المساعد الشخصي الرقمي

مشاهدة النسخة كاملة : بورصة الدوحة تتوقع غزوة كويتية.. وتخافها



إنتعاش
12-03-2005, 11:40 PM
مع قرب دخول قرار السماح للاجانب بتملك الاسهم القطرية حيز التنفيذ الفعلي في الثالث من الشهر المقبل، يبدي المستثمرون القطريون والمتعاملون في سوق الدوحة للاوراق المالية تخوفا متزايدا من رجال الاعمال والمستثمرين الكويتيين بشكل خاص، من دون نظرائهم في دول مجلس التعاون.

يقول رجل اعمال قطري مرموق يعد من كبار المستثمرين في سوق الدوحة المالي «المستثمرون الكويتيون معروفون بحب المغامرة لذلك نخشاهم».

وتابع رجل الاعمال الذي طلب عدم ذكر اسمه «التخوف الوحيد من رجال الاعمال والمستثمرين الكويتيين يتمثل في احتمال سيطرتهم على الاسهم الممتازة وبالتالي قيادة دفة اتجاه اسعارها هبوطا او صعودا».


سيولة مالية ضخمة

واضاف قائلا «الكويتيون لديهم باع طويل في مجال الاستثمار والتعامل بالاسهم، ولديهم سيولة مالية ضخمة يسعون الى استغلالها في منافذ واوعية استثمارية جديدة، لذلك سيكون سوق الدوحة المالي هدفهم المقبل».

ومضى الى القول «المستثمرون الكويتيون مضاربون جيدون، اذا دخلوا سوقا ماليا، فيجب على الجميع ان يكونوا حذرين».

وكان مستثمرون كويتيون زاروا سوق الدوحة المالي مؤخرا لاستكشاف فرص الاستثمار المتاحة في اسهم الشركات المطروحة للتداول.

ذراع طويلة

ويحظى رجال الاعمال الكويتيون بنصيب الاسد من تلك الاحاديث نظرا لما يشكلونه من ثقل كمستثمرين خليجيين لهم «ذراع طويلة» في معظم اسواق المال والبورصات الخليجية والعربية.

بعض تلك الاحاديث تقول «ان الكويتيين اذا دخلوا بورصة الدوحة سيأكلون الاخضر واليابس»، وهناك احاديث اخرى تشير الى ان الكويتيين سيأتون الى سوق الدوحة المالي واضعين نصب اعينهم اهم الاسهم المتداولة وهي اسهم شركات البنوك ثم التأمين، والبعض الآخر من الاحاديث يطالب بوضع آلية معينة تحول دون سيطرة الكويتيين المحتملة على سوق الاسهم القطري.

يعتقد مستثمر الاسهم المعروف في قطر حمد صمعان الهاجري ان التخوف من الكويتيين موجود، مؤكدا ان ذلك يتطلب الحذر من قبل المستثمرين والمتعاملين في سوق الدوحة المالي.

لكن الهاجري لا يجد مبررا لهذا القدر الكبير من التخوف الذي تبديه اوساط المستثمرين ورجال الاعمال القطريين من نظرائهم الكويتيين بشكل خاص، لأن المتعاملين القطريين اصبح لديهم وعي كبير وخبرة كافية في ادارة استثمارات الاسهم.

اقتناص فرص الاستثمار

الا ان مستثمر آخر رفض ذكر اسمه كان له رأي آخر عما اورده الهاجري، يقول «الكويتيون يتمتعون بقدرة كبيرة ومهارة عالية في كيفية التحرك بالبورصة والتعامل مع الاسهم واقتناص فرص شرائها او بيعها»، ويضيف «لذلك لا اعتقد ان احدا من المستثمرين الخليجيين يستطيع ان يضاهي الكويتيين».

ويبدو ان تخوف المستثمرين ورجال الاعمال القطريين من نظرائهم الكويتيين له ما يبرره من وجهة نظرهم في ظل ما يتردد عن انهم - اي الكويتيين - يقفون وراء الارتفاعات الكبيرة التي تشهدها اسعار معظم اوجه النشاط الاقتصادي في السوق المحلي القطري والتي يعتبر قطاع العقارات من ابرزها، حيث يشهد ارتفاعا جنونيا في مستويات الاسعار تجاوزت نسبته الـ 300 في المئة في بعض الاحيان.

وكان وزير الاقتصاد والتجارة القطري الشيخ محمد بن احمد بن جاسم آل ثاني قد عبر عن اعتقاده في لقاء تلفزيوني قبل بضعة اشهر بوجود «اموال غير قطرية» ساهمت في اشعال نار سوق العقارات في قطر.

ويتردد في اوساط القطاع الخاص القطري ان المستثمرين الكويتيين حققوا ارباحا طائلة من وراء ارتفاع سوق العقارات في قطر، وذلك بعد ان قاموا بضخ سيولة مالية كبيرة في هذا السوق الذي ما زال يشهد ارتفاعا متصاعدا دون ان يجد من يستطيع ان يحرك ساكنا لفرملته على الاقل والذي دفع بالعديد من المقيمين الذين اكتووا بناره الى اعادة عوائلهم الى بلدانهم بعد ان انتقلوا الى شقق اخرى مشتركة مع مستأجرين آخرين وبأسعار اقل.

القبس الكويتيه

ضايق الصدر
12-03-2005, 11:50 PM
ان شاء الله هذا يكون من صالح المستثمر القطري
في الفترة الحالية

ابوعلي اليافعي
13-03-2005, 12:09 AM
نسبة ال25%المسموح بتملكهالن تفتح مجال للمستثمر الكويتي باكل الاخضر واليابس كما يذكر التقرير ولا ننسى ان هذه النسبه سيشارك فيها مستثمرون من جنسيات اخرى..عالعموم السوق سوقنا ويجب ان نكون اعرف من الغير فيه وكما يقول المثل((اهل مكه ادرى بشعابها))..

الجوري
13-03-2005, 12:29 AM
الله يستر علينا يابن الحلال


انا من صغار المستثمرين :p :p واجهل الكثير والله يستر علينا

qatar_moon
13-03-2005, 12:51 AM
اي والله الله يستر علينا

ROMA
13-03-2005, 02:13 AM
الله كريم انشاء الله

وياخوى دام بو مشعل موجود الله يطول بعمر مافي خووف
والعب في سوق المناخ وارفع ونزل هناااك

اما اهنيه ما اعتقد الحيله والعب بيمشي
وادم هم بياكلون الايبس لهم والخضر لنا
واحلى تحيه لصغار المستثمرين :)

الوهم
13-03-2005, 04:40 AM
رومااا؟؟؟؟

من يطلع بومشغووول ؟

THE END
13-03-2005, 05:57 AM
ممكن حد يزودنا كم سهم يطلع 25% من كل شركة علشان انعرف

مستثمر كبير
13-03-2005, 07:01 AM
الله يستر والله لانهم شتغلو في بورصة مسقط وتمروها اللله يستر يارب الوضع يخووووووف

الحزين
13-03-2005, 08:41 AM
في اعتقادي الشخصي والمتواضع أن المستثمرين الأجانب وخاصة الكويتيين منهم سيكون تأثيرهم على الهوامير أكثر من تأثيرهم على صغار المستثمرين ، وبما أن العرض والطلب حالياً يتحكم فيه الهوامير فإن الأجانب سيخلخلون تأثير الهوامير لصالحهم . وبذلك سيستفيد صغار المستثمرين نوعاً ما أكثر من الهوامير ..
مجرد رأي شخصي وقد أكون مخطأً في الرأي

الأستشاري
13-03-2005, 11:16 AM
هل الكويتيون لديهم عصى سحريه..... النسبة المسموح بها فقط. . فهل ستذهب كلها للكويتيين ؟؟ كما أن الكويتتين مسموح لهم الدخول في بورصة الدوحةفي 10 شركات الأن فلماذا لايشترون اليوم ؟؟؟؟؟

لاتوجد هناك أي خطوره .......... وعلى الجميع الأحتفاظ بأسهم الصناعات والناقلات والبنوك .......... ........

وتحياتي لكم.......

ابوسعود
13-03-2005, 11:46 AM
شكرا اخوي انتعاش على الخبر

بس اعتقد الخوف ماله داعي وليس له مبرر في ضل الاجراءات الجديده لسوق

ومنهااااااااااااا

1- النسبه المسموح بها لغير القطريين وهي 25% وهذه تحد من مخاطر المستثمر ين
الاجانب واعتقد بانها تعتبر نسبه قليله لاتاثر على السوق التاثير الكبير

2 - اجبار المستثمرين على ايداع المبالغ الكبيره في البنوك وهذا مهم
حتى لا يكون هناك تلاعب او اخطا

سهم طايش
13-03-2005, 01:58 PM
مثل ما قال اخوي الاستشاري كانت هناك عشر شركات يقدرون يشترون منها ما اشوف صار عليها اي تغيير و بعدين هناك نسبة 25 % ما اعتقد بيمتلكونها كلها

اعتقد ما له داعي هالخوف الغير مبرر لازم تكون عندكم ثقة في نفسكم

و اللي ما يقدر على البورصه لا يدخل و خل يتفرج من خارج السوق لين يعرف اصول اللعبه

أبو عبدالعزيز
13-03-2005, 03:06 PM
يحتاج لو حد يخبرنا بالتفصيل عن اسلحة المستثمرين الكويتيين واساليبهم القتالية
جتى نحصن دفاعاتنا ونصد العدوان على أعقابه

بوناصر-قطر
13-03-2005, 10:25 PM
اخوي ابوعبدالعزيز

داش حرب انت الله يهداك مب بورصه :)

منصور
14-03-2005, 03:03 PM
25 بلمئه لا تسمح باكل الاخضر واليابس

المستثمر الكويتى
14-03-2005, 03:17 PM
السلام عليكم


يا ويلكم جايينكم جايينكم بنكتسح السوق عليكم


بنأكل الاخضر واليابس زين بعد اذا ما نأكلكم هههههههههههههههههههههه


امزح معاكم بتاخذون فليساتنا وتضحكوووون علينا


احب ابين بعض المعلومات للاخوه


ترى السعر الاساسى للصناعات هو 400 ريال لان اربع شركات ومن اقوى الشركات وبعد شركات قائمه وتطحن ليل نهار فى الانتاج بس كبار المستثمرين يهضمون حقها علشان يخلوووون صغار المستثمرين يفرحون بشويه الفائده اللى مب مصدقين فيها


ومممكن توصل الى 600ريال



بالنسبه للكهرباء السعر الاساسى هو 250 ريال لان الدوله معتمده على الشركه لاحتياجات التطور والنمو العمرانى

والدعم الحكومى للمواطنين لن يستمر كل شى له نهايه


بالنسبه المخازن انتبهوا راح ترتفع الى 185 ريال مثل المخازن الكويتيه كانت بأقل الاسعار والان اعلى سعر فى بورصه الكويت



وتذكرووووا كلامى


فى النهايه رددو معى "يسلم لنا ابومشعل راعى المكرماتى "

THE END
14-03-2005, 05:06 PM
الارزاق بيد الله ( لو جريت جري الوحوش غير رزقك ما تحوش حتى لو جو الوحووش)

Alemadi
14-03-2005, 07:43 PM
25% يعني يقدرون يشترون 70,000,000 سهم من النافلات وبسهوله بيقدرون يتحكمون فيها في الطلوع والهبوط وخاصه ربعنا مالهم خض في البورصه خير شر ومايعرفون متى يشترون ومتى يبيعون
الله يستر

بو صالح
15-03-2005, 11:07 PM
والله الكويتين اذا دشوا مكااااان ( اقلبوه فوق حدر )

قبل ما كان مسموح لهم بالدخول قبل قرار التملك

واطلبوا انهم يدشووون ايام ( الشيخه خليفه بن حمد ) ولكن الشيخ قالهم لا

لانه كان يدري بهم

ومره كنت قاعد مع شباب خليجين بجامعه امريكيه ( الي يكلمني كويتي ) ها اشلون الدوحه

والله تمام

يقولون خير عندكم

عندنا وعندكم الخير بس من اي ناحيه

الوالد يقول

اشلون

الوالد عندكم موجود بالدوحه مع هواميير اكوييتين

طيب

قالوا الاستثمار بقطر بيحقق لهم ارباح 500 %

وهذا الي صار

شوفوا اشلون طارت الاراضي والبيوت وكل شي ولع ( واتقولون ما يقدرون ايسوي شي )

هذيله ناس اذا دشوا ايدشوووون جرووووب مع بعض ويطلعوووون مع بعض


مثل ما سووا في اماره اماراتيه ( اعتقد الفجيره او بني ياس ) ما ادري بالضبط

المهم دشوا الكويتين وشروا الاراضي والفلل ونفس الحاله الي عندنا

لين ما وصلوا الاراضي بنص مليون ومليون وبعدييييين اطلعواااا

وطبعا الواحد لما يشوف الاراضي اتطير ( ايقول ) يله خلنا نلحق على شي

واخرتها الرجال يتدبس فيها ( يشتريها بغالي ) وبعدين ما يلاقي حد يشتريها

لان الاسعار اضربت توب

ولا يومكم الاراضي فاضيه ( العالم لين الحين اتسدد الديون )


الزبده

الله يستر منهم الكويتيين

قـطـريـه
15-03-2005, 11:22 PM
والقطرين مب هينين
ولا حاطين اي اجنبي في باله

والحمدلله عندنا القدره على المحافظه علىاقتصادنا
والقائمين على الاقتصاد القطري

عندهم القدره على مواجهه من يحاول التلاعب باقتصادنا,,,,,,,,,,,

المستثمر الكويتى
16-03-2005, 01:25 AM
الكلام مب انه مافيه ناس عندكم يحافظوووون على الاقتصاد او مواجه التلاعب

الكويتيون ماراح يدخلووون الا قانونييين ولافيه تلاعب

بس راح يلعبوووووونكم هيلا هووووبا فوق تحت بعدين يخلووونكم على الارض فجاءه


والكلام هذا مب تقليييل منكم ولكن من شطارتهم وخبرتهم فى الاسواق الماليه و ووفرة السيوله عندهم

شوووفوووو وين مايرحووون يسببون ربكه

ناس بالعربى مثل ما قال عبدالحسين عبدالرضا يحكوووون الدينار لما يطيروون صبغته

ابن الوكره
16-03-2005, 12:04 PM
الله يهديكم لا الكويتين و لا غيرهم لهم سبب في تغير السوق ... الانتعاش اللي حاصل في البلد سببه الرئيسي الطفره الكبيره في الاقتصاد القطري خصوصا قطاع الغاز القطري و الزيادة الكبيرة في عدد الوافدين لما تتطلبه هذه الطفره من ايدي عامله .... و اللي ماهو مصدق يشوف شوارع الدوحه شلون صارت الزحمه الخياليه فيها وفتح الطرق و الجسور ولا ملحقين عليها ..... ولا بعد بتقولون الكويتين جابوا سياراتهم عندنا :)

بالمناسبة شركة الايجارة و منشاءات المدينة الرياضية ( اسياد 2006 ) لها دور بس غلطان اللي يفكر ان العقار بالذات راح ترجع و تنزل اسعاره .... لانه قطر تمشي لقدام و مشاريع الغاز في ازيديا ولله الحمدلله والبلد تستقطب يوم بعد يوم وافدين اكثر يعني ابشروا بالخير ياهل قطر شركات مساهمة ( مكرمات ) و سوق عقارات يزداد الطلب عليه

القطرية
16-03-2005, 12:21 PM
اتوقع السوق بعد 3/4 بيكون مب مستقر يوم فوق و يوم تحت...

قـطـريـه
16-03-2005, 01:36 PM
المستثمر الكويتى ليس تقليل من قدره لكويتيين
لكن على القطرين صعب يلعبون هيلا لان بيردونهم بيلا

رجل الاعمال القطري ليس بهين
واكبر دليل قوة الاقتصاد القطري والحمدلله
ثقتنا فيهم كبيره,,,,,,,,,,
البورصه القطريه ليست الساحه الوحيده الي يستمثر فيها
القطري فهوه عنده خبره كبير في ساحات المضاربه
ويعرف كل الاساليب الي يعلب فيها المضاربين
هلا فيكم يوم 3 ابريل
بتتعلمون اللعب على الطريقه القطريه العنابيه

وياهلا................

السهم الازرق
16-03-2005, 02:59 PM
يا اخوان و اخوات هدو اللعب شوي ترى السالفه مب مستاهله كل هالحزازيات !!
هاذي بورصه مب مباراة كاس خليج !!
و بالعكس انا ارحب بدخول الاجانب للبورصه لانها تخدمنا احنا يا صغار المستثمرين و لا تخدم الكبار اللي همهم تجميع اكبر كميه من الاسهم بأرخص الاسعار للحصول على مناصب في مجالس الاداره و غيرها من المنافع الشخصيه لهم ..

تدفق السيوله الى السوق من شأنها ان ترفع مؤشرات السوق الى اعلى و اعلى و تعزز سعر السهم من خلال زيادة الطلب عليه و هذا ما نبحث عنه احنا الفقاره المساكين ..

اللي بقوله ان احنا الخليجيين دايما تاخذنا العزه بالنفس لدرجة انها تعمينا عن مصلحتنا ..

اسمحولي عالاطاله و اتمنى ان الموضوع ما ياخذ اكبر من حجمه و ارجع و اقول يا حي الله كل الاجانب و فلوسهم .

سعادة الوزير
16-03-2005, 03:45 PM
انا بس ابي اعرف وين المشرفين عن هالكلام الي ما اقدر اسميه الا (اسمحولي على التعبير) فاضي .. يا يبا كلنا اخوان وعيال عم وتربطنا امور اعلا واكبر من الفلوس والبورصة .. ثاني شي ، الكويتيين يدخلون حالهم حال غيرهم .. والدولة اسمحت لهم مثل ما اسمحت لغيرهم .. والدولة فيها قوانين ولوائح لا كويتيين ولا قطريين ولا اي حد يقدر انه يخالفها .. والدليل على ذلك الي صار الشهر الي فات .. ناس كانوا فوق السحاب نزلوا تحت الارض .. بسس مخالفة القوانين .. وفي النهاية اقول للمشرفين ياريت لو تسكرون هالموضوع لانه موضوع فاضي ولا يسبب الا وجع الراس.

قطري
17-03-2005, 01:49 AM
المستثمر الكويتى
اهلاً بك في بلدك الثاني قطر
انا قرأت ردودك كلها ولاحظت في شويت مديح على شوي استهزاء
ولاحظت بعض الاستياء من اخوانك القطرين من كلامك.
ارجو منك احترام اخوانك القطرين في المنتدى...وهذا رجاء من اخ لك
شكراً لك

المستثمر الكويتى
17-03-2005, 02:06 AM
ياجماعه شنو السالفه يضيييق صدركم مداكم قريب


محد يضحك

بعدين انا قلت من الاول ما اقلل منكم يا جماعه


واذا غلطت فحقكم على خلاص يبا نسكر الموضووووووع


بس انا حبيت ابين لكم شى انا اعرفه واشوف شى انتم ما تشووووفوووونه


بس اللى باقوووله شووووفوووا شنو راح يصير لما يدشوووون الكويتيوووون والنتائج ليست لحظيه وانما على طول المدى البعيد


ومره ثانيه لحد ياخذ بخاطره علينا وصج ما ينمزح معاكم

السهم الازرق
17-03-2005, 03:16 AM
يا المستثمر الكويتي مع احترامي لك .. ما عندك سالفه!!

لو تسكت وايد احسن ولا تزيد الطين بله ..

على فكره .. انا كويتي و تضايقت من طريقة كلامك و اسلوبك .. عيل ما الوم اخواني القطريين اذا تضايقو من كلامك ..

لازم ترتقي شويه بأسلوبك و طريقة كلامك مع الناس لانك تمثل بلدك ..

و لا تنسى ان انت في الانترنت مب في الديوانيه يعني احنا ما نشوفك اذا انت تضحك او تتكلم جد !!

و مافي داعي للكلام البايخ اللي ذكرته ..

و خل اللي تشوفه واللي احنا ما نشوفه لك ..

و انا كويتي و زوجتي قطريه و اشتغل في البورصه بأسمها من زمان و غيري من اخواني الكويتيين ايضا معاي والحمدلله خير قطر مغطي اهلها و مقيمينها ..

كلمه اخيره .. اتمنى تخللي تأثير المدى البعيد اللي تتكلم عنه بيد رب العباد لان هو وحده عالم الغيب .

ملاحظه : اتأسف من جميع اخواني و اخواتي الاعضاء على ما بدر من المستثمر الكويتي من اسلوب غير لائق و بالنهايه هو يمثل نفسه و لا يمثل الشعب الكويتي و احنا أهل و بنظل أهل ان شاء الله و ما راح يعكر علاقتنا لا البورصه ولا كأس الخليج حتى ;) .. كما اتمنى ان ينتهي الموضوع عند هذا الحد او يشطب نهائيا من المنتدى .. في امان الله .

قطري
17-03-2005, 07:53 AM
هلابك اخوي السهم الازرق
وبارك الله فيك هو صحيح في بعض الاخوة تضايقو من كلام اخونا المستثمر الكويتي
بس اعتقد انه ماكان يقصد وكان نوع من المزح ومافي داعي اخوي للأسف
لان احنا كلنا اخوان واهل واحباب وان شاء الله خير سوقنا يعم كل ابناء الخليج العربي
وحيالله اهل الكويت كلهم :)

بيـــزات
17-03-2005, 07:57 AM
صحيح اخواني المساهمين

ان الاخوة الكويتيين لهم باع طويل في سوق الاسهم.. لكن

لا يجب ان نقلل من شأن المساهم القطري.. ونعمم قلة الخبره على الجميع

وهذا سوق فيه الرابح والخاسر.. وان شاء الله الكل رابح

بالتوفيق للجميع

LiquidMoney
17-03-2005, 10:26 AM
يــــاشباب ... خلوا روحكم رياضيه ... واللي في الجدر .. يطلعه الملاس ... مثل مايقولون ...
:)

السهم الازرق
17-03-2005, 04:11 PM
هلابك اخوي السهم الازرق
وبارك الله فيك هو صحيح في بعض الاخوة تضايقو من كلام اخونا المستثمر الكويتي
بس اعتقد انه ماكان يقصد وكان نوع من المزح ومافي داعي اخوي للأسف
لان احنا كلنا اخوان واهل واحباب وان شاء الله خير سوقنا يعم كل ابناء الخليج العربي
وحيالله اهل الكويت كلهم :)

الله يحييك اخوي قطري ..

و كلنا نعرف ان هناك فرق بين المزح و الاستهزاء .. و الاخ المستثمر الكويتي ما يعرف يميز بين الاثنين ..
لدرجة تصوير الكويتيين انهم حراميه جايين ينهبون البلد و يمشون !!
الكويتيين جايين ان شاء الله و معاهم كل خير و سيوله بتترك اثر طيب على ربح صغار المستثمرين خصوصا و اقتصاد البلد ككل .. و ان كان لا بد من ترك اثر سلبي على الهوامير و لكن هالشي لا بد منه لان هناك قاعده تقول اي شيء من مصلحة صغار المستثمرين فهو ضد مصلحة الهوامير .. و استشهد بمداخلة الاخ الحزين :


في اعتقادي الشخصي والمتواضع أن المستثمرين الأجانب وخاصة الكويتيين منهم سيكون تأثيرهم على الهوامير أكثر من تأثيرهم على صغار المستثمرين ، وبما أن العرض والطلب حالياً يتحكم فيه الهوامير فإن الأجانب سيخلخلون تأثير الهوامير لصالحهم . وبذلك سيستفيد صغار المستثمرين نوعاً ما أكثر من الهوامير ..
مجرد رأي شخصي وقد أكون مخطأً في الرأي

بالنسبه لمداخلة الاخ بو صالح الذي ذكر سابقه للكويتيين في الامارات و انهم شرو الاراضي و البيوت و رفعو سعرها و بعدين باعوها و طلعو .. انا اقول ان الوضع في سوق العقار يختلف .. و الكويتيين و غيرهم ما راح يدخلون في مشروع غير لما تكون هناك جدوى اقتصاديه من المشروع .. ولو الكويتيين ما دخلو سوق العقار في الامارات كان غيرهم دخل .. و الحمدلله الكويتيين دخلو الامارات كانت صحراء و طلعو منها مدينه يضرب فيها المثل و زيادة الاسعار كانت لزيادة الطلب على العقار بسبب توافد الاجانب للعمل او التجاره او السياحه .. وهو ما يحدث الان في قطر الحبيبه من طفره اقتصاديه و عمرانيه لا بد ان تترك اثر على اسعار العقار و ذلك شيء طبيعي لزيادة الطلب .. و دوام الحال من المحال و كلكم تتفقون معاي ان قطر قبل 5 سنوات ليست قطر اليوم .. فلماذا نقف فقط عند غلاء العقار و نستغرب !! الغلاء الحاصل هو ردة فعل طبيعيه فأتمنى ان لا نلقي باللوم على اشخاص او جنسيات معينه و نحملها سبب هذا الغلاء .. و استشهد بمداخلة الاخ ابن الوكره :


الله يهديكم لا الكويتين و لا غيرهم لهم سبب في تغير السوق ... الانتعاش اللي حاصل في البلد سببه الرئيسي الطفره الكبيره في الاقتصاد القطري خصوصا قطاع الغاز القطري و الزيادة الكبيرة في عدد الوافدين لما تتطلبه هذه الطفره من ايدي عامله .... و اللي ماهو مصدق يشوف شوارع الدوحه شلون صارت الزحمه الخياليه فيها وفتح الطرق و الجسور ولا ملحقين عليها ..... ولا بعد بتقولون الكويتين جابوا سياراتهم عندنا :)

بالمناسبة شركة الايجارة و منشاءات المدينة الرياضية ( اسياد 2006 ) لها دور بس غلطان اللي يفكر ان العقار بالذات راح ترجع و تنزل اسعاره .... لانه قطر تمشي لقدام و مشاريع الغاز في ازيديا ولله الحمدلله والبلد تستقطب يوم بعد يوم وافدين اكثر يعني ابشروا بالخير ياهل قطر شركات مساهمة ( مكرمات ) و سوق عقارات يزداد الطلب عليه

و في النهايه اعتذر للاطاله لوضع النقط على الحروف و ان شاء الله يعم الخير على خليجنا و يحمينا من الحاسدين .

سعر الأغلاق
17-03-2005, 07:53 PM
السلام عليكم جميعا .. اولا يسرني انضمامي لكم لعلي استفيد من الخبرات في هذا المنتدى الرائع

وثانيا اول شي سويته قبل اكتب حرف . اني رشحت الموقع .. والمفروض كل الأعضاء يسوون كذا

ثالثا فتح قطر مجال الأستثمار للخليجيين او الأجانب له جانب ايجابي وآخر سلبي

الأيجابي هو ضخ سيوله في البلد مما ينعشها اقتصاديا

السلبي هو قدوم مايسمى (لوبي الأستثمار) وهو مجموعه من الهوامير يتفقون فيما بينهم على رفع اسهم شركه معينه بشرا كل مايعرض من اسهم حتى يكون الطلب اكثر من العرض فترتفع اسهمها
وعندما نأتي نحن الذين على باب الله ونشتري بحثا عن الربح , نجد ان الأسهم قد هوت بسرعه غريبه من جراء البيع المتواتر من هذا اللوبي. وقد حدث امامي ان ترتفع اسهم شركات خسرانه .. كيف تجي ؟؟ مدري .. بس سووها !!

المهم يا أخوان نكون حذرين .. يعني لا نطير في العجه مثل مايقولون .. ننتظر ونراقب ونشتري ونبيع بحذر
واتمنى للجميع التوفيق .. لكن لازم تلاحظون ان اللي بيجي للسوق القطريه .. ناس متمرسين في الشغله وخبراتهم في اسواق تتعامل يوميا بمليارات الريالات.... وجاو لسوق عدد المواطنين فيه قليل .. وبلد في فترة نهضه مباركه ..

هذا ما اردت ايراده وهو قول يحتمل الخطأ والصواب

المستثمر الكويتى
18-03-2005, 02:42 AM
اول شى الله يسامحك اخوى السهم الازرق انا لم انعت الكويتيييييت بالحراميه ولم اصورهم كذلك وارجع الى ردوودى وانما وصفتهم بالذكاء والخبره الطويله فى الاسواق الماليه وانهم راح يسببون ربكه وبس

وابعد عن ظنونك الرديئه "ان بعض الظن اثم"

ثانى شى انت ليس وصى على الكويتيووووون حتى تتأسف وتظهرنى كأنى غلطان وانا لم اغلط على احد


بس بعض الاخوه متشنج من الكلام اللى قلته وهو " هيلا هوبا " والمقصد منها جمله تردد عندما بترفع شى وبتنزله ولم اقصد شى ثانى


وبالنسبه للموضوووع هذا ما راح ارد عليه لانه خذا الكفايه ولا اريد ان ادخل فى نقاش عقيم وجداااال


وارجو من الاخوه عدم التشنج فى بعض المواضييييع لانه الفكره فى الاساس هى النقاش والاستفاده

السهم الازرق
18-03-2005, 03:23 PM
اول شى الله يسامحك اخوى السهم الازرق انا لم انعت الكويتيييييت بالحراميه ولم اصورهم كذلك وارجع الى ردوودى وانما وصفتهم بالذكاء والخبره الطويله فى الاسواق الماليه وانهم راح يسببون ربكه وبس
وابعد عن ظنونك الرديئه "ان بعض الظن اثم"
ثانى شى انت ليس وصى على الكويتيووووون حتى تتأسف وتظهرنى كأنى غلطان وانا لم اغلط على احد
بس بعض الاخوه متشنج من الكلام اللى قلته وهو " هيلا هوبا " والمقصد منها جمله تردد عندما بترفع شى وبتنزله ولم اقصد شى ثانى
وبالنسبه للموضوووع هذا ما راح ارد عليه لانه خذا الكفايه ولا اريد ان ادخل فى نقاش عقيم وجداااال
وارجو من الاخوه عدم التشنج فى بعض المواضييييع لانه الفكره فى الاساس هى النقاش والاستفاده


اخوي المستثمر الكويتي ..


طريقة كتابتك للمشاركات تعطي انطباع ان الميانه طايحه بينك و بين الشباب و انك تعرفهم من سنين !!

اعتبر نفسك داخل ديوانيه اول مره تدخلها هل راح تكلم روادها بهالطريقه او راح تكون متحفظ في البدايه ؟!

يا اخي في ناس ما تتحمل تكلمها بهالطريقه من المزح اللي يعتبرها البعض استهزاء و تقليل من قيمتهم ..

و يمكن انت ما تقصد الاستهزاء بس احنا ما نعرفك ولا نشوف وجهك علشان نحكم عليك .. احنا لنا الظاهر من كلامك ..

صحيح اني مش وصي على الكويتيين لكن ايضا انت لست النموذج للمواطن الكويتي .. و احب اقول لك ان من تواضع لله رفعه .. و حتى لو كنت تظن ان كلامك عن اللي راح يسوونه الكويتيين في بورصة قطر صحيح المفروض تحتفظ فيه لنفسك و ما تقوله لان مو كل شي ينقال و المفروض تنتقي كلامك لانك تمثل بلدك من اسمك يا المستثمر الكويتي .. و انا ككويتي ما ارضى احد يمثل بلدي بهالطريقه علشان هالشي اعتذرت للشباب من منطلق وطني .

و انا ما اعرفك ولا انت تعرفني يعني الموضوع ليس شخصي بيني و بينك انما لي الظاهر منك و يمكن انت تكون احسن مني بمراحل بس للاسف خانك التعبير و قلت كلام المفروض ما ينقال ..

اتمنى كلامي يكون واضح لك و في امان الله .

سهم عتيج
18-03-2005, 04:59 PM
أول شيء اعتقد ان الموضوع اخذ أكبر من حقه,, ليس لأن الكويتيين سيدخلون السوق فقط,, ولكن لأن التصور ان الكويتيين هم من سيتحكم في السوق في الفترة القادمة,,

اما من وجهة نظري المتواضعة فأعتقد بأن السعوديون هم قد يأخذوا المبادرة من الكويتيين وذلك لأن حجم الأموال السعودية الفائضة كبيرة جدا جدا,, وأعتقد بأن السعوديون من المنطقة الشرقية راح يكون لهم النصيب الأكبر من المستثمرين غير القطريين في البورصة القطرية بعد فتح البورصة للأجانب..

اما بالنسبة للكويتيين وليعذرني الأخوة الكويتيون في المنتدى على ما سأقوله,, فأعتقد بأن للكويت تجربة مريرة لازالت آثارها تمتد الى اليوم من سوق المناخ ,, حيث قام الكويتيون بأنفسهم باحداث أضرار كبيرة جدا لاقتصادهم الوطني,, فما بالك عندما يذهبوا الى أي سوق آخر,, فلا أعتقد بأنهم سيراعون أي اعتبارات غير اقتصادية ,,

وبالنسبة للسوق القطري فلا أعتقد بأن نسبة ال 25% تجعل الأجنبي يستطيع الاضرار بالبورصة القطرية,, لأن هذه النسبة لن تشمل الأسهم التي تكون الدولة مشاركة بها في أي شركة,, وبالتالي فان النسبة ستقل كثيرا في بعض الشركات كصناعات والكهرباء والماء,, والأسمنت ووقود والوطني,, هذا بالاضافة الى ان بعض الشركات مفتوحة للخليجيين بالاستثمار بها منذ زمن طويل,, يعني القرار لن يكون له تأثير كبير على بعض الشركات..

لذلك فانني لا أعتقد بأن الكويتيين قادرين على مسك زمام الامور بالبورصة القطرية للأسباب التي ذكرتها سابقا,, ولأن السعوديون هم من سييأخذ زمام المبادرة بالنسبة للمستثمرين غير القطريين

والله الموفق

رأس المال
18-03-2005, 06:47 PM
السلام عليكم

يا جماعة اميرنا غالي وما راح يترك لا السعودي ولا الكويتي انهم يلعبون في البلد ... هذي شغلة

اما الشي الثاني فيا جماعة الخوف اذا جاء المستثمرين الاجانب ( الخليجيين وغيرهم ) وشروا نسبتهم كاملة انهم ما يبعون اسهم الاا عدد قليل...

يعني اذا شركة مثلا لها 100000 سهم في البورصة فيعني الاجانب لهم منها 25% اللي هي 25000 سهم

اذا جاءوا هالمستثمرين وشتروا 25000 سهم اللي لهم بحسب القانون ... الخوف انهم ما يبعون اسهمهم او على احسن حال اللي يبعون قلة يعني من 25000 سهم يمكن يرجع البورصة 5000 سهم او حتى 15000 سهم والباقي يخلون الاسهم عندهم ينطرون متى ترتفع الاسعار عشان يستفيدون....

تخيلوا الحين واحد ياي السوق يبي اسهم وتقوله شركة الوساطة اسفين نسبت الاجانب مخلصة من السوق ... شنو الحل في هالحالة :mad:

عليان
18-03-2005, 07:07 PM
كلام ممكن يكون صحيح !!!! الله اعلم.

سهم اعوج
18-03-2005, 07:24 PM
بسم الله الرحمن الرحيم

اخواني لايمكن يسيطر احد غير اهل قطر على السوق القطري وانا بأذن الواحد الاحد اتحدى

من سيلعب بالبورصة القطرية (: . و راح ينطبق علية رايح اصيد وصادة اهل قطر الشوامخ تجاريا

وعقليا واتخافون يا اهل قطر الله ويانا دائما ثم ابو مشعل حاط الضمانات في قوانين البورصه

اشتروا وبيعوا وابحوا بأذن الرزاق الكريم .

باحث علم
18-03-2005, 09:42 PM
ياجماعة الربع والربعين والربعات

الشي بالعقل

احنا لنا الجمهور .. والارض
احنا لنا 75% وهم لهم ولجميع الاجانب معهم 25%
اضف إلى ذلك أن سمو الامير الله يحفظه وحكومته فكروا في هالشي قبل مانفكر فيه وعارفين هاللعبة من زمان ، لذلك لا تخافون

الخوف مو من الكويتيين ، الخوف والله من القطريين اللي لاهفين الخضر واليابس طول عمرهم ، حسره علينا تونا عارفين ان فيه شي اسمه بورصة في قطر

السهم الازرق
19-03-2005, 12:28 AM
احنا لنا الجمهور .. والارض



ههههههههه

حلوه سالفة الارض و الجمهور !!

الظاهر للحين عايش جو كأس الخليج :D

بس مو دايما .. ساعات الارض و الجمهور ينقلبون نقمه ;)

والله مادري شقول لكم بس الموضوع الظاهر ما راح ينتهي :confused:

هاوي أسهم
19-03-2005, 01:29 AM
بأختصار ماطار طير وأرتفع إلا كما طار وقع

ولا يهمكم إن شاء الله الصناعات توصل ألف ريال والمصرف 1500ريال

أم المخازن 500 ريال والطبية 400 ريال
والتخصصي 350 ريال كلام جميل بالنسبة لأرباحها التي بالمليارات. :confused:

كل واحد يحكم عقلة تري مافي سوق غير الدوحة بيكون مفتوح للخليجين والخير في كل مكان والأمارات أولي الأتجاهات وناس كثار(قطرين) خرجوا من السوق وأتجهوا إل سوق دبي الواعد والذي في بداياتة،، وسوق أبوظبي وسوق البحرين أقول كل واحد يكون قنوع ويأخذ رزقه ((الطمع يذهب ماجمع))

طبعاً الكلام واضح للي يعي والذي لايعي فليتفرج علي القادم !!!!!

وكلامي ليس دعوة للشراء أو البيع والخيار طبعا متروك لكم.

تحياتي والسلاام.

عليان
19-03-2005, 02:08 AM
سويتوها غزوة و عملتوها حرب من قبل الكويتيين , وهي مو اكثر من تجارة اسهم تحدث في اي دولة مجاوره.

الكلام مبالغ فيه جداً جداً.

سعادة الوزير
19-03-2005, 04:20 AM
للمرة الرابعه .. ارجوكم يا مشرفين انكم تضعون حد للحرب الي شانينها الاخوان ضد المستثمرين الكويتيين .. بصراحة بعض المشاركات صايره مب اكثر من كلام يهال .. ارجوكم رجاء حااااااااار انكم تحافظون على مكانة الموقع والبعد عن هذه السذاجات الي عايشينها البعض.