نموذج لاستغلال بعض المغاسل للعملاء في موسم الأمطار

[ولد البدر]

ما دفعني للكتابة عن هذا الموضوع هو ما حدث لي عندما ذهبت بسيارتي لمغسلة لاهور بطريق سلوى وكانت بالطبع متسخة ببعض الطين على الرفارف فقط والباقي من جراء الأمطار ، فكنت أعرف بأن سعر الغسيل قد ارتفع بلا مبرر وبلا حسيب ولا رقيب وقلت سيغسلها بـ 25ريال ( غسيل خارجي ) فعندما سألته من باب الاحتياط فإذا به يقول لي بـ 40 ريال فصرخت في وجهه صرخة ارتعدت منها فرائصه ، 40 ريال لغسيل خارجي ،اتق الله ، هذا سعر غسيل جيك في بعض المغاسل فقال يوجد طين بالسيارة ، فقلت له لم أكن أعلم وإلا لغسلت السيارة ولمعتها وجئت إليك لتغسلها ، ولو كان بها طين وغسلتها بـ 25 ريال هل سيبقى الطين وإذا غسلتها بـ 40 سيذهب الطين ، رشة واحدة بمكينة الغسيل الضاغطة سيذهب كل شي فلماذا الطمع والجشع ، وأعتقد – والله أعلم - بأنه قال لبعض الشباب كذلك فوافقوا وأعطوه الأربعين وزيادة مما فتح شهيته لافتراس المزيد من أموال الناس واستغلالهم في وقت ارتفع فيه كل شيء بمبرر ودون مبرر ، ولم أعجب إلا عندما اجتمع المسؤولون من أجل زيادة نصف ريال على المرطبات وقامت الدنيا ولم تقعد ولم يتنفسوا الصعداء إلا عندما ألغيت النصف ريال وعادت المياه إلى مجاريها فهل لأنهم من مدمني المياه الغازية ، وأين هم عن أسعار السيارات وقطع الغيار وأسعار التصليح فالبطاريات – على سبيل المثال – وصلت إلى الـ500 ريال وأكثر بينما كانت تباع منذ وقت قريب بـ 180 – 220 ريال أما الإطارات فحدث ولا حرج ، ونحن لم تستلم الزيادة إلى الآن فكيف لو استلمناها بالطبع سنأخذها باليمين ونسلمها للسادة التجار بالشمال 0000 ودمتم سالمين

[بوعلي2]

صادني نفس الموقف الي صادك

في مغاسل فريج بن محمود

عقب ماغسل السياره يقول بـ35

ضحكت في وجهه وعطته 25 ريال وقلت له تحمل تقول لي مره ثانيه 35 ريال

وتم يقول فيها طين اقول له لاتكلمني بموضوع 35 ريال

خاف وسكت

هم يبيلهم واحد ملسون يعطيهم بوجهم بيخافون وبيقبلون بـ25 ريال

هي اقصاها رشت مكينه شبيكلفه؟

ليكون قاعد يصب ماي بكلك على شان نقول يتعب؟

يبون يستغلونا بس

عندكم اياهم ترى عطه الـ25 وبيسكت

[بوحارب]

مافيه احلى من غسيل البيت

ببلاش و25 ريال نشتري فيها بضاعه

مثل كرك وكرت هلا بو 10 ريال وعشا كلاب مع شبس

وسلامتكم ^ ــ ^

[Abu Deeb]

يارجال الله يعين ذكرتني بموقف اليوم صديقي قالي صار معاه عنده نيسان سفاري يبي يشتريلة درمويل بالوكاله الواحد ب 550 ريال كان واحد من اصدقائه بالسعوديه كلمه قاله جيبلي معاك
جابلة الأثنين ب500

والله الغلا والأسعار شي خيالي بقطر الله يكون بالعون

والحمدلله ما أغسل السيارة لين بعد أسبوع لان الوضع غير مستقر والشوارع كلها ماي

[غناتي1]

حمروا العين في العامل 00 وعطوه كم زقره

ولا تتهاونون ابدا وما راح يسترجي يرفع السعر مرة ثانية

[ولد البدر]

فعلاً أخوي طائر الأشجان أنا لو ما سألته وغاسل كان ما يشوف غير الـ 25 ريال لكني سألته وانقهرت ، أخوي بو حارب صج إنك اقتصادي بس من له بارض يغسل السيارة عقب المطر

[ANONYMOUS]

فعلاً أخوي طائر الأشجان أنا لو ما سألته وغاسل كان ما يشوف غير الـ 25 ريال لكني سألته وانقهرت ، أخوي بو حارب صج إنك اقتصادي بس من له بارض يغسل السيارة عقب المطر


يقصد الدريول.. ولا الزراع..

[ولد البدر]

فعلا أخوي أبوديب شي مجرب إن قطع الغيار وكل شي في السعودية أرخص بكثير من قطر وحتى الأدوية الي تنباع بالصيدلية 0
وكلامك مضبوط أخوي غنائي 1 لازم انوقفهم عند حدهم كل واحد ينزف من صوب 0
أخوي Anonymous يمكن يقصد زراع أو دريول لكن انا ما عندي أي منهم
ومشكورين على مروركم الطيب ومشاركتكم الكريمة

[بومحمد911]

والله عااد انا افتكيت من هل المغاسل شريت لي مكينة برشر ب1700

وكل ما توصخت السيارة ادخلها في الحوش واغسلها براحتي منها توفير ومنها حركة

[على العهد]

صح كلامك اخوي

مريت على هالموقف


الله يعيينا

[FULL]

العيب مو فيكم ولا في العامل ،،، العيب في اللي يقوله العامل 40 ويعطيه بدون نقاش

مو مشكله عنده العامل لو يتهزأ من قبل 20 او 30 واحد ... ويجي واحد منهم يعطيه 40 ;)

والدولة تتحمل جزء من موضوع الاسعار .... سوق مغاسل كامل راح ومافي رخص جديده ؟؟ طيب شالمانع من طرح رخص مغاسل جديده ؟؟؟؟؟؟؟؟؟؟؟؟؟؟


وقيس نفس الكلام على الخدمات والبضاعة الثانية

[Qtr Denver]

مافيه احلى من غسيل البيت

ببلاش و25 ريال نشتري فيها بضاعه

مثل كرك وكرت هلا بو 10 ريال وعشا كلاب مع شبس

وسلامتكم ^ ــ ^

تعجبني بساطتك :victory:

[diab911]

اتذكر من سنه تقريبا كان الغسيل 20 ريال وايام المطر قالو في طين وبناخذ 5 ريال زياده علشان المطر
وبعد ما خلص المطر استمر الحال على ما هو عليه 25 ريال ايام المطر وبعد المطر

وشكله نفس الفيلم بسونه اصحاب المغاسل الحين

((( طمع واستغلال ))

[السيف5]

في شارع ال شافي بالريان جميع مغاسل السيارات كانت 20ريال وتم زيادة أسعارها الى 25

منذ فترة بسيطة -------- ماعدا مغسلة واحدة كان معاهم 20 وزاد 25 والأن 30ريال وحاط اعلان بهذه الزيادة على المحل ولاعليه من حماية المستهلك ولاغيره على قولة العامل هذا هامور كبير
مافيه خوف ---------------------------------الى اليوم الواحد يتساءل ليش قامت الدنيا من الحكومة على زيادة البيبسى وباقي الاشياء راقدين عنها

[hxamad]

والله تغسلها أنت فى البيت أحسلك تستخدم شامبوا خاص لسيارك وشمليدر نظف وتفرك التاير عدل لين ماينظف عدل وترش الموتر من تحت بعدين شوف النظافة بتكون أحسن من المغسلة أو أفكك علم الدريول أو الخدامه شلون تغسل وفك نفسك من المغاسل ومنى واحد أسوى هالشى صراحة المغاسل شمخوا موترى من الخلقان ألى من موتر لموتر ماروح المغسلة ألا عشان الجيك وبس
وأسمحولى على الإطالة

[ولد البدر]

مشكورين اخواني على المشاركة والإدلاء بآرائكم النيرة

[الـقـاسـي]

لو كان الغسيل 25ونص كان قامت الدنيا واحتجو الناس كلهم
اما اذا وصلت اربعين عااادي
اهم شي مايكون في الزياده نص

[فلفل حار]

مافي الا نسوي نفس البحرين

نشوف لنا حد من هالهنود ألي لاشغله ولا مشغله ...... يمر بسيكله كل يومين ويغسلها ...... وتحاسبه أخر الشهر .......بلا مغاسل بلا عوار راس:nice:

والله لو بس 30% من الناس طبقت هالطريقه ...... والله لايرجع سعر غسيل الجيك بـ25 ريال

الله يرحم ايــــاام اوووولـ:)

[lawyer]

للاسف بعض الشباب يخلونهم يتعودون على هالشي
مثل سالفة الحلاليق من 5 الى 20 وفي العيد 100 ريال تحديد لحية والحلاق مو فاضي
هذا الشي منا للاسف