(مجموعة اسئلة مستثمر صغير جدا)

[Bin Hood]

السلام عليكم ورحمة الله وبركاته....

خلال عطلة الربيع ناوي انزل الدوحة علشان ادش سوق الدوحة للاسهم رسميا (يعني باسمي هب باسم غيري ) وانا ما عرف شي كلش من حيث طريقة الشراء والبيع واستلام وتسليم المبالغ وغيرها. فعندي مجموعة اسئلة ابيكم منكم اجوبته يا شباب ما عليكم امر واي واحد يقدر يجاوب الاسئله لانه اي واحد دخل السوق يقدر يجاوبه.

1- اذا بغيت اشتري اسهم من السوق , شنو اسوي اول شي ؟
2-هل لازم يكون عندي حساب في بنك في قطر , وفي اي بنك تنصحوني (لازم يكون اسلامي )؟
3-اي شركة وساطة تنصحوني فيه ( لازم تكون اسلامية)؟
4-شلون ادفع حق الوسيط اذا بيغيت اشتري اسهم ادفعله من خارج قطر ؟
5-شنو المحفظة ؟ هل ممكن اني اربط بين المحفظة وبين حسابي في البنك (يعني هل يصير احول مبالغ من حسابي للمحفظة علشان اشتري اسهم وهل يمكن العكس ؟
6-انا راح انزل الدوحة شهر 1 بس انا عمري شهر واحد بيكون باقي لي شهرين علشان يصير عمري 21 سنه فهل ممكن اني اشتري والا لا ؟
7-بالنسبه للارباح اذا كان نسبة الارباح 20% بيوزعونه على شكل اسهم وعندي 1000 سهم سعر السهم في السوق 80 ريال والسعر الدفتري للاسهم 10 ريال فكم سهم راح يعطوني هل 200 سهم ؟ واذا كانوا بيوزعون على شكل مبالغ كم بتكون ارباحي 2000 ريال والا كم ؟
8-الشركة لين وزعت ارباح وين استلمه في الاحساب والا على شكل شيك ؟ واذا وزعت اسهم وين احصله ؟
9-هل التعامل في البيع والشراء والا ستلام وغيرها سهل بدون صعوبه او مشاكل ؟
10-وين اشتري الاسهم من السوق وشركة الوساطة ؟
11-بالنسبه للانترنت متى راح يطبق وهل ممكن الاستخدام من الخارج؟

واناطالب في الجامعة ادرس في الامارات واسكن في البحرين(لاني بحرني) , قررت ادخل السوق اسوه ببعض اهلي وبسبب ما اسمعه من اخبار طيبه .فقمت بتجميع مدخراتي وافكر اني اخذ قرض صغير ابتدي فيه ,وصارت لي خبره بسيطه من خلال" منتديات شبكة الأسهم القطرية" الي فادني بشكل غير طبيعي وانا اشكر ادراة المنتدى وكل الاعضاء على جهدهم الي يبذلونه.واسمحولي على كثرة الاسئلة وجزاكم الله خير .



مع اطيب التمنيات
المستثمر المثابر

[بولينجر]

مرحب بك يا أخوي انت بين أهلك واخوانك...

1- أول شي تروح البورصة اللي اسمها عندنا (سوق الدوحة للأوراق المالية) وتطلب منهم يعطونك رقم المساهم اللي اسمه Nin.

2-يكون عندك حساب في أي بنك عندنا في قطر مب شرط إسلامي ولكن تحري الحلال أفضل، وتلقى البنوك في نفس الشارع جنب البورصة.

3-يكون عندك دفتر شيكات صادر من البنك اللي فتحت فيه الحساب لتسديد قيمة أي سهم تشتريه

4- تفتح حساب عند أي شركة وساطة بالسوق ومب شرط إسلامية، وبيعطونك رقم حساب التداول.

5-السن القانوني 18 سنة، وإذا عندك بطاقة شخصية (هوية)يكون أحسن أو استخدم جواز السفر وخلهم معاك على طول يمكن يطلبونهم منك.
6-التداول عن طريق النت إن شاء الله يبدأ يوم الاثنين، وأول شركة دلالة تليها باقي الشركات.

7- الدفع عن طريق الشيكات، أو خصم من حساب البنك لدى نفس البنك الذي تتعامل معه شركه الوساطة (مثال الدولي الإسلامي والإسلامية للأوراق المالية)

8- المحفظة هي مجموعة الأسهم التي تمتلكها ككل، ويمكنك إيداع أي مبلغ لدى شركة الوساطة لتبدأ به الشراء وإبقاء أي مبلغ في حسابك لدى شركة الوساطة لسهولة التعامل.

9- بالنسبة للأرباح حسابك صحيح.

10-توزيع الأرباح إما أن تستلمه عن طريق عنوانك البريدي المسجل لدى إدارة البورصة عند تسجيلك لديها، أو تستلمه في مقر الشركة (على حسب كل شركة وطريقتها)، ويكون على شكل شيكات.

11- مافهمت قصدك بسهولة التعامل، لكن بقولك اللي أعرفه. يستغرق منهم 3 أيام لتسوية الأسهم المشتراة أو المباعة دون التأثير على أسهمك.يعني حقك محفوظ. وإذا كنت واضح في أوامرك يعني كاتب كل البيانات المطلوبة من سعر وصلاحية الأمر وطريقة الشراء (مجزأ أم دفعة واحدة) ما أعتقد بتكون في مشاكل.

12-الشراء يكون عن طريق شركة الوساطة الموجودة في السوق، وليس من السوق لأن لازم يكون عن طريق شركة الوساطة.

13- النت ما أعرف عنه لكن غالبا أن يمكن التداول من الخارج.

وإن شاء الله أكون أفدتك....:)

[Bin Hood]

بيض الله ويهك بياض مايسود , مشكور وماقصرت ياخوي بولينجر, وجزاك الله خير والله يرزقك .وان شاء الله يستفيد من الموضوع اخوانا.