رواد سيلين والعديد

[GENIUS]

السلام عليكم جميعا
جميع الأخوة الأفاضل من رواد الجنوب وبالذات منطقتي سيلين إلى العديد
بصراحة قرأت بعض التعليقات في موضوع آخر بخصوص قلص وسحب المواتر في هذه المنطقة لكن ما يحرق القلب فعلا هو الكلام الذي للأسف بعضه صحيح وهو عدم وجود الفزعة من قبلنا مع العلم بأن البعض يستطيع المساعدة لكنه يتفرج عندما يرى سيارة بحاجة للمساعدة لكن ليس كل شباب قطر يقف للفرجة وبلا فزعة
يرجى من الجميع ممن يحتاج لأي خدمة في هذه المنطقة ( تغريزة ) داعبة... صبخة .. رباض...
مراسلتي على بريد المنتدى والمساعدة مجانية وبلا مقابل في هذه المنطقة والأجر على الله

[فتى الجود]

قدها
وبيض الله وجهك

وماتقصر يالغالى

[ابن البيطار]

المشكله ان في سيلين مافي انترنت

[بن درويش]

بيض الله ويهك وماتقصر
وانا معاك عندنا ونش واذا تبي رقمى كلمنى على الخاص

[GENIUS]

راسلني على الخاص وفالك طيب وانا شابك النت حتى في سيلين

[بن رومي]

بيض الله وجهك

[Index Signal]

المشكله ان في سيلين مافي انترنت


هههههههههههه :nice:


المشكله إن البعض الله يهديهم لما تعرض عليه المساعده يرفضها و بخياس نفس و ما يلقيك ويه بعد

و تلاقيه غشيم و محتاج المساعده بس يكابر و يعاند نفسه

[&بوشهد&]

بيض الله وجهك وماقصرت

[لاميزون]

الله يعطيك على نياتك

[موظف بالبورصه]

هههههههههههه :nice:


المشكله إن البعض الله يهديهم لما تعرض عليه المساعده يرفضها و بخياس نفس و ما يلقيك ويه بعد

و تلاقيه غشيم و محتاج المساعده بس يكابر و يعاند نفسه

اي والله صدقت ...

صاادتني هالحركه مره وقفت حق واحد مغرز ومخيس النفس وياي واقوله باقلصك

يرد علي بخياس نفس يقولي لا في جمس جاي ركبت موتري حتى ماقلت سلام عليكم

ورحت ورديت ولا اشوف الجمس طاب حذاه ويحفرون له ..

مريت عليه كني ماشوفه عشان يعدل نفسيته مره ثانيه ...

وبيض الله ويهك ياراعي الموضوع ..

[رذاذ العطر]

والله الشباب ما شاءالله عليهم ما يقصرون مره كنت أنا وعايلتي في سيلين وغرزنا وجانا واحد من بعيد من عند التخييم وشافنا وجا بروحه وقلصنا جزاه الله خير إن شاءالله

[بومحمد911]

الله يجزيك خير

[ali]

السلام عليكم ورحمة الله
اتمنى من الاخوان ماحد ياخذ بخاطره على كلامي هاذي ارزاق وكلن ياخذ رزقه ماتعرف ظروف الناس
الريال ورفيجه يترزقون وفي ايام الاسبوع و((24 ساعه)) ومقابل مادي بسيط ومب استغلال للناس او ابتزازهم الشغله سحب كباين وكرفانات ولا طايح ببحر ولا صبخه يعني التغريزه او طايح برباض هاذي مستحيل ياخذ فيها شي الشلغه مب استغلال وماده
الشي الثاني
يعني واحد ما يبي يخرب سيارته بالسحب او مايقدر يجيبها من العديد يعني صار مافينا خير ولا فزعه يعني يوم الثلاثاء امس الساعه 1 ونص اتصل شخص يبي يطلع من الصبخه طلعنها ونقص سيم الونش ولا رجعو الشباب الا الساعه 6 الصبح هل في شخص عنده استعداد بي وقت يروح وبدون مقابل مادي وبكل وقت يطرش لي رقمه وانت بعد يالغالي طرش رقمك وبكلمك ومن عيوني بس بشرط تلتزم و تجي تسحب بكل وقت

الغريب انك ماسويت حمله يعني يوم علام ذبح العالم في سنتين :) ويدفعهم غصب وبفلوس وبأسعار خياليه
مغرس 500 والصبخه ياخذ 4000 ريال والشباب موجوده وبتكلم حتى جوالاتهم ياخذها :)
ماحد اعترض ولا شل حمله عليه كلن يدفع وراضي
على العموم
بارك الله فيك وكثر الله من امثالك يالغالي
والسموحه من الجميع

[X5 QaTaR]

الحمدلله انا اشوف الشباب من تغرز يوقفون لك على طول (( تامر شي الشيخ ))

وانا الحمدلله كل ماشفت حد ماتعطل وقفتله ..

بس مره من اسبوعين (( اجنبي )) عربي بدون ماقول الجنسيه ..

عنده جي اكس ار طايح في رباض طلعته بالدبل العوود هلك الكلج والشباب معاي يحفرون

وهم تقريبا 6 اشخاص محد فيهم تنزل يحفر ..

رفيجهم عنده الشفر البيكم الي نفس الكدلك قاعد يدور حوالينا بعد غرز واطلعه هو الثاني

يالربع محد قال شكرا ..

شتقوووووول فيهم ذيله ... بس يالله الاجر عند رب العالمين

وتبون الصج تسلينا شوي

[hxamad]

والله ماقصرت أخوى الله يعطيك على قد نيتك

[احساس غريب]

والله كفو وبيض الله وجهك..\

انا مره صادني موقف وهو اني كنت مع واحد من الربع سليطي رادين من العديد ف موتري وانا اللي كنت

اسوق وغرزنا عالسيف وكانت المايه تسقي علينا وكنت صج متوهق وهالكلام الصبح الا واحد ياجماعه

عنده استاندر ابيض يوم شفته استانست قالي انا بقلصكم بس ب 500 ريال انا استغربت يعني مب مبين على

الريال الفقر بالعكس المهم رفيجي السليطي حس ان الريال جنه غالط علينا قاله يبا توكل على الله انشالله

بنتدبرها والموتر مافي امل يطلع الا واحد يقلصه عاد راعي الاستاندر راح وقف فوق الطعس يدري ان

السالفه فيها نكبه واننا غصب بندفعله عاد شاورت رفيجي وقلتله الا قالي ينصب علينا قلت معليه لاحول ولاقوه

نصيبه قال اوكي ناديت الريال الا الريال قال لا على كلام رفيجك انا مب قالصك الا ب 700 ريال ياجماعه

المشكله انه قطري لو اجنبي بقول يمكن بس انه قطري قلتله يبا طلعنا من الغراز وبدفعلك 700 وفعلا طلع

الموتر وعطيته فلوسه بس الصراحه غريبه انا اتوقع انه يتحبل حق العالم اللي يغرزون ويدفعهم..

[موظف بالبورصه]

والله كفو وبيض الله وجهك..\

انا مره صادني موقف وهو اني كنت مع واحد من الربع سليطي رادين من العديد ف موتري وانا اللي كنت

اسوق وغرزنا عالسيف وكانت المايه تسقي علينا وكنت صج متوهق وهالكلام الصبح الا واحد ياجماعه

عنده استاندر ابيض يوم شفته استانست قالي انا بقلصكم بس ب 500 ريال انا استغربت يعني مب مبين على

الريال الفقر بالعكس المهم رفيجي السليطي حس ان الريال جنه غالط علينا قاله يبا توكل على الله انشالله

بنتدبرها والموتر مافي امل يطلع الا واحد يقلصه عاد راعي الاستاندر راح وقف فوق الطعس يدري ان

السالفه فيها نكبه واننا غصب بندفعله عاد شاورت رفيجي وقلتله الا قالي ينصب علينا قلت معليه لاحول ولاقوه

نصيبه قال اوكي ناديت الريال الا الريال قال لا على كلام رفيجك انا مب قالصك الا ب 700 ريال ياجماعه

المشكله انه قطري لو اجنبي بقول يمكن بس انه قطري قلتله يبا طلعنا من الغراز وبدفعلك 700 وفعلا طلع

الموتر وعطيته فلوسه بس الصراحه غريبه انا اتوقع انه يتحبل حق العالم اللي يغرزون ويدفعهم..


هذا المفروض تقوله اوكي باعطيك ..

اول مايطلع موترك تلقمه الواحد وتمشي عنه ..

ماعرفت له ..

[احساس غريب]

هههههههههههههههههههههههههههههههه
والله رفيجي قالي قلت لا قدر وجهه

[بوحارب]

بارك الله فيك

[أبو صطاب 89]

مشكلتنا طيبين واهل فزعه

[GENIUS]

بصراحة انا ما طرحت هالموضوع إلا لغرض واحد وهو إننا أهل فزعة وواجب
الأخ علي صاحب الموضوع الآخر نحن هنا لا نقطع رزقك ولا نفسد عملك بل القصد شيء آخر وانت أعتقدت بأن هذا رد على موضوعك لا يا أخي الكريم وألف لا الفكرة هي فقط بأن أهل قطر أهل واجب وكرم وفزعة وشوف ردود الأخوة الأفاضل وبتعرف المقصد فسواء أنت ومجموعتك أو علام السوداني هذه أرزاق يقسمها بينكم رب العباد لكن الفزعة والواجب والله بتلقاها من ألف غيري وغيري فلا تفهم الموضوع بأنه موجه لك فقط

واكررها صدقني ارقامي موجودة للي يبغيها على الخاص وصدقني في غيري بيفزع قبلي وهذا العشم في أهل قطر

وعذرا على الإطالة ولكن لتوضيح مابين السطور

ولكم جميعا كل التحايا وسلامتكم

[زمن الغدر]

انا يالربع واحد من الناس عندي موتري وعندي قلص والله كم مره اقلص العالم وخاصه العوايل بس الانقليز ماقلصهم او هنود لانه يجيك ببيكم يبي يضرب طعس ولا انا هو الخبره ماينسم
اذكر مره وره طعس التوقيع عايله قطريه كان يوم سبت الساعه 12 وشي ابلليل طايحين برباضه وانا كنت مار عاد وشو موترهم سوبربان باليه يلعن يومه هههههههه هلك موتري وانا اقلصه
المهم الريال يحلف انه من ساعه ونصف مغرز
وعقب ماضهرته جيت اسلم عليه وافك القلص الا الريال ظهر من مخباه 500
تدرون يالربع كرهت نفسي وربي
معني ماطلبت شي منه ولا عمري سويتها
لك الريال الي معاي قاله ترى ماعلينا قصور يالشيخ قاله ليش تبون اكثر من 500!!!!!!!!
يوم قال كذا انا قتله والله اني متحسف اني ضهرتك ولا حنا جناك عشان فلوس قتله
قتله تزكا فيها ابرك ولا تبرع فيها عنا

[احساس غريب]

انا يالربع واحد من الناس عندي موتري وعندي قلص والله كم مره اقلص العالم وخاصه العوايل بس الانقليز ماقلصهم او هنود لانه يجيك ببيكم يبي يضرب طعس ولا انا هو الخبره ماينسم
اذكر مره وره طعس التوقيع عايله قطريه كان يوم سبت الساعه 12 وشي ابلليل طايحين برباضه وانا كنت مار عاد وشو موترهم سوبربان باليه يلعن يومه هههههههه هلك موتري وانا اقلصه
المهم الريال يحلف انه من ساعه ونصف مغرز
وعقب ماضهرته جيت اسلم عليه وافك القلص الا الريال ظهر من مخباه 500
تدرون يالربع كرهت نفسي وربي
معني ماطلبت شي منه ولا عمري سويتها
لك الريال الي معاي قاله ترى ماعلينا قصور يالشيخ قاله ليش تبون اكثر من 500!!!!!!!!
يوم قال كذا انا قتله والله اني متحسف اني ضهرتك ولا حنا جناك عشان فلوس قتله
قتله تزكا فيها ابرك ولا تبرع فيها عنا

صدقني الرجال على اعتقادي انه من الفرحه ماعرف شلون يكافئك لان المكان اللي هو مغرز

فيه مايمرون عليه عالم وخصوصا انه يوم عادي مثل يوم السبت يعني نادر مايحصل حد يقلصه

وانت يعني عالعموم ماقصرت هذا اهم شي وفي مقوله عمي قالها لي من وانا صغير قالي

(ترىياولدي الطيب فرص واذا جاتك هالفرص لاتفرطها) ..

[جونسون]

جزاك الله خير

[Sharshooooor]

بيض الله وجهك وبارك الله فيك

بس ياخي التمس الاعذار يمكن واحد ماعنده قلص او مايعرف يدرول
واللي يبط جبدك كل اسبوع سيارتين هايلوكس سنفل يتواجدون هناك وكلة مغرزين
اكيد شفتهم
ههههههههههههههه
شيجيبهم كل اسبوع ويسوون مشاكل للناس

[professonal]

بيض الله وجهك

اشهد انك راعي فزعة وواجب وجزاك الله خير

[hamoor4ever]

بصراحه يااخوي شبابنا مايقصرون بس مثل ماتقول انا كنت كم مره اقلص حد وغالبا من الاجانب بس اكتشفت عقب انهم مايستاهلون وخاصه اني اهلك موتري علشانهم يعني مثل مايقولون لك الشباب انت تحفر وتقول لهم دزو وهم يقعدون يتفرجون عليك لا والقهر ساعات يركبون السياره وانت تبي تقلصهم واذكر مره كنت ابغي اقلص واحد وهلك موتري وانا احاول اطلع فيه وبغيت اغرز معاه واخر شي الحبيب الدبل مب مشغله وانا اقول له انت مشغل الدبل يقول لك اي ، يعني تعبي على الفاضي اما شبابنا القطرين اغلبهم اذا رحت لهم بيقولون لك مشكور وجاينا واحد بيساعدنا ومن عقبها صرت ماافتكر بصراحه بعدين لاتلوم الشباب يعني اذا شاف واحد مغرز في صبخه من بيفكر يقلصه الا اذا هو ناوي انه يغرز معاه ، فيحتاج واحد عنده خبره يكون افضل والبعض ماعنده لا خبره ولا قلص بعد

عموما مشكور اخوي

[S A L M A N]

كفو والله

والله يعطيكم العافية

[بوخالد911]

كثر الله من أمثالك

وعساك ذخر

[الواصـل]

مشكور وجزاك الله خير .. وبيض الله وجهك ..

[A.L.I]

بيض الله وجهك

[الصامل999]

موفق خير

[سبع قطر]

الله يكتب لك الاجر

[Mansour_qa]

ذكرتوني في مرة غرزت في صبخة طلعني بوحوض أيام التيوتا والدرولة الله يعين ..:nice:

وجزاك الله ألف خير ..:victory:

[لاداعي]

جزااااااااااك الله خير يالذيب

[مفلوز]

جزااااااااااك الله خير

[moaam_79]

اهل قطر اهل فزعه وانا اشهد والكل يشهد

والله يحي اصلهم

[شارع الأصمخ]

بيض الله وجيهكم

وانا عن نفسي كل ماشفنا واحد مغرز طلعناه
حتى لو مانقدر بس نحاااول

[نغم الحياة]

اللله يقدرك على عمل الخير

[حمد]

اذكر مره غرزت عند بحر راس بوعبود ... صوب نادي الدوحه... شنو احراج ... يمكن من عشر سنوات او اكثر ..... صج من زمان

[شيخ ش قطــر]

بيض الله وجهك

وبارك الله فيك

[GENIUS]

مشكورين جميعا على الردود والتواصل والتفاعل مع الموضوع

يرجى من جميع من يرغب بالتواصل المراسلة على بريد المنتدى للتزود بالأرقام للإتصال عند الحاجة

وكلي يقين بأن كل شباب قطر أهل فزعة وواجب

ولكم جميعا كل التحايا

[alda3e]

جزاك ربي كل خير

[keyo]

بيض الله وجهك
والله يكثر من امثالك