حد يقدر يقيدني وين اقدر اشتكي على شركه الرنج الله لايهينكم

[الهيدبارك]

ياليـــيت حد يفيدني نااااااااوي على الشر الله يبعدنا بس شركه الفردان قسم السيرفس يدورون الشر

[بـــ ح ـــر]

مرحبااخوي شوف رقم شركة الطايراللي في الامارات هم المسؤلين عن الرنج في الشرق الاوسط وكلمهم

[qatar.1995]

ابداء بوزارة الاقتصاد قسم حمايه المستهلك

و فرع الشركات

عن طريقه بدل الامور القانونيه

[الـخـور]

محق وكاله .. نسمع عنها شكاوي وايد

[الفهد1]

روح العاصمة وافتح بلاغ وهم بيحولونك على النيابة والنيابة بتحولك على المحكمة والمحكمة بتنظر في شكوتك وانشاء بينصفونك

[سهم متردد]

امن الريان في المنطقة الصناعية

مجرب

[diab911]

اخوي ممكن نعرف نوع الشكوى

[محمد عبدالرحمن]

أنا مع أخونا بحر، أو إنك تقابل عمر الفردان.

أنا شخصياً فعلا مب راضي عن خدمة الفردان للسيارات، عندي جاغوار مطلعها من الوكالة السابقة، و عانيت من ضمان الفردان و كل دخلة للسيارة تكلف ١،٧٠٠ ريال (تشييك كامل مع تغيير الزيت) مع إن السيارة ماشية الحين أقل من عشرة آلاف كيلو. يعني الجاغوار مع الفردان أغلى من اللمبورغيني مع الدانة للسيارات من واقع تجربة، و أتوقع اللي عندهم رنجات يعانون أو بيعانون أكثر مع الفردان قريباً.

تحياتي،
محمد (الديان سابقاً)

[عين الحر]

مرحبااخوي شوف رقم شركة الطايراللي في الامارات هم المسؤلين عن الرنج في الشرق الاوسط وكلمهم

هذا هو الفعل الصحيح ....لان هو الوكيل الاقليمي في الشرق الاوسط كلمهم وبعد ذلك ابعث شكوتك
بالايميل للشركه الام من خلال السايد تبعهم ...يعني بالعربي شعللها والله الموفق.

بس اخوي ليش تبي تشتكي ايش السبب

[وحيد-الشوق]

عيل وين الي يمدحون وكالة الفرادن وسيرفسهم :rolleyes2:

الظاهر عدوى شركة عبدالغني انتقلت للفردان :anger1:

حسبي الله ونعم الوكيل حقوقنا ضاعت في كل مكان ناصبين علينا :(

[الهيدبارك]

السالفه ظريت رصيف من فتره وصار في السياره كم عطل وصلحتها في الشركه وشيكو عليها المهم تميت 7 شهور ولا احسن من السياره طلع فيها صوت في السكن وصوت وراء اذ جيت تلف بعض المرات وديتها فرع الاند وقالو لي في قطع يبي تبديلها قلت بدلوها قالو على حسابك قلت ليش قالو صايدها حادث قلت انا مصلحها في الشركه موب في كراج شاحنات قالو تبي ادفع ماتبي شي راجع لك المهم دفعت وامري لله مستعجل وقلت مابي اجي ثاني مره حق عطل واتقولون حادث وخرابيط قالو لا ان شالله ويقصوني ب 5000 المهم خذت السياره وتوني واقف ماطلعت من الكراج الصوت لين الحين موجود قلت يالليل اللي موب معدي ناديتهم وسمعتهم الصوت شيكو على السياره قالو الاستيرنق يبي له تبديل قلت يالله همتكم قالووو حبيبي ادفع فلوس السياره صايدها حااادث يعني كل مره اجي اتقولون حادث لين متى لين اتقولون خارج الضمان شستفدت من الضمان ليش اصلح السياره في الشركه مدام بتذلونا المهم طلعت وتميت فتره قلت خل اروح لصناعيه وسلمتهم السياره وسمعتهم الاعطال اللي بسياره وقالو لي كل الاصوات يتحملها الضمان قلت خير وبرك تمت السياره من يوم السبت لين الاربعا يوم جاء الظهر اتصلو لي قالو لي ترى القطع على حسابك قلت ليش ان شالله قالو صايدها حادث ليش مابدلت الافريم اللي تحت لن هاي يمكن يسبب ظرر اهاااااا مدام انت ركبت القطعه الجديده على الفريم فمعناته انه عااادي قال لا بس يمكن يسوى ظرر مستقبلي قلت الزبده قال ادفع فلوس قلت اشبع من السياره واذ زهقتو منها كلموني اتصلو لي يوم طلعت قالو بنسوي لك خصم قلت ولا ريال المهم قالو بنزل القطعه وانت طالع ادفع فلوس مال التشييك قلت بعد

هاه فهمتو السالفه يعني شتبون اسوي معهم عقب هاي كله

[HEART_LION]

مثل ماقالوا اخوانا افتح بلاغ وبيتحول النيابه وبينظرون في موضوعك

وانشالله بتاخذ حقك

[وحش قطر]

راجع بنود اتفاقية الضمان اول شي لا تنقلب السالفة عليك

[milan]

الحمدلله تخلصت من هالموتر قبل سنتين بالبيع بعد خروج السياره من الوكاله ب 4 شهور !!

وقبل مابيع الموتر راسلت الوكيل في الشرق الاوسط بالايميل !!

الله يعينك اخوي

[قطري 22]

اانا قبلك اششتكيت على شركة الهمر عند الوكيلل الاقليمي
ولاحياة لمن تنادي
حتى امريكا حاولت اراسلهم مالقيت لهم عنوان
و اي حد اراسله يحولني على الوكيل الاقليمي في مصر

[الـقـاسـي]

الله يعينك على بلواك خلك ع التويوتا ابرك لك

[Abdulla86]

بصراحه انا عندي بي ام الفئة 7 واشتكيت على الفردان للمدير الأقليمي في دبي وطرشت إيميل لقسم خدمه العملاء في المصنع في المانيا وبصراحه درشولي فني من المانيا وحل المشكله في سيارتي

والحمد لله انا بحياتي ماقط شتكيت من الفردان إلا في هالمرة

[مستثمر111]

حقك ضايع من الحين اقولك لا تعب نفسك انا انصبو علي عيني عينك واشتكيت عليهم وطقعولي اشتكيت عند كل الناس الي في الوكاله من الفراش لين عمر الفردان وفي الامارات وفي الشركه الام مافي فايدة كان ردهم لي من قالك تشتري رنج عن طريق بدل بسيارة

[rashid700]

زين والله
وانا كان ناوي على اول زياده في الراتب اروح اطلع لي رنج من الفردان
مادام السالفه كذا لا عز الله هونت

[الخاص]

روح المحكمة المدنية وارفع شكوه عليهم وهم بياخذون حقك اسأل مجرب

[الألماسي]

طيب التأمين الشامل شـ محله من الإعراب . .!!!

هل يشمل التأمين ضربه الرصيف مثلاً . .!!!!!!!

[شمسة]

ياليـــيت حد يفيدني نااااااااوي على الشر الله يبعدنا بس شركه الفردان قسم السيرفس يدورون الشر


انا عندي لك طريقة حلوة وعن تجربة
:nice::nice::nice:
اتصل(( جريدة الامارات اليوم )) وافضحهم علاني يوم بتقول لهم بتصل الجريدة بيركضون وراك الوكالة

[بوسعد82]

الله يعينك أنا بعد صار لي موقف معاهم ودعمو سيارتي داخل الفرع ونقعوني أسبوع لين ما صلحوها لي ، بعدين بعت السيارة وخذت لي تويوتا ، والحمد لله كل شيء تمام ....
نصيحة بيع سيارتك وفتك ،،، وإن شاء الله يجيهم يوم ...

[lawyer]

:victory:'واحد من الربع طرش ايميل للوكالة الام وبعد كم يوم جاه اتصال من دبي وشرحلهم المشكلة وبعدها اطلبوة الوكالة الي في السد وحلو المشكلة والحين امورة في الوكالة فوق النخل

[ابوعبدالعزيز]

الرنج عنده وكيل اقليمي في الشرق الأوسط اظن في جبل علي ، وعندهم إيميل على النت ممكن اتطرش شكوى على الشركة وإذا ما نفع طرش على إيميل الشركة في بريطانيا .


تحياتي .