مهاجرون الي قطر , مهاجرون من قطر

[الزعفراني82]

ساعه 9:30 بعد صلاه التراويح , رن جوالي و المتصل صديقي المقرب
كالعاده طلب يقابلني و لكن هالمره حسيت ان في شي غير عن كل مره
موعدنا ساعه 12 في مندرين بعد ما اخلص تمرين في الصاله .
اثناء التمرين ( احد زملائنا في الصاله من احد الجنسيات العربيه مدير احدي الشركات )
اخوي حسين, حبيت أسالك وين احسن مكان الواحد يشتري فيها شقه ؟ انت شو بتنصح
حسين : تبغي سكن او استثمار ؟
الوافد : لا يا عم في احد بيسكن بالدوحه بالشوب ؟ بدي اشتريه و ابيعه
باقي الحديث : مب مهم .
بعد الانتهاء قابلت صديقي و راح اسميه عبدالله ( كلنا عباد الله ) عمره 28 سنه شغال في جهه شبه حكوميه , من مواليد دوله قطر , اعزب , مسلم سني , من عائله معروفه
و هذا حديثنا :
هلا عبيد شخبارك ؟ ,,, و عليكم السلام تعلم يا بني أدم تقول سلام عليكم تعلم تحيه الاسلام .
زين زين انثبر و اقعد اشبلاك ؟ العاده تكون مداوم هالوقت ؟

شوي متضايق و ترخصت من الدوام و برجع بعد ساعتين

زين الزبده الحين ايش تبغي ؟ لا يكون متضايق من سالفه زواجك ؟
لا انا اصلا ما راح اتزوج و نسيت الفكره الي اشعار اخر !
عيل ؟
بهاجر !!!!! بسافر ؟ زهقت ؟ ملــــــــــــــــــــــــيت !!!
عرفت اشفيك اكيد زهقت من موضوع الجنسيه
اي والله لين متي اكون حامل وثيقه سفر قطريه ؟ لأني قطري ولأني اجنبي
بالشغل اليوم معطيني بدل سفر حق ايران ؟ انا لا شفت ايران ولا حتي ابوي شافها
لا انا ولا ابوي عنده اي وثيقه او شهاده او ورقه تثبت اننا ايرانيين بس عشان اسم عائلتنا و اصولنا خلونا ايرانيين
ما ادري شاقولك بهالموضوع انا ما عندي اي شي اقدر اساعدك ؟ حتي الناس الي اعرفهم ما يقدرون يساعدونك هالموضوع غير عن باقي المواضيع
ادري بس انا ما ابغيك تتوسط لي !!!! كلم الي تعرفهم بكندا اني ابغي اهاجر هناك ؟ الجنسيه الكنديه احسن من البريطانيه ؟ دوله مسالمه و سمعتها جيده مب نفس امريكا او بريطانيا و بتم هناك لين ما احصل الجنسيه و بشوف يمكن ارجع او حتي ما ارجع
و امك و ابوك الشيبه ؟ اخوانك و عيال عمك و خالاتك و عماتك كلهم بالدوحه ؟
ربعك و خصوصا انا ( الصديق الصدوق ) بتخليني و تروح !!
احلا شي بالسالفه اني بفتك من ويهك .ههههههههههه و شاسوي قلبي ما يطاوعني اخليهم بس بنتظر لين عيد الاضحي الجاي
اشمعني عيد الاضحي
يقولون في مكرمه اميريه بتعديل و تصحيح اوضاع اصحاب وثائق السفر القطريه يمكن بعيد الفطر او الاضحي ؟؟ بنتظر و بشوف يمكن يتعدل الوضع
سمعنا هالشي من قبل ؟ اصلا لازم قبل منح الجنسيه يشوفون و يبحثون من يستحق و من ما يستحق و تعرف هالشي حساس , مب اي واحد تعال عطه جنسية و روح ,كل شي بالعقل
تعرف ليش هونت من الزواج ؟
ليش يا حظي !!!!
يوم بغيت اتزوج قطريه قالو لي انت اجنبي , يوم بغيت اتزوج اجنبيه قالو لي انت قطري !!!!
زين اذا تبغي تهاجر محتاج فلوس , كم عندك انت الحين ؟
ما عندي شي الحين بس عندي اسهم عندي صناعات بأسم عيال اختي القطريين و عندي
المصرف الريان
اي انت ما تشتري شركات غير اسلاميه
اي حرام
من صجك اي حرام اي حلال ؟ ناس اغلبيتهم مضاربين ما يفكرون بهالشي
انا انصحك تشتر لك مواشي !!! هههههههههه او بدل اسهم مواشي بخروفين احسن
زين زين يا ولد الناس يا بو عيون احلا من لمعه الماس و الحين ايش تبغي مني ؟
شوف انت ربعك بكندا وايد , اسالهم كم مبلغ المادي مطلوب حق الهجره ؟
روح بفيزا دراسيه و بعدين غيرها الي اقامه هناك و بالمره كمل دراستك !! و علا خبري اخر مره مطلوب 250 الف دولار كندي اقل شي و السفاره الكنديه بالامارات تقدر تقدم علا الويزا هناك ؟
ههههههههههه حسينو تصدق انا سافرت بريطانيا و اوروبا بالوثيقه بس ما اقدر اسافر الامارات و البحرين ؟:secret: بطرشك انت تخلص اوراقي
من صجك ما تقدر تسافر دول الخليج ؟
اي حتي يوم سافرت الكويت بواسطه الشغل كاتبين : بمرافقه طاقم العمل القطري ههههههه
اصلا احنا لازم نجدد هالوثيقه كل سنه و ندفع 500 ريال رسوم اقامه نفس اي اجنبي اخر
حتي مالديف و سيشل الي جميع جنسيات العالم تدخلها من غير ويزا ما يقبلون بهالوثيقه
ما عليك يا بو صالح انشالله خير و شوف اذا حبيت تسافر تراني بروح وياك و بقعد وياك لين ما تتعدل امورك
و انا ببيع اسهمي (الي اصلا مب بأسمه ) و سيارتي و اقدر ادبر حوالي مليون دولار كندي ينفعون اشتري فيه شقه و اكمل دراستي الجامعيه من ناحيه و اقدر احصل شي يثبت وجودي بالعالم
اعضاء المنتدي الكرام : اعتقد الصوره واضحه و كل شي باين
بعض الفئات الي عاشوا و تربوا في ارض و تراب قطر همهم الاكبر مجرد هويه تثبت وجودهم و انتمائهم و يكون دليل علا انهم من سكان الكره الارضيه

بعض اهالي الي من مواليد مستشفي الرميله او الولاده ( مريم عبدالملك ) الي الأن لا يمتلكون
هويه تثبت انتمائهم سواء الي دوله قطر او الي اي دوله اخري

عاشوا و تربوا و ركبو باص العنابي من المدرسه لين البيت و العكس
لباسهم (ثوب و غتره , عقال و نعال ) ابيض اللون نفس قلوبهم
العابهم (قلينه و ماطوع ) و اكل و زادهم ( مجبوس و هريس و ثريد )
لكن هالفئه من الناس زهقوا من الصبر لا يعرفون شنو مصيرهم :لا جنه ولا نار
و لكن بالاخير اتخذوا اصعب القرارات بان يهاجرو موطنهم الاصلي الي انولدو و تربو فيه
قطــــــــــــــــــــــــــــــــــــــــــــــــ ـــــــــــــــــــــــــــــــــــــــر
و صارت كندا و بريطانيا و امريكا الملاذ و الوطن و الانتماء

اما من ناحيه اخري
بعض الوافدين خصوصا من غرب آسيا بذريعه الحرب و عدم الاستقرار صارت قطر الارض الي تدر الخير عليهم و هذا الشي مب غريب و لكن بطرق مختلفه
قطر اصبحت مجرد مصدر للغني و اللهو و العب , حيث الرواتب العاليه و المميزات الباهيه و الاستثمارات القويه و الأمنه و الخ الخ الخ الخ

يشترون و يبيعون و يستفيدون من جميع المميزات و حتي احيانا هم لهم مميزات لا يمتلكها القطريون في التوظيف و التعليم و التسويق و المنح و الهبات
لكن اين انتمائهم ؟ هم اصلا لا يمتلكون انتماء الي موطنهم الام فما بالك قطر
اصلا القطريين لا يستحملون حر الصيف و يكونون كالطيور المهاجره في فتره الصيف فماذا يفعلون هم في دوله قطر ؟ هل بقائهم حب و ولاء للدوله ؟ ام الاستفاده الماديه العظمي في ظل التطور القتصادي المجنون في الدوله ؟
هل ستصبح الدوحه نفس دبي ؟ القطري غريب و الوافد مواطن ؟
طبعا دام هو قاعد بشقته او عقاره الي بأسمه !!! ولا ننسي العادات و الاساليب الغريبه في مجتمعنا و غير المحتشمه الي صدروها لمجتمعنا المحافظ
و من طرف اخر بعض الافراد المجتمع القطري ( الأصيل ) نعم الاصيل الي عاش و تربي في هذا البلاد منتهي اماله هويه يستطيع بها الزواج اوتحويل املاكه و عقاراته بأسمه يفكر بالهجره للحصول الي هويه من دوله اخري لم يقصدها فقط الا للحصول علا الجنسيه و لم تستقبله الدوله الا لحاجته في الاستثمار في صحاري بلاد القاحله او في ثلوج البارده

ادري طولت عليكم بس ابغي ارائكم و مشاركاتكم و نفس كل مره
( اتمني الردود تكون عقلانيه سواء بالنفي او للتأكيد ) من غير اي تعصب

[الفريق أول ركن]

اخي الكريم ،،

الكل يعرف ان هناك فئه من فئات المجتمع القطري ولدوا وترعرعوا منذ اربعينات القرن الماضي وقد خدموا هذا البلد بالغالي والنفيس ،، فلماذا لاتصرف لهم الجنسيه اسوة بغيرهم من من يتم تجنيسهم تحت مسمى ( خدمات جليله)

فاللي اسمعه واعرفه ان هناك حالات تم تجنيسها من اول ما وطئت اقدامهم مطار الدوحة الدولي والجنسيه كانت بانتظارهم..

شي يحز بالخاطر اني اشوف الوافد الاجنبي عايش عيشه احسن من ولد البلد ومن عيشة حملة الوثائق القطريه

بس ان شاء الله السلطات بتوضع حد لهذه المسأله وان شاء الله مب صاير الا كل خير

[ANONYMOUS]

عليه بالدعاء والصبر والله كريم

اذا الله كتب له الجواز.. فـ بيجيه على طبق من ذهب.. بس يعمل بالاسباب

والانسان مايدري وين الخيره

والحمدلله على كل حال

[ولد الجزيرة]

ودي أهاجر كندا أو بريطانيا

خل صاحبك يدلنا على الطريقة

ترى ملللللللللللللللللللينا

[القهيدان]

الجنسيه مهب اي واحد ياخذها هناك وزارة داخليه هناك لجان هناك اجراءات كثيرة
اذا يستحق ينتظر
واذا يبي يروح يروح الله يحفظه ارض الله واسعه الي يبي يروح يروح
معلومه
اكثر الاجانب عندنا عايشين احسن عيشه من بلدهم الي هم منها
يعني الموطن والمقيم متساوين باشياء كثيرة

[قطري vip]

صح عايشين احسن عيشه بس اخوي اهو الحين بوثيقه مب بجواز يعني يدفع رسوم تجديد اقامه وحتى

الامارات قامت بخطوات وهذولي اخوانا اللي تربو بقطر وماعرفو ديرتهم الابالاسم ياخي والله مساكين

يعني اعرف ناس صار لهم بقطر 40 سنه ولين الحين ماخذو الجواز ويدفعون ولا رواتبهم على 2000 ريال

قولي الحين اشلون بيدفعون للبيت الماجر ولا للاكل ولا للدراسه ولا عنده اكثر من ولد وبنت ومع ذالك رافض

اي شي وقاعد لانه يحب هالبلد واهلها الطيبين وبومشعل الله يحفظه ان شاء الله مب مقصر بس هذوله وضعهم

ياخي الله لايراويك ياخي ترى مايحس بهالشي الا اللي طايح فيه والله والله يصبرهم ان شاء الله وان شاء الله

تفرج كربتهم وابومشعل الله يحفظه مايقصر مع كل الناس

[hamoor4ever]

الله يعينه ويسر اموره ، والكندي يسوي شغل يااخوي بعد ، خل يتوكل ع الله واللي خذو الكندي مب احسن منه

[um abdulla]

اشمعني عيد الاضحي
يقولون في مكرمه اميريه بتعديل و تصحيح اوضاع اصحاب وثائق السفر القطريه يمكن بعيد الفطر او الاضحي ؟؟ بنتظر و بشوف يمكن يتعدل الوضع
سمعنا هالشي من قبل ؟ اصلا لازم قبل منح الجنسيه يشوفون و يبحثون من يستحق و من ما يستحق و تعرف هالشي حساس , مب اي واحد تعال عطه جنسية و روح ,كل شي بالعقل
ادري طولت عليكم بس ابغي ارائكم و مشاركاتكم و نفس كل مره



اتمنى تتعدل الاوضاع فعلا في القريب العاجل !
قل لي اخوي الزعفراني 82 كيف بيدبر رفيقك مليون دولار كندي ؟؟؟ اوضاعه كويسة ؟ عنده اسهم ؟ بيتسلف ؟؟؟؟؟ واذا صعبة يتزوج فهل يبقى اصحاب الوثيقة عزابية ؟؟ والا شيسوون؟

[فارس العرب]

الجنسيه مهب اي واحد ياخذها هناك وزارة داخليه هناك لجان هناك اجراءات كثيرة
اذا يستحق ينتظر
واذا يبي يروح يروح الله يحفظه ارض الله واسعه الي يبي يروح يروح
معلومه
اكثر الاجانب عندنا عايشين احسن عيشه من بلدهم الي هم منها
يعني الموطن والمقيم متساوين باشياء كثيرة

صح السانك

[أمة الله]

وعليّه عليهم والله حالتهم حاله وهم يعتبرون من عيال البلد وماعرفوا غيرها

الله ييسر أمورهم ويتعدل حالهم بأسرع وقت ان شالله

[ســـهم]

يوم بغيت اتزوج قطريه قالو لي انت اجنبي , يوم بغيت اتزوج اجنبيه قالو لي انت قطري !!!!

شر البليه مايضحك !!

مافيه قانون واضح القوانين هنا اهوائيه :rolleyes2:

في الأصل لماذا يعطى وثيقه لأجل غير مسمى ولماذا لايكون للوثيقه عمر افتراضي

يستحق حاملها اكتساب الجنسيه على الاقل لو يقدر بعشر سنوات لكي يكون هناك وضوح
ام جعلت الوثيقه كجرعه مهدئه الى شعار آخر !!

الزعفراني اعتقد ان من طلبات الهجره الى كندا فتح حساب ب25 الف دولار

الله يكون بعونهم ,,

[نمر بن عدوان]

للاسف اخوي الزعفراني ان رفيقك نفس الوافد الاجنبي.

الوافد الاجنبي لانه مرتاح فالدوحة مايبي يتركها ولو ضروفة تغيرت راح يترك قطر ويرجع بلادة.

ورفيقك ماتحمل الوضع في قطر الي يعتبرها بلاده ولازم يستحمل الى ان يفرجها الله .ماقدر يتحمل العيشة هني ووده يهاجر كندا عشان يدور على حياة افضل هناك .

الوطنية وحب تراب الوطن مايبين في الرخاء لكن يبان في الشدة.

[qatar700]

شوف اخوي قول حق رفيجك يجوف له دبره و يروح كندا او اي دوله اجنبيه ثانية ياخذ له الجنسية من عندهم ويرجع وبيكون وضعه احسن من اي قطري .

اما بشان اكتساب الجنسية القطريه مافي قانون صريح وواضح بشان الاكتساب الجنسية لانه في الاخير يكون الامر سيادي ممكن ياخذ وممكن ما ياخذ .

اما عن الزواج اذا سافر اهناك وتزوج من الدوله المعنيه في غضون سنتين يعطونه الجنسية بكل سهوله ويسر او يفتح له مشروع تجاري ومن خلاله هم يكون مرشح لاكتساب الجنسية بعد سنتين طبعا انا اقصد عن كندا.

والانسان المفروض ما ينتظر الفرج من البشر عشان ينحل مشاكله وخلافه.

اتمنى من المسؤولين النظر بعين العطف لابنائنا المجهولين الهوية والمستقبل

[الزعفراني82]

الجنسيه مهب اي واحد ياخذها هناك وزارة داخليه هناك لجان هناك اجراءات كثيرة
اذا يستحق ينتظر
واذا يبي يروح يروح الله يحفظه ارض الله واسعه الي يبي يروح يروح
معلومه
اكثر الاجانب عندنا عايشين احسن عيشه من بلدهم الي هم منها
يعني الموطن والمقيم متساوين باشياء كثيرة

اخوي ما تظن فتره الي قضاها بالدوحه مب كافيه لاكتساب الجنسيه ؟
علا الاقل احسن من الي لا يعرفون شي من قطر و عاداتها و تقاليدها !!!!
بعض الناس لا يمرون لا علا الداخليه ولا باطنيه و حصلو و طبعا ما انكر ا الامر سيادي بس حرام تعلقون الناس بين السما و الارض
اغلبيه الوثائق اصحاب تجاره و وضعهم مادي جيد الي ممتاز فسواء اهني او هناك
ما تفرق عنده
شكرا علا مرورك

[الزعفراني82]

اتمنى تتعدل الاوضاع فعلا في القريب العاجل !
قل لي اخوي الزعفراني 82 كيف بيدبر رفيقك مليون دولار كندي ؟؟؟ اوضاعه كويسة ؟ عنده اسهم ؟ بيتسلف ؟؟؟؟؟ واذا صعبة يتزوج فهل يبقى اصحاب الوثيقة عزابية ؟؟ والا شيسوون؟

رفيجي راتبه الحالي 23 الف ريال قطري و لا عليه ايجار بيت او اقساط سياره
عنده اسهم و عنده الي يكفيه و اهله ما عليهم قصور
هو يقدر يتزوج الحين ولكن يفكر بالمستقبل ؟ ما يبغي عياله يكونون نفسه !!!!
اخوانه تزوجوا من وثائق قطريه و عيالهم بعد وثايق

[الزعفراني82]

شوف اخوي قول حق رفيجك يجوف له دبره و يروح كندا او اي دوله اجنبيه ثانية ياخذ له الجنسية من عندهم ويرجع وبيكون وضعه احسن من اي قطري .

اما بشان اكتساب الجنسية القطريه مافي قانون صريح وواضح بشان الاكتساب الجنسية لانه في الاخير يكون الامر سيادي ممكن ياخذ وممكن ما ياخذ .

اما عن الزواج اذا سافر اهناك وتزوج من الدوله المعنيه في غضون سنتين يعطونه الجنسية بكل سهوله ويسر او يفتح له مشروع تجاري ومن خلاله هم يكون مرشح لاكتساب الجنسية بعد سنتين طبعا انا اقصد عن كندا.

والانسان المفروض ما ينتظر الفرج من البشر عشان ينحل مشاكله وخلافه.

اتمنى من المسؤولين النظر بعين العطف لابنائنا المجهولين الهوية والمستقبل

شكرا علا مرورك و ارشاداتك ما قصرت

[الزعفراني82]

للاسف اخوي الزعفراني ان رفيقك نفس الوافد الاجنبي.

الوافد الاجنبي لانه مرتاح فالدوحة مايبي يتركها ولو ضروفة تغيرت راح يترك قطر ويرجع بلادة.

ورفيقك ماتحمل الوضع في قطر الي يعتبرها بلاده ولازم يستحمل الى ان يفرجها الله .ماقدر يتحمل العيشة هني ووده يهاجر كندا عشان يدور على حياة افضل هناك .

الوطنية وحب تراب الوطن مايبين في الرخاء لكن يبان في الشدة.

ااخوي رفيجي وضعه المادي زين و مرتاح وكل شي بالدوحه متوفر له ولكن الهدف من الهجره هو اكتساب الهويه لا اكثر ولا اقل

[الزعفراني82]

شر البليه مايضحك !!

مافيه قانون واضح القوانين هنا اهوائيه :rolleyes2:

في الأصل لماذا يعطى وثيقه لأجل غير مسمى ولماذا لايكون للوثيقه عمر افتراضي

يستحق حاملها اكتساب الجنسيه على الاقل لو يقدر بعشر سنوات لكي يكون هناك وضوح
ام جعلت الوثيقه كجرعه مهدئه الى شعار آخر !!

الزعفراني اعتقد ان من طلبات الهجره الى كندا فتح حساب ب25 الف دولار

الله يكون بعونهم ,,

اخوي اخوانه الي اكبر منه ب10 سنوات لين الحين ما حصلو و صار لهم اكثر من اربعين سنه ينتظرون و اعتقد نفس ما قلت الوثيقه مجرد مسكن للالام
اذا علا 25 الف دولار بسيطه و حتي 100 الف دولار بسيطه
شكرا علا مرورك

[غناتي1]

موضوع الجنسية 00 داومة بتعورون روسكم منها وما بتسلمون

دعوا الخلق للخالق وادعوا ان الله يفرجها

[القناص]

مافيه الا يروح لمكتب لوزير الداخلية
ويشرح له الوضع وممكن يكون معاه
أكثر من شخص عندهم نفس المشكلة
ويكتبون عريضة يشرحون فيه الوضع





للأسف الشديد ناس أتو قطر أمثال( سبيستان وفابيو وماركوني ) لا هم من دينا ولا يتكلمون لغتنا ولا يعرفون عادادتنا وبعد 3 سنوات الجوازمعاهم بحكم أنهم لاعبين فقط
وأشخاص من الأربعينات مايحملون الا وثائق قطرية وخدمو البلد وبعضهم ضحوا من أجل قطروعايشين كالأغراب

[الزعفراني82]

مافيه الا يروح لمكتب لوزير الداخلية
ويشرح له الوضع وممكن يكون معاه
أكثر من شخص عندهم نفس المشكلة
ويكتبون عريضة يشرحون فيه الوضع





للأسف الشديد ناس أتو قطر أمثال( سبيستان وفابيو وماركوني ) لا هم من دينا ولا يتكلمون لغتنا ولا يعرفون عادادتنا وبعد 3 سنوات الجوازمعاهم بحكم أنهم لاعبين فقط
وأشخاص من الأربعينات مايحملون الا وثائق قطرية وخدمو البلد وبعضهم ضحوا من أجل قطروعايشين كالأغراب

اخوي العزيز

بعض من اصحاب الوثائق القطريه راحو عند الوزير الداخليه و قال لهم ان هم من اهل قطر و الخ الخ الخ
ولكن حتي الان ولا تغير شي !!!!!!

تيتي تيتي نفس ما رحتي جيتي !!!!!!.

[رحال]

أخي العزيز الزعفراني ...

والله أني أراك أسم على مسمى ... ودائما أتعجب

من مواضيعك وردودك وطرح مواضيعك ...

وهذا الموضوع جميل وحساس يضيف الى

منتدانا ثراء على ثراءه !!!

أتمنى من العلي القدير أن يرفع درجتكم في

الدارين ... وأن تحل مشكلة قطريين الأربعينات

والخمسينات والستينات !!!

والنيات لا يعلمها الا الله سبحانه وتعالى !!!

وتقبل خالص شكري وتقديري !!!

[almulla]

مقااال جميل جدا

ولازم يشوفون حل ويدرسون دراسة كاملة لهذه القضية ولو تبي الصج الجواز القطري الحين مايسوى شي

يعطونه للي مايسوى واللي يسوى يمنعونه عنه وبعدين الوظايف وكل شي موجود لغير القطريين قبل القطريين

وخل يشد حيله وياخذ الجواز الكندي والله يعيش هني شيخ ويحطونه فوق روسهم لانه كندي ووراه حكومته

[almulla]

رفيجي راتبه الحالي 23 الف ريال قطري و لا عليه ايجار بيت او اقساط سياره
عنده اسهم و عنده الي يكفيه و اهله ما عليهم قصور
هو يقدر يتزوج الحين ولكن يفكر بالمستقبل ؟ ما يبغي عياله يكونون نفسه !!!!
اخوانه تزوجوا من وثائق قطريه و عيالهم بعد وثايق

اذا على الهوية والله يعيش بوثيقة قطرية افضل له من انه يقسم بالولاء لدولة اجنبية ماعاش فيها ولا يوم

[THE PILOT]

الهجرة مالها خص في الوطنيه يا جماعه متى بتفهمون هل الشي عندنا عقول قطرية مهجرة من زمان قولوا ...ما عندهم وطنية بعد...عطوهم حقهم بدال ..ماتيبون أجانب .

[الزعفراني82]

أخي العزيز الزعفراني ...

والله أني أراك أسم على مسمى ... ودائما أتعجب

من مواضيعك وردودك وطرح مواضيعك ...

وهذا الموضوع جميل وحساس يضيف الى

منتدانا ثراء على ثراءه !!!

أتمنى من العلي القدير أن يرفع درجتكم في

الدارين ... وأن تحل مشكلة قطريين الأربعينات

والخمسينات والستينات !!!

والنيات لا يعلمها الا الله سبحانه وتعالى !!!

وتقبل خالص شكري وتقديري !!!


ما اعرف شاقولك ياخوي رحال اخجلتني :shy::shy::shy:
شكرا علا مرورك و انشالله خير ياخوي بس اتمني اي شخص يقدر ولو يقدر يوصل موضوعهم للمسئولين المختصين
مره اخري شكرا علا كلامك العذب

[الزعفراني82]

الهجرة مالها خص في الوطنيه يا جماعه متى بتفهمون هل الشي عندنا عقول قطرية مهجرة من زمان قولوا ...ما عندهم وطنية بعد...عطوهم حقهم بدال ..ماتيبون أجانب .


كلامك صحيح :nice::nice::victory:

[الزعفراني82]

مقااال جميل جدا

ولازم يشوفون حل ويدرسون دراسة كاملة لهذه القضية ولو تبي الصج الجواز القطري الحين مايسوى شي

يعطونه للي مايسوى واللي يسوى يمنعونه عنه وبعدين الوظايف وكل شي موجود لغير القطريين قبل القطريين

وخل يشد حيله وياخذ الجواز الكندي والله يعيش هني شيخ ويحطونه فوق روسهم لانه كندي ووراه حكومته

ياخوي الملا والله اذا حصل رفيجي اي جنسيه صدقني بيرجع الدوحه
عمامه و خواله و اهله كلهم يحملون جنسيات قطريه و هو انسان ملتزم يخاف يربي عياله في بيئه غربيه غير مسلمه بس شيسوي مجبور علا هالشي

[فراغ]

لا حول ولا قوة الا بالله
والله أخوي فيه ناس وايد يستحقون الجنسيه
لو كنت مسئول تشان عطيتهم من بكرة لجنسية
على الأقل هم أولى بها من كثير من الناس
لو أنا من صديقك تشان لعبت كوره وحصلتها بدون تعب
لكن تعال
خله يعلم عياله الكوره ترى فيها الجنسية

[الساهرة]

محد يحب ينجرح ومحد يحب الجروح ** الا جرحك ياوطن عندي من اغلى الجروح


الله يفرج كربتكم يارب العالمين والله انه انتم احق من غيركم في هالبلد
على الاقل تعرفون تتكلمين بالسان عربي مواليد هالبلد اب عن جد مب لعيبة كوره
مايعرفون في قطر الا اسم النادي اللي تبناكم وعطاكم العنابي بكل امتيازاته

ان شاءالله تعالى نسمع اخبار طيبه عن مكرمه من ابونا ابو مشعل اتحل مشكلتكم .





الساهره

[الزعفراني82]

لا حول ولا قوة الا بالله
والله أخوي فيه ناس وايد يستحقون الجنسيه
لو كنت مسئول تشان عطيتهم من بكرة لجنسية
على الأقل هم أولى بها من كثير من الناس
لو أنا من صديقك تشان لعبت كوره وحصلتها بدون تعب
لكن تعال
خله يعلم عياله الكوره ترى فيها الجنسية

اخوي خلاص شيب و صار عمره 28 سنه و غيره بحالته وصلوا الاربعين سنه
ولكن ماميش اي فايده

[hamoor4ever]

والله صاج يالزعفراني هالشخص يستاهل الجنسيه بجداره

[aabdulla1]

بلادي وإن جارت عليً عزيزة وأهلي وإن ضنوا كرام

شخصياً ما أنصح أخونا بالهجرة ... أنا درست في ها البلاد لفترة طويلة وشفت فيها ناس من البدون والقطريين (من عوايل معروفة) وكانوا يشتغلون في هالبلدان و في البداية ما صدقت إنه في قطري يشتغل برع بلاده لكن الدنيا غدارة وكل وحد له ظروفه. وأغلبهم يتمنى يرجع البلد وعلى لسان واحد منهم (كفاية إني اسمع الأذان كل يوم). هذا رأي شخصي والقرار طبعاً للشخص نفسه وأنا ما أقدر احط نفسي مكانه.

إن الله مع الصابرين

ضاقت ثم ضاقت فلما استحكمت حلقاتها فرجت وكنت تحسبها لا تفرج.

[الزعفراني82]

والله صاج يالزعفراني هالشخص يستاهل الجنسيه بجداره

اخوي هو يبغون يعرفون فقط هل بيعطونهم ولا ما راح يعطونهم سواء كانوا يستحقون او لا ؟

اغلبيه اصحاب الوثائق لا في سما ولا في ارض

نرجو بتحديد مصيرهم باقرب فرصه ممكنه

[الزعفراني82]

بلادي وإن جارت عليً عزيزة وأهلي وإن ضنوا كرام

شخصياً ما أنصح أخونا بالهجرة ... أنا درست في ها البلاد لفترة طويلة وشفت فيها ناس من البدون والقطريين (من عوايل معروفة) وكانوا يشتغلون في هالبلدان و في البداية ما صدقت إنه في قطري يشتغل برع بلاده لكن الدنيا غدارة وكل وحد له ظروفه. وأغلبهم يتمنى يرجع البلد وعلى لسان واحد منهم (كفاية إني اسمع الأذان كل يوم). هذا رأي شخصي والقرار طبعاً للشخص نفسه وأنا ما أقدر احط نفسي مكانه.

إن الله مع الصابرين

ضاقت ثم ضاقت فلما استحكمت حلقاتها فرجت وكنت تحسبها لا تفرج.

اخوي في جميع البلدان غير اسلاميه هناك مساجد وجاليات اسلاميه
بالاخير اعيد و اكرر الهدف من الهجره هو اكتساب هويه لا اقل ولا اكثر
الرواتب و الفلوس و العائد المادي في الدوحه من افضل الاماكن بالعالم
لكن الفلوس موجوده و الهويه مفقوده

[الوعد2016]

الله كريييييييييييييييييييييم

[وحيد-الشوق]

ليش الظلم الحين الافارقه ولعيبه الكورة وكاظم الساهر يستحقون الجنسية ؟ :anger1:

وينهم عن الشعب ليش مايشوفون اصحاب الوثائق ولا الي عايشين اكثر من 30 سنة ومولودين في قطر ومايعرفون بلاد غيرها لكن شنقول الشكوى لغير الله مذله

الله يفرج كربتكم ويهونها عليكم يارب

[الزعفراني82]

ليش الظلم الحين الافارقه ولعيبه الكورة وكاظم الساهر يستحقون الجنسية ؟ :anger1:

وينهم عن الشعب ليش مايشوفون اصحاب الوثائق ولا الي عايشين اكثر من 30 سنة ومولودين في قطر ومايعرفون بلاد غيرها لكن شنقول الشكوى لغير الله مذله

الله يفرج كربتكم ويهونها عليكم يارب

مب شغلنا الحكومه تعطي حق من او تاخذ من من ؟ لكن الحين نبغي نعرف شنو مصير هالناس ؟

بيعطونهم او لا ؟ عشان يعرفون شيسوون في بقيه حياتهم !!!

[mosahm]

ياحبي لقبايل قطر العربية

[مليت]

قوله يقولك مليت شد الرحال ودرب عمك ادله

وحاول قدر المستطاع انك تساعده

[Riku3]

الله يكون في عونه .. بس ما اعتقد المشكلة بهذا السوء ان يهاجر من البلد دام انه مرتاح مادياً واخوانه واهله حوله !! .. ياخي اعرف ناس عندهم وثائق وحالتهم سيئة جداً ومع هذا متزوجين ولله الحمد وعايشين بإلي عطاهم اياه رب العالمين وراضين وناطرين الفرج من الله .

فالمفروض ماييأس بسهولة من امور صغيرة دام الله معطيه الصحة والعافية والمال والاهل .

بس تصدق في شي حز في خاطري من فترة مع واحد من الربع وهو من حملة الوثيقة ! .. تصدق يوم بغى يشتغل في "حماية" جاله رفض من الداخلية مثله مثل اي اجنبي مع ان الراتب حول الـ 5,000 ... ولما بغى يتزوج من ايرانيه طالبوه انه يقدم طلب موافقة من الدولة لانه بيتزوج اجنبيه !!!!!!! .. لاحول ولاقوة الا بالله .. ازدواجية >_< .

[bohilal191]

مافي حد ماعنده اصل ياجماعة واحد من الربع توه محصل الجنسية وكانت عنده وثيقة قطرية هو واهله وكلهم مواليد قطر بس بشرط لازم يعدلون وضعهم،،وصج عدلوا وضعهم وطلعوا جوازات ايرانية وعطوهم جوازات قطرية يعني اقدروا يعدلون وضعهم وبنفسهم قالوا ان ماعندنا هوية،،،على العموم الله يفرجها على رفيجك،،،وعلى فكرة انا مب قطري بس امي قطرية ابا عن جد وكل اللي نطلبه الجنسية والضمان الوظيفي بس ،،،مانبي لا أرض ولا قرض والله يطول بعمر اميرنا

[bohilal191]

تعقيبا على كلام اخي ابوعمر,اذكر كان لي صديق عزيز ايام الدراسة وكان يحمل وثيقة قطرية وكان هو ووالده من مواليد قطر ,وعند ما يساله احد عن جنسيته ارى مسحة حزن على وجهه,فسالته مرة انتم اصلا جئتم من اي بلد فيقول من السعودية وتحديدا نجد...المهم بمرور الوقت دخل صديقي الشرطة وعمل شيء يستحق عليه انهاء الخدمات والابعاد...لكن المشكلة ما الدولة التي ستقبل به,,,وظل فترة طويلة في السجن لحين ايجاد دولة تقبل به,,وعندما الامر طال وصديقي مل من السجن واهله يتقطع قلبهم على ولدهم .ذهب ابوه لسفارة ايران بالدوحة وطلب استرداد جنسيته الايرانية الاصلية,واستخرج لصديقي الجواز الايراني وتم ابعاده لايران وعايش الان مبسوط جدا ويقول عشنا في وهم استمر عشرات السنين على امل الحصول على الجنسية القطرية انكرنا اصلنا وحتى غيرنا اسماء عائلاتنا في سبيل الحصول عليها ,لكني احمد ربي الان انني في ايران..
فما رايكم بقصة صديقي؟

يعني يبي الجنسية ومع ذلك انكر اصله وفي النهاية رجع لأصله ،،هذا سبب عدم منح الجنسية القطرية انكار الاصل،،،بالتوفيق للجميع

[الزعفراني82]

مافي حد ماعنده اصل ياجماعة واحد من الربع توه محصل الجنسية وكانت عنده وثيقة قطرية هو واهله وكلهم مواليد قطر بس بشرط لازم يعدلون وضعهم،،وصج عدلوا وضعهم وطلعوا جوازات ايرانية وعطوهم جوازات قطرية يعني اقدروا يعدلون وضعهم وبنفسهم قالوا ان ماعندنا هوية،،،على العموم الله يفرجها على رفيجك،،،وعلى فكرة انا مب قطري بس امي قطرية ابا عن جد وكل اللي نطلبه الجنسية والضمان الوظيفي بس ،،،مانبي لا أرض ولا قرض والله يطول بعمر اميرنا

انشالله ترزقون ما تستحقون

[الزعفراني82]

الله يكون في عونه .. بس ما اعتقد المشكلة بهذا السوء ان يهاجر من البلد دام انه مرتاح مادياً واخوانه واهله حوله !! .. ياخي اعرف ناس عندهم وثائق وحالتهم سيئة جداً ومع هذا متزوجين ولله الحمد وعايشين بإلي عطاهم اياه رب العالمين وراضين وناطرين الفرج من الله .

فالمفروض ماييأس بسهولة من امور صغيرة دام الله معطيه الصحة والعافية والمال والاهل .

بس تصدق في شي حز في خاطري من فترة مع واحد من الربع وهو من حملة الوثيقة ! .. تصدق يوم بغى يشتغل في "حماية" جاله رفض من الداخلية مثله مثل اي اجنبي مع ان الراتب حول الـ 5,000 ... ولما بغى يتزوج من ايرانيه طالبوه انه يقدم طلب موافقة من الدولة لانه بيتزوج اجنبيه !!!!!!! .. لاحول ولاقوة الا بالله .. ازدواجية >_< .

كلامك صحيح رفيجي هاي مشكلته الازدواجيه
يوم يقولون له انت ايراني يوم يقولون انت قطري علا حسب مرادهم و كيفهم
الوثيقه في الاصل مجرد مسكن مب علاج

[عنابي 2010]

القطرين ماحصلو بيوت والا ارضي مثلهم مثل رفيجك .الوضيف بالوسطه .والله لورفيجك يروح كندي وياخذ الجنسيه ويعود اسهل من الجنسيه القطريه
فيه ناس ولدو وماتو في الدوحه وماخذو الجنسيه وناس العبو مباره او كانوا احتياط واخذوالجنسيه

[الوجبه]

حتي لو اصوله ايرانيه !!!!

اغلبيه العظمي من اهالي قطر اصولهم من ايران ( سواء كانوا عرب او عجم او هوله )
من تجار معروفين الي اطباء و مهندسين و موظفين و
ثاني شي ياخوي الدوله الفارسيه كانت مهيمنه تاريخيا علا كل منطقه الخليج حتي اسم الرسمي للخليج المعترف فيه في الامم المتحده و جميع دول العالم هو الخليج الفارسي persian gulf و الي تقول اصولهم ايرانيه هم اقرب من اي فرد اخر الي عادات و تقاليد البلد حتي من بعض العرب انفسهم و دوله قطر كانت ولا زالت وطن لاكثر من عرق و اصل و مذهب
ثاني شي لا يمتلك اي شي تبثت هويته الايرانيه و قلت لك من قبل هالشي .
مره جايه بنجيب لك اصحاب وثائق سفر من الصين و اوروبا عشان يطالبون بالجواز بس عشان ترضي علينا يا ابو عمر و ثاني شي ما رديت علا سوالي !!!! منتظر ردك يا اخي المسلم


................

.. يا االزعفراني .. اركد وعين خير .. هذا كلامك وجاي انت ورفيجك تطلبون الجواز .. لا اتعرف بتاريخ قطر ولا والقبائل

وادافع عن ايران .. كنك تقول احمدو ربك ي ااهل قطر التجار كلهم ايرانيين واكلكم وشربكم منهم .. اعتقد وجهه نظر الحكومه

صايبه يوم انها تخليكم على الوثائق .. لا خيركم ولا كفايه شركم

[الزعفراني82]

................

.. يا االزعفراني .. اركد وعين خير .. هذا كلامك وجاي انت ورفيجك تطلبون الجواز .. لا اتعرف بتاريخ قطر ولا والقبائل

وادافع عن ايران .. كنك تقول احمدو ربك ي ااهل قطر التجار كلهم ايرانيين واكلكم وشربكم منهم .. اعتقد وجهه نظر الحكومه

صايبه يوم انها تخليكم على الوثائق .. لا خيركم ولا كفايه شركم

اخوي الوجبه انت مرفوع عنك القلم و انت معروف بالمنتدي اصلا انت اخر واحد انا اتمني انه حتي يشارك
انا ما قلت كل تجار قطر ايرانيين و لكن هم نسبه و نسبه مب قليله و هذا الواقع و الحقيقه سواء تعجبك او تعجب غيرك او لا و بالاخير هذا الواقع يا الوجبه

و اعتقد مسئله وثائق القطريه صارت مسئله لازم جهات المختصه تشوف لها حل
نفس مسئله شوارع الدوحه المكسره و الباهته

علا العموم بقولك شوف الواقع و شوف التاريخ الي اكيد انت ما راح تعجبك بحكم انك (لا تعليق)

[الوجبه]

انت ذكرت كلام واضح وفيه اساءه لتاريخ قطر ولغيت 90% من قبائل قطر .. واذا احد من الموجودين فوتها لك

انا ما اعدي هذي الامور بسهوله ..

وكل كلمه الواحد يكتبها يحاسب عليها ولا هو كلام وبس .. وانت عارف هذا منتدى يشاهده

الكبير والصغير والجاهل والمتعلم .. اما انك جالس (تفتي) ان شعب قطر معظمهم (ايرانيين )

وتلغى كل قبائل قطر .. فهنا حدك .. والتجار اللي في قطر اللي تقول عنهم ايرانيين ما يجون

نسبتهم صفر بالميه من تجار قطر .. بس انت جالس اتفخم واتضخم في (ايران) لك فتره

وانا اتمنى من اداره المنتدى الانتباه او التنبيه للزعفراني بعدم تكرار هذا الكلام ..

واترك عنك معروف وغيره وخلك في صلب الموضوع ..


وبعدين التاريخ اللي ما راح يعجبك مش تعجبك ..

وتبون الجواز

واحترم البلد اللي انتي فيها (كاتب الدوحه دوخه ) الله يهديك بس

[الزعفراني82]

انت ذكرت كلام واضح وفيه اساءه لتاريخ قطر ولغيت 90% من قبائل قطر .. واذا احد من الموجودين فوتها لك

انا ما اعدي هذي الامور بسهوله ..

وكل كلمه الواحد يكتبها يحاسب عليها ولا هو كلام وبس .. وانت عارف هذا منتدى يشاهده

الكبير والصغير والجاهل والمتعلم .. اما انك جالس (تفتي) ان شعب قطر معظمهم (ايرانيين )

وتلغى كل قبائل قطر .. فهنا حدك .. والتجار اللي في قطر اللي تقول عنهم ايرانيين ما يجون

نسبتهم صفر بالميه من تجار قطر .. بس انت جالس اتفخم واتضخم في (ايران) لك فتره

وانا اتمنى من اداره المنتدى الانتباه او التنبيه للزعفراني بعدم تكرار هذا الكلام ..

واترك عنك معروف وغيره وخلك في صلب الموضوع ..


وبعدين التاريخ اللي ما راح يعجبك مش تعجبك ..

وتبون الجواز

واحترم البلد اللي انتي فيها (كاتب الدوحه دوخه ) الله يهديك بس

لا ياخوي انا لأ اساءت و بالعكس انت قاعد تحاول تزرع الفتنه و هذا ي مب غريب عليك
و خلاص انا بكتب ان اغلبيه العظمي من التجار من موزمبيق عشان حضرتك ترضي علي
و ابغي اعرف اشلون ما راح تعدي هالامور علي بسهوله يعني ايش بتسوي مثلا !!!!
و انا ما فخمت او ضخمت في ايران بس كل واحد لازم يعرف الي له و الي عليه

و الدوحه دوخه نعم و الكل عارف هالشي و عارف ليش الدوحه صارت تدوخ الي عايش فيها بس يمكن انت عايش بغرفتك و ما تطلع من البيت .

[الثاقب]

اخوي الوجبه انت مرفوع عنك القلم و انت معروف بالمنتدي اصلا انت اخر واحد انا اتمني انه حتي يشارك
انا ما قلت كل تجار قطر ايرانيين و لكن هم نسبه و نسبه مب قليله و هذا الواقع و الحقيقه سواء تعجبك او تعجب غيرك او لا و بالاخير هذا الواقع يا الوجبه

و اعتقد مسئله وثائق القطريه صارت مسئله لازم جهات المختصه تشوف لها حل
نفس مسئله شوارع الدوحه المكسره و الباهته

علا العموم بقولك شوف الواقع و شوف التاريخ الي اكيد انت ما راح تعجبك بحكم انك (لا تعليق)

هذا الي خايفه منه الدوله مهما اتقدم لهم ايظل الولاء لدوله ثانيه وسرعان ماينقلبون عليك