ليش!! يابنك الدولي الاسلامي

[بوبندر]

قدر الله ونسحبت بطاقة الصراف الالي...من احد مكاين الدولي الاسلامي امس
وانا حسابي في بنك اخر رحت اليوم بنكي وقلتلهم عن سحب البطاقه عن طريق احد مكائن الدولي الاسلامي..على طول قالي الموظف ان اقدم على بطاقه جديده!! ليش مب البطاقه تبعث لكم عقب كم يوم...قالي لا ....اذا عن طريق مكائن الدولي لا تبعث بل تعدم !!!!..واذا من بنك اخر ترسل لنا....قدمة على بطاقه جديده شسوي......وتعليق لك:anger1:

[hich]

بنك السمسونايت من يوم ماسرقوا شعار شنطة السمسونايت وانا رامي طوبتهم

[واحد ثقة]

باختصار ... أمحق بنك ،،

مابغي اجدد المواجع خلونا ساكتين ،،

سمعت كلام كثير عن بنك قطر الوطني الإسلامي ، يمدحونه والله ،،

[سهم طايش]

ليش خدمات البنوك الاسلاميه متردية

ليش ارتبط سوء الخدمات البنكية مع البنوك الاسلاميه

و على الجانب الاخر نشوف البنوك الربوية عندها احسن الخدمات بكثير

[عزووز قطر]

امحق بنك
افشل بنك على مستوى قطر من خلال تجربتي معاهم انتظر بس تنتهي اقساطي منهم بفارغ الصبر
الله يصبرنا عليهم

[بوخالد911]

والله الوطني الاسلامي ولا أروع

غير بنكك وافتك من وجع الرااااس

ولك القرار

؛؛؛
بوخالد911

[Riku3]

ليش خدمات البنوك الاسلاميه متردية

ليش ارتبط سوء الخدمات البنكية مع البنوك الاسلاميه

و على الجانب الاخر نشوف البنوك الربوية عندها احسن الخدمات بكثير
انا اتعامل مع ثلاث بنوك شخصية وللدوام والفارق كبير جداً للاسف ..

فمافي اي مقارنه بين الدولي والمصرف من جهة .. والدوحة والتجاري وقطر من جهة ... فرق شاسع بالتعامل وسرعة الانجاز والدقه , واشوف التجاري والدحة هم الافضل ولكن ما اقدر احط فلوسي الشخصية فيه او في افرعه الاسلاميه لانه بنك ربوي وما ابي ادخل نفسي بشبهات >_< .

+++++
الله يعينك اخوي على طلب البطاقة ! .

[عين قطر]

الصراحه راحه
تعاملت مع 3 بنوك الدولي الاسلامي والمصرف وبنك الدوحه
الثالث طلع روحي
اما الاول فلا يعلى عليه والله يسلم بو خالد وبو تركي الله يجزاهم خير الجزاء حتى ان وجدت بعض الملاحظات على الدولي الاسلامي ولكن يبقى هو الافضل بالنسبة لي

[khaldoon]

رحت افتح حساب توفير في الدولي مع انه عندي وديعتين فيه و حساب جاري

قالولي جيب صوره عن جواز سفرك....قلت لهم الاقامه صالحه و هي نفسها من سنتين و البطاقه الشخصيه موجوده و تثبت هالكلام و انا مب فاتح الحساب لاول مره

قالولي صحيح انت عطيتنا صوره عن جواز السفر اول سنة 2007...لو انه الظروف نفسها اللي فوق ...يعني عندي وديعتين و حساب جاري و ابي افتح حساب توفير و صورة الجواز كنت معطيهم اياها سنة 2008 مب 2007 كان ما لزم صوره عن جواز السفر

بالله عليكم يعني ايش المعنى و ايش الغايه...طبعا ما قدرت افتح حساب توفير و اودعت المبلغ في الجاري

حسبي الله عليهم و على قوانينهم اللي ما لها طعم ولا لون ....بس لها ريحه :secret:

[الهاوي28]

ما عليك منهم كذابين يبونك تقدم على وحده جديده علشان الرسوم

اصبر لك اسبوع وروح البنك مره ثانيه وقول لهم بطاقتي انسحبت وبيشيكون عندهم وان شاء الله بتلقاها

انا بطاقتي انسحبت كذا مره وقالو لي نفس الكلام بتنعدم بس راجعتهم عقب اسبوع ولقيتها عندهم

[الصارم]

نصيحه لكل إنسان مسلم يخاف ربه عايش على أرض قطر ... لا تتعاملون مع البنوك الربويه مهما كان وسوء المعامله مب عذر .. الربا حرااااااااااااااااااااااااااااااااااااااام واللي تجرأ على محاربة ربه لا يجر غيره معاه .. اتقوا الله ...

[اكسجين]

ها.....قال بنك...والله اسم بنك ايخق عليه.......قول_ حصاله _ خزانه_ بشتخته_...اما بنك لالالالا سلامتك

[مزيون الدوحه]

هالشي اعرفه من زمان

هذا القرار طالع من مصرف قطر المركزي
وكل البنوك تسويها يعني اذا انسحبت بطاقه
في صراف الي غير تابع لبنكك تعدم البطاقه

[فنان قطر]

أتعس بنك في قطر الدولي الاسلامي

[واحد ثقة]

انا اتعامل مع ثلاث بنوك شخصية وللدوام والفارق كبير جداً للاسف ..

فمافي اي مقارنه بين الدولي والمصرف من جهة .. والدوحة والتجاري وقطر من جهة ... فرق شاسع بالتعامل وسرعة الانجاز والدقه , واشوف التجاري والدحة هم الافضل ولكن ما اقدر احط فلوسي الشخصية فيه او في افرعه الاسلاميه لانه بنك ربوي وما ابي ادخل نفسي بشبهات >_< .

+++++
الله يعينك اخوي على طلب البطاقة ! .




طيب شرايك في الوطني الإسلامي ؟
خاصة أن الشيخ يوسف القرضاوي افتتحه بنفسه :con2:

[Bu Rashid]

نصيحه لكل إنسان مسلم يخاف ربه عايش على أرض قطر ... لا تتعاملون مع البنوك الربويه مهما كان وسوء المعامله مب عذر .. الربا حرااااااااااااااااااااااااااااااااااااااام واللي تجرأ على محاربة ربه لا يجر غيره معاه .. اتقوا الله ...


لا باللّه سوء المعامله والخدمات عذر ونص...
أفتح حساب جاري ما يعطونك فوائد... وخلصنا

[لاداعي]

الله يكون في عونكم واحنا وين مانطقها عويه

[Darco]

هذا الشيء مب بس حق الدولي الإسلامي, كل البطاقات المسحوبة اللي مهب من نفس بنك مكينة الـATM يتم إتلافها.

[hasss1969]

في الحقيقة انا في الدولي الاسلامي وعندي وديعة فيه لكن بالحقيقة خدمات تعيسة جدا ,لاموقع انترنت زي الناس ولا مراسلات ورقية بين البنك والعميل زي الناس,والله افكر بجدية اغيره بعد انتهاء اجل الوديعة...وسؤالي هنا ماهي اجراءات التغيير من بنك لبنك وهل هي صعبة ومعقدة كما سمعت؟؟

[بو شهاب]

اخوي , انا صارت معي نفس السالفة مع ماكينة الدولي اللي في سوق الجبر . و استلمتها
من بنكي المصرف بعد حول 3 اسابيع . اتصل على الدولي و ان شاء الله يساعدوك .

[الرافعي]

بنك قطر الدولي الاسلامي من اتعس البنوك اللي تعاملت معاها
تخيلوا صار لي يومين اتصل على رقم خدمة العملاء اللي المفروض يعمل على مدار الساعة ولا من مجيب
يعني اللي يصير له طارئ ما وبعيد شيسوي؟؟
وحتى لو في البلد ليش يستحمل زحمة الشوارع وقلة المواقف على شي بسيط تنجزه البنوك الثانية بالتلفون


والله صج امحق بنك
بحول الله بسكر حسابي عندهم وبشوف الوطني الاسلامي

[م. عبدالعزيز]

في الحقيقة انا في الدولي الاسلامي وعندي وديعة فيه لكن بالحقيقة خدمات تعيسة جدا ,لاموقع انترنت زي الناس ولا مراسلات ورقية بين البنك والعميل زي الناس,والله افكر بجدية اغيره بعد انتهاء اجل الوديعة...وسؤالي هنا ماهي اجراءات التغيير من بنك لبنك وهل هي صعبة ومعقدة كما سمعت؟؟
انا نقلت من بنك لبنك ، واللي سويته بكل بساطة هو التالي:

1- رحت للبنك القديم وقلت للموظف ابي احول راتبي لحساب ثاني في البنك الثاني ، قال اوكية وعطاني ورقة "إخلاء طرف" يعني انه ماعندي اي التزامات معاهم.
2- رحت للبنك الجديد وفتحت حساب جاري وطلبت بطاقة فيزا + ورقة تحويل الراتب.
3- حولت كل فلوسي من البنك القديم للبنك الجديد (حوالة عاديه )
4- رحت للشغل وعطيتهم الورقتين ، الاخلاء طرف + تحويل الراتب. وبعد شهر حولوا راتبي للبنك الجديد.

تميت حوالي 4 شهور عقب صكرت حسابي في البنك القديم
وبس

[زقرتي ومزاجي]

اكيد البطاقه فيزا او ماستر

[غناتي1]

يبون 50 ريال بدل فاقد

[غناتي1]

يبون 50 ريال بدل فاقد

مجربينهم من قبل

[شكري وتقديري]

قدر الله ونسحبت بطاقة الصراف الالي...من احد مكاين الدولي الاسلامي امس
وانا حسابي في بنك اخر رحت اليوم بنكي وقلتلهم عن سحب البطاقه عن طريق احد مكائن الدولي الاسلامي..على طول قالي الموظف ان اقدم على بطاقه جديده!! ليش مب البطاقه تبعث لكم عقب كم يوم...قالي لا ....اذا عن طريق مكائن الدولي لا تبعث بل تعدم !!!!..واذا من بنك اخر ترسل لنا....قدمة على بطاقه جديده شسوي......وتعليق لك:anger1:


تعدم ؟؟؟؟؟؟!!!!!!!!!!!!! بشرك الله بالخير .

ترى أبرك تعدم ولا تنتقل من يد إلى يد وبعدين توصل لك .

[الراقية]

....


انا بعد سمعت من كذا وحدة هالموقف صار لها وماعرف السبب:anger1::anger1:

[بوخالد911]

يبون 50 ريال بدل فاقد

مجربينهم من قبل



الصواب هو بدل مفقود


الفاقد هو أنت !!!

والمفقووود هو البطاقة

للتنبية فقط وآسف للتدخل

؛؛؛؛


بوخالد911

:secret::secret::secret:

[maryam5]

انا في البنك الدولي الاسلامي من زمان وارتحت في التعامل معاهم كثير واشوفه افضل من المصرف لني كنت عندهم وبعدها نقلت حسابي من عندهم...
ولا افكر اغيره...

هذا رايي...

[coolqtri]

بنك السمسونايت من يوم ماسرقوا شعار شنطة السمسونايت وانا رامي طوبتهم


ههههههههههههههههههههههههههههههههه

[المها]

الحين في قانون جديد انه البطاقات اللي تنسحب يعدمونها على طول ولازم تقدم على وحده جديده حتى يوم تستلم البطاقه الجديده مايخليك تحط رقم السري القديم للبطاقه المسحوبه.