الله يعز الإسلام والمسلمين ، موقف حصل لي في فرنســا [الأرشيف]

مشاهدة النسخة كاملة : الله يعز الإسلام والمسلمين ، موقف حصل لي في فرنســا

Chambray

05-01-2008, 08:49 PM

انا حالياً في مدينة صغيره ساحلية غرب فرنسا ، كنت ادور على مسجد لكي اصلي الجمعه فيه ، لكن بائت محاولاتي كلها بالفشل !
رحت لمطعم هندي في نفس المدينة ، ولحسن الحظ ان الي يشتغلون فيه باكستانيين مسلمين ، فأول سؤال سأته انت مسلم ، قالي نعم ، قلت تكفى قولي وين المسجد ؟؟
قالي المسجد بعيد عن هنا ، مافي مسجد في هالمدينة :(
قالي انت اطلب وتغدى وراح ادليك على المسجد بعد الغدى لان موعد الصلاة خلاص فات ، قلت لو كان بها .. وتغديت ورحت له واعتذر لي لان في ناس في المطعم ومايقدر يخليهم ويروح فقالي الساعة 5 امر عليك بسيارتي واوديك المسجد ، قلت له اوكي .. انا في انتظارك

الساعة 5 بالضبط اتصل فيني وقالي انا انتظرك عند المكان الفلاني، وبالفعل رحت له ولا هو ينتظرني
قالي المسجد بعيد عليك انت إذا بتروح له مشي ، لازم تروح بسيارة
قلت له غريبه ليش مافي مسجد هنا في هالمدينة ؟ مع انها مدينة سياحية واعتقد انها فيها مسلمين كثار ، قالي بالفعل المسلمين هنا واجد ، لكن مايقدرون يشترون مسجد ، احنا مستأجرين مكان وقالبينه مسجد للمسلمين ، بعد 15 دقيقه بالسيارة او اقل شوي ، وصلنا مكان نفس المنطقة الصناعية !؟ استغربت الامر انا ، قلت له وين المسجد ، قالي اكاه ، وهو مكان نفس مظلة المدارس الي يوقفون فيه الطلاب لكنه مصكر من كل الجهات ، بس بحجم اصغر شوي ، دخلت فيه إلا مشتغلين فيه شغل مساكين على قدهم والله ، بس عجبني حبهم للدين في اصعب الظروف ، مسوين مكان لمصلى الحريم ، ومكان لتدريس الطلاب اللغة العربية وعلوم الدين ، وحمامين صغار للوضوء ،، وفارشين المسجد بزل قطع ، يعني مب المسجد كل قطعة من الزل شكل ..
جانا إمام المسجد وهو الشيخ مصطفى ، مغربي الجنسية ، سلم علينا وتعرفت عليه وقالي صحيح ان المسجد بعيد لكن اي وقت تبي تصلي فيه هذا رقمي اتصل فيني انا اجيبك لين اهنا وارجعك للسكن الي انت فيه ..
المهم صلينا المغرب وقبل لا امشي عطيته المقسوم وقلت له هذا حق مستلزمات المسجد ، لان المسجد بأجار شهري ، والكهرباء والماء عليهم وبروحهم مساكين على قد حالهم ومحد يساعدهم او يمولهم غير المصلين نفسهم ..
فالصراحة موقف المسلمين متحدين ( الباكستاني والمغربي والتركي و و و ) اعطاني شعور بالفخر كوني مسلم ..

الخلاصة :
إذا احد مستحب انه يساعد في تطوير المسجد أو التبرع لو بمبلغ بسيط أو المساعدة في إرسال مصاحف او كتب إسلامية باللغة الفرنسية والعربية ويرسلها لي وانا راح اسلمهم بنفسي فأنا مستعد ان شاء الله .. والله يجزيكم عني وعنكم كل خير ..

ترى فرنسين وايد يدخلون في الدين الإسلامي ، لانهم مايعرفون شنو اصلن الاسلام ..

وإذا حد يقدر يتكفل ببناء مسجد في المدينة نفسها بعد يقولي وبانسق مع السفارة في باريس وان شاء الله يتم بناء مسجد .. وذلك لكثرة الطلاب هنا المسلمين الي مايحصلون مسجد يصلون فيه

كلاسيك للبيع

05-01-2008, 08:49 PM

الله يعطيك على قد نيتك...... يعني كم يكلف بناء مسجد صغير.. وهل يجب على المتبرع ان يشتري الارض

نورا

05-01-2008, 08:52 PM

جزاك الله كل خير

بارك الله فيك

الله يوفقك دنيا واخره

وان شاء الله الكل ما راح يقصر بأذن الله

{راشد}

05-01-2008, 08:58 PM

جزااااااااك الله خيرا عنا وعنهم

h2004

05-01-2008, 10:00 PM

"بدأ الإسلام غريبا وسيعود غريبا فطوبى للغرباء"
س :قيل يا رسول الله من الغرباء؟

قال الذين يصلحون إذا فسد الناس
وفي لفظ آخر: الذين يصلحون ما أفسد الناس من سنتي

وفي لفظ آخر: هم النزاع من القبائل

وفي لفظ آخر: هم أناس صالحون قليل في أناس سوء كثير

هم الذين يستقيمون على دين الله عندما يتأخر الناس عن دين الله، وعندما يكفر الناس، وعندما تكثر معاصيهم وشرورهم يستقيم هؤلاء الغرباء على طاعة الله ودينه، فلهم الجنة والسعادة ولهم العاقبة الحميدة في الدنيا وفي الآخرة.

"إِنَّ الَّذِينَ قَالُوا رَبُّنَا اللَّهُ ثُمَّ اسْتَقَامُوا تَتَنَزَّلُ عَلَيْهِمُ الْمَلائِكَةُ أَلا تَخَافُوا وَلا تَحْزَنُوا وَأَبْشِرُوا بِالْجَنَّةِ الَّتِي كُنْتُمْ تُوعَدُونَ نَحْنُ أَوْلِيَاؤُكُمْ فِي الْحَيَاةِ الدُّنْيَا وَفِي الْآخِرَةِ وَلَكُمْ فِيهَا مَا تَشْتَهِي أَنْفُسُكُمْ وَلَكُمْ فِيهَا مَا تَدَّعُونَ نُزُلًا مِنْ غَفُورٍ رَحِيمٍ

ابوسعود

05-01-2008, 10:49 PM

جزاك الله خير
والله انا فرحت من هذا العمل والتكاتف في مواجهة الصعاب
ومواجهة الغربه والاغراب
الله ينصرهم ويثبتهم
ويعنهم انه سميع عليم

relaax

05-01-2008, 11:37 PM

اذا فكرنا بأنشاء مسجد

ماهي الخيارات

مثلاُ

شراء منزل تحويله مسجد

بناء مسجد

تركيب ...

الاسعار

التيما

06-01-2008, 12:20 AM

ماشاء الله عليهم وسبحان الله الي خلاك وصخرك عشان توصل لهم .. وين ماكانو لازم يسوون لهم مسجد .. اذكر في هونج كونج شفت مسجد يحاولون يهدونه لهم وهم مصرين يحافظون عليه ويدفعون اجاره عشان ما يتسكر ..

اخوي بلغهم سلامنا وقولنا لو نبي نبعث لهم سجاد وكتيبات ومصاحف وفلوس شالطريقة ؟؟

AL_MUTAEM

06-01-2008, 12:30 AM

جزاك الله كل خير اخوي

Chambray

06-01-2008, 12:42 AM

مشكورين وجزاكم الله خير ..
إذا حد بيتكفل ببناء مسجد لازم اكلم السفارة وانسق معاها علشان اعرف ايش الاجراءات القانونية في مثل هالحالات ..
اما في حالة إرسال كتيبات ومصاحف اعتقد ان مافي مشكلة في هالشئ ،، عن طريق البريد كل شئ يوصل ..

والله يجزيكم كل خير ..

راح اجتمع بكرة مع رئيس المسجد وباشوف معاه ايش الي هم محتاجينه بالضبط لإنشاء مسجد في وسط المدينة .. وايش الي محتاجينه حالياً للمسجد الحالي ..

امل الحب

06-01-2008, 12:57 AM

جزاااك الله خير

عوجان

06-01-2008, 12:58 AM

بارك الله فيك بس لو تشرح الموضوع لاحد الجمعيات الخيرية اعتقد راح تمع مبلغ اسرع

PoBox

06-01-2008, 01:06 AM

قواك الله اخوي جاسم البدر

وهذا الموقع فيه كل المساجد حول العالم
(( حتى اللي تكون في غرف ))

http://www.islamicfinder.org/cityPrayer.php?country=France&lang=arabic

ياليت تضيف مكان المسجد اللي حصلته ان ماكان موجود

والله يقويك مرة ثانية وييسر بك مساعدة اخوانك المسلمين في الغرب

Chambray

06-01-2008, 01:47 AM

جزاكم الله خير

اخوي بوكسنغ انا في مدينة Royan بحثت في هذا الموقع ولم اجد شئ ، وضفت اسم موقع المسجد انا امس ، على ما اعتقد يبيله اسبوع حتى يضاف في الموقع ..

تحياتي لك

Mr Brox

06-01-2008, 01:53 AM

ما شاء الله .. الله يجزاك كل خير
ويا ريت كل طلبتنا هناك يكونون مثلك
وهذا فعلا ديننا الاسلامي وين ما تروح تلقاه
انا ودي اقدم مساعدة للمسجد .. ممكن تدز لي على الخاص
رقم حساب معين ارسل عليه فلوس لدعم المسجد

ارستقراطي

06-01-2008, 05:29 AM

الله يجزاك خير ياجاسم ويوفقك وين ماكنت يعطيك كل خير وبركه

الحين نقدر نقول وين تجار المسلمين ؟؟؟؟؟

وفي النهايه نتمنى منك تزويدنا بالمستجد من معلومات

تحياتي

امـ حمد

06-01-2008, 05:57 AM

جزاك الله خير والله يوفقك لما تحب وترضا وان شاء الله في ميزان حسناتك

الكاسر007

06-01-2008, 06:27 AM

يالله ياجماعة الخير نبدا مشروع بناء المسجد في تيك المنطقه
وانا ببدا 500 ريال على قد حالي
ونظبط الامور مع جاسم البدر
ومدير المنتدى
يالله يا هل قطر هل الخير وش رايك يا جاسم

اعالي الجنان

06-01-2008, 05:43 PM

اخوي الفاضل اذا حاب اوفر لك مصاحف بالكراتين وبالدرازن خبرني وان شاءالله خير ناس في الدوحه الله يجزاهم خير يطبعون بالالاف قران ويوزعونها فرد علي بارك الله فيك عشان اكلمهم واشوف المقدور عليه
اخوي الكاسر بارك الله فيك وقفه طيبه ياليت الاخوان يقتدون بك ولك اجر كل اللي بيتبرعون

حصه

06-01-2008, 07:01 PM

وين نحط التبرعات اذا حبينا نتبرع اخوي ..

..............

وجزاك الله الفردوس ان شاء الله

relaax

06-01-2008, 10:19 PM

Chambray

06-01-2008, 10:58 PM

الله يجزيكم خير ..
اخوي الكاسر .. ماعتقد 500 على 500 بتجيب رأس المال الي ينشرى به الأرض والبناء ..
خل نفترض وصل المبلغ 20 ألف يورو .. مثلاً .. وسعر الارض 50 ألف يورو .. انا ايش راح اسوي في ال 20 الف يورو؟؟ بتكون في ذمتي وانا ماحب يكون شئ في ذمتي ..

انا اقول لو حد يكلم الجهات المختصة في قطر لكي تتكفل ببناء المسجد في وسط المدينة افضل
وسعر الارض تقريباً مابين 50 - 70 الف يورو والبناء 40 - 70 الف يورو وربما اقل .. بس يجي عن طريق جهة مسؤولة في الدولة افضل .. وإذا شفت مافي فايده باكلمكم مرة ثانية لكي توفرون المبالغ وعلى الاقل ادفعها للمسجد واجار المسجد ..
بخصوص الكتيبات والمصاحف اليوم احد الاخوان اتصل فيني هاتفياً يخبرني انه جهز كتيبات ومصاحف وبروشرات لكي يرسلها لي فالله يجزيه خير ..

في هالمدينة عدد المسلمين تقريباً 70 مسلم والطلاب سنوياً بالمئات ..
اقرب جامع رئيسي لهم مدينة بوردو 90 كيلو .. واقرب مسجد عن المدينة 10 كيلو في مدينة صناعية وقراجات ..

عطوني مقترحاتكم وانا حاضر بالي تامرون فيه ..

Chambray

06-01-2008, 11:02 PM

اسأل اخوي جاسم

عن بناء مسجد

اليوم اجتمعت مع امام المسجد وقالي نفس الكلام الي فوق .. وقالي انه هو والاخوان بيساعدونا في بناء المسجد وكل واحد على قدر استطاعته 500 - 1000 - 1500 يورو ..

انا افضل من وجهة نظر شخصية ان نجمع المبلغ ونعطيه لاحد الجمعيات الخيرية ونشترط عليهم بناء المسجد في هالمدينة والجمعية هي راح تتكفل بذلك بالتنسيق مع السفارة القطرية في باريس .. وانا راح اكون مراسلكم ان شاء الله

الله جزيكم خير

PoBox

06-01-2008, 11:23 PM

الدكتور احمد الحمادي هو دايما ينسق هالسوالف في بناء المساجد في الغرب وله خبرة كبيرة سواء في شراء الاراضي او الكنائس وتحويلها او المدارس

وهو يجمع المبالغ وان شاء الله هو شخص ثقة وماراح يقول لا
وكل شي يكون رسمي وباوراق ثبوتيه حسب الاجراءات المتبعة عند قطر الخيرية

للاسف ماعندي رقمه ولا كنت برسله لك اخوي جاسم
ياليت اللي عنده رقمه يحطه مشكورا

Chambray

06-01-2008, 11:46 PM

الكاسر007

07-01-2008, 01:39 AM

يالله ياجماعة نبي نحرك الموضوع
واول السيل قطره يااخ جاسم البدر
وفي ناس ان شا الله بتدفع دبل
في ناس فيهم خير
وبالاخص حريم قطر فيهم الخير وصدقني بتجمع المبلغ بس نبي التنسيق
من ادارة المنتدى
وفي منتدى قطري سوو نفس الحركة وجمعوا مبلغ واحفرو بير ماء في افريقيا وبعد انتهاء العمل
قاموا بتصوير البير وحطو عليه بنفقه منتدى مااذكره وبصراحة حركه رهيبه وتحث على الخير
وياريت منتدانا يسوي نفس الحركة
ان شا الله

Chambray

07-01-2008, 02:19 AM

يالكاسر انت والله تبث في نفسي الحماس صراحة ..
لكن انا مابي اجمع الفلوس والفلوس ماتكفي ،، ابي حد يكلم الحمادي .. ويتفق معاه .. وانا مستعد ادفع معاكم .. والاخوه الي هني بعد مستعدين يدفعون والله

انا بس محتاج جهة من الدوحة تقوم بالتنسيق والمتابعه ،، يعني انا مستحيل آخذ الفلوس واعطيها امام المسجد ، وانا توني لين احين ماعرفته عدل ، يمكن ياخذها ويسافر واتوهق انا :(
ولا ودي اخذ الفلوس والتبرعات واخليها مجمده عندي ،، لأن الامانه مو شئ بسيط ..

إذا كانت تبرعات بسيطة للمسجد الحالي فأنا ماعندي مشكلة .. وإذا كانت تبرعات مثل كتيبات وغيره .. بعد ماعندي مانع وجزاكم الله خير ..
لكن كمبالغ كبيره وتتم في حسابي مثلاً ما اعتقد اني اقدر على تحمل هالمسؤولية وانا عندي مسؤوليات اهم ..

انا الي ابيه احين حد يتحرك ويكلم لي جهة خيريه تتكفل ببناء المسجد في هذا المكان ومن خلاله تتم التبرعات للجهة الي راح تتكفل بمتاابعة الموضوع .. والله اجركم كبير عند الله .. لان هالمكان مشهور جداً بمعهده العالمي لدراسة اللغة الفرنسية وسألوا اي حد درس في فرنسا عن هالمدينة بيقولكم ان اشهر معهد هو في هالمدينة .. ومن كل دول العالم يجيون هالمدينة سنوياً خاصة في فترة الصيف تجي افواج للدراسة في هذا المعهد لمدة شهر وشهرين و3 شهور ..
عدد سكان هالمدينة 30 ألف نسمه .. وفي الصيف يتضاعف عددها يوصل لين 150 - 200 الف نسمه من السياح والدارسين ..

صاحب مطعم باكستاني يسالف لي يقولي جايين هالمدينة عدد 25 طالب باكستاني في منهم دكاتره طب و مهندسين و و وإلخ ،، يبون يصلون الظهر والعصر مايقدرون لان المسجد بعيد ، والمعهد البريك الي فيه ساعتين مادري ساعة ..
حتى ايام الاجازه تعب عليهم او مستحيل يروحون مشئ ..
امام المسجد معطني رقمه يقولي اي وقت تبي تصلي اتصل فيني قبل الصلاة بنص ساعة علشان امر عليك ..

المسلمين هنا مجتهدين والله ، ويحبون الخير ويسعون له ، لكن مافي مسانده ماديه ومعنوية ..

يقولي مرة فكرنا نأجر بيت في المدينة مجرد تأجير ، قبل لانوقع العقد ، قلنا حق المالك ان بنسويه مسجد ، رفض وماأجروا البيت .. يقولي الامام .. لو ان هالبيت قلناله بنخليه حق مرقص كان بيسويلنا خصم
لكن قال المسجد راح يكون وكر للإرهابيين ،، << هاي تفكيرهم الفرنسيين ..
يقولي ماعندنا إمكانية لشراء بيت او ارض وبناءها .. والي عندنا حق التأجير في المنطقة الي قلت لكم عنها .. والمنطقة الي فيها المسجد صراحة حرام يكون مسجد طاهر في هالمكان ،، وعندهم تصريح من الحكومة لإقامة مسجد هنا ولكن بدفع اجار شهري ..

ولا حول ولاقوة إلا بالله العلي العظيم

اعالي الجنان

07-01-2008, 11:58 AM

اخواني الافاضل بارك الله على مجهودكم
هذا رقم الشيخ الدكتور احمد الحمادي 5847000
اتمنى منكم الاتصال والتنسيق معاه وخبرونا عشان نكون معاكم باللي نقدر عليه وبانتظاركم
احنا بالمدارس نسوي حملات تبرعات وانجزنا كذا مشاريع بفضل الله ومنته علينا اولا واخيرا
فاذا بديتو بالمشروع هذا (المسجد)اتمنى افادتناونحاول قدر المستطاع باللي الله يسره لنا
(لاتحقرن من المعروف شيئا)اقوله للاخ جاسم البدر لو نبتدي بريال ريال على ريال يطلع مبلغ باذن الله واتمنى من الاخوة والاخوات التفاعل لانه زرع الدنيا وحصاد الاخره نلقاه بالاخره هالتبرعات ومو شرط تكون ماديه اي شي كل واحد واللي يقدر عليه وواحد يتكفل بجمعها من الاخوة والاخوات ويوصله للشيخ .......
بانتظار التفاعل ياهل قطر اهل الكرم .......

ســـهم

07-01-2008, 12:04 PM

جزاك الله كل خير

أخوي جاسم

بارك الله فيك

الله يوفقك دنيا واخره

بوخالد2

07-01-2008, 12:17 PM

جزاك الله خير ان شاءالله

ياليت بفلوس الكنيسه اللى يبنونها عندنا

يتبرعون بالقليل لهم

Chambray

24-01-2008, 11:50 PM

احب ابشركم ان احد الشباب القطريين ارسل لي شحنه تبلغ من الوزن حوالي 50 كيلو فيها الكتب والمصاحف والمنشورات الي تتعلق في المسجد واشياء كثيرة والله يجزيه خير يكثر من امثاله .. والشحنة وصلت اليوم مطار شارديغول الدولي :) فألف شكر له والله يجزيه خير ان شاء الله ، وإن دل هذا فيدل على اخلاقه العاليه وغيرته على دينه والله يكثر من امثاله ..
كما وصلني من أخت إماراتية من إمارة دبي مبلغ 252 يورو اي ما يعادل 1400 درهم ، فجزاها الله الف خير ، وتم تسليم المبلغ للمسؤولين عن المسجد لتغطية تكاليف المسجد ..

والشيخ الحمادي وعدني انه يجي عندنا في مدينة رويان في الصيف لكي يرى الوضع هنا وإمكانية إنشاء مسجد فيه :) وهذي ايضاً بادره طيبه من الشيخ الحمادي ..

لكن لازال المسجد يحتاج إلى اشياء كثيرة في الوقت الحالي .. وابسطها اجهزة التدفئة .. وإذا في كتب تعليمية وبرامج تعليمية للأطفال على الكمبيوتر للأطفال المسلمين لتعليمهم الصلاة والصيام وأمور الدين اتمنى انكم توافوني بها .. لان هناك مدرسة صغيره تفتقر لهذه الكتب التعليمية ..

ســـهم

24-01-2008, 11:54 PM

احب ابشركم ان احد الشباب القطريين ارسل لي شحنه تبلغ من الوزن حوالي 50 كيلو فيها الكتب والمصاحف والمنشورات الي تتعلق في المسجد واشياء كثيرة والله يجزيه خير يكثر من امثاله .. والشحنة وصلت اليوم مطار شارديغول الدولي :) فألف شكر له والله يجزيه خير ان شاء الله ، وإن دل هذا فيدل على اخلاقه العاليه وغيرته على دينه والله يكثر من امثاله ..
كما وصلني من أخت إماراتية من إمارة دبي مبلغ 252 يورو اي ما يعادل 1400 درهم ، فجزاها الله الف خير ، وتم تسليم المبلغ للمسؤولين عن المسجد لتغطية تكاليف المسجد ..
على فكرة المسجد محتاج إلى أجهزة تدفئة الجو وايد بارد فيه :(

الله يجزاهم كل خير ويجعل ماقدموه عتقا لهم من نار جهنم

وجزاك الله اخوي جاسم بمثله وأكثر فالدال على الخير كفاعله

بارك الله فيك وبك نفتخر ..

Chambray

25-01-2008, 12:05 AM

الله يجزاهم كل خير ويجعل ماقدموه عتقا لهم من نار جهنم

وجزاك الله اخوي جاسم بمثله وأكثر فالدال على الخير كفاعله

بارك الله فيك وبك نفتخر ..

هلا بالغالي ،، الف شكر لك .. والله يجزيك خير ..
احرجتي بكلامك الطيب ..

صدقني انا هنا سنه سنتين مو اكثر ،، والمسجد راح يبقى للمسلمين الي يجون هنا سنوياً

وان شاء الله يصير هالمكان مكان للدعوه ومكان يدخلون فيه الناس للإسلام .. والله يعز الإسلام والمسلمين