ماذا يعني ( الموعد ) بالنسبة لك ؟

[Chambray]

الموعد هو الموعد ، مثلاً رحت تبي تقابل دكتور ، قالولك موعدك الساعة 6 المغرب ، تروح 5:45 دقيقه ، وتدخل عليه 6 بالضبط او بالكثير 6:05

لكن في قطر

تروح 5:45 على امل مقابله الدكتور في الموعد المتفق عليه ، تتفاجئ إنك تدخل على الدكتور الساعه 7 مساءً !!


انا في الغربه عرفت قيمة الموعد وقيمة الدقيقه والثانية وصرت احترم الموعد لأبعد درجة واحط احتمالات قبل لا اطلع ومنها احتمالات الزحمه وخلافه !!.
في أوروبا إن حد عطاك كلمة فهي مسمار في لوح ، يقولك انا اجيك 6 مساءً ، يجيك قبلها ب 5 دقايق .. او تحصله ينتظر في الخارج حتى تصبح الساعة 6 ويطق الباب عليك .. وإذا تأخر يتأخر 5 او 10 دقائق بالكثير .. ويعتذر منك جداً على تأخيره ..



هنا في قطر للاسف مافي مصداقية للمواعيد ، لا من مواطن ولا من مقيم !

باعطيكم كذا مثال صار لي ..
اتصلت للكهربجي عندي بعض الليتات محتاجه تركيب ، قالي باجيك الساعة 9 الصبح ، ماشفته إلا الساعة 7 ونص في الليل !!

مكيف غرفتي اخترب مادري شسالفته يطلع لي هوا حار ، اتصلت بشركة سامسونغ اخذ موعد من عندهم ، قالولي الثلاثاء بعد الفطور ، قلت اوكي ، وانا متصل لهم يوم السبت ، يعني مستحمل علشان احترمت الموعد . لكن امس للاسف محد جاني حتى الساعة 10 وانا انتظر ويوم اتصل لهم عطوني رقم الفني ، ويوم اتصلت له قالي عندي شغل واجد وماقدر اجيك اليوم :anger1: يعني انتظر وانتظر وآخر شئ يقولي ماقدر أجي !؟ عطاني موعد ثاني اليوم وبنشوف يا انا ياهم :anger1:

بنك قطر الوطني ، رحت لهم علشان اجدد بطاقة الفيزا ، عطوني مهله 5 ايام لين تنتهي البطاقة ، اليوم هو اليوم السابع او الثامن ولا شفت البطاقة ! والمشكلة اني مسافر اول الاسبوع الجاي ، وهذي المرة الثانية الي تصير فيني ، اسافر قبل لا استلم البطاقة :anger1:

ياجماعة انا الاحظ ان الناس هنا ماديين اكثر من احترامهم للناس والمواعيد
يعني الدكتور تحصله يدخل عليه 40 مريض في اليوم ويخلصه بسرعه علشان يلحق على الي بعده ، وهو في الاساس لازم وقت معين للدكتور يقعده مع المريض ويعرف ايش فيه ومافيه .. مب يخلص شغله بسرعه علشان الي بعده .
وحتى التجار ، يضغط عمرة علشان يحاول يخلص اكثر من زبون في نفس اللحظة وهو مايعرف ان في زحمه طريق وناس عندها التزامات !!

وضربت امثله كثيرة في هذا الخصوص ، إذا واحد في قطر قالك اجيك الساعة 10 مثلاً ، تقوله مواعيد عرب ولا انجليز هههههههههههههه
وهذا ان دل فيدل على ان العرب متعودين على اللامبالاه في المواعيد .. للاسف !!


السؤال الآن موجه لكم :
ماذا يعني لكم الالتزام بالمواعيد ؟؟؟؟؟؟

[اهل قطر]

انا مثلك اخوي منصدمه بعدم التزام الناس بمواعيدهم
بالنسبه لي لو عندي موعد 6 اطلع من البيت الساعه خمس ونصف واكون من قبل متاكده اني ادل العنوان لو ما كنت ادله اروح قبلها بيوم ادل العنوان علشان ما اتاخر
طبعا مع ان الاغلب ما يحترم الوقت بس عن نفسي انا اعتبر احتراامي للوقت جزء من شخصيتي ومن الاحترام الي افرضه على الناس من انا ومن اكون
في الغرب كل دقيقه لها قيمه في حين عندنا الساعات لا قيمة لها
شوف اخوي
للاسف محد يهتم
حتى الزبون اصلا محد عليه منه لان الزبون لو راح بيجي غيره وما عندنا حقوق للمستهلك

غير كذا لا تتنتظر معاملتك تخلص بروحها تحتاج بطاريه فوقها مندوب يتابعها
اذكر كانت عندي معامله في جهه حكوميه لا الا لي لين الحين لها سنه
لاعت كبدي حتى يئست منها
وكل شيء حط مندوب وادفع والا مافيه قطري يروح بروحه
مرات كثيره اسمعم يقولون ليه جايه ارسلي مندوب
ما تعودنا ,,
لين متى يا بلادي

ما حك ظهرك الا ضفرك

[Riku3]

والله معاكم حق .. انا بنفسي صرت ازيد نصف ساعة لمواعيد ربعي ! .. فلما يقولي بنمر عليك 7 .. يعني 7 ونص وطالع للاسف!! ..

حتى مره عصبت على شباب عزمتهم عندي للعشاء الساعه 9 وماوصلوا الا 10 وممكن انت تتخيل الاحراج وانا جالس انتظرهم بعد كل الاكل الي جهزته لهم.. ومن يومها والله ماعجمتهم بالبيت عندي لهذا السبب.

للاسف هذي الحاله صارت عند الكل .. وصرنا لما نوصل بالموعد الكل يستغرب لدرجة ان ممكن يقولك ليش مبكر ~_~ ..

فالالتزام بالمواعيد هو احترام للنفس وللطرف الاخر .. وامانه لازم نحافظ عليها.

[ضوى]

الموعد ايا كان احترمه جدا واحترم الشخص اللي مواعدته ، من هالناحية وايد ملتزمة بشكل مشرف الصراحة

[بلاهويـــــة]

حتى في أوروبا مب كلهم ملتزمين بالمواعيد

أنا كان عندي موعد في إحدى المستشفيات بلندن كان موعدي 1 ما دخلت عليه إلا 1:30 ياريت كان عنده مريض طالع حديقة المستشفى يدخن

الإلتزام بالمواعيد يعتمد على الشخص نفسه مب على الجنسية

[ذيبه مزاجيه]

اي و الله يعتمد على الشخص لا الجنسيه @_@

انا عن نفسي احترم المواعيد .. الا احيانا اذا صادتني ظروف تحدني اعتذر عن اي موعد و لا اخلي الواحد معلق .. والاعتراف بالحق فضيله لو تاخرت اعتذر بشده عن التاخير و الاكيد انه يكون غير مقصود @_@

وتحياتي للجميع

[وحيد-الشوق]

انا عن نفسي احترم المواعيد الا اذا حصل ظرف خارج عن ارادتي

اكره شيء عندي مواعيد المستشفى الموعد الساعة 8 تدخل الساعة 9 او 10 ليش مادري :eek5:

والي يقهرني اكثر الي يتأخر عن موعده ومايعتذر والي يرفع الضغط اكثر مثلا واحد من الربع يقولك مر علي الساعة 7 او بمر عليك في هالوقت مثلا وعقب تتصله مايرد عليك او مسكر جواله :anger1:

يعطيك العافية كعادتك متميز في الطرح اخوي جاسم :nice:

[almulla]

انا عن نفسي احترم المواعيد الا لو كان عندي شغلتين

[غيمة مطر]

انا عن نفسي احترم مواعيدي ... الا اذا طرا ظرف قاهر فاني اعتذر ..

لكن اتوقع عدم المبالاه بقيمه الوقت هي السبب

فالاغلبيه عاشو في بيئه ماتعرف قيمة الوقت .. فتلقاه يصحى باي وقت وينام باي وقت .. وماعنده اي تنظيم في حياته ...

اما اللي يقدر الوقت من صغره يعرف اهميته له وللغير ...

شكرا على الطرح المميز

[أمة الله]

اي والله صااادق....هالجمله لازم تنقال للتأكيد (( مواعيد عرب والا انقليز ))

[امل الحب]

هالشي يرجع حق نظرة الشخص ..

يعني في اجانب وايد مواعيدهم :secret: لاتعليق يقولك بعد 5 دقايق تحسبها تلقاها ساعة وزود:eek5:..

نحترم المواعيد لان لو ماحترمناها ضاع اليوم كامل وتاجل الشغل :)

[WIFE]

اهلين
احترام المواعيد شي مهم , لكن اللي يزعل انك مثلا لو متواعد مع شخص بوقت محدد و العوزه له تلقاه واقف ينتظرك من قبل الموعد...لكن لو العوزه لك ...هااااه انتظر لين يفضى و يجيك.
انا ضد المعاملة بالمثل لكن بعض الناس يضطرونك انك تغير من طبعك لو شوي عشان تذوقهم من نفس الكاس ، يعني امس انتظرته ساعه واليوم لكم لقاء ثاني خله ينتظرك انت و شوف رد الفعل بيزعل معناته يدري ان التأخير شي يضايق ...و اذا ما زعل !! عانك الله ع طبعه

و تحياتي

[Bu Rashid]

والله كلامك صج.. يعطيك العافيه..
والي زاد الطين بله الزحمه...خبرك صار عندهم عذررررررررررر...

[relaax]

احترام المواعيد دليل انك شخص منضبط ومسئول

واللي حاصل عندنا عجيب وغريب

مثل الحالات اللي ذكرتها وايد وغيرها

اعتقد من اسبابها عدم الانضباط والشخص عارف انك بتنتظره غصب عليك حاجتك عنده

ولو هو يدري ان في بديل ما تأخر

اما بالنسبة للمستشفى في الخارج لو تأخرت عليه 5 دقايق يروح موعدك ويكون في عدد معين من المرضى وكل مريض يخصص له وقت ... وللدكتور وقت فترة استراحته
وهنيه يصيخ بك المرار وتنتظر الدكتور وبها تدخل وما تدخل غير انهم يدخلون اللي بدون موعد

[عذوبـة قلم]

.♦. ♠ .♦
:
♥
:

أسعد الله مسائكم بكل خيـر ..


لن أضيف الكثير على كلمات وخطوط أخواني الكرام ..

فقد شملت تعليقاتهم .. كل الزوايا .. والأمثله المتاحه للذكر ..


كل شيء تعلمته من والدي .. فهو من علمني فن الإتكيت .. واحترام المواعيد ..

وهذا ماتعلمه والدي من غربته .. مثلك تماماً أخي الكريم ..


لم يراودني سؤال المواعيد كما راودكم .. بل ما لفت إنتباهي هو ....

لما تعلمت أنت .. ووالدي .. وغيركم .. إحترام المواعيد من الغربـة .. ومن موطن الأجانب


لما لم تنبع هذه المحاور وهذا الحرص من العرب ..

ولما دائما يُطلقون جملة .. " مواعيد عرب ولا أنقليز "

كما ذكرت محبوبتي في الله .. أمة الله ..


ان كان كل عضو .. في رده هنا .. أجاب بـ "نعم ألتزم بالموعد" .. فأين تلك الفئه التي لا تلتزم بالمواعيد؟


ماجذبني لموضوعكـ .. وللأمانه هو عنوانكـ .. ماذا يعني ( الموعد ) بالنسبة لك ؟

الموعد .. يعني لي جزء من وقتي .. سيملكه غيري ..

الموعد .. لقاء مع وجهه .. أو قدر .. أو مصير ..

الموعد .. بداية ألم .. أو نهاية حزن ..

الموعد ليس موعد عيادة .. أو جلسه .. أو محاظرة فقط ..


فالموعد بالنسبة لي .. موعدي مع سريري كل يوم ..

موعدي مع ذكرياتي ..

موعدي مع قلمي .. ريشتي .. وأوراقي ..

موعدي مع قدري .. وحلمي .. ويقظتي ..



أخي في الله .. جاسم البدر

لا أخفي عليك .. أستمتعت كثيرا بالرد عليك ..

وسُعدت لما قرأت .. هنـ ـا ..

وصرخات قلم .. من اجل الحرص على كلمة موعد ..


فلكـ مني جزيل الشكر والتقدير .. وتقبل تحيات ريشة قلمي

:
♥
:
.. ع ـذوبـة الـ ق ـلم ..
.♣.

[الراقية]

اولا السلام عليكم ***ومبارك عليك الشهر والعيد... مره وحدة والله يتقبل منا ومنك صالح الاعمال


ماذا يعني لكم الالتزام بالمواعيد ؟؟؟؟؟؟

الموعد بالنسبة لي حياة أو موت :waiting:


انا ايضا علمتني الغربة احترام المواعيد وان احترام المواعيد هو احترام للشخص بحد ذاته


ولكن :anger1:

في قطر سلم لي على المواعيد :anger1:

اخرها بشهر رمضان :swoon:


عندي اجتماعات مسائية

وبيتي باخر الشمال والاجتماعات باخر الجنوب اجتماعاتي المفروض الساعة 9 مساء

تخيل صلاة التراويح اصلي العشاء على أمل ان ارجع لتكملة الصلاة ...وترك الاهل بهالفترة المهمة بالنسبة لي

وخروجي من البيت بوقت قد يكون اذا ما ابالغ 8


واوصل قبل الموعد ب على الاقل 10 دقائق

اتفاجئ محد موجود غير السكرتير والفراش

المسئولين لم يحضر احد

شوف الاعذار :

زحمة ( ماعنده فكرة ان قطر فيها زحمة والمفروض يطلع من وقت)
راحت علي نومة بعد الفطور قلت ( بغط شوي ومادري ايش صار فيني ( مافية اختراع اسمه منبه )
راسي يعورني ولازم اشيش...امر الشيشة ( يكلم اللي احذاه يعني انا صمخه )
مريض مزكم ومسخن ومن يدخل يصرخ على الفراش هات وهات ( شاي قهوة نسكافية زعتر ينسون يتذكرون ؟؟؟حركات انه :anger1:

تدري في هاللحظات اموت 100 مرة قهر وودي اقلب المكتب عليه ولولا العمل الزامي كان رويته

لكن بعدها بكذا اجتماع لاحظ :omg:

طلعوا بختراع جديد اسمه 9.30 قلت اوه زين شكلهم :rolleyes2:حطوا حق نفسهم ايجابيات وسلبيات واحترموا الوقت المهم لقيت الوضع على ماهو علية


صرت اطلع من البيت 9 بعد

ما .....:victory:

اصلي ...واشرب كرك ..واهذر شوي مع اخواني وخواتي وعيالهم وخداماتهم

بعدها اطلع واسوق وانا اسمع ( سوق على مهلك سوق بكرة الدنيا تروق )

القاهم اتصالات وينج عسى ماشر ننتظرج :rolleyes2:حلوة قلت العب لهم على نفس الحبل

بس حبلي صادق بيتي في اخر الشمال وسلم لي على الجنوب

ومن ما يحترم مواعيدي.... ابدا لا اعمل لمواعيده اي تقدير

ودمت بود اخي العزيز

[الامل القديم]

بالنسبه لي خسرت صديقه علشان ما التزمت معي بالموعد

انا عقلي جدا صعب بالنسبه للمواعيد

[اعالي الجنان]

سم ضروسي اللي مايلتزم بالموعد
اي حد يعطيني وقت احب انه يلتزم فيه مب اروح وبالاخير انطر بدال الخمس دقايق ساعه

عن نفسي دقيقه بالمواعيد اقول الساعه الفلانيه امشي عليها اله اذا اضطرتني الظروف اني اتأخر
في هالحال اتصل واقول اني بتأخر