دليل الدمام والخبر والبحرين السياحي (دعوه للمشاركه))

[حب عابر]

السلام عليكم ورحمة الله وبركاته
ارجوا من الجميع مساعدتي حيث انه يوم الخميس باذن الله تعالى متجه للبحرين والدمام والخبر وبمر على الاحساء بالسياره
فياريت احد يساعدني بالامكان الترفيهيه والاسواق الشعبيه والحديثه بالدمام والخبر والبحرين
وكذالك شقق مناسبه من ناحية النظافه والاسعار
وشكراً

[ام الحلوين]

ممكن اعلمك ع الدمام والخبر
الدمام عندك المارينا مول والشاطي مول بالكورنيش
عندك سوق الدمام الشعبي وسوق الجمله عند الاماره
الخبر
سوق الراشد وانصحك فيه جدا خاصه بعد افتتاح التوسعه لان ماركات متنوعه وحلوه بالراشد
الظهران مول حلو بعد التوسعه
مجمع الاناقه البسيطه شارع البيبسي هم كم محل لكن ماركه وفساتين للاهل راقيه جدا
سوق جمعه مول بكورنيش الخير
فؤاد سنتر لاانصحك به ابدا
فنيسا مول جديد وحلو
سوق السويكت حلو جدا خاصه محل عبايات للاهل
اي سؤال انا حاضره
ورحله سعيده يارب

[بوعلي-Qtr]

انصحك في فندق ميركيور جراند في البحرين ..
نظام شقق فندقيه .. وتقدر تروح مجمع العالي مشي والسيف بعد ..
ومافي خرابيط ..

[q6ria25]

يسلموو على الطررح ونترقب كل جديد

[غروب الشمس]

عندك شارع سويكت اوشارع الحب (له اسمين) بالخبر حلو وعندك جمعه ستي سنتر بعد حلو يقابله فؤاد سنتر (مب حلو) بس ميزته العاب الاطفال وايد حلوه مثل الغابه, الراشد وظهران مول ,فنيسيا مول حلويييييييين عندهم خبر مول وخبر بلازا وشقق العليا انصحك بشششششده نظيفه وحلوه مقابل مجمع الراشد بالخبر .
نروح الدمام السوق القديم اسمه سوق الحب (وايد رومانسيين) عندك مارينا مول الواحه مول(مثل سوق الجبر بس ارقى وكبير جدا) مجمع الخلدون ,الشاطئ مول هذا كل اللي اعرفه

[الجافي]

عندك اماكن ترفيهية بالبحرين جنة دلمون المفقودة
و بعد منتزة عين عذاري والعرين بس العرين ماينفع في الحر
اممم عندك المنتزة المائي الجديد في مجمع السيتي سنتر
طبعا عندك مجمع السيف والعالي ومجمع البحرين والدانة وفي مجعات صغيرة مثل مجمع سنتر بوينت في سند ومجمع السترة في منطقة السترة وعندك مجمع الرفاع ومجمع السنتر في البديع بس مجمعات صغيرة
وعندك المطاعم والكوفي شوبات مثل ليليو ، لاشوكولا (في منطقة السيف)، واتر ليمون و صفة المطاعم اللي عند مجمع العالي حلوين، في وايد مطاعم
اذا رحت ليلو او لاشوكولا لازم اتجرب الكيك عندهم حده حلووو
وعندك الفنادق الريتز، موفنبيك، اليت/ اليت سويت ، العرين (بانيان تري)
وبعد اسواق شعبية عندك السوق الشعبي ( وايد حر ومايستاهل حد يروحه)
وعندك سوق واقف في مدينة حمد
وشارع جدعلي في مدينة عيسى
وشارع بوكوارة في الرفاع
وشارع المعارض وشارع العدلية وعندك الجفير في مطاعم وكوفي شوبات.....
وعندك السينما في مجمع السيف ومجمع الدانة وفي منطقة البديع سينما السار
وبعد عندك امممم جزر امواج البحر اهناك حلووو
ولاتنسى تروح الشويطر محل حلوى ومتاي اللي في محرق

[halah]

الخبر أنا جربت فيها كذا شقة فندقية ومعظمها أسعارها للغرفتين وصالة بحدود 200و 400لكن الأفضل والأجدد تقريبا هي شقق ميلان سعر الغرفة مع الصالة تقريبا 500ريال وفيها برك سباحة داخلية اذا معاكم أطفال والمواقف متوفرة لسكان الفندق ويقدمون إفطار مجاني بسيط عصاير وكيك ومعجنات وجريدة يوميا وفيه كوفي شوب وحراسة وخدمتهم زينة ويعطونك بطاقة عميل

وبالنسبة للمجمعات عندك طبعا الراشد ومقابله مجمع جديد اسمه فينيسا وفي جمعة ستي عنده فساتين زينة ورخيصة نوعا ما وفؤاد سنتر دايما فاضي ونص المحلات عندها تصفية وعندهم مكان الألعاب كبير

وفي شارع السويكت فيه مول صغير اسمه الخبر بلازا فيه جلابيات وملابس نسائية

وفي مجمع آخر اسمه الخبر مول اعتقد موجود فالطريق بين الدمام والخبر اذا ما نسيت

وفالدمام في مارينا مول أو الشاطئ مول اللي جنب فندق الشيراتون وفي الحياة بلازا مدري الحياة مول يقولون ان أسعاره ارخص من الخبر فالفساتين والملابس مع العلم انها نفس الماركة

وفي سوق كانوا الحساوية يبيعون فيه حب واسمه سوق الحب من الحبوب بعد رخيص


والبحرين مافي أشهر من مجمع السيف والعالي والماركات اللي فيه نفس الدوحة لكن اذا تعرف حد من أهل البحرين ممكن تسأله عن الأسواق والمولات الغير معروفة واللي عادة تكون أرخص

ولا تنسى تاخذ معاك صوغة البحرين حلوى ومتاي وخذ بهارات بعد بهاراتهم زينة

واتمنى لك رحلة موفقة

[حب عابر]

الله يعطيكم العافييه ماقصرتوا اخجلتموني بمساعدتكم

وان شاء الله بروح للاماكان اللي قلتوا لي عنها
لائنه بصراحه كل مافكرت اسافر مكان يقولون لي فيه مرض الخنازير وانتوا بكرامه فقلت مالي الا الدمام قريبه والكل مدحها لي والبحرين وان شاء الله خير

واي احد منكم يبي مني شي مايرده الا لسانه يرسل لي رساله خاصه باللي يبيه وانا تحت امركم
وشكرا للجميع