ايش اللي قاعد يصير عندنا...؟؟؟؟؟

[احب قطر]

السلام عليكم ورحمة الله وبركاته ...

بصراحة وبدون مقدمات...ايش اللي قاعد يصير عندنا... هل هو تخبط او عدم كفاءة؟؟؟ في يوم نشوف يرفعون سعر البيبسي وثاني يوم يخفضونه وبعده بنك يفرض رسوم وثاني يوم يشلها وبعدها مؤسسة عليها كثير من التساؤلات تصدر تعميم وثاني يوم تجمده وبعدها قانون موارد بشرية سبب طرح الكثير من التساؤلات وسبب ربكه وعدم ارتياح لدى الموظفين...

شلون راح يقدر المواطن يثق في المسؤلين... ووينهم عن رؤية قطر 2030 ووينهم عن اهم اساسات الادارة والتخطيط الاستراتيجي...

ليش قبل مايصدر القانون تعد جميع الجهات توضيح كامل لموظفيها عن امتيازاتهم ورواتبهم علشان ماتصير هالبلبلة في البلد... نعم في ناس استفادوا واللي اشوفه ان في ناس انظلموا!!

يعني ابسط مثال...مؤسسة حمد الطبية... اذا انهم يبغون يستدرجون كفاءات للعمل هل هاذي الرواتب تعادل رواتب الاطباء الاكفاء على مستوى العالم.. او هل يعقل بان هذه الشريحة من الناس اللي تعتبر من اشطر الناس في المدارس واللي راحوا وتغربوا وعانوا في دراستهم اساويه في اي تخصص ثاني (مع احترامي لجميع التخصصات)..

شلون راح توجد انتاجية ... وهذا القانون نفسه يذكرني بقانون المرور واللي اعادوا تقييمه ومازالت الحوادث والوفيات عندنا في ازدياد...

بصراحة..انا اعتقد ان لازم يكون في تسونامي للقائمين على مثل هالقوانين واللي بدل ماتخدم البلد قاعده تضره... بصراحه قهر... لو كان القانون يخدم او يضر في كلتا الحالتين كان يجب توضيح القانون بشكل مفصل للناس بدل ماكل موظف يسأل وش راح يصير فيني...

[الزاجل]

ما ادري علمي علمك..

اهم شي انهم ما يستمرون في الخطأ
افضل من ان الخطأ يستشري ويستحون يسحبونه ..

[الـقـاسـي]

هذولا الكفاءات الاجنبيه على قولتهم مايسوون ..
انا متأكد لو فيه قطري فيه خير قطري أصيل مارضى لعيال بلاده وأهل بلاده بهذا اللي قاعد يصير ..

[واحد دوت كوم]

اي و الله صدقت في هذي
" يعقل بان هذه الشريحة من الناس اللي تعتبر من اشطر الناس في المدارس واللي راحوا وتغربوا وعانوا في دراستهم اساويه في اي تخصص ثاني (مع احترامي لجميع التخصصات).. "

اهم النخبه .... بالمجتمع ويصير فيهم جذيه ؟

[امل الحب]

:)

لاتثق فيهم لانهم مايستحقون الثقة واغلبهم يقول يالله نفسي ويسوي الي يسويه ويروح ومحد يكلمه ..

وانت وغيرك تدفعون ثمن هالاخطأ الي مالها حساب ..

وانتهى ..

حتى رؤية 2030 اقولك من الحين ريح بالك منها اذا الله عطانا عمر لين وقتها قول فلانة قالت ان مافي رؤية ولافي اي شي..

كلها شعارات اما وقت التنفيذ ولاشي ..

[Cat-R]

بكل بساطه , إن مايدور حولنا هو عبارة عن مسرحية كبيرة وطويله جداً مليئة بالعشوائية البحتة والتخبط والمصالح الشخصية , في الحقيقة لا يوجد شيء نتاج دراسات متعمقة أو استفتاء أو المصلحة العامة , كل مايحدث مبني على اساس التجربة الأبدية والعشوائية الغبية والتخبط العمياني والمصلحة الشخصية فوق رأس الجميع, سواء كان العمل هندسي ا تجاري او صناعي او اداري او حتى ديني !
اللهم لا نسألك رد القضاء ولكن اللطف فيه.

[فرقة الصقور]

مصيبة لما تسند المهام لغير اهلها

والمهم الحين ان المستشفى يحاسبون اللي ورى هالتخبط وماتكون سحابة صيف ليكونون عبره لغيرهم وتكون رادع لهم