انا وانت وصلة الرحم

[ROSE]

السلام عليكم ورحمة الله وبركاته


اب ، ام ، اخت، اخ ، عم ، خال ، جد ، جده ، اقارب ، اهل ، جيران ، اصدقاء كل من تربطني معهم صلة موده وحب وقرابه هم اقربائي



رقية: وين تبينا نروح

ناصر : قومي خل نزور امي

رقية : فكني زين من اسبوعين شايفينها

ناصر : زين شفيها لو زرناها اليوم

رقية : مشغوله ابي اروح بيت امي واطلع مع اختي نروح السوق مب فاضية


************************************************** *

علي: وينه ربيعك صار لنا فتره ماشفناه

خالد : من تقصد ولد عمي

علي : اي نعم

خالد : شدراني فيه اكيد مشغول بالدنيا

علي: زين خل نروح نشوفه

خالد: ليش ماعندك سالفة اذا عمي ماشفته صار لي شهور بروح اسال عن ولده؟

************************************************** **

سبيجه : الا اقول اخبار اختج مع عيالها

روضه: مادري عنها من سافرت مع زوجها تدرس برع انقطعت اخبارها

سبيجه : زين اتصلي فيها سالي عنها

روضه : اوووه بروحنا خسرانين بعد نخسر مكالمات خلاص بتصل لها في العيد الجاي

وبسال عنها بالمره ابارك لها بالعيد :rolleyes2:


*************************************************
محمدين : ماتجيي نزور خالك ده وحشني اوي

حسنين : خال ايه ياعم خليها على ربنا

محمدين : ليه هو فيه ايه

حسنين : اصلوا مشفانش وشو من سنتين وماجاش يسال عننا من يوميها

محمدين : طيب خليك انت الاحسن هو الكبير برضو

حسنين : يروح في داهيه مليش دعوه بيه لما يبأه يسأل عننا بعدين حفكر :tease:


**************************************************

هذي عينات من اللي نشوفهم واللي حاصل في هالوقت

صلة الرحم



اوجبه الله تعالي علينا ومن قطعه اصبح من الخاسرين

إن قطع الأرحام تكون بهجرهم ، والإعراض عن زيارتهم

وعدم مشاركتهم في مسراتهم، وعدم مواساتهم في أحزانهم

كما تكون بنفضيل غيرهم عليهم في الصلات والعطاءات الخاصة

التي هم أحق بها من غيرهم.


الامور الحاصلة اليوم من الجري وراء المال والمصالح الشخصية من الانشغال

بامورنا اليوميه الاطفال العمل المشاكل التي لا تنتهي هل تجعلنا نقطع رحمنا او نقصر

في حقوقهم



عقوبة قطع الرحم

قال الله تعالى: ( فهل عسيتم إن توليتم أن تفسدوا في الأرض وتقطعوا أرحامكم . أولئك الذين لعنهم الله فأصمهم وأعمى أبصارهم ) . سورة محمد:32-33 .

(وَالَّذِينَ يَنْقُضُونَ عَهْدَ اللَّهِ مِنْ بَعْدِ مِيثَاقِهِ وَيَقْطَعُونَ مَا أَمَرَ اللَّهُ بِهِ أَنْ يُوصَلَ وَيُفْسِدُونَ فِي الْأَرْضِ أُولَئِكَ لَهُمُ اللَّعْنَةُ وَلَهُمْ سُوءُ الدَّارِ) (الرعد:25)

(الَّذِينَ يَنْقُضُونَ عَهْدَ اللَّهِ مِنْ بَعْدِ مِيثَاقِهِ وَيَقْطَعُونَ مَا أَمَرَ اللَّهُ بِهِ أَنْ يُوصَلَ وَيُفْسِدُونَ فِي الْأَرْضِ أُولَئِكَ هُمُ الْخَاسِرُونَ) (البقرة:27) .والله أعلم.


ومن أعظم العقوبات التي يعاقب بها قاطع الرحم أن يحرم من دخول الجنة ، فقد قال الرسول صلى الله عليه وسلم : "لا يدخل الجنة قاطع". رواه البخاري ومسلم.


من منكم يصل رحمه بشكل دائم ويعمل بما امر الله به

هل هناك اعذار تبيح القطع ؟

حتى وان اخطأ عليك من هو اكبر سنا منك هل ستقطعه لانه قطع رحمه ام ستكون الافضل

هل تصل رحمك في جميع الاوقات ام في المناسبات فقط ؟

[khaldoon]

بارك الله فيكي يا روز

[lusail]

رقية : فكني زين من اسبوعين شايفينها ...:omg:


الله يكفينا الشر والله ...اسبوعين ...

والله لو الواحد عرف قدر الوالده ووصلها ان تتيسر اموره في ذي الدنيا بس من دعواتها..

اسبوعين من امه ..

والحمد لله انا عن نفسي اوصلهم ..واشوف مافيه اعذار يعني السوق وغيره ومشاغل الدنيا اهم.

وبالنسبه للكبير وهو غلطان له الحق وش بخسر ان سلمت عليه ووصلته مثل ما انا ماتغيرت.

وطبعا في المناسبات اكثر بس فيه اقارب من الدرجه الاولى دوم وياهم ولا اقطعهم..

والحمد لله قطر وطبع شعبها التواصل وصله الارحام الا من رحم ربي..

[هتـان قطر]

الحمدلله صحيح الوصل قل في هذا الزمن ..ولكن مازالت اواصر القربى موجوده

ومازال الاهل يتواصلون حتى ولو عن طريق التلفون ..

الله يعين الاجيال الجاية ..

[بوعلي2]

موضوع مهم وجميل ويذكر الواحد الي خذته الدنيا بشرع الله في صلة الرحم التذكير واجب وشكرا لج روز على موضوعج الجميل والمهم وتقبلي مروري اختي

[اّل ثاني 77]

الله يعطيج العافيه موضوع :nice:
ولاحلى انه ذكرني بمسلسل رقية وسبيجة

[ســـهم]

قال الله تعالى { وَاعْبُدُواْ اللّهَ وَلاَ تُشْرِكُواْ بِهِ شَيْئاً وَبِالْوَالِدَيْنِ إِحْسَاناً وَبِذِي الْقُرْبَى } البقرة 36


عن ابي هريره رضي الله عنه عن النبي صلى الله عليه وسلم قال: « من كان يؤمن بالله واليوم الآخر فليصل رحمه» رواه البخاري.

الحمدلله مازلت مستمر على هذه السنه مع لهو الدنيا وأنشغالات الحياه ..

شكرا روز .

[فارس الكلمة]

عرض جميل .. و أمثلة حية للواقع الذي نعيشه ..

شكراً أختي روز على هذا الموضوع .. و أرجو أن يكون دافع خير .. و تذكير

للذين نسوا أقرباءهم .. تحية لك ..

[ROSE]

بارك الله فيكي يا روز

وفيك اخوي خلدون وين هالغيبة

نورت الصفحة

[ROSE]

رقية : فكني زين من اسبوعين شايفينها ...:omg:


الله يكفينا الشر والله ...اسبوعين ...

والله لو الواحد عرف قدر الوالده ووصلها ان تتيسر اموره في ذي الدنيا بس من دعواتها..

اسبوعين من امه ..

والحمد لله انا عن نفسي اوصلهم ..واشوف مافيه اعذار يعني السوق وغيره ومشاغل الدنيا اهم.

وبالنسبه للكبير وهو غلطان له الحق وش بخسر ان سلمت عليه ووصلته مثل ما انا ماتغيرت.

وطبعا في المناسبات اكثر بس فيه اقارب من الدرجه الاولى دوم وياهم ولا اقطعهم..

والحمد لله قطر وطبع شعبها التواصل وصله الارحام الا من رحم ربي..


مااجمل دعاء الوالدين ورضاهم عليك تحس الدنيا كلها ملكك حزتها الله يحفظهم ويخليهم لنا يارب

اشكرك اخوي على هالاضافة الجميله والله لا يقطع لك وصل ان شاء الله

[ROSE]

الحمدلله صحيح الوصل قل في هذا الزمن ..ولكن مازالت اواصر القربى موجوده

ومازال الاهل يتواصلون حتى ولو عن طريق التلفون ..

الله يعين الاجيال الجاية ..

فعلا ياهتان الخوف من الاجيال القادمه

لو تلاحظين قبل ايام جدودنا وامهاتنا الفريج كله يتزاور والاهل لو مسافرين يتعنون ويجون

يزورون اهاليهم والصلات موصوله وفي اجيالنا الجار ماقام يعرف جاره

والاهل يادوب يعرفون بعض لدرجة في بعض الناس مايعرفون عيال خالاتهم ولا عيال عماتهم

الا اللي متواصلين معاهم

اما عيالنا الله يعلم بس اهم شي احنا نعودهم على التواصل


اشكرج هتان

[ROSE]

موضوع مهم وجميل ويذكر الواحد الي خذته الدنيا بشرع الله في صلة الرحم التذكير واجب وشكرا لج روز على موضوعج الجميل والمهم وتقبلي مروري اختي


الشكر موصول لك اخوي وعسانا نكون كلنا واصلين ولا نقطع

بارك الله فيك

[ROSE]

الله يعطيج العافيه موضوع :nice:
ولاحلى انه ذكرني بمسلسل رقية وسبيجة

الله يعافيك يارب

ههههههههههههههه اي جاوا على بالي :shy:

[ROSE]

قال الله تعالى { وَاعْبُدُواْ اللّهَ وَلاَ تُشْرِكُواْ بِهِ شَيْئاً وَبِالْوَالِدَيْنِ إِحْسَاناً وَبِذِي الْقُرْبَى } البقرة 36


عن ابي هريره رضي الله عنه عن النبي صلى الله عليه وسلم قال: « من كان يؤمن بالله واليوم الآخر فليصل رحمه» رواه البخاري.

الحمدلله مازلت مستمر على هذه السنه مع لهو الدنيا وأنشغالات الحياه ..

شكرا روز .

بارك الله فيك اخوي سهم خلونا نتواصل ومانقطع ونعلم عيالنا والاجيال الجاية

[ROSE]

عرض جميل .. و أمثلة حية للواقع الذي نعيشه ..

شكراً أختي روز على هذا الموضوع .. و أرجو أن يكون دافع خير .. و تذكير

للذين نسوا أقرباءهم .. تحية لك ..


اتمنى ذلك ولعله ذكرى لمن نسى وشغلته الدنيا بمشاغلها ومتاعبها

فيصبو نفسه لوالديه واقاربه وينسى معهم ما اهمه


زدت المتصفح اشراقا بهذا المرور الرائع


اعجبتني كلمات توقعيك دمت فارسا للكلمه :nice:

[شيزكيك]

وي فديت امي تقريبا كل يوم اشوفها بحكم اني اودي بنتي عندها

والله يرحمك يا يبه:weeping:

وحده من جداتي عايشه وساكنه بيت عمي نزورها ايام الجمع العصريه

واهل زوجي نروح لهم ظهرية الجمعه ونتغدا معاهم

[ROSE]

وي فديت امي تقريبا كل يوم اشوفها بحكم اني اودي بنتي عندها

والله يرحمك يا يبه:weeping:

وحده من جداتي عايشه وساكنه بيت عمي نزورها ايام الجمع العصريه

واهل زوجي نروح لهم ظهرية الجمعه ونتغدا معاهم
الله يرحم الوالد ويخلي لج الوالده ويطول لج بعمرها حسسيها انج ماتروحين لها بس عشان

تدوين بنتج زوريها بالاجازات بعد والله يحفظج يارب زين تسوين في زيارة اهل زوجج

واقاربج لو ماقدرتي تزورينهم كلميهم بعد التيلفون يسوي شغل في نفوسهم :nice:

اشكرج على هالطله الحلوه

[SomeOne]

الله يرحم والديك

موضوع ممتاز،،

[شيزكيك]

الله يرحم الوالد ويخلي لج الوالده ويطول لج بعمرها حسسيها انج ماتروحين لها بس عشان

تدوين بنتج زوريها بالاجازات بعد والله يحفظج يارب زين تسوين في زيارة اهل زوجج

واقاربج لو ماقدرتي تزورينهم كلميهم بعد التيلفون يسوي شغل في نفوسهم :nice:

اشكرج على هالطله الحلوه

تسلمين حبيبتي يا احلى ورده

وانا اروح حق امي زيارات وحتى الغدا لان بو العيال مايتغدا وصرت لما آخذ بنتي

اتغدا معاها ونتونس مع بعض


وتسلمين على موضوعك الحلو

[ضوى]

موضوعج وايد يعور القلب

بصراحة مقصررررة واااااااايد بحق ارحامي الله يسامحني ويارب يغير هالعادة اللي فيني


مشكوووورة روز عالتذكير

[شاهيناز]

الله يهديني ويهدي الجميع

مشكلتي مع قطع الرحم مالها حل
في العيد اروح بيت واحد ماحب الزيارات والمجاملات

بس ان شاءالله يتعدل طبعي

جزاك الله كل خير اختي روز وكتبه الله في ميزان حسناتك

[ROSE]

الله يرحم والديك

موضوع ممتاز،،

جزاك ربي كل خير

[ROSE]

تسلمين حبيبتي يا احلى ورده

وانا اروح حق امي زيارات وحتى الغدا لان بو العيال مايتغدا وصرت لما آخذ بنتي

اتغدا معاها ونتونس مع بعض


وتسلمين على موضوعك الحلو

زين تسوين الله يخليكم لبعض ان شاء الله

وتسلمين لي انتي على احلى طله

[ROSE]

موضوعج وايد يعور القلب

بصراحة مقصررررة واااااااايد بحق ارحامي الله يسامحني ويارب يغير هالعادة اللي فيني


مشكوووورة روز عالتذكير

ليش ياضوى ترى اتصال واحد ولا زيارة وحده غير انها تحببج عندهم

يستانسون عليها يحسون ان الدنيا للحين بخير

اشد على ايدج وحاولي يالله يالغالية حاولي وخبريني


تسلمين لي على هالمرور الحلو

[ROSE]

الله يهديني ويهدي الجميع

مشكلتي مع قطع الرحم مالها حل
في العيد اروح بيت واحد ماحب الزيارات والمجاملات

بس ان شاءالله يتعدل طبعي

جزاك الله كل خير اختي روز وكتبه الله في ميزان حسناتك

انتي بعد :( ترى كنت مثلكم والله بس في الفتره الاخيره غيرت من طبعي

الاهل اللي بعاد اخصص لهم يوم كل اسبوع واتصل فيهم كلهم شلونكم اخباركم عساكم بخير

شوية سوالف ومع السلامه يستااااانسووون ومايخلون حد مايقولون له اني اتصلت فيهم

والاهل اللي قراب اخصص لهم يوم اما للاتصال او الزيارة على حسب وضعهم

يلا شاهي قرري وحددي لج يوم واتصلي وشوفي ردة الفعل


وتسلمين لي يارب على هالطلة وجزاج بمثله ان شاء الله

[jajassim]

الموضوع خطير ،، محد يعرف قيمة ثواب الصلة :shy:


الله يرحم والديك وجزاك الله خير ،،، :)

[ROSE]

الموضوع خطير ،، محد يعرف قيمة ثواب الصلة :shy:


الله يرحم والديك وجزاك الله خير ،،، :)

جزاك بمثله ان شاء الله


فعلا محد يعرف قيمته خاصة هالايام الناس مشغوله بنفسها وعيالها وبس

اشكرك اخوي جاسم على هالمرور الطيب بارك الله فيك

[ضوى]

ليش ياضوى ترى اتصال واحد ولا زيارة وحده غير انها تحببج عندهم

يستانسون عليها يحسون ان الدنيا للحين بخير

اشد على ايدج وحاولي يالله يالغالية حاولي وخبريني


تسلمين لي على هالمرور الحلو


والله عارفة يا روز

بس والله وبالله احس بالي مشغول هذا يبي شئ وهذا يبي شئ هذا يحن هذا يون يالله

الحين بتقولين كا انت قاعدة عالنت الحين اتصلي باحد محارمج كلميه باقولج والله سويتها واشتغل مسلسل الحنة هذا قال لي وهذا سوالي وهذا اخذ قلمي وخلافه والله يبي وقت بس استرخي فيه هدوووووووووء

[المشتاقه الى الجنه]

صلة الرحم واجبة وقطيعتها محرمة، ومن الكبائر.

قال القرطبي رحمه الله: (اتفقت الملة على أن صلة الرحم واجبة وأن قطيعتها محرمة).
لقد وعد الله ورسوله واصل الرحم بالفضل العظيم، والأجر الكبير، والثواب الجزيل، في الدنيا والآخره

أختي روز مشاغل الدنيا شغلت الكثير منا عن صلة أرحامه فجزاكي الله خير الجزاء على هالموضوع القيم لتذكيرنا بأرحامنا المقصرين في حقهم وصلتهم تكون ولو بالهاتف


قال الرسول صلى الله عليه وسلم :
{ لا يدخل الجنة قاطع رحم }

للأسف رغم ان وسائل الاتصالات اصبحت متعدده وفي متناول الجميع ..

لكن مانلاحظه ان الروابط العائلية اصبحت متفككه .. ضعيفه ..

وانا اعترف بوجود هذا الشيءعندي أنا..

والمشاغل وغيرها من الاعذار التي نختلقها ليست عذراً مقنعا للقطيعه ..

كما انها ليست حلا للمشاكل العائليه ..

والهاتف يؤدي الغرض طبعا وسمعت فتوى بهذا الخصوص ..

الله يهدينا جميعا

[!قطريـة بنت القمـر!]

من منكم يصل رحمه بشكل دائم ويعمل بما امر الله به
واللي ما عنده للاسف الا قلة قليلة ولا يعرف لا ارقامهم ولا بيوتهم مع انهم يدلون بيته ولو كلفوا نفسهم بزيارة وحده جان خذنا منهم المعلومات ولكننا نريد ولكن الله يفعل ما يريد ....
هل هناك اعذار تبيح القطع ؟
لا والله لا اعذار ان جينا للحقيقة ....

حتى وان اخطأ عليك من هو اكبر سنا منك هل ستقطعه لانه قطع رحمه ام ستكون الافضل
الاكبر سنا لهم احترام خاص مهما فعلوا فالرسول عليه الصلاة والسلام قال من منا لا يرحم صغيرنا ويوقر كبيرنا .... ونحبهم على راسهم لو يغلطون لكن للاسف كلهم ماتوا الكبار الله يرحمهم ....

هل تصل رحمك في جميع الاوقات ام في المناسبات فقط ؟

والله الصراحة كنا نزورهم على حياتهم في المناسبات بس بعضهم كل جمعة لكن بعد موتة الوالد قطعونا مع انهم يدلون البيت واحنا ما اندل بيوتهم ولا عندنا ارقامهم ولكن الله يحاسب الانسان على نيته وكنا نريد ولكن مشاغل الدنيا يمكن الهتهم الله يهدينا جميع ....

جزاج الله خير على التذكير والعيد قرب والكل ان شاء الله بيزور ارحامه وشوي شوي يتعودون على هالعادة الجميله التي اندثرت مثلها مثل عادات رائعه كانت لاجدادنا في الماضي التليد .... بارك الله فيج اختي روز ومشكوره وماجوره على حثج للخير ان شاء الله ....

[ام شهد قطر]

والله أن في أقارب الواحد يوصلهم بس لوجه الله والاهم أبد مايستاهلون يوصلون في الناس الاغراب وأقرب الناس لهم يسفهونهم الله يأجرنا في وصلهم ويخلينا دايما أحسن منهم

[>>> غــمـــوض <<<]

احنا متعودين من واحنا صغار كل خميس لازم نتجمـع في بيت جدي من طرف امي وكل الاهل يجون هناك
والجمعـه العكس نروح بيت جذي الثاني من طرف ابوي ونفس الشي كل الاهل يجون هناك

الحمد الله ان مافي اي قطع في صله الرحم،، اسبوعيا لازم نشوف الكـل
وحتى في الاعياد نفس القصه اول يوم وثاني يوم بيت الجدود

والله يامحلى الجـمعه والقعده مع الاهل شي يفرح القلب

موضوع مميز كصاحبته
تقبلي مني اجمل تحيه
اختج في الله \ >>> غــمـــوض <<<

[اعالي الجنان]

يازين وصل الاهل ...يكفى وناستهم لين نتصل عليهم والدعاوي الطيبه اللي تطلع من قلوبهم....


احب اوصل اهلي والله معطيني هالميزه والحمدلله ماحب القطيعه حتى لو بمسج اراسلهم داخل قطر وخارجها

وبالمقابل مايقصرون فيني دوووم يسألون عني اكثر وحده ,.,,,ويازين دعوات الكبار منهم تثلج صدري وتسعدني

موضوع قيم يالغاليه والله لايجعلنا من قاطعين الرحم ...

[شكري وتقديري]

صلة الرحم بركة وراحة

بركة في المال والعمر

وراحة للنفس والقلب

جعلنا الله وإياكم من الواصلين لأرحامهم لا القاطعين

قال الأولون عن من لا يزورون ولا يزارون :

( تحصنا بالله ، ما ياكل أكلهم لا يار ولا فار )


شكرا على الموضوع

[بوحارب]

جزاج الله خير مراقبتنا العزيزهـ

[أمير المحبه]

اختي روس انا امشي على خير الكلام ماقل ودل
من النهايه الحين نادر ماتلاقين صلة الرحم بين الاهل
والاغلبيه قاطعين صلة الارحام والاخت ماتشوف اخوها شهر والاخو مايمر اخوه
ولا يتذكره الا وقت المشكله او العزا الله يبعده عنا وعنكم
وشكرااا

[ذيبه مزاجيه]

الله يحنن القلوب ان شاء الله ..

الحمدلله للحين نوصل رحمنا !!!!!!!

حتى لو على فترات متباعده ترا نحن عليهم ويحنون علينا .. الا اللي قلوبهم قاسيه الله يتكفل بهم !!

جزاج الله خير على الموضوع

[أمير المحبه]

الله يحنن القلوب ان شاء الله ..

الحمدلله للحين نوصل رحمنا !!!!!!!

حتى لو على فترات متباعده ترا نحن عليهم ويحنون علينا .. الا اللي قلوبهم قاسيه الله يتكفل بهم !!

جزاج الله خير على الموضوع

اختي واللي اتمرينهم ومايمرونج وتقولين معليه
وتمرينهم مره ثانيه اتلاقين نص البيت انخش ومايبي يشوفج لعانه
يكون اخوج اختي واللي ينخشون مرت اخوج اعياله ايش موقفج منهم
بتمرينهم المره الثاله في ذمتج ذيبه :(
واحد يقولي عالسالفه صديق الروح

[ANONYMOUS]

صلة الارحام يبي لها وقفه جديه.. اضيفي لها زيارة المرضى

الله يكون في عونا