك يا الجني على كتاباتك

الف شكر لك

اهم شي الصنقل ما عض الثوب و طبع الآيل على الثوب

هههههههههههههههههه
اما يا سهم طايش سالفة الصنقل اللي يعض الثوب عجيبه راحت عن بالي
و بعض احيان يشق الثوب






:strong:strong:strong

متااااااااااابع وبقوة


جزاك الله خير :nice:

الله يجازيك خير اخوي قطر


الله يعطيك الف عافية اخوي الجني

على هذا السرد الرائع

الله يعافيج ام فهد و شرفني مرورج و تعليقج



تسلم ايدك على هالسرد الراقي من انسان راقي بافكاره :)


خلني الهمك بالموضوع الجاي :nice: تكلم اكثر عن المدارس وشلون كنتو اتروحون وطبعا انعرف ان اوقات المدارس اتكون بعيده


اخبر ابوي قبل كان يقول ان بعض العيال مايقدرون يكملون الثانوي أو الاعدادي لان المدرسه تكون بعيده عن المنطقه !!!!



يعطيك الف عافيه

تسلمين اختي للتعليق الراقي
صحيح الكثير من الطلبه يشيل هم الذهاب و الاياب للمدرسه


اللللللله عليك يالجني والللللللله على بطلة فيلمك اقصد محطاتك وانا مثلك كنت اطحن ابي سيكل لين طلعت من الاوائل واخوي العود شرالي سيكل اخضر بو كراكيش ملونه وكان يومها عيد عندي ...طبعا ماكنت ادري انه شرالي اياه لما قمت من النوم اون امي قالت لي روحي جوفي الحوش شنو فيه؟ وانا عيوني مغمصه وحالتي حاله استغربت من الطلب لكني رحت وجاااااااااااااااان اتفاجأ بالاخضر مرتز حذا الطوفه وجان اركبه وانا متشققه العب فالحوش ...وعقب سندته عالطوفه ورحت اغسل ويهي والبس الجينز لزوم الكشخه وذاك البوت اللي مافوقه فوق وعلى طووووول عالسكه اتفلسلف على عيال الجيران وانا اسوق ورافعه خشمي وهم يطالعوني بتشفق لان سيكلي يديد والعصر طرنا مثل العصابات رحنا دكان محمد سالم الله يرحمه وشرينا ذيج اللزاقات الملونه وكلن قعد في صوب يلزق سيكله الللللللله اياااااااااام حلوووه والله ماتنعاد وماظنتي عيال الحين يفرحون بأي لعبه كثر فرحتنا قبل!

ههههههههههههه
طلع الصج و طلعتي بنت الفريح
بس ما كان عندنا جينزات اول
انتي اكيد ساكنيه في فريج الزمالك هههههههههههه

شرفني مرورج و تعليقج اختي

[المهاجر]

ما زلنا متابعين للاحداث المثيره

بالفعل محطااات تستحق المتاابعه

كم رجعنا وحنينا للماضي البعيد

كم كان جميلا وممتعا

كم كانت المحبه تجمعنا في الفريج

يسلمك ربي يالجني

[الطرف الأغر]

أحلى شي النخي عجبتني الحركه ،، انا مع اعيالي اول ما علمتهم الحسبه نفس الطريقه بس بالاقلام مب بــالنخي ههههه ،، الله يرحم أيام لول

عجبتني هالمحطه وايد ،، يمكن لأني يوم صغيره كنت ماعرف اركب سيكل الي هو طبعا سيكل اخوي الي اكبر مني بسنتين بو تايرين ،، كل اشوي اطيح ولا ادعم طوفه واذا في هوز ممدود في الحوش ،، أنسى اني اسوق عشان ما اطيح

والحين نسوق سياره ،، دنيــا :o

شكرا لك أخوي الجني

[Qa6ar]

اهم شيء الصنقل والبيدر كل يوم وكل شوي تنزل وتركب

لاهنت اخوي

واضح واضح

[Pro]

سالفة السيكل عندي سالفة
حزينه وفيها بعض الإجرام
كان حلم حياتي اشتري سيكل
لأن الفكرة كانت مرفوضة بالكامل
و السبب طبعا أخواني الكبار
-
-
تميت احن كل سنة
ابي سيكل أبي سيكل
المهم الوالد حن علينا (انا مع أخواني الصغار) و شرا لنا سياكل
و أشترط علينا بعدم الخروج من البيت
و كان السيكل إلي عندي تايرين وتايرين صغار
عشان ما اطيح
-
-
المهم طلب الوالد كان صعب التنفيذ
لأن حوش البيت كله 2 متر 2 متر
(الوالد مستتغل الحوش مخزن)
-
-
و بدأت العملية الإجراميه
خرجت من البيت بالسيكل
و لكن ياريتني ما خرجت
عايروني عيال الفريج
بسبة تواير التوازن (التواير الصغار)
-
-
و بكل إصرار جبت العدة و أفك تواير التوازن
و الوالدة تسأل ليش تشيل التواير حرام عليك تخرب السيكل
و انا أقولها بكل ثقة انا مهوب ياهل اقدر اسوق بدونهم
-
-
المهم بدت التجارب الأولى في البيت
و عاد خذ الضحك من الأخوان و انا أحاول بكل جهد
و في قلبي أقول أتفشل في البيت و لا أتفشل في الفريج
و بعد عدة أيام عرفت أسوق السيكل بكل سهوله
-
-
و الأن جاء تنفيذ الخطة الثانيه
و هو الخروج بحريه
-
-
خططت من الصبح و في رمضان مع ولد فريجنا
كان عندي مركز تحفيظ قرآن الصبح
-
-
طبعا ما رقدت الفجر هربت السيكل عند ولد فريجنا
و رجعت البيت بكل ثقة
-
-
و طبعا قوموني للمركز قمت بنشاط
بسبب إني ما رقدت أصلا
-
-
و أطلع من البيت على طول بيت رفيجي
و كان ناطرني
-
-
و طلعنا نتمشى بين الفرجان
ساعات من المتعه و الفرح
و الساعات تمر علينا مرور الكرام
ما حسيت بنفسي من الوناسه
-
-
رجعت البيت ولا جنه صاير شيء
بالخش دخلت السيكل
و من التعب حطيت راسي و رقدت
-
-
و اليوم الثاني و الثالث و الرابع
مشيت على نفس الخطة
لين جا اليوم المحتوم
رحت مستانس من الصبح عند رفيجي
و أول ما جفته سألني جفت سيكلي قلت له في بيتكم
قالي تصدق يمكن باقوا سيكلي و سيكلك
-
-
طبعا انصدمت و انقهرت
و رجعت أحن على الوالد أبي سيكل
قالي انسى خليتك تهيت و سكت عنك
و هذا جزاءك (و انا على بالي محد يدري عني)
-
-
بعد أسبوع جفت هيكل سيكلي
عرفت من وقتها ان هناك عصابة
تشليح سياكل في الفريج
-
-
و رجعت انتظم في مركز التحفيظ

[سهم طايش]

بعدين جات موضة الاريل في السيكل

و شلوشن تيب على اسيام الرنق الوان و اشكال تقول سيكل بتان

و بعدين نزل سيكل بومسند اووووووو ما فوقه فوق اللي عنده سيكل بومسند

ايام كان كل شي له طعم حلو رغم بساطة العيش و الفقر

اللحين الصبي يمشي و وراه خدامتين

اول من توصل من المدرسه تحذف الشنطه و تطلع لين المغرب و ترجع املح و مغبر من اللعب في السكيك في الشموس لكن هالسكيك طلعت رجال يعتمدون على نفسهم لا يعرفون خدامه و لا غيره 0
و الفلعات في الراس لا تعد و لا تحسب ما تبين الا لين سويت قرعه غير اللجمه في ابهام الريل من العناصيص في الشارع 0

ايااااااااااام راحت

[على قد حالها]

ههههههههههههه
طلع الصج و طلعتي بنت الفريح
بس ما كان عندنا جينزات اول
انتي اكيد ساكنيه في فريج الزمالك هههههههههههه

شرفني مرورج و تعليقج اختي[/QUOTE]


من قالك ياخوي مافي جينز الا في ونص لين الحين اتذكر الدوّار لما يمر صوبنا ويقول دوّاااااااار دوّااااااااار وتهد امي الطباخ وتروح له ويفج الخلقه ويطلع الشماطيط اللي عنده وشرت لي ذاك البنطلون الجينز بو حمالي مع تي شيرت احمر ههههههههههه لين الحين اذكره والله ولبسته يدام الريال وقعدت ادور فيه فالسكه اون لابسه شي يديد :eek2::eek2:

[على قد حالها]

بعدين جات موضة الاريل في السيكل

و شلوشن تيب على اسيام الرنق الوان و اشكال تقول سيكل بتان

و بعدين نزل سيكل بومسند اووووووو ما فوقه فوق اللي عنده سيكل بومسند

ايام كان كل شي له طعم حلو رغم بساطة العيش و الفقر

اللحين الصبي يمشي و وراه خدامتين

اول من توصل من المدرسه تحذف الشنطه و تطلع لين المغرب و ترجع املح و مغبر من اللعب في السكيك في الشموس لكن هالسكيك طلعت رجال يعتمدون على نفسهم لا يعرفون خدامه و لا غيره 0
و الفلعات في الراس لا تعد و لا تحسب ما تبين الا لين سويت قرعه غير اللجمه في ابهام الريل من العناصيص في الشارع 0

ايااااااااااام راحت


:nice::nice:والله انك صاااااادق ياخوي

اما سالفة الفلعات هههههههههههههههههههه موتني من الضحك كنت اتطنز على ولد جيرانا رفيجي:whistling:( ايام اول عادي مب الحين) يحليله كل مايقرع اعيب عليه وكان من يقرع يلبس قحفيه مع انه من العاده مايلبسها كللللش:sneaky:

[رايق]

ايييييييه يا الجني .. دايما ذكريات الطفولة تكون ممتعة


أنا اذكر في ايام طفولتي كنت دايما أغني Hello Kitty Hello Kitty :D


مبدع يالجني .. واصل

[الجني]

ما زلنا متابعين للاحداث المثيره

بالفعل محطااات تستحق المتاابعه

كم رجعنا وحنينا للماضي البعيد

كم كان جميلا وممتعا

كم كانت المحبه تجمعنا في الفريج

يسلمك ربي يالجني


الله يسلمك اخوي المهاجر

و يا ليت يرحع شيء بسيط من راحة البال

[الراقية]

محطاتك رائعة يالجني

ومبروك على أول سيكل لك

[الجني]

أحلى شي النخي عجبتني الحركه ،، انا مع اعيالي اول ما علمتهم الحسبه نفس الطريقه بس بالاقلام مب بــالنخي ههههه ،، الله يرحم أيام لول

عجبتني هالمحطه وايد ،، يمكن لأني يوم صغيره كنت ماعرف اركب سيكل الي هو طبعا سيكل اخوي الي اكبر مني بسنتين بو تايرين ،، كل اشوي اطيح ولا ادعم طوفه واذا في هوز ممدود في الحوش ،، أنسى اني اسوق عشان ما اطيح

والحين نسوق سياره ،، دنيــا :o

شكرا لك أخوي الجني

شرفني مرورج اختي و تعليقج

و السيكل يعتبر من افضل الرياضات


اهم شيء الصنقل والبيدر كل يوم وكل شوي تنزل وتركب

لاهنت اخوي

واضح واضح

تسلم اخوي Qa6ar

شرفتني بمرورك و تعليقك

واضح واضح



سالفة السيكل عندي سالفة
حزينه وفيها بعض الإجرام
كان حلم حياتي اشتري سيكل
لأن الفكرة كانت مرفوضة بالكامل
و السبب طبعا أخواني الكبار
-
-
تميت احن كل سنة
ابي سيكل أبي سيكل
المهم الوالد حن علينا (انا مع أخواني الصغار) و شرا لنا سياكل
و أشترط علينا بعدم الخروج من البيت
و كان السيكل إلي عندي تايرين وتايرين صغار
عشان ما اطيح
-
-
المهم طلب الوالد كان صعب التنفيذ
لأن حوش البيت كله 2 متر 2 متر
(الوالد مستتغل الحوش مخزن)
-
-
و بدأت العملية الإجراميه
خرجت من البيت بالسيكل
و لكن ياريتني ما خرجت
عايروني عيال الفريج
بسبة تواير التوازن (التواير الصغار)
-
-
و بكل إصرار جبت العدة و أفك تواير التوازن
و الوالدة تسأل ليش تشيل التواير حرام عليك تخرب السيكل
و انا أقولها بكل ثقة انا مهوب ياهل اقدر اسوق بدونهم
-
-
المهم بدت التجارب الأولى في البيت
و عاد خذ الضحك من الأخوان و انا أحاول بكل جهد
و في قلبي أقول أتفشل في البيت و لا أتفشل في الفريج
و بعد عدة أيام عرفت أسوق السيكل بكل سهوله
-
-
و الأن جاء تنفيذ الخطة الثانيه
و هو الخروج بحريه
-
-
خططت من الصبح و في رمضان مع ولد فريجنا
كان عندي مركز تحفيظ قرآن الصبح
-
-
طبعا ما رقدت الفجر هربت السيكل عند ولد فريجنا
و رجعت البيت بكل ثقة
-
-
و طبعا قوموني للمركز قمت بنشاط
بسبب إني ما رقدت أصلا
-
-
و أطلع من البيت على طول بيت رفيجي
و كان ناطرني
-
-
و طلعنا نتمشى بين الفرجان
ساعات من المتعه و الفرح
و الساعات تمر علينا مرور الكرام
ما حسيت بنفسي من الوناسه
-
-
رجعت البيت ولا جنه صاير شيء
بالخش دخلت السيكل
و من التعب حطيت راسي و رقدت
-
-
و اليوم الثاني و الثالث و الرابع
مشيت على نفس الخطة
لين جا اليوم المحتوم
رحت مستانس من الصبح عند رفيجي
و أول ما جفته سألني جفت سيكلي قلت له في بيتكم
قالي تصدق يمكن باقوا سيكلي و سيكلك
-
-
طبعا انصدمت و انقهرت
و رجعت أحن على الوالد أبي سيكل
قالي انسى خليتك تهيت و سكت عنك
و هذا جزاءك (و انا على بالي محد يدري عني)
-
-
بعد أسبوع جفت هيكل سيكلي
عرفت من وقتها ان هناك عصابة
تشليح سياكل في الفريج
-
-
و رجعت انتظم في مركز التحفيظ

الحمد لله ان الله سلمك

والسيكل بداله كروزر :D


بعدين جات موضة الاريل في السيكل

و شلوشن تيب على اسيام الرنق الوان و اشكال تقول سيكل بتان

و بعدين نزل سيكل بومسند اووووووو ما فوقه فوق اللي عنده سيكل بومسند

ايام كان كل شي له طعم حلو رغم بساطة العيش و الفقر

اللحين الصبي يمشي و وراه خدامتين

اول من توصل من المدرسه تحذف الشنطه و تطلع لين المغرب و ترجع املح و مغبر من اللعب في السكيك في الشموس لكن هالسكيك طلعت رجال يعتمدون على نفسهم لا يعرفون خدامه و لا غيره 0
و الفلعات في الراس لا تعد و لا تحسب ما تبين الا لين سويت قرعه غير اللجمه في ابهام الريل من العناصيص في الشارع 0

ايااااااااااام راحت

ذبحتني من الضحك

ما شاء الله عليك سرد جميل لتاريخ تطور السيكل



ههههههههههههه
طلع الصج و طلعتي بنت الفريح
بس ما كان عندنا جينزات اول
انتي اكيد ساكنيه في فريج الزمالك هههههههههههه

شرفني مرورج و تعليقج اختي


من قالك ياخوي مافي جينز الا في ونص لين الحين اتذكر الدوّار لما يمر صوبنا ويقول دوّاااااااار دوّااااااااار وتهد امي الطباخ وتروح له ويفج الخلقه ويطلع الشماطيط اللي عنده وشرت لي ذاك البنطلون الجينز بو حمالي مع تي شيرت احمر ههههههههههه لين الحين اذكره والله ولبسته يدام الريال وقعدت ادور فيه فالسكه اون لابسه شي يديد :eek2::eek2:[/QUOTE]

اسف تراني قليل درايه بلبس البنات

احنا ثوبك و انجز

باسأل من هي ام سيكل اخضر تدور في الفرجان





ايييييييه يا الجني .. دايما ذكريات الطفولة تكون ممتعة


أنا اذكر في ايام طفولتي كنت دايما أغني Hello Kitty Hello Kitty :D


مبدع يالجني .. واصل

شرفني مرورك و تعليقك يا مبدع منتدانا

[الجني]

محطاتك رائعة يالجني

ومبروك على أول سيكل لك

الله يبارك فيج

مأدم (مقدم) بالبناني

بس يا ليته موجود :eek5:

[فلوه]

بصراااحه أنا من المتشوقين ....لمحطااااتك


مبدع

يعطيك العااافيه

[Pro]

بعدين جات موضة الاريل في السيكل
و شلوشن تيب على اسيام الرنق الوان و اشكال تقول سيكل بتان
و بعدين نزل سيكل بومسند اووووووو ما فوقه فوق اللي عنده سيكل بومسند
ايام كان كل شي له طعم حلو رغم بساطة العيش و الفقر
اللحين الصبي يمشي و وراه خدامتين
اول من توصل من المدرسه تحذف الشنطه و تطلع لين المغرب و ترجع املح و مغبر من اللعب في السكيك في الشموس لكن هالسكيك طلعت رجال يعتمدون على نفسهم لا يعرفون خدامه و لا غيره 0
و الفلعات في الراس لا تعد و لا تحسب ما تبين الا لين سويت قرعه غير اللجمه في ابهام الريل من العناصيص في الشارع 0

ايااااااااااام راحت

إي والله
خاصة سيكل 20 مال البتان
و سيكل 16 الكشخة شوي
بعدين انزلت سياكل بي ام اكس
و لكن المرغوب سيكل البتان
لأنه قابل للزيادات

[الجني]

بصراااحه أنا من المتشوقين ....لمحطااااتك


مبدع

يعطيك العااافيه


جزاج الله خير يا فلوه

و الله يعطيج العافيه

[الجني]

إي والله
خاصة سيكل 20 مال البتان
و سيكل 16 الكشخة شوي
بعدين انزلت سياكل بي ام اكس
و لكن المرغوب سيكل البتان
لأنه قابل للزيادات

اما سياكل البتان اللي انقرضت

يازينها الأول و هي مزكرشه بالالوان

و الاكسسوارات

[ناصر العمادي]

يعطيك العافيه على الروائع ..... والذكريات الأروع .....

ومتابعين بكل اهتمام

جزاك الله كل خير

والله يوفقك يارب

[khaldoon]

اسلوب طرح شيق وجميل وقصص جميله والله يديم عليك النعمه يا رب

[لولوتي]

الله على سوالفك الطيبه يالجني
ماشاء الله عليك
بالفعل ابدعت

بكل صراحه كلما كنت اشوف عنوان محطات في حياة الجني كنت اقول اكيد موضوع عن بلده زايرها الجني وحاط صور اكيد وسوالف عن هالدوله ومعالمها
وكنت ماادخل الموضوع

بس اليوم اكتشفت الكنز:thumbup::thumbup::thumbup:
وحتى لو اني اكتشفته متأخر استمتعت به جدا جدا جدا

رحم الله والديك دنيا واخره وجزاك الخير على هالمواضيع الحلوه
ولا تحرمنا من جديدك

[@ دانتيل قطر @]

مشكور
والله يعطيك العافيه
وعساك عالقووّه
وماقصرت في برّكّ لأمكّ
الله يعطيها العافيه(أحسها حنوونه وايد)
وبدون مجامله
حزاوويك مانمل منها
وتسلم
:thumbup:

[nor85]

روعه كل مشاركه احلى من الثانيه

[nor85]

روعه كل مشاركه احلى من الثانيه