المساعد الشخصي الرقمي

مشاهدة النسخة كاملة : ابي منكم مساعدة ياجماعة الله لايهينكم............


الساحوت2002
05-08-2008, 11:45 AM
السلام عليكم ورحمة الله وبركاتة



ارجوا منك ياهل الخبرة تساعدوني
انا إنشالله مسافر ادرس بامريكا في جامعة فلوريدا ارجوا انكم تساعدوني وتقولون رايكم بهلجامعة وشلون المعيشة هناك يعني الافضل اعيش بسكن الجامعة او مع عائلة او سكن برا الجامعة
وشلون اسعار الشقق اهناك
اتمني اللي عندة معلومات عن هلجامعة يقولي ولايبخل علينا وبكون
لكم من الشاكرين
الساحوت2002
05-08-2008, 12:01 PM
وين الردود؟
VIPLady
05-08-2008, 12:04 PM
الله يوفقك وتروح وترجع بشهاده رافع فيها راسك وراس هلك كلهم

ماعندي معلومات عن الجامعات
لك بالنسبه للشقق الي بالعقود السنويه والمعيشه بصفه عامه في ولاية فلوريدا مو غاليه كثير والتاكس عندهم اقل من ولايات ثانيه..
وامريكا كلها المعيشه فيها وايد مريحه وكل شي تحتاجه بتحصله يعني ما راح تتعطل في ولا شي ..والشعب من اروع ما يمكن فرندلي وطيبين و حبوبين..
وانصحك انك تعيش بشقه بنفسك احسن من السكن الخاص بالجامعه.. او اذا تقدر وتستحمل تشوف لك روميت معاك لكن مادري مافيه اي نوع من الخصوصيه

يمكن ما اكون ضفت لك شي بس استانس لين اشوف شبابنا بيروحون يكملون دراستهم و مجتهدين بصراحه وابي اتابع الموضوع واشوف من ساعدك و شالمعلومات الي ضافوها لك على شان جذي كتبت بالموضوع الخاص فيك :)

تحياتي
الساحوت2002
05-08-2008, 12:07 PM
مشكور اخوي واشكرك على المرور اللى نور الصفحة

بس مافهمت


.. او اذا تقدر وتستحمل تشوف لك روميت معاك لكن مادري مافيه اي نوع من الخصوصيه

:)
VIPLady
05-08-2008, 12:09 PM
مشكور اخوي واشكرك على المرور اللى نور الصفحة

بس مافهمت

اقصد يعني انك تعيش مع شخص غريب معاك بشقه وحده يمكن تصير خلافات بينكم يعني يبي لك تستحمل شوي..
يمكن يكون بخيل يمكن يكون اناني يمكن يكون مزعج ماتدري .. هذا الي اقصده .. فالسكن بنفسك تكون الخصوصيه فيه اكثر و كل شي تتحكم فيه انت ماعندك حد يعور راسك او يقول لك ابي هذا ومابي هذا..

هذا قصدي انشالله الحين وصلت المعلومه
الساحوت2002
05-08-2008, 12:24 PM
يعطيك العافية وماقصرت


بس اذا سكنت بسكن الجامعة راح اكون بروحي بلغرفة والا بيجيبون واحد معاي
VIPLady
05-08-2008, 01:13 PM
لا تسكن بسكن الجامعه
اسكن بنفسك بشقه صغيره خاصه فيك احسن لك واريح ..

ومادري باقي الاعضاء يمكن يقترحون عليك شي ثاني بس هذا اقتراحي ..

موفق انشالله
سهم مديون
05-08-2008, 01:54 PM
ماعندي فكرة بس متابع كي استفيد!
الساحوت2002
05-08-2008, 02:41 PM
يعطيك العافية بس ليش سكن الجامعة فية شي او الخدمات مب زينة والا شلون ؟
يعني ازعاج والا مب مريحة الغرفة اللى بلجامعة
VIPLady
05-08-2008, 02:47 PM
يعطيك العافية بس ليش سكن الجامعة فية شي او الخدمات مب زينة والا شلون ؟
يعني ازعاج والا مب مريحة الغرفة اللى بلجامعة

انا ماجربت السكن الخاص بالجامعه كلش..
لكن من الي اسمعه من اخواني و زوجي الي درسوا برى ولا حد منهم فكر يسكن في سكن الجامعه ..
وسوري يعني بس اتوقع بتشوف كل الطبقات عايشه معاك بنفس المكان يعني في منهم بس طلبه علم وظروفهم صعبه و بتكون معاك من دول مختلفه و بيئات و عادات خاصه فيهم.. ولنفرظ بيكون معاك شخص بالغرفه الله العالم من اي ديره بيحطون معاك.. شغلانه يعني ... يمكن ما يضرونك بشي ولا يسببون لك اي ازعاج . لان اكيد في قوانين معينه خاصه بالسكن والكل يتقيد فيها لكن اقتراحي لا تفكر فيه و شوف لك مكان خاص احسن لك بوايد
تطلع على كيفك تعزم على كيفك تدرس على كيفك .. تطبخ على كيفك .. كل شي من غير اي قيود .

ومادري بعد يمكن انت ترتاح اكثر بالسكن كل من له اطباعه وكل من له راي مختلف
الساحوت2002
05-08-2008, 03:01 PM
عيل بشوف سكن برا احسن
انزين شنو احسن جامعة في فلوريدا
>;كولاردو وين؟
VIPLady
05-08-2008, 03:37 PM
اي مدينه تبي في فلوريدا؟؟ لازم تحدد فلوريدا كبيره
وبعدين انت لحين ما راسلت ولا جامعه؟ ماجالك اي قبول منه؟ لازم تراسل كذا جامعه مو بس جامعه وحده لين يردون عليك على حسب نسبتك ومعدلك و مادري كل جامعه له شروط للقبول
ولا تقيد نفسك في ولايه وحده.. راسل جامعات في كلفورنيا في دنفر في كذا ولايه ترى ياخذون وقت مو شوي ..لا تضيع عليك سنه كامله بس انت ادور لك جامعه وقبول

وقبل ما تراسل اي جامعه تاكد من المجلس الاعلى للتعليم واهم يعطونك لسته الجامعات الي تتعامل معاها الملحقيه هناك و مادري شروط وايد .. فاهم بيسهلون عليك طريقه التعامل و القبول ..

والله يوفقك

كولارادو اتيك بنص تقريبا

روح قويل او ياهو شوف خريطه امريكا بتعرف موقعها بالضبط..
الساحوت2002
05-08-2008, 03:52 PM
انا مبتعث عن طريق الهيئة العامة للطيران المدني والتخصص علوم اطفاء وحرائق
وقالوا اختر الكان اللي تبية قلت لهم ابي فلوريدا قالوا خلاص مافي مشكلة واول شي بيودوني سنة لغة
فمادري المدينة حلوة والا لا انا ماسمعت عنها الا انها زينة وجوها حل
بو عبدالرحمن
05-08-2008, 04:07 PM
اخي العزيز انا درست في جامعة ميامي في فلوريداوتخرجت سنة 2000 (6 سنوات).
مانصحك بالدراسه في فلوريدا لان الجو حار ورطب في الصيف بالاضافه الى انها متروسه من الهسبانيك(الكوبيين) وهم مجرمين.
انصحك تختار اي ولايه في وسط او شرق امريكا.
المعيشه في امريكا رخيصه مقارنة مع اوروبا.
اختار جامعه خاصه لان الجامعات الخاصه تهتم بالطالب اكثر من الجامعات الحكوميه.
بالتوفيق.................
VIPLady
05-08-2008, 04:31 PM
انا مبتعث عن طريق الهيئة العامة للطيران المدني والتخصص علوم اطفاء وحرائق
وقالوا اختر الكان اللي تبية قلت لهم ابي فلوريدا قالوا خلاص مافي مشكلة واول شي بيودوني سنة لغة
فمادري المدينة حلوة والا لا انا ماسمعت عنها الا انها زينة وجوها حل

اها يعني انت لك مطلق الحريه في اختيار الولايه
عيل لا تروح فلوريدا من الاساس..فلوريدا حلوه للعوايل لسياحه اسبوعين 3 بالكثير بس للمعيشه مادري كشاب ما انصحك فيها ..

شوف لك كلفورنيا
سان فرانسيسكو الجو فيها حلو .. واتوقع فتره اللغه يبي لك مكان حلو على شان بتكون اول سنه لك و الغربه يمكن تاثر فيك ..

او واشنطن دي سي بس بعد الجو بالصيف شوي حار والشتا ثلج وحاله يعني انت و ذوقك :)..

والله يوفقك
الساحوت2002
05-08-2008, 08:52 PM
ياجماعة حيرتوني يعني اترك فلوريدا واشوف اى مكان ثاني
بس ابي مكان حلو والجو زين معتدلل مافية ثلج وعفسة
وانا لي الحرية في اختيار الجامعة بس شرط يكون فيها تخصص علوم اطفاء وحرائق
يعني شنو المكان اللى يصلحلي عندي فترة اقل من شهر في الاختيار انا رحت لهم اليوم وقلت لهم فلوريدا
ومادري اذا لكم راي ثاني وذا عن كلفورنيا يقولون غالية مادري شلي احسن وارخص وزينة
من جميع الواحي

واشكركم جزبل الشكر على مساعدتي وعسها في ميزان حسناتكم
VIPLady
06-08-2008, 12:59 AM
اقتراحي تروح كلفورنيا

والله يوفقك
الوعد2016
06-08-2008, 01:02 AM
بالتوفيق والاهم تنتبه على دراستك وترك الوناسه والافضل عند عائله وعدم الاختلاص بسكن الطلاب والمعيشه هناك ارخص وافضل من بريطانيا
اعالي الجنان
06-08-2008, 01:02 AM
ان شاءالله يفيدونك الاخوة والاخوات
الساحوت2002
06-08-2008, 08:11 AM
زين ياجماعة كلفورنيا حلوة والمعيشة فيها شلون يعني رخيصة او غالية والجو فيها شلون
ابي مكان يكون امن مافية خطر وايد
وكل واحد يعطيني راية ويعطيكم فية العافية.............
VIPLady
06-08-2008, 11:29 AM
بالنسبه لي كلفورنيا وايد حلوه
غاليه مادري ماكنت اشوفها غاليه عاديه يعني .. لان امريكا بصفه عامه ما تعتبر غاليه بالمقارنه مع اوروبا..
والمناطق الي انا اعرفها وايد حلوه
عندك سان ديقو المدينه حلوه
وعنده سان فرانسيسكو كلها طبيعه و حلوه
وكذا مدينه رحت لهم زياره بس مادري عن الحياه بفتره طويله فيها شلون

لوس انجلوس عشنا فتره في الداون تاون .. الكل يقول خطره وما خطره بس ماعمري شفت شي والبنايه كانت قريبه من الجامعه Usc
وعشت فتره في منطقه تبعد عن الداون تاون اسمها سان ديميس وايد حلووووووه وهاديه و تكون المنطقه شوي جبليه و مافيها اي نوع من الخطوره

والجو روعه في كلفورنيا .. يمكن شوي بالصيف فتره بسيطه يكون الجو حار بس مو مثل حر واشنطن اقل يعني و تكون بالشمس وبليل يكون الجو حلوو وبالشتا البروده الحلوه مو الي تجمدك و ماتخليك تطلع من البيت

ومن عيوبها انها بعيده ..
وانشالله باقي الاعضاء يفيدونك .. يمكن اكون نسيت شي بس هذي المعلومات البسيطه الي عندي
الساحوت2002
06-08-2008, 02:31 PM
رحت اليوم لهم قلت ابي كلفورنيا قالوا لازم تكتب كتاب وتطرشة للمدير
وبعدين اهم شي راحت البال في الولاية انا بروح انشالله وبتوكل على الله بس بعد مدحولي اورجون وسان فرنسسكو وشرايكم فيها
VIPLady
06-08-2008, 03:20 PM
اكتب كتاب و طرشه للمدير والله بيسر امورك انشالله .
كلفورنيا تسوى اطرش على شانها كتاب و كتابين وثلاث بعد ... وانشالله بتعجبك و بترتاح فيها
وسان فرانسيسكوو تجنن روعه وجوها وااااااااااااااااايد واايد حلوو,, رحت لها بالشتا شوي بارده بس حلوه وبالصيف جوها ربيعي و حلوو


الله يوفقك وتروح وترجع بالسلامه انشالله
الساحوت2002
07-08-2008, 09:28 AM
وياج انشالله
بس الحين سان فرانسسكو قريبة من كلفورنيا والا شلون
يعني اقدر اروح لها في الاجازة والا بعيدة
وكلفورنيا فيها مدينة العاب نفس ديزني والا لا بس مدينة طبيعية بس ناس وزرع
وعلى فكرة اليوم رحت وعطيتهم الكتاب وقالوا خلاص
انطر الرد
والله يوفقنا جميع
ومشكورة على التفاعل في الموضوع جزيل الشكر
VIPLady
07-08-2008, 11:21 AM
كلفورنيا الولايه وفيها وايد مدن ..
وسان فرانسيسكو مدينه في كلفورنيا..
ودزني ومدينه الالعاب تجيك في لوس انجلوس ..
وكلهم في كلفورنيا..

شوف خريطه كلفورنيا بالتعرف وين كل مدينه موجوده
الساحوت2002
07-08-2008, 12:18 PM
يعني اقدر اشتري سيارة او سيكل واروح اتمشي
او اركب باص واتمشي في الويكند
؟
VIPLady
07-08-2008, 12:27 PM
لازم سياره اصلا ماتقدر تعيش مع غير سياره هناك
ولا ماتقدر تروح تتمشى و ترجع لانهم شوي بعاد عن بعض .
في مدن كنا نروح ونرجع لها بنفس اليوم
بس المدن الابعد كنا نبات فيهم يوم او يومين

واذا على التمشايه كل مدينه لها اماكن تمشايه خاصه فيها خاصه لوس انجلوس عندهم وايد شوارع فيها حيه بليل خاصه يعني ما تتملل كلش..
والمسافه بالضبط بين لوس انجلوس و سان فرانسيسكو ماعرفها لانه لين كنا نروح بصراحه نمر على كذا مدينه و نبات فيها من باب السياحه يعني

تقدر تشوف وتقيم بالكيلو والمسافه بين المدينتين

والله انا الشباب عندي مسافرين الي كانوا يدرسون هناك كنت بعطيك معلومات اكثر. لان انا معلوماتي بسيطه وماكنت اقيم المسافات
فشوفها انت وقيم المسافات بالكيلو

والله يوفقك ولا تقعد توسوس وتحاتي الدنيا سهالات والخليج هناك شكثر خاص الشباب ياكثر الطلاب الي هناك بيساعدونك بكل شي ..
الساحوت2002
07-08-2008, 12:58 PM
يعطيج الف الف الف عافية على تفاعلج
وماقصرتي اختي وانشالله الله بيسر امورج مثل ماساعدتني
ومن فرج على مسلم كربة فرج الله علية كربة
وتسلمين ماقصرتي
وانشالله بجوف بقوقل ايرث وبدور
VIPLady
07-08-2008, 01:08 PM
يعطيج الف الف الف عافية على تفاعلج
وماقصرتي اختي وانشالله الله بيسر امورج مثل ماساعدتني
ومن فرج على مسلم كربة فرج الله علية كربة
وتسلمين ماقصرتي
وانشالله بجوف بقوقل ايرث وبدور

طمنا عليك اذا رحت وابي بشاره الشهاده بلييز اوكي :)
على شان نبارك للوالده
الساحوت2002
07-08-2008, 02:13 PM
انشالله الله يسمع منج بس انطريني في 2013
مهندس
07-08-2008, 05:24 PM
أخي العزيز الساحوت

الله يهديك إنت الظاهر إنك رايح وناسة مب دراسة !!!!!!!:omen2::)

فلوريدا و كليفورنا ...الصراحة ما أنصحك فيهم لعدة أسباب ....و أنا شخصيا لا أفضل الدراسة في هاتين الولايتين بشكل عام...

أخوي إنت رايح دراسة و ودك إدا كنت رايح دراسة تروح مدينة مافيها إغرائات كثيرة و تكون آمنة و مريحة نوعا ما....


أنا الصراحة أنصحك بالنورث ويست ...يعني و لاية أوريغين (بورتلاند أو سيليم )مثلا...عندك واشنطن ستيت(سياتل أو سبوكان),,,

الصراحة انا لا أنصحك بتاتا بالدهاب إلى الجنوب مثلا تينيسي أو الميسيسيبي أو ماشابة...

نصيحة أخ خل نظرتك تكون أوسع من الوناسة فقط...لأنك لازم تدرس وتجيب الشهادة...

إدا كنت تبي تروح مثلا لفلوردا او غيرة روح فقط في العطل و الإجازات غير جو....بس كدراسة..الصراحه ما أنصحك أبدا....

إنت أول اطلب منهم الجامعات الي في ولاية واشنطن و أورقن بعديت قرر اي مدينة تروح...

على فكرة ترى حتى الناس تختلف من مكان لآخر...
الساحوت2002
10-08-2008, 05:13 PM
الصراحة اخوي انا اخترت ولاية كلفورنيا وانا انسان اذا ابي ادرس بدرس والحمد لله حتي لو كان اي شي يوقف بطريقي
وابي رايك عن ولاية كلفورنيا لاني خلاص قررت وارسلت كتاب للمدير وانشالله يوافق
ابي نصيحتك على الجامعات اللي هناك في كلفورنيا هي صح انها ولاية حلوة وفيها طبيعة يعني ترتاح نفسيا
وتقدر تركز
وانا خلاص قررت اروح هناك وابي نصيحتك جزاك الله خير
مهندس
11-08-2008, 09:19 AM
الصراحة اخوي انا اخترت ولاية كلفورنيا وانا انسان اذا ابي ادرس بدرس والحمد لله حتي لو كان اي شي يوقف بطريقي
وابي رايك عن ولاية كلفورنيا لاني خلاص قررت وارسلت كتاب للمدير وانشالله يوافق
ابي نصيحتك على الجامعات اللي هناك في كلفورنيا هي صح انها ولاية حلوة وفيها طبيعة يعني ترتاح نفسيا
وتقدر تركز
وانا خلاص قررت اروح هناك وابي نصيحتك جزاك الله خير

أخي العزيز...

ولاية كليفورنيا أكبر من السعودية و فيها مدن كبيرة و أخرى متوسطة و صغيرة...
فيها..لوس أنجلوس ..سان فرانسسكو ..ساندييغو ....ستاكتن...ساكرامنتو..سانكوز..فرزنو...

و كل مدينة فيها عدة جامعات ..و عدة كميونتي كلجز.....

أنا نصيحتي تدور على جامعة زينة و كويسة :)

لا هي الصعبة و لا السهلة وتكون في مكان آمن و مب غالي ...لأنك راح تعيش هناك منت رايح سياحة....

و على فكرة خلني أعطيك نصيحة بس :nice:
إنت مبين عليك تحب الكشخة و الذوق الرفيع لأنك ناوي على كليفورنيا أو فلوردا...
خلني أنصحك نصيحة و إنت بكيفك...
الحين إذا رحت مدينة المستوى المعيشي فيها عادي أو متوسط أكيد إنك راح تطلع عليهم توب و كاشخ بعد بالموتر و غيرة...

بس إذا كنت بكليفورنيا أو فلوريدا راح تضيع مع الناس و أغلب الناس كاشخين أكثر و مواترهم أحسن واايد.....

إنت إذا رحت مدينة عادية راح إنت تكون أعلى منهم بالمستوى المعيشي .بس إذا رحت حق أغلب مدن كليفورنيا راح تعيش مثل الناس لا و أغلا بعد و الحر راح يأذيك.....هذا أولا....((أنا أقول هذا الكلام لأني أدري شنو الي يدور في بالك :tease: ))

ثانيا...
إذا كنت بولاية جيدة و مافيها عرب ولا شباب وايد يشغلونك راح تتعلم لغة بسرعة و تحتك مع الناس العاديين و تتعلم حتى أمور الحياة اليومية و هذا في تصوري خلاصة الغربة .... مب تقعد في مكان كلة شيشة و قهاوي!!!!!!!!!!!!...و كأنك يا بو زيد ما غزيت:tease::tease:

أنا أنصحك إنك تسكن مع عائلة....حتى و إن تضايقت لأن مصلحتك بالسكن معاهم....

و على الأقل تسكن سنة..أقل شي سنة...ولمصلحتك....

مب علشان اللغة بس...لا...علشان اللغة و الأمان في أول الوقت حتى تتأقلم مع المدينة و تعرف الأماكن الزينة من الشينة و الخطرة...حتى تعرف طريقة التعامل مع المجتمع و حتى ما تتأذى مع الأثاث و التأثيث في أول أيامك....

تقبل تحياتي ...
و إذا ودك بأي سؤال لاتستحي ترى الشباب يكونون فاهمين بعض أكثر ....

و أنا إن نصحتك ترى والله ماأبي إلا مصلحتك و أنا أخوك...و خل عند الأمور الثانوية ...إهتم بالدراسة و الجامعة أولا و أخيرا ..
bu salem
11-08-2008, 09:28 AM
اخوي الساااحوووت



انا بصراحه ماعندي خلفيه عن الجامعه

وماعشت في امريكا مدة طويله

بس انا مجرّب الدراسه في الخارج



انا اقترح عليك الآتي

اول ماتوصل هناك روح للجامعه فيه قسم عندهم خاص بالسكن

واطلب منهم قائمه بعناوين العائلات

اسكن مع عاااائله لمدة شهرين على الاقل

تعرف منهم عادات اهل البلد وتعرف الأماكن هناك وتتعرف على شباب يفيدونك وكذلك تستفيد لغه (أو بالأصح لهجه) ترى مو سهل انك تفهم على كلامهم الا لما تتعود على لهجتهم :)


بعد فتره تقدر تشوووف لك سكن خاص بك وترتاح من الرسميه



اتمنى اني أفدتك :)
bu salem
11-08-2008, 09:32 AM
بخصوص سكن الجااااامعه


انا ما ادري عن مووودك :)

بس ترى فيه ازعاج

ولا تنسى ان المطبخ ودورات المياه (تكرم) مشتركه

ماراح ترتاح ولا تتطمّن على اغراضك الخاصه مثل (الفرشاه - الصابون الخاص بك - الشامبو - اكوابك ومواعينك)

انا انصح بالعااااااائله

وركّز على العااائله اللي عندهم عيايز وشيبان

عشان تستفيد اكثر

كله قاعدين في البيت وماعندهم شغل

لذلك يسولفون عليك ويسلّونك :)



بعد حاول مايكون عندهم طلّاب غيرك :)



تحياتي
book 1
11-08-2008, 10:23 AM
سلام عليكم اخوي انا اشوف انك تسكن في سكن الجامعه لمده سنه و تسكم مع امريكي عشان تتعلم الغه صح و تعرف كل شي عن الجامعه و فلوريده حلوه و ايد غير ديزني لاند فديتها و الله انا سويت جذيه يوم كنت ادرس في امريكا و الحمدالله تعلمت و ايد و كونت صداقات و ايد في سكن الجامعه احسن من بو عراب مالهم فايده اهناك كله طلعات و سهر و تسلفهم افلوس انا هذيه الي شفته و جربته بس حبيبي توكل على الله و روح شوف مستقبللك و الله يوفقك أن شاء الله
ام عبدالعزيز
11-08-2008, 10:37 AM
لا انصحك تسكن بروووحك..

ولا ترتب وضعك وعقب ترد لقطر عا الصيف ووتتزوج بعد..

لان سكن الجامعات لووووثه ووووع ولوعه وغير طابور الحمامات الله يكرمك..


يعني سكن بروحك لك انت. احسن لك تصلي على راحتك تاكل براحتك...وربي يوفقك..
الساحوت2002
16-08-2008, 02:37 AM
تسلمووون كلكم ع التواصل معي

بس ياجماعة انا كنت مختار فلوريدا وعقب طلبت كلفورنيا لان جوها روعة ومدينة امنة والراتب اللى بيصرفونة على الهيئة زين حدود 8000 ريال قطري 2150 دولار غير البدلات
وانا صراحة يوم جيتهم المرة الثانية ع شان احول لكلفورنيا قالوا لازم تكتب كتاب لطلب التحويل لكلفورنيا
ومب حلوة اروح واكتب كتاب ثاني للتحويل لمدينة ثانية انا ماصدقت يقبلوني
انا ابي مدينة ارتاح فيها واستانس مابي مدينة كئابة وضيقة صدر ابي ناس اسولف معاهم وطيبين ابي جو حلو معتدل ياجماعة هذي 5 سنوات مب شوي
واذا عن الدراسة بأذن الله انجح واجيب الشهادة

وعن اللى سمعتة ان كلفورنيا غالية بس مب اغلي من اوربا
ابي نصايحكم ويعطيكم العافية ع التواصل
التيما
16-08-2008, 02:47 AM
تسلمووون كلكم ع التواصل معي

بس ياجماعة انا كنت مختار فلوريدا وعقب طلبت كلفورنيا لان جوها روعة ومدينة امنة والراتب اللى بيصرفونة على الهيئة زين حدود 8000 ريال قطري 2150 دولار غير البدلات
وانا صراحة يوم جيتهم المرة الثانية ع شان احول لكلفورنيا قالوا لازم تكتب كتاب لطلب التحويل لكلفورنيا
ومب حلوة اروح واكتب كتاب ثاني للتحويل لمدينة ثانية انا ماصدقت يقبلوني
انا ابي مدينة ارتاح فيها واستانس مابي مدينة كئابة وضيقة صدر ابي ناس اسولف معاهم وطيبين ابي جو حلو معتدل ياجماعة هذي 5 سنوات مب شوي
واذا عن الدراسة بأذن الله انجح واجيب الشهادة

وعن اللى سمعتة ان كلفورنيا غالية بس مب اغلي من اوربا
ابي نصايحكم ويعطيكم العافية ع التواصل

اخوي نصيحه مني .. وعن تجربه .. اسمع كلام اخوي المهندس .. كلامه صج وبيفيدك وعين العقل .. وصدقني افضل نصيحه من الي ردوا عليك كانت منه .. وانت براحتك .
VIPLady
16-08-2008, 11:51 AM
تسلمووون كلكم ع التواصل معي

بس ياجماعة انا كنت مختار فلوريدا وعقب طلبت كلفورنيا لان جوها روعة ومدينة امنة والراتب اللى بيصرفونة على الهيئة زين حدود 8000 ريال قطري 2150 دولار غير البدلات
وانا صراحة يوم جيتهم المرة الثانية ع شان احول لكلفورنيا قالوا لازم تكتب كتاب لطلب التحويل لكلفورنيا
ومب حلوة اروح واكتب كتاب ثاني للتحويل لمدينة ثانية انا ماصدقت يقبلوني
انا ابي مدينة ارتاح فيها واستانس مابي مدينة كئابة وضيقة صدر ابي ناس اسولف معاهم وطيبين ابي جو حلو معتدل ياجماعة هذي 5 سنوات مب شوي
واذا عن الدراسة بأذن الله انجح واجيب الشهادة

وعن اللى سمعتة ان كلفورنيا غالية بس مب اغلي من اوربا
ابي نصايحكم ويعطيكم العافية ع التواصل


توكل على الله .. والله يوفقك

والي بيروح دراسه يبي شويه وناسه بعد
هذي 5 سنوات مو شوي انك تدفن عمرك بولايه مافيه شي وكئيبه
لازم تكون نفسيتك حلوه على شان تقدر تعيش بالغربه وتذاكر وتجتهد

الله يوفقك وين مارحت
الساحوت2002
16-08-2008, 01:26 PM
مشكورين على التفاعل والمساعدة والله يوفقنا جميع


وأي احد عندة معلومات يفيدنا جزاكم الله خير
الساحوت2002
16-08-2008, 07:00 PM
شرايكم ياربع في ولاية كولورادو
يقولون زينة ورخيصةقولوا لي شرايكم
مهندس
17-08-2008, 11:43 AM
شرايكم ياربع في ولاية كولورادو
يقولون زينة ورخيصةقولوا لي شرايكم

بالشتاء سنو و ثلج ..وبالصيف جيدة.....
الصراحة ما رحت هناك
أنا ما أنصح فيها لسبب لكثرة العرب الي يدرسون هناك....أنا أقول كثرة يعني كثرة!!!

و بعدين منو قال إن سياتل مافيها وناسة :anger1:؟؟!!!

عزيزي القرار قرارك...
إستخير و إنشاء الله راح الله يوفقك بالقرار المناسب...


إشرايك تدرس معاي بإيطاليا..أنا رايح هناك دراسة ست أشهر:)؟؟!!
الساحوت2002
17-08-2008, 01:52 PM
بالشتاء سنو و ثلج ..وبالصيف جيدة.....
الصراحة ما رحت هناك
أنا ما أنصح فيها لسبب لكثرة العرب الي يدرسون هناك....أنا أقول كثرة يعني كثرة!!!

و بعدين منو قال إن سياتل مافيها وناسة :anger1:؟؟!!!

عزيزي القرار قرارك...
إستخير و إنشاء الله راح الله يوفقك بالقرار المناسب...


إشرايك تدرس معاي بإيطاليا..أنا رايح هناك دراسة ست أشهر:)؟؟!!


والله فكرة اذا بتوديني على حسابك ;) انا ماعندي مانع

اتغشمر انا بروح ادرس الحين ضعت مبينكم واحد من الشباب يقول تعال كولورادو وانت يامهندس تقول تعال واشنطن
الساحوت2002
19-08-2008, 11:32 PM
للرفع