ما أسباب رفض البلدية لبعض تصاميم المنازل؟؟

[toota]

عندي سؤال ويا ليت اللي عنده خبره في الموضوع يفيدني وجزاه الله الف خير.
ليش البلديه ترفض بعض الخرائط التصميمية للبيوت.؟ وعلى اي اساس يرفضون؟ وايش اسوي
علشان اتفادى رفض البلديه؟ هل رفض البلديه موضوعي ومبرر او انه مجرد لعانه وخبث وحسد؟

[أبا خطاب الهلالي]

بصراحة كرأي شخصي رفض البلدية بعض الاحيان لا مبرر له

أول أمس جاني المكتب رجل مليونير معروفه عماراته في قطر

يسألني عندك أرض أبي ابني عماره قلت له اي لازم ترخيص عاد

قال اي ترخيص ياحبيبي اي أرض أبيها بطلع ترخيص عليها مب على كيفهم

وصح كلامه 100 % تدرون ليش لأنه قال في الاخير كلمه جد اعجبتني

قال ليش يرفضون دام اني ببني شي راقي وحلو وأشرف بلادي

[مطراش]

السلام عليكم
اسباب الرفض كثيره واهم شي الارتداد بينك وبين الجار ثاني شي الشبابيك ثلث شي انه مايسير تعمل بيت على نظام الشقق يعني اذا المهندش شك في الخريطه انه بسير شقق ممكن يرفضها وبنسبه البنت هاوس لازم يكون 30%100 من مساحة السطح ومافي نوافذ تطل على الجار يعني بتكون النوافذ على السطح ويمكن يسمحلون 40%100 او حتى 50% 100في بعض الاحيان
بعدين مساحة الارض مممكن ما تكفي الا فيلا بس موب اكثر وبنسبه لارتدادت لازم يكون من الامام 5 متر اقل شي ولارتداد من صوب الجيران 3 متر طبعا هذا المتعارف عليه الا في بعض الحلات ممكن يوصل الارتداد بس 1.5 متر ونص في بعض الحلات ومن اسباب الرفض بعد يكون السبب من المكتب الاستشارى يعني اغلاط في الرسم مو اكثر ولا اقل وهذى اتسير وايد وتكون بس محتاجه تعديل بس

انشاء الله اكون وصل المعلومه صح موب غلط هذا الحد علمي

[رويس]

اسباب الرفض انه مافي واسطه والسالفه سالفة مزاااااااااااااج

[السهم الثابت]

السلام عليكم
اسباب الرفض كثيره واهم شي الارتداد بينك وبين الجار ثاني شي الشبابيك ثلث شي انه مايسير تعمل بيت على نظام الشقق يعني اذا المهندش شك في الخريطه انه بسير شقق ممكن يرفضها وبنسبه البنت هاوس لازم يكون 30%100 من مساحة السطح ومافي نوافذ تطل على الجار يعني بتكون النوافذ على السطح ويمكن يسمحلون 40%100 او حتى 50% 100في بعض الاحيان
بعدين مساحة الارض مممكن ما تكفي الا فيلا بس موب اكثر وبنسبه لارتدادت لازم يكون من الامام 5 متر اقل شي ولارتداد من صوب الجيران 3 متر طبعا هذا المتعارف عليه الا في بعض الحلات ممكن يوصل الارتداد بس 1.5 متر ونص في بعض الحلات ومن اسباب الرفض بعد يكون السبب من المكتب الاستشارى يعني اغلاط في الرسم مو اكثر ولا اقل وهذى اتسير وايد وتكون بس محتاجه تعديل بس

انشاء الله اكون وصل المعلومه صح موب غلط هذا الحد علمي

كفين ووفيت الغالي و عتقد انة الملاحق بعد ماتزيد عن نسبة موعينة بس ناسي الحين
وماتبني فيلتين في ارض واحدة واللة يعين يارب

[toota]

اوكي مش مشكله , يمكن قصدهم ما تبني فيلتين في ارض وحده علشان بعض التجار وصل فيهم الطمع لدرجة انهم بانيين فيلل صغيره جدا ما تكفي عائلة من الفيارين . ما علينا . بس صراحه الانسان يعني حر بأرضه . يسويها
التصميم اللي يحب . بعدين انا كان عندي فكره بس احس من كلامكم ان البلديه ما راح توافق على فكرتي .
والله فكره عبقريه وبتخلي العوائل القطريه راضيه عن المساكن والمنازل . كما انها توفر خصوصيه كامله لاهل البيت , بس صراحة انصدمت من كلامكم . اكيد البلديه بترفض . تحياتي .

[مطراش]

السلام عليكم
بنسبه حق الملاحق مسموحلك من البلديه 50 متر ويمكن 60 متر ام اكثر فيقولك لازم اتروح اتجيب رسومات هندسيه من مكتب استشاري يعني سلفه ومراكض ام بنسبه لموضوع الفلتين مو كل الارضي مسموحلك تبني فلتين انشاء اتكون 2000متر بس تقدر اتروح البلديه وتشيك على ارضك اذا كان مسموح او موب مسموحه لانه موب على كل الاراضي بعضها وفي مناطق معينه بس

[فارس الكلمة]

بعدين انا كان عندي فكره بس احس من كلامكم ان البلديه ما راح توافق على فكرتي .
والله فكره عبقريه وبتخلي العوائل القطريه راضيه عن المساكن والمنازل . كما انها توفر خصوصيه كامله لاهل البيت , بس صراحة انصدمت من كلامكم . اكيد البلديه بترفض . تحياتي .

ما هي هذه الفكرة .. ؟ خبرنا عنها بارك الله فيك ..:)

[السندان]

يقولك بلدية الريان لها قانون قانون لمنتسبي مناطق الريان وباقي قطر كلها لها قانون في التخطيط العمراني

والله قوي الريان

[toota]

ما هي هذه الفكرة .. ؟ خبرنا عنها بارك الله فيك ..:)

بسم الله الرحمن الرحيم
مثل ما انشوف الحين , الاسر القطرية تشتكي من صغر مساحة الأرض الممنوحه لبناء المنازل . كما ان الاسر القطريه اصبحت تشتكي من البيوت المجاوره حيث انها تكشف خصوصية البيت , والعوائل لا تستطيع استخدام الحوش الخارجي والجلوس به .
فكرتي هي
تستغل الارض كامله , ويبني كل شخص بيته بحيث يكون الحوش داخلي يعني مثل بيوت اول . يعني يبني البيت ويخليه في النص مفتوح . في النص يقدر يسوي حديقه او بركة سباحه . ويكون البنيان دار ما دار . مثل البيوت السوريه القديمه . وبهالطريقه يستغل الواحد ارضه افضل استخدام وكذلك يحافظ على خصوصيته كامله . بس ما أظن البلديه توافق على مثل هالتخطيط .
تحياتي

[فارس الكلمة]

شكراً و بارك الله فيك .. حول هذه الفكرة يتبادر سؤال :-

أين ستكون الملاحق الخارجية ..؟ و أين ستكون مواقف السيارات ..؟

ثم أن البيوت المكشوفة كما هي في البيوت القطرية القديمة لم تعد مناسبة حالياً ..

أعجبتني الفكرة .. لكن التطبيق يحتاج إلى دراسة أكثر ..

[المهندس عبدالعزيز]

بعض الأحيان يكون


نحاسة و ولعانه و مزاجية و حسد إذا ما في معرفة بينك وبين الموظف


و بعض الأحيان

تكون أسباب موضوعية مثل المحافظة للشكل الجمالي عام على المنطقة والمدينة وحمولات الكهرباء وعدم التعرض للجار

[المهندس عبدالعزيز]

وحاب أضيف حاجة ثانية قوانين البلدية صار لها 30 سنة يوم كان الأراضي والعقارات رخيصة وكانت الأراضي متوفر بكثرة فكان ما في ضرر كبير في التشدد في القوانين لكن الان الأراضي غالية جداً و الناس يالله يالله يحصلون أرض وأهل البلدية يتفلسفون ويصعبون على السكان وهم بهذي الطريقة يساهمون بطريقة مباشرة في رفع نسبة التضخم في قطر عن طريق تصعيب البناء وتقليل عدد العقارات المستخدمة

موظفين البلدية والتخطيط يتكلمون عن الناحية الجمالية (شي ثانوي) والناس مب لاقية أرض، الحين سكن نفسه أهم أن يكون البيت شكله جميل أو لا ، الأولوية أول شي يكون للواحد سكن وبعدين يكون بيته جميل

وقوانين البلدية في قطر أصعب قوانين في البناء ترى قوانين السعودية للبلدية أسهل وايد الأرتدادات أقل وفي البحرين الواحد يقدر يختار أي لون للبيت وفي الكويت وفي البحرين والسعودية مسموح البناء ثلاثة طوابق للبيت بإستثناء قوانين البلدية في قطر التي لم تتطور من 30 سنة

وفي النهاية حاب أقول لكل واحد يشتغل في البلدية أو في الأسكان سهلوا البناء على هل قطر وخلوهم يبنون وشوفوا قوانين البلديات في البحرين والسعودية والكويت أسهل بوايد بالرغم بأن العقارات والأراضي أرخص بوايد من عندنا

[toota]

شكراً و بارك الله فيك .. حول هذه الفكرة يتبادر سؤال :-

أين ستكون الملاحق الخارجية ..؟ و أين ستكون مواقف السيارات ..؟

ثم أن البيوت المكشوفة كما هي في البيوت القطرية القديمة لم تعد مناسبة حالياً ..

أعجبتني الفكرة .. لكن التطبيق يحتاج إلى دراسة أكثر ..
اخي العزيز فارس الكلمة
راح يكون فيه ملاحق خارجية وكذلك مواقف سيارات . المشكله المخططات والتصاميم في راسي ما اقدر اشرحها لك . لو ألاقي مهندس يرسمها لي واعرضها لكم . بس صدقني فكرة ولا أروع .