للي عندهم خبر بالطراريد

[حشيم]

السلام عليكم

إن شاء الله نويت اشتري طراد جديد 23 قدم ، وطبعاً حبيت أشاور أهل الخبرة بماذا ينصحوني عند طلب الطراد من المصنع لأني إن شاء الله ناوي اخذ الشارقة مارين فحبيت اعرف ايش إلي ممكن اطلبه قبل كل شي يعني مثل نوع الكابن:
والسكان:
والمرابط:
ومفاتيح الكهرباء:
وخزان البترول:
والتريلا:
وغيرها من المتطلبات يا هل الخبرة

[al-buainain]

وبعدين انت تبغيه حق شغل ولا طربه ووناسه


واهم شي تيدر قلفانايز يقولون سعره ارخيص في الامارات

[ألأصيل]

أخي العزيز,

انا طلبتلي طراد من الامارات قبل تقريبا سنه وشهرين. طوله 27 قدم ونوعه الجلف كرافت (السولي) لو بغيت صور له نزلتها لك. المهم ممكن افيدك بالامور التاليه:

1. حسب مقاسات امواج بحر الخليج, فالمسافه بين الموجه والموجه على حد علمي تقريبا 25 قدم, يعني الافضل تشتري لك طراد من ها المقاس او اطول تجنبا للضرب في الماي. طبعا قصة الجرف وعمقه ووزنه واشياء ثانيه تلعب دور.

2. ألتيدر في الامارات للطراريد اللي هيه فوق 22 قدم تبتدي من 15 الف درهم وانت رايح, طبعا للجلفانايز وهذي تكون ام 4 تواير مع الونش اليدوي والتاير الامامي.

3. المكاين ياماها, ولا تجيب الا الموديلات الجديده يعني 4 ستروك, سهله ونظيفه وما فيها صوت ولا يبغيلها خلط زيوت وتضرب سلف وتحرك. والياماها في الخليج مثل الجيهات يعني شيك في مخباك. للحجم اللي تقول عنه ولغاية ال 27 قدم انصحك بي ال 115 حصان عدد 2 طبعا وتقدر توفر تقريبا 15 الف ريال عن سعر الدوحه لو تجيبهم مع الطراد من الامارات.

4. ما انصح بالكبينه للحجم اللي تقول عنه, لانه ما يبقالك شي من مساحه على سطح الطراد, واصلا الكبينه في مناخ الخليج ومن خبرتي يعني يمكن شكلها اوكي بس بالتالي ما راح تستخدمها الا ستور لاغراضك قيما بعد وهذا رأيي طبعا. اما بالنسبه للسعر فهي نفس الشي ما يفرق السعر بين الطراريد اللي فيها كابين ولا بدون خصوصا للاحجام الصغيره.

5. طبعا حسب امكانياتك انا انصح دوم بالجديد, لانه غالبا ينطبق المثل اللي يقول "لو فيه خير ما رماه الطير" الا في حالات نادره ولازم يكون الشراي راعي بحر متمرس عشان يعرف اذا الطراد مضروب ولا فيه اي عيوب. صدقني الشطار كثار.

6. هنا مربط الفرس او زبدة الكلام: كثير من الربع يتوهمون انه سعر الطراد هو الجرف بس ولا يزيدله شويه عليه لاجل المكاين وهنا الغلط الفادح وهاك شي من اللي اقصده:

*** سعر الجرف
*** سعر المكاين
*** سعر الشحن والتخليص والعمولات والجمارك والتسجيل
*** بخشيش سائق التريلا
*** تكلفة الكرين في قطر لاجل ينزلك اياه من التريلا وللعلم بس يمكن فيه واحد في الدوحه يقدر يسويها.
*** سعر المصف هذا ان لقيتلك مصف في قطر يكون عليه القيمه يعني ما حد يتعبثلك بطرادك ولا يبوق لك منه شي ولا يوقف الاخوان الهنادوه من التصوير فيه وعليه. أخر سعر لموقف في نادي الدوحه اللي هو مسكر كان لاجل يتنازل الريال عن موقفه بي اربعين الف ريال.

*** تضيف على سعر الجرف:

الكبينه وحجمها يعني فيها تكرم حمام او مخزن
مغسله
تنك مياه عذبه لا يقل عن مية لتر مع ولف ومروش
تنك بترول لا يقل عن اربع ماية لتر
ليتات في الطراد
الانكر مع العفشه حقته جدام والحبل
الاحبال الجانبيه مع حدايدها وبلاوينها
الاناره النافيجيشن
سلندر الحريق
كراسي
مفاتيح ضد الماي وانصح بحقة الوكاله ولا يقل عددها عن 8
بوصله ميكانيكيه
ثلاجات
عرشه او مظله وتكون ستانلس ستيل مش حديد
سكان باور
مضخات ماي
بطاريات عدد 2 مع قافل وفاصل
كشاف ليلي على ظهر العرشه مع او بدون ريموت
المكاين ييجي وياها الساعات حق السرعه والعمر لكن يبيلك ساعات اخرى اذكرها عقب
واشياء ثانيه حسب رغباتك

7. اضافات مكلفه عقب ما تشتري الطراد ومنها:

الجي بي اس البحري اللي يكشف لك خوارط البحر والممرات ومواقع الصيد والاماكن المسموحه والممنوعه (شي لا بد منه). وطبعا يعمل مثل بوصله الكترونيه.

سترات النجاة

الفش فايندر هذا ابشن للمهتمين بالصيد والغوص ويراويك طبيعة ارض البحر والاعماق ودرجة حرارة المياه وكمية الاسماك واحجامها

لاسلكي للي يبي يبعد عن شبكات الجوال الجي اس ام, شي انصح فيه

مسجل للوناسه

مخرج للتشارج حق الجوال

تركيب هذي الامور وتكلفتها تزيد على سعر الطراد اربعين بالميه تقريبا حسب النوعيات.

بالنهايه اطلب من ربي يوفقك وارجوا اني اكون قد فدتك بعض الشيء وحاضرين للطيبين.

أخوك ألأصيل