اعترافي+اقتراحي ارجوكم بس مروا ولو مرور الكرام

[قلب بو ظبي]

السلام عليكم ورحمة الله وبركاته


بمناسبة الشهر الفضيل ابى اقترح اقتراح وهو بخصوص الفرص اللي
موفرتها دولنا وحكوماتنا من خلال الجمعيات الخيرية ومؤسسات النفع العام
الواحد اليوم لله الحمد قادر بطريقه او بأخرى انه يتصدق على نفسه وعلى والديه الاحياء منهم والاموات
خاصة في ظل ارتفاع الاسعار الناس فيها المستعفف والمسكين والفقير
عندنا في الامارات نفس الحاله في جهات عدة ممكن من خلالها نمد يد العون لاخوان واخوات مانعرفهم ولا يعرفونا وبيدعون لنا دون معرفه من بينا وتخيلوا حجم الفرحة اللي بنرسمها في قلوبهم لتوفيرنا لهم اقل القليل وهو اللقمه اللي هم عاجزين عن الحصوول عليهم لضيق اليد
اتمنى الكل يساهم باللي يقدر عليه
واذكروا الغالين الذين غيبهم المووت
انا ما اعرف الاخ ابو البورصه وهو احد الاعضاء المتوفين رحمة الله عليه بس قريت دعواتكم له وحبيت تألفكم وتعاضدكم وانكم لليوم تدعون وتولون هالامر اهتمامكم
وفي اعضاء اخرين انتم تعرفونهم وتعزونهم ولكم وياهم ذكريات غاليه
ليش مانسوي صندوق السهم فيه ب 50 ريال او 100 وهالمبلغ نتصدق به على روح الفقيد ابو البورصه والاخوة الافاضل الغالين على قلوبكم
ال50 ريال او ال 100 ماهي بكاسره ظهر حد فينا - هذا اقتراحي الاول -
اما الشي الثاني هو من تجربتي الشخصية يمكن حد فيكم يسويها في محيطه-
انا شخصياً عندي مشروع وقف لوالدي واخواني وجداني وخوالي وعمي المرحوم واعز صديقاتي(نعم صديقتي ومش صديقي رجاء ً كملوا الموضوع وبتفهمون) رحمة الله عليهم رحمة ً واسعه-
المشروع مش مكلف بقدر ماهو ممتع مستفيده (نعم مستفيده مش مستفيد)
فيه من الشباب والبنات-عيال اخواني وخواتي- في اسرتي الكريمه
ومسوي جوا حلو من بينا وسوالف حلوه اجتمعنا على فعل الخير والله ميسرها علينا
وهو توزيع المصاحف على مساجد الدولة
الدوله بشكل عام وحكومة ابو ظبي بشكل خاص موليه بيوت الله اهتمامها ولله الحمد ولكن الواحد عنده فرصه يساهم بالقليل فليش لا ويوهب الاجر لوالد متوفي لاخ راحل لخال فقيد لعم عزيز
ليش لأ ولاني واجهت مشكله انه في ناس تسول لهم نفسهم يسرقون المصاحف ويعيدون بيعها في مكاتب قريبه من المساجد توجهت لمحل عمل الاختام وسويت اختام خاصه باسم كل فقيد اوهب الاجر له -وتدرون هالحركة مثلاً لما سويتها لجدتي اللي هي جدة ولد عمي اللي هو ريل اختي-عيال اختي تحمسوا نحن بعد نبى نسوي لجدتنا ولما سويتها لعمي المرحوم عيال عمي استغاروا تخيلوا ابونا نحن نبى نسوي له فصار في تنافس من بينا على عمل الخير
ونفس الحاله مع عيال خالي
المشروع بسيط وتكلفته بسيطه لانه مصاحف التوزبع اسعارها تتراوح مابين 6 دراهم و10
يعني ال 100 مصحف بتكلف مابين 600 درهم إلى 1000 تقريباً
انقلهم بسيارتي الخاص وعقب يتولون الشباب توزيعهم على مساجد الرجال
ونحن البنات على مساجد النساء ليس قلت نحن
بعترف لكم اعترف بالمناسبه اول شي ببدأ باعترف قلب بوظبي بنيه مش ولد للامانه
دخلت على اساس ولد لاني اساساً داخله ابى اشتري سياره من قطر لا اكثر ولا اقل ومجننه اخوي ابى سياره استيشن وتحديداً من قطر
اللي يميز السيارات في قطر قلة الممشى -
واخويه قالي حصلي سياره وعقب انا بروح اشتريلج اياها ولاني ماريد سوالف مالها داعي
وبيلاحظ الاخوان اللي طرشوا لي ارقامهم بخصوص سيارات انه ماتم التواصل معاهم
اولاً انا اعترف قبل الشهر الكريم لاني ما احب الكذب ووالله عالم ماغلطت على حد
وثانياً لاني تعبت من كتابة ردود او مشاركات واقراها 100 مره عشان ما اغلط واكتب بصغة الانثى :)
السموحه واعتذر وبارك الله فيكم واتمنى من كل قلبي لو واحد او وحده فيكم يعجبه مشروعي سواء بخصوص التبرع لاخوانا في المنتدى او البدء بعمل خيري لغاليين غيبهم الموت وكانوا جزء غالي من حياتنا وتبدون تسوونها على محيط الاسرة ويتفاعلوون وياكم الاخوة والاخوات في البيت وعيال اخوانكم وخواتكم والله انه جو رائع ومواقف عجيبه ووناسه واخرتها اجر بطريقه سهله وميسره

اسمحووووا لي وفقنا الله واياكم لما يحب ويرضى
مش بو شمه
-شمه-

[السنافية]

يا هلا ومرحبا فيج اختي - شمة - قلب بو ظبي
وبارك الله فيج على المشروع الرائع وجزاج الله خير
وانشالله يكون فيه تسارع لتنفيذ مشروعج00
لانه بالفعل فيه الفايدة والخير الكثير خصوصا لموتانا واحبائنا
اللي فقدناهم وبالايام المباركة هذي الله يرحمهم00
وانا عن نفسي وايد عجبتني الفكرة وانشالله بطبقها على مستوى العايلة والناس اللي حوالي
والصدقة راح تنفعنا احنا وتفنع موتانا
والله يجزاج خير

وتقبلي مروري00 الله يرعاج اختي :)

[يونيك]

بارك الله فيكِ ونفع بك ان شاء الله .... بالنسبه للإعتراف اعتقد الموضوع بسيط والاخوان اكيد بيتفهمون ظروف وسبب تسجيل الاسم .

وبالنسبه للمشاريع المباركة .... اسأل الله ان يثيبكِ عليها.... وفي ميزانك ان شاء الله تعالى.


وان شاء الله نشوف تجاوب الاخوة والاخوات ... وللعلم فإن البعض قد يقرأ الموضوع ولا يرد عليه ولكنه قد يكون أول المجربين لمثل هذه الأعمال الخيره والمباركة بعيدا عن ذكرها طلبا لمزيدا من الأجر.


أحسنتِ وجزيت خيرا ان شاء الله.

[قلب بو ظبي]

بارك الله فيكم واشكر ردودكم
والفكره والقصد بذكرها انه ابين لكم انه الموضوع جداً سهل والامور ميسره ولله الحمد وللعلم يعني الواحد ماوده لا يبلغ عيال عم ولا عيال خال انا سويت كذا والا كذا لكن بالنسبه لي انا بحكم انه اخواني ماخذين بنات خالي وعيال عمامي هم رياييل خواتي وكلنا في بيت واحد الموضوع يوصل وخاصة اني مشغله عيال إخواني وخواتي ويايه مساعدين وللعلم لهم أجر معين يعني اعطيهم المقسوم
وترى ايي التفاعل جداً رائع مرات ومرات في ناس جهال وماعندهم عقل يعني في شخص قال انا ما ابغيكم تسوون لحياة ابوي ) انا اولى بالاجر والمرحوم خلف رياييل وما ادري شو
يا اخي انته ابوك سواء عمي خالي له فضل كبير علي وانا من باب الدور اللي لعبه في حياتي والغلا اللي اكنه له حبيت اسوي له لو شي بسيط يعني ردات الفعل مختلفه
في مثال من تسمع عن مسجد قريب يفتح جهز عمرك وشوف شو ممكن تقدم
عندنا مثال في ابوظبي المدن الجديدة فيها مساجد تبارك الرحمن المنطقة الوحده من 3 إلى 4 مساجد ومسجد جامع لكل منطقتين
يعني والله فرصة ولايمكن تتعوض
الناس اللي تشتغل في اماكن تسمح لها التعامل مع الجمهور بشكل مباشر مثل البريد وهذا موقف مريت به نزلت البريد اتلقى حواله من عند خالي باسم الوالده وموظف البريد سلمني الظرف مع كرت دعوي-كتيب دعاء-
عجبتني الحركة في اشياء كثيرة ممكن نقدم فيها خدمة تجلب الاجر والثواب لناس كنا ولازلنا نحبهم والحب اللي مايترجم بعمل ما اعتبره حب وهذا رايي شخصي الفرص مابتيي تركض عند ابواب بيوتنا ولو ماسعينا لعمل الخير في شبابنا متى بنسويه محد ضامن عمره والايام تركض والفرص كثيره اتمنى نغتنمها زاتمنى قبل تقولون شمه الله يرحمها تكون شمه قدمت ماقد يشفع لها في يوم الحساب

والا شو رايكم؟؟

[Q6RI-001]

(( قلب بو ظبي )) الله يبلغج رمضان ويتقبل صيامج وقيامج وطاعتج

الشيخه انتي معذوره وانشاءالله الكل بيتفهم الوضع..وهذه شجاعه منج في الاعتراف

الموضوع المطروح وااايد حلوو وانا عن نفسي عملته في العائلة في وفات جدي وجدتي والفقيد الغالي والعزيز خالي ... الله يتغمدهم برحمته (( انشاءالله الى جنات الخلد ))

ومثل ما قلتي المشروع مو مكلف واكيد مفيد والكل بيستفيد منه .. احنا وزعنا المصاحف على المحتاجين والفقراء مع الصدقات والزكوات واللي نعرف انهم محتاجين والباقي من المصاحب وزعناها على بعض المساجد الصغيره اللي مافيها اهتمام كثير ..!! وتم التوزيع من قبل العائله كلها صغيرها وكبيرها مع وضع الاختام على المصاحب باسم الفقداء رحمة الله عليهم حتى لا تتوزع مره ثانيه او تنباع .. لان في ناس قلوبهم مريضه ياخذون المصاحف من المساجد ويبيعونها الله يهديهم.

مشكووره الشيخه على الموضوع والمشروع .. في ناس سوت هاي المشروع وفي ناس انشاءالله راح تسوي المشروع لانها افكار حلووه ومفيده ... ربي يعطيج العافيه

[قلب بو ظبي]

اشكركم جميعاً واتمنى من كل قلبي انه لو عضو واحد بس او عضوه يباردرون في مثل هالاعمال ويشاركونا تجاربهم عشان نستفيد من الافكار المبادرات اللي اقدم غليها غيرنا وفي النهاية ربي يرزقنا الاجر والثواب ان شاء الله