كلمة لمن فقدناهم ...

[التيما]

مرات كثيرة أتذكر أمي العودة " جدتي " الله يرحمها ويغفر لها ولكل المسلمين .. وأتذكر قعداتي معاها وخفة دمها وقصصها الي كنت دايما أقول في نفسي اني بسجلها وبدونها .. في هاي الهلمة الكثيرة من الذكريات تذكرت إني ماعمري قلت لها إني أحبها :weeping: .. وهالشي يضايقني .. يمكن ماتعودت .. يمكن كنت في احساسي اعرف انها تدري اني أحبها .. ومع كذا الحين أقول حق نفسي ياريتني قلت لها اني أحبها .. وتعلمت هالشي اسويه مع هلي " أمي .. أبوي .. إخواني .. خواتي فديتهم كلهم ..


بس موضوعي أبيه يكون عن .. شخص فقدته وتحسفت انك ما قلت له كلمة ترن للحين في خاطرك وروحك .. وتقول ياريتني قلت له ....... أبي الموضوع أبي كلمة جاية من حب ..

من هالشخص ؟

وشالي بخاطرك تقوله ؟

وليش ما قلت له وهو جدام عينك ؟

[نمر بن عدوان]

كلمة احبج خاطري اقولها لزوجتي الله يرحمها لو كانت عايشه وحشتني هالكلمه من زمان ماقلتها لحد ولا راح اقولها لحد غيرها والله يجمعني ويها في الجنه واقولها لها .الله يرحمها ويرحم اموات المسلمين. قلبتي علي المواجع اختي التيما

[حنيــن]

قلبتي المواجع يا ألتيما

هي جدتي
الله يرحمها ويرحم جميع موتى المسلمين

توفت الله يرحمها من 14 سنة ولليوم عيني تبكيها
لليوم أحس إني أحتاج لها ولحبها وحنانها

وندمااااااااااااااانة إني وعدتها أروح لها المستشفى الظهر وما رحت لها إلا المغرب بعد الجامعة .. وكانت خلاص في آخر لحظاتها وما شفتها ولا شافتني يوم وفاتها :weeping:

ما أنسى اللحظة اللي دخلت فيها المستشفى وعمي يقول لي خلاص يا يبه .. جدتج راحت منا

هالإنسانة هي اللي زرعت فينا كلنا كل خصلة حلوة .. عمري ما أنسى فضلها ولا حبها لنا ومهما سويت أو قلت أبقى مقصرة في حقها

بس لو أحلم فيها وأشوفها :weeping:

[التيما]

كلمة احبج خاطري اقولها لزوجتي الله يرحمها لو كانت عايشه وحشتني هالكلمه من زمان ماقلتها لحد ولا راح اقولها لحد غيرها والله يجمعني ويها في الجنه واقولها لها .الله يرحمها ويرحم اموات المسلمين. قلبتي علي المواجع اختي التيما

ليش قلبت المواجع عليك أخوي ؟ أنا اتصور انك من الأساس ما نسيتها .. ولولا كذا ما ذكرتها الله يرحمها ويغمد روحها الجنه آمين .. أنا قصدت في هالموضوع ان الكلمة الي في خاطرنا تحرق ارواحنا لانا ما قلناها .. وتحسفنا انا ما قلناها .. ويقولون ان الميت يزور اهله ويشعر فيهم .. وأكيد هي تعرف أنت شقد تحبها ومخلص لها .. الله يجمعك وياها يارب في جنة النعيم ..

[التيما]

قلبتي المواجع يا ألتيما

هي جدتي
الله يرحمها ويرحم جميع موتى المسلمين

توفت الله يرحمها من 14 سنة ولليوم عيني تبكيها
لليوم أحس إني أحتاج لها ولحبها وحنانها

وندمااااااااااااااانة إني وعدتها أروح لها المستشفى الظهر وما رحت لها إلا المغرب بعد الجامعة .. وكانت خلاص في آخر لحظاتها وما شفتها ولا شافتني يوم وفاتها :weeping:

ما أنسى اللحظة اللي دخلت فيها المستشفى وعمي يقول لي خلاص يا يبه .. جدتج راحت منا

هالإنسانة هي اللي زرعت فينا كلنا كل خصلة حلوة .. عمري ما أنسى فضلها ولا حبها لنا ومهما سويت أو قلت أبقى مقصرة في حقها

بس لو أحلم فيها وأشوفها :weeping:

اختي حنين الله يرحم جدتج إن شاء الله وييرحم أمواتنا يارب .. بس ما قلتي لنا شنهي الكلمة الي تبين تقولينها لها ؟ هلي تبين تقولين لها آسفة لانج تأخرتي عليها او كلمة ثانية في قلبج تبين تقولينها لها ؟

[طير شلـوى]

لا تزيد المواجع خلني قد نسيت

:weeping::weeping::weeping::weeping:

[التيما]

لا تزيد المواجع خلني قد نسيت

:weeping::weeping::weeping::weeping:

يبدو انتو ما فهمتو الموضوع .. انا طلبت في الموضوع نقول كلمة في خاطرنا كلمة حب لإنسان فقدناه .. كلمة لو قلناها الحين حتى لو فقدنا هالشخص نرتاح شوي من السؤال الي في بالنا " ليش ما قلنا لهم ؟ "

شاكره المرور ..

[بوحارب]

من هالشخص ؟


محد يا التيما !!

الغاليين موجودين والله اعلم متى يروحون من هالدنيا @@

مشكورة ع الموضوع الحزين

[ســـهم]

التيما

نغفل دائما من الفراق ونستبعده وهذا من حكمة الله لذلك نجهل هذا الكلام

لو نعرف ان فلانا سيفارقنا لجلسنا بقربه حتى تفيض روحه ونحن نقول له نحبك نحبك نحبك

ولكن تأكدي أن الحب في القلوب وتبادل للشعور ولا يقع تحت كلمه من ثلاثة أحرف

لذلك لاتندمي فالشعور متبادل بين المحبين وعبر القلوب ...

شكرا لك التيما .

[ROSE]

جدتي الله يرحمها ابي اقول لها احبج وسامحيني :(

كانت مريضة بالمستشفى ونفس قصة حنين وكنت في ثالث ثانوي

وكان المفروض اروح لها المستشفى بس ماحصلنا انا واختي من

يودينا على اساس اني طلعت من المدرسة وهلي كلهم كانوا معاها

بالمستشفى ويقولون قبل ماتتوفى كانت تسال عنا :( وبعدها بلغونا بوفاتها

الله يرحمها

[ضوى]

من هالشخص ؟

امي الله يرحمها ويوسع قبرها ويدخلها الجنة مع الابرار والمتقين اللهم امين

وشالي بخاطرك تقوله ؟

سامحيني يمه ما كنت اقصد اي شئ سويته معاج ، عمري ما فكرت بلحظة اني ممكن افقدج بغمضة عين ، عمري ما فكرت يصحوني من النوم عشان يقولون لي امج ماعادت بهالدنيا ، عمري ما تخيلت حياتي بدونج :weeping: سامحيني سامحيني سامحيني احبج احبج احبج

وليش ما قلت له وهو جدام عينك ؟

لهتني الدنيا وركضتني وراها عيال وزوج وبيت وشغل ونسيت اغلى الناس واعز الناس اتمنى لو يرد الزمن يوم واحد بس واكحل عيوني بشوفتها واضمها واابوس قاع ريولها واقول لها فديت ترابج يا يمه

الله يرحمها يرحم ابوي واخوي وجدتي ويجمعني بهم بجنة النعيم اللهم اميييييييييييييييييين

[التيما]

محد يا التيما !!

الغاليين موجودين والله اعلم متى يروحون من هالدنيا @@

مشكورة ع الموضوع الحزين

والله لا يحرمك منهم .. واذا في غاليين لا تنسى تقولهم أحبكم ترى لها مفعول السحر .. ولا تظن انهم يدرون .. انا للحين رغم اني متأكدة إن جدتي تعرف اني احبها وااايد الا اني لا زلت الوم نفسي واسألها شكان بيصير لو قلت لها احبج يا يدتي ؟:weeping:

[التيما]

التيما

نغفل دائما من الفراق ونستبعده وهذا من حكمة الله لذلك نجهل هذا الكلام

لو نعرف ان فلانا سيفارقنا لجلسنا بقربه حتى تفيض روحه ونحن نقول له نحبك نحبك نحبك

ولكن تأكدي أن الحب في القلوب وتبادل للشعور ولا يقع تحت كلمه من ثلاثة أحرف

لذلك لاتندمي فالشعور متبادل بين المحبين وعبر القلوب ...

شكرا لك التيما .

اخوي سهم .. أحاول اقول لنفسي هالكلام .. بس احس في سؤال فيني ليش ما قلت لها قبل ما تموت ؟ ليش ما نحبهم اكثر الا اذا فقدناهم .. ليش لين صحنا وتذكرناهم نقول وينكم والله نحبكم ..

شاكره مرورك اخوي سهم

[التيما]

من هالشخص ؟

امي الله يرحمها ويوسع قبرها ويدخلها الجنة مع الابرار والمتقين اللهم امين

وشالي بخاطرك تقوله ؟

سامحيني يمه ما كنت اقصد اي شئ سويته معاج ، عمري ما فكرت بلحظة اني ممكن افقدج بغمضة عين ، عمري ما فكرت يصحوني من النوم عشان يقولون لي امج ماعادت بهالدنيا ، عمري ما تخيلت حياتي بدونج :weeping: سامحيني سامحيني سامحيني احبج احبج احبج

وليش ما قلت له وهو جدام عينك ؟

لهتني الدنيا وركضتني وراها عيال وزوج وبيت وشغل ونسيت اغلى الناس واعز الناس اتمنى لو يرد الزمن يوم واحد بس واكحل عيوني بشوفتها واضمها واابوس قاع ريولها واقول لها فديت ترابج يا يمه

الله يرحمها يرحم ابوي واخوي وجدتي ويجمعني بهم بجنة النعيم اللهم اميييييييييييييييييين

الله يرحمهم يارب .. ويغفر لهم ولكل أمة محمد .. تصدقين ضوى حبيبتي انا لمن بديت اقولها لامي وأبوي حسيت بشي غريب واستحيت من ايش مادري شي يمسك الساني عن اني اقولها .. ممكن اقول هلا لبيه عيوني بس أحبج يما او أحبك يبا ماقدرت اقولها .. بس دربت نفسي اقولها لهم .. الله يخليهم لي ويطول بعمرهم يارب

[هتـان قطر]

التيما يالغاليه عمر الحب ماكان بالكلام وبس والا كان شفتي

الكل يتشدق بها المحب وغير المحب..

يكفي ان تشعري من تحبين بحبك من خلال افعالك وتضحياتك

انا فقدت الاب والاخ والجدة وكلهم يعلم الله كم احبهم ولكن طبيعتنا

تغلب علينا والى الان لا انطق بهذه الكلمة الا نادرا ..

لان فاقد الشئ لا يعطيه..

التيما احبك في الله:shy:

[التيما]

جدتي الله يرحمها ابي اقول لها احبج وسامحيني :(

كانت مريضة بالمستشفى ونفس قصة حنين وكنت في ثالث ثانوي

وكان المفروض اروح لها المستشفى بس ماحصلنا انا واختي من

يودينا على اساس اني طلعت من المدرسة وهلي كلهم كانوا معاها

بالمستشفى ويقولون قبل ماتتوفى كانت تسال عنا :( وبعدها بلغونا بوفاتها

الله يرحمها

الله يرحمها حبيبتي ويرحم أمواتنا يارب .. غلاي روز أنتي مالج يد في عدم روحتج .. فعلا صعب عالواحد يحس بهالاحساس .. تدرين غلاي ان يدتي لمن ماتت كانت في بيتنا وبيني وبينها غرفه بس كنت توني يايه من الدوام وقلت لين غيرت ملابس بمرها .. :weeping: وكنت واايد متأخره .. بس ما خليتها لمن دريت انها اسلمت الروح قعدت ابوسها وادعي لها بالثبات ..
تسلمين غلاي عالمرور

[التيما]

التيما يالغاليه عمر الحب ماكان بالكلام وبس والا كان شفتي

الكل يتشدق بها المحب وغير المحب..

يكفي ان تشعري من تحبين بحبك من خلال افعالك وتضحياتك

انا فقدت الاب والاخ والجدة وكلهم يعلم الله كم احبهم ولكن طبيعتنا

تغلب علينا والى الان لا انطق بهذه الكلمة الا نادرا ..

لان فاقد الشئ لا يعطيه..

التيما احبك في الله:shy:


هتان حبيبتي .. أدري ان غلانا لحد مو بالحجي .. بس ليش ما نكمل هالغلا والحب لهم بكلمة أحبج أو أحبك ؟ ليش نستحي نقولها ؟ تدرين هتان انتي قلتي انج ماتقولينها الا نادر .. وهاي غلطتنا .. لازم اكون واثقه اني قلتها وان امي وابوي وخواتي واخواني يدرون اني أحبهم مو بالفاضية والمليان لان ماراح يكون لها طعم .. لكن في اوقات معينه صدقيني الا ما تكون حلوة ولها قيمة

شاكره مرورج حبيبتي .. وأحبج في الله انا بعد اختي ..

[دنيا الاسهم]

اشكرج على الموضوع اختي التيما
احيانا نحب اشخاصا افتقدناهم بسبب الوفاة هم من صلة الارحام ولكن لا نقول لهم اننا نحبهم رغم اننا نحبهم
ونفترض انهم يعلمون ذلك باحساسهم لكن ليس بالضرورة ان نقولها لهم صراحة
مع اني خاطري اقولها لابي وجدتي وعمتي الله يرحمهم جميعا
الله يهديج يا التيما قمتي تقولين مواضيع حزينة نغض الطرف عنها رغم عدم نسيانها :weeping:

[FG]

أنحاول أشوي أنغير حالة الموضوع الى فرح
:)

أن شاء الله نلقاهم في الجنه وأنقول لهم نحبكم في الله ..

[التيما]

اشكرج على الموضوع اختي التيما
احيانا نحب اشخاصا افتقدناهم بسبب الوفاة هم من صلة الارحام ولكن لا نقول لهم اننا نحبهم رغم اننا نحبهم
ونفترض انهم يعلمون ذلك باحساسهم لكن ليس بالضرورة ان نقولها لهم صراحة
مع اني خاطري اقولها لابي وجدتي وعمتي الله يرحمهم جميعا
الله يهديج يا التيما قمتي تقولين مواضيع حزينة نغض الطرف عنها رغم عدم نسيانها :weeping:

اختي دنيا الأسهم .. اايدج في كلامج نغض الطرف عنها لكن ما ننساهم .. الله يرحمهم يارب .. وفعلا يمكن كانو يعرفون مقدار حبنا لهم .. رغم كذا ما قلنا لهم هالكلمة ؟؟ السؤال حبيبتي ليش ما قلنا لهم ؟

شاكره مرورج ..

[التيما]

أنحاول أشوي أنغير حالة الموضوع الى فرح
:)

أن شاء الله نلقاهم في الجنه وأنقول لهم نحبكم في الله ..

:nice: زين سويت اخوي الحبابي .. ترى الموضوع مو حزن بقد ما هو توارد مشاعر .. بس اعجبتني مداخلتك .. :yes:

[سلامي للكل]

الوالــــــــــــــــد (رحمة الله عليك)

صيحتيني ياالتيما.....

ماعندي غير كلمة أحبك يابا

وينك يابا..؟

ارجع فديتك...

ارجــع ورجــع الفرحـــة

والله اني محتاج لك يابا

الله يرحمك ويجمعني معاك في الجنـــة

[التيما]

الوالــــــــــــــــد (رحمة الله عليك)

صيحتيني ياالتيما.....

ماعندي غير كلمة أحبك يابا

وينك يابا..؟

ارجع فديتك...

ارجــع ورجــع الفرحـــة

والله اني محتاج لك يابا

الله يرحمك ويجمعني معاك في الجنـــة


اخوي سلامي للكل .. الله يرحم والدك يارب .. أخوي سلامي .. الموت حق وشعورك بفقدان الوالد دليل على عظم هالانسان ودوره في حياتك ومدى الحنان الي حسيته منه .. من كلامك على الوالد الله يرحمه وبكائك لفراقة وكلامك له حسيت بنفس احساسك وبكيت معاك مع اني ما اعرفه الله يرحمه ويغمد روحه الجنه آمين ..

[جلمود]

موضوع وايد حلوو اختي التيماا ويقلب الذكريات

هو موقف صار لي مع ولد عمتي الذي انتقل الى رحمة الله تعالى من كم يوم اثناء قيامة بتدريب على كيفية فك قنبلة ( اثناء الواجب ) لقيته قبل لايتوفه بالاندمارك وكنت رايح أدفع الفتوره من العجله ماسلمت عليه ,, ياليتني سلمت عليه قبل لا افارقه ,, لاكن هذا امر الله سبحانه

والحمدلله علي كل حال ..

[التيما]

موضوع وايد حلوو اختي التيماا ويقلب الذكريات

هو موقف صار لي مع ولد عمتي الذي انتقل الى رحمة الله تعالى من كم يوم اثناء قيامة بتدريب على كيفية فك قنبلة ( اثناء الواجب ) لقيته قبل لايتوفه بالاندمارك وكنت رايح أدفع الفتوره من العجله ماسلمت عليه ,, ياليتني سلمت عليه قبل لا افارقه ,, لاكن هذا امر الله سبحانه

والحمدلله علي كل حال ..

الله يرحمه ان شاء الله .. أخوي جلمود ما قلت لنا شتبي تقوله ؟ وليش ما قلتها له قبل ما تفقده ؟ هل انت حاز بخاطرك انك ما سلمت عليه يومها ؟ هاي من طيبك اخوي جلمود .. الشعور بالحزن على موقف رغم انه غير مقصود تعني اهميه هالانسان لنا وتوعينا لهالدنيا الي تخلينا ننشغل عن كلمه حلوة للأهل .. ما نعرف قيمتها الا بعد ما يفارقونا ..

شاكره مرورك اخوي .

[جود]

اختي التيما اقرا الموضوع واشوف اردود الأخوان
واقول اكتب في من والا من
جداتي الله يرحمهم
والا عمي الله يرحمه
والا الغالية الي توفت الاسبوع الي فات الله يرحمها!!

وانا افكر طلع الي في بالي كلام كثير
اعتذار , تعبير عن حب , وصل

لكن القاهم ان شاء الله في جنات النعيم

[التيما]

اختي التيما اقرا الموضوع واشوف اردود الأخوان
واقول اكتب في من والا من
جداتي الله يرحمهم
والا عمي الله يرحمه
والا الغالية الي توفت الاسبوع الي فات الله يرحمها!!

وانا افكر طلع الي في بالي كلام كثير
اعتذار , تعبير عن حب , وصل

لكن القاهم ان شاء الله في جنات النعيم

الله يرحمهم ويرحم موتانا اختي جود .. فعلا مع العودة للغاليين الي فقدناهم مانعرف شنقول ولا نقول .. شاكره مداخلتج اختي .

[miss-qatr]

موضوع مميز اختي التيما


من ردود الاعضاء لاحظت الاغلب فكر باللي رحلو وماتو لكن الحمدلله فيه ناس كثير عايشين وانحبهم بس الواحد مايحس بقيمه اللي عنده الا اذا فقده


ليش ما يكون هالموضوع تنبيه لنا عشان ما نتحسف بيوم انا ما عطينا من نحبهم حقهم ؟؟؟


وفعلاً هالدنيا ما تسوى ان القلوب تنملي بالاحقاد والكره وياما خوان واهل يموتون واهم ما يكلمون بعض

لازم انخلي كلمه (احبكم) دايماً على لسانا ان كنتي أم دايماً قوليها حق عيالك ترا لها تأثير كبير عليهم

ان كنت اب نفس الشي ليش دايماً البعض يمتنع عن هالكلمه ويكتفي بالحب اللي بقلبه ؟؟

قول حق عيالك وزوجتك اني احبكم :)

طلعت شويه عن الموضوع مدام التيما بس كان هالكلام بخاطري اقوله :nice:

خلنا نعيش حياتنا مع اهلنا ومع كل من انحب وخلهم يحسون بحبنا لهم عشان احنا بعد نستمتع بحبهم لنا


يعطيك العاااااااافيه

[حنيــن]

اختي حنين الله يرحم جدتج إن شاء الله وييرحم أمواتنا يارب .. بس ما قلتي لنا شنهي الكلمة الي تبين تقولينها لها ؟ هلي تبين تقولين لها آسفة لانج تأخرتي عليها او كلمة ثانية في قلبج تبين تقولينها لها ؟




لليوم أحس إني أحتاج لها ولحبها وحنانها

وندمااااااااااااااانة إني ما شفتها ولا شافتني يوم وفاتها :weeping:

هالإنسانة هي اللي زرعت فينا كلنا كل خصلة حلوة .. عمري ما أنسى فضلها ولا حبها لنا ومهما سويت أو قلت أبقى مقصرة في حقها

بس لو أحلم فيها وأشوفها :weeping:

هلا أختي ألتيما
اللي فوق هو اللي ودي أقوله لها

وباختصار ..
ودي أشكرها على كل شي حلو زرعته فينا .. وفضلها العمر كله ما أنساه وبيمتد مني لعيالي
وفعلاً مشتاقة ومحتاجة لها ولمحبتها وحنانها .. حتى لو بشوفتها في حلم


الله يرحمها ويغفر لها ويجعل مثواها الجنة .. هي وجميع موتى المسلمين

[ونه الم]

كل الحروف هنا نزفت ألماً بفراق الأحبه
ولكن لامحال لنا في هذي الدنيا كل من عليها فان تجمعنا وتفرقنا
أسأل الله لكم الصبر فيمن فقدتم
وجمعكم مع كل عزيز بجنات الفردوس الأعلى

[أمة الله]

خاطري أقول حق أمي وأبوي وخواتي واخواني وكل كل هلي اني أحبكم بس مثل ماقلتي اللسان مب متعود على هالشي والواحد يستحي انه يقولها....ليتنا تربينا على إظهار مشاعرنا بشكل طبيعي بدل ما الواحد تكون مشاعره بينه وبين نفسه

[التيما]

موضوع مميز اختي التيما


من ردود الاعضاء لاحظت الاغلب فكر باللي رحلو وماتو لكن الحمدلله فيه ناس كثير عايشين وانحبهم بس الواحد مايحس بقيمه اللي عنده الا اذا فقده


ليش ما يكون هالموضوع تنبيه لنا عشان ما نتحسف بيوم انا ما عطينا من نحبهم حقهم ؟؟؟


وفعلاً هالدنيا ما تسوى ان القلوب تنملي بالاحقاد والكره وياما خوان واهل يموتون واهم ما يكلمون بعض

لازم انخلي كلمه (احبكم) دايماً على لسانا ان كنتي أم دايماً قوليها حق عيالك ترا لها تأثير كبير عليهم

ان كنت اب نفس الشي ليش دايماً البعض يمتنع عن هالكلمه ويكتفي بالحب اللي بقلبه ؟؟

قول حق عيالك وزوجتك اني احبكم :)

طلعت شويه عن الموضوع مدام التيما بس كان هالكلام بخاطري اقوله :nice:

خلنا نعيش حياتنا مع اهلنا ومع كل من انحب وخلهم يحسون بحبنا لهم عشان احنا بعد نستمتع بحبهم لنا


يعطيك العاااااااافيه

ماقدر اضيف على كلامج اختي .. وهاي هدفي من موضوعي وهو ..

1- نتذكر ناس حبيناهم استحينا نقولهم نحبكم ومن غير سبب الا الحياء ..

2- نتعلم ان هالكلمة حلوة ولها مفعول السحر في نفوسنا فلا نبخل فيها على الي نحبهم عشان ما نندم عقب ..

[التيما]

هلا أختي ألتيما
اللي فوق هو اللي ودي أقوله لها

وباختصار ..
ودي أشكرها على كل شي حلو زرعته فينا .. وفضلها العمر كله ما أنساه وبيمتد مني لعيالي
وفعلاً مشتاقة ومحتاجة لها ولمحبتها وحنانها .. حتى لو بشوفتها في حلم


الله يرحمها ويغفر لها ويجعل مثواها الجنة .. هي وجميع موتى المسلمين

شاكره عودتج للموضوع اختي حنين .. والله يرحمها ويغفر لها ويرحم موتى المسلمين آمين ..

[التيما]

كل الحروف هنا نزفت ألماً بفراق الأحبه
ولكن لامحال لنا في هذي الدنيا كل من عليها فان تجمعنا وتفرقنا
أسأل الله لكم الصبر فيمن فقدتم
وجمعكم مع كل عزيز بجنات الفردوس الأعلى



كلمات جميلة كل الشكر على مشاركتنا فيها في الموضوع .. ندعو للجميع بالرحمة والله يجمعنا بأحبتنا في جنته آمين ..

[التيما]

خاطري أقول حق أمي وأبوي وخواتي واخواني وكل كل هلي اني أحبكم بس مثل ماقلتي اللسان مب متعود على هالشي والواحد يستحي انه يقولها....ليتنا تربينا على إظهار مشاعرنا بشكل طبيعي بدل ما الواحد تكون مشاعره بينه وبين نفسه

اختي أمة الله هي مسألة تعود .. وأول من بيحس بحلاوتها أنتي .. لا تبخلين فيها على أغلى الناس عليج .. والله يخليكم لبعض يارب ..