مطلوب عاجل سائق للتوصيل ( دريول)

[بوعبدالرحمن9]

مطلوب سائق لتوصيل شاب عمره 17 سنة من منطقة اللقطة الى جامعة قطر يوميا
أرجو المساعدة يا شباب
أرجو المراسلة على العنوان التالي :umoqbil@hotmail.com

[مستثمر 999]

يا ابو عبدالرحمن

17 سنه ما شاء الله ولا قوة الا بالله وتدور له على سايق

خله يسوق ويحس بالمسؤليه

90% من الشباب الي بعمره عندهم سيارات

مشوار الى المرور وربع ساعه ولا انت مطلع له الكجه ( رخصة سواقه تحت التعليم )

وربي يوفقك

[الجوكر90]

السلام عليكم
يوم كان عمري 16 كنت اسوق بس طلعت الليسن 17
بس اتوقع الحين غيروا القوانين لازم يكون عمره 18 عشان الكتشه
بس لو تقول حق مدير المرور انه فالجامعه راح يسويله استثناء ويطلعله
وبالتوفيق ان شاء الله

[شارع الأصمخ]

الكجة 17 سنه

والليسن 18

ومااافي اي استثناء في الليسن

والكجه مامنها فايده والله انا كنت اسووق بكجه وانا رايح المدرسه الشرطي ع الدوار قالي وين ليسنك قتله عندي كجه

قالي صف ع جنب
وكلم الظابط وقالي امش وراي لين الحجز
احجزوا الموتر 4 ايام المفروض 3 شهور بس تساهلوا معاي



والله الموتر ماصارله اسبوعين طالع من الوكاله وانحجز قهرررر

قهرررر

وازيدكم من الشعر بيت الامتحان راح علي ولا عادوه لي



خلونا ساكتين

[شارع الأصمخ]

نسيت اقولك بالتوفيق

[بوعلي2]

الله يعينه بس لازم يسوق بهالعمر يعتمد على نفسه
والله يوفقك وتحصل مرادك

[khalid1975]

شكل صاحب الموضوع ما طرح الموضوع الا لمن لقى انه ما في فايده الا الدريول

ومثل ما قال اخونا شارع الاصمخ .. الكجه 17 سنه وبتفلسفون فيها الجماعه والليسن بـ 18سنه

فالحل عنده هو دريول .. شخص يوده الجامعه ويرده منها


الله يعينك اخوي بوعبدالرحمن وتلقى سائق (او دريول).

تقبل تحياتي ...

[منكم نستفيد]

يالربع الرجال سال عن دريول مب سال كل واحد وشو قصته ومتى ساق

هالشاب اللى عمرة 17 محد يدرى وشو ظروفه وليش ما يسوق يمكن له ظروفه الخاصه اللى احنا ما ندرى بها

على العموم الله يوفقك وتحصل مرادك

[بوعبدالرحمن9]

السلام عليكم ، مشكورين على التعليق أو ابداء الرأي ، لا تفكرون ما طرقت باب اني أحصل على الرخصة المؤقتة ولكن للعلم الرخصة المؤقتة يجب ان يكون سواق دائم بجانب المتعلم هذه شروط المرور ، ولي منكم يا طيبين عندة واسطة في المرور يتفضل يدلنا عليها اذا كان ممكن ان يحصل الشاب على الرخصة قبل ما يصير 18 سنة .
وجزاكم الله خير يا الربع

[مستثمر 999]

عزيز ابو عبد الرحمن

اليوم شفت اعلان في الشرق وتحديدا الوسيط

وريه اريتيري يدور شغل .......لدى الشركات او البيوت

اذا تبي الرقم

[مستثمر 999]

شاب مصري على درايه بمناطق الدوحه يرغب بالعمل لدى الافراد والشركات

وهذا رقمه


ممنوع كتابة الارقام على العام