شحن السيارة الى الامارات (مساعدة)

[المولع22]

السلام عليكم والرحمة ,,

ياشباب الله يعطيكم العافية ,, شحالكم عساكم طيبين ,,

بخصوص شحن الموتر عن طريق البر إلى دبي ,,

ذهاب وعودة ,,

كلمت احد الشركات قال لي في حدود 12 ألف :eek5::eek5: هذا غير رسوم الجمرك 5% من قيمة السيارة ,,

شسالفة يالربع ,,

ابي انقل موتري لدبي وطبعا برجعه يعني ذهاب وعودة ,,

كم الاسعار تقريبا ,, ومن الشركات اللي تقوم بهالشي بشكل مضمون ومؤمن ..

ساعدوني الله يجزاكم خير ,,

موفقين ان شاء الله

[فلفل حار]

والله لو قالي 12 ألف بقوله شكلك للحين راقد ارجع بيتكم كمل رقادك

يالغالي انا ماقد شحنت بس كلهم يضمنون لك السياره واعتقد في عقد ضمان علي النقل بس مب متأكد من المعلومه وبدليك وين وانت استفسر منهم بنفسك

شوف ياطويل العمر وانت ياي من دوار المتحف ورايح دوار هيئة الجمارك قبل الدوار تدخل لفة ميناء الدوحه وبتحصل تقاطع في ويهك ، كمل سيده ، وبتجيك لفه اجباريه يمين وعند هاللفه الاجباريه بتحصل مبني حق هيئه الجمارك وفي كباين خشب برع جدام المبني وهالكباين هم شركات شحن وتخليص وعندهم تخلص موضوعك :nice:

مر عليهم واحد واحد وخذ الاسعار

ومووووفق اخوووووي

[المولع22]

الله يعطيك العافية ياخوي ( فلفل حار ) ماقصرت على المساعده

بشوفهم ان شاء الله وارد خبر ,,

والشباب اللي مجربين يفيدونا بالموضوع يجزاهم خير ان شاء الله ,,

تحياتي لكم

[بوحارب]

اما 12 الف @@

الله يعينك أخوي

[المولع22]

اي والله انا ياخوي انصدمت بصراحة عيل لو اشحن لي مايباخ يطلع ارخص يمكن ههههههااااي

ياخوي المشكلة ان واحد من الربع شاحن موترة من قطر لين سوريا ذهاب وعودة طلع عليه بـ 6 الاف

انا ابغي اوديه دبي يطلع 12 ههههههههههه ياخي مصيبة هذي ,,

المشكلة ان الشركة اللي ماخذ منها رفيجي ماتودي المواتر الا سوريا ومصر والاردن ,, ماياخذون الخليج ,,

الله يعين بس ,,

وننتظر الشباب اللي مجربين

[رقم مميز]

اذكرك

مره ودينا النيسان بـ 3 الالف ريال من زمان

رحنا الصناعيه وكلمنا راعي سطحه قلناله نبيك تودديه

دبي العوير قال 3 الاف بكره هو هناك في الكراج

ومره خذا من السعوديه من منطقة المحيا بـ1000 ريال لين كراج المضمار

هذا الكلام من 2005 تقريبا

واذا الموتر شغال

طلعه من حدود قطر وفي المشروع الى هي المنطقه الى بعد الحدود السعوديه مباشره

كلم اي راعي سطحه بيوديه رخيص

[zeknon]

اخوي انا اودية لك ب 3000 ريال بدون ضمان
escape
:thumbup:

[مستثمر 999]

جرب اخوي

شركة اكبرس للشحن البري وهذا الرقم من احد الاخوان معانا في المنتدى

5128222 اكسبرس

وعندك شركة Ez طريق سلوى
4500700

عموما ليش ما تسافر بها كلها 5 ساعات الى بوظبي ومن هناك اشحنها على شركة الصحراء

او اي سطحه

[ولـــد قطـــر]

في شركة شحن توديلك الموتر بـ 4000ريال تقريبا على براكدون جيمس

وفي الرجعه عندك شركات كثيرة تجيبلك السيارة لين الدوحة بــ 1500

بس أبي أعرف 5% للجمرك ليش

انت بتصدر الموتر وتركب عليه لوح تصدير ومب مرجعه

وهذا رقم الشركة ملوكي للشحن الي قتلك عنها فوق: 5832121 أحمد

[زمن الغدر]

يالغالي طلعه من حدود السعوديه اذا الموتر شغال
وكلملك راعي سطحه من الدوحه او يدليك على راعي سطحه بالسعوديه ابركلك
واذا مب شغال راعي سطحه من هنا يويده لك انا من بيتنا لين الدمام ب الف ريال
ورجعته لين الدوحه ب600

[المولع22]

الموتر شغال يالربع مافيه مشكلة ,, بس انا ابغي اوديه بالشحن يعني وانا بلحقه بالطيارة واخذ الموتر

وبعد ماخلص شغلي اللي ابغيه في دبي بعدها برجع انا بالطيارة والموتر يلحقني بالشحن يعني ,,

الربع اللي عطوني المعلومات والارقام الله يرحم والديكم وجزاكم الله خير ,,

بس الحين باتصل بهم كلهم وبتأكد من المعلومات وارجع اعطيكم الخبر ,,

الله يعطيكم العافية ماقصرتو

[قلب بو ظبي]

اتصل امس بشركة الصحراء وهي شركة شحن سيارة داخل دولة الامارات وخارجها
وسالتهم لو في سياره في قطر وابى اشحنها للامارات بكم قالوا 3000 درهم
ورقمهم مجاني ما ادري إذا تقدر تتصل فيهم من قطر
8002800
وفتح خط الامارات 009712 (أبو ظبي)

اطيب التحيات وبالتوفيق يارب

[نيساني]

الموتر شغال يالربع مافيه مشكلة ,, بس انا ابغي اوديه بالشحن يعني وانا بلحقه بالطيارة واخذ الموتر

وبعد ماخلص شغلي اللي ابغيه في دبي بعدها برجع انا بالطيارة والموتر يلحقني بالشحن يعني ,,

الربع اللي عطوني المعلومات والارقام الله يرحم والديكم وجزاكم الله خير ,,

بس الحين باتصل بهم كلهم وبتأكد من المعلومات وارجع اعطيكم الخبر ,,

الله يعطيكم العافية ماقصرتو





اخوي ولا عليك امر قولنا شيصير معاك

[المولع22]

قلب بوظبي ,, تسلم ياخوي كلمتهم وشفت كيف الترتيب وياهم

بس اثبت على شركة بعطيكم خبر يالربع

[خالد الخوري]

تلقى شباب بحرينيين يشحنون السيارات للامارات بسعر ارخص من الشركات تقريبا بياخذ 2000 الى 2500 تلقاهم بالصناعية لو تبي