محطات في حياة الجني (17) جولات مع جدي رحمه الله

[الجني]

بسم الله و الحمد لله و الصلاة و السلام على رسول الله
و على اله و صحبه و سلم

جولات مع جدي

يقال ما اعز من الولد الا ولد الولد

ما زلت اتذكر كوت (جاكيت) جدي الازرق و في الشتاء
يحملني داخل الكوت و يمشي فيني

كان الله يرحمه جثة طول بعرض

يده اليمنى تزن طن و نصف و فيها 27 اصبع

مب انتوا 5 اصابع اثنين مثل بعض ماكو

كان لي تحنحن او تخنخن درايش البيت اتقلقل


كنا نروح جبرة الخضرة و السمك اللي جنب سوق العسيري و البريد الممتاز حاليا

و كان الله يرحمة مثل باقي البشر يحمل الاغراض الى البيت بنفسه مشياً لمسافة طويله.

و في العيد كنا نروح العرضة اللي في اسلطة (ما كان فيه اسلطة الجديدة و لا الحديثة)

و كل اهل قطر مجتمعين يرزفون

و بعد الرزيف نانسي عجرم و عمر دياب قاموا يغنون و اهل قطر يصفقون
(لو يطلعون كان قطعوا رقابهم)


و في العيد رحت مع جدي مدينة الألعاب اللي كانت على الكورنيش و بعد فترة

قصيرة اغلقها الشيخ عبدالله بن زيد آلمحمود رحمه الله لأنها نوع من اللهو

و الميسر و الله اعلم


و بعض الايام نروح البحر و كأني اشوف النجاجيل تدفن فرضة الدوحة الحالية

و فيها سنابيك خشب صافة جنب بعض. و كنت احدق بعض الاحيان في السنابيك و اصيد بدح


كنا نروح نسبح في البحر و للأمانه ان رياييل قبل اهل غوص و التفصخ بين بعض عادي

كان الله يرحمة يسبح بوزار و لي طلع فصخ الوزار و عصرة و لبسة مرة ثانية

طبعاً ما كان فيه حركة مرور كما اللي موجوده الحين


و مرة و احنا طالعين من البحر في حالة الثبر (جزر) و اذا بمئات القباقب و الشربيان في

البحر . جدي مر عليهم كأنه يمشي على رخام ناعم و انا في البحر مب قادر اطلع من الخوف

و اناديه: يبا . . يبا .

التفت علي و قال: اطلع

قلت: ما اقدر . . . القباقب بيعضوني

قال : ما يعضونك اطلع

قلت: ما اقدر بيعضوني

التفت و راح عني

اخذت نفس عميق و من كثر الهواء اللي دخل الرئه صرت مثل البلونه و طرت في الهواء فوق

الى ان طلعت من البحر و انا طاير , عقب طلعت الهواء من صدري و نزلت مرة ثانية على اليابسه . هههههههه


اخذت نفس و ركضت بالقوه و انا احس ان اللي تحتي تماسيح مب قباقب

و في لمح البصر طلعت .


و اتذكر الصباح اللي اخذني الى المدرسة و سجلني في المدرسة و كنت امشي معاه

و انخش تحت كوته الازرق .


و بعد ما تخرجت من الثانوية اخذت ملفي من المدرسة علشان اودية للوزارة علشان البعثة

و فتحت الاوراق ووجدت بصماته على اوراق تسجيلي لأنه ما كان يوقع الله يرحمه

و بعد ما رجعت من الدراسة في الخارج قيل لي انه توفى رحمه الله

الله يرحمك يا يبه رحمة واسعة و جميع اموات المسلمين


كان يبني طوف و يذبح و يسلخ و يقطع و يصلح و يركب و يشيل و يحط

يمسك المطرقة و لما يضرب المسمار اشوف الشرار

و لما يركض عدائين الماراثون ما يلحقونه


كانت اشوفة ينزل من باص ابيض مال الشركة (البترول)

لابس اوفرهول (Overall) و جوتي ابيض مال عمال و ضارب تريمبة

كنت اركض عليه و يعطيني اربعنات اروح فيها الدكان

الصراحة جيل مختلف عن جيلي تماماً

جيل يجد و يكد

جيل يمزح و ينكت و يتطنز

جيل مجرب نوائب الدنيا و مكتوي بحرارة شمسها


احلى شيء في يوم من الايام كنا في الدكان و دخل علينا شايب يعرف جدي

و تموا يسولفون و ما وعيت الاّ بذاك الشايب اللي مسك ضورسه بيده

و طلع ضروسه من حلجه و قام يراويهم جدي . و فجأة

طلع جدي ضروسه من حلجة و قام يراويهم الشايب

قمت انا و عطتهم ظهري و حطيت يدي في حلجي ابي اشوف

ضروسي تطلع مثلهم و الا لا

و احك ضروسي بثوبي و امسكهم بقوه ابي اطلعهم بس ما يطلعون

بعد ما راح الشايب و طلعنا من الدكان التفت على جدي و

قلت له : يبه اشلون اقدر اطلع ضروسي مثلك .

ضحك علي و قال : بيطلعون لي كبرت

و الحين كبرت و دائماً احاول بس ما يطلعون , ما ادري ليش؟

و صلى الله على سيدنا محمد و على اله و صحبه و سلم



محطات في حياة الجني (16) الطب الشعبي
http://www.qatarshares.com/vb/showthread.php?t=165543

محطات في حياة الجني (15) يا ليت يعود الزمن ساعة
http://www.qatarshares.com/vb/showthread.php?t=164892

محطات في حياة الجني (14) الراعي و الغنم
http://www.qatarshares.com/vb/showthread.php?t=150029

محطات في حياة الجني (13) يوم السم العالمي
http://www.qatarshares.com/vb/showthread.php?t=147329

محطات في حياة الجني (12) فزعات الناس لبعض
http://www.qatarshares.com/vb/showthread.php?t=146794

محطات في حياة الجني (11) الجني فوق السطح
http://www.qatarshares.com/vb/showthread.php?t=146092

محطات في حياة الجني (10) الضرب في المدارس
http://www.qatarshares.com/vb/showthread.php?t=144573

محطات في حياة الجني (9). . . الشنتورة
http://www.qatarshares.com/vb/showthread.php?t=144121

محطات في حياة الجني (8) هوشه في الفريج (اكشن(
http://www.qatarshares.com/vb/showthread.php?t=143848

محطات في حياة الجني (7) مغامرات في العيد (دراما)
http://www.qatarshares.com/vb/showthread.php?t=143465

محطات في حياة الجني (6) الدراسة و الواجبات
http://www.qatarshares.com/vb/showthread.php?t=143207

محطات في حياة الجني (5) الجني و التلفزيون
http://www.qatarshares.com/vb/showthread.php?t=142812

محطات في حياة الجني (4)
http://www.qatarshares.com/vb/showthread.php?t=142592

محطات في حياة الجني (3)
http://www.qatarshares.com/vb/showthread.php?t=142272

محطات في حياة الجني (2)
http://www.qatarshares.com/vb/showthread.php?t=142031

محطات في حياة الجني (1)
http://www.qatarshares.com/vb/showthread.php?t=141863

[انا احساس]

الله يرحمة ويسكنه فسيح جناته
.
.
تخيلت كل المواقف في بالي....وانت تناقز على القباقب تبي تطلع...شكلك يضحك هههه
.
.
ياحلاة لاول وناسه ....صج رياييل
.
يعطيك العافية

[ضوى]

الله يرحمه يارب

والله كانك تتكلم عن ابوي الله يرحمه ويرحم موتانا اجمعين

والملاهي لحقت عليها طلعنا من نفس الجيل يا جني

زمن اااااااه يا زمن

[دلة الرسلان]

مدري ها الصفحة حزنتني يالجني وذكرتني بالوالد الله يرحمه نعم جيل يبني ويشيل ويحط ويتعب

ويربي الله يغفر لهم جميع .

[desert hunter]

سلام عليكم ورحمة الله

اخي الجني

ذكرتني بما مضى جدي رحمه الله

وصدقت جدي كان عزيز علي رحمة الله عليه

كنت اروح معاه سوق واقف والدكان القديم

وكنت اروح معاه الشغل وفعلا كانت ايام حلوه

ناس تحس فيهم القوه والهمه وحب العمل وحب الخير

مو نفس احين

ذكرتني بما مضى يوم اروح وياه الدكان وكنت فرحان اني رحت الدكان

وعيال هالزمن نوديهم تويز ار اص مدري شسمه وزعلاننين

ذكرتني يوم اروح الدكان وياه واخذ الكوره واستانس لما العب فيها

واحين تجيبلهم بلاي ستايشن وهم زعلانين


سبحان الله وين الجيل القديم عن احين

اولى احلى وابرك واجمل وايام لاتنسى

والله يعين الجيل القادم

استمر استمر اخوي والله مذكراتك روعه وانا لازم اسجلها لك ولا نسويلك موقع مخصص

وتسلم

اخوك

[بدور]

الله يرحمه ويغفر له ويرحم جدودنا وجداتنا

ول عليك يا الجني وصفت جدك وصف يده اليمنى تزن طن و نصف و فيها 27 اصبع

الحمدلله خذ أمانته والا ان كان ذبحته :eek5: بعينك

ذكريات جميله وماضي ماينمسح من الذاكره يا خوي

كل ماله ويتجدد .... الله يعطيك العافيه وتسوي لاحفادك مثل ماسوى لك جدك

[موظف بالبورصه]

الله يرحمه ويغفرله ويرحم اجدادنا جميعا ...

ماشالله عليك يالجني مبدع في اسراد القصص واسلوبك ممتاز

خليتني ارد اقراء المحطات كلها واستمتعت فيها ..

لاتحرمنا من محطاتك بأنتضار جديدك

والله يعطيك الصحه والعافيه ..

[ROSE]

مادري شاقول يالجني

ذكرتني بجدتي الله يرحمها ويرحم جدك ويرحم جميع موتنا وموتى المسلمين


مواقف كثيره لو الواحد بيذكرها يبي له كتاب

ايام حلوه وبسيطه وناس بسطاء

ارجع واشكرك على هالمحطات الحلوه

[k__]

الله يعطيك العافية إخوي الجني بصراحه كل يوم تطلع بسالفة جديدة
والله يرحم جدك وجميع موتانا . . .

[nor85]

اسلوبك يشد بالكتابه ثنكيو

[المخفي]

ضحك علي و قال : بيطلعون لي كبرت


ضحكتني هذي الجملة من قلب

الله يرحمه يا الجني ويطول في عمر جدي ويحفظه يعطيه الصحة والعافية

[رايق]

[COLOR="DarkSlateGray"][SIZE="5"]

اخذت نفس عميق و من كثر الهواء اللي دخل الرئه صرت مثل البلونه و طرت في الهواء فوق

الى ان طلعت من البحر و انا طاير , عقب طلعت الهواء من صدري و نزلت مرة ثانية على اليابسه . هههههههه


هههههههههههههه
من وصفك كأني اشوف الموقف قدامي
اضحك الله سنك اخوي الجني

بأنتظار المحطة المقبلة .. على أمل ان لا تنتهي الرحلة و نستمر من محطة الى اخرى

[جلمود]

الله يرحمه ويغفرله

ويعله الجنه

بس هذا موقف الاسنان مر علي مره !!

رجال راحووو

يسلموو يالجني

[umm yousef]

سوالفك حلوة...مع إنك جني( الله الحافظ :) )

[زهرة قطر]

الله يرحمه ويجعل مثواه الجنه
آمين
مبدع ماشاالله عليك

[الجني]

الله يرحمة ويسكنه فسيح جناته
.
.
تخيلت كل المواقف في بالي....وانت تناقز على القباقب تبي تطلع...شكلك يضحك هههه
.
.
ياحلاة لاول وناسه ....صج رياييل
.
يعطيك العافية

شكراً على المرور انا احساس
ترى عضت القبقب شينه
جربتها عدة مرات

[(الفيصل)]

تعتريني ابتسامة عريضة :) اخي الجني عندما أقرأ لمحطاتك
أسئل الله أن يكون مقبلها عبادة وأخرها شهادة
تحياتي لك

[الجني]

الله يرحمه يارب

والله كانك تتكلم عن ابوي الله يرحمه ويرحم موتانا اجمعين

والملاهي لحقت عليها طلعنا من نفس الجيل يا جني

زمن اااااااه يا زمن

شرفي مرورج اختي ضوى

انا مب نفس جيلج

المحطة ذكرتج بالوالد الله يرحمه

و انا اتكلم عن جدي يعني بيني و بينج جيل كامل

و انا عمري 22 سنه و كلام رياييل عمري ما غيرت عمري

صار لي سنين و انا 22 :nice:

[الجني]

مدري ها الصفحة حزنتني يالجني وذكرتني بالوالد الله يرحمه نعم جيل يبني ويشيل ويحط ويتعب

ويربي الله يغفر لهم جميع .

اللي خلف ما مات اختي دلة رسلان

الله يقدرنا و يطلعون عيالنا فيهم خير

شرفني مرورج و تعليقج اختي

[الجني]

سلام عليكم ورحمة الله

اخي الجني

ذكرتني بما مضى جدي رحمه الله

وصدقت جدي كان عزيز علي رحمة الله عليه

كنت اروح معاه سوق واقف والدكان القديم

وكنت اروح معاه الشغل وفعلا كانت ايام حلوه

ناس تحس فيهم القوه والهمه وحب العمل وحب الخير

مو نفس احين

ذكرتني بما مضى يوم اروح وياه الدكان وكنت فرحان اني رحت الدكان

وعيال هالزمن نوديهم تويز ار اص مدري شسمه وزعلاننين

ذكرتني يوم اروح الدكان وياه واخذ الكوره واستانس لما العب فيها

واحين تجيبلهم بلاي ستايشن وهم زعلانين


سبحان الله وين الجيل القديم عن احين

اولى احلى وابرك واجمل وايام لاتنسى

والله يعين الجيل القادم

استمر استمر اخوي والله مذكراتك روعه وانا لازم اسجلها لك ولا نسويلك موقع مخصص

وتسلم

اخوك

تسلم اخوي G_man على المرور و التعليق

لكل زمان دولة و رجال

و الله يحسن خاتمتنا

[الجني]

الله يرحمه ويغفر له ويرحم جدودنا وجداتنا

ول عليك يا الجني وصفت جدك وصف يده اليمنى تزن طن و نصف و فيها 27 اصبع

الحمدلله خذ أمانته والا ان كان ذبحته :eek5: بعينك

ذكريات جميله وماضي ماينمسح من الذاكره يا خوي

كل ماله ويتجدد .... الله يعطيك العافيه وتسوي لاحفادك مثل ماسوى لك جدك

شكرا اختي بدور على المرور و التعليق

ترى عيني بارده ابرد من الثلج

الله يعطينا وياج طول العمر و يحسن اعمالنا و خاتمتنا

[الجني]

الله يرحمه ويغفرله ويرحم اجدادنا جميعا ...

ماشالله عليك يالجني مبدع في اسراد القصص واسلوبك ممتاز

خليتني ارد اقراء المحطات كلها واستمتعت فيها ..

لاتحرمنا من محطاتك بأنتضار جديدك

والله يعطيك الصحه والعافيه ..

الله يعافيك اخوي موظف في البورصه
هذه شهادة اعتز فيها
و لنا لقاء ان كان في العمر بقية اخوي العزيز
و شكرا على تشريفك لي و مرورك

[الجني]

مادري شاقول يالجني

ذكرتني بجدتي الله يرحمها ويرحم جدك ويرحم جميع موتنا وموتى المسلمين


مواقف كثيره لو الواحد بيذكرها يبي له كتاب

ايام حلوه وبسيطه وناس بسطاء

ارجع واشكرك على هالمحطات الحلوه

الله يرحمها و يغمد روحها الجنة و موتى المسلمين

و ليش و تكتبين كتاب عن الذكريات القديمة

شرفني مرورج يا مشرفتنا و تعليقج

[إنسان]

كنا نروح جبرة الخضرة و السمك اللي جنب سوق العسيري و البريد الممتاز حاليا


و في العيد كنا نروح العرضة اللي في اسلطة (ما كان فيه اسلطة الجديدة و لا الحديثة)
و كل اهل قطر مجتمعين يرزفون


و في العيد رحت مع جدي مدينة الألعاب اللي كانت على الكورنيش و بعد فترة
قصيرة اغلقها الشيخ عبدالله بن زيد آلمحمود رحمه الله لأنها نوع من اللهو
و الميسر و الله اعلم


و بعض الايام نروح البحر و كأني اشوف النجاجيل تدفن فرضة الدوحة الحالية
و فيها سنابيك خشب صافة جنب بعض. و كنت احدق بعض الاحيان في السنابيك و اصيد بدح


كنا نروح نسبح في البحر و للأمانه ان رياييل قبل اهل غوص و التفصخ بين بعض عادي
كان الله يرحمة يسبح بوزار و لي طلع فصخ الوزار و عصرة و لبسة مرة ثانية
طبعاً ما كان فيه حركة مرور كما اللي موجوده الحين


و مرة و احنا طالعين من البحر في حالة الثبر (جزر) و اذا بمئات القباقب و الشربيان في البحر


و بعد ما تخرجت من الثانوية اخذت ملفي من المدرسة علشان اودية للوزارة علشان البعثة
و فتحت الاوراق ووجدت بصماته على اوراق تسجيلي لأنه ما كان يوقع الله يرحمه


كان يبني طوف و يذبح و يسلخ و يقطع و يصلح و يركب و يشيل و يحط


كانت اشوفة ينزل من باص ابيض مال الشركة (البترول)
لابس اوفرهول (Overall) و جوتي ابيض مال عمال و ضارب تريمبة
كنت اركض عليه و يعطيني اربعنات اروح فيها الدكان

الله يرحمه ويرحم جميع المسلمين

هالمحطة فيها محطات

ما اقول إلا .. إسرد وإجرح وعذب على ما تشتهي .. الصج يبقى والماضي يبقى والخديعه تنتهي

يسلموووووووووو اخوي الجني

[الواارد]

الله يرحم جدك يا اخوي الجني
ولااخفيك انك رجعتني لهذاك الوقت وهله جزاك الله خير اللي قلتي لي وين كان سوق الخضرة قبل قد رحته وانا صغير وما قدرت اتذكر وين كان لكن البضاعه كلها طماط وتفاح وجح هذي الانواع اللي كنت اعرفها خبرك ماتشوفها الا في العيد عقب العيد يتم جمع قشر البرتقال عشان يتدخنون علية العجايز ولوح صندوق البرتقال افضل اداه لرضخ الجروح ذاك الوقت

[جود]

الله يرحمه ان شاء الله,,,
ذكريات جميلة ,,في منها مر علينا

الله يعطيك العافية

[لولوتي]

الـــــــــــــلّــــــــــــــــه
مااجمل هذه المحطه
ومااجمل الذكريات
ذكريات اعز الناس على قلوبنا

ذكرتني باللي كنت احسه دووم وانا اسوي مساج لأبوي الله يرحمه...
كنت احس ان إيدي نتفه وصغيييييره جداً على ظهره وهو اللي ماشاء الله كان مثل ماتفضلت جثه طول وعرض...

زمان اول ومااحلى زمان اول

الله يرحم جميع المسلمين الاحياء منهم والاموات ويرزقنا اجمعين الصلاح في الدنيا والاخره

بارك الله فيك:)

[سهم بن سهم]

يالحبيب ذكرتني بزمان مضى وذكرتني بالوالد الله يغفر له وذكرتني بفريجنا ( المرقاب ) وذكرتني بالناس الطيبه اللي فيه ولحقت على ذاك الزمان يمكن على أواخره ..................................الله على ذاك الزمان !

انا من طبعي ماخاف ويمكن نظرية الخوف زالت من قاموسي والسبب ( كف أو طراق من الوالد الله يغفر له ) وانا صغير على ظهر المركب وانا عمري عشر سنوات ..........إستو رجال و أمسك السكان زين لايشط المحمل !!

عشر سنوات وسكان السنبوك أكبر من حجمي وايدي الصغيره ماتقدر تمسك او تفر السكان ولكن 0 ( الكف الساخن ) خلاني استوي رجال وأمسك السكان زين وعلى ضوء هالكف مسكت سكان حياتي !

الله يرحم الطيبين ويغفر لهم

[بوخالد2]

الله يرحمه ويغفرله ان شاءالله

ويجعل مثواه الجنه يارب

ايام جميله اخوى الجنى

الله يرحم اجدادنه واجدادكم

[بنت المنتدى]

الله يرحمه يارب


الف شكرلك

[الجني]

الله يعطيك العافية إخوي الجني بصراحه كل يوم تطلع بسالفة جديدة
والله يرحم جدك وجميع موتانا . . .

الله يعافيك يا k و يرحم والديك

شرفني مرورك

[الجني]

اسلوبك يشد بالكتابه ثنكيو

شرفني مرورج يا نور

ويل كم

[الجني]

ضحكتني هذي الجملة من قلب

الله يرحمه يا الجني ويطول في عمر جدي ويحفظه يعطيه الصحة والعافية

الله يجعل ايامك كلها افراح اخوي المخفي

و يطول عمر جدك و يعطيه الصحه و العافية

[الجني]

هههههههههههههه
من وصفك كأني اشوف الموقف قدامي
اضحك الله سنك اخوي الجني

بأنتظار المحطة المقبلة .. على أمل ان لا تنتهي الرحلة و نستمر من محطة الى اخرى

قليل هم من يقدر ان يتصور و يطلق العنان لخياله
و نحن ينقصنا بعد النظر و رؤية ما وراء الوصف

الله يعطينا وياك اخوي رايق طول العمر و الصحة و العافية و نستمر
شرفني مرورك اخوي رايق

[الجني]

الله يرحمه ويغفرله

ويعله الجنه

بس هذا موقف الاسنان مر علي مره !!

رجال راحووو

يسلموو يالجني

الله يسلمك اخوي جلمود و يرحم والديك

شكرا على المرور و التعليق الكريمين

[الجني]

سوالفك حلوة...مع إنك جني( الله الحافظ :) )

الله يحفظج اختي umm yousef

شرفني مرورج الكريم

[الجني]

الله يرحمه ويجعل مثواه الجنه
آمين
مبدع ماشاالله عليك

جزاج الله خير اختي زهرة قطر

شرفني مرورج الكريم اختي

[الجني]

تعتريني ابتسامة عريضة :) اخي الجني عندما أقرأ لمحطاتك
أسئل الله أن يكون مقبلها عبادة وأخرها شهادة
تحياتي لك

الله يرزقنا الشهادة اخوي الفيصل , جزاك الله خير

شرفني مرورك اخي العزيز

[الجني]

الله يرحمه ويرحم جميع المسلمين

هالمحطة فيها محطات

ما اقول إلا .. إسرد وإجرح وعذب على ما تشتهي .. الصج يبقى والماضي يبقى والخديعه تنتهي

يسلموووووووووو اخوي الجني

خلها على ربك اخوي انسان

و هونها و تهون و لا يصح الا الصحيح

الله يسلمك اخوي العزيز

[الجني]

الله يرحم جدك يا اخوي الجني
ولااخفيك انك رجعتني لهذاك الوقت وهله جزاك الله خير اللي قلتي لي وين كان سوق الخضرة قبل قد رحته وانا صغير وما قدرت اتذكر وين كان لكن البضاعه كلها طماط وتفاح وجح هذي الانواع اللي كنت اعرفها خبرك ماتشوفها الا في العيد عقب العيد يتم جمع قشر البرتقال عشان يتدخنون علية العجايز ولوح صندوق البرتقال افضل اداه لرضخ الجروح ذاك الوقت

الله يرحم والديك اخوي الواارد

صحيح الخضرة لا توجد الا في المناسبات

شرفني مرورك اخوي الواارد

[الجني]

الله يرحمه ان شاء الله,,,
ذكريات جميلة ,,في منها مر علينا

الله يعطيك العافية

الله يرحم والديج و يعطيج العافية اختي جود

شرفني مرورج و تعليقج

[هتـان قطر]

الجني..جننتنا وعذبتنا بالذكريات الخالدة اللي ما نقدر ننساها او نتناساها

ذكرتني بابوي الله يرحمه لما كان يجيب لنا خضرة من سوق الخضرة وكنا

نتسابق على الجزر البنفسجي اللي اكتشفت بعد سنوات طويله انه مب جزر

اظن اسمه شمندر ما دري بنجر..:rolleyes2:

ااااه يااارب تغفر لبوي وجد الجني وتسكنهم الفردوس الاعلى من الجنه..

[الجني]

الـــــــــــــلّــــــــــــــــه
مااجمل هذه المحطه
ومااجمل الذكريات
ذكريات اعز الناس على قلوبنا

ذكرتني باللي كنت احسه دووم وانا اسوي مساج لأبوي الله يرحمه...
كنت احس ان إيدي نتفه وصغيييييره جداً على ظهره وهو اللي ماشاء الله كان مثل ماتفضلت جثه طول وعرض...

زمان اول ومااحلى زمان اول

الله يرحم جميع المسلمين الاحياء منهم والاموات ويرزقنا اجمعين الصلاح في الدنيا والاخره

بارك الله فيك:)

الله يرحم الوالد اختي لولوتي و يبارك فيج

و مشكورة على المرور و التعليق الكريمين

[@ دانتيل قطر @]

رحمةّالله عليه
والله يرحم أبهاتنا وأمهاتنا
وجدوّدنا
صج
أيامهم ماتتعوّض
مشكوووووووووووووور

[الجني]

يالحبيب ذكرتني بزمان مضى وذكرتني بالوالد الله يغفر له وذكرتني بفريجنا ( المرقاب ) وذكرتني بالناس الطيبه اللي فيه ولحقت على ذاك الزمان يمكن على أواخره ..................................الله على ذاك الزمان !

انا من طبعي ماخاف ويمكن نظرية الخوف زالت من قاموسي والسبب ( كف أو طراق من الوالد الله يغفر له ) وانا صغير على ظهر المركب وانا عمري عشر سنوات ..........إستو رجال و أمسك السكان زين لايشط المحمل !!

عشر سنوات وسكان السنبوك أكبر من حجمي وايدي الصغيره ماتقدر تمسك او تفر السكان ولكن 0 ( الكف الساخن ) خلاني استوي رجال وأمسك السكان زين وعلى ضوء هالكف مسكت سكان حياتي !

الله يرحم الطيبين ويغفر لهم

يا زين المرقاب و اهله يا سهم بن سهم و السنبوك له ذكريات كبيرة يبيله محطة

شرفني مرورك اخي سهم بن سهم و تعليقك الكريمين

[لولوتي]

اتمنى اضافة خاصية طباعة الصفحه في المنتدى...

حتى لا اضطر لنقل مااقرأه من محطات على برنامج اخر ومن ثم طباعته...

سويت دعايه حلوه عالمحطات واظن اني بتاجر فيها:ok:

[بــو فهــد]

الله يرحم جدك ويغمد روحه الجنه ان شالله

كم تمنيت اني اعيش في هالزمن .. الزمن الجميل مثل ما احب اسميه ..

الله يعطيك الصحه وطول العمر ابوي الجني ..

ولدك المغترب
بــو فهــد