المهر ....لا تصرفينه على شي ما يسوى

[الوان]

رساله لخواتي الصغار

اللي استلمت المهر

100 الف ولا 200 الف ولا 300 الف

الله يبارك لج فيه

نصيحة ... امسكي فلوسج ولا تغرج قاعه ولا كوشة ولا تجهيز طاولات

ثرى والله ما يسوى

يا بنات هذي نصيحة بتشوفون نتيجتها بعد العرس بكم سنة و ان شاء الله تدعون لي

لو العروس و المعرس يحطون هالفلوس في عقار

بدل ما يساهمون في ارتفاع حسابات الرتز و الشيراتون و غيرها

الفلوس حتى ما تروح للدولة

تروح لأوروبا و أمريكا

ولا شرايكم

[فارس الكلمة]

معقولة .. بنت تقول هذا الكلام .. ؟!!

بارك الله فيك .. لكن من يسمع ..؟!

[الوان]

معقولة .. بنت تقول هذا الكلام .. ؟!!

بارك الله فيك .. لكن من يسمع ..؟!

انا سويت عرسي في بيت ابوي

و الكوشه كلفتني 3 الاف ريال ( كرسي و وردتين)

[هتـان قطر]

اختي الوان اشوفها صعبة على بنت مقبلة على الزواج انها ما تجهز نفسها
وتكون ملكة ولو لليلة وحدة..
اكيد البنت تبي تقعد على كوشة وتصوير.. وامور البنات ابخص بها..

مهر البنت لها..ولها مطلق الحرية فيه ومهب حلوة تاخذه وتشارك زوجها فيه..
الايام جايه ورزقهم على الله..


واعتقد هذا الكلام ما يطلع الا من وحدة متزوجة...:nice:

[بوفهاد]

أقلهن مهراً أكثرهن بركة

قال النبي صَلَّى اللَّهُ عَلَيْهِ وَسَلَّمَ : (خير النكاح أيسره) رواه ابن حبان . وصححه الألباني في صحيح الجامع (3300) .
وقال صَلَّى اللَّهُ عَلَيْهِ وَسَلَّمَ : (خير الصداق أيسره) رواه الحاكم والبيهقي . وصححه الألباني في صحيح الجامع (3279) .
وقال النبي صلى الله عليه وسلم لرجل أراد الزواج: (التمس ولو خاتماً من حديد) . متفق عليه .

روى أبو داود (2125) والنسائي (3375) – واللفظ له - عَنْ ابْنِ عَبَّاسٍ أَنَّ عَلِيًّا قَالَ : تَزَوَّجْتُ فَاطِمَةَ رَضِيَ اللَّهُ عَنْهَا ، فَقُلْتُ : يَا رَسُولَ اللَّهِ ، ابْنِ بِي – وهو الدخول بالزوجة - . قَالَ : أَعْطِهَا شَيْئًا . قُلْتُ : مَا عِنْدِي مِنْ شَيْءٍ . قَالَ : فَأَيْنَ دِرْعُكَ الْحُطَمِيَّةُ ؟ قُلْتُ : هِيَ عِنْدِي . قَالَ : فَأَعْطِهَا إِيَّاهُ . صححه الألباني في صحيح النسائي (3160) .
فهذا كان مهر فاطمة بنت رسول الله صلى الله عليه وسلم سيدة نساء أهل الجنة .


أين نحن منهم ، اصبحنا للأسف نتحدث بمئات الالاف !!

وكأن الزواج هو العرس ذاته .. فإن لم يقع كما هو مترتب له ، فذاك لا يُسمى عرساً

كثر الله من امثالك اختي الوان

[بوفهاد]

للإستزاده

ذكر ابن القيم في "زاد المعاد" (5/178) بعض الأحاديث الدالة على تخفيف المهر وأنه لا حد لأقله ثم قال :
فتضمنت هذه الأحاديث أن الصداق لا يتقدر أقله . . . وأن المغالاة في المهر مكروهة في النكاح وأنها من قلة بركته وعسره اهـ .

وبهذا يتبين أن ما يفعله الناس الآن من زيادة المهور والمغالاة فيها أمر مخالف للشرع .
والحكمة من تخفيف الصداق وعدم المغالاة فيه واضحة :
((( وهي تيسير الزواج للناس حتى لا ينصرفوا عنه فتقع مفاسد خلقية واجتماعية متعددة .)))
والله أعلم .

[الوان]

أقلهن مهراً أكثرهن بركة

قال النبي صَلَّى اللَّهُ عَلَيْهِ وَسَلَّمَ : (خير النكاح أيسره) رواه ابن حبان . وصححه الألباني في صحيح الجامع (3300) .
وقال صَلَّى اللَّهُ عَلَيْهِ وَسَلَّمَ : (خير الصداق أيسره) رواه الحاكم والبيهقي . وصححه الألباني في صحيح الجامع (3279) .
وقال النبي صلى الله عليه وسلم لرجل أراد الزواج: (التمس ولو خاتماً من حديد) . متفق عليه .

روى أبو داود (2125) والنسائي (3375) – واللفظ له - عَنْ ابْنِ عَبَّاسٍ أَنَّ عَلِيًّا قَالَ : تَزَوَّجْتُ فَاطِمَةَ رَضِيَ اللَّهُ عَنْهَا ، فَقُلْتُ : يَا رَسُولَ اللَّهِ ، ابْنِ بِي – وهو الدخول بالزوجة - . قَالَ : أَعْطِهَا شَيْئًا . قُلْتُ : مَا عِنْدِي مِنْ شَيْءٍ . قَالَ : فَأَيْنَ دِرْعُكَ الْحُطَمِيَّةُ ؟ قُلْتُ : هِيَ عِنْدِي . قَالَ : فَأَعْطِهَا إِيَّاهُ . صححه الألباني في صحيح النسائي (3160) .
فهذا كان مهر فاطمة بنت رسول الله صلى الله عليه وسلم سيدة نساء أهل الجنة .


أين نحن منهم ، اصبحنا للأسف نتحدث بمئات الالاف !!

وكأن الزواج هو العرس ذاته .. فإن لم يقع كما هو مترتب له ، فذاك لا يُسمى عرساً

كثر الله من امثالك اختي الوان

جزاك الله خير

[عاشق الشهادة]

انا استغرب من مثل هذا الكلام كيف تطلبين البنات يمسكون المهر حق كم سنه وحق من اهااا لليوم الاسود المنتظر ؟

صحيح خلها تعمل العرس في بيت ابوها وتحط لها كوشه 3الاف و وردتين على قولتج ؟
والمعاريس ايش عشاهم ليكون دجاج والا تورته وعصير ؟

[الوان]

اختي الوان اشوفها صعبة على بنت مقبلة على الزواج انها ما تجهز نفسها
وتكون ملكة ولو لليلة وحدة..
اكيد البنت تبي تقعد على كوشة وتصوير.. وامور البنات ابخص بها..

مهر البنت لها..ولها مطلق الحرية فيه ومهب حلوة تاخذه وتشارك زوجها فيه..
الايام جايه ورزقهم على الله..


واعتقد هذا الكلام ما يطلع الا من وحدة متزوجة...:nice:

ما يخالف خل تكون ملكه
بس مش بالطريقة اللي نشوفها

اعتقد لو الدولة تسوي قاعات افراح في كل منطقة بتنحل مشاكل وايد

[بوفهاد]

عزوف اكثر الشباب أو تأخرهم في الزواج من أسبابه الأساسية يا أخي المهر العالي وتكاليف العرس ... الخ

فلو هون كل رب اسرة وكل بنت تريد الستر على من اتاهم راضين بخلقه ودينه لكان خيرا لهذه الأمة.

وانا ما اقول يقبلون بواحد ما يقدر يصرف على البنت !! بس مو شرط ان الواحد يكون راتبه 20 الف يقدر يدفع 200 الف مهر !!!!!!

يعني يبدأ حياته باقساط وربا بنوك ؟ !!!!!!!!!

[الوان]

انا استغرب من مثل هذا الكلام كيف تطلبين البنات يمسكون المهر حق كم سنه وحق من اهااا لليوم الاسود المنتظر ؟

صحيح خلها تعمل العرس في بيت ابوها وتحط لها كوشه 3الاف و وردتين على قولتج ؟
والمعاريس ايش عشاهم ليكون دجاج والا تورته وعصير ؟

بس معقولة تصرف 80 الف على القاعة
و 60 الف على تجهيز الطاولات
و50 الف على الكوشة
20 الف على تجهيز الخلّه
و 30 الف على الفستان
و 10 الاف على التوزيعات
و مادري كم على البطاقات
احس وايد حرام

[بو الجوري]

الله يكثر من أمثالج إختي ..

وطبعاً مب لازم تسويه فالبيت وتصرف 10الاف بس ..
عادي تسوي عرس وتستانس وتفرح .. لكن مب بالمبلغ كله ..
تخلي لها شوي .. ومهب عيب اذا الزوجه ساعدت زوجها ..
ومب لازم تفوشر وتدفع زياده عالمهر عشان تصير ملكه !!
ترى العرس بالعروس وأهلها وأهل المعرس .. يصير روووعه ..
خلكم من المفوشر وعرس فلانه أحلى وإلا ليش هي سوت هالشي انا بعد بسوي ..
و.. و... و ... مافي شي مفلس الرجال غير .. مفوشر حريمهم .. وهذي عندها وهذيك سوت ..


ترى كلامي عن البعض .. .. وفي بنات ماعليهم قصور ومايحتاجون توصيه ..

[هتـان قطر]

مهر المرأة في الاسلام واجب على الرجل..ولم يُحدد كما يفعل البعض الان
بل يترك على حسب مقدرة الزوج..سواء قليل او كثير..



صعد عمر رضي الله عنه يوما الى المنبر,وخطب في الناس ,فطلب منهم ألايغالوا

في مهور النساء, لأن رسول الله صلى الله عليه وسلم وأصحابه لم يزيدوا في مهور النساء عن

أربعمائة درهم؟

لذالك أمرهم لا يزيدوا في صداق المرأة على أربعمائة درهم فلما نزل أمير المؤمنين من على منبره

قالت له امرأة من قريش يا أمير المؤمنين,نهيت الناس ان يزيدوا النساء في صدقلتهن على أربعمائة

درهم؟قال نعم فقالت أما سمعت قول الله تعالى((وأتيتم احداهن قنطارا))

والقنطار هو المال الكثير فقال اللهم غفرانك كل الناس أفقه من عمر

ثم رجع فصعد المنبر وقال يا أيها الناس اني كنت نهيتكم أنتزيدوا في مهور النساء

فمن شاء أن يعطي من ماله ما أحب فليفعل.

[بوفهاد]

بس معقولة تصرف 80 الف على القاعة
و 60 الف على تجهيز الطاولات
و50 الف على الكوشة
20 الف على تجهيز الخلّه
و 30 الف على الفستان
و 10 الاف على التوزيعات
و مادري كم على البطاقات

وفي النهاية ، تجلس على الكوشة ساعة وحدة بس !!! وتنتهي حفلتها اللي كلفتها أكثر من 100 الف ..

علشان تبتدي حياة المشاكل مع او كلمة للزوج ( ما عندي ) !!

[الوان]

بس معقولة تصرف 80 الف على القاعة
و 60 الف على تجهيز الطاولات
و50 الف على الكوشة
20 الف على تجهيز الخلّه
و 30 الف على الفستان
و 10 الاف على التوزيعات
و مادري كم على البطاقات

وفي النهاية ، تجلس على الكوشة ساعة وحدة بس !!! وتنتهي حفلتها اللي كلفتها أكثر من 100 الف ..

علشان تبتدي حياة المشاكل مع او كلمة للزوج ( ما عندي ) !!

اللي صاير
يقعدون الضيوف من الساعة 8 لين الساعة 10
تنزل الشيخة العروس اذا من وهل الساعة 10 و معظمهم ما ينزلون الا الساعة 11
اول ما تقعد يطلعون النسوان .. وراهم بيوت
يعني مسوية العرس ليش اذا محد شاف العروس والله احس تعقد هي واهلها بروحهم

[انا احساس]

وشرايج في البنت االي تقترح هالشيء على زوجها ...بس هو يرفض ويقول لازم نسوي عرس ؟؟
بعض الازواج مايوافقون .... وانا اشوف انها تسوي عرس احلى الوحده كم مره بتفرح بس في حدود المعقول موب بالاسعار الخيالية اللي نشوفها الكوشة بـ 50 او 80 ألف وفي اغلى ...في كوش بـ 7 و 8 ونفس الشيء اسعار القاعات وتجهيز الطاولات وغير وغيره ... اشوف ان كل شيء بيد البنت بعضهم يحب الفشار وشوفي المخاسير وبعضهم بسيط وحلو وسعر معقول ....
والف شكر لج

[حروف]

معاج حق في كل شي اختي الوان :)
انا مهري خذته خشيته وقبل جم سنه كان صج مبلغ محترم وبعدها بديت اشتري اسهم واكتتب والحمدلله الحين من فلوس مهري بس عندي خير الله يزيد ويبعد العين ان شاء الله ...
لا سويت عرس ولا شي ... سويت لي حفل استقبال بسيط "أهل" في بيت ابوي وبعدها سافرنا شهر العسل وكان كل شي أوكي .. حتى ما لبست فستان ابيض لبست لون ثاني والحمدلله كان كل شي اوكي

[بوفهاد]

الاخت الكريمة هتان

فمن شاء أن يعطي من ماله ما أحب فليفعل.

هذه في المشيئة ، ولكن الأصل جاء في القلة .

والله إذا واحد يقدر يدفع ويبي ليش لا ، خير وبركة

ولكن نحن نتكلم عن اصل المسألة والأساس ، اللي يجب ان يكون من طرف البنت ووالدها.

الوان ، العرس للفندق الله يسلمج
الله يغفر لنا

[هدوء الصباح]

انا سويت عرسي في بيت ابوي

و الكوشه كلفتني 3 الاف ريال ( كرسي و وردتين)

اختي الوان هي ليلة وحدة بهالعمر..والوحدة تظل تحلم فيها من هي صغيرة..
المشكلة مش في الحفلة,المشكلة في ارتفاع الاسعر الجنوني ,وعدم وجود منافسة بين العارضين,الطلب كثير والعرض قليل مما ادى الى ارتفاع التكاليف..
نحاول ان نبحث عن شئ معقول ولكنني لست معك في تصغير الحفلة لهذه الدرجة..المساعدة بين الطرفين مطلوبة والفرحة مطلوبة ايضا..
خير الامور اوسطها..

بعدين الفلوس رايحة!!!ما في شي يتوفر هالايام وانا اختج..

[بوفهاد]

القضية مش في المال ..

المسأل تتعلق بما نفعله بهذا المال ، نفرح .. لا شيء في الفرح والسرور .. ولكن هل ما يحدث في القاعات والاعراس .. يرضي الله !!

يا اخوان لابد نتذكر حديث الرسول صلى الله عليه وسلم ( لا تزول قدما عبد يوم القيامة حتى يسأل عن أربع )

من ضمنها ... وعنْ مالهِ مِنْ أيْنَ أخذهُ وفيما أنْفَقَهُ.

هنا مربط الفرس ، فيما تم انفاق المال !!!!!

اهو في حلال ام غير ذلك ، اهو في حاجة ام بذخ

الله يجيرنا

[الوان]

بس معقولة تصرف 80 الف على القاعة
و 60 الف على تجهيز الطاولات
و50 الف على الكوشة
20 الف على تجهيز الخلّه
و 30 الف على الفستان
و 10 الاف على التوزيعات
و مادري كم على البطاقات
احس وايد حرام

نسيت اضيف المطرب و المطربة

[بوفهاد]

تعالوا نتكلم بكل صراحة ووضوح وجدية .

ووالله اني لا اقول هذا الكلام حقدا على بناتنا ، على العكس بنت بلادي تستاهل كنوز الدنيا

ولكن

من المستفيد الأول مما يُصرف في الأعراس !!

هل هو المعرس .. أم العروس .. ام المنظمون لهذه الاحتفالات ؟

[الوان]

تعالوا نتكلم بكل صراحة ووضوح وجدية .

ووالله اني لا اقول هذا الكلام حقدا على بناتنا ، على العكس بنت بلادي تستاهل كنوز الدنيا

ولكن

من المستفيد الأول مما يُصرف في الأعراس !!

هل هو المعرس .. أم العروس .. ام المنظمون لهذه الاحتفالات ؟

و المنظمين كلهم من جنسية وحدة مكوشين على هالقطاع

[بوفهاد]

هذا بلا بوك

وصلنا للمهم .. يعني لا المعرس مستفيد ولا حتى العروس اللي المفترض ان المهر لها !!

يعني بالعربي لما اجي اخطب لابد يحضر معاي الوالد وابو العروس والأهم ( منظم الحفلات ) .. علشان اهو اللي يقول كم المهر :) !!

[a.a.a.qatar]

هذا بلا بوك

وصلنا للمهم .. يعني لا المعرس مستفيد ولا حتى العروس اللي المفترض ان المهر لها !!

يعني بالعربي لما اجي اخطب لابد يحضر معاي الوالد وابو العرس والأهم ( منظم الحفلات ) .. علشان اهو اللي يقول كم المهر :) !!

عليك نور لأن كله في جيبه وجيب طوايفه

[بوفهاد]

طيب سؤال يا بنات .. وهذا السؤال للمتزوجات ، يعني اللي مرت بها التجربة

بكل صراحة وتجرد

اي حفلة من الحفلات اللي مرت عليج من الخطوبة .... الين العرس.. كانت هي الافضل بالنسبة لج

ليلة حسيتي فيها انج ماخذة راحتج ، وتسولفين مع الكل ، والكل يمر عليج ويضحك ، وتحسين ان كل اللي حولج اهم هلج وصديقاتج ..

بكل صراحة .

[الوان]

طيب سؤال يا بنات .. وهذا السؤال للمتزوجات ، يعني اللي مرت بها التجربة

بكل صراحة وتجرد

اي حفلة من الحفلات اللي مرت عليج من الخطوبة .... الين العرس.. كانت هي الافضل بالنسبة لج

ليلة حسيتي فيها انج ماخذة راحتج ، وتسولفين مع الكل ، والكل يمر عليج ويضحك ، وتحسين ان كل اللي حولج اهم هلج وصديقاتج ..

بكل صراحة .

العروس بشكل عام منحرجة و مستحية
انا بالنسبة لي ما سويت لا خطوبة ولا حنة ولاشي

[بوفهاد]

انتي ما حولج اخت فارطة يمين يسار :)

ما شاء الله عليج ما سويتي شي ابد !!

انا مُصر اسمع الإجابة من وحدة مرت بمراحل الاحتفالات التقليدية.

[هدوء الصباح]

طيب سؤال يا بنات .. وهذا السؤال للمتزوجات ، يعني اللي مرت بها التجربة

بكل صراحة وتجرد

اي حفلة من الحفلات اللي مرت عليج من الخطوبة .... الين العرس.. كانت هي الافضل بالنسبة لج

ليلة حسيتي فيها انج ماخذة راحتج ، وتسولفين مع الكل ، والكل يمر عليج ويضحك ، وتحسين ان كل اللي حولج اهم هلج وصديقاتج ..

بكل صراحة .

الخطوبة والعرس (الحمد لله)

[بوفهاد]

لا تصعبينها علي ، ابي جواب واحد بس

[هدوء الصباح]

لا تصعبينها علي ، ابي جواب واحد بس

ممممم...العرس:)

[بوخالد2]

معاج حق في كل شي اختي الوان :)
انا مهري خذته خشيته وقبل جم سنه كان صج مبلغ محترم وبعدها بديت اشتري اسهم واكتتب والحمدلله الحين من فلوس مهري بس عندي خير الله يزيد ويبعد العين ان شاء الله ...
لا سويت عرس ولا شي ... سويت لي حفل استقبال بسيط "أهل" في بيت ابوي وبعدها سافرنا شهر العسل وكان كل شي أوكي .. حتى ما لبست فستان ابيض لبست لون ثاني والحمدلله كان كل شي اوكي

بارك الله فيج اختى

تدرين في محل في النصر راعيه لبناني

يسولف حق واحد من الربع ويقوله سويت كوشه و تقديم وكلش 700 الف !!!

هل تصدقون الشي هذا

انا عن نفسي مب مستوعب الكلام هذا

[بوفهاد]

المشكلة ما في اجابات كثيرة علشان أقدر أقارن واواصل الطرح

شكل البنات رافضين هذا الموضوع بتاتا

بس وربي اني ناوي استلم الشباب :)

[بوفهاد]

ليش يا بو خالد مش مستوعب

ياخوي النهبه على بيزة طالما تلقى ناس متقبلين هذا الأمر !!

[بابا الضحية]

ما يخالف خل تكون ملكه
بس مش بالطريقة اللي نشوفها

اعتقد لو الدولة تسوي قاعات افراح في كل منطقة بتنحل مشاكل وايد

:nice:

[بوخالد2]

المشكلة ما في اجابات كثيرة علشان أقدر أقارن واواصل الطرح

شكل البنات رافضين هذا الموضوع بتاتا

بس وربي اني ناوي استلم الشباب :)

الله يغربل ابليسك حكرت لهم عدل !!

سوال ورى سوال ؟؟

[المرايا]

أقلهن مهراً أكثرهن بركة

قال النبي صَلَّى اللَّهُ عَلَيْهِ وَسَلَّمَ : (خير النكاح أيسره) رواه ابن حبان . وصححه الألباني في صحيح الجامع (3300) .
وقال صَلَّى اللَّهُ عَلَيْهِ وَسَلَّمَ : (خير الصداق أيسره) رواه الحاكم والبيهقي . وصححه الألباني في صحيح الجامع (3279) .
وقال النبي صلى الله عليه وسلم لرجل أراد الزواج: (التمس ولو خاتماً من حديد) . متفق عليه .

روى أبو داود (2125) والنسائي (3375) – واللفظ له - عَنْ ابْنِ عَبَّاسٍ أَنَّ عَلِيًّا قَالَ : تَزَوَّجْتُ فَاطِمَةَ رَضِيَ اللَّهُ عَنْهَا ، فَقُلْتُ : يَا رَسُولَ اللَّهِ ، ابْنِ بِي – وهو الدخول بالزوجة - . قَالَ : أَعْطِهَا شَيْئًا . قُلْتُ : مَا عِنْدِي مِنْ شَيْءٍ . قَالَ : فَأَيْنَ دِرْعُكَ الْحُطَمِيَّةُ ؟ قُلْتُ : هِيَ عِنْدِي . قَالَ : فَأَعْطِهَا إِيَّاهُ . صححه الألباني في صحيح النسائي (3160) .
فهذا كان مهر فاطمة بنت رسول الله صلى الله عليه وسلم سيدة نساء أهل الجنة .


أين نحن منهم ، اصبحنا للأسف نتحدث بمئات الالاف !!

وكأن الزواج هو العرس ذاته .. فإن لم يقع كما هو مترتب له ، فذاك لا يُسمى عرساً

كثر الله من امثالك اختي الوان


بارك الله فيك ..

والله يجزيك كل خير

وهالكلاام مب شرط المتزوجة تعرفه ..

حتى البنات يفكروون هالتفكير ..

لانه يصب في مصلحتها ومصلحة شريك حيااتها ..

اللي اعتقد رااح يحفظ لها الجميل طول العمر ..

[المرايا]

طيب سؤال يا بنات .. وهذا السؤال للمتزوجات ، يعني اللي مرت بها التجربة

بكل صراحة وتجرد

اي حفلة من الحفلات اللي مرت عليج من الخطوبة .... الين العرس.. كانت هي الافضل بالنسبة لج

ليلة حسيتي فيها انج ماخذة راحتج ، وتسولفين مع الكل ، والكل يمر عليج ويضحك ، وتحسين ان كل اللي حولج اهم هلج وصديقاتج ..

بكل صراحة .

انزين ابي اجااوب ..؟؟ ممكن ..؟؟؟

[بوخليفة3]

انا مع تقليل التكاليف بس من حق البنت تسوي حفله وعرس وطقطقه وتجيب خيريه وربعها
بس كل شي بالعقل
ويعطيج العافيه الشيخه ع الموضوع

[بوفهاد]

ممكن ونص ؟ جاوبي

[المرايا]

طيب سؤال يا بنات .. وهذا السؤال للمتزوجات ، يعني اللي مرت بها التجربة

بكل صراحة وتجرد

اي حفلة من الحفلات اللي مرت عليج من الخطوبة .... الين العرس.. كانت هي الافضل بالنسبة لج

ليلة حسيتي فيها انج ماخذة راحتج ، وتسولفين مع الكل ، والكل يمر عليج ويضحك ، وتحسين ان كل اللي حولج اهم هلج وصديقاتج ..

بكل صراحة .

من الخطوبة .. الحنة لين العرس والهدية

اللي لمسته في العرووس ان احلى يووم هو يوم عقد القران ( الملجة ) ..

احس انه هو احلى يوم بحيااتها

يمكن قبل تقدر تقوول ان العروس تستمتع بيوم الخطوبة .. على اساس انها في البيت بين اهلها وبس ..

اما الحين من الخطوبة لين العرس الحفلات كلها في الفنادق والصالات .. ما اظن ان العرووس تحس بشي من اللي يصير حولها ..

لانها ما رااح تستفيد من كل اللي سوته .. مرتبكة تحاتي وتفكر شلون شكلها مشيتها ..
تحااسب على كل تصرف بيصدر منها ..
وفوق ذي كله تكلف على نفسها وزوجها واهلها .. عشاان ترضي النااس وقبل كل شي ترضي غروورها .. طيب وبعدين .. رضا النااس غااية لا تدرك

هذا والله اعلم

[dream~qa]

الحمدلله أنا الله رزقني ببنات حلال انصحوني أول ما ملجت وفعلا مشيت على نصيحتهم وتوفقت .

خذت جزء من المهر وحطيته في التوفير ولما بنينا بيتنا سحبته واستفدت منه .. وأكثر شي شريته الذهب والمجوهرات .. وهاذي كلها بعتها لما ارتفع سعر الذهب وسددت ديوني اللي كنت ماخذتها علشان نبني بيتنا .. والحمدلله مب متحسفة على مصاريف العرس لأنها كانت بسيطة . بس أكثر شي تكلفنا فيه هو العشا والضيافة لأن هذا الشي اللي يسد عيون الناس أما باقي الاشيا ما يهتمون فيها وتنسى بعد كم يوم من العرس . أصلا الأعراس كلها صارت كوبي ومملة والناس من تدخل العروس طلعو من القاعة .

[بوفهاد]

اللي لمسته في العرووس ان احلى يووم هو يوم عقد القران ( الملجة ) ..

. مرتبكة تحاتي وتفكر شلون شكلها مشيتها ..

هذا اللي كنت انا متأكد منه ، وهذا اللي متوقع اسمعه ، خصوصا انه كان هناك استبيان كبير جدا بنفس السؤال اللي انا طرحته ، وكانت الاجابات كلها نفس اجابتج اختي .

إذا هذا يجرنا لسؤال آخر ، طالما ان البنت تفرح في هذي اللية اكثر من غيرها ، وعن تجربة اللي حولها ، فـ ليش العرس ( المبالغ فيه ) .

طبعا من حق البنت انها تفرح مع اهلها وقرايبها ، ولكن نتحدث عن المبالغة .

عموما اعقتد اني وصلت بخصوص قضية المهر والعرس الى نهاية المطاف ..

خلونا في نفس الموضوع ولكن من محور آآخر ..

شوي وراجع لكم

شكرا للكل

[بوفهاد]

(((( وأكثر شي شريته الذهب والمجوهرات .. هاذي كلها بعتها لما ارتفع سعر الذهب وسددت ديوني اللي كنت ماخذتها علشان نبني بيتنا ))).

ياليت الكل يفكر بنفس الطريقة

الله يوفقكم جميع يارب

[اروع سهم]

انا اقول سوي عرس واكشخي واحجزي قاعة بس ماله داعي الاسراف في تجهيز القاعة
والعرس ما يتعوض للمرأة لان مره وحدة في العمر وماينعاد

[الوان]

انا اقول سوي عرس واكشخي واحجزي قاعة بس ماله داعي الاسراف في تجهيز القاعة
والعرس ما يتعوض للمرأة لان مره وحدة في العمر وماينعاد

و المهر ما ينعوض بعد كم مرة حد بيقط 200 الف في يد البنت

[eXpert*]

واعتقد هذا الكلام ما يطلع الا من وحدة متزوجة...:nice:

:nice::victory:

[المقهوره]

احنا مهورنا ماتتعدى 50 الف يعني صارفينها صارفينها
واذا اخذنا غير عيال عمنا وجماعتنا بلفيت غلينا عليه 70

والله لاصرفها

[المرايا]

إذا هذا يجرنا لسؤال آخر ، طالما ان البنت تفرح في هذي اللية اكثر من غيرها ، وعن تجربة اللي حولها ، فـ ليش العرس ( المبالغ فيه ) .

والله ماله دااعي ..

انا اشووف تسوي عشاا بحضوور اهلها وصديقااتها .. وتساافر ..

ما تفكر في شي ولا تحااتي ..

ما يمنع انها تلبس وتصور ..

بس ما تحط 150 او 200 الف في قاعة وكوشة حق ليلة وحدة ..

وليش تعطي المبلغ ذي ناس ما يستحقونه .. مثل المنظمين ..

تستفيد منه هي وزوجها احسن ..

[ورقــة أمــل]

والله انا امس شايفة واحد مسوي عرسه في خيمة شكبرها وحاط تلفزيون في الشارع عشان يا ناس شوفوني بالغصب

وين العرس فيه بركة وفيه ناس مثل هذيلا

النسوان يفسفسون من صوب والرياييل نفس الشي

[المقهوره]

من الخطوبة .. الحنة لين العرس والهدية

اللي لمسته في العرووس ان احلى يووم هو يوم عقد القران ( الملجة ) ..

احس انه هو احلى يوم بحيااتها

يمكن قبل تقدر تقوول ان العروس تستمتع بيوم الخطوبة .. على اساس انها في البيت بين اهلها وبس ..

اما الحين من الخطوبة لين العرس الحفلات كلها في الفنادق والصالات .. ما اظن ان العرووس تحس بشي من اللي يصير حولها ..

لانها ما رااح تستفيد من كل اللي سوته .. مرتبكة تحاتي وتفكر شلون شكلها مشيتها ..
تحااسب على كل تصرف بيصدر منها ..
وفوق ذي كله تكلف على نفسها وزوجها واهلها .. عشاان ترضي النااس وقبل كل شي ترضي غروورها .. طيب وبعدين .. رضا النااس غااية لا تدرك

هذا والله اعلم




على فكره انا ماكنت بسوي عرس بصراحه
بس امي وام زوجي قالوا مايصير ولدنا الكبير ولازم نفرح فيه مع اني انا وهو مجانين اثنين قلنا نسافر احسن وعشا عائلي لان مامن الناس فايده غير شفتي المعرس شفتي العروس وشفتي وش حطوا وماحطوا
يعني ان حطينا الكوشه الماس في الماس والماي الي يشربونه ذهب بيتكلمون فالشفايده من البدايه


عن نفسي احب البساطه واحب الحريه وما اكون متقيده بنظرات الناس


فصلت فستان طبعا لبسه اولى بس ايجار تصميم انا اختاره بس غالي كإيجار بس اهم شي انه تصميم فكتوري نفس الي كان بخيالي المهم كلفني 15 الف @_@


وسويت كوشه بالبيت وبوفيه ل100 شخص وديجي بس اهلنا وربعي القريبات وما احد دخل لي الا الناس المقربين بصراحه ويوم جاء زوجي صورنا بحريتنا وبدون خوف وارتباك ورحنا عقب ليلتين بالريتز وعقب سافرنا ماليزيا 10 ايام ورجعنا رحنا العمره وكان الله غفورا رحيما



حفله العرس بالبتي كلفتنا 17 الف


والحمد لله زوجي ماعليه ريال واحد دين من زواجي على شان مايعايرني هههههههههههههههههه خبركم الرجاجيل اول مايصير شي بينهم قال انتي السبب ياوجه الفلس

خلني اخذها من البدايه وما اكلف عليه

وللعلم كثير بنات يقولون خليه يصرف ويكد لانه ان ماخسر فيني بيخسر في غيري وهالمعلومه خطأ

بالعكس زوجي يحترمني على قراري

[oceanrose]

انا معاج اختي في كل كلمه تقولينها

بصراحه المستفيد الوحيد هم منظمين العرس وشغالين نهب في فلوس خلق الله

بالنسبه لي اقبل بحفله عائليه مبسطه بلا عرس ولا قاعات ولا عوار راس لدرجه مابي حتى بطايق

الله يخلي الجوال والاهل خخخخخخخخخخخخخ من جد لما تروح بنفسك وتشوف النهب بعينك تنقهر

وتتحسف على كل فلس دفعته على اشياء والله ما تسوي


الله يوفقكم

[الوان]

على فكره انا ماكنت بسوي عرس بصراحه
بس امي وام زوجي قالوا مايصير ولدنا الكبير ولازم نفرح فيه مع اني انا وهو مجانين اثنين قلنا نسافر احسن وعشا عائلي لان مامن الناس فايده غير شفتي المعرس شفتي العروس وشفتي وش حطوا وماحطوا
يعني ان حطينا الكوشه الماس في الماس والماي الي يشربونه ذهب بيتكلمون فالشفايده من البدايه


عن نفسي احب البساطه واحب الحريه وما اكون متقيده بنظرات الناس


فصلت فستان طبعا لبسه اولى بس ايجار تصميم انا اختاره بس غالي كإيجار بس اهم شي انه تصميم فكتوري نفس الي كان بخيالي المهم كلفني 15 الف @_@


وسويت كوشه بالبيت وبوفيه ل100 شخص وديجي بس اهلنا وربعي القريبات وما احد دخل لي الا الناس المقربين بصراحه ويوم جاء زوجي صورنا بحريتنا وبدون خوف وارتباك ورحنا عقب ليلتين بالريتز وعقب سافرنا ماليزيا 10 ايام ورجعنا رحنا العمره وكان الله غفورا رحيما



حفله العرس بالبتي كلفتنا 17 الف


والحمد لله زوجي ماعليه ريال واحد دين من زواجي على شان مايعايرني هههههههههههههههههه خبركم الرجاجيل اول مايصير شي بينهم قال انتي السبب ياوجه الفلس

خلني اخذها من البدايه وما اكلف عليه

وللعلم كثير بنات يقولون خليه يصرف ويكد لانه ان ماخسر فيني بيخسر في غيري وهالمعلومه خطأ

بالعكس زوجي يحترمني على قراري

بارك الله فيج
و اعتقد ان الرجال يحب المره اللي تعينه عالدنيا
انتي ماخذج رجال يكون لج حبيب و صديق مش عدو عشان تفلسينه
فستان العرس و المكياج خسري فيه لأن حق عيون زوجج
بس ادفع فلوس حق القاعة عشان يقولون عندها فلوس و ماخذها مليونير
(مليونير برجولته و اخلاقه و صلاته مب بفلوسه)
و يتم حسابي في البنك مصفر ياعلهم ما تعشو
انا في عرسي كنت ابي احط ذباح على الارض حق الحريم بس امي عيّت

[الوان]

انا معاج اختي في كل كلمه تقولينها

بصراحه المستفيد الوحيد هم منظمين العرس وشغالين نهب في فلوس خلق الله

بالنسبه لي اقبل بحفله عائليه مبسطه بلا عرس ولا قاعات ولا عوار راس لدرجه مابي حتى بطايق

الله يخلي الجوال والاهل خخخخخخخخخخخخخ من جد لما تروح بنفسك وتشوف النهب بعينك تنقهر

وتتحسف على كل فلس دفعته على اشياء والله ما تسوي


الله يوفقكم


اصلا احنا عوايلنا كبيره يعني لما يكون عائلي اقل شي بتعزمين 50 وحده اظن البيت يكفي

[المرايا]

على فكره انا ماكنت بسوي عرس بصراحه
بس امي وام زوجي قالوا مايصير ولدنا الكبير ولازم نفرح فيه مع اني انا وهو مجانين اثنين قلنا نسافر احسن وعشا عائلي لان مامن الناس فايده غير شفتي المعرس شفتي العروس وشفتي وش حطوا وماحطوا
يعني ان حطينا الكوشه الماس في الماس والماي الي يشربونه ذهب بيتكلمون فالشفايده من البدايه


عن نفسي احب البساطه واحب الحريه وما اكون متقيده بنظرات الناس


فصلت فستان طبعا لبسه اولى بس ايجار تصميم انا اختاره بس غالي كإيجار بس اهم شي انه تصميم فكتوري نفس الي كان بخيالي المهم كلفني 15 الف @_@


وسويت كوشه بالبيت وبوفيه ل100 شخص وديجي بس اهلنا وربعي القريبات وما احد دخل لي الا الناس المقربين بصراحه ويوم جاء زوجي صورنا بحريتنا وبدون خوف وارتباك ورحنا عقب ليلتين بالريتز وعقب سافرنا ماليزيا 10 ايام ورجعنا رحنا العمره وكان الله غفورا رحيما



حفله العرس بالبتي كلفتنا 17 الف


والحمد لله زوجي ماعليه ريال واحد دين من زواجي على شان مايعايرني هههههههههههههههههه خبركم الرجاجيل اول مايصير شي بينهم قال انتي السبب ياوجه الفلس

خلني اخذها من البدايه وما اكلف عليه

وللعلم كثير بنات يقولون خليه يصرف ويكد لانه ان ماخسر فيني بيخسر في غيري وهالمعلومه خطأ

بالعكس زوجي يحترمني على قراري


بارك الله فيج ..

:nice::victory::victory:

[هتـان قطر]

من خلال كلامكم..بينتوا ان البنت او العروس هي اللي ملزومة ومتكفلة بكل شي!!

العروس فقط عليها تجهيز نفسها من ملابس وفستان وشعر ومكياج وتصوير..

طبعا هذا كله من مهرها..

اما تجهيز الصالة وحجزها والعشا والتقديم على المعرس وأهله
وغالبا الاهل هم اللي يبون هالشي ويبون عرس ولدهم يكون على مستواهم
وهم احرار في اللي يسوونه..حتى لو يبون في البيت..

اللي ابي اقوله ان مهر البنت ماله علاقة بتجهيزات العرس والعشا او اي شي ثاني

والله يوفق الجميع
وانا مع المقولة اللي تقول
ما هان .. تبارك

[dream~qa]

من خلال كلامكم..بينتوا ان البنت او العروس هي اللي ملزومة ومتكفلة بكل شي!!

العروس فقط عليها تجهيز نفسها من ملابس وفستان وشعر ومكياج وتصوير..

طبعا هذا كله من مهرها..

اما تجهيز الصالة وحجزها والعشا والتقديم على المعرس وأهله
وغالبا الاهل هم اللي يبون هالشي ويبون عرس ولدهم يكون على مستواهم
وهم احرار في اللي يسوونه..حتى لو يبون في البيت..

اللي ابي اقوله ان مهر البنت ماله علاقة بتجهيزات العرس والعشا او اي شي ثاني

والله يوفق الجميع
وانا مع المقولة اللي تقول
ما هان .. تبارك

الحين أقل مهر 100 ألف ... معقولة تصرف هالمبلغ على ملابس وفستان وشعر ومكياج وتصوير بس .. الحين احنا نسمع أن بعض العرايس مهرهم يخلص وياخذون من أهلهم علشان يكملون تجهيزاتهم ..إذا الفستان بس تروح تفصله ب 40 ألف على ساعتين ومحد يشوفه .

من هنيه أحنا نقول المفروض ما تصرف مهرها على أمور مبالغ فيها .

[بوفهاد]

هذي النبرة اللي نسمعها دووم ... اموت واعرف وشهي تركيبتها

((( غالبا الاهل هم اللي يبون هالشي ويبون عرس ولدهم يكون على مستواهم )))

يعني ابفهم شغلة ، الحين العرس عرس حريم ، والليلة ليلة العروس ، وش دخل المعرس بالسالفة ، يا دوب إذا رضى يدخل القاعة ما يكثر في قعدته عن دقائق معدودة ..

وش له بها العرس علشان امه تقول هذا عرس ولدنااااااااااا !!!

وبعدين انا ما اقول ان العروس ما تفرح ، انا كل قصدي انها اهي تستانس بالفلوس ، مهب المنظمين.

يا جماعة انا ملاحظ ان ( الموافقة ) تكاد تكون 100% في كلامنا ووجهات النظر ، لكن هل في احد يطبق ؟!!

[eclipse]

والله هذا نقص عقل ودين
كل هالصاريف لـ3 ولا 4 ساعات
خافوا ربكم
وراكم سؤال فالقبر عن مالك في ما انفقته

[eclipse]

انا سويت عرسي في بيت ابوي

و الكوشه كلفتني 3 الاف ريال ( كرسي و وردتين)

كفو عليج والله انج اخير من اللي صرفوا بمئات الالاف علشان تقول بس شوفو انا شسويت في عرسي
اوكي وبعد مايقولون اييه:eek2::eek2:الله واي فلانه عرسج يجنن
وحلو ومافي مثله

اوكي وبعدين وصلت القمر؟
نفعت حد بهالعرس؟
حد قال جزاها الله خير على اللي سوته
ولا بس حلو ويجنن ومن جهه ثانيه ذنوب والواحد يدور على الاجر
الله يهديهم انشالله

[بوحارب]

البنت لما تستلم المهر ما تعرف وش تسوي فيه

والقاعدة تقول:

بنت + قلة عقل + فلوس + غباء + مافيه رقابة = اسراف لين يوم الأسراف :eek5:

[سعد آل شريم]

كلام سليم مليون %100

وتستحقين عليه التحيه .. ويالين الناس تتعض علشان تحل البركة

[بوفهاد]

والله انتوا يالشباب ، كأنكم ما صدقتوا على الله ولقيتوا شي على البنات ..

الصبر طيب

دوركم ما حان الى الان ..

راح يكون موضوع منفصل ان شاء الله :)

[الزاجل]

جزاك الله كل خير..
واحنا نقول مثلج..

الأيام هذي وايد امصخينها

اولا
شبكة وحفلة خطوبة
وطالعين بموضة الحفلة في القاعات..

ثانيا
تجهيزات العرس
القاعة
الطاولات
الكوشة
الصحون المزينة

ثالثا
وشو بعد ؟

ما ادري


المهم

ياليت تكون هناك حملة توعية للأمر هذا..
ها فيكم شدة ؟

[>>> غــمـــوض <<<]

هههههههههههههههههههـــ

اشفيكم قالبيــن السالفــه
هالايام اغلب البنات مايدفعون ولا شي حق الكوشه والفندق .. الخ ،، هاي كله من اختصاص الرياااال
مهرهــا بس لملابسهــا ومكياجها وذهبــها..

ومن حق البنت انها تكشخ وتتصرف بالطريــقه اللي تريحهــا ،، اهي كم مره بتعرس :)
عرسها بيكون اكبــر فرحـــه لها ولازم تكون مميــزه بالطريــقه اللي تناسبها
ودام ان المعرس راضــي والحمدالله مافي قاصــر خلوهم يستانسون

[بوحارب]

،، اهي كم مره بتعرس :)
عرسها بيكون اكبــر فرحـــه لها ولازم تكون مميــزه بالطريــقه اللي تناسبها
ودام ان المعرس راضــي والحمدالله مافي قاصــر خلوهم يستانسون

بعض الحريم يعرسون اكثر من مرة نفس الرياجيل قصدي الرجاجيل :eek5:

[بوفهاد]

(((( عرسها بيكون اكبــر فرحـــه لها ولازم تكون مميــزه بالطريــقه اللي تناسبها
ودام ان المعرس راضــي والحمدالله مافي قاصــر خلوهم يستانسون )))



عليكم بالعافية :) وتستاهلون

[>>> غــمـــوض <<<]

بعض الحريم يعرسون اكثر من مرة نفس الرياجيل قصدي الرجاجيل :eek5:

اي لــكن المره الاولــى غيــر :)
لانــها بتدخل حياة يديــده وتجربــه لاول مره تخوظــها:)

[بوحارب]

اي لــكن المره الاولــى غيــر :)
لانــها بتدخل حياة يديــده وتجربــه لاول مره تخوظــها:)

ودام انها بتدخل حياة جديدة

يعني تروح السوق وتخم الزين والشين وكلة وعقب تتوهق ةمن يودي الشناط لبيت سعيد الحظ زوجها:(

وتدخل السحلية بيت التمساح وهي مافيه مخباها ولا ريال

ليييش؟؟

لأنها شرت مجموعة من الملابس الكشخة اللي بتنقط بعد كم من شهر :omen2:

تفكيرج غلط اختي في الله @@

[بوفهاد]

وتدخل السحلية بيت التمساح وهي مافيه مخباها ولا ريال

يااااخي انت عليك تعبير ، ما اكتبه العقااااااد نفسه :)

[بوحارب]

وتدخل السحلية بيت التمساح وهي مافيه مخباها ولا ريال

يااااخي انت عليك تعبير ، ما اكتبه العقااااااد نفسه :)


لا لا لا لا

انت تحرجني جيه وايد :weeping::shy::)

ما عليك زود يابوفهاد وانت لسانك ينقط عسل :)

[>>> غــمـــوض <<<]

ودام انها بتدخل حياة جديدة

يعني تروح السوق وتخم الزين والشين وكلة وعقب تتوهق ةمن يودي الشناط لبيت سعيد الحظ زوجها:(

وتدخل السحلية بيت التمساح وهي مافيه مخباها ولا ريال

ليييش؟؟

لأنها شرت مجموعة من الملابس الكشخة اللي بتنقط بعد كم من شهر :omen2:

تفكيرج غلط اختي في الله @@


ههههههههههههههههههههههـــ

اخوي بوحارب الحمدالله الخدم مو مقصريـــن بيودون شناط العروس وحاجاتــها لين الغرفــه انت لاتحاتــي ،، هي مب معادلــة رياضيه صعبــه وماتنحل

بعدين دام العروس يرضيــها هالشي خلها تشتري وتستانس في النهايــه هالكشــخه مابتروح لفراغ ،، بتكشخ لزوجــها __ عيل تبيها تروح لبيت ريلها على كمن قطــعه تلبسها
لازم كل شي عندها يكون جديد وحلو
وشي طبيعي انها بتخش شي من المهر مو معقــوله العروس بتصرف المهر كامــل :)

[بوحارب]

ههههههههههههههههههههههـــ

اخوي بوحارب الحمدالله الخدم مو مقصريـــن بيودون شناط العروس وحاجاتــها لين الغرفــه انت لاتحاتــي ،، هي مب معادلــة رياضيه صعبــه وماتنحل

بعدين دام العروس يرضيــها هالشي خلها تشتري وتستانس في النهايــه هالكشــخه مابتروح لفراغ ،، بتكشخ لزوجــها __ عيل تبيها تروح لبيت ريلها على كمن قطــعه تلبسها
لازم كل شي عندها يكون جديد وحلو
وشي طبيعي انها بتخش شي من المهر مو معقــوله العروس بتصرف المهر كامــل :)


لو انه كنت عروسه صدقين ماروح الا بقميص نوم وجلابية بس

وبوفر المهر للمستقبل واخلي التمساح يشتريلي كل شي<<<< اشفيني @@:eek5:

القصد من كلامي انه حرام يروح المهر كامل على كم من قطعة من الثياب والله يهني سعيد بسعيده

[هتـان قطر]

حسستونا ان المعرس يقدم المهر للعروس..وهو حاط عينه عليه
كأنه يقول ..هذا المهر..ولا تلعبين فيه..خشيه عندك واذا بغيته
عطيني اياه..

العروس حرة في مهرها..تشتري فيه اللي تبي..وهي مهب ملزومه
انها تساعد زوجها بهالمهر..الايام جايه ويقدرون يحوشون

على ايامنا..كان المعرس يشتري للعروس 6 او 7 سلع ذهب وكلها
من الكبار ..هذا غير الملابس والعطور ..وغير المبلغ الكاش
والحمد لله الله بارك للجميع..

الحين اغلب اللوم يقع على اصحاب القاعات وعلى محلات التجهيزات
هم اللي عقدوا الامور..

والا مهر الزوجة اشوفه عادي وغير مكلف..

[بو الجوري]

هههههههههههههههههههـــ

اشفيكم قالبيــن السالفــه
هالايام اغلب البنات مايدفعون ولا شي حق الكوشه والفندق .. الخ ،، هاي كله من اختصاص الرياااال
مهرهــا بس لملابسهــا ومكياجها وذهبــها..

ومن حق البنت انها تكشخ وتتصرف بالطريــقه اللي تريحهــا ،، اهي كم مره بتعرس :)
عرسها بيكون اكبــر فرحـــه لها ولازم تكون مميــزه بالطريــقه اللي تناسبها
ودام ان المعرس راضــي والحمدالله مافي قاصــر خلوهم يستانسون


والله أختي .. صح إن الأغلب يقولون العرس عالرجال .. لكن هم اللي يختارون وينقون .. وهم الكسبانين :secret: بدال ما ياخذون مبلغ معين والعرس عليهم . ياخذون المهر بس .. والباقي بينقونه بس الفلوس هو اللي بيدفعها .. ( البعض طبعاً ) :secret:

وبخصوص إن هي كم مره بتعرس وخل تستانس .. انا معاج لكن اذا الرجال عنده خير وقادر .. إن شاء الله يسوونه فالقمر .. لكن اذا الرجال على قد حاله .. لاتضغطون عليه ..
ومب كل الرجال يقولون انا ماعندي اذا ماعنده .. أغلب الرجال ماعندهم لكن مايحب يحرج زوجة المستقبل ويقول ماعندي .. فيسوي المستحيل عشانها .. وآخرتها يتوهق ..

وبعدين المشكله ان البنات .. يقولون فلانه سوت .. ليش انا اقل منها .. انا بعد بسوي وأحسن ..
مايفكرون إن فلانه ريلها عنده خير .. عكس ريلها هي !!

الله يهديهم إن شاء الله ويبعثلهم زوج صالح ودين وبليونير :)

إسمحولي عالإطاله ..


ملاحظه :.. هذا رأيي الشخصي .. وللعلم أنا أتكلم عن البعض .. ..

[الزاجل]

حسستونا ان المعرس يقدم المهر للعروس..وهو حاط عينه عليه
كأنه يقول ..هذا المهر..ولا تلعبين فيه..خشيه عندك واذا بغيته
عطيني اياه..
العروس حرة في مهرها..تشتري فيه اللي تبي..وهي مهب ملزومه
انها تساعد زوجها بهالمهر..الايام جايه ويقدرون يحوشون
على ايامنا..كان المعرس يشتري للعروس 6 او 7 سلع ذهب وكلها
من الكبار ..هذا غير الملابس والعطور ..وغير المبلغ الكاش
والحمد لله الله بارك للجميع..
الحين اغلب اللوم يقع على اصحاب القاعات وعلى محلات التجهيزات
هم اللي عقدوا الامور..
والا مهر الزوجة اشوفه عادي وغير مكلف..

هتون .. المهر للمرأة..
ياليت لو كان يروح في اشياء مفيدة

اتحصلينها رايحة عند مسيو زاجلكو سهل
مصمم لها فصطان عرس على 50 الف هذا التصميم
اللي على الورق التفيصل والخامات غير..
او ماخذة لها ميكاجات اشكال والوان لا حصر لها
او انها ماادري اشياء وايدة تروح فيها المهر..

خليها تاخذ لها ذهب الماسات تعيش وياها وتفيدها
هي قبل غيرها ..

مب المهر يروح ويخلص في امور مالها معنى..
و خاطرها في طقم يديد ينزل عقب العرس بشهر
تنطر زوجها يتكرم عليها ويشتري لها ..

[هتـان قطر]

هتون .. المهر للمرأة..
ياليت لو كان يروح في اشياء مفيدة

اتحصلينها رايحة عند مسيو زاجلكو سهل
مصمم لها فصطان عرس على 50 الف هذا التصميم
اللي على الورق التفيصل والخامات غير..
او ماخذة لها ميكاجات اشكال والوان لا حصر لها
او انها ماادري اشياء وايدة تروح فيها المهر..

خليها تاخذ لها ذهب الماسات تعيش وياها وتفيدها
هي قبل غيرها ..

مب المهر يروح ويخلص في امور مالها معنى..
و خاطرها في طقم يديد ينزل عقب العرس بشهر
تنطر زوجها يتكرم عليها ويشتري لها ..


لا عاد مهب لهالدرجة..
يعني نقول فستان 20
الكوشة 20
التصوير 15
مكياج وعطور 10
ملابس 10
طبعا العقد والدبلة والساعة على المعرس :nice:
هذا غير الهدايا من الاهل والصديقات
وخلصت السالفة..

هذي هي الامور اللي تصير من حوالي..
وهذا الوضع اللي عند اغلب بناتنا..

[>>> غــمـــوض <<<]

والله أختي .. صح إن الأغلب يقولون العرس عالرجال .. لكن هم اللي يختارون وينقون .. وهم الكسبانين :secret: بدال ما ياخذون مبلغ معين والعرس عليهم . ياخذون المهر بس .. والباقي بينقونه بس الفلوس هو اللي بيدفعها .. ( البعض طبعاً ) :secret:

وبخصوص إن هي كم مره بتعرس وخل تستانس .. انا معاج لكن اذا الرجال عنده خير وقادر .. إن شاء الله يسوونه فالقمر .. لكن اذا الرجال على قد حاله .. لاتضغطون عليه ..
ومب كل الرجال يقولون انا ماعندي اذا ماعنده .. أغلب الرجال ماعندهم لكن مايحب يحرج زوجة المستقبل ويقول ماعندي .. فيسوي المستحيل عشانها .. وآخرتها يتوهق ..

وبعدين المشكله ان البنات .. يقولون فلانه سوت .. ليش انا اقل منها .. انا بعد بسوي وأحسن ..
مايفكرون إن فلانه ريلها عنده خير .. عكس ريلها هي !!

الله يهديهم إن شاء الله ويبعثلهم زوج صالح ودين وبليونير :)

إسمحولي عالإطاله ..


ملاحظه :.. هذا رأيي الشخصي .. وللعلم أنا أتكلم عن البعض .. ..


كلامــك حلو ومداخــله جميــله منك

بس احب اعقب تعقيب بسيط وهو مجرد ما الريال يـخطب البنت ويسألون عنه بيعرفون اذا كان الريال مقتدر ويقدر يوفر كل شي ولا بيكون على قد حاله

وهني البنت بتكون لها الحريــه المطلقــه يا انها توافق وتتحمل يكون كل شي عادي وبسيط وماتكلف على ريلها او انها ترفضه لانها تطمح لشي هو مابيقدر يوفره لها

ووالمتطلبات والمصاريف دايما يتفاهمون عليها بين الحريم قبل الزواج وتنـحط النقاط على الحروفــــ قبل ما يتم اي شي

:)
وعلى سالفـة البنت هي اللي تنقــي شي طبيعي لان الرياييــل :secret: ماعندهم ذوق ومايعرون هالسوالف وشنهي الموضه وشنو اللون اللي تحبهه ويناسبها


وتحياتــي للجمــيع

[بوخليفة3]

حسستونا ان المعرس يقدم المهر للعروس..وهو حاط عينه عليه
كأنه يقول ..هذا المهر..ولا تلعبين فيه..خشيه عندك واذا بغيته
عطيني اياه..

العروس حرة في مهرها..تشتري فيه اللي تبي..وهي مهب ملزومه
انها تساعد زوجها بهالمهر..الايام جايه ويقدرون يحوشون

على ايامنا..كان المعرس يشتري للعروس 6 او 7 سلع ذهب وكلها
من الكبار ..هذا غير الملابس والعطور ..وغير المبلغ الكاش
والحمد لله الله بارك للجميع..

الحين اغلب اللوم يقع على اصحاب القاعات وعلى محلات التجهيزات
هم اللي عقدوا الامور..

والا مهر الزوجة اشوفه عادي وغير مكلف..

:nice::nice::nice:

[الزاجل]

لا عاد مهب لهالدرجة..
يعني نقول فستان 20
الكوشة 20
التصوير 15
مكياج وعطور 10
ملابس 10
طبعا العقد والدبلة والساعة على المعرس :nice:
هذا غير الهدايا من الاهل والصديقات
وخلصت السالفة..

هذي هي الامور اللي تصير من حوالي..
وهذا الوضع اللي عند اغلب بناتنا..

فستان ب 20 الف ...> مب مبلغ مبالغ فيه ؟
كوشة على 20 الف ..> مب مبلغ مبالغ فيه ؟
تصوير 15الف ...> مب مبلغ مبالغ فيه ؟
مطياج وعطور على 10 الا ريال ..> عسى ما شر
بتستخدمهم كلهم خلال كم اسبوع او شهر ؟

مبالغة مالها معنى..

عقب شهر من الزواج
ينزل عطر يديد خاطرها فيه
وعقب شهرين من الزواج تتغير الموضة
وتتغير الوان المكياج ..

امور تصرف فيها الفلوس من غير تفكير ..
بس علشان تقول تعالوا شوفوني انا شريت..

[الـقـاسـي]

لا عاد مهب لهالدرجة..
يعني نقول فستان 20
الكوشة 20
التصوير 15
مكياج وعطور 10
ملابس 10
طبعا العقد والدبلة والساعة على المعرس :nice:
هذا غير الهدايا من الاهل والصديقات
وخلصت السالفة..

هذي هي الامور اللي تصير من حوالي..
وهذا الوضع اللي عند اغلب بناتنا..


أنا استغربت من كلامك اختي هتان .. مع اني ملاحظ من ردودج انج انسانه مثقفه وتفكيرج ناظج ,,

يعني انتي تشجعين البنت انها تصرف كل مهرها على اشياء تافهه ..

سؤال أختي هتان البنت لو كان عرسها عادي مراح تستانس ...

مراح تكون بعد ليلة مميزه في حياتها .. مب معناته تبخل على نفسها لا بالعكس ..

بس يكون عرس في حدود المعقول .. هل اذا صار هالشي مراح تكون مستانسه ومتهنية ..

هالـ 100 الف ولا 200 الف اللي تنصرف في ليلة وحده مب حراام
"أن المبذرين كانوا اخوان الشياطين "

احنا مانقول انها تاخذ المهر وترد تعطيه زوجها عقب لا ع الاقل تخليه حق نفسها ..

مب لازم تاخذ لها مكياج وملابس حق سنه قدام .. يعني الزوج مراح يشتري لها ملابس ولا مكياج عقب ..

تاخذ على قدها .. والباقي الرجال بيرد يشتري لها اكيد ملزوم يصرف عليها ..

اما اللي نشوفه هالايام البنت لما تتزوج تشتري اغراض وكانه خلاص مراح تروح السوق بعد هاليوم .. او مراح تروح بعد العرس ..

مأذينا عنوسه وعنوسه ومادري شنو .. وفالاخير البنات سبب في تطفيش الرجال من العرس ..

[الزاجل]

هالـ 100 الف ولا 200 الف اللي تنصرف في ليلة وحده مب حراام
"أن المبذرين كانوا اخوان الشياطين "

..

صرت قاسي ليش ؟:eek5:

تدري يا القاسي احنا دايما نخربط ونربط شي بشي
المسرفين غير عن المبذرين..
المسرفين اللي يسرفون في الشراء
اما المبذرين اللي يصرفون فلوسهم على اشياء محرمة ..
يشترون افلام اشرطة اغاني يروحون السينما..
هذا هو المقصود بالمبذرين ..

[هتـان قطر]

فستان ب 20 الف ...> مب مبلغ مبالغ فيه ؟
كوشة على 20 الف ..> مب مبلغ مبالغ فيه ؟
تصوير 15الف ...> مب مبلغ مبالغ فيه ؟
مطياج وعطور على 10 الا ريال ..> عسى ما شر
بتستخدمهم كلهم خلال كم اسبوع او شهر ؟

مبالغة مالها معنى..

عقب شهر من الزواج
ينزل عطر يديد خاطرها فيه
وعقب شهرين من الزواج تتغير الموضة
وتتغير الوان المكياج ..

امور تصرف فيها الفلوس من غير تفكير ..
بس علشان تقول تعالوا شوفوني انا شريت..


اشوف المبالغ هذي بالنسبة للسوق..جدا عادية
انت اخذ لك جولة في الدوحة وشوف الغلا اللي صاير

وانا قلت قبل اللوم يقع على اصحاب المحلات
لابد من مراقبة الاسعار لانه صايرة نار وما تطاق

وبالنسبة للعطور والمكياج..اكيد بتكون من العطورات
الاصلية سواء فرنسية او شرقية وبخورات
وهذي كلهم اسعارهم فوق ما تتصور..

امور كثيرة تخلي الفلوس تطير بدون ما يحس الواحد
لكن شتسوي البنت..مجبورة انها تحط مهرها في اشياء
تزينها في عين زوجها واهله..والا بيقولون اشدعوه
وين المهر اللي خسرناه عليها..؟؟؟!!!:eek5:

[بوفهاد]

هتان

بالعربي الشباب يبون يوصلون لشي واحد

لسان حال كل واحد منهم .... ( يعني لازم عرس !! ) :cool:

[>>> غــمـــوض <<<]

اشوف المبالغ هذي بالنسبة للسوق..جدا عادية
انت اخذ لك جولة في الدوحة وشوف الغلا اللي صاير

وانا قلت قبل اللوم يقع على اصحاب المحلات
لابد من مراقبة الاسعار لانه صايرة نار وما تطاق

وبالنسبة للعطور والمكياج..اكيد بتكون من العطورات
الاصلية سواء فرنسية او شرقية وبخورات
وهذي كلهم اسعارهم فوق ما تتصور..

امور كثيرة تخلي الفلوس تطير بدون ما يحس الواحد
لكن شتسوي البنت..مجبورة انها تحط مهرها في اشياء
تزينها في عين زوجها واهله..والا بيقولون اشدعوه
وين المهر اللي خسرناه عليها..؟؟؟!!!:eek5:


:ok::app::ok::app:

[هتـان قطر]

أنا استغربت من كلامك اختي هتان .. مع اني ملاحظ من ردودج انج انسانه مثقفه وتفكيرج ناظج ,,

يعني انتي تشجعين البنت انها تصرف كل مهرها على اشياء تافهه ..

سؤال أختي هتان البنت لو كان عرسها عادي مراح تستانس ...

مراح تكون بعد ليلة مميزه في حياتها .. مب معناته تبخل على نفسها لا بالعكس ..

بس يكون عرس في حدود المعقول .. هل اذا صار هالشي مراح تكون مستانسه ومتهنية ..

هالـ 100 الف ولا 200 الف اللي تنصرف في ليلة وحده مب حراام
"أن المبذرين كانوا اخوان الشياطين "

احنا مانقول انها تاخذ المهر وترد تعطيه زوجها عقب لا ع الاقل تخليه حق نفسها ..

مب لازم تاخذ لها مكياج وملابس حق سنه قدام .. يعني الزوج مراح يشتري لها ملابس ولا مكياج عقب ..

تاخذ على قدها .. والباقي الرجال بيرد يشتري لها اكيد ملزوم يصرف عليها ..

اما اللي نشوفه هالايام البنت لما تتزوج تشتري اغراض وكانه خلاص مراح تروح السوق بعد هاليوم .. او مراح تروح بعد العرس ..

مأذينا عنوسه وعنوسه ومادري شنو .. وفالاخير البنات سبب في تطفيش الرجال من العرس ..


اخوي القاسي..لا تكون قاسي علي بكلامك
يمكن كلامي ما عجبكم لكن انا اتكلم من خلال
وضعي ..الحمدلله احنا في خير ونعمه..

ومادام مهرها لها وخاص بها خل تصرفه على
نفسها..

اخوي لو كنت مكان الام وجلست مع بنتك وشفت
الطلبات اللي لازم تشتريها..كان غيرت رايك

[هتـان قطر]

هتان

بالعربي الشباب يبون يوصلون لشي واحد

لسان حال كل واحد منهم .... ( يعني لازم عرس !! ) :cool:


نعم لازم عرس..ومن السنة اشهار العرس

وضرب الدفوف..

[الزاجل]

اشوف المبالغ هذي بالنسبة للسوق..جدا عادية
انت اخذ لك جولة في الدوحة وشوف الغلا اللي صاير

وانا قلت قبل اللوم يقع على اصحاب المحلات
لابد من مراقبة الاسعار لانه صايرة نار وما تطاق

وبالنسبة للعطور والمكياج..اكيد بتكون من العطورات
الاصلية سواء فرنسية او شرقية وبخورات
وهذي كلهم اسعارهم فوق ما تتصور..

امور كثيرة تخلي الفلوس تطير بدون ما يحس الواحد
لكن شتسوي البنت..مجبورة انها تحط مهرها في اشياء
تزينها في عين زوجها واهله..والا بيقولون اشدعوه
وين المهر اللي خسرناه عليها..؟؟؟!!!:eek5:


والله يا هتون سمعت ان هناك بنات
مهورهم كانت 100الف
وصرفوا فقط 40 الف على كل اللي محتاجينه
والبعض 30الف فقط..
اهنيه الفرق ما بين الوحدة اللي مقتنعة من اللي تبيه
ومن بين الوحدة اللي تشتري علشان ينقال عنها انها تشتري..
ثقافة المفوشر والتزابي مسيطرة على العقول..

فستان ابيض ناعم بسيط ما بيكلفها 20الف
بس لازم الفستان يكون بالشكل الفلاني والتطريز العلاني
وفي الأخير الآثنين معلقين في الكبت ..

والحسةر على الفلوس اللي انصرفت عليهم ..

[ابوسعود]

عين الصواب

ياليت كل واحد وحده مقبله على الزواج

تسمع نصيحتج

بارك الله فيج وجعله في ميزان حسناتج

[أم وضحى]

طيب سؤال يا بنات .. وهذا السؤال للمتزوجات ، يعني اللي مرت بها التجربة

بكل صراحة وتجرد

اي حفلة من الحفلات اللي مرت عليج من الخطوبة .... الين العرس.. كانت هي الافضل بالنسبة لج

ليلة حسيتي فيها انج ماخذة راحتج ، وتسولفين مع الكل ، والكل يمر عليج ويضحك ، وتحسين ان كل اللي حولج اهم هلج وصديقاتج ..

بكل صراحة .



انا لا خطوبة ولا حنا ولا خرابيط ..

عرسي في بيت اهلي .. ومن احلى مايكون ..:shy:

والله بارك لنا ورزقنا بالذرية .. الله يحفظهم ويصلحهم :nice:

[dream~qa]

هههههههههههههههههههـــ

اشفيكم قالبيــن السالفــه
هالايام اغلب البنات مايدفعون ولا شي حق الكوشه والفندق .. الخ ،، هاي كله من اختصاص الرياااال
مهرهــا بس لملابسهــا ومكياجها وذهبــها..




صج بعضهم ما يدفعون حق الكوشة بس هي اللي تروح تحجز وهو يدفع وطبعا أغلب الرياييل يستحون يقولون لا مهما كان الثمن .

[جادووور]

اعرف بنات مهرهن 30 الف فقط منها ملابسها وفستان العرس والمكياج والحنا والذهب وياحليلهن مبسوطات وعرسهم مره بسيط لكن فيه بركه ووناسه