الوضع في اسباير بين الراحة والوقاحة !!

[أم وضحى]

الكل يعلم بأن الهدف من انشاء الحدائق العامة هو الشكل الجمالي الحضاري للدولة ..
وكذلك لتكون متنفس للراحة للمواطنين والمقيمين على حد السواء ..


ولاشك بأن حديقة اسباير تشهد اقبالا جماهيريا كبيرا ..لأنها تعتبر من أجمل أماكن رياضة
( المشي )..وايضاً لجمال تصميمها وفساحة مكانها ..


ولكن .. مايعكر صفو هذه الراحة .. هو وقاحة بعض مرتادي هذا المكان من فئة ( المراهقين والشباب ) .. بشكل دائم ومستمر ..
بدون أدنى احترام لخصوصية السيدات والعائلات ممن ينشدن الراحة والرياضة في نفس الوقت ..


ولانه من باب ( من امن العقاب اساء الأدب ) فأننا نطالب بوجود رادع لوقاحة هؤلاء المراهقين ..


من المخجل ان يتم مثل هذا التضييق على بنات البلد وعوائلها من قبل بعض شبابها ( الوقح )

دعونا نستمتع بحدائق بلدنا ..

انظروا بانفسكم للاماكن السياحية ( المجانية ) في البلد ..
سواء كانت الحدائق او الكورنيش او البحر ..
من هي الفئة المستفيدة منها ؟
ستجد ان الاجانب هم من استفاد منها ..!! وبلا منازع ..

[سلمان_1]

وانتي كذا :nice:

يعطيج العافية وتقبلي مروري

[Only Me]

ليش ما يخولونه للعائلات فقط
نفس حديقة دحل الحمام
بعض الشباب ماعندهم سالفة الصراحه

[فارس الكلمة]

فأننا نطالب بوجود رادع لوقاحة هؤلاء المراهقين ..

من قبل بعض شبابها ( الوقح )
ربما تقصدين المراهقين القطريين .. لكن ما هي شكل هذه الوقاحة حتى يتم ردعها ..؟

طبعاً تصرفات المضايقة .. مرفوضة ..

[المرحب]

[QUOTE=أم وضحى;3959528][SIZE="6"][B][COLOR="DarkRed"][CENTER]

ولانه من باب ( من امن العقاب اساء الأدب ) فأننا نطالب بوجود رادع لوقاحة هؤلاء المراهقين ..



الله يعطيك العافيه على الموضوع

وفعلاً كلامك واقتراحك منطقي وفي مكانه !!!



انظروا بانفسكم للاماكن السياحية ( المجانية ) في البلد ..
سواء كانت الحدائق او الكورنيش او البحر ..
من هي الفئة المستفيدة منها ؟
ستجد ان الاجانب هم من استفاد منها ..!! وبلا منازع ..



كلام صحيح المستفيد الأجانب من كل شي !


مشكوره على كل كلمه تم كتابتها ويعطيك العافيه أختنا أم وضحى !









تحيـــــــــــــاتي ...

[أم وضحى]

وانتي كذا :nice:

يعطيج العافية وتقبلي مروري



الله يعافيك اخوي

شكراً لمرورك ..

[الألماسي]

الحل بسيط جداً . . يخلون الدخول للعائلات فقط . . :)

و اللي يبي يمشي من الشباب يروح صوب استاد خليفه :nice:

[الكولونيل]

موضوع جيد خاصة ان هذا المكان الرائع يرتاده الكثير من الناس للمتعة والراحة والرياضة ولكن ممكن تخصيص أيام للعائلات ولكن لايمكن حرمان الشباب من الإستمتاع بهذا المكان

[دوحة الجميع]

صحيح المكان جميل جداً ولكن تنقصه الرقابة الصارمة من العضيد .

[بو الجوري]

هلا أختي ..
بس سؤال عشان نعرف نتكلم فشنو بالضبط .. ..

أنتي تتكلمين عن مضايقات الشباب ..
وإلا إن الاماكن صارت للأجانب .. .. ..

[بو الجوري]

أنا أقول يسوونها للقطرين فقط

الاجانب مللونا بصراحة

حديقة البدع نلقاهم ودحل الحمام نلقاهم على الكورنيش نلقاهم وعلى البحر نلقاهم وفي اسباير نلقاهم وفي كل مكان نلقاهم ومسويين زحمة لنا ما نقدر ناخذ راحتنا حتى في العطلة


ممممم .. قويه شوي .. للقطريين فقط .. ..

وبعدين يعني مالهم رب يروحون هالاماكن .. وإلا شالسالفه .. ..

إحنا القطريين .. نادر منا يروح الحدايق مع هله .. .. ويقعد .. يخاف من القيل والقال وإن الناس يشوفونه .. ويغار على هله ..

[أم وضحى]

ليش ما يخولونه للعائلات فقط
نفس حديقة دحل الحمام
بعض الشباب ماعندهم سالفة الصراحه


الرياضه ( خاصة رياضة المشي) حق للجميع ..
لا اطالب ان تكون للعائلات فقط ..
ولكن اطالب بالوعي .. وبالغيرة الاجتماعية ..
المفروض ماتكون غيرة الشخص على اهله بس .. بالعكس تكون غيرته على بنات بلده .. وبنات المسلمين جميعاً ..


شاكره لك مرورك ..

[أم وضحى]

ربما تقصدين المراهقين القطريين .. لكن ما هي شكل هذه الوقاحة حتى يتم ردعها ..؟

طبعاً تصرفات المضايقة .. مرفوضة ..



المقصود بالوقاحة .. المضايقات العلنية ..
فيهم اللي يقط رقمه ويروح ..
وفيهم اللي يقط كلام وبصوت عالي ..
وفيهم اللي يلحقك مثل ظلك ..


القهر ان في بنات صغار مع اهلهم بـ 12 سنه وطالع ..
يضايقني ان تفتح عيونهم هالامور .. ويسمعون مثل هالكلام ..

[أم وضحى]

[quote]



الله يعطيك العافيه على الموضوع

وفعلاً كلامك واقتراحك منطقي وفي مكانه !!!





كلام صحيح المستفيد الأجانب من كل شي !


مشكوره على كل كلمه تم كتابتها ويعطيك العافيه أختنا أم وضحى !









تحيـــــــــــــاتي ...




العفو اخوي ..
وشكراً لمرورك ..

[anything99]

ذهبت صباحا للحديقة لم اجد سوى الاجانب الذين يمارسون رياضة المشي وركوب الدرجات .. لكن هل هذا ذنبهم ام ذنبنا؟ .... يوم الجمعة للعلم كان فيه سيكيورتي وتم تخصيصه للعائلات ..

[أم وضحى]

الحل بسيط جداً . . يخلون الدخول للعائلات فقط . . :)

و اللي يبي يمشي من الشباب يروح صوب استاد خليفه :nice:


اقتراح جيد ..
شاكره لك مرورك

[بلا حدود!]

المقصود بالوقاحة .. المضايقات العلنية ..
فيهم اللي يقط رقمه ويروح ..
وفيهم اللي يقط كلام وبصوت عالي ..
وفيهم اللي يلحقك مثل ظلك ..


القهر ان في بنات صغار مع اهلهم بـ 12 سنه وطالع ..
يضايقني ان تفتح عيونهم هالامور .. ويسمعون مثل هالكلام ..





اختي كلمه وقاحه كلمه اكبر من ما تتصورين
وهؤلاء شباب مراهقين وما يقومون به يأتي تحت
مسمى "مضايقات " وليس بما تلفظتي به ...

"عيب" ان تخرج هذه الكلمه من امرأه
نتمنى تغيير العنوان او حذفه ..!!

[أم وضحى]

موضوع جيد خاصة ان هذا المكان الرائع يرتاده الكثير من الناس للمتعة والراحة والرياضة ولكن ممكن تخصيص أيام للعائلات ولكن لايمكن حرمان الشباب من الإستمتاع بهذا المكان


كلام صحيح ..
شكراً لمرورك ..

[غزلان]

انا لين الحين مارحت لها وكل هالسوالف فيها الا سحر الا ثعابين الا وقاحه

اقول نقعد بالبيت احسن

شكرا

[متفائله]

لا حول ولا قوة الا بالله العلي العظيم
نترك دائماً المشكله الرئيسية ونتكلم في فروعها الثانوية

يعني لما المراهقين يضايقون العائلات القطرية فهل هذا الخطأ يجب أن يتحمله الأجانب لأنهم يستغلون الحدائق خير استغلال في الرياضه؟
يعني لما الأجنبي يهتم بالرياضه ويخليها شي أساسي في حياته واحنا لا نهتم بها فهل هذا ذنبه إنه احنا ما نحب الرياضة؟
حقيقة أذكر هنا قصة الجمل والتلميذ الذي كل ما جاوب سؤالاً بعيداً كل البعد عن الجمل بدأ بالموضوع ثم تحول كلامه عن الجمل وهنا الجمل هو الأجنبي وكل ما انفتح موضوع حتى لو كان عن القمر وعن حفره تلقائياً وأوتوماتيكياً يتحول الموضوع إلى الأجنبي ويطلع في الأخير الأجنبي هو سبب الحفر على القمر

فلنتكلم كلاماً منطقياً بعيداً عن توافه الأمور ونمسك المشكله من جذورها والأفعى من رأسها وليس من ذيلها

[بو الجوري]

أولاً أنا بتكلم عن مضايقات الشباب .. ..

ياريت يفكر إنه عنده خوات وممكن يصير فيهم اللي يسويه فبنات الناس ..
وإقتراحي هو .. فأي مكان عام ,, سواء حدايق أو مجمعات ,, يحطون سكيوريتي ..
ومايكون هندي والا نيبالي والا .. .. .. .. المفروض يحطون قطري ..
لأن الشباب للأسف إذا السكيوريتي كان أجنبي .. يطقعونله .. ..
لكن القطري بيحسبونله حساب ..( يمكن) .. :)
ومايحطون واحد فمكان كبيــــر .. لازم أكثر من واحد .. ..

وياريييييييييييت الأمن الوقائي ينشرون رجالهم فهالأماكن .. ..

[بو الجوري]

انظروا بانفسكم للاماكن السياحية ( المجانية ) في البلد ..
سواء كانت الحدائق او الكورنيش او البحر ..
من هي الفئة المستفيدة منها ؟
ستجد ان الاجانب هم من استفاد منها ..!! وبلا منازع ..




أختي مادري شدخل هالجمله .. فالموضوع ..

لكن أنا ماشوف إن لهم خص .. .. و وين المشكله إنهم يروحون هالأماكن ويستانسون ؟

حد قالنا .. يا قطريين لاتروحون هالأماكن .. أو هل حد بيمنعنا؟

انا اشوف إن ماله خص هالشي .. فالمضايقات :eek5:

[أم وضحى]

صحيح المكان جميل جداً ولكن تنقصه الرقابة الصارمة من العضيد .


هذا هو المطلوب

شكراً لوعيك ..

[>>> غــمـــوض <<<]

ليــش تتكلمون عن الاجانـــب
ترى الدنيا ما انخلقت لكــم بروحكــم

للقطرين والاجانــب الحق في الفســحـه في اي مكان يبغونــه
ترى مب زيــن عليــكم هالعنصريـــه
يعني الدوحــه شفيها غير كم مكان الواحد يروح يتمشى فيه بعد بتضيقون على خلق الله
وبتقولون اجانب ،، دامهم يشتغلون ويتعبون في بلادنــا خلوهم ينـفسون عن روحهــم
ولا تبونهــم مايتحركون من بيوتهم

اعتقد النقطه اللي المفروض تركزون عليها الا وهي الشباب والمعاكساتـــــــــــ وشلون نقدر نقلل من هالظاهــره المنتشره بشكل كبير

تحياتـي لصاحبــة الموضوع :nice:

[متفائله]

أولاً أنا بتكلم عن مضايقات الشباب .. ..

ياريت يفكر إنه عنده خوات وممكن يصير فيهم اللي يسويه فبنات الناس ..
وإقتراحي هو .. فأي مكان عام ,, سواء حدايق أو مجمعات ,, يحطون سكيوريتي ..
ومايكون هندي والا نيبالي والا .. .. .. .. المفروض يحطون قطري ..
لأن الشباب للأسف إذا السكيوريتي كان أجنبي .. يطقعونله .. ..
لكن القطري بيحسبونله حساب ..( يمكن) .. :)
ومايحطون واحد فمكان كبيــــر .. لازم أكثر من واحد .. ..

وياريييييييييييت الأمن الوقائي ينشرون رجالهم فهالأماكن .. ..

أحييك على مثل هذه الاقتراحات ومحاولة وضع حلول عقلانية للأمور فالأمور يجب أن تناقش بعقلانية وليس باقتراحات مالها علاقه بالموضوع مثل خلي الحدائق بس للقطريين (يعني يوقفون ناس من الجوازات علشان يشوفون الجنسية ويدخلون الناس حسب الجنسية؟)))):secret:

[anything99]

ليــش تتكلمون عن الاجانـــب
ترى الدنيا ما انخلقت لكــم بروحكــم

للقطرين والاجانــب الحق في الفســحـه في اي مكان يبغونــه

تحياتـي لصاحبــة الموضوع :nice:

كلام منطقي ..

[أم وضحى]

أنا أقول يسوونها للقطرين فقط

الاجانب مللونا بصراحة

حديقة البدع نلقاهم ودحل الحمام نلقاهم على الكورنيش نلقاهم وعلى البحر نلقاهم وفي اسباير نلقاهم وفي كل مكان نلقاهم ومسويين زحمة لنا ما نقدر ناخذ راحتنا حتى في العطلة


الغلط مو ع الاجانب ..
الغلط على ( بعض ) عيال البلد اللي مب معطين العائلات القطرية فرصه يستمتعون بهالمنشئات الترفيهية ..

[متفائله]

ليــش تتكلمون عن الاجانـــب
ترى الدنيا ما انخلقت لكــم بروحكــم

للقطرين والاجانــب الحق في الفســحـه في اي مكان يبغونــه
ترى مب زيــن عليــكم هالعنصريـــه
يعني الدوحــه شفيها غير كم مكان الواحد يروح يتمشى فيه بعد بتضيقون على خلق الله
وبتقولون اجانب ،، دامهم يشتغلون ويتعبون في بلادنــا خلوهم ينـفسون عن روحهــم
ولا تبونهــم مايتحركون من بيوتهم

اعتقد النقطه اللي المفروض تركزون عليها الا وهي الشباب والمعاكساتـــــــــــ وشلون نقدر نقلل من هالظاهــره المنتشره بشكل كبير

تحياتـي لصاحبــة الموضوع :nice:


تحية احترام لكلامك الرائع

بس أخاف يشككون في وطنيتك لأنك تدافعين عن الأجانب

[بو الجوري]

ليــش تتكلمون عن الاجانـــب
ترى الدنيا ما انخلقت لكــم بروحكــم

للقطرين والاجانــب الحق في الفســحـه في اي مكان يبغونــه
ترى مب زيــن عليــكم هالعنصريـــه
اعتقد النقطه اللي المفروض تركزون عليها الا وهي الشباب والمعاكساتـــــــــــ وشلون نقدر نقلل من هالظاهــره المنتشره بشكل كبير

:nice:

يعجبوني الناس اللي يفهموووون :nice:

يا أعضاء خلكم فالموضوع الأساسي .. اللي تبي توصله أختنا أم وضحى ..

عشان لايتسكر الموضوع .. بردود الاعضاء اللي بتطلع عن الموضوع ..

[>>> غــمـــوض <<<]

كلام منطقي ..

:nice: واتمنى الكل يكون واعــي ومانلتفت لصغائر الامــور

[أم وضحى]

هلا أختي ..
بس سؤال عشان نعرف نتكلم فشنو بالضبط .. ..

أنتي تتكلمين عن مضايقات الشباب ..
وإلا إن الاماكن صارت للأجانب .. .. ..



انا ياخوي اتكلم عن المضايقات ( من القطريين وغيرهم من الاجانب )
اللي تسبب في هروب العائلات القطرية من هالاماكن ..
لين ماصارت كلها اجانب ..

[أم وضحى]

ممممم .. قويه شوي .. للقطريين فقط .. ..

وبعدين يعني مالهم رب يروحون هالاماكن .. وإلا شالسالفه .. ..

إحنا القطريين .. نادر منا يروح الحدايق مع هله .. .. ويقعد .. يخاف من القيل والقال وإن الناس يشوفونه .. ويغار على هله ..



مستحيل طبعاً هالطلب ..
الكل له حق الاستمتاع ..
بس صارت العائلات القطرية مسلوب حقها بسبب هالمضايقات ..

[هدوء الصباح]

انا ياخوي اتكلم عن المضايقات ( من القطريين وغيرهم من الاجانب )
اللي تسبب في هروب العائلات القطرية من هالاماكن ..
لين ماصارت كلها اجانب ..

يعني المضاقيات ينزعج منها بس القطريين والاجانب لا؟؟سبحان الله..

عن نفسي اروح دايما الحديقة ولا شفت مضايقات على العكس شبابنا محترمين وفي حالهم...
يمكن في حالات بس مب منتشرة.

[>>> غــمـــوض <<<]

تحية احترام لكلامك الرائع

بس أخاف يشككون في وطنيتك لأنك تدافعين عن الأجانب

الله يسلمج حبيبتي وكلامج موزون وعيــن العقــل
وان شاء الله جميع الاعضاء ياخذون الكلامــ ويحسبونــه حسبه منطقيــه
ههههههههههـــ اما سالفـه يشككون في وطنيتي (( دمـي قطري ابا عن جد )) وحتى لو دافعت عن الاجانــب فأقول الدنيا كبيره ومافي داعـي يلتفتون للشي الصغيــر اللي ماله اي تأثير

والف تحيه لج حبوبــه ولكلامــج الطيب

[أم وضحى]

ذهبت صباحا للحديقة لم اجد سوى الاجانب الذين يمارسون رياضة المشي وركوب الدرجات .. لكن هل هذا ذنبهم ام ذنبنا؟ .... يوم الجمعة للعلم كان فيه سيكيورتي وتم تخصيصه للعائلات ..

لا ذنبنا ولا ذنبهم ..
ذنب الي مايخاف ربه .. ويتعرض لخلق الله ..
وياليت يكون فيه سيكيورتي قطري طول ايام الاسبوع ..

[بو الجوري]

انا ياخوي اتكلم عن المضايقات ( من القطريين وغيرهم من الاجانب )
اللي تسبب في هروب العائلات القطرية من هالاماكن ..
لين ماصارت كلها اجانب ..


أوكي يعني الجمله الأخيره فموضوعج .. تصدين فيها .. إن بسبب المضايقات .. صارت بس أجانب .. والقطري ما قام يروح ..

الحين فهمتج ..

والله لازم يحطون حراسه قطريه .. وأمن وقائي بشكل مكثف ..

انا عن نفسي ماطلع مع هلي فالويكند .. بس عشان المصخره اللي تصير ..
وطبعاً محد كفو يتكلم .. لكن نفسياً أتضايق لما اشوف الشباب يغازلون .. كل من هب ودب ..

[>>> غــمـــوض <<<]

يعجبوني الناس اللي يفهموووون :nice:

يا أعضاء خلكم فالموضوع الأساسي .. اللي تبي توصله أختنا أم وضحى ..

عشان لايتسكر الموضوع .. بردود الاعضاء اللي بتطلع عن الموضوع ..

:):)
ان شاء الله الموضوع ماراح يتسكــر اخوي
وأحييــك على رجاحــة عقلك

تحياتــي العطره لكـــــ

[كاتم الاسرار]

أنا أقول يسوونها للقطرين فقط

الاجانب مللونا بصراحة

حديقة البدع نلقاهم ودحل الحمام نلقاهم على الكورنيش نلقاهم وعلى البحر نلقاهم وفي اسباير نلقاهم وفي كل مكان نلقاهم ومسويين زحمة لنا ما نقدر ناخذ راحتنا حتى في العطلة


:victory::victory::victory::victory::victory:

والله صدقت في كلامك جبته في القلب ما انروح مكان والا في ويهنا انا ادري بتقولون كلنا واحد وكلنا مسلمين ------ الخ وكل واحد وجه نظره بس انا عن نفسي الصراحه ابغي وخاطري في حديقه للقطرييييييييييين وللعوائل فقط نفس الاسباير صج مكان الواحد يرتاح مع العائله والمشكله مسويييييين زحمه غير طبيعي الاجانب وبعدين لحد يفكر اني ما بغييهم انا اقول ان شاء الله يخلوووووووووووون الاسابير او اي مكان للمواطنيييييييييين يتساهلوون اهل البلاد واولا فيهم والاجانب عندهم اماكن والله احنا القطرييييييين ما نقدر ندخله والكل يدري كل مكان واحنا لنا الحق بعد في ديرتنا نبغي مكان للقطريييييييين الله كريم

اما بالنسبه حق المراهقين الصراحه ما عندهم سالفه وعقلهم اصغير مايفكروون كلش انا اتمنى في امن او غيره يمكسونهم او ينصحونهم او اي شي المهم يخلوووون العوائل في حالهم الله يعيييييييييينكم منهم في كل مكان المراهقين

[أم وضحى]

اختي كلمه وقاحه كلمه اكبر من ما تتصورين
وهؤلاء شباب مراهقين وما يقومون به يأتي تحت
مسمى "مضايقات " وليس بما تلفظتي به ...

"عيب" ان تخرج هذه الكلمه من امرأه
نتمنى تغيير العنوان او حذفه ..!!



يمكنك اخوي الرجوع للمعاجم العربية لمعرفة معنى كلمة وقاحة ..
ومعناها سفيق الوجه قليل الحياء ..
واللي يتعرض لبنات خلق الله .. لايليق به الا هذا الوصف ..

[أبو راكان]

مشكله ازليه فالعالم كله
الحل
الدخول للعائلات فقط
وفرض رسوم جبريه
للكبار ب10 ريالات ولصغار 5 ريالات
وماراح تجوفين ولاطير
وكان الله غفورا رحيما

[أم وضحى]

انا لين الحين مارحت لها وكل هالسوالف فيها الا سحر الا ثعابين الا وقاحه

اقول نقعد بالبيت احسن

شكرا

لا يخلو اي مكان من الزين والشين ..
ومافتحت هذا الموضوع الا محاولة لعلاج الشيء ( الغلط )..

شكرا لمرورك

[السدره]

كلام صحيح......


مشكوره على كل كلمه تم كتابتها ويعطيج العافيه أختي ...

[غيور الدوحة]

انا معاكم في مشكة المراهقين يجب ان يكون هناك عقاب ورادع
وان يتم تخصيص افراد الهدف منهم حماية الحديقة من هذي الممارسات
والحديقة للكل

[anything99]

:victory::victory::victory::victory::victory:

والله صدقت في كلامك جبته في القلب ما انروح مكان والا في ويهنا انا ادري بتقولون كلنا واحد وكلنا مسلمين ------ الخ وكل واحد وجه نظره بس انا عن نفسي الصراحه ابغي وخاطري في حديقه للقطرييييييييييين وللعوائل فقط نفس الاسباير صج مكان الواحد يرتاح مع العائله والمشكله مسويييييين زحمه غير طبيعي الاجانب وبعدين لحد يفكر اني ما بغييهم انا اقول ان شاء الله يخلوووووووووووون الاسابير او اي مكان للمواطنيييييييييين يتساهلوون اهل البلاد واولا فيهم والاجانب عندهم اماكن والله احنا القطرييييييين ما نقدر ندخله والكل يدري كل مكان واحنا لنا الحق بعد في ديرتنا نبغي مكان للقطريييييييين الله كريم

اما بالنسبه حق المراهقين الصراحه ما عندهم سالفه وعقلهم اصغير مايفكروون كلش انا اتمنى في امن او غيره يمكسونهم او ينصحونهم او اي شي المهم يخلوووون العوائل في حالهم الله يعيييييييييينكم منهم في كل مكان المراهقين

الحمد لله انك مش من المسؤليين في البلد .. يعني تخيل نفسك تسافر لندن وتقرأ التعليمات قبل السفر .. لو مرضت اعلم ان المستشفى لاهل البلد ولا يمكنك العلاج فيها .. وبعض الحدائق مخصصة فقط للبرطانيين للحفاظ على الهوية الانجليزية ولا يمكنك دخولها .. والمدارس لو حبيت تدرس هناك كراسيها محدودة وفي الغالب لن تجد مكان لاطفالك .. ياخي المشلكة ليست في الاجانب المشكلة في التضخم السكاني اللي صار والضغط على مرافق الدولة الغير مهيئة لهذا العدد من السكان .. وما زال للان ناس تطلب وتعمل على زيادة عدد العمالة والموظفين من الخارج حتى نتعش اقتصاديا من دخولهم ..!!!!

[أم وضحى]

لا حول ولا قوة الا بالله العلي العظيم
نترك دائماً المشكله الرئيسية ونتكلم في فروعها الثانوية

يعني لما المراهقين يضايقون العائلات القطرية فهل هذا الخطأ يجب أن يتحمله الأجانب لأنهم يستغلون الحدائق خير استغلال في الرياضه؟
يعني لما الأجنبي يهتم بالرياضه ويخليها شي أساسي في حياته واحنا لا نهتم بها فهل هذا ذنبه إنه احنا ما نحب الرياضة؟
حقيقة أذكر هنا قصة الجمل والتلميذ الذي كل ما جاوب سؤالاً بعيداً كل البعد عن الجمل بدأ بالموضوع ثم تحول كلامه عن الجمل وهنا الجمل هو الأجنبي وكل ما انفتح موضوع حتى لو كان عن القمر وعن حفره تلقائياً وأوتوماتيكياً يتحول الموضوع إلى الأجنبي ويطلع في الأخير الأجنبي هو سبب الحفر على القمر

فلنتكلم كلاماً منطقياً بعيداً عن توافه الأمور ونمسك المشكله من جذورها والأفعى من رأسها وليس من ذيلها



الموضوع كان واضح من بدايته اختي المتفائلة ..
انا شددت على موضوع المضايقات واللي كان من اسبابها هروب العائلات من هالاماكن ..
مما ادى بها الى انها اصبحت مكان للاجانب ..


واذا حد خرج عن الموضوع فهذي مشكلته :)

[أم وضحى]

أولاً أنا بتكلم عن مضايقات الشباب .. ..

ياريت يفكر إنه عنده خوات وممكن يصير فيهم اللي يسويه فبنات الناس ..
وإقتراحي هو .. فأي مكان عام ,, سواء حدايق أو مجمعات ,, يحطون سكيوريتي ..
ومايكون هندي والا نيبالي والا .. .. .. .. المفروض يحطون قطري ..
لأن الشباب للأسف إذا السكيوريتي كان أجنبي .. يطقعونله .. ..
لكن القطري بيحسبونله حساب ..( يمكن) .. :)
ومايحطون واحد فمكان كبيــــر .. لازم أكثر من واحد .. ..

وياريييييييييييت الأمن الوقائي ينشرون رجالهم فهالأماكن .. ..



هذا هو الكلام الصحيح ..
وياليت يتم تطبيقه ..

شكراً لوعيك اخوي ..

[بو الجوري]

الحمد لله انك مش من المسؤليين في البلد .. يعني تخيل نفسك تسافر لندن وتقرأ التعليمات قبل السفر .. لو مرضت اعلم ان المستشفى لاهل البلد ولا يمكنك العلاج فيها .. وبعض الحدائق مخصصة فقط للبرطانيين للحفاظ على الهوية الانجليزية ولا يمكنك دخولها .. والمدارس لو حبيت تدرس هناك كراسيها محدودة وفي الغالب لن تجد مكان لاطفالك .. ياخي المشلكة ليست في الاجانب المشكلة في التضخم السكاني اللي صار والضغط على مرافق الدولة الغير مهيئة لهذا العدد من السكان .. وما زال للان ناس تطلب وتعمل على زيادة عدد العمالة والموظفين من الخارج حتى نتعش اقتصاديا من دخولهم ..!!!!

صدقتي والله ..:nice:

وياريت محد يطلع عن الموضوع ..

[وتبقى الدنيا حلوه]

انشالله الجهات المعنية تتخذ اجراء

[أم وضحى]

ليــش تتكلمون عن الاجانـــب
ترى الدنيا ما انخلقت لكــم بروحكــم

للقطرين والاجانــب الحق في الفســحـه في اي مكان يبغونــه
ترى مب زيــن عليــكم هالعنصريـــه
يعني الدوحــه شفيها غير كم مكان الواحد يروح يتمشى فيه بعد بتضيقون على خلق الله
وبتقولون اجانب ،، دامهم يشتغلون ويتعبون في بلادنــا خلوهم ينـفسون عن روحهــم
ولا تبونهــم مايتحركون من بيوتهم

اعتقد النقطه اللي المفروض تركزون عليها الا وهي الشباب والمعاكساتـــــــــــ وشلون نقدر نقلل من هالظاهــره المنتشره بشكل كبير

تحياتـي لصاحبــة الموضوع :nice:



شكراً لمرورج اختي ..

[سهم مديون]

الكل يعلم بأن الهدف من انشاء الحدائق العامة هو الشكل الجمالي الحضاري للدولة ..
وكذلك لتكون متنفس للراحة للمواطنين والمقيمين على حد السواء ..


ولاشك بأن حديقة اسباير تشهد اقبالا جماهيريا كبيرا ..لأنها تعتبر من أجمل أماكن رياضة
( المشي )..وايضاً لجمال تصميمها وفساحة مكانها ..


ولكن .. مايعكر صفو هذه الراحة .. هو وقاحة بعض مرتادي هذا المكان من فئة ( المراهقين والشباب ) .. بشكل دائم ومستمر ..
بدون أدنى احترام لخصوصية السيدات والعائلات ممن ينشدن الراحة والرياضة في نفس الوقت ..


ولانه من باب ( من امن العقاب اساء الأدب ) فأننا نطالب بوجود رادع لوقاحة هؤلاء المراهقين ..


من المخجل ان يتم مثل هذا التضييق على بنات البلد وعوائلها من قبل بعض شبابها ( الوقح )

دعونا نستمتع بحدائق بلدنا ..

انظروا بانفسكم للاماكن السياحية ( المجانية ) في البلد ..
سواء كانت الحدائق او الكورنيش او البحر ..
من هي الفئة المستفيدة منها ؟
ستجد ان الاجانب هم من استفاد منها ..!! وبلا منازع ..




ولو كان هناك احتشام بعد من الطرف الاخر كان افضل وأفضل:omen2:

[سنافي]

والله موضوع مهم وشي صار ينشاف في الحدائق والمجمعات وكل مكان وصراحة الواحد وده ينفجر من كثر ماهو شي يحرق القلب ..... لكن يا اخواني وخواتي لحد يتردد في الاتصال بالشرطة والامن الوقائي والعضيد ... انا اعرف واحد يشتغل وعاهم قال ان من صلاحياتهم التفاعل مع هذي الشكاوي ... بهدوء اتصلو وبيحضرون واشتكو على اي واحد ... لكن المشكله اذا كلنا سكتنا تتمادى المشكله .. انا واحد من اشوف اي خطأ من حيث:
-اللبس.
-الحركات اذا كانت واحد ووحده اجانب.
مضايقات.
اتصلو على هالارقام.
العضيد 4947888
عمليات الشرطة
4330000
لازم انتعاون ونقضي او انقلل من هذي الظاهرة

والله يرزق الكل على نيته

[م. عبدالعزيز]

ليش مايخلون الجمعه للعائلات ؟؟ وبعدين يعني اذا منعتوا الشباب وين تبونهم يروحوون؟؟
واسمحولي يعني مب كل الشباب عليهم حركات مثل ماتقولون.. يعني مثلا انا ورفيجي نروح نقعد معانا اللابتوب نتسلى ونسولف شيخصنا في غيرنا؟؟؟
ماتبونا نغير جو يعني اذا منعتوا علينا الاماكن علشان نغير جو وين تبونا نروح؟؟ وبعدين تتشكون الشباب تايهين وصايعين..

[أم وضحى]

مشكله ازليه فالعالم كله
الحل
الدخول للعائلات فقط
وفرض رسوم جبريه
للكبار ب10 ريالات ولصغار 5 ريالات
وماراح تجوفين ولاطير
وكان الله غفورا رحيما


المطلوب نشر الوعي
وفرض الرقابة ..

الرسوم ماراح تسوي شي ..

[أم وضحى]

كلام صحيح......


مشكوره على كل كلمه تم كتابتها ويعطيج العافيه أختي ...



العفو اختي
والله يعافيج ..

[بو الجوري]

.... لكن يا اخواني وخواتي لحد يتردد في الاتصال بالشرطة والامن الوقائي والعضيد ...

والله ياخوي المشكله .. اذا بتتصل ولما يجون .. قد الناس راحت ..

لكن لو يكون في أمن وقائي وحراسه متواجده .. بيكون أفضل وأسرع فالإجراء ..

[أم وضحى]

انا معاكم في مشكة المراهقين يجب ان يكون هناك عقاب ورادع
وان يتم تخصيص افراد الهدف منهم حماية الحديقة من هذي الممارسات
والحديقة للكل



ان شاء الله
اتمنى ذلك ..

[أم وضحى]

انشالله الجهات المعنية تتخذ اجراء


ان شاء الله

[بو الجوري]

ليش مايخلون الجمعه للعائلات ؟؟ وبعدين يعني اذا منعتوا الشباب وين تبونهم يروحوون؟؟


أخوي طبعاً مابيخلون كل يوم حق العائلات .. وإنت ورفيجك محشومين عن هالسوالف ..
لكن لو كان في سكيورتي .. بيكون أفضل .. وبتكون في رقابه ..

[أم وضحى]

ولو كان هناك احتشام بعد من الطرف الاخر كان افضل وأفضل:omen2:

الاحتشام واجب وفرض على كل مسلمة ..
وكلامك صحيح ..
شكراً لمرورك ..

[أم وضحى]

والله موضوع مهم وشي صار ينشاف في الحدائق والمجمعات وكل مكان وصراحة الواحد وده ينفجر من كثر ماهو شي يحرق القلب ..... لكن يا اخواني وخواتي لحد يتردد في الاتصال بالشرطة والامن الوقائي والعضيد ... انا اعرف واحد يشتغل وعاهم قال ان من صلاحياتهم التفاعل مع هذي الشكاوي ... بهدوء اتصلو وبيحضرون واشتكو على اي واحد ... لكن المشكله اذا كلنا سكتنا تتمادى المشكله .. انا واحد من اشوف اي خطأ من حيث:
-اللبس.
-الحركات اذا كانت واحد ووحده اجانب.
مضايقات.
اتصلو على هالارقام.
العضيد 4947888
عمليات الشرطة
4330000
لازم انتعاون ونقضي او انقلل من هذي الظاهرة

والله يرزق الكل على نيته



شكراً اخوي على اضافتك المهمة

[بلا حدود!]

يمكنك اخوي الرجوع للمعاجم العربية لمعرفة معنى كلمة وقاحة ..
ومعناها سفيق الوجه قليل الحياء ..
واللي يتعرض لبنات خلق الله .. لايليق به الا هذا الوصف ..









اختي مانبي نرجع للمعاجم لان فيها كلام تفسيره غير عن واقعنا الحالي
مفردات اللغه في السابق غير عن "الحين" وعندي كلمات قويه تقال الان
معناها في معاجم اللغه غير عن مانتلفظ به خصوصا البذيء منهـــا
وجربي ذلكــ مع اي من معجم في متناولكــ ..!!


عموما كان يجب ان تقولي "الشباب والمعاكسات او المضايقات"
الا اذا كنتي متمرسه في" علم الطباق" في قواعد النحو .!!

فعنوان موضوعكــ ياتي بمحاوله طباق موزونه ونحن هنا في المنتدى
ولسنا في درس للغه وفحوها ..لذا ارجو ان تتمعني في معنى كلمه وقاحه
في معناها المعاصر واللذي تغيير بعد الغزو الفكري والهامبرجر ..لاننا اليوم
لانرجع لتفسير اي كلمه لمختار الصحيح او المحيط او اي معجم لغوي ولكننا
نفسرها على ماهيتها عليه اليوم ...!!

راجعي نفسكــ ولا تكسبي الاثم بقولكـ وعنوانكــ ..

عموما ماسبق سرده كان من باب النصح والارشــاد ...!!

ولاحول ولا قوه الاباللـــــــــــه .....

[رويتر]

كلامج صحيح يا ام وضحى

وحسبي الله على الوقاحة وأهلها

خلونا نحبس اهلنا في بيوتنا ولا يطلعون إلا واحنا وياهم

هذا حالنا في بلادنا !!

خاطري أعرف وين الأمن الوقائي وشنو دورهم في البلاد !!!؟

لا حول ولا قوة إلا بالله العلي العظيم

[أم وضحى]

ليش مايخلون الجمعه للعائلات ؟؟ وبعدين يعني اذا منعتوا الشباب وين تبونهم يروحوون؟؟
واسمحولي يعني مب كل الشباب عليهم حركات مثل ماتقولون.. يعني مثلا انا ورفيجي نروح نقعد معانا اللابتوب نتسلى ونسولف شيخصنا في غيرنا؟؟؟
ماتبونا نغير جو يعني اذا منعتوا علينا الاماكن علشان نغير جو وين تبونا نروح؟؟ وبعدين تتشكون الشباب تايهين وصايعين..


والله يا خوي ما اطالب انها تكون للعائلات .. كثر ما اطالب بوجود رقابة تحمي للسيدات والعائلات خصوصيتهم ..


من البداية وانا اقول البعض ..
وكثير اللي فيهم الخير ..

[بو الجوري]

..لذا ارجو ان تتمعني في معنى كلمه وقاحه
في معناها المعاصر واللذي تغيير بعد الغزو الفكري والهامبرجر




وما معنى وقاحه .. أقصد مثل ماتقول ( معناها المعاصر ) !!!! ؟

[أم وضحى]

اختي مانبي نرجع للمعاجم لان فيها كلام تفسيره غير عن واقعنا الحالي
مفردات اللغه في السابق غير عن "الحين" وعندي كلمات قويه تقال الان
معناها في معاجم اللغه غير عن مانتلفظ به خصوصا البذيء منهـــا
وجربي ذلكــ مع اي من معجم في متناولكــ ..!!


عموما كان يجب ان تقولي "الشباب والمعاكسات او المضايقات"
الا اذا كنتي متمرسه في" علم الطباق" في قواعد النحو .!!

فعنوان موضوعكــ ياتي بمحاوله طباق موزونه ونحن هنا في المنتدى
ولسنا في درس للغه وفحوها ..لذا ارجو ان تتمعني في معنى كلمه وقاحه
في معناها المعاصر واللذي تغيير بعد الغزو الفكري والهامبرجر ..لاننا اليوم
لانرجع لتفسير اي كلمه لمختار الصحيح او المحيط او اي معجم لغوي ولكننا
نفسرها على ماهيتها عليه اليوم ...!!

راجعي نفسكــ ولا تكسبي الاثم بقولكـ وعنوانكــ ..

عموما ماسبق سرده كان من باب النصح والارشــاد ...!!

ولاحول ولا قوه الاباللـــــــــــه .....







احترم وجهة نظرك ..
ويبقى للكلمة نفس معناها في السابق والحاضر ..
ولا ضير اخي في استخدام الطباق .. او اي من قواعد النحو في الكتابة ..

ويبقى الموضوع الرئيسي مطروح للمناقشة ..

[بلا حدود!]

وما معنى وقاحه .. أقصد مثل ماتقول ( معناها المعاصر ) !!!! ؟




بصراحه وانا رجل استحي ان اكتب معناها على العام
في منتدى يقراء من كثير من الطبقات ... !!

وانا استغرب ان يظل العنوان هكذا راكنا في صفحات المنتدى العام
دون اي تحركــ ...

قد يكون احد اسباب ركنه دون تغيير هو ان كاتبته امرأه

[أم وضحى]

كلامج صحيح يا ام وضحى

وحسبي الله على الوقاحة وأهلها

خلونا نحبس اهلنا في بيوتنا ولا يطلعون إلا واحنا وياهم

هذا حالنا في بلادنا !!

خاطري أعرف وين الأمن الوقائي وشنو دورهم في البلاد !!!؟

لا حول ولا قوة إلا بالله العلي العظيم


جزاك الله كل خير اخوي على مداخلتك ..

[أم وضحى]

وما معنى وقاحه .. أقصد مثل ماتقول ( معناها المعاصر ) !!!! ؟


شكراً لك اخوي بو الجوري لاثرائك الموضوع بالمناقشة ..

[Store]

الله يعطيك العافيه على الموضوع

والله يهدي الشباب

[أم وضحى]

الله يعطيك العافيه على الموضوع

والله يهدي الشباب

الله يعافيك

واللهم آمين ..

[البارع]

انا اشوف ان المسؤل عن تصرفات الشباب هم الحريم الله يهداهم تحصل البعض منهم متعطره ومتمكيجه
وعلى قولة القايل على سنقس 10ولاتبي حد يضايقها ولايتحرش فيها انتي لو احترمتي نفسج وتحشمتي والله محد يضايقج ولايسوي لج شي اما تتكشخين من مجاميعه وتحملين الشباب المسؤليه لابالله انتي المسؤوله
وتستاهلين اكثر من جي بعد ؟؟؟؟؟؟؟سلم لم

[أم وضحى]

انا اشوف ان المسؤل عن تصرفات الشباب هم الحريم الله يهداهم تحصل البعض منهم متعطره ومتمكيجه
وعلى قولة القايل على سنقس 10ولاتبي حد يضايقها ولايتحرش فيها انتي لو احترمتي نفسج وتحشمتي والله محد يضايقج ولايسوي لج شي اما تتكشخين من مجاميعه وتحملين الشباب المسؤليه لابالله انتي المسؤوله
وتستاهلين اكثر من جي بعد ؟؟؟؟؟؟؟سلم لم

لا ننكر وجود هذه الفئة ..
ولكن لا نعمم ..


شكراً لمرورك

[البارع]

لا ننكر وجود هذه الفئة ..
ولكن لا نعمم ..


شكراً لمرورك

ماعممت انا قلت البعض وهم كثر الله يقلهم ان شاء الله:nice:


العفو اختي ام وضحى

[سداوي&مدريدي]

كلامج صحيح أختي صاحبه الموضوع

انزين وبالنسبه للبنات الي خبري خبرج

متواجدين هناك وبكثره ويبيلهم رادع :omen2:

[بوحارب]

الموضوع عن حديقة اسباير والشباب المراهقين ولقافتهم

انتوا ليش تطلعون برع الموضوع:anger1:

على العموم الله يهدي الشباب الوقحين اللي يتليقفون في اماكن العوائل

صج انهم ملاقيف :anger1:

والله يعينكم يالحريم على ثقالتهم

[أم وضحى]

كلامج صحيح أختي صاحبه الموضوع

انزين وبالنسبه للبنات الي خبري خبرج

متواجدين هناك وبكثره ويبيلهم رادع :omen2:


مثل ماقلت بالضبط يبيلهم رادع ..
سواء بنت او رجل ..

شكراً لمرورك ..

[سداوي&مدريدي]

مثل ماقلت بالضبط يبيلهم رادع ..
سواء بنت او رجل ..

شكراً لمرورك ..

:nice:

[أم وضحى]

الموضوع عن حديقة اسباير والشباب المراهقين ولقافتهم

انتوا ليش تطلعون برع الموضوع:anger1:

على العموم الله يهدي الشباب الوقحين اللي يتليقفون في اماكن العوائل

صج انهم ملاقيف :anger1:

والله يعينكم يالحريم على ثقالتهم



آمين الله يهديهم ..

وجزاك الله كل خير ..

[أم وضحى]

اتمنى ان لا يخرج الاخوة والاخوات عن صلب الموضوع ..


شاكرة للجميع تفاعلهم ومداخلاتهم المثرية ..

[الصاعق الحارق]

الحل بسيط عن الصاعق الحارق
1- ضبط المراهق وتصويرة ووضع صورته بلجريده الرسمية
2- جلده او ضربه ضرب مبرح حتى يعتبر
3- اعطاء المراهق فرشاة اسنان وجعله يكنس بها شارع طوله 10 كم

اذا في واحد في امه خير سوى هذا السوالف عقب هذا العقاب لكم مني الي تبغونه

[أم وضحى]

الحل بسيط عن الصاعق الحارق
1- ضبط المراهق وتصويرة ووضع صورته بلجريده الرسمية
2- جلده او ضربه ضرب مبرح حتى يعتبر
3- اعطاء المراهق فرشاة اسنان وجعله يكنس بها شارع طوله 10 كم

اذا في واحد في امه خير سوى هذا السوالف عقب هذا العقاب لكم مني الي تبغونه

مانبي والله تشهير في خلق الله ..
يكفي انذار اول .. ثم انذار ثاني .. ثم اجراء مناسب ..
لعلهم من المرة الاولى يهتدون ..



شكراً لمرورك ..

[OTOsan]

من المخجل ان يتم مثل هذا التضييق على بنات البلد وعوائلها من قبل بعض شبابها ( الوقح )

دعونا نستمتع بحدائق بلدنا ..

-
-
-انظروا بانفسكم للاماكن السياحية ( المجانية ) في البلد ..
سواء كانت الحدائق او الكورنيش او البحر ..
من هي الفئة المستفيدة منها ؟
ستجد ان الاجانب هم من استفاد منها ..!! وبلا منازع ..




اعتقد اختي ام وضحى ان ما اثار اللغط في الموضوع وعدم فهمه من البعض هو الفراغ مكان النقاط الحمراء الموجوده ، وهو نفسه ماحصل لي عند قرائتي لما كتبتِ !

فورود الفقرة الخاصة بالاجانب جاءت محشورة ومفاجئة ، وبالتالي لم يفهم البعض سبب ادراجهم في موضوع يتحدث عن ( المراهقين ) !!


لمن يطالب بعدم دخول الاجانب هناك .. نقول ( الدنيا لله ) .. وحديقة اسباير ليست بذلك المكان الضيق الذي تحتك به اكتف الناس معا من ( الزحمة ) !

انا اذهب اليها في نهاية الاسبوع .. و(اتخيّر ) المكان من المساحة الشاسعة الخضراء التي تحتويها .. واغلب ظني ان ( الزحمة ) ان وجدت تكون عند العاب الاطفال فقط !

[الصاعق الحارق]

مانبي والله تشهير في خلق الله ..
يكفي انذار اول .. ثم انذار ثاني .. ثم اجراء مناسب ..
لعلهم من المرة الاولى يهتدون ..



شكراً لمرورك ..

هذا الله يسلمك من طيبه اهل قطر طيبين ولا يحبون يضرون خلق الله
لكن هذا الي يضايق بنات الناس ماهو متربي ولا هله فيهم خير
ويستاهل حد يربيه
الله على ايام عبدالله بن خالد والله ايام عشوها اهل قطر في امن وطمئنينه
ولاراح ننساها من ايام

[أم وضحى]

اعتقد اختي ام وضحى ان ما اثار اللغط في الموضوع وعدم فهمه من البعض هو الفراغ مكان النقاط الحمراء الموجوده ، وهو نفسه ماحصل لي عند قرائتي لما كتبتِ !

فورود الفقرة الخاصة بالاجانب جاءت محشورة ومفاجئة ، وبالتالي لم يفهم البعض سبب ادراجهم في موضوع يتحدث عن ( المراهقين ) !!


لمن يطالب بعدم دخول الاجانب هناك .. نقول ( الدنيا لله ) .. وحديقة اسباير ليست بذلك المكان الضيق الذي تحتك به اكتف الناس معا من ( الزحمة ) !

انا اذهب اليها في نهاية الاسبوع .. و(اتخيّر ) المكان من المساحة الشاسعة الخضراء التي تحتويها .. واغلب ظني ان ( الزحمة ) ان وجدت تكون عند العاب الاطفال فقط !



الفقرة الاخيرة ماكتبت الا من اجل توضيح ما آل إليه التضييق على العائلات القطرية ..
فعلا أخي المساحة شاسعة ..وتسع الجميع .. ولكن هناك من ذهب للتسلية ( الخطأ) ولم يكن هدفه الرياضة أو الترويح عن النفس ..
فتح هذا الموضوع للمطالبة بوضع حلول .. لا أكثر ..

شكراً لمرورك ..

[..الاميرة..]

الأجانب
الأجانب
الأجانب

شسالفه حد يفهمنا :rolleyes2:
واين اذنك ياجحى

العوق والعله معروفه ممن مايحتاج نفتح لها مواضيع بس مشكلتنا مانحب الصراحه ولا نرضى بها .. :)

قال إش الأجانب يغازلون !

حبيبتي عليج بالفزعه هم حق المغازلجية خذي الكلام مني .. :)

[فـــــواز]

الحل بسيط جدا ولا يبيله شي ابد

المحرم وينه وين الرجال

اكيد لو فيه محرم ولا واحد يفكر يجي صوبكم

مشكوره والله يستر عليكم وعلي بنات المسلمين

[أم وضحى]

الأجانب
الأجانب
الأجانب

شسالفه حد يفهمنا :rolleyes2:
واين اذنك ياجحى

العوق والعله معروفه ممن مايحتاج نفتح لها مواضيع بس مشكلتنا مانحب الصراحه ولا نرضى بها .. :)

قال إش الأجانب يغازلون !

حبيبتي عليج بالفزعه هم حق المغازلجية خذي الكلام مني .. :)




اللي حب ياخذ من الموضوع كلمة اجانب ويبتعد عن صلب الموضوع فهذي مشكلته ..


وشاكره لك مرورك ..

[أم وضحى]

الحل بسيط جدا ولا يبيله شي ابد

المحرم وينه وين الرجال

اكيد لو فيه محرم ولا واحد يفكر يجي صوبكم

مشكوره والله يستر عليكم وعلي بنات المسلمين


مب الكل يقدر يكون معاه المحرم ..
والله يستر علينا وعلى بنات المسلمين اجمعين ..


شكرا لمرورك ..

[بو الجوري]

أم وضحى .. الله يعطيج العافيه .. ..

صراحه في عقليات فالمنتدى .. ماتقدر تستوعب وتفهم المعنى من الموضوع ..

أنا أقول إنسي الموضوع .. .. وإكتبيه عقب كم يوم .. بس بدون ذكر كلمة أجنبي ..
عشان محد يطلع برع الموضوع .. ويقدرون يفهمون إنتي شتبين ..

لج تحياتي .. ..

[anything99]

الحل بسيط جدا ولا يبيله شي ابد

المحرم وينه وين الرجال

اكيد لو فيه محرم ولا واحد يفكر يجي صوبكم

مشكوره والله يستر عليكم وعلي بنات المسلمين

هذا هو الحل .. :victory:

[أم وضحى]

أم وضحى .. الله يعطيج العافيه .. ..

صراحه في عقليات فالمنتدى .. ماتقدر تستوعب وتفهم المعنى من الموضوع ..

أنا أقول إنسي الموضوع .. .. وإكتبيه عقب كم يوم .. بس بدون ذكر كلمة أجنبي ..
عشان محد يطلع برع الموضوع .. ويقدرون يفهمون إنتي شتبين ..

لج تحياتي .. ..



شكراً لتواجدك اخوي في الموضوع ..
المفروض نطالب ادارة المنتدى بوضع كلمة اجنبي على هيئة XXXX
او من الكلمات اللي ممنوع تداولها !!!

نحتاج الى ثقافة وعي .. وقراءة مابين السطور ..


شاكرة لك مجددا وجودك ..

[ROSE]

اختي ام وضحى

وجهة نظرج وصلتيه وشكوتج وصلت يغلق الموضوع

بسبب المناوشات