آااااااااااااااااااه ياقطـــر !! فقدنا الأمان ؟؟

[الســـهم]

فعلا هذا واقعنا المرير شئنا ام ابينا , راحت الايام اللي كنت اطلع فيها للشغل وقلبي مرتاح ومتطمن , ماعدنا نحس بالامان بالدار اللي ينضرب فيها المثل , عشوائية وعدم تخطيط وكلا يغني على ليلاه , لاالبلدية ولا الداخلية ولا العمل ولا الصحة قادرين يتخذون اي اجراءات تمنع سكن العزاب بين العوائل , كلا يرمي الكورة في ملعب الآخر وبين حانا ومانا ضاعت لحانا , غريب امرهم وهم يرون كتيبة كاملة (جيش عمال) يقطنون بيوت لا تتحمل بضع عشرات من الافراد , بيت واحد يسكنه مايتجاوز عدد سكان المنطقة باكملها , مخالفات صريحة لقوانين البناء والاسكان ماتحرك ساكن , كيف أئتمن على عائلتي اللي عددهم لا يتجاوزالـ 8 افراد من بيت الجار الذي يقطنه مايتجاوز الـ 100 عامل من العزاب , والله ان محل تجاري وبلوحة تجارية تحول الي سكن للعزاب وبأبوابه الزجاجية , فعلا مأساة لما تشتكي وماتلقى اذن تسمعلك ..

همسة لكل من تطاوعه نفسه بسلب الناس أمانهم >>

((الله يبلاك بما بليت الناس به)) ..

[غزلان]

الحريه انعدمت بوجودهم حتى في لبيوت محد يقدر يطلع يمشي او في الجو الحلو يجلس بالحديقه

العمال من كل صوب:(

[alwahesh]

المشكله مب بس سكن العمال

وحتى الفلل تتأجر بالغرف يعني كل فيلا فيها اكثر من 10 عوائل مختلفه وخاصه البتان يفرخون ما شاء الله

كل بيت مثلا فيه 8 اخوان وكل اخ عنده 6-8 عيال مراهقين

الحل ان الدوله تبني مجمعات قبل ما تقرر انها تهد بيوت خلق الله

تحياتي

[الجنوبي 11]

اخوي السهم ،اتفق معاك وحاس باللى تعاني منه،بس اح\ سأل نفسه لمن هذي البيوت ،كلنا نعرف انها حق اهل او جيران قطريين كانوا ساكنين حولينا،وين اهل قطر الطيبين اللى كانوا يختارون الجار قبل الدار وين الطيبن اللى يشاورون الجيران قبل لايسكنون احد في عقاراتهم،كل هذي الامور انتهت الا من رحم الله .المادة طغت على النفوس ،حتى القرى والمدن الصغيرة امتلت بالعمال ،روحوا ياجماعة الخور او ذخيرة او الوكرة ،روحوا الشحانيه كلها عمال من مختلف الجنسيات .الله المستعان

[ضوى]

الصراحة شئ محزن جدا

كيف انت يا جاري تأجر البيت لعمال وانت عارف انه للحق جار عليك ، تستر عليه وتصون حرمته

لا حول ولا قوة الا بالله وحسبي الله ونعم الوكيل

[الســـهم]

هلا اختي غزلان ..

لا حرية ولا امان , الناس همها المادة ..

ما راح يحسون الا اذا طاح الفاس بالراس , اغتصاب وجرايم وانتقام ..


هلا اخوي alwahesh ..

والله تعدد العوئل اهون من العزاب , على الاقل تلقاهم بحال سبيلهم ..

العزاب يسرحون ويمرحون بدون حسيب ولا رقيب , لا لباس محتشم ولا وازع ديني (غير مسلمين) ..

والمشكلة ولا اي جهه حكومية قادره تتخذ اي اجراءات , لا قانون ولا صلاحيات رغم ان منهم ناس حاسين فيك وودهم يساعدونك ..


هلا اخوي الجنوبي 11 ..

الله يعين اهل الخور والذخيرة , وكلنا نعرف انهم اهل قطر , على هالامواج العاتية اللي بتخلط الحابل بالنابل ..

المشكلة الناس عمتها المادة وطغت على اخلاقياتهم , طبعا انا ما اعم ولكن الفلوس تعمي النفوس ..


شاكر لكم مشاركتكم والله يكون بعونا ويستر على اهلنا وعيالنا ..

[بوالنوف]

انتوا تشتكون من سكن العمل والعزاب

وانا اشتكي من عيال منطقتنا

في فيريجنا في سكن ماخذينه جاليه هنديه، بس يحليلهم ولا كأن لهم وجود ماتجوف الا سيايرهم في الليل وفي النهار مافي شي

لكن عيال فريجنا يتيمعون في نص الشارع ومايخلون حد في حاله لا كبير ولا صغير، ولا بنت ولا صبي

كلمتهم لكن أجابتهم كانت في منتهى الحقاره: أحنا قدام بيتنا وفي الشارع مب عند بيتكم قاعدين

مع ان مايفصل بين بيتنا وبيتهم 5 متر وحاولة اشتكي عند الشرطة ولا في فايده

العفوا خرجت عن موضوعكم

لكن عشان تعرفون مب بس المستأجرين قمنا نخاف منهم حتى عيال نخاف منهم أهل البلد
والهنود نرتاح لهم أكثر من المواطنين

[سعود ناصر]

البلدية وزارة فاشلة من قلب على جميع المستويات تبي وزير قوي يحركه من الخيارين الله يذكره بالخير

[الـدانـه]

الله يأمن خوفك اخوي السهم


موضوعك يحز في النفس


المفروض البلديه تتخذ اجراء عاجل لخطورة هذا الوضع على الأسر الآمنه

[السلطان]

الله يعينك والله انها مصيبة

[بنت المنتدى]

والله شي يعور القلب خلها ع الله

[الســـهم]

هلا اختي ضوى ..

بارك الله فيج وفي امثالج من الناس , اللي للحين قلوبهم على جيرانهم واهل بلادهم في زمن ماتت فيه الضماير الا من حم ربي , وحسبنا الله ونعم الوكيل ..


هلا اخوي بوالنوف ..

هذول اليهال بكرة يكبرون وبيخف اذاهم , لكن العزوب (عمالة) جايينك من كل حدب وصوب (من كل قطر اغنية) ودينهم غير دينك , نعاني من تصرفاتهم واطباعهم اللي لايمكن نتقبلها , لو كانوا عوائل كانت الامور أأمن بكثير , مشكلة ماتحس بها الا لما تعانيها والله لايبليك بهم ان شاء الله ..


هلا اخوي سعود ناصر ..

وزير البلدية صعب احمله المسؤولية , لأنه بدت قبل وصوله المنصب , اللي ممكن تحملها المسؤولية هي الحكومة وسياسة الازالة لانها خلقت ازمة في توافر المساكن , كذلك محاولة اللحاق بركب التطور في يوم وليلة رغم ان غيرك وصلها بعد سنين طويلة وبخطوات مدروسة , والدليل التخبطات اللي صايرة باغلب مشاريع البنية التحتية , اضف على ذلك عدم وجود قوانين تحمي المواطنين من هذا المد العزابي الكبير ..


هلا اختي الدانة ..

شعورج طيب نابع من قلب اخت حاسة بمعاناة المواطنين , وان شاء نلقى تجاوب من الجهات المسؤولة , لان الوضع راح يصبح اخطر من الحاصل حاليا لو مارصارت تحركات سريعة ..


هلا اخوي السلطان ..

شاكر لك شعورك الطيب , وكثر الله من امثالك ..


هلا اختي احلى ملاك ..

الله يبعد عنكم هذه المعاناة , وشعور طيب منج ..

شاكر لكم مروركم وتعقيبكم جميعا , والله يبعد عن اهل هذه البلد مواطنيها ومقيميها كل مكروه ..