الـــزواج .. ومــــا أدراك ما الـــزواج !!

[i.qatar]

بسم الله الرحمن الرحيم

والصلاة والسلام على خير المرسلين
سيدنا وامامنا ونبينا محمد وعلى آله وصحبه أجمعين

وبعد ..


































ترا متنا ذبحنا الغلا .. خلاااااص عاد .. :anger1:






نبي نتزوج صكينا الـ 30 وللحين مب قادرين
نجمع مهر ولا نفتح بيت :anger1:

خفو المهور شوي .. مايسوى علينا .. اللي نصرفه في ليلة العرس من مهر وشبكه
وحفله وعشى وكلام فاضي نقعد نسدده طول عمرنا


احسبوها معاي :omen2:

المهر: 100 الف ريال
الشبكه : 100 الف ريال
تكاليف الخطوبه من هديه وعشى وخرابيط : 50000 ريال
العرس نفسه
وهو مقسوم الى نصفين :
1-عرس الرياييل :
اذا خيمه قول 40الف والعشى قول 40 ذبيحه الذبيحه الوحده بتكلفك 1000
يعني المجموع 80 الف ريال
2- عرس الحريم " الطامه الكبرى":
القاعه مع العشى ,, والعشى انواع في بوفيه "ارخص" وفي سيرفس
يكلف تقريبا 200 الف ريال
خيريه وصل سعرها اعتقد 40 الف .. يعني المجموع 240 الف
والكوشه والبوشه والطاولات وترتيبها وفستان المدام .. الخ مادري بكم

المدام صارت لازم تفصل فستان عرسها عند الاخ اللبناني " ايلي صعب " . . .


وهذا الشخص اسم على مسمى الصراحه .. " لاحظوا حتى اسمه صعب "


وقبل هالسوالف في البطاقات طبعا
راح تكلفك مالايقل عن 30 الف ريال

يعني انت للحين ماتزوجت ولادخلت ولاسويت شي وصرت صارف تقريبا

600000 :rolleyes2:

انزين الحين تزوجت
ودخلت .. وامورك طيبه .. تحسب خلاص ؟؟

لا حبيبي .. عندك بدعه اسمها الهديه .. ثاني يوم
خذلك عاد .. ساعه الماس .. سياره ... قطار .. اللي هو
بس اهم شي اللي تقدمه مايكون اقل من اللي قدمه عديلك :anger1:

وجهز اغراضك عقبها .. وراك شهر عسل :eek5:
تذاكر دوحه - برع - دوحه على شركتنا الوطنيه الغراء
Qatar Airways
راح تكلفك اقل شي 15000 الف
هذا لانك قطري .. اما اذا كنت من الاجانب سعيدي الحظ اقسم السعر على 2

ومصاريف السفره نفسها من فنادق واكل و شرب قووول 20000
وغير الهدايا اللي بتاخذها مرتك .. يعني تقريبا 20000
المجموع 40000 مع التذاكر يصير 55 الف
هذا اذا كنت رايح ماليزيا طبعا .. اوروبا لها سعر ثاني
اضرب المجموع في 3 وفالك طيب :rolleyes2:

انزين تعااال ...!!
انت قبل لا تعرس وتسافر شهر عسل ... دبرت نفسك ؟
يعني قسمك اللي بتسكن فيه ؟
اذا كنت ساكن في بيت ابوك .. يبيلك على الاقل 50000 ريال
اما اذا انسباك اشرطو عليك تسكن بنتهم في بيت بروحها من اول
يوم زواج .. فلاتعليق الصراحه والله يعينك .

اللي ابي اقوله ياجماعه .. ليش ما انسن سنه طيبه
هالمصاريف والفلوس انت وهلك وعيالك اولى بها

الرسول صلى الله عليه وسلم قال اقلهن مهرا اكثرهن بركة
والعادات المتبعه في حفلات الزواج ليست من عادتنا ولا تقاليدنا
البذخ والتبذير وتحميل النفس فوق طاقتها حرام شرعا وراح نتحاسب
على هالشي يوم القيامه ..


بسنا مظاهر على الفاضي



الله يهدينا .. ويهديكم ان شاءالله



.

[حـ ن ـيـ ن]

انتم ليش ظالمين البنية ... البنت مالها إلا مهرها وهديتها ...أما العرس وترتيباتها هل المعرس الي يسوون

هالاشياء ...

[i.qatar]

انتم ليش ظالمين البنية ... البنت مالها إلا مهرها وهديتها ...أما العرس وترتيباتها هل المعرس الي يسوون

هالاشياء ...

اختي مااختلفنا على المهر .. انا اتكلم عن المظاهر .. وهالمظاهر تكسر الظهر

وانتي تقولين ان العرس وترتيبه (( هل المعرس )) اللي يسوونه
على فكره (( هل المعرس )) = (( المعرس نفسه )) في كثير من الحالات

[حـ ن ـيـ ن]

اختي مااختلفنا على المهر .. انا اتكلم عن المظاهر .. وهالمظاهر تكسر الظهر

وانتي تقولين ان العرس وترتيبه (( هل المعرس )) اللي يسوونه
على فكره (( هل المعرس )) = (( المعرس نفسه )) في كثير من الحالات

هل المعرس = المعرس ماختلفنا

ولكن هم الي يسوون هذي المظاهر البنت ماتقول لهم شي

[بابا الضحية]

الله يكون في العون

بس ترى في بنات عندنا في الدوام وقطريات اسألهم عادي تتزوجزن من غير مهر قالو عادي !!

انتو ظالمينهم ترى !!!في بنات قطريات يبون الستر

ما نبي نقول اجنبيات عشان ماتقوقلون خوال العيال يتفشلون !!!!

ما طالع فوق تتعب ترى يا وليدي

[i.qatar]

هل المعرس = المعرس ماختلفنا

ولكن هم الي يسوون هذي المظاهر البنت ماتقول لهم شي

البنت ماتقول ..

بس امها تقول .. :)

وهالمظاهر سواء جت من هل المعرس او هل العروس هي في النهاية غلط

[i.qatar]

الله يكون في العون

بس ترى في بنات عندنا في الدوام وقطريات اسألهم عادي تتزوجزن من غير مهر قالو عادي !!

انتو ظالمينهم ترى !!!في بنات قطريات يبون الستر

ما نبي نقول اجنبيات عشان ماتقوقلون خوال العيال يتفشلون !!!!

ما طالع فوق تتعب ترى يا وليدي


اخوي الضحيه .. شحالك

اخوي ... صدقت في بنات يبون الستر .. وعادي عندهم يتزوجون بمهر بسيط وحفله وبسيطه
والسلام ..

بس في حالات .. الواحد يروح حق البنات اللي يبون الستر وينصدم بطلبات اهلهم

[بابا الضحية]

اخوي الضحيه .. شحالك

اخوي ... صدقت في بنات يبون الستر .. وعادي عندهم يتزوجون بمهر بسيط وحفله وبسيطه
والسلام ..

بس في حالات .. الواحد يروح حق البنات اللي يبون الستر وينصدم بطلبات اهلهم

والله انا اقترح !!!في خطب الجمعه ان يخطب الامام ويتكلم عن هالموضوع !!!

لانه بيد الاب والاخ !!!صراحه

الله يوفق الجميع ويستر على بناتنا وشبابنا يا رب :)

[ذيبه مزاجيه]

الله يكون في عون اللي يبي يتزوج الصراحه >_<

صج صج ينكسر ظهره من كل هالمصاريف -_-"

[سمو انسان]

تعوذ من بليس

7
7
7
7

قول اللهم صلي على محمد

7
7
7
7

اللي فقلبه الصلاه ما تفوته

واذا انت تشوف انه الزواج صرفيه وغلاء ومن هل قبيل انا بقولك انت غلطان

كل شي مقدور عليه انت بس توكل على الله

فالبدايه بقولك البنت اللي عندها لستة طلبات وتتشرط وتطلب اكثر من اللي انت تقدر عليه
اعرف انها ما بتفيدك ولا بتسعدك .

بسم الله الرحمن الرحيم وبابتدي الحسبه الصحيحه معاك

نقول راتبك مع العلاوات 13 الف كحد ادنا

اعزلك الفين كل شهر وانساها

شل بدل السكن وخذ مكانه بيت اجاره عن طريق الاسكان لا تقولي منت محصل، حط فبال انتو ثنين بس
وفي فلل واجد 4 غرف وملحق مطبخ وغرفة خدم ، واذا عندك بيت راسلني عالخاص وبعلمك
شي معروف لكن بذكرك فيه.

خذ لك قرض اثاث ، وقرض سياره من الدائره اللي انت تشتغل فيها

راتبك بيوصل اقل من النص نقول 4 الاف وحط فبالك انك تعزل الفين كل شهر

واذا عندك سياره كشخه بيعها وخذ لك سياره انزل منها (يعني كامري، افالون، اوريون )

واذا انت من النوع اللي تحب تصرف على نفسك من ساعات غتر تلفونات لابتوبات انا بقولك
وقف عنها وحاول توفر كل ريال تقدر عليه، وطلعات المطاعم وسينما خف منها شوي.

كمل على هل مشوار 4- 6 شهور

جيك حسابك فالبنك بشوف انك جمعت مبلغ

انوي الزواج وتوكل على رب العالمين وفلوسك بتتبارك، دور البنت اللي بتسعدك

ولا تنسى واجبك اتجاه ربك من صلاه لين صدقه

( ولا تنسى انه في عينية زواج وان شاء الله محد مقصر معاك)

بهل طريقه امورك خالصه وحط فبالك في فترة بعد الملجه وحاول تجمع فيها

وبين حق المره انك انت ما راح تسوي لها الا اللي تقدر عليه يعني ، ولا تبخل عليها خلها تطلب
على قدر المستطاع.

اما عن تكاليف العرس انت ما عليك الا انك تحجز قاعه ومب شرط تكون في الرتز وله
الشيراتون في اماكن واجد ارخص ومستواها زين.

وشهر العسل وهل خربطيشن يا انك تاجلها او تروح دوله قريبه تقعد فيها سبوعين كحد اقصى.

وامورك بتكون طيبه بإذن الله

والله يوفقك ويسر امورك ويزوجك اللهم امين <<<<< قولو امين

[حـ ن ـيـ ن]

طيب وش الحلول الي تقترحونها ...

حفلة كل بنت تبي لها حفلة وعلى مستوى ...المهر الاسعار نار والبنت تبي تتسوق ...فما هي الحلول بنظركم ؟؟؟

[بوحارب]

الله يزوجك ويستر عليك

[سمو انسان]

طيب وش الحلول الي تقترحونها ...

حفلة كل بنت تبي لها حفلة وعلى مستوى ...المهر الاسعار نار والبنت تبي تتسوق ...فما هي الحلول بنظركم ؟؟؟

الحلول الله يسلمج لو البنات يخففون طلباتهم شوي ويسون لنا تخفيضات على الاقل 20٪
وينسون فكرة الزبو قدام رفيجاتهم ،هذا حق البنات اما الشباب يوقفون التذمر والحنا اللي ما
راح تغير شي ويقتصدون فمصاريفهم :nice:

[مليونيره]

مد رجولك على قد لحافك
أنا مستغربه لازم خطوبة؟ ولازم شبكة ب100 ألف
عائلتنا تحط حد على المهر بنت العم 80 الغريبه 100 مب لازم ساعة حق الصباحية ومب لازم خطوبة ومب ملزوم بشبكة ب100 ألف وبعضهم يعطون البنات 100 أو 120 مع قيمة الذهب الي تسمونها شبكة وعرس الحريم عليه القاعة والعشا وترتيب بس وترتيب عرسه
ترى على الأهل ياخوي ولا فالدين المهر بس

[الـقـاسـي]

أنت توكل على الله وبتييسر صدقني .. مب تصرف بالهبل ولما تجي تتزوج تقول ماعندي فلوس ..

بعدين تراك مبالغ في المصاريف شوي ..

300 الف بتكفيك لو بغيت تتزوج .. ولاتنسى العانيات ونفعه اخوانك وعيال عمك ..

بعدين لاتخلي البنت على كيفها كل ماطلبت شي قلت ان شاء الله .. لازم تحاول تمسك ايدك شوي ..

وعسى الله يوفقك ان شاء الله ..

[أمة الله]

اشدعوه أخوي شبكه بــ 100000!! ترى المبالغه تجي منكم انتوا مب من البنات!

[شهد]

شبكه 100 الف ليشششششش

اخوي تقدم وقبل ماتملك خل اهلك يوضحون لاهل البنت كل شئ

انا زوجت 2 من اخوان زوجي الله يحفظهم هذي السنه

المهر 80الف
والشبكه 40 الف

عرس الحريم بالكامل 86 الف القاعه + طاولات + توزيعات+ فرقه
ويختارون قاعه الجيوان او الدفنه للاحتفالات

عرس رجاجيل ماعرف عنه شئ بصراحه

كوشه على العروس والطاولات علينا

هذا كله وضحته من البدايه علشان لايغثونا ولا نغثهم

عروس الثاني اطلبت المهر 100 وافق اخو زوجي ولكن كانت شبكتها
25 الف ذهب مهب الماس

وافق على اللى تقدر عليه لاتضغط على نفسك
وربك بيسهلها باذن الله


الله يوفقك ياخوي

[نورFROM قطر]

الصراحه اللي ذكرته هو اقل شي .... لين الحين ما وصلت فوق او المعدل الطبيعي...بعدين الشبكه هذاك اول 50 الف و60 الف الحين زاد السعر الحين الطقم العادي وصل 60 و70 ممممم هذا اللي انا اشوفه واسمعه

[الزاجل]

طيب وش الحلول الي تقترحونها ...

حفلة كل بنت تبي لها حفلة وعلى مستوى ...المهر الاسعار نار والبنت تبي تتسوق ...فما هي الحلول بنظركم ؟؟؟

اممم
الحلول..

تيسير الزواج بالاستغناء عن الكثير من المظاهر التي سادت حفلات الأعراس

مب شرط العرس يكون في قاعة
مب شرط المهر يكون فوق 50 الف
مب شرطة حفلة خطوبة الكل يحضرها
مب شرط حفلة هدية في قاعة


الحياة صارت صعبة جدا

وايد شباب يبون يتزوجون ومب قادرين
ويفكرون بالمصاريف اللي بتنحط على روسهم ..


ذكر لنا أحد الأخوان
ان خطيبته رافضة عرس ومصاريف على الفاضي
تقول عقد قران وحفلة للأقارب ( اشهار الزواج )
والسفر لشهر العسل ..

والفلوس اللي كانت بتنصرف على القاعة والطاولات
والبهانس والصواني والسلال ونقوط الطقاقات
كلها تمت في جيبي وما اضطريت احط ديون على راسي ..

وحتى الرجال يا جماعة الخير
المفروض انه يقلل من مصاريفه
فلما نطالب البنت انها تخفف من مطالبها
فهذا لا يعني انه يسوي حفلة زواج وفرقة تحيي له ليلته
ويعزم العالم ..

الاقتصاد في كل شي ومن الطرفين ..

[الزاجل]

الصراحه اللي ذكرته هو اقل شي .... لين الحين ما وصلت فوق او المعدل الطبيعي...بعدين الشبكه هذاك اول 50 الف و60 الف الحين زاد السعر الحين الطقم العادي وصل 60 و70 ممممم هذا اللي انا اشوفه واسمعه

اخوي تزوج من فترة.. شبك على زوجته بشبكة كانت 7 الاف ريال
وقلنا غالية :shy:

فالعالم اللي عندهم واللي ما عندهم يبون يصيرون بنفس المستوى..

صارت الوحدة اتطير بالأغراض اكثر مما اتطير بوجود الريال معاها
والتقييم يكون على قد ما يحمل من هدايا او فلوس ..

[بنت مريخ]

الله يوفقك انت وجميع اعيال بلادي
بقولك عن تجربتي مهري 70الف وماسويت حفله خطوبه لاني احس انها مب من عاداتنا
ولازم طقم الشبكه ابو 60و70الف ؟؟ مايصير ب 23 الف طقم ناعم وبسيط من السيمان؟
عرسي كان في البيت حطينا البوفيه في الحوش والكوشه داخل الميلس ودي جي والفستان تاجير وصبابات قهوه وشاي وصواني حلاوه +فطاير ومداخن ومضارب عطور والحمدلله الله سهل زواجنا ,وبفضل من رب العالمين الكل مدح العرس,شوف اخوي البنت تبي الستر ولاستقرار ماعليك من المظاهر لازم اسوي نفس فلانه وعلانه ؟ لو بطالع فلانه وعلانه عز الله ماتزوجت,عن نفسي ادور الستر والاستقرار وليش ارهق ميزانيه الريال عشان الناس!ماعلي من الناس ولامن كلامهم واللي معطيني شي يجي ياخذه, هذا كله مايهم اهم شي السعاده الداخليه اللي تحس بها البنت .اغلب الناس يفكرون ان كل مادفع اكثر كل ماعزالبنت وحط لها قدر وهم غلطانين في هشي.والله اعرف بنات بيموتون ويعرسون ومستعدين يساعدون الريال ماعندهم مشكله.دورلك وحده ترضى بظروفك وعلم اهلك يوضحون لها كل شي بلا مظاهر وخرابيط,يبطون جبدي الاهل اللي يتشرطون.
بقولك عن تجربيتن:الاولى: لي قريب في الامارات وتحديدا بوظبي وهناك عندهم قاعات لزواج من الدوله على 40الف وقريبي عنده الخير تبارك الرحمان زوج ولده في وحده من هلقاعات مااهتم حق كلام الناس مع انه يقدر يسويه في افخم قاعه
الثانيه :سمعت من صديقاتي عن وحده متزوجه قبلي بفتره بسيطه يعني قول شهرين مهرها كان 100 الف وخذت سلفيه من البنك فوق ال200الف حسب ماسمعت وسوت عرسها ثلاث ايام ليله حنا وليله جلوه والعرس ثالث يوم وطبعا كل يوم فرقه من مثل السعوديه وعشى للمعزيم
اشرايك في هتخلف والله ناس تموت من الجوع وناس تتسلف عشان مظاهر

[الزاجل]

الله يوفقك انت وجميع اعيال بلادي
بقولك عن تجربتي مهري 70الف وماسويت حفله خطوبه لاني احس انها مب من عاداتنا
ولازم طقم الشبكه ابو 60و70الف ؟؟ مايصير ب 23 الف طقم ناعم وبسيط من السيمان؟
عرسي كان في البيت حطينا البوفيه في الحوش والكوشه داخل الميلس ودي جي والفستان تاجير وصبابات قهوه وشاي وصواني حلاوه +فطاير ومداخن ومضارب عطور والحمدلله الله سهل زواجنا ,وبفضل من رب العالمين الكل مدح العرس,شوف اخوي البنت تبي الستر ولاستقرار ماعليك من المظاهر لازم اسوي نفس فلانه وعلانه ؟ لو بطالع فلانه وعلانه عز الله ماتزوجت,عن نفسي ادور الستر والاستقرار وليش ارهق ميزانيه الريال عشان الناس!ماعلي من الناس ولامن كلامهم واللي معطيني شي يجي ياخذه, هذا كله مايهم اهم شي السعاده الداخليه اللي تحس بها البنت .اغلب الناس يفكرون ان كل مادفع اكثر كل ماعزالبنت وحط لها قدر وهم غلطانين في هشي.والله اعرف بنات بيموتون ويعرسون ومستعدين يساعدون الريال ماعندهم مشكله.دورلك وحده ترضى بظروفك وعلم اهلك يوضحون لها كل شي بلا مظاهر وخرابيط,يبطون جبدي الاهل اللي يتشرطون.



:nice::nice::nice:

[مبرمج QA]

لا فض فوك ...


ما شاء الله عليك...

واقعي 2000 من 100

[Riku3]

لي عودة ان شاء الله :] .. عجبتني مقدمتك الي تعور القلب xD .

[اروع سهم]

اوافقك الراي ان المظاهر تكسر الظهر صادق بس هذه هي الدنيا والله يعين الشباب ويرزقهم زوجات صالحات قنوعات

[oceanrose]

ياربي انا ما تقهرني الا مثل هالمواضيع يعني كل البنات طلباتهم تعجيزيه

ومهرهم غالي ياخي دورا وبتلقون الي طلباتهم في حدود المعقول

[ورقــة أمــل]

ههههههههههههههههههههههههههه والله المقدمة اللي انت حاطها ضحكتني

في بنات يبون الستر وماهمتهم الفلوس بس انت عليك تدور

الحين البنية اللي تهمها حياتها وراحة زوجها مثل الفقع نادر ما تحصله

الله يوفقك ويزوجك بنت الحلال

[(الفيصل)]

موضوع قُتل بحثاً ومناقشاً وحواراً على كافة الاصعده المرئية والمسموعه والمقروئه ولكن لابأس يستحق النقاش:rolleyes2:
تذكرون أغنية الاطفال
(حمامه نودي نودي .. سلمي على سعودي.. إلى أن تصل إلى الحداد يبي فلوس .. والفلوس عند العروس... والعروس تبي عيال .. والعيال يبون حليب.. والحليب عند البقر .. والبقر يبي حشيش .. والحشيش يبي مطر .. والمطر عن الله )؟؟؟!!

العروس تستاهل أكثر من الفلوس وكنوز الارض ماتوفيها حقها
وكلن يمد رجوله على قد الحافه
يعني لو تركنا الزبو والتقليد الاعمى للغير نحن بخير
وفيه ناس يرضون بالقليل ويبون الستر لبناتهم
ويشترون الرجال الكفو .. بل يخطبونه لبناتهم
وفقنا الله وإياكم لما يحب ويرضى