فكره

[aljar]

السلام عليكم ورحمه الله وبركاته
اليوم كنت أشوف برنامج في قناة الجزيرة الوثائقية وكان اسمه ارض الهند بصراحة لفت انتباهي شي فالهنود وهو اشلون واقفين جنب بعض ويهتمون لبعض شفت واحد مليونير وكبير فالسن لكنه فنان وكون ثروه من انه جمعهم في مكان واحد وسوا جمعيه تتبنى مشاريع الهنود فالمهجر والتمويل من نفس الهنود الي يشتركون فهالجمعيه مثل ماحنا أنسميها قطيه بس على مستوى اكبر أنزين يالربع متى احنا بنكون مثلهم او أحسن منهم وشبابنا يقومون من جدام السوني ويطلعون من المجالس ويستغلون هالمخ الي الله عطاهم إياه وفي ميزه بشباب قطر واهل قطر اذكيا ويتميزون في اي شي يبون يسونه وحلمهم دوم يكون كبير وطموحهم عالي واهدافهم كبيره هالعناصر هي مفتاح النجاح فكره مجهود ابداع تميز وكل هذا موجود في شبابنا بس باقي انه احنا نوقف جنب بعض تلقى واحد عنده افكار متميز بس ماعنده امكانيات واحد ثاني ماعنده اي فكره وعنده ميزانيه مايعرف شيسوي فيها انزين ليش ما نبدى بتاسيس شركه كبيره ونتكاتف مع بعض وندور مدير تنفيذي ممتاز من برع يقود هالشركه من قطر وياخذها للعالميه مثل قوقل ومثل مايكروسوفت وماكدونالدز ليش لا او اقل شي نبداها بموقع على النت والي يبي يشارك يقط ونكون راس مال وننسويه منتدى او ملتقى او تجمع حي فيلا او بيت ونرتب الامور والافكار ونسجلها وندرسها ونسوي دراسات جدوى ونشوف من الي ممكن يساعدون او يكونون قاده فهذا المجال وتكون مربحه وتدر على الكل ؟؟ شرايكم ادري طولت بس الفكره دخلت مزاجي وممكن نسويها ليش لا وكل العوامل متوفرة بس نأخذها بجديه
على فكره قريت كمن فكره على الموقع شي شي منها فكره الوسيط الاكتروني للعقارات ويكون ببلاش وندخل من الاعلانات لو الاعلان كان بالمسجات على كل مسج 10 وعليكم الحسبه وفي افكار اكثر ووايد

واسمحولي على الاطاله

[مناحي السادس عشر]

فكره جهنميه يا كبتن
بس تدري وين راح نختلف
من بيكون المدير

[zeknon]

يعطيك العافية الافكار موجودة بس السيولة قليلة ماتوفي

[aljar]

تسلمون على المرور طبعا انا المدير فالبدايه والسيوله اشلون مب موجوده لو خمسميه ريال بتكفيى لو كنا عشرين شخص هذي 10000 كل شهر وكل مازاد العدد قلت القطيه وانا مستعدوعندي العلاقات الي ممكن تساعدنا

[aljar]

تعالوا بسالكم الحين احنا هالقطر ليش ننطر من الغير يعطفون علينا ترى القوه فيدنا ولو كل واحد يعرف وشو حقوقه بس ووشو الي يقدر يسويه بجوازه وبطاقه الشخصيه اقل شي سجل تجاري وياجره وليش ياجره يشتغل بروحه مثل هالاخت الي دور شغل اشتغلي بروحج وفكري وشغلي الي محطوط على جسمج فوق ( المخ ) بحسب معاكم حسبه بسيطه لو قلنا هذي البنت اشتغلت كم بتلقى عشره 15 الف انزين كم سنه بتشتغل 40 او 50 سنه كم بيطلع لو حسبنا كل رواتبها من تشتغل لين اربعين سنه ؟
بيطلع مبلغ لو هي شغلت مخهها تقدر اطلعه في اربع او خمس سنين وجربوا احسبوا وشوفوا بروحكم خل انكون ايجابييين اشوي مانبي نضيع طاقتنا فالشكاوي عندنا قوه ومخ ومميزات من الدوله نقدر نسوي فيها الي نبي والراتب الي نبيه جربوا كل واحد يحسب راتبه لخمسين سنه ولا ينسى عمره كم يوم شتغل ؟؟؟؟؟؟؟
انزين سوال ثاني انتوا اتعرفون كم عدد الشباب القطريين والشابات الي ماعندهم وظايف بس عندهم شهادات ومعلومات وافكار تقدرون تتخيلون وشو الي ممكن يسونه او حجم الشركه الي ممكن يكونونها اقل شي نسوي شركه مساهمه للي ماعندهم وظايف ويديرونها بروحهم ويطلعون فيها ويتسلون ويدخلون فلوس حتى مانحتاج دعم من حد لا من الدوله ولا من التجار بس نجمع الافكار وننفذ ولو بتكلم على التخصصات واااايد في الاداره وفي الفنين وفي التصميم وفي الهندسه و التسويق وكلشي

[قطريه ماركه]

^
^

أفكااااار جميلة .. بس وين التطبييييق ...

[الخير كله]

عيزت الحكومه وهي تقول اشتغلووووووووووووووو

[" روح قطر "]

الله يوفق لك

الكل راح يأيدك على موضوعك

بس وقت الجد والعمل محد بيتم في الساحة الا أنت

موضوعك يبيلة دورة كاااااااااااااااااملة علشان توصل الفكرة للناس

وتقدر تستأذن من المنتدى وتفتح دورة وتسجل فيها الاعضاء اللي حابين أنهم يشاركون في المشروع

وطبعا أول شي رؤؤؤؤس أقلام من المشروع وفكرتة

وثاني شي تسوى لهم أجتماع وتبتدى تطرح عليهم الافكار

وهنى راح تحصر عدد الناس اللي بتشاركك في مشروعك

الله يوفق لك ويسهل طريقك

[aljar]

يعطيكم العافيه على الردود
بس شتقصدين بدوره اختي تاجره ؟؟
بصراحه انا الفكره عجبتني وكانت عندي من فتره لكن لقيت الهنود مسوينها فقلت احطها لكم فالمنتدى ونشوف ردودكم وتفاعلكم معنه الي زاروا وشافوا الفكره فوق 50 بس الي تجاوبوا وردو 5 او اقل او اكثر على العموم الفكره يبيلها متابعه وان شاء اللله بيكون لي وقفه على الفكره بس اول اخلص من الي فيدي واذا في حد مستعد وعنده افكار يحطها وفي موضوع قريته بصراحه روعه ويعطيها العافيه الي كتبته عن قصص النجاح لتجار الموقع هذي بروحها تشحن طاقات الشباب بس لازم يطلعون ويتكلمون فيس تو فيس عشان الكل يستفيد وتتفتح عقول الشباب

[فلفل حار]

فكره جهنميه يا كبتن
بس تدري وين راح نختلف
من بيكون المدير

:eek5:



اتفق العرب على الأ يختلفوا ...!

:secret:





تسلم أخــووي ....

:)

[الـقـاسـي]

والله ياخوي افكارك حلوه .. وتتكلم بحرقه مبين عليك على شباب قطر ..
انا انسان جاهز وبحط ايدي بيدك بس لازم يكون كل شي مرتب ..
حاول ترتب افكارك اكثر عشان تتضح الصوره للاعضاء ..

[رجل تعليم]

جميل جدا أن تهتدي لأفكار رائعة كهذه ... حتى وأنت لا تملك مقومات تحقيقها فلا تستسلم وإلا فستقوم بعملية إلغاء لكل الأفكار الجميلة القادمة ...

من الصعب طبعا تحقيق كل ما نحلم به ، ولكن الأصعب هو أن تهتدي لشيء جميل لتحلم به

الإبداع موهبة وقد يكون مجرد فكرة بسيطة جدا ، لذا ينصح التربويون دائما بعدم إغفال التفاصيل القليلة الإنارة ، فربما يكمن الحل والمستقبل في إحداها ...

شكرا جزيلا وتقبل مروري
ونهارك سعيد

[aljar]

تسلمون على المرور والتعليقات
بقولكم بصراحه انا عن نفسي الحمدالله اشتغلت وعندي تجاره وبديت من الصفر والحين عندي فروع وشغل في اكثر من دوله وجدامي مشروع قاعد اشتغل فيه وفكره مب موجوده فمكان ولا شفتها فاي دوله رحت لها وان شاء اللله بتكون فقطر وانا اتكلم عن تجربه شخصيه وشفت وعرفت انه الرزق فالتجاره وعلى كل الناس الي قابتلتهم من قطر وبرع قطر لاحظت انه عقول شبابنا وبناتنا من انضف العقول وشغلهم لبغوا يشتغلون يكون من خاطرهم ومن قلبهم ويتعلقون فيه ويعطون من قلبهم لدرجه انهم ياخذون هموم الشغل للبيت معاهم معنهم مب مستفيدين من شغلهم وعشان اوضح بقولكم مثال عن شخص يشتغل فبنك ومعاشه 14 الف كارفينه كرف الشر ومن 7 لين 5 ومرات لين 7 فالشغل يخلص شغله عشان البنك مايتعطل اتعرفون هالموظف يوم حسبت قيمه شغله يدخل على البنك ملاين وهم يعطونه 15 وهالشي مايرضيني انا بوافق انه ياخ14 في حاله وحده ان يكون له نسبه من مدخول شغله او يحدد البنك نسبه من الارباح للموظفين مثل خمسه فالميه من صافي الربح شوفوا القطريين شبيسووون وقتها تخيلوا 30 او 50 مليون تتوزع على الف من الموظفين القطرييييين اتعرفون كم بيطلع له مكافئه اقل شي ال 30 الف غير راتبه واجازاته واستحقاقاته يا جماعه والله انا ازعل يوم اشوف هالشباب الي ماعندهم وظايف ومتخرجين وقاعدين فالبيت بنات وشباب وحتى الي ماعنده شهاده وننتظر حدى الوزارات والا مكان يوافق حد يشغلهم خل انحط يدنا فيد بعض ونشيل بعض تتقدرون تتخيلون لو جمعنا الي ماعندهم وظايف وعندهم شهادات وافكار ؟؟ كم العدد تتوقعون ؟؟؟ انزين مب شرط الكل يكون مدير موظف ممكن ندخل ملاين بدون مانطلب من حد وبعدها لين تيمعنا على يد وحده واسسسنا وسوينا شي الكل يعرفه بيكون لنا قوه نقدر نطالب بدعم لانه افكارنا ناجحه فكروا فيها واذا تبون بنكتب موضوع الي وده يساهم وياسس معانا يسجل اسمه ويبعث لي عنوانه والانشطه والافكار موجوده وبتجي مع الوقت ويعطيكم العافيه
(( لا تطعمني سمكه لكن علمني كيف اصطاد ))

[صوت الضمير]

اخوي بأمانه جاتني ذا الفكره بما اني افكر اسوي مشاريع وللحين انا طالبه بالجامعه

وتقريبا عندي مبلغ صغير حول 5 الاف فكرت نفس تفكيرك حتى كنت بطرح الفكره

انه يشتركون مع سيدات ونسوي مشروع صغير بقطيه ... ومع الايام بيكبر المشروع

واذا تبي اخوي افكار عندي افكار ومشاريع محتاجتها دولتنا فكرة فيها ...

اشجعك اخوي وايدك بصراحه ....

العنود

[aljar]

اخوي بأمانه جاتني ذا الفكره بما اني افكر اسوي مشاريع وللحين انا طالبه بالجامعه

وتقريبا عندي مبلغ صغير حول 5 الاف فكرت نفس تفكيرك حتى كنت بطرح الفكره

انه يشتركون مع سيدات ونسوي مشروع صغير بقطيه ... ومع الايام بيكبر المشروع

واذا تبي اخوي افكار عندي افكار ومشاريع محتاجتها دولتنا فكرة فيها ...

اشجعك اخوي وايدك بصراحه ....

العنود

الف مبروك على التخرج
عشان اشجعج انا بديت بولا شي ولا ريال والحين ماشي تمام الحمدالله
واذا عندج افكار طرشيها على الخاص وخلينا نبدى ونتناقش ونشوف يمكن تخصصج يفيدنا
يعطيج العافيه

[aljar]

والله ياخوي افكارك حلوه .. وتتكلم بحرقه مبين عليك على شباب قطر ..
انا انسان جاهز وبحط ايدي بيدك بس لازم يكون كل شي مرتب ..
حاول ترتب افكارك اكثر عشان تتضح الصوره للاعضاء ..

تسلم اخوس القاسي على المرور
لكن الفكره هي بروحها انه احنا انجمع الافكار ونحطها بين حجرين الرحى ونطلع منها الزبده ونتناقشها مع بعض على قولتهم انسوي لها عاصفه دماغيه ونوصل لطريقه انه احنا نطلع الفكره الحلوه او المشروع الناجح للعالم مب بس فقطر لانه قطر بس 1ز7 مليون نسمه :victory: وللحديث بقيه

[صوت الضمير]

اخوي :) الله يبارك فيك بس انا بقى لي سنه ونص على التخرج

:)

العنود

[aljar]

اخوي :) الله يبارك فيك بس انا بقى لي سنه ونص على التخرج

:)

العنود

سوري العتب على النظر بس بعد مافي شي يمنع :victory:

[aljar]

بصراحه لقيت تفاعل من الشباب والبنات على الخاص بس توهقت ماقدر ارد بروح ازيد مشاركاتي وابدى ارد خخخخ

[aljar]

اووو اليوم محد عطانا راي ياللله معليه ناطر ردودكم