ابي نصيحتكم وشوركم يا جماعهـ !!

[6611]

السلام عليكم


اخواني وخواتي

ابشركم اني نجحت فالثانويه العامه بمجموع 83.1% ادبي علوم ورياضيات

وابي شوركم

وين تنصحوني ادرس او في وين احسن مكان اقدم على بعثه

وصراحه الكل قالي روح لندن او امريكا لكن الصراحه ما قدر ع الغربه :(

انتوا شرايكم وهل في جامعات فالدوحه مستواها من مستوى لندن وامريكا

وترى انا لي حين ماخذة لغه واللغه ست شهو مقدور عليها برع ولا اربع سنين غربه :(

وبنتظار اخواني وخواتي

ويعطيكم العافيه:)

[*بوحمد]

عزيزي ولد الكعبي

انا معاك الغربه صعبه

بس تحمل كل شي علشان مصلحتك

ولاتضيع عمرك فالتفكير

وكمل والله يوفقك

بس لندن يمدحونها

وانت بعد شاور
وبالتوفيق

[الغزال العارضية]

الصراحه الواحد يقدر يتحمل الغربه 4 سنوات اهون من ان يتحمل الذل والتعب والقهر في الجامعات الموجوده في قطر وتعجيزها

انصحك تروح المجلس الاعلى وتقدم على بعثه الى امريكا او ترشيحه من الداخليه وهم يبعثونك هناك راتب ودراسه ومستقبل مضمون وش تبغي احسن من كذا لا وتتخرج وانت معلق نجمة ووظيفتك جاهزة

لاتضيع على نفسك هني بيروح تعبك عالفاضي

[The Blade]

اوفق جميع الاعضاء الي ردوا على الموضوع
اعرف شباب ازهقوا من الجامعات في قطر اطلعوا برع والحين هم سنه ثانية وثالثه
كل شئ برع يهون وحط في بالك ترى الحين الشباب القطريين بتحصلهم في كل مكان ( الله يوفق الجميع ( في بريطانيا وامريكا ومصر وكل مكان :) انصحك لوجه الله لاتضيع هذه النسبه شوف مستقبلك والله يوفقك يالغالي

[6611]

ما قصرتوا وانشوف راي الاعضاء الباقيين

بس يالغزال العارضيه خل النجمه لاهلها اخر شي افكر فيه العسكريه :)

[الغزال العارضية]

عيل توكل على الله وخذ البعثه من المجلس الاعلى بس الله يعيينك


انا قلت الداخليه لان الراتب 35 الف يكفي ويوفي

وبعدين مابتكون جندي ولا بتنكرف

[هتـان قطر]

انا انصحك تقدم على كلية احمد بن محمد العسكرية..

شهادة بكالوريس ودبلوم عسكري...والراتب ولا احلى :victory:


طول الاربع سنوات في الكليه وراتبك يتجمع من غير دورة اللغه في لندن

وصرف بدل التمثيل..

[قطري شايب]

عيل توكل على الله وخذ البعثه من المجلس الاعلى بس الله يعيينك


انا قلت الداخليه لان الراتب 35 الف يكفي ويوفي

وبعدين مابتكون جندي ولا بتنكرف

بخصوص ال 35 الف

كان بودي والله بس طلع الموضوع من يدي

[قطري شايب]

الكعبي روح امريكا 4 سنوات كانها اربع ايام

الله يوفقك ياوليدي

[lalamar]

أنصحك تدرس برا

[سلامي للكل]

ولـــد الكعبـــي

مبروك الف الف مبروك النجاح

نصيحتـــي لك الدراســـة في الخارج (أمريكــا أو لنــدن) أحســـن بوااااايــد من الدراســة اهنــــي

انــت عارف ان اللغـــة الانجليـــزية أصبحــــت مهمــة في حياتنـــا وخصــوصاً فـــي مجـــال العمـــل

فالدراســة في الخارج تعطيــك الأفضليـــة لتعلــــم اللغـــة بشكــــل صحيح

وبالنسبــة للشهــادة صحيـــح ان بكالوريوس جامعــة قطــــر هو نفــــس بكالوريوس بريطانيـــا أو أمريكـــــا بــس في فرق كبيــر ليــن تقـول انــك متخـــرج من أمريكــــا \ لنــدن أو جامعة قطـــر:rolleyes2: (مع احتــــرامي للجـــامعــة)

وطبعــــاً لاننســــى اذا تابــي هــ الأفضليـــات لازم تضحــــي اشوي (الغـربـــة)

4 أو 5 سنــوات غربــة تهـــون ان شاء الله وتعــدي بســــرعـــة

هــذا والقـــرار لك اخــــوي:)

ربٍ يوفقك ويكتـــب لك الخيـــر وين ما تروح

وفاااااااااااااااااااااالك طيب:victory:

[Abdulla Ahmed]

انا انصحك تقدم على كلية احمد بن محمد العسكرية
..

شهادة بكالوريس ودبلوم عسكري...والراتب ولا احلى


طول الاربع سنوات في الكليه وراتبك يتجمع من غير دورة اللغه في لندن

وصرف بدل التمثيل..
الغربه شينه يا خوي وممكن الواحد يضيع ويضيع دينه ودنياه وآخرته

عندي ولدين تخرجوا السنه والحمد لله وهم رأيهم اما الكلية العسكريه وإلا الحرس الاميري

استخير الله,,,,,,,,, لندن وإمريكا حبائل الشيطان شهوات وإغرآت

صدقني تراني بها خبيرا ممكن تنسيك أمك وأبوك وإخوانك وبلدك وتفكر بعدين في الهجره

والله يقول ولا تتبعوا خطوات الشيطان

ولعلها من الخطوات بتحصل من يفتي لك ويقول طلب العلم فريضة وفي سبيل الله ومن تعلم لغة قوم,,,,,,,

وحتى يصير الفاس في الراس بعدين ما ينفع الندم

ترى هناك ما فيه عيب ولا عار ولا شرف والله يا أخوي أسأل مجرب ولا تسأل حبيب

ضكحوا علينا لولا لطف الله بنا

قالوا لنا روحوا تعلموا عندهم وارفعوا رؤوسنا فوق

لا تصادقون العرب حتى لا تتكلمون مع بعضكم إلا بالإنجليزي وكل واحد ياخذ له قيل فرند وعليكم بالمراقص

والبارات بعد ستة شهور رايح تشوف نفسك مستر بن:omen2:
والله نصيحتي لك بلادك واهلك

تشوف أمك وأبوك كل يوم

والمسجد والآذان والصيام والتراويح

[6611]

جزاكم الله خير


والله يجيب الي فيه الخير

[lalamar]

انا انصحك تقدم على كلية احمد بن محمد العسكرية
الغربه شينه يا خوي وممكن الواحد يضيع ويضيع دينه ودنياه وآخرته

عندي ولدين تخرجوا السنه والحمد لله وهم رأيهم اما الكلية العسكريه وإلا الحرس الاميري

استخير الله,,,,,,,,, لندن وإمريكا حبائل الشيطان شهوات وإغرآت

صدقني تراني بها خبيرا ممكن تنسيك أمك وأبوك وإخوانك وبلدك وتفكر بعدين في الهجره

والله يقول ولا تتبعوا خطوات الشيطان

ولعلها من الخطوات بتحصل من يفتي لك ويقول طلب العلم فريضة وفي سبيل الله ومن تعلم لغة قوم,,,,,,,

وحتى يصير الفاس في الراس بعدين ما ينفع الندم

ترى هناك ما فيه عيب ولا عار ولا شرف والله يا أخوي أسأل مجرب ولا تسأل حبيب

ضكحوا علينا لولا لطف الله بنا

قالوا لنا روحوا تعلموا عندهم وارفعوا رؤوسنا فوق

لا تصادقون العرب حتى لا تتكلمون مع بعضكم إلا بالإنجليزي وكل واحد ياخذ له قيل فرند وعليكم بالمراقص

والبارات بعد ستة شهور رايح تشوف نفسك مستر بن:omen2:
والله نصيحتي لك بلادك واهلك

تشوف أمك وأبوك كل يوم

والمسجد والآذان والصيام والتراويح

أولا : تقصد غيرل فرند

ثانيا : احنا الصراحه ماسمعنا عن هالقصص اللي تقولها

وايد ناس راحوا ولا صارت معاهم هالبلاوي

هو على حسب الشخص شلون تربيته وفي أي بيئه نشأ

ومب شرط إن اذا الواحد سافر للخارج للدراسه يتأثر فيهم

وإذا واحد يتأثر عشره مايتأثرون

[الواارد]

مبروك يا الكعبي على النجاح تعال لندن وتعلم صح كلها اربع اسنين وانت خالص واذا على اللغة انصحك تدرس اللغة في الجامعة اللي بتدرس فيها عشان اذا ماجبت 6 في الايلس يقبلونك حتى اذا جايب اقل لانهم اهم شي عندهم انك تعرف تكلم وتفهم ايش يقولون وترى الجامعات ما يطلبون 6 عشان يقبلونك بس في الدوحة معقدين الامور اكثر من اللازم.

[هام السحاب]

ادرس برى و العسكريه انساها
خلك مدني ابرك لك

[WARNING]

مبروك ياولد الكعبي عالنجاح
ومافي داعي اتغرب عندك االجسر الاكاديمي
وبلا غربه وعوار راس :nice:
وهاذا الرابط
http://www.abp.edu.qa/output/page775.asp

[Abdulla Ahmed]

أولا : تقصد غيرل فرند


Girlfriend

هذه الكلمة كما هي بلغتهم
حرف R يكتب ولا ينطق
ما سمعنا انجليزي يقول جيرلفرند
ممكن واحد تعلمها من الكتاب
في المدرسة والمدرس الذي درسه لم يمارس اللغة

[الغزال العارضية]

تعال نسيت اقولك مبرووووووووك النجاح

[نجود]

الف الف مبرررررررررررررروك

[6611]

الله يبارك فيكم

وما قصرتوا

وشكلي بروح لندن والله كريم

^_^

[الغزال العارضية]

لاتنسى تستخير

[الـking]

لا لا لا لا

احسن شي وانا لو في مكانك اروح الحرس الاميري
ياخي طالبين مرشحين وهناك بتكون ضابط ودوامك في الديوان وترفيعتك كل سنتين و و و و........

الله يوفقك ويهدي اخوي ويدخل هناك

آآآآآآآآآآآآآمييييييييييييييييين

[عذب الكلام 1]

اولا مبروك اهم شي استخير الله المجال واسع للدراسه واهم شي النيه بس الدراسه في الخارج احسن وبلا تعقيد مثل الدوحه خبرك مستفدين منا وهمهم الفلوس وشكراا

[الدانـة]

هلا اخوي

روح قطر للبترول ، طالبين 80% ، تقدر تسافر برع او في الدوحه على راحتك

[أمة الله]

الف الف مبروووك

أخوي أنصحك تكون مبتعث عن طريق هيئة والا مؤسسة....تتكفل بدراستك وتمشي لك راتب ولمن تخلص تلقى الوظيفة جاهزة بإذن الله....وانت عارف ان الشباب (من الجنسين) مصاريفهم كثيرة في الفترة الجامعية، فمافي أحسن من ان يمشي لك راتب :)


* والله هالجيل محظوظين ما شاء الله عليهم والفرص تجيهم بطبق من ذهب وبعد مهب مقدرين هالشي ( أتكلم عالنطاق العائلي عشان محد يقول تقصدني ) مب على أيامنا....تخصصات محدودة ومافي حد يتكفل فينا ولا شي :(

[ذيبة الريان]

اول شي مبروووووووك النجـآآح أخوي

وأنصحك تسجل في " قطر للبترول"

إذا اللي في السبعين الستين مهتمين فيهم ويدرسونهم على حسابهم ,,

كيف ماشاءالله اللي يجيب 80 ؟

بيقدرونك ويحطونك على راسهم

ومافي أحسن من دراسة على حساب مؤسسة كبيره ,, وراتب ماشي ,, وإذا درست بره يمشون لك راتبين ويدفعون مصاريفك ,,

توكل على الله وصلي صلاة الاستخاره وادعي ,,

والله بيوجهك للمكان الصحيح ,,

الله يوفقك ويسهل عليك ,, ويكتب لك اللي فيه الخير ,,

[Fatima Y]

روح امريكا
وبالاخص كلفورنيا (لوس انجلوس- سان فرانسيسكو -سان ديقو .........) ولا بتحس بالسنين ...لين بتتخرج بتقول ابي اقعد مابي ارجع اصلا... ويمكن تكمل الماستر وphd اذا عجبك المكان طبعا واكيد بيعجبك ..

والامريكان شحلاتهم و شزينهم ويازين تعاملهم .. والخدمات الي بديرتهم ما شفتها بمكان ثاني كل شي تتخيله تلاقيه . كل هوايه عندك بتلقى كل شي خاص فيها ..
مو البريطانين اعوذ بالله تقولهم هاي يكشرون في ويهك .. الامريكان يمشون و يسلمون يحليلهم ..

بعدين كفايه تتعلم تعتمد على نفسك .. وتتعرف على بيئات و مجتمعات وتختلط بناس من كل الجنسيات فهذا بنفسه دراسه و استفاده

الله يوفقك

[حبر سري]

بعدين كفايه تتعلم تعتمد على نفسك .. وتتعرف على بيئات و مجتمعات وتختلط بناس من كل الجنسيات فهذا بنفسه دراسه و استفاده

الله يوفقك

:nice::nice::nice::nice::nice::nice::nice:

[قطرية عسل]

الف مبروك أخوي وانا مع اقتراح امه الله و ذيبة الريان
والله يوفقك :victory:

[Bin Hood]

اخوي انصحك بالدراسة برع وبالنسبة للتخصص انصحك تروح صوب البزنس

بالاخص الاستثمار والتحليل المالي يعني قريب من البنوك !!!!!!!

الله يوفقك

[شاهيناز]

من تجربه اقولك

الدراسه في بريطانيا اوكي
وبريطاينا قريبه
يعني شباب العائله يروحون ويجون
وصرنا مانحس انهم في غربه

3 اجازات في السنه
وبعدين مابتحس في الغربه
وايد قطريين هناك

بس اهم شئ تشوف لك جامعه معترف فيها
الجامعات في قطر ماعليها كلام
بس للاسف الدخول لها وايد صعب
مب مهم اللغه
في اعتبارات ثانيه
وين اخذت الثانويه
ولازم تنجح في امتحانات القبول
وايد شباب تاخرو في الدراسه والسبب
نظام الدخول في الجامعات الاجنبيه في قطر
والله يوفقك يارب

[الزعفراني]

مر على الربع في برج اللجنة الأولومبية وبتلقى الشي اللي يرضيك :)
عندهم بعثات الى بريطانيا وامريكا لدراسة اربع مادري 5 تخصصات قبل السفر يعطونك تأهيل لدراسة اللغة واذا لغتك اوكيه يبتعثونك بعد اجتياز المقابلة الشروط :

1- الثانوية العامة بنسبة 80% واعلى .
2- العمر ما يتجاوز 20 سنه .

الامتيازات :

1- يعطونك 10 الاف ريال قبل السفر تضبط امورك فيها .
2- تكاليف الدراسة والتسجيل والمقررات وكل ماله علاقة بالدراسة على حسابهم .
3- يعطونك راتب كل شهر 2500 دولار اذا مبتعث لامريكا و 1500 باوند اذا مبتعث لبريطانيا .
4- عقب ما تخلص يعطونك 10 الاف ريال تستانس فيها .
5- عقب التخرج وظيفتك جاهزه عندهم ويشترط تخدم عندهم بعدد سنوات الدراسة وعقب ان بغيت تطلع من عندهم يبقى شي راجع لك .

التخصصات :
- ادارة اعمال واقتصاد
- علاقات عامة وتسويق
- نظم معلومات
- تربية رياضية

هذا اللي يحضرني وتقدر تتأكد أكثر لا مريت عليهم .

وبالتوفيق ان شاء الله