أتساءل .. أيهما أفضل من وجهة نظركم للمـرأة القطــــرية ؟

[HAYA]

ونحن مقبلون على موسم العطلات والسفر والسياحة ...
فأيهما من وجهة نظركم أفضل للمرأة القطـــرية :

1 ) أن تلتزم بزيها الخليجي المتوارث ( العباءة والشيلة ) مهما كان الهدف من رحلتها وأينما كانت وجهتها ؟
أم ...

2) تكتفي بلبس الحجاب ولبس المحتشم من الثياب ؟

..... أرجو المشاركة ... مع الشكر .

[بو الجوري]

الشيله والعبايه طبعاً أفضل ..

ولكن اذا كانت رايحه ملاهي .. مافي مانع تلبس لبس فضفاض وواسع .. والشيله مثل ماهي ..

والله الاسبوع اللي طاف كنت فجنة دلمون (حديقه مائيه فالبحرين) .. وشفت 3 حريم بالنقاب والعبايه ..
راكبين السباحه .. (التيوب) ونازلين من الزحلاقيه .. يحليلهم .. والله عجبوني انهم ملتزمين بالزي .. وفنفس الوقت محتشمين ..

فالنهايه .. الأفضل هو الشيله والعبايه ..

[الخير كله]

؟؟؟؟؟؟؟؟؟؟؟؟
ليش يعني :telephone:كلن عقله براسه ويعرف خلاصه:)



وكل وحده تسوي اللي يمليه عليها وازعها الديني والسلام يا حلوه
ملاحظه اهم شي يكون لبس لا يشف ولا يصف مفاتن الجسم:victory:

[بو الجوري]

؟؟؟؟؟؟؟؟؟؟؟؟
ليش يعني :telephone:كلن عقله براسه ويعرف خلاصه:)



وكل وحده تسوي اللي يمليه عليها وازعها الديني والسلام يا حلوه
ملاحظه اهم شي يكون لبس لا يشف ولا يصف مفاتن الجسم:victory:

:victory:

[الصارم]

المشكله حتى العبايه والشيله في هالزمن صارت مخالفه للحجاب الشرعي وتفضح أكثر ما تستر

الواجب على الوحده تلتزم بالحجاب الشرعي المأمور به في القرآن والسنه والذي وضحه علماء الأمه سواء في بلدها أو في البلاد الأجنبيه...


فالأمر إذاً لا يحتاج إلى وجهات نظر لأنه أمر تنزل من فوق سبع سماوات

[ابو فهيد]

السلام علييكم

,,

من رأيي انها تلبس العبايه والشيله فهي تزيدهاا وقارا واحتــراما ,, احترم من تحافظ على لبسها الاسلامي وعادات بلدهــا .. وشـكـرا

[Realistic]

العبايه والشيله مب من الدين .. هي من العادات والتقاليد

فلو لبست المرأه لباس غير العبايه والشيله ( بشرط ان يستر عورتها ولا يصف ولا يشف ولايلفت الانتباه) فالامر مافيه حرج شرعي

المتعارف عليه في قطر .. ان البنات تلبس العبايه والشيله ( كما هو متعارف ان يلبس الشاب الثوب والغتره)

فاذا طلعت من قطر .. فيسقط المتعارف عليه ( لانها في دوله غير قطر) .. وتلتزم باللبس الشرعي

[VIPLady]

بالدوحه و دول الخليج شيله وعبايه طبعا

بس بالسفر لدول برى .. حجاب و لبس محترم...افضل من العبايه

[فارس الكلمة]

المعذرة .. موضوع مكرر .. و تتناوله معظم المنتديات ..

اللباس الشرعي هو المطلوب .. بغض النظر عن المسميات ..!

[هدى ورحمه]

بالدوحه و دول الخليج شيله وعبايه طبعا

بس بالسفر لدول برى .. حجاب و لبس محترم...افضل من العبايه

بالضبط

نفس رأيي بالضبطططططططططططط

[سهم طالع]

الحل بسيط .. تسأل وش كان يلبسون نساء الصحابة عندما يخرجون امام الرجال وتلبس مثلهم .. و(كل نفس بما كسبت رهينة ) .. والآراء الزايدة ما منها فايده

[HAYA]

السيد الفاضل / بوالجوري ..
أحترم رأيك ، وأقدر مشاركتك .

[بوحارب]

اللباس المحشتم

لحد يكلم الفي اي بي ههههه

[عبدالمحسن]

اذا كانت رحله سياحيه فانا اشوف فيه مناطق في الخليج سياحيه جدا ويمكنها ارتداء زيها


واذا كانت مضطره للسفر لبلاد الغرب فيجب عليها الاحتشام

[ريماس الغلا]

لبس المحتشم من اللباس في قطر او خارجها


مب في قطر قمه الاحتشام وخارجها بالجينز والكت


الله يهداهم ..

[technical]

نبي الستيره , وهي الأفضل

[الاعــلامية]

اللبس الشرعي مطلوب


اهم شي الحجاب الشرعي .. واللبس الفضفاض اللي لايشف ولا يفصل


انا عن نفسي مهما سافرت ورحت وجيت .. رحلات سياحية او عمل او غيره

شرق وغرب وجنوب وشمال

عبايتي ما اشيلها ابد

:
:

[HAYA]

الأخت الكريمة / المبروكة :
عقله براسه صح ... لكن لا تنسين أننا جميعا في الخارج نمثل الإسلام ونمثل قطــــر ....
لك تحياتي .

[HAYA]

الأخ الكريم / الصارم :
أتفق معك تماما بأن العباية الخليجية قد تعولمت هي الأخرى وفقدت وظيفتها الأساسية ... وأدعو لحملة تتولاها الجمعيات الخيرية تحت عنوان : " إلا عباتي " على غرار " إلا صلاتي "
مع دعائنا الصادق بالستر والهداية لنساء المسلمين وبناتهم .

[حيهور]

الأفضل لها طبعا الإلتزام بالزي الشرعي الإسلامي

سواء كانت في قطر او خارج قطر

والأحسن تلتزم بالعادات والتقاليد في البس سواء داخل او خارج قطر

وووايضا على الرجال الالتزام بالزي القطري داخل وخارج قطر وحتى لو كان في دولة غربية مما يؤدي لتقوية شخصية المواطن والأعتزاز بالتراث والعادات والتقاليد المروثه من الأجداد منذ القدم

هذا راي والله اعلم

[بنQATARت]

ليش انتنازل عن ملابسنا وعن عاداتنا وتقاليدنا وأخلاقنا
بس علشان الاناقه وعلشان نرضي الغرب والاجانب ومايقولون عنا متخلفين
خل ايقولون ويشبعون
بنقولهم
رجعي الى الاسلام دربي فتقدم نحو الجاهليه
وبنطز عينهم بالعبايه والشيله وخلهم يموتون قهر

ماشوف الهنديه والبكستانيه قطت الساري والبنجابي والبسو لبس الغرب
بلعكس الكل محافظ على لبسه الا احنا كله نستحي ايعيبون علينا ياأختي
خل يعيبون في الاخير مايصح الا الصحيح
وسلامتكم

[HAYA]

السيد الفاضل / بوفهيد
إن من تحافظ على عادات وتقاليد بلدها تستحق التحية والاحترام منا جميعا ...

[HAYA]

الأخ الكريم realistic
أتفق معك بأن للمرأة أن تتحرر من عباءتها إذا التزمت بالزي الشرعي ، ولكن يفضل الالتزام بالزي التقليدي إذا كانت المرأة تمثل بلدها في الخارج .

[بوخالد2]

في المتحجبه لباس شرعي للسفر للخارج

وهو لباس العباه مثل الثوب والحجاب

اعتقد افضل شي هذا
من انها تنسى ربها هناك

[HAYA]

الأخت الكريمة v.i.p
أشكر لك مشاركتك .. قد تتخلى المرأة أحيانا عن عباءتها في الخارج وتلتزم بالمحتشم من الثياب حتى لا تلفت الأنظار إليها ... ولكن ما هو رأيك إذا كانت القطرية موفدة لتمثيل بلدها ؟؟ هل تتقيد حينها بالعباءة أم بأي زي محتشم ؟

[HAYA]

الأخ الكريم فارس الكلمة
لم ألاحظ تكرار هذا الموضوع في منتدانا هذا أو في غيره كما تفضلت !!!!!!!
وأعتقد بأن التنبيه مرارا على الأشياء الضرورية في حياتنا لا يضر ، بل هو واجب علينا لحماية عقيدتنا وقيمنا وعاداتنا وتقاليدنا .
مع شكري لمشاركتك .

[ام لولوه]

بالدوحه و دول الخليج شيله وعبايه طبعا

بس بالسفر لدول برى .. حجاب و لبس محترم وساتر وفضفاض...افضل من العبايه

[واحد في حاله]

ليش اهو الدين في قطر غير عن برى !!؟

هذي مافيها نشدة شيخ

والزي الخليجي المتوارث اهو الي تحت العباه :)

[طين وعجين]

ونحن مقبلون على موسم العطلات والسفر والسياحة ...
فأيهما من وجهة نظركم أفضل للمرأة القطـــرية :

1 ) أن تلتزم بزيها الخليجي المتوارث ( العباءة والشيلة ) مهما كان الهدف من رحلتها وأينما كانت وجهتها ؟
أم ...

2) تكتفي بلبس الحجاب ولبس المحتشم من الثياب ؟

..... أرجو المشاركة ... مع الشكر .


يعجبني في المراة حياءها ! يعني ما يصير اسود في اسود وتتصرف بلا ذرة حيا
الصوت عالي وتلاسن وتزاحم الخ

[نشميّه]

والله انا اشوف عباية وشيله في الدول الخليجيه وفي الدول الأوروبيه اللي تصير خليجيه !
يعني مافي أمل امشي في لندن في الصيف بلا عبايه :s أمشي في قطر بلا عبايه احسن لي :p
لا والله جد .. انا اشوف العبايه في البلاد العربيه وفي الخارج إذا حبت ممكن تلبس لبس محتشم
فضفاض .. في أماكن طبيعتها يبيلها ثياب عمليه غير العبايه وبعد في عواصم اوروبيه مانقدر
نقط فيها العباه لأنها تكون كانها الدوحه ولا الخليج:s وكل الناس متجمعين في نفس المكان ..!
اتمنى لكم إجازه سعيده :p

[VIPLady]

الأخت الكريمة v.i.p
أشكر لك مشاركتك .. قد تتخلى المرأة أحيانا عن عباءتها في الخارج وتلتزم بالمحتشم من الثياب حتى لا تلفت الأنظار إليها ... ولكن ما هو رأيك إذا كانت القطرية موفدة لتمثيل بلدها ؟؟ هل تتقيد حينها بالعباءة أم بأي زي محتشم ؟

اذا كانت مهمه رسميه و ووفد يمثل دولتي سالتزم بالزي في حاله كل من حولي ملتزم بالزي الرسمي لدولته ..مثال اذا كانت سفره لمؤتمر فشي طبيعي وجود اشخاص من دول اخرى فاذا كل من ملتزم بزيه الرسمي الخاص بدولته لابد من الالتزام ولكن اذا كانت سفره عاديه خاصه كسياحه مثلا او مهمه خاصه اكتفى بلبسي الخاص بالسفر وابتعدى عن العبايه في الدول الاجنبيه..
لان احيانا و في بعض الدول الاجنبية العبايه تكون ملفته وتلفت الانظار اكثر من اللباس الاخر..

وفي النهايه كل من له رأي ومبدئ ومنطق يمشي عليه و الاهم من هذا كله الاقتناع باللبس الي لابسته سواء عبايه او غيرها

[الهـواوي]

النقاب والعبايه والستر وبس والباقي خس

[WIFE]

أهلين
الشيلة و العباية حلوه و عمليه و ستيره في حدود طلعاتنا في الديرة و بدول الخليج بعد...كل المشاوير بالسيارة..لكن برا المشي كثييييير و الروحة و الجية....اللبس اكيد في كل الحالات لازم يكون محتشم...بصراحة العباية والشيلة ما احسها عملية الا اذا ثبتي الشيلة عدل و مب كل شوي تلفها و تعدلها و تدخل القذلة ووو و فالحجاب مع دبوووس مثبت اكثر + الجلباب الذي يرتفع شبرا عن الارض + بنطلون فضفاض طويل و (تكرمون) جوتي ستير و مريح ما يكشف اجزاء القدم ...اعتقد انها بتكون جاهزه وما تحاتي اي جزء فيها ينكشف...والله اعلم
وبصراحة في حريم ا(الله يهيدهم) هدفهم من العاباية برا انهم ينعرفون انه من دول الخليج بغض النظر عن الهدف ...بعض البلدان ان عرف انك من دوله خليجية يتم استغلالك و يزيدون عليك سعر البيعة بعد...مب كل مكان طبعا و لكن بعض الاماكن....

و لكم التحية

[HAYA]

الأخت الكريمة بنت الريح : أشكر لك مشاركتك .

[روميت]

ليش انتنازل عن ملابسنا وعن عاداتنا وتقاليدنا وأخلاقنا
بس علشان الاناقه وعلشان نرضي الغرب والاجانب ومايقولون عنا متخلفين
خل ايقولون ويشبعون
بنقولهم
رجعي الى الاسلام دربي فتقدم نحو الجاهليه
وبنطز عينهم بالعبايه والشيله وخلهم يموتون قهر

ماشوف الهنديه والبكستانيه قطت الساري والبنجابي والبسو لبس الغرب
بلعكس الكل محافظ على لبسه الا احنا كله نستحي ايعيبون علينا ياأختي
خل يعيبون في الاخير مايصح الا الصحيح
وسلامتكم


بنqatarت

أنتي 10 على 10



بارك الله فيك وكثر الله من امثالك .

[جليســــة القــــرآن]

أنا ما أستغنى عن الشيله والعبايه
أصلا هم لبس محتشم طبعا عبايه ساده مب كأني رايحه عرس
وبصراحه وين ما أكون ما أقدر أقعد بدونهم
والحمد لله على نعمة الإسلام