سؤال : عن الباركيه في غرفه النوم

[NASEER]

السلام عليكم

احد عنده فكره عن الباركيه وتركيبه هل يصلح يتركب غرفه النوم وماهو
افضل محل يركب الباركيه وهل الباركيه الحشرات مثل اجلكم الله الصراصير
اللي يعلرف محل زين يفيدنا

[Mi$$ OriGinaL]

السلام عليكم

احد عنده فكره عن الباركيه وتركيبه هل يصلح يتركب غرفه النوم وماهو
افضل محل يركب الباركيه وهل الباركيه الحشرات مثل اجلكم الله الصراصير
اللي يعلرف محل زين يفيدنا



انا بعد خاطري اعرف .. احسه بيكون راااقي وايد وخاصه بغرفة النوم .. ابي اسوي غرفتي :shy:

بتابع الموضوع وان شاء الله نستفيد من الردود

[نورFROM قطر]

الباركيه جدا راقي ... انا حاطه بغرفتي الرئيسيه وغرفه البيبيات.... تحسين بالنظافه ومافي حشرات ولا شي؟؟؟

اول مره ادري ان يجيب الصراصير؟؟؟؟؟؟؟؟

بالتوفيق

[NASEER]

الباركيه جدا راقي ... انا حاطه بغرفتي الرئيسيه وغرفه البيبيات.... تحسين بالنظافه ومافي حشرات ولا شي؟؟؟

اول مره ادري ان يجيب الصراصير؟؟؟؟؟؟؟؟

بالتوفيق



انا ما اقول انه يجيب الصراصير

انا اخبر الصراصير يحبون الخشب وخصوصا خلف الكبتات

وانا اكره شي اسمه صرصور وخايف من الحشرات

وانتي ماقصرتي عالمعلومه بس ياليت تقولين لي المحل اللي

اخذتي منه الباركيه وهل هو غالي ولا رخيص وكم تقريبا تكلفه

غرقه 6/6 كم تقريبا التكلفه وكم مده التركيب يوم يكفي ولا اكثر

[حراير قطر]

صباح الخير

وانا بعد كان بخاطري اسويه

بس محد امدحه لي وقولولي

انه يجيب الصراصير وهونت عنه ..

[NASEER]

صباح الخير

وانا بعد كان بخاطري اسويه

بس محد امدحه لي وقولولي

انه يجيب الصراصير وهونت عنه ..




هذا اللي انا خايف منه دام السالفه فيها صراصير

هونت خلاص بلاش منه خلني على زوليتي الخضراء ابرك لي

[Xملاك قطرX]

السلام عليكم
في تشكيله جديده من السيراميك على شكل الباركيه
يعني اللي يشوفه يقول انه باركيه

[حراير قطر]

هذا اللي انا خايف منه دام السالفه فيها صراصير

هونت خلاص بلاش منه خلني على زوليتي الخضراء ابرك لي


عندك اخوي السيراميك حلو

احنا حاطين في البيت كله

واسهل حق التنظيف ..

[ام خليفة]

انا مركبه سيراميك في غرفه عيالي يشبه الباااركيه اللي يشوفه يقول خشب لكنه هوسيراميك حلووو

[LOLOO]

انا مركبه باركيه....انصحك ماتركبه لان في بعض الاماكن تقشر...ولا يقولون لك حسب النوعيه
كلها قشرة خشب....
ويحتاج عنايه في التنظيف...

[دلة الرسلان]

اخوي بحط لك تجربتي الخاصة وانت كيفك

في بيت اهلي كله باركيه يعني الممرات والمجالس والغرف وصار له الحين قريب الاربع

سنوات ومفروض ما يجيه ماي بس اللي اشوفه انه ماشاء الله صامد لاتقشر ولا اخترب

والمنظر راقي جداااااااااا ومسوينه في نابينا .

انا مسويته في جزء من غرفة النوم لان المناطق القريبة من البلكونة يدخلها المطر - الله

يجيبه - وحذروني انه بيخترب وطلع على حوالي 4000 ريال 4×5 متر وتركيبه خذ يوم كامل

وركبته عند شركة رافكو اللي في الريان القديم .

وللأمانة افضل النوع اللي في بيت اهلي لأنه انكرف فعلا بس تشوفه كأنه جديد .

[سهم طايح]

مر على محل اسمه ( ارام ) على طريق سلوى

شريت من عنده سيراميك نفس الباركيه بالضبط ونفس حجم الباركيه وفيه منه اكثر من لون

بعد التركيب مستحيل تقول ان هذا سيراميك

المتر على 75 ريال

الكلام هذا من كم شهر

[لوردغاليري]

ايجنن واراقي غرفتي باركية من رافكو

[جود]

أنا مركبة من مفروشات الخليج ,, في غرف النوم
وما انصحك بالسيراميك لانه بارد ويضر
لكن الباركيه أفضل ..

بس المشكلة ان النوع الي خذته مع انه من الغالي
الا انه صار عليه اثر للسرير لما احركه عشان انظف تحته

[سكر_قطر]

السلام عليكم

انا احب شي اسمه باركيه وانصح الكل فيه

انا مركبته في غرفتي وصار له سنه ماتغير عليه شي ولا حتى تشمخ

سهل وايد فالتنظيف وماسبب لي لا حشرات ولا غبار مثل الموكيت

وتنظيفه سهل اللهم تمسح بالمكنسه الكهربائيه عالسريع وتمسح الارضيه بفوطه عشان اللمعه

ومافي شي مايبي له عنايه حتى الموكيت لو طنشته بيروح لونه وبينترس غبار ووصخ

وناويه اكمل باقي البيت بالباركيه بعد

النوعيه اللي تكلم عنها تسبب حشرات ووصاخه هاي النوعيه الرخيصه هو اصلا فيه الغالي والزين والرخيص

العادي .. انصحك فيه لانه وايد يريح فالتنظيف وبعدين احسن حق اللي فيه ربو وحساسيه انا بعد ريحني من

عقب معاناتي مع الغبار..وبعد دافي مايسبب بروده للمكان والصوت يكون عادي مب مثل السيراميك والرخام يحشر المكان

عندك مكانين دوم الناس يسون فيهم .. الخليج اللي في شارع الاصمخ بس بضاعته لونها محدود وكميتها

تخلص بسرعه ومحل ثاني سويت انا عنده بس ناسيه اسمه الحين باكتب لكم تفاصيله بعدين وبكم السعر

بخصوص غرفتك يمكن تكلف بحدود 3000 او 4000 بس طبعا يعتمد عالنوعيه

تحياتي

[nono-qtr]

حتى انا سمعت انه مع الوقت يسوي حشرات :(

وبعدين قالو لي مزعج يسوي صوت مع المشي .!!

[nym]

انا مركب في بيتي من ثلاث سنوات في غرف النوم بس
الصراحه مافيه اي مشكله لاصراصير ولا غيره يوميا ينمش بقطعة قماش مبلوله ولا اروع منه
اخذته بسعر 125 ريال للمتر المربع وانا الصراحه انصح للغرف احسن من الرخام او البورسلن

[بولينجر]

متابع للموضوع... أفكر اسوي باركيه بعد لأن تنفسي تعب من الموكيت

[BURBERRY]

متااابع للموضوع لاني بعد ابي اركب باركيه في الغرفه .. :)

[اّل ثاني 77]

ركب باركية على مسؤوليتي:
- في الشكل عجيب ومميز جدا
-تقدر تختار من عدة الوان واشكال
-افض من الموكيت لان الموكيت يجمع الغبار والاتربة ويسوي حساسية وربو
- افضل من السيراميك في الشكل والسيراميك إذا شغلت المكيف بتثلج وإذا دست علية بتحس ببرودة وبتضطر اتحط قطع سجاد
افضل المحلات:
رافكو في الريان
مفروشات الخليج
محل في شارع النصر ما اعرف اسمه
الاسعار تختلف
في الصيني (ما انصحك فيه)
السويسري فنلندي واعتقد فيه الماني

[محمد2]

السلام عليكم
في تشكيله جديده من السيراميك على شكل الباركيه
يعني اللي يشوفه يقول انه باركيه

انا ركبت هذا السيراميك وتمام وكشخة حتى عند التنظيف

[نجود]

انا ودي اركبه انا شفت واجد يمدحونه بس متردده وانتو اقنعتوني الله يجزاكم خير

[بنت المزن]

انا مركبته في غرف الأطفال من سنة ونصف تقريبا وماشالله ممتاز على الدعس ووساخة الجواتي وغيرها الله يكرمكم.... الصراحة قبل ما احطه ما حصلت حد مستخدمه قبلي استشيره وفي النهاية ركبت راسي وركبته..... وكان نعم الاختيار.... من مميزاته:
* بارد في الصيف ودافي في الشتاء
* سهل التنظيف(مجرد فوطة فيها شوية ماي) والابتعاد عن استخدام المواد الكيماوية إلا الديتول
* سعره أصبح نفس سعر السيراميك الجيد يعني كان غالي والحين مقدور عليه
* فيه أنواع أوروبي وهو الأفضل والآسيوي (طقوا منه) سعر المتر مع تركيب النعلات 80-120 ريال
* سهولة التركيب ويطلعون العمال والمكان نظيف ما يحتاج فرك وتلييف. غرفة 4x5 تاخذ شغل 3 ساعات فقط
* دوروا على الأنواع المعالجة ضد الانزلاق وضد الحريق.
* الألوان حلوة واجد: فيه البيج الفاتح والماهوجني وخشب الورد وألوان ثانية بعد
* اللي يقول يجيب الحشرات أبدا غير صحيح الكلام.. إلا إذا كانت البيت فيه حشرات من الأصل فبتجي على المكان سواء كان موكيت أو سيراميك أو باركيه. الأهم الواحد ما يحط السبة على شي ماجربه أبدا....

وفي النهاية أنصح الكل بتركيبه... في منزلي الجديد باركبه في كل الغرف ما عدا طبعا الحمامات والمطابخ!!!!!!!!!
:victory:
:victory:
:victory:
:victory:

[غـيـد]

ما يطلعــ صدى فالغرفهــ إذا تكلمتــ ..؟!

[الطائر الحائر]

السلام عليكم اخوي ... انا مركب باركيه في غرفتي وغرفة الاولاد .. جدا راقي وسهل التنظيف وصحي من حيث البروده على الارجل ( القدم ) وصار لي سنتين من ركبته ولا فيه اي مشاكل ( ملاحظة ) يقولون اذا انكب عليه ماء يجب تنشيفه على طول .... وانا ركبته من محل مفروشات الخليج .

[كاروهات]

انا خاطري اركب الباركيه فحجرتي
بس بسأل اللي ركبوا انتو لين تمشون عالباركيه بنعال الله يعزكم او صندل او اي شي ثاني يطلع صوت
لاني انا لين ادخل المحلات اللي يكونون مركبين باركيه ويكون الصوت وايد مزعج....
انتظر ردكم؟؟؟؟....

[بنت المزن]

انا خاطري اركب الباركيه فحجرتي
بس بسأل اللي ركبوا انتو لين تمشون عالباركيه بنعال الله يعزكم او صندل او اي شي ثاني يطلع صوت
لاني انا لين ادخل المحلات اللي يكونون مركبين باركيه ويكون الصوت وايد مزعج....
انتظر ردكم؟؟؟؟....



منجرة الوفا اللي ركبت لي الباركيه حطت تحته
اسفنج سمكه 2 سم تقريبا كتم الصوت عندي

واختي لا ما يطلع صدى إذا الغرفة فيها أثاث.....

وفيه ناس يقولون انه يتقشر بالرطوبة...
احنا الصراحة ما نطفي المكيف ابدا إلا في الشتاء
وضمان المنجرة لمدة 8 سنوات
إذا تقشرت او تفسخت أو تبططت وحدة من الخشبات يجوون يركبون غيرها مجانا

[chillis]

مرحبا اخوي انا مركبه بغرفة نومي والصاله روعه وايد ومافيه اي مشاكل ولا يتقشر لانه حسب النوعيه والاسبانيه ممتازه ولا تجيب حشرات ولا شي وتنظيفه سهل صار لي سنه واكثر مركبه الباركيه

[تاجره]

:nice:
متاابعه بعمق

:shy:


:nice:

[ابو العنود]

انا مركب في البيت كامل باركيه وجايبه من السوق الصيني في دبي يابلاش ( المتر 22 ريال ) وعندهم اشكال وانواع وا لوان حق الباركيه بس عليك لختيار وسارله 3 سنوات وكني اليوم مركبه ولاتقول صيني مب شي احسن من الايطالي فيه طبقه عازله

[ديجافو]

لا ماعليك ركب باركيه انا امركب ولا صراصير ولا نمل ماعليك انا قالوا لي نفس الكلام بس ركبت كل الغرف عندي باركيه ومرتاح الصراحه حتى نظافته ومنظره احسن .. ارسل لي ايميلك على الخاص وبرسل لك رقم واحد يركب زين بس لازم تشرف معاه على التركيب ..وبسعر احسن من غيره

[$$كلنا قطر$$]

الصراحه ما عليه كلام
وانصحك انك تركبه
ونصيحتي لا تركبه عند المحلات الصغيره
في محل اسمه رافكو عند محلات العبيدلي للتنجيد الي في الغرافه
وضمانه تقريبا 15 سنه
ولا نمل ولا زهيويه
احسن من السيراميك وخاصه لو عندك يهال

ولو ارضية الغرفه مستويه يخلصه لك بنفس اليوم

[الكايـــده]

الباركيه مأساه خاصه لاجاه ماااي يتنفخ ويتفطر احسه مايصلح لجوونا الحااار

اذا تبي حط البسطه الباركيه

[LUL]

أنا من تجربتي مركبه في الدور الثاني كله يجنن وااايد أنظف من الموكيت وهذا نوع جديد أسمه الباركيه العالج لايمكن يتغير وعليه ضمان بعد المحل في شارع سلوى أسمه (كوين كاربت) ....

[غناتي1]

نصيحة من مجرب 000

الباركية ان كثر عندك مب اكثر من 2-3 سنوات

لانه فعلا يجلب الحشرات 000 ويبي له مكان بارد

على طول عشان ما يتنفخ وجونا ما يصلح له

اخذه عن خاطرك كم سنة بعدين غيره