كسرت خاطري صرااااااحه....وين الحل..!!!!

[ذوق]

السلام عليكم ورحمة الله وبركاته...


كيف الحال يا جماعة الخير...!!

لقرب هذا المنتدى الشديد على قلبي...قلت أعرض مشكلة وحده قريبه مني جدآ..والي مأرقتها ومأرقتني جدآ لقربها من قلبي صراحه...

مشكلتها بكل اختصار...إنها تعقدت نفسيآ والسبب إنعكاس صورتها الذاتيه لنفسها انها اذا عملت شي ولا بدت في شئ توقف عنه ولا تكمله...والمشكله الصدف الي صادفتها في حياتها جعلت عقلها يتشرب هذه الفكره حتى تبناها...وعمرها تحس بدى يضيع والسبب إنها من تبدي في شي ماتكمله..توقف عليه من النص...



يعني عندكم دخلت جامعه قطر...وضاع من عمرها 3 سنوات وانطردت...وقالت انها في الوقت الي انطردت فيه بتاخذ كورس ICDL وبالفعل كلمت الكورس وبقى على الكورس اسبوع ولظرف ما ماراحت هالأسبوع الي بقالها...والمفروض ان ماتنعطى لها شهادة اذا ماكملت الكورس الي عليها..
ولكن فوق هذا عطوها الشهاده وهي من داخلها تحس انها ماتستحقها ولكنها شهادة حضور...يعني مب شهاده امتحان...والمفروض الحين هي تقدم من ذيج الأيام على الأمتحان حق الICDL ولكن من عقدتها الداخليه تحس انها اذا قدمت الأمتحان مابتكمل باقي الأمتحانات الي عليها وبتوقف في الوسط...لأن الأمتحان من النوع الي ماده بماده يعني الأكسل بروحه والوندوز بروحه والبوربوينت بروحه والخ...
المهم جاتها فرصه ذهبيه وكملت في الشمال الأطلنطي معاي ودخلت كورس مع البترول والي هو الoffice admin وانفصلت مؤقت لمدة كورس بسبب الغياب المتكرر وهي بقالها كورس مادتين وتتخرج من هذا الكورس ( وهو مجرد شهاده عاديه يعني مب دبلوما ) المهم بسبب الطرد المؤقت البترول انهت العقد الي بينهم وبينها واستقالت...المهم قالت خلاص بعد هالطقات الي جاتها على راسها عزمت عزيمه قويه انها تكمل الي بقالها من الكورس بحسابها وبالفعل بدأت وفي يوم التوظيف الي يعملونه كل سنه (carrer day) في كليتنا
قتلها خل نشوف العروض دامج ماتشتغلين في الوقت الراهن...المهم قالت ادري اني ماراح اتوظف بس خل نجرب حظنا قتلها خلاص قدمي في البنك التجاري معانا...ومن حسن حظها ما أدري قرادة حظها اقبلوها المهم والشغل طلبوها في الوقت الي بقالها في كورسها بس مادتين في الكليه..يعني اذا ماوقفت من الكورس راح تروح عليها الفرصه..وفرصتهم ايضآ كانت ذهبيه لأن ايضآ هم يبعثون لكورسات وروابتهم قويه والخ..من الأمتيازات الحلوه

المهم اقنعت نفسها انها راح تنسحب من الكورس الي بقالها وراح تكمل مع البنك التجاري عل وعسى تاخذ شهاده حقيقية هالمره...المهم راد الي راده ربي وكملت الكورس الي مع البنك طبعآ في تخصص الBANKING لكن صج عورت قلبي يوم رسبت في مادتين الي هي فعلآ ميح فيهم وهم الaccounting وال math المهم في يوم التخرج الي المفروض يخرجون فيه الدفعه عطوا الكل شهادات انهم خلصوا الكورس الي عليهم وهي عطوها شهاده ناقصه مكتوب فيها بس درجاتها الي تفشل ... يعني بقالها بعد هالمادتين الي اذا ماقدمت فيهم وانجحت راح تبقى شهادتها ناقصه...
والحين طلعت لنا بعره جديده ان البنك التجاري ربوي وانها طالبه من البدايه انهم يحطونها في الفرع الأسلامي لكنهم بعد التخرج حطوها في الفرع الغير اسلامي,,,مما زاد اكتئابها..عاد الحين هي قالت تبي تطلع...وتروح مكان فلوسه حلال
الحين عاد فكرت فيها انها لو اطلعت من التجاري ماراح ينحسب لها خبره حتى تكمل سنه على الأقل..وهي مابقالها الا 4 شهور وتكمل سنه..ومتذبذبه في الموضوع..وخايفه من الحلال والحرام
البنت فعلآ تعقدت...لدرجة قام يأثر في حياتها الشخصيه..بدأ وزنها يزيد بدت تنعزل اكثر بدت تنام واااااايد بدأت صحتها تدهور...وكل خوفي يصيبها مرض من الحزن،، تحس ان عمرها قام يروح وهي ماقاعده تحقق شي يعني وقفت طموحاتها وقفت كل شي حلو في حياتها كل شي صار نفس الشي وزادت مشاكلها الأسريه وصارت بالعربي وحيده جدآ يعني مابقالها غيري

قتلها ليش ماتبتدي رياضه على الأقل تبتدي تنزل وزنها وتقدر تصفي بالها وتقدر تفكر بلي تبي تسويه مستقبلآ...وهي عمرها للحين 24 لكن بدأت تقتنع ان عمرها خلاص قريب بينتهي وانها قربت ال30 وان مافي وقت تكمل دراستها وتسوي شي...!!

عاد الحين انا بديت عليها الضغط اكثر وبدأت شوي تستوعب نوعآ ما ودبت فيها الطاقه والحياه...لكن مشكلتها انها الحين من كثر الأشياء الي تراكمت عليها من ذيج السنين لازم واااايد اشياء تسويها..فعاد الحين يوم حسبت الأشياء الي لازم تسويها بدا الأكتئاب يرجع لها شوي شوي...:rolleyes2:

صراحه توهقت....وابي اعطيها فرصه تثق في نفسها لأنها فعلآ بدون مبالغه بنت ذكيه جدآ جدآ لكن المصادفات الي صارتلها في حياتها جعلتها بهذه الصوره

ابي ابتدي فيها شوي شوي شي فعلي...طرحت عليها فكرت انها تكمل دراستها...وتحمست للفكره...لكن لا انا ولا هي عارفين وين نخليها تكمل...وفي اي جامعه والخ...شلون تضبط بين شغلها الحين والدراسه...

البنت محتاجه لأعاده افكارها وصياغتها وترتيب وقتها...

وياريت ان كل الأعضاء يدلي بدلوه...ويساعدنا في حل مشكلتها :telephone:


وجعله ربي في ميزان حسناتكم


أختكم

ذوق

[الـمـحـنـك]

ركعتين خالصه لوجه الله


دعاء من القلب بصدق نيها واخلاص



حياتها كلها تعتدل <<


خليها تجرب :nice:


وحسبي الله ونعم الوكيل على جامعة قهر الي ضيعت شبابنا وبناتنا

[ذوق]

حياك الله اخوي المحنك....والله انها الحمدالله مب مقصره في واجباتها الدينيه...

بس تهقى العقد الي طلعت منها بسبة جامعه قهر هههههههههههه...والله كل شي جايز

[فارس الكلمة]

البنت .. تحتاج إلى إدارة و تنظيم للوقت و الجهد ..

الإضطراب في العمل و الدراسة يؤدي إلى مشاكل كثيرة ..

[شيزكيك]

هي محتاجه تشجيع اتهاتقدر تسوي وتنجز كل شي وقولي لها عن انجازات صديقاتكم

علشان اتحمس وخلها تتوكل على ربها ودورة الآي سي دي ال حرام مدام هي قاطعه شوط

كبير فيها خل تكملها انا العام خذتها وصدقيني كل الي معاي تحمسوا والي

خذتها على حساب الشغل والي على حسابها الخاص وفي وحده آخر امتحان ما قدمته وصار

لها اكثر من سنتين ويوم شافت حماسنا اتصلت لهم وقالوا لها تعالي قدميه وقدمته واستلمت

الشهاده من ثاني يوم

[QATAR 11]

ان شاء الله الحل بيكون في هذا الرابط

http://www.qatarshares.com/vb/showthread.php?t=110024

والله يكوون في عونهاا المسأله كله مافيها ثقها في نفسها وانا اوجه لج دعوه لزياره الرابط

[ANONYMOUS]

انا اقول خل تستقيل من البنك الربوي.. وعقب تعيد حساباتها..

[!الشايمه!]

المسالة كلها سؤ تقدير.....للامور.....احسها هي اللي مخربه على عمرها...
المسألة يراد لها......
تخطيط من جديد.....وبشكل صحيح.....وتصمم...وتثبت على رأي...

وتتوكل على الله وتسير في هذا الطريق...
اما اللخبطة اللي صارت.....يجب انها ماتكررها.

وبالتوفيق

تحية

[المشتاقه الى الجنه]

جامعة قطر هي السبب الي عقدت البنت
أعرف ناس كثير درسوا سنتين وما خذوا التوفل وبعدين تركوا الجامعه وسببلهم هالشي عقده
مش هينه إن الإنسان يفشل

[فرقة الصقور]

جزاك الله خير واراك مايفرحك فيها

اعلم انك انت وهي اقدر الناس على خروجها من هذه العقده. وانا لست باعلم من يكتب في هذا المشكلة ولكن يشهد الله اني تأثرت جدا من هذه القصة واليك ماتسعفني به معرفتي .

الحمدلله الذي لايحمد على مكروه سواه،لتعلم اخي ان الفشل والصدمات هي جزء من الحياة وكل ناجح تعرض لفشل وصدمات وهذا ما يجعل للنجاح عثرات. فستقرا الكثير الكثير من الفشل والمصاعب في حياة الناجحين.
وان كانت على ماتقول دينة فانا انصحها بالاستماع لسلسة السيرة النبوية و قصص الانبياء لما لها من عظيم الاثر في تجاوز المحن والمشقات بالصبر والصلاة.

الصلاة والصبر عند الابتلاء له عظيم الاثر في النجاح وبلوغ المقصد وقال تعالى( حَتَّى إِذَا اسْتَيْئَسَ الرُّسُلُ وَظَنُّوا أَنَّهُمْ قَدْ كُذِبُوا جَاءَهُمْ نَصْرنا) انصح بالاستماع الى محاضرة للشيخ د.عبدالمحسن الاحمد في هذا الصدد.

لا اتمنى ان تكون لديها اعراض عين او حسد ولكن الاحتياط واجب والمداومة على الرقية الشرعية حافظ بأذن الله ومزيل لكل ضيق صدر ووسواس. انصح بالاستماع لاي محاضرة عن العين والحسد.

اعرف الكثير من من اصيبو بنوع حسد او عين وبدت عليهم اعراض تعيقهم من الذي حسدو عليه، ولاجزع فالعين امر يسير يزول بالرقية.

اسأل الله لها النجاح والصلاح

لك صادق الود

[!قطريـة بنت القمـر!]

جامعة قطر للاسف اختي ذوق سوت هوايل .... وايد بنات اعرفهم تضرروا نفسيا لدرجة كل وحده فيهم فقدت كل طموحاتها وفي النهاية تم طردهم من الجامعة وحتى اخوي العود منهم ومن عقدته ما عاد يشتغل خلاص ولا يبي يدرس ولا يسوي شي كلش .... لكن كنت موجوده لسنين في جامعة قطر وضاع عمري ع الفاضي هناك .... وما اخش عليج تعقدت لين ما الله شافلي .... لكن الحمدلله الاصرار والقوة والاراده سوت فيني سوايا وخلتني اتحدى مليون ظرف وظرف والحين صرت في افضل حالات حياتي على الاطلاق .... كل اللي عليها تمسح كل شي صار بحياتها وتنساه بتاتا .... ولا تفكر لا بعمر ولا خرابيط اكاني اكبر منها وطموحي حي للغاية وكاني افكر انهي الدبلوما هني واكمل برى الدوحه ولا قلت لا عمر بيوقفني ولا اي شي ثاني باذن الله .... اهم شي الاصرار والتفاؤل وتقعد مع ناس يبثون فيها بعد روح التفاؤل .... افا عليها ترى الحياه حلوه وايد بس يبيلها اللي يفهم ويقدر الامور و يوزنها والتذبذب والخوف من الشيطان يبي يخرب عليها حياتها ويخليها دوم توسوس .....باختصار ذوق؟؟ هاتيها لي واقعد لج معاها اسبوع وحياتج اخليها اكثر انسانة متفائله بالدوحه هههههههههه .... والله عندي وايد صديقات وناس كانوا العن من جي والحمدلله بفضل الله ومن بعدها جهود متواضعه مني خليتهم يمشون لقدام ولا يشوفون وراهم اي شي بالعكس الطموح هو هدفهم الوحيد الحين وصاروا متفائلين وعايشين الحياة بطول وعرض .... يبيلها ارادة قوية وبث روح التفاؤل وانج تحاولين تخلينها تدخل العالم من جديد ولازم انها تتعرف على ناس طموحة ومخها كبير وتفكيرها اكبر و احسن لها تبتعد عن الناس اللي مخوخها فاضيه وفئة البنات اللي ما همهم الا المظاهر لان في حالتها يبيلها عقل فاهم و واعي و ناضج ولو لها اخوان كبار وناجحين جان حالتها اتوقع بتصير احسن لان بحالتي اول انسان ساهم في تغييري للافضل هو اخوي العود بما انه انسان ناجح للغاية ومتميز وذكي وايد و واجه صعوبات وايد بحياته وتحداها و وصل لمستوى جدا راقي فجي كان يلمس فيني شي مميز وقال حرام تضيعينه ويقعد كل يوم يبث فيني روح حماسية لين خلاني اصير انسانة ناجحه بكل المقاييس ولله الحمد .... اللي بمثل حالة رفيجتج لازم لها شخص داعم يعني نفس اخوي بالنسبة لي يبيلها انسان ناجح جدا ومر بتجارب مره و واجهها لين صار بمرتبة تشرف ومن جي يحاجيها كل يوم والثاني ويبتدي بالتاثير عليها لين تصير ان شاء الله نفسيتها حديد ولا عليها لا من وزن ولا هالخرابيط ولا من شغل ولا من دراسة بالعكس تبتدي من الصفر وتكمل توها صغيره مو عيوز عشان تفقد الامل وحتى العيايز في منهم طموحين ويبون يدرسون من اول وجديد وخلنا نتعلم منهم ..... واسال مجرب ولا تسال طبيب :victory: .....

[فيزيائية]

بشكل عام شبابنا ماعندهم التخطيط السليم لحياتهم ولاهدف
مايعرفون شيبون ولا يعرفون شبيصيرون.....
ولا يقبلون الرأي والمشورة كلامهم الصح وليس غيره!
انا انصحها انها تستخير وتحدد اهدافها في الحياة بما يرضي الله
وان شاء الله يفتح لها الف باب وباب...
ولا تنس الجدية والانتظام وترك الكسل

[بلاهويـــــة]

سوء تخطيط منها

[coolqtri]

اختي ذوق .. انا ماأقول إلا الله يوفقك يارب .. ويوفق خويتك ..

وانا اغبط خويتك عليك صراحة .. ماشاء الله عليكم .. والله يخليكم لبعض .. وصديقتك تذكرني بنفسي قبل .. بس قولي لها .. مشكلتك تهون إن شاء الله .. والوقت يمر .. ( ومن شال الدنيا .. حطها ) .. وانا اخوك .. غصب ولا طيب .. بس تلاحقي عمرك .. والله يوفقكم ..

[سداوي&مدريدي]

ركعتين خالصه لوجه الله


دعاء من القلب بصدق نيها واخلاص



حياتها كلها تعتدل <<


خليها تجرب :nice:


وحسبي الله ونعم الوكيل على جامعة قهر الي ضيعت شبابنا وبناتنا

:nice: :nice:

[هاجن داز]

ركعتين خالصه لوجه الله


دعاء من القلب بصدق نيها واخلاص



حياتها كلها تعتدل <<


خليها تجرب :nice:


وحسبي الله ونعم الوكيل على جامعة قهر الي ضيعت شبابنا وبناتنا

كلام سليم

ونصيحه خليها تدخل منتدى الاسهم القطرية لانه متنفس للكل

ننتظر تسجيلها ....

[السامـي]

تأخذ إجازة لمدة 10أيام،وتسافر لمكان هادئ،لتصفية الذهن
وطرد الأفكار السلبية، ومن ثم ترتب أفكارها،وتواجه الحياة من جديد.

[miss-qatr]

مسااااء الخير لك ولها اختي ذوق :)


اول ماقريت مشكلتها قعدت اقول بل ومسكينه وربي يعينها


بس ترا لو كل انسان بحث في نفسه قبل سنين مضت بيلقى ان الدنيا سكرت بوجهه ابواب كثيره وفقد الامل


لكن بعد مرور وقت بيحس برحمه الله في تخطيط اموره وايجاد الافضل له مهما ظن ان حظه ضده


يعني انا ضاعت علي فرص كثيره والقهر لين جيتي اتعيدين حساباتك وانك بتفكرين من الصفر

او بتاخذين قرارات مب على البال :rolleyes2:


والله ان وضعها اهون من غيرها بكثير وقوليها دام الله ماعطها الصحه والعافيه وانها تقدر اتفكر وتمشي على ريلها فكل شي تقدر اتعوضه :)



وبعد قوليلها اتقولك مس قطر ان لكل حصان كبوه او بمصطلحي ( كبوات :victory: ) بس اتقوي نفسها واتقوم وماتفقد الامل واتخلي الشيطان يغلبها

[شكري وتقديري]

أختي العزيزة ذوق :

لو كل إنسان وقف مكانه وندب حظه فلن تعمر هذه الدنيا .

جامعة قطر وغيرها من الجامعات في أي مكان في العالم مجرد وسائل للتعليم

والوسيلة تساعدنا ولكنها لا تتعلم عنّا ولا تقوم بمهامنا ولا تبني أهدافنا وتسعى لها

نحن من يجب أن يسعى .

إنني من خريجات جامعة قطر ، وبحمد من الله وفضل توفقت وتفوقت .

ذوق :

أقول لنفسي ولك ولصديقتك :

إننا إن لم نتصدى لما أمامنا فلن نتقدم خطوة واحدة .

مشلكة صديقتك أنها تجمع الحصى و لا ترميه

كلنا قد يتساقط كثير من العقبات والحصى أمامه أثناء المسير في هذه الحياة

ولكن لن يتوقف منّا إلا من وقف وترك الحصى يتراكم أمام ناظريه ثم ينتقل إلى قلبه ونفسه

حتى يصبح جدارا عاليا يمنعه من الحراك والرؤية الواضحة للأمور والناس والأشياء .

أما من تلقف كل حصاة ألقيت أمامه ثم رماها وراء ظهره فلن يتوقف أبدا .

أنصح صديقتك بأن تكسر جدار الحصى المتراكم في نفسها وقلبها بأن تفتت المشكلة الكبرى

وهي التوقف إلى مشاكل صغيرة تتفحصها تواجهها وجها لوجه ثم تمحيها من حياتها وتبدأ من

جديد.

وأظن أن صديقتك سوف تكون أكثر قوة في مواجهة العقبات القادمة لأنها تغلبت على أكبر عقبة

وهي ذاتها التي حطمتها بيديها .

وفقنا الله وإياكم للخير والصواب .

[ROSE]

فعلا اللي عنده هالمشكله بتتكاثر العقبات جدامه

صديقتج يبي لها وقفة صارمه مع نفسها وانتي شدي على ايدينها

خليها مره وحده وفي امر من الامور تكمل للاخير وبتشجيعج واصرارج عليها

بعدها بتحس بطعم الاستمرار ان شاء الله


حد فاهم يقعد معاها ويخليها تتكلم ويحاول يحفزها لين ما تحس نفسها فعلا تبي تواصل

والله يوفقها ان شاء الله

[ذوق]

مروركم جميل وحلولكم أجمـــــل....لكن السؤال المهم الحين...هي تبي تكمـــــــــــل دراستها حاليآ وين تقدر تبتدي في ظنكم

وشكرآ

[!قطريـة بنت القمـر!]

مو هي كانت تدرس بالاطلنطي ؟؟ خلها تكمل اللي عليها وعقب ان شاء الله تشتغل في مكان نفس البترول وتقعد كم سنة واذا لها نية تدرس برى بيبعثونها ان شاء الله :) ....

[التيما]

اختي ذوق اسمحي لي اختلف مع باقي الاعضاء .. الردود تعيب في الجامعه والكليه والبنك و و و ونسو رفيجتج وهي أصلا أساس المشكله .. رفيجتج من كلامج عنها يتوضح لي انها انسانه اسمحي لي دلوعه شوي من قبل أهلها وكل هالنوعيه من البنات يسوون هالشي .. وهالشي ناتج مو من تو .. الأكيد انه معاها من صغرها يعني كانت تبي شي ويوفرونه لها أهلها ولمن يصير عندها تمله .. او تدخل دوره وما تكملها طبعا نفس النتيجه .. انا مابي احبطج ولا احبطها .. بس هالشي لازم هي تعترف فيه لان كل الي تسويه يكون من غير رغبه صادقه منها .. والحل ؟؟ انها تختار شي هي تحبه وتعشقه عشان تدرسه وتحقق فيه شي .. وصدقيني لو دشت دوره او عشرات الدورات ماراح تكملهم .. لازم يكون عن رغبه حقيقيه منها .. وتخصص هي تبيه .. مصيبه انها للحين مب عارفه شتبي وشتحب ؟؟

[(الفيصل)]

الاخت ذوق
(ماراح اعطيك حل وباسميك أم المشاكل كل ماشوف اسم ذوق القى أنك مشاركه بمشكله وتبين حل)
:anger1:
أرجعي شاركي بالمنتدى(كما عهدناك) بارك الله فيك
والاخوان والاخوات ماقصروا بارك الله فيهم بوضع الحلول لك
رغم ان الحل بسيط جداً:)
تحياتي لك

[أم ريليه]

:اختي يمكن يكون عندها أضطراب في الشخصية ......مو من الساهل تحديده الا عند أخصائي
وهؤلاء الاشخاص لا يحققون اي شيء في حياتهم (اضطراب سلوكي )وعلاجه يحتاج شخص خبير ولفترة طويلة مع مشاركة الأهل والجهات الأخرى في العلاج .
من كلامتش عنها قد يكون عندها درجة من درجات الأكتئاب مع قلق وهاي راح يخليها تظل في دوامة اذا ما عالجت هالشي مع مساعدة الاهل لها .
الله يوفقها ويوفق جميع المسلمين لما يحبه ويرضاه .:)

[ذوق]

الاخت ذوق
(ماراح اعطيك حل وباسميك أم المشاكل كل ماشوف اسم ذوق القى أنك مشاركه بمشكله وتبين حل)
:anger1:
أرجعي شاركي بالمنتدى(كما عهدناك) بارك الله فيك
والاخوان والاخوات ماقصروا بارك الله فيهم بوضع الحلول لك
رغم ان الحل بسيط جداً:)
تحياتي لك

:rolleyes2: قول اعوذ برب الفلق لوووووووول :tease:

يا خي عيزااانه شسوي ماعندي وقت :omen2:

[ذوق]

تسلمون التيما وعبث الموت مع ان يا ألتيما هالبنت بالذات الي ماعرفت للدلع طريج

وحياكم يالغوالي