مسقطهم ومسقطنا

[الوجبه]

السلام عليكم

من فتره زرت مسقط .. عاصمه سلطنه عمان ... كانت زياره سريعه .. ممكن احد ما زار مسقط

يقول ان الشعب العماني شعب متواضع وطيب وبعيد عن اي (مناوشات) سياسيه خارجيه ..

وهذا صحيح .. بس الدوله مركزه على شعبها اكثر وعلى امورها الداخليه ..

طبعا انا في سفراتي ابحث عن (تكسي) فيه مواطن او راعي البلد .. اسمع منه هموم بلده

ومشاكلها وايضا انجازاتها يعني (فضفضه) راعي التكسي حلوه :) .. المهم

صادني ذهول من نظافه شوارعهم وترتيبها وتنسيقها مع العلم ان عمان تجيها امطار

وفيضانات واعاصير بشكل غير طبيعي .. لكن بعد فتره تشوف الشوارع من افضل ما يكون ..

قلت حق راعي التكسي (بن مرهون) يا بن مرهون ما شاء الله شوارعكم نظيفه انا

ابغي اشوف بس غرطاس او كيس مرمي مش محصل .. قال لي انت الحين لو ترمي

المنديل اللي بيدك انا ممكن ارميك وراه (وضحك) .. قلت له يا بن مرهون لهذه الدرجه

عندكم قوانين قويه .. قالي كيف .. والله تنسحب رخصنا وننغرم وممكن ننسجن اذا تكرر ..

انا سرحت شوي وتذكرت (سوبر) بقطر مار جدامي و(القطريه) توها متعشيه (كنتاكي)

في الموتر مع عيالها وبعد ما خلصت نزلت الجامه وطلعت يدها اشكبر وحذفت الكيس

على يمين الشارع ..

سرحت شوي .. قال لي بن مرهون ايش فيك ..

قلت له والله يا بن مرهون عندكم بلديه قويه وناس مهتمه بالنظافه .. وبعدين دخلت معاه

شوارع فرعيه ولقيتها انظف من الشارع الرئيسي .. قلت له يا بن مرهون الشوارع

الفرعيه انظف من الرئيسيه .. قال لي هذه المنطقه والبيوت كل بيت يهتم بالشارع اللي امامه

وايضا مسئول عنه ..

وعليهم بعد مخالفات في حال مرت البلديه وشافت اي وساخه وقال لي شي غريب ..

يقول اي بيت فيه سياره تسرب منها بترول على الشارع او آيل يتحمل المسئوليه صاحب

البيت اللي راكن سيارته ..

يقول لي النظافه حاجه مقدسه عندنا .. قلت له يا بن مرهون ما اتسلمونا بلديتكم

شوي بس ..

المهم انتهيت مع بن مرهون .. ويوم رجعت قطر .. قلت بدخل موقع بلديه مسقط

وبشوف كيف الاهتمام .. وياليتني ما دخلت .. شفت اللي اذهلني في سبيل منع الغش

والمحافظه على الاسعار ..

http://farm4.static.flickr.com/3131/3211138095_f2cc8a37b7_o.jpg

الاسعار كلها في موقع البلديه .. يعني اذا رحت تشتري وقال لك والله هذا سعره مختلف

ممكن تتصل البلديه او اتسحبه للمركز ..

ما حبيت اعمل مقارنه .. لان الصراحه بتكون ظالمه بينا وبينهم ..

الله يحفظ اهل عمان ويحفظ لهم شعبهم .. والله شعب طيب وقلوبهم على بعض .. ما عندهم

الحسد او الحقد .. ما عندهم والله هذا عنده اكثر من هذا.. ما عندهم (تجار)

جشعيين مستغليين .. كل فتره زاد في السعر .. الاسعار مراقبه وكل حاجه بسعرها ..

انا اتمنى ان (ربعنا) يزورون بلديه مسقط .. واتمنى ان تجارنا يشوفون (اخلاق) تجار

مسقط وكيف يتعاملون مع شعبهم واشكر كل الشكر كل من يساهم في مسقط في القضاء

على الغش التجاري وحمايه المستهلك وردع التجار ولا عزززززززززززاء على تجارنا ..

نسخه لحمايه المستهلك
نسخه لبلديه الدوحه
نسخه فاضه .. ارسلها بكيفك
نسخه المجلس البلدي

هذا موقع بلديه مسقط .. شوف الجوائز بس ..
http://www.mctmnet.gov.om/newweb/

[نشميّه]

والله شي عجيب ياخوي ..
ماشالله عليهم أحسهم شعب طيب ومحترم ..
وكل واحد مايستحي من شغلته ومتواضعين :)
أشكرك على مشاركتك لنا تجربتك

[غدير البورصه]

عاشت الثقافه والعلم
وعاش الانتباه والملاحظه القويه عندك يا الوجبه ما شاء الله عليك مفتح عيونك ومنتبه.
وانا اقول شهالنظافه عندهم في صلاله ومسقط

اها من قوانين البلديه
شكرا يا الوجبه على الاخبار المفيده والهادفه

[بوعلي2]

انا رحت مسقط وعدل كلامك شوارعهم نظيفه وديره مرتبه بس مافيها بنايات كبيره كل بيوت وشقق وفنادق ولكنها ديره شي شي

[Gold Boy]

الشعب العماني متطورين و منفتحين , و دليل في ذالك وجود شباب العمانين في اغلب مجالات العمل و ناجحين , من الصغير إلى الكبير ... و نشوف النساء ايضا في اغلب المجالات العمل ... من السفيرات و الوزيرات و المهندسات ...

بس إعلامهم سيء , ولا ينقل صوره المتطوره لها ...
ايضا هي مهتمه بنظافة شوارعها و نظامة , و ما اعرف ليش نلاحظ بيوتهم اغلبها بلون الابيض او مشتقات اللون الابيض , و كل ابنيتهم الرسميه من الوزارات او غيرها تبنى على شكل قلاع او حصون ... بمعنى طابع تراثي ....

... (( يا حلات حلوى العماني )) ...

[الخارجية]

تسلم أخوي الوجبه على المعلومات الطيبه

[alwahesh]

الله يخلي الاستعمار البريطاني

انت تتكلم عن عمان اليوم اجل لو تشوف عمان قبل 20 سنه ايش تقول

انظف من لندن وباريس

ونفس الشي في البحرين قبل 25 سنه تحس انك في لندن طبعا قبل الغزو السعودي

وفي قطر خلهم يسرحون الهنود والبنقال والبتان امشي وا.............الله يهديم

بدال ما نعلمهم السنع احنا تردينا وقمنا نقلدهم

وللاسف في الفتره الاخيره قمت اشوف قطريين وخاصه عند الاشارات يفتح الباب و,,,,

[ضوى]

بكل امانة انا رحت مسقط

بلاااااااااد نظيفة صج وبالفعل قوانين عندهم

الله يفتح على بلادنا يارب وتصير احلى بلد خليجي بس بدون انفتاح عالبحري

[هتـان قطر]

ماشاءالله تبارك الله..عمان صارت يابان الخليج..:nice:

انا ملاحظه عليهم التطور في كل المجالات والدليل

صبرهم وتخطيطهم لاعداد منتخب جديد قوي قادر على

احراز البطولات..وكاس الخليج اللي خذوه ماهو الا صبر

وجهد امتد لسنوات..

بالنسبة للفرق بين بلديتنا وبلديتهم اعتقد بعد اللي قلته يالوجبة

حرام نظلم بلديتهم ونقارنها ببلديتنا ..يكفي ان موظفين البلدية عندنا

ما يداومون الا ايام قليله وكل موظف يقدم خدمه للثاني وينوب عنه في

التوقيع..خصوصا وقت المقناص ..:anger1:

استغرب كيف يحللون معاشهم ويطعمون عيالهم من مال ما تعبوا فيه..!!



احنا محتاجين دورات اذن في مسقط لاداريين ومدراء وموظفين البلديات عندنا..:victory:

[شويهينــه]

ماشاء الله عليهم

ان شاء الله الجمعه هذي انا رايحه عمان ومتحمسه للسفره وايد

وهالشي اللي ذكرتوه عن الشعب العماني طبعا كلنا عارفينه من زمان بس بين واضح في وقت دوره كاس الخليج

شفناهم شلون كانوا يفرحون مع اي منتخب يفوز في اي مباراه

الله يحفظهم ويعطيهم على قد نيتهم الصافيه

[فاكس727]

انا سرحت شوي وتذكرت (سوبر) بقطر مار جدامي و(القطريه) توها متعشيه (كنتاكي)

في الموتر مع عيالها وبعد ما خلصت نزلت الجامه وطلعت يدها اشكبر وحذفت الكيس


ههههههه

ولا تنسى الي يجلسون على الكورنيش . تعال شوف مكانهم بعد ما يقومون .

[شسالفة...؟]

شسالفة...؟ يسلم عليك :

ببساطه أخي الكريم الموضع يبيله ثقافه مجتمعيه واللي للأسف هي ضعيفة عندنا وإن وُجدة أحاين كثيرة ما تًتجاهل

والنقطه الثانيه الوضع الأقتصادي لهذا المجتمع سيحكم على تصرفاته

والنقطه الثالثه أن كان المسؤل لديه ثقافه مجتمعيه عاليه تجاه مجتمعه سيكسبها لهذا المجتمع من خلال قراراته

والنقطه الأخيره يا حبي لأهل عمان كل ما عرفت واحد منهم لقيته اطيب من اللي قبله

[السامـي]

بصراحة الشيء هذا مو من هالحين،انا كنت عندهم قبل 13 سنة،

ولفت أنتباهي ما لفت أنتباهك،من محافظتهم الشديدة على (النظافة)،

وحبهم للـ (نظام)،وقبل كل هذاالسعي لمساعدة (الغريب) بآي طريقة.

شكراً لك يا الوجبة.

[الوجبه]

ممكن نقول تعتمد على (الثقافه) مثل ما ذكر اخونا شسالفه

[rashid-1]

شسالفة...؟ يسلم عليك :

ببساطه أخي الكريم الموضع يبيله ثقافه مجتمعيه واللي للأسف هي ضعيفة عندنا وإن وُجدة أحاين كثيرة ما تًتجاهل

والنقطه الثانيه الوضع الأقتصادي لهذا المجتمع سيحكم على تصرفاته

والنقطه الثالثه أن كان المسؤل لديه ثقافه مجتمعيه عاليه تجاه مجتمعه سيكسبها لهذا المجتمع من خلال قراراته

والنقطه الأخيره يا حبي لأهل عمان كل ما عرفت واحد منهم لقيته اطيب من اللي قبله

السلام عليكم

بالسابق كثير من المواطنين القطريين غير مهتمين بالمحافظة على نظافة المدينة لكن اليوم الغالبية يهتم ولايرمي الأوساخ من نافذة السياره لكن لازال هناك فئة ترمي أعقاب السجائر لكن اللي مايهتمون بنظافة قطر هم الأجانب وخصوصا الهنود يوميا أنا أشوف ظاهرة البصق بالشوارع



وأنا أطالب بوضع قوانين صارمة كالتي هي في عمان لتأديب من يحاول تشوية المدينة والمفروض على وزارة البلدية ان تستغل موظفينها ( البطالة المقنعه ) في مراقبة هؤولاء وخصوصا الأجانب بالإضافة إلى توعية الأجانب من خلال كتب إرشادية صغيره تحث على تحسين السلوك في الشوارع


وبالأخير

شكرا أخ الوجبة على موضوعك وأنا أصابني فضول لزيارة مسقط ورؤية البلد عن قرب من خلال ماسمعت عنها أثناء دورة كأس الخليج من تعامل شعبها وجمال البلد وان شاء الله نزور قهوة المكان :nice:

[ولد الخال]

العمانيون هم المثل للمواطن الخليجي كيف يجب أن يكون

الله يوفقهم ويسدد خطاهم

لا بترول ولا غاز

لكنهم أحسن الناس

هم والبحرينيون

صحيح من قال المال مو كل شيء

التربية والثقافة والعلم هي كل شيء

[الوجبه]

http://img15.echo.cx/img15/9495/omannord277ha.jpg

شوف الشوارع الداخليه .. قارن بينها وبين شوارعنا الداخليه .. او عند اي سوق من اسواقنا

انا متعمد مكبر الصوره .. شوف النظافه كيف

[JoOoOoOoJ]

السلام عليكم

بالسابق كثير من المواطنين القطريين غير مهتمين بالمحافظة على نظافة المدينة لكن اليوم الغالبية يهتم ولايرمي الأوساخ من نافذة السياره لكن لازال هناك فئة ترمي أعقاب السجائر لكن اللي مايهتمون بنظافة قطر هم الأجانب وخصوصا الهنود يوميا أنا أشوف ظاهرة البصق بالشوارع



وأنا أطالب بوضع قوانين صارمة كالتي هي في عمان لتأديب من يحاول تشوية المدينة والمفروض على وزارة البلدية ان تستغل موظفينها ( البطالة المقنعه ) في مراقبة هؤولاء وخصوصا الأجانب بالإضافة إلى توعية الأجانب من خلال كتب إرشادية صغيره تحث على تحسين السلوك في الشوارع


وبالأخير

شكرا أخ الوجبة على موضوعك وأنا أصابني فضول لزيارة مسقط ورؤية البلد عن قرب من خلال ماسمعت عنها أثناء دورة كأس الخليج من تعامل شعبها وجمال البلد وان شاء الله نزور قهوة المكان :nice:

يعني ليش بس الاجانب اللي لازمهم توعيه ....ياخي الكل محتاج نوعيه بخصوص نظافة البلد .....استغرب منكم الهجوم الشديد على الاجانب ....كأنه الاجانب جايين البلد مشان بس يمو سجاير وورق ووسخ من الشبابيك ....ياخي الكل مشترك بهالموضوع ....ولعلمك بعد الاجانب عندهم خوفمن القوانين اكتر من ابناء البلد ....لأنه اولا واخرا اجنبي و مجبر يحترم قوانين البلد ....و كل الناس خير و بركه يا rashid-1

[السهم الحلال]

العماني إذا جاء الدوحة بسيارته

أول شي راح يتفاجأ بطريق سلوى

ويحمد ربه انه نجا ووصل

والله يعينه إذا مر صوب الصناعية ( تدرون في لوحات داخل الصناعية مكتوب عليها بوسمره)
أكيد راح يحرم يجي بسيارته مرة ثانية