تقييمك لحفل " طيور الجنة " ..

[شاي كرك]

ها بشروا وش صار في حفل " طيور الجنة " ؟؟؟

يقولون ان نص الدوحة كانت موجوده في الحفل ومستائين من وضع الحفل داخل مجمع اسباير ويقولون انه لو تم وضع الحفل في الاستاد الرئيسي كان افضل نظرا للاعداد الكبيرة من العائلات اللي احضرت ..

واليوم الثاني من الحفل يقولون ان الفرقة اعتذرت وألغت الحفل ....!!


شلون كان الوضع ؟؟


وللعلم هذه هي المشاركة الثانية لهم في الدوحة .. فهل كانت ناجحة وتداركوا الاخطاء الماضية ؟؟؟

[ALHAJAJI]

انا صرحت ما وديت العيال
بس اللي سمعتة انهم صكروا البوابات قبل بداية الحفل بساعتين . والتنظيم داخل كان الله بالخير

[عضو قديم]

انا بيتي جدام اسباير بالضبط ومع ذلك ما قدرت اودي اعيال

[Sharshooooor]

انا قلت لام العيال تحملي تودينهم
لاني جربت الحفلة اللي طافت في قاعة المعارض
وكانوا عيالي بيتأذون من الجمهور اللي يمشي مايشوف قدامه
لدرجة اني قمت اصارخ عالناس واضربهم
جد كان التنظيم الله بالخير

[khalid.qtr]

كان المكان مزدحم

[Only Me]

االمكان زحمه وايد بس التظيم حلو وممتاز
والجمهور كان متفاعل ومستانس والكل طلع فرحان والي مادخل نتمنى له حظ اوفر بالمرات القادمة

[شيزكيك]

الصراحه المكان كبير وانترس من الناس لدرجة حتى السلالم اقعدوا عليها لناس

بس الي حز في خاطري وايد ان في حريم قاعدين على السلالم واي حد يبي يركب الدرج

او ينزل يضطرون انهم يقومون والرياييل مسمتين على الكراسي والحمدلله طلعت شوي

بدري ودليتهم على كراسينا

والحفله حلوه واليهال استانسوا

وما ادري ليش كنسلوها لانهم قالوا بتكون بس حق الحريم واليهال وهالشي المفروض

يصير في كل حفلاتهم

[قناص الخليج]

حتى المدرج المجاور كانوا ناس جالسين فيه ويشاهدون الحفله عن طريق الشاشه

بصراحه لازم يكون التنظيم افضل وخاصه انكم دعيتوا اطفال

والله قدام عيني ان اطفال يصيحون عند الباب وهم واقفين مب راضين يتحركون على الرغم من ان الباب مغلق من الساعه خمس العصر

[بنت ذياب]

كان وايد زحمه ..

خواتي لصغار راحوا

اول شي مادخلوهم لانه زحمه ..

بس بعدين .. ياو يهال وتموا يدزون البوابه وانفتحت هههههههههههههههههههههههه

ودشوا الناس !

انا اقترح يخلونه بفلوس

لانه كل من هب ودب قام يدخل !!!

عاد مايصير جي

حتى الهنود ادخلوا .. شفهمهم بطيور الجنه مادري !!!!

[]ام جاسم[]

بالنسبه لي كان الحفل روعه ومنظم
وانبسطو العييال والامن ماقصرو والفرق الكشفيه كلهم بيضا اللله وجوووهم
بس طلعت قبل لاتخلص الحفله خفنا من الطلعه وزحمة العالم
وكل الشكر للمنظمين للحفل

[هتـان قطر]

ام جاسم[;3849243']بالنسبه لي كان الحفل روعه ومنظم
وانبسطو العييال والامن ماقصرو والفرق الكشفيه كلهم بيضا اللله وجوووهم
بس طلعت قبل لاتخلص الحفله خفنا من الطلعه وزحمة العالم
وكل الشكر للمنظمين للحفل


نفس اللي كنت باقوله يام جاسم فعلا الحفل كان رائع ومنظم

وتحيه تحيه لابناء الكشافه ما قصروا اللي يبيض وجيههم

طبعا اللي دخل بدري ولقا مكان بيمدح واللي ما لقا بيسب

انا الحمد الله المره الاوليه وهالمرة نجي بدري ونلاقي مكان

التوفيق من رب العالمين

[الساري]

انا شخصيا كنت هناط من الساعه 4 مالقيت اربع كراسي جنب بعض
على الساعه 5 كنت واقف ولم اجد مكان لي ولا للي معاي
صراحه قطر اصبحت للاجانب
والشباب المنظمين كانوا في خدمة النساء اكثر من الرجال ماشالله عليهم
طلعت على الساعه 6 لاني انقرفت من الزحمه وقلة التنظيم

يعني بالمختصر تحسفت اني رحت