هل يوجد في الدوحة مطاعم تقدم لحم الخنزير ؟؟؟؟

[شخبوط]

هل يوجد في الدوحة مطاعم تقدم لحم الخنزير ؟؟؟؟

السلام عليكم جميعا..
يمكن سؤال يكون غريب على البعض ان يقدم لحم الخنزير في قطر ،، ولكن هاذا اللي حصللي
رحت من يومين على مطعم فرايديز اللي في اللاندمارك وطلبت ستيك مع الخضار والماش بوتيتو
والستيك عبارة عن لحم بقر .. هاذا اللي كان مكتوب في المنيو
ولمن وصل الطبق الشهي وسميت بالله لقيت طعم اللحم رائع ولكن لاحظت ان حولين قطعة الستيك قطعة لحم لونها زهري وشكلها مايشهي قطعة غير عن الستيك ...مسكتها بيدي واللا كلها دهن غريب مالها رائحة ولا طعم ذقت منها قطعة صغيرة بس حسيت بشي غريب .. ناديت الفلبينية وسألتها قالت لي وهي تضحك هاذا "بوووورك" سكت وكني اكلت كف ... يمكن ماسمعت وللا اني مافهمت ...مادري .. !!!! قلت لها بس مكتوب في المنيو انها قطعة ستيك بقر "بييف" موب خنزير "هااام" قالت لا هاذا بس القطعة الصغيرة وهاذا غير الهام .. قالت هاذا حلال ... وهي عبارة عن قطعة من البقر بس منطقة غير .. مادري مافهمت اللي تقوله... وراحت .. وخليت الطبق ودفعت وطلعت .. ومادري ليش .. كان المفروض اخذ هاذي القطعة علشان يتم تحليلها .. بس مادري وين
هل يوجد مختبر لهاذي الحالات .. ؟؟؟
ارجو افادتي .. وانا فعلا ودي اعرف اذا كان هاذا بوورك فعلا وللا لا...
وافضل الواحد ياكل في بيته ... بس ايش نقول ..
ولا حول ولا قوة الا بالله

[abo rashid]

اخوي اعتقد لا يوجد مطعم على حسب علمي يقدم لحم الخنزير الا في الفنادق الفخمة و بحرص ارجوا التأكد من الموضوع

[Muslim Investor]

من تجربة شخصية لي في بريطانيا

يوجد نوع من اللحم اسمه Peperoni لكنني لست متأكدا من طريقة كتابة الكلمة
تجد هذا النوع من اللحم عادة في البيتزا ..
وهو لحم خنزير
لكن
محلات الطعام "الحلال" كما يسمونها، وتكون لباكستانيين مسلمين، تضع قطع البابروني المصنوعة من "لحم الغنم"، وتكون بنفس لون قطع الخنزير، لكنني لا أعرف هل الطعم متشابه أم لا..

ما أريد أن أصل إليه هو أن طريقة إعداد الطعام قد تختلف لتلائم البيئة حتى وإن تشابهت الأسماء.. فربما قامت الجهة المسؤولة عن إصدار التراخيص في الدولة بطلب تغيير طريقة إعداد الطعام لتتناسب مع القيم الإسلامية المعمول بها في قطر..

تحيتي

[شخبوط]

اشكركم اخواني على الرد بس مازال الشك فيني .. واعتقادي انه اكيد لحم خنزير .. ودي اعرف هل يوجد مختبر خاص اقدر اعرف فيه اذا كان هاذا اللحم خنزير وللا لا... لاني بروح وبطلب نفس الطلب وباخذ هذا اللحم معاي ... بس قبل هذا ابي اعرف اذا كان يوجد مختبرات لهالشي..لاني الصراحة القهر ذابحني ومابي اسكت
ارجو افادتي .. واسمحولي ان كان الموضوع مزعج بس مااقدر اسكت .. لو حد بعد يتأكد من الوجبات اللي يقدمونها .. لانه عليه طلب وزحمة وايد اخاف الناس ماتفرق بين الخنزير واللحوم الثانية ..
الله كريم

[بو عبدالرحمن السهم]

السلام عليكم : جزاك الله خير أخوي شخبوط على التنبيه ...........بس اللي اعرفه ان مافي مختبرات هني تحلل (في بس مختبرات الرميله ) بس هذه ماترضى تاخذ الا عن طريق جهه رسميه وما تاخذ من الآفراد لانه ممنوع ........... بس الافضل انك تاخذ العينه من اللحم وتروح على طول البلديه وتقدم شكوتك هناك ((( بس من تاخذها تروح على طول علشان العينه ماتفسد وما يرضون ياخذونها ))) وجزاك الله خير

[المستثمر]

والله كلامك اخوي صج في العيد رحنا انا والربع طلبنا استيك وبرغر لحم كان طعم الاستيك يلوع الكبد والبرغر كان عليه قكعة دهن وريحتهم خايسه الاثنين دفعنا وقمنا وترى مافي انظف من طباخ الواااالده الله يطول عمرها.

وسلامتكم

دع مايريبك الا ما لايريبك

[وطن]

اخوي

متأكد هي قالت لك بورك

ما قالت بيكن؟؟؟ Bacon

لان البيكون غير ...اللي عندنا بقطر وبالخليج عموما يكون مصنوع من لحم البقر وهو وصفه مثل ما قلت

واللي بالدول الاجنبيه يكون من الخنزير


والصراحه ما قط سمعت عن مطاعم عندنا تبيع خنزير خصوصا المطاعم مثل اللي ذكرته فرايديز ولا ابل بيز او فدركرز... الخ

[لاداعي]

اي والله اخوي شخبوط الله يجزاك خير لازم اتاكد الاني فعلآ كم مره كلت من هاي الوجبه بس ماتاكدت وفي مختبر على ما اظن في مستشفى حمد العام :anger2: :anger2: :anger2:

[golden]

اخوي شخبوط اشكرك جزيل الشكر

ولكن احتمال انك تكون مخطأ واحتمال العكس

فأتمنى التحري من الموضوع وعدم تجاهل الامر

[شخبوط]

والله اعتقد انها فعلا قالت باكون موب بورك.. اختلط علي المسمى لانه اعرف انه الاثنين لحم خنزير .. بس شلفرق ؟؟ الباكون بعد خنزير ؟؟ وللا في باكون بقر !!
أرجو انك ياوطن توظحلي اكثر .. وماقصرت اخوي تسلم

[شخبوط]

السلام عليكم : جزاك الله خير أخوي شخبوط على التنبيه ...........بس اللي اعرفه ان مافي مختبرات هني تحلل (في بس مختبرات الرميله ) بس هذه ماترضى تاخذ الا عن طريق جهه رسميه وما تاخذ من الآفراد لانه ممنوع ........... بس الافضل انك تاخذ العينه من اللحم وتروح على طول البلديه وتقدم شكوتك هناك ((( بس من تاخذها تروح على طول علشان العينه ماتفسد وما يرضون ياخذونها ))) وجزاك الله خير

مشكور اخوي بوعبد الرحمن على الافادة، وجزاك الله كل خير
انا فعلا بروح وبقدم الشكوى فقط للتأكد وعلشان ارتاح نفسيا .. مااقدر انام :( وحتى البارحة شفت في منامي انه خنزير يلحقني :court: وانا اهرب منه :eek3: .. حتى في الحلم لاحقني :anger2:
الله يستر
تحياتي اخوي ..

[شخبوط]

اشكركم اخواني كل الشكر ،، وياليت الكل يتعلم من تجارب غيره انا عن نفسي لو شكيت في شي انه موبحلال سيده بروح اشتكي في الرميله او في حمد مثل ماافاد اخوي "لاداعي"
وشكرا مرة ثانية على مروركم وعلى الافادة