معرض قطر المهني اومعرض قطر لتجميع السير الذاتية [الأرشيف]

مشاهدة النسخة كاملة : معرض قطر المهني اومعرض قطر لتجميع السير الذاتية

الوطني

14-04-2009, 10:45 PM

السلام عليكم ورحمة الله وبركاتة..
اخواني واخواتي الافاضل..
اليوم ذهبت انا ومعاي 2 من الربع الي مركز قطر لتجميع السير الذاتية :omg::omg:...
عفواً اقصد معرض قطر المهني :weeping::weeping: واقل واحد فينا شهادة بكالريوس على العموم رحنا نلف على كل الجهات العارضة وتعرفون ايش رد اغلبية العارضين عطنى السيرة الذاتية وحنا بنجمعهم وبعدها راح نتصل فيك في حالة الموافقة ...:anger1:
وبعضهم يقول خزنها عندنا على الكمبيوتر وبعدها راح نتصل فيك..:anger1:
ياابلفيت انهم افضل من غيرهم عشان الكمبيوتر..:anger1:
الي انا حبيت اقول لكم ليش ما اطلقوا على اسم المعرض معرض قطر لتجميع السير الذاتية بدال معرض قطر المهني... هل توافقوني الرائ ام لا...:victory::victory:
وين دور وزارة العمل ممثلة بأدارة القوى العاملة في توظيف القطرين..
بدال مايسون معرض ويخسرون ليش ما وزارة العمل تكفلت في موضوع التوظيف..

انا عندي خيار.. اما يغلون ادراة القوى العاملة بوزارة العمل او يلغون المعرض..
لانهم وظيفتهم وحدة..
انا عارف اني طولت عليكم بس هاذي الحقيقة...
وتقبلوا مروري...

بواردي

14-04-2009, 10:48 PM

لا وانت الصادق
بيجمعون الاوراق والملفات وتنباع مزاد علني لتغليف سندويشات الفلافل والطعمية

السد

14-04-2009, 10:52 PM

ولا طولت ولا شي
المفروض ادارة القوى العاملة اتكون صلاحيتهم اكثر لكل انحاء قطر
من مؤسسات البترول الى كل الوزرات
والمفروض انه يوجد موقع الكتروني

الخير كله

14-04-2009, 10:53 PM

المفروض كمعرض مهني يكون عندهم لسته بالوظائف الشاغره...والمطلوب لكل وظيفه
مثل ما قلت معرض تجميع السير الذاتيه لاني ما سمعت حد يمدح
الا قول لي يقولون اللي يجمعون السير كانهم رايحين عرس صج هالاكلام

الوطني

14-04-2009, 10:57 PM

مشكورين اخواني على الردود..
وبالنسبة للاخ فلترمان ماراح حد يشتريهم منهم..
وبالنسبة للاخت المبروكة .. الله يرحم العرس ... هذا صاير حفلة تنكرية...
بس هل انتو تأيدوني بتغير الاسم؟؟؟؟؟

الغريب3

14-04-2009, 10:57 PM

الوطني

14-04-2009, 11:03 PM

اخوي شدنك صادق ياخسارة المبلغ الي اندفع في هذا المعرض تحس انه مافيه اي اهتمام عادي اهم شي ياخذون السير الذاتيه حتى البعض مايعطيك رقم معامله ........... نسخه مكرره من المعرض الاول وياليت مايسون المعرض الثالث.
ملحوظه : لقيت شباب وايد اعرفهم أسالهم يقلولي عندك وسطه بتوظف

ياعزيزي صدقني هذا المعرض اسمة معرض تجميع السير الذاتية..
والله قبل لاروح كنت متأكد انه نفس الي العام ... بس قلت خلني اشوف بعيني يمكن تغيروا..
بس طلعوا نفس الي قبل...
وعلى فكرة والله ماقدمت على اي مكان..
لانة خسارة فيهم اعطيهم اوراقي وانا عارف وين طريقها
ومشكور على المرور

امل الحب

14-04-2009, 11:53 PM

http://www.qatarshares.com/vb/showthread.php?t=253845

:)

شـعـشـبـونـه

14-04-2009, 11:59 PM

انا اتفق معااك وياليتني السنه اللي فاتت سويت مثلك وماعطيتهم اوراقي
والله لا يعوز احد لهالمعرض واللي يبي يشتغل يروح لمكان العمل نفسه ومايعطي اوراقه لكل من هب ودب ...

الوطني

15-04-2009, 12:52 AM

انا اتفق معااك وياليتني السنه اللي فاتت سويت مثلك وماعطيتهم اوراقي
والله لا يعوز احد لهالمعرض واللي يبي يشتغل يروح لمكان العمل نفسه ومايعطي اوراقه لكل من هب ودب ...

الله يرزقنا على قد نياتنا..
ومشكورة على المرووووووور

مبرمج QA

15-04-2009, 08:16 AM

أحسن شي في المعرض..

جوائزهم حلوه... الصراحة : أقلام + كاسات + دفاتر + فلاش ميموري + كابات + راديو مع ليت ( طالعين البر ) + أكياس (علشان لبسة الرياضة! )

::.Silent.::

15-04-2009, 08:20 AM

أحسن شي في المعرض..

جوائزهم حلوه... الصراحة : أقلام + كاسات + دفاتر + فلاش ميموري + كابات + راديو مع ليت ( طالعين البر ) + أكياس (علشان لبسة الرياضة! )

اي والله

انا حصلت بعد:Ipod وسويت:eek5:

من شركة الديار

و لا عزاء للاوراق المحذوفه

eXpert*

15-04-2009, 08:38 AM

اي والله

انا حصلت بعد:Ipod وسويت:eek5:

من شركة الديار

و لا عزاء للاوراق المحذوفه

على الاقل حصلت لك على الايبود .

وللتصحيح هو مب ايبود هو MP4 :)

وبخصوص الاوراق لحد يحط في ذمته ان تنحذف ،، ياجماعة اعتقد الجميع شاف الاقبال على الجهات المشاركة ،، وشاف العدد الهائل ،، بعض الجهات الى اليوم استقبلت اكثر من 4000 سيرة ذاتية 75% منها للقطريين. للعلم للحين باقي يومين يعني بـ الراحة الرقم راح يتعدى 5500 سيرة ذاتية.

العملية كلها محتاجة وقت و صبر و بالاول والاخير يعتمد على عدد الشواغر المتوفرة.

أغلب الشركات عندها موظفين مسبقاً فأذا بيوظفين بيحتاجون ما يقارب من 10 لملئ الشاغر فقط.

و أتمنى من الجميع في الاول والاخير يتم فهم رؤية معرض قطر المهني ،، هي ليست توظيف بقدر ما هي تعريف بالجهات المشاركة خصوصاً ان سنوياً اشوف جهات جديدة تنظم للمعرض .

الله يوفق الجميع ،،

سوق واقف

15-04-2009, 08:42 AM

بعد المعرض روح خلف المعرض بتحصل الأوراق في درامات الزبالة تكرمون

سر يا قلم

15-04-2009, 08:42 AM

يعطيكم العافيه

ذيبه مزاجيه

15-04-2009, 01:25 PM

انا ما اصدق هالمعرض كلش كلش

ولا افكر اتعب نفسي و اروح .. لاني رحت العام شفت انهم مب مهتمين اصلا .. فغسلت يدي منهم

وانت صاج يا الوطني ((معرض السي في )) اللي بينحذف في اقرب زباله ..

الموضوعي

15-04-2009, 01:28 PM

كله علشان يقولون لسمو ولي العهد احنا نوظف

الوطني

15-04-2009, 01:41 PM

اشكر كل من مر على الموضوع..
اما بخصوص الهدايا فهي ماتسوى قيمة البترول الي صرفته ولا تسوى قيمة المخالفة اذا كان حد واقف غلط ولا تسوى الانتظار عشان تدور موقف ولا تسوى التعب الي يتعبة الواحد..
هذا كلة في صوب والمعرض بصوب..
بس هل توافقوني الرائ ان المعرض وادارة قوى العاملة شغلتهم وحدة؟؟؟؟؟
اتنمى من المسؤولين وقف هذا المعرض او الغاء ادارة قوى العاملة...

GPC

15-04-2009, 01:47 PM

كله علشان يقولون لسمو ولي العهد احنا نوظف

يعطيك العافية
عندي اقتراح وهو بعد انتهاء المعرض تقوم كل شركة بالإعلان في الصحف عن أسماء من تم تعيينهم وعددهم ويكون الإعلان على سبيل التهنئة مثلاً من الشركة للموظفين الجدد ... اعتقد بهذا تكون هناك شفافية على درجة كبيرة

AL HAJRI

15-04-2009, 02:35 PM

بصراحه انا متفائل بالمعرض مش مثل مـــ البعض متصور ,,,

ليش ياجماعه تستعجلون بالنقد بهــ الطريقه ,,,

يعني وش تبيهم يسوون !!!! يوظفونكم على طول !!!!!

لنفرض ان فيه وظيفه ما في شركه ما لمهندس وجاهم شخص عنده بكالوريوس في مجال هندسه

وماعنده خبره راح اول يوم وقدم سيرته الذاتيه وفي اليوم الثاني او الرابع راح لهم شخص

عنده بكالوريوس هندسه وخبره 10 سنوات ,,, من الافضل برأيكم ؟ وبكل صراحه

انا شخصياً ضد الاختيار من البدايه لان ذلك فيه اجحاض لحق المتقدمين اللي بعدي ,,,

المعرض ماعليه كلام ولكن عندي مقترحين لو تصير :

الاول : مش معقول معرض يكون على مستوى الدوله ويكون مدته 5 ايام (فهو ليس بمعرض كتاب او غيره ) وانما معرض وظيفي يشمل قطاعات الدوله بشكل شبه كامل ,, فلو كان مثلاً المعرض 12 يوم ومقسم لـــ 3 أقسام بحيث يكون في الـــ 4 ايام الاولى من المعرض مخصص لحملة الشهادات العليا اول 3 ايام للتقديم ويوم واحد لأجراء المقابلات , والـــ 4 ايام الثانيه لحملة الشهادة الجامعيه ,, والـــ 4 ايام الاخيره للشهادة الثانويه فما دون ,

بذلك قسمنا المعرض حسب كل فئه من الشهادات وحسب الطاقه الإستيعابيه للشركه ,,
وأعطينا يوم لإجراء المقابلات بعد تقديم السيرة الذاتيه ,,,

الاقتراح الثاني :

وأنا الحمد لله بلغت الاخوان القائمين على المعرض بحيث انهم يطبقونه بدايةً من السنه الجايه

الا وهو ,, ان يكون فيه لجنه خاصه لأخذ أراء المتقدمين + الأماكن اللي قدموا فيها + بياناتهم الشخصيه وارقامهم للتواصل معاهم بعد المعرض لمعرفة كم أعداد المواطنين اللي استفادوا من المعرض وتوظفوا ,,, لان فيه شركات تقول احنا سوينا وسوينا وهم اخرطي لا سووا ولاشي
حدهم 2 او 3 وبس ,,,

وانشاء الله الكل يستفيد وتأكدوا ان فيه ناس متابعين المؤتمر بشكل دقيق وعلى رأسهم
سمو ولي العهد الله يحفظه ,,

STAR

16-04-2009, 12:13 AM

وانت صاج اخوي مايونسني في المعرض الا بشي واحد ... الهدايا التذكارية هههههه

على الاقل احس اني طلعت بشي منهم

جمال اليافعي

16-04-2009, 12:21 AM

ليث العرين

16-04-2009, 12:46 AM

ان اشهد انك جبتها

معرض قطر لتجميع السير الذاتيه

واحد 11

16-04-2009, 01:10 AM

امل الحب

16-04-2009, 01:40 AM

للأسف الشديد تبين لي ان الكثير نظرتهم سوداويه في هذه الحياة .. طبعا من المنتدى ... كيف تبون البلد يتقدم وعندنا ناس حياتهم شي أسمه سلبي .. والايجابي منعدم ...

تعوذو من أبليس يا أهل قطر , تراه والله لاعب فحسبتكم وانت نازلين تذمر .. بيجيكم اليوم الي المسؤول بحط ماي في أذنه وبيسفه لكم .. انتوا جاعدين تسووون نفس الراعي والذيب ... يتم (( مع أحترامي الشديد )) يكذب " يتذمر " من كل شي لييين ما أهل القريه " المسؤولين " ملوو منه وطجعو له وجاه الذيب وأبلعه ...

أحمدو ربكم على النعمه يا عالم ..

نظرة سوداوية عشان الصج ينكتب امرك غريب!!

والحمد يستاهل الحمد كل يوم وكل حزة ..

وكل شي لازم نقوله الحمدلله وكان السالفة منة من عند حد .. ترا محد له منه على حد..كلها عطايا رب العالمين ومثل ماعطاهم بياخذها يعني لاتحسسني انها املاكهم واستملكوها..

الانتقاد صار شي غلط وصار تذمر..!

بس ترا الكل يأيد هالشي يعني كلهم يكذبون ويتبلون .. سبحان الله !

وماننتقد لمجرد الانتقاد.. ترانا قطريين والي يمسها يمسنا وكل من يبي يشوفها فوق..

ولكن الصح صح والغلط غلط..

ومحد قال ان المسؤولين سيئن في الشين والزين ولكن الزين صار نسبة بسيطة ..

لايغرك وايد الي تشوفه لاصار وقت الصج مابتشوف ولاشي من الي يقولونه لك في المكان الي قابلتهم فيه والي اقنعوك فيه..

المعرض فكرة حلوة.. لكن يبي له التزام ومصداقية في التعامل ..

المعرض مايبي له خذ وجمع ورق من العالم

يبي له ترتيب وتوضيح فكر حق العاملين فيه قبل الناس الي تدخله..

السلبية وين في انتقاد المعرض.. الانتقاد شي طبيعي جدا للسلبيات الموجودة ..

لاتقول احمدوا ربكم كأن السالفة منة .. كل مسؤول مجبور ومجبور ومجبور ان يساهم في تصحيح المسار اذا حاد عن طريقه الصحيح والا ليش هو مسؤول عشان يقعد ويطالع من بعيد لبعيد ويقول انا مالي خص..

ورمي الناس بصفة الكذب ترا شي سيء:)

مستجدة

16-04-2009, 03:08 AM

الرابح الاكبر هي المكتبات ....... تصوير سيرة ذاتية على عدد الجهات المشاركة ... ويبدا التوزيع العشوائي هناك .. ياتصيب ياتخيب ... مافيه تقييم او مقابلات او جدية في القبول... استغرب من معرض للتوظيف ولايعمل مقابلات مع احد فقط لتجميع السير الذاتية ....

صادق اليوم مصورة بــ 30 وراس المال كان 50 ريال :weeping: يعني طارت الخرده الغداء فلافل ولابدون اطحينيه عشان ارخص وتكفي ال 20 الباقيه :weeping:
ورحت ادور بكل المعرض ابي احد يقبل سيرتي الذاتيه كل قسم امر عليه يقلون نبي للغه ولا الاخوات يكلمونا بالانجلينزيه كلمه عربي وكلمه انجلينزي حتى الاستبيانات انجلينزيه
واللي يبي خبرة واللي اصلا مايستقبل الا خرجين سنه معينه
فيه قسم مابي اقول اسمه لكن تابع للخدمات البتروليه الاخت من شافتنا عند الكونتر نستفسر انهدت علينا تتكلم انجلينزي سألتها الاخت قطريه هههههههه ابيها اتحس على نفسها
قالت عندكم لغه مب مهم الشهادة ثانوي جامعي مب مشكله المهم للغه قلت لها هاي الشركه
تابعه لحكومة قطر ...؟
ولا شركه خاصه قالت لا شركه قطريه قلت طيب اشحقه محد فيكم يتكلم مع الثاني الا بالانجلينزي لايكون صارت اللغه الرسمه لقطر .....!!!
قالت وهى تضحك الشيخه كل المدراء اجانب وكل الاوراق اللي رايحه جايه انجلينزي
قلت في خاطري ...>>> عيل وين تقطير الوظائف اذا كل المدراء اجانب ومجبورين كلنا نتكلم للغتهم ولا ماميش وظيفه للقطري :anger1:

انا ندمت انه رحت بصراحه احس كل اللي مشاركين في المعرض حق بس الدعايه
لاكثر

قناص 787

16-04-2009, 03:12 AM

لا وانت الصادق
بيجمعون الاوراق والملفات وتنباع مزاد علني لتغليف سندويشات الفلافل والطعمية

أخوي ترا الفلافل هو الطعميه شكلك جوعان الغالي

بوخليفة3

16-04-2009, 06:28 AM

انزين انتوا اشله مستعيلين
انتضروا وشوفوا يقولون هالسنه غير
وبعدين اخوي اشتبي منهم يسوون يقولك طلبات كثيره جات لهم
يعني تبيهم مع كل واحد مقدم طلب يسوون معاه مقابله
يمكن في لجنه بعدين تدقق فالطلبات ويتصلون فيكم:nice:

لولوتي

16-04-2009, 07:49 AM

السلام عليكم ورحمة الله وبركاته

أعزائي الكرام بنظرة تفاؤلية أدعوا الجميع للتوكل على الله، والذهاب وتقديم الطلبات،
بما أنه اليوم آخر يوم للمعرض،
مع هذا الجو الجميل، بسماءه الملبدة بالغيوم :)
:):)تفاءلوا:):)

فكما الأمطار تهطل بإذن الله رب العالمين في حينها بالخير والبركة علينا اجمعين،
صغيرنا وكبيرنا،
غنينا وفقيرنا،
القطريّ منا والأجنبي،
صاحب الواسطة وسواه،
الخـَـيـّـر والشرير :nice:
وعلى الجميع دون استثناء:)

فإن رحمة رب العالمين ليست ببعيدة في تحقيق التوفيق لنا اجمعين :)

فتوكلوا على الله :)

جمال اليافعي

16-04-2009, 08:57 AM

نظرة سوداوية عشان الصج ينكتب امرك غريب!!

والحمد يستاهل الحمد كل يوم وكل حزة ..

وكل شي لازم نقوله الحمدلله وكان السالفة منة من عند حد .. ترا محد له منه على حد..كلها عطايا رب العالمين ومثل ماعطاهم بياخذها يعني لاتحسسني انها املاكهم واستملكوها..

الانتقاد صار شي غلط وصار تذمر..!

بس ترا الكل يأيد هالشي يعني كلهم يكذبون ويتبلون .. سبحان الله !

وماننتقد لمجرد الانتقاد.. ترانا قطريين والي يمسها يمسنا وكل من يبي يشوفها فوق..

ولكن الصح صح والغلط غلط..

ومحد قال ان المسؤولين سيئن في الشين والزين ولكن الزين صار نسبة بسيطة ..

لايغرك وايد الي تشوفه لاصار وقت الصج مابتشوف ولاشي من الي يقولونه لك في المكان الي قابلتهم فيه والي اقنعوك فيه..

المعرض فكرة حلوة.. لكن يبي له التزام ومصداقية في التعامل ..

المعرض مايبي له خذ وجمع ورق من العالم

يبي له ترتيب وتوضيح فكر حق العاملين فيه قبل الناس الي تدخله..

السلبية وين في انتقاد المعرض.. الانتقاد شي طبيعي جدا للسلبيات الموجودة ..

لاتقول احمدوا ربكم كأن السالفة منة .. كل مسؤول مجبور ومجبور ومجبور ان يساهم في تصحيح المسار اذا حاد عن طريقه الصحيح والا ليش هو مسؤول عشان يقعد ويطالع من بعيد لبعيد ويقول انا مالي خص..

ورمي الناس بصفة الكذب ترا شي سيء:)

أختي الكريمه لما الواحد تتصكر الابواب بوجهه يتم يشوف الامور بسلبيه و يطنش اي شي أيجابي ما مسه .. لو تقريين ردي انا قلت " تذمـــر" .

الواحد يشتكي الي يصير بس مهب يتم يقول هذه خدعه او السي في هات مجرد دعايه تراكم والله جاعدين بطريقه غير مباشرة تغلطون على ناس حاطتنا في عيونها ... يعني لما يكون المنظم فلان بن فلان ويحب الشعب وانتوا تقولون ان المعرض دعايه , ايش تعتقدين انج جاعده تسوين ؟ تقولين الحق ؟ انتي جاعده تظهرين ان المنظم لايفقه شي ولا يدري بأحوال الناس ...

ولا حد يزعل :) هذه أسلوبي في التفكير دايما اتعمق أكثر و أكثر من الامور الظاهره ..

الوطني

16-04-2009, 09:07 AM

اشكر كل من ابدئ رائية بالموضوع ... وانا كل قصدي من الموضوع هو معرفة مدى الاستقلالية الي تقوم بها الجهات العارضة.. مثل اخذ السير الذاتية سواء الورقية او تخزينها عندهم على الداتا بيس على قولتهم ومصيرها معروف وين بيكون...
اهما اطلقوا علية اسم معرض قطر المهني وانا اطلقت علية اسم معرض قطر لتجميع السير الذاتية..
الي يناقض كلامي هذا يثبت لي انه توظف في المعرض الاول اوالثاني سواء اتصلوا علية او قابلوه ..
ياجماعة الخير على قولة المثل (( يرقدون غزلانكم))
واحد من ربعي الخاصين موجود على احدى الاستاندات تدرون ايش قالي بلحرف الواحد.. قسم بجلال الله انه قالي ان المعرض shwo وانه هدف المعرض بلكثير يوظف 20 شخص بس..
خلنا نسويها عملية حسابية 115 تقسم 20 =5.75 شخص لكل مكان..معناتها ليش هل الخساير الي سواها؟؟؟؟؟؟؟؟
ايش الفرق بين المعرض وبين ادارة قوى العاملة التابعة لوزارة العمل؟؟؟
ترى احنا نفهم قصدهم من المعرض ونفهم ايش نيتهم ...
لكن خلوووووووووها على الله سبحانه وتعالى...
تقبلووووووووووووووووا مروووووووووري الي يمكن مايرضي بعض الناس...

واقع

16-04-2009, 02:01 PM

اللي انا شفته بعيني وصار لاحد الاصدقاء انه قدم على شركه واتصلو عليه وطلبوووه مقابله باليووم الثااني وفي ناااااس تمت الموافقه عليهم
في وزارات وفي هيئات وفي شركات هل تتوقع هيئة او شركه بتوظف شخص مقبووووول ؟؟؟؟ عيل شنو خلو للوزاراات ؟؟؟
وهل تتوقع ان وااحد حااك عمره 4 سنين دراااسه ومعدل عالي مكانه وزااارة؟؟؟ اكيد شركه ولا هيئه
صحييح ان في ناااس معدلاتهم مقبوول وشغالين في امااكن ممتازة لكن تضل نسبة بسيطه
اتمنى العقلانيه في بعض ردوود الاخواان
لكل مجتهد نصيب
من جد وجد ومن زرع حصد

eveqatar

16-04-2009, 02:12 PM

بصراحه انا اظن
يتم تخزينها على الكمبيوتر
عقبها يسوووون فورمات للكبيوتر
لليوم الثاني

Sharshooooor

16-04-2009, 03:53 PM

اليوم انا زرت المعرض

كله كلام فاضي اللي يسمع كلامهم يقول بيوظفونك الحين

ادخل بياناتك + مقابلة شخصية + اختبار انجليزي

والله قدمت قبل المعرض على جهه معينه وقالوا لي مانبي هالتخصص

يوم زرت المعرض قلت لهم ايش التخصصات اللي تبونها

قالوا لي كل التخصصات

قلت لهم من شهر ماتبون هالتخصص والحين تبونة

قالي مادري تابع مع الادارة هناك

ههههههههه

والله حاطينهم دعاية

armani**

18-04-2009, 10:45 AM

يمكن هالسنه غير انا سمعت ان ولي العهد الشيخ تميم مشدد عليهم هالسنه بتوظيف القطرين .
احنا تجربنتا مع المعرض الاول شوهه لنا صوره المعرض هالسنه .
و تفائلوا بالخير تجدوه , مع اني اكثر الاحيان غير متقائل واحب التشائم لاني ما ابي اعطي نفسي امل و بعدين اطيح طيحه قوه .
بس ما ادري حاس انه في خير ان شاءالله في المعرض هذا .