المساعد الشخصي الرقمي

مشاهدة النسخة كاملة : اللي يبي تصميم فيلا يتفضل هنا ( للمقبلين على البنيان )



بوحارب
06-07-2009, 12:51 AM
السلام عليكم ورحمه الله وبركاته

الموضوع باختصار مهم لكل من هو مقدم على بناء بيت العمر او بيت للاستثمار او بيت للأيجار <<< زين الأستثمار والأيجار نفس الشي :funny:

فــ عندما يبدأ فلان من الناس في مشروع البناء اول شي يفكر فيه كيف اسوي تصميم حلو :thumbup1:

فــ يسأل علي وعلي ماعنده اي خبره في البنيان كللللللش

وبعدين يروح حق حسينوه وحسين اخس من علوي في البنيان :(

وأذا كان متزوج يسأل ام العيال يا مرة وش رايج اشلون اسوي بيت العمر:shy:
والأجابة بتكون وانه وش عرفني انه الريال ولا انت :omen2:

اااااااااخر شي يروح المسكين الى اي مكتب تصميم ويقول للمهندس عطني تصاميم ابي اختار منها لبيتي!!! ( اكبر غلطه )

طبعا بعض المهندسين في هذي الحالة راح يعطيه اسخف تصميم عشان ما يتعب نفسه في رسم الخرايط وووو الخ

الكلام كثير بحاول اختصر لكم :(

اللي دعاني اكتب هالموضوع شي لاحظته انه بنفسي في الفلل اللي دخلتها:confused:

for example: ارض مساحتها 450 م مبني عليها فيلا فيها 7 غرف نوم:)

وفي المقابل أرض مساحتها 1200 م مبني عليها فيلا فيها 5 غرف نوم

:confused::confused::confused::confused::confused:

طبعا اكيد هالشي مايدخل العقل ولا في الخيال بعد,, لكن انه بنفسي شفت هالشي يا اخوان

وحزنت على صاحب الأرض بو 1200 م انه ماعرف كيف يستغل هالمساحة في توزيع الغرف وملحقاتها بالطريقة المناسبة :no:

وقلت في نفسي اشكر فنه راعي الأرض بو 450 م كيف عرف يستغل المساحة عدل :ok:

لازال الكلام كثير وكثير ولكن انه بوقف لهذي النقطة وبدخل في صلب الموضوع <<< انت للحين مادخل في صلب الموضوع؟ :eek:

احط لكم هذا الموضوع وبيكون عن تبادل الخبرات في انتقاء افضل التصاميم الهندسية للفلل

واللي عنده اي مشروع بناء ومتوهق في التصميم ما عليه الا ان يستشير اخونه من اهل الخبره هنا في المنتدى

فــ هذا المنتدى فيه الكثير من اهل ال Engineering & Construction

يقولون ربع(ن) تعاونو ماذلوا :)<<< فزعة للي عندهم بنيان ومتوهقين:cool:

والله يوفق الجميع:)

بوحارب
06-07-2009, 01:03 AM
الموضوع مفتوح للجميع ولحد يبخل علينا برأية بلييييييز ^^

عينـ السيــح
06-07-2009, 01:07 AM
جزاااك الله خير يابوحارب..

eimadi
06-07-2009, 02:50 AM
جزاك الله خير..... صج موضوع مفيد

الســـهم
06-07-2009, 09:38 AM
الله يعطيك العافيه يابوحارب , وشكرا على اهتمامك ونصايحك لاخوانك , واعتبر ردي رأي شخصي يحتمل الخطأ قبل الصواب ..

دهــن العود
06-07-2009, 12:25 PM
جزاك الله خير بوحارب

الموضوع مهم .. واكيييد بيفيد المهتمين بالبنيان

واسمح لي اشارك معاك واتابع موضوعك

في البداية احب انبة الى ضرورة تحديد الاحتياجات في المسكن
وفي المقابل تحديد الامكانيات وبشكل صحيح

وووضع الستقبل دوما في التفكير .. يعني فكر في المستقبل هل راح تكون هناك احتياجات مستقبلية او لا

هذا الي حضرني الحين والى وقت مانشوف مشاركات باقي الاخوان :)

الغـــيور
06-07-2009, 12:48 PM
thanx bro :)

i hope we can see some examples of a new modern house sketchs
also we can discuss the designs together

(sorry for writing in english)

بوحارب
06-07-2009, 01:00 PM
جزاااك الله خير يابوحارب..
تسلم عين السيح :):)

لاهنت

جزاك الله خير..... صج موضوع مفيد

تسلم يالعمادي وأن شاء الله يكون هالموضوع مفيد للجميع

بوحارب
06-07-2009, 01:02 PM
لي عودة لجميع الردود

alnajjar
06-07-2009, 01:28 PM
مشكوووووووووووووووووور فكرة مفيدة

بوحارب
06-07-2009, 06:29 PM
مساء الورد والكرك

شخبارك عزيزي السهم؟




بما ان لك خبره في البنيان !! عطني مساحات الغرف بهالفيلا ؟
شوف اخوي السهم صدقني اقل غرفة بتكون مساحتها 4.5*5 هذي المساحة اعتقد

كاااافية جدا وتعتبر مساحة متسوطة ولا تقول لا :)

اما الغرف الماستر ماتقل مساحتهم عن 6*5:victory:

اعتقد العدد كافي خصوصا ان الغرف شامله الدريسنج روم والحمام عزكم الله
امس كنت رايح اشوف فيلا للايجار في منطقة الخليج الغربي
ومساحة الأرض 1200 م تقريباً

تخيل انه الدور الثاني مافية الا 3 غرف نوم بس :(

هذا ما تسميه عدم خبره في توزيع الغرف

الواحد لما يبني بيت العمر لازم يسوي حسابه حق المستقل

واذا كان للأيجار لازم يكثر عدد الغرف لأنه المستأجر يبي لكل واحد من افراده غرفة مستقلة .... الخ

حتى الشخص اللي كان معاي قالي اي هذا التخبط في التصميم<<<< مع انه قليل خبره في البناء والأمور هذي



في فرق لما تعيش ببيت فيه مساحات واسعه وحديقه وخضره وبين بيت مافيه روح غير انك ترقد فيه , واذا قعدت بالصالة ماتشوف الا الطبيله بويهك
اعجبتني الطبيلة بويهك هههههههههههههههههههه :nice:

بس انه اقصد من الموضوع اصحاب الأراضي الكبيرة فقط

انت لما تكون عندك ارض مساحتها 900 م وفوق ويكون عدد الغرف قليل جداً

اكيد بتكون هناك ملاحظات على طريقة توزيع الغرف وهكذا

اما صاحب الأرض بو 450 م فهذا مسكين وماعنده الا الطبيلة في وجهة :weeping:

غرف حماماتها مشتركه وفيما بعد وحده تنفتح عالثانية ويصيرون 4 بدال 7 , وكنك يابوزيد ماغزيت , وانت يابو 5 غرف نظام سويت وماتحتاج تكسر لأنك بديت صح واساسيات الغرف موجوده (حمام + دريسنج) وغرف الله موسع عليك فيها ..
الصراحة المفروض يكون في كل فيلا تنبني 4 غرف ماستر في الدور الثاني كأقل القليل :)

هذا التصميم اللي اشوفه مناسب جدا جدا


على الاقل غرفتين كبار وغرفتين مساحات متوسطة

هذا الكلام بالنسبة للدور الثاني:victory:


الله يعطيك العافيه يابوحارب , وشكرا على اهتمامك ونصايحك لاخوانك , واعتبر ردي رأي شخصي يحتمل الخطأ قبل الصواب ..

الله يعافيك وكلامك على عيني وراسي وبالعكس استانست بمداخلتك القيمة :):)

بوحارب
07-07-2009, 12:11 AM
جزاك الله خير بوحارب

الموضوع مهم .. واكيييد بيفيد المهتمين بالبنيان

واسمح لي اشارك معاك واتابع موضوعك

في البداية احب انبة الى ضرورة تحديد الاحتياجات في المسكن
وفي المقابل تحديد الامكانيات وبشكل صحيح

وووضع الستقبل دوما في التفكير .. يعني فكر في المستقبل هل راح تكون هناك احتياجات مستقبلية او لا

هذا الي حضرني الحين والى وقت مانشوف مشاركات باقي الاخوان :)
نورت الموضوع والله اخوي دهن العود ولاهنت على الملاحظات المهمة

والموضوع مابتزيد حلاوته الا بالمشاركات الجملية هذي منك ومن باقي الأخوان

خلك معاي على الخط :nice:


thanx bro :)

i hope we can see some examples of a new modern house sketchs
also we can discuss the designs together

(sorry for writing in english)
ولكم الغيور

اخوي انت قولنا وش نوع البيت اللي تفكر فيه واحنا بنحاول نعطيك افضل التصاميم من عندنا

والقرار في الأول والأخير بيرجع لك

يعني ما نقدر نعطيك تصميم من عندنا بدون مانعرف القصد من البنيان ( سكني _ تجاري )

وكم عدد الأشخاص اللي بيسكنون في هالبيت ...... الخ

وياهلا فيك :victory:


مشكوووووووووووووووووور فكرة مفيدة

العفووو:)

الوفي
07-07-2009, 12:28 AM
أخوي بوحارب موضوع جميـــــــــــــل ومفيد ويستاهل المشاركة.........
بالنسبـــــــــة لتصميم الفله انا صممت بيتي بيدي أول شي اسكيتش فكرت كحاضر ومستقبل كم غرفه احتاج.....وبعدها سئلت أصحاب الخبرة للي ساكنيين بيوت كبار وعطوني نصايحهم وأضفت الناقص للفله......وبعدها سئلت أكثر من استشاري يسون لي أسكيتشات مع الاضافات الهندسيه والنواقص .....
هذا الكلام أخذ علي سنه وانا ادور وأسئل لين صفيت على هذا المخطط كالتالي:
أولا: تصميم المواقع......
مساحة الأرض 1200 متر مربع على شارع واحد يطل على الجنوب يعني شرق منزل جاري وشمال منزل جاري وغرب منزل جاري....
مساحة الفله 236 متر للدور الاول والثاني 236 متر المجموع 472 متر مربع
والملاحق 71 متر والمجلس 83 متر
المجموع الكلي 626 متر لمساحة البناء والمساحة المبنيه على الارض هي236+71+83=390 متر مربع وباقي المساحة من الارض هي.......
1200-390=810 متر فاضيه ولا طابوقه ولاحديده... خخخخ
وضع الفله لزيتها لجهة الغرب حيث تبعد عن جدار السور الغربي 2متر ورجعتها ورى جهة الشمال حيث تبعد عن الملاحق 2 متر من طرف الشمال هنا استقليت اكبر مساحة للارض......ليش لزيت للغرب لان ضوء الشمس بالشرق اي الشرقه مفيده للبيت صوب الشبابيك لكن الغروب او العصاري مرض وتكون عموديه على البيت وحرارة غير طبيعيه هذا بعز الصيف الواحد يحس فيه......
المجلس خليته بالجهه الشرقيه من دون شبابيك لا من الخلف شمالا ولا اليمين غربا وصاير بزاويه الارض شرقا مثل رقم 2 يعني معزول عن البيت تماما وشبابيكه على الشارع من الشرق والجنوب.....
هذا التوزيع بعد استشارات الشياب الله يطول بعمارهم الاجداد لهم خبره في وضع الجهات للبيوت ايام الطين والخيام وهم ادرى بالجو والتضاريس بالماضي.....:victory:
بالنسبه للفله يتكون الدور الارضي من ثلاث صالات مفتوحة بمساحه الاولى 4.5 في 8 والثانيه 4.5في 8 والثالثه 4.5 في 5.40 مطعمه بمغسله توأم يعني ثنين وحمام 2.8 في 2.4 للضيوف وغرفتين على الاطراف 5في4 مع دريس وحمام... ولوبي يم الدرج يخرج منه باب من جهة الشرق للحديقه وباب من اللوبي الاخر يحتوي على مخزن داخلي ومخرج من جهة الشمال للملاحق طبعا هذ غير الباب الرئيسي للفله جهة الجنوب...
ملاحظه هامة:انتبهوا لعرض الدرج الخريطة غير الواقع لازم يكون الدرج عريض مب ضيق يعني مايقل عن المتر وعشرين((1.2)):funny::funny::funny:
الدور الثاني نفس الغرفتين فوق على الاطراف 4 في 5.... يعني هنا يكون كل حمام تحته حمام وغرفتين بدون ادريس وحمام بمساحة 4في 4 وحدة منها داخله من ضمن السويت او الماستر.....كمتب خاص
الغرفه ال4في 4 يدامها صالة بمساحه 4.5 في 5 ويسارها بنتري اي مطبخ تحضيري مار باللوبي الي يم الدرج وحمام2.4 في2.8 مفتوح حيث يخدم صالة اليهال فوق مع الغرفه ال4في4 وضمن الغسيل الخاص مثلا لنشره بالسطح والحمام فوق اللوبي الي تحت وبعده اسويت له مدخل يتكون مثل ماقلت مكتب 4في4 وغرفتين مفتوحين على بعض بمساحة كل وحدة 4.5 في 5.4 يعني مجموع السويت 9في 5.4 طبعا بينهم قوس.....خخخ وحمام الماستر 4.5 في 2.8......
هنا المجموع غرفتين بالدور الارضي و الدور الثاني سويت ومكتب وثلاث غرف ......كلها 7 غرف...
الملاحق مطبخ 4في 6 ومخزن 3في3 وغرفة خادمه 4في4 وحمام 2.4 في 2.4 للخدامة وغسالة الملابس...
المجلس 5في 8.2 ومطعم 4في4 بينهم لوبي مفتوحين على بعض وبينهم حمام ومغاسل ثنين....
نرجع للارض خليت مساحة 175 متر حديقه مع ليتات والباقي بلاط وطبيلة للسيارات مشاهده الباب العود...
ان شاء الله تعم الفايدة للجميع......
تحياتي لبوحارب

بوحارب
07-07-2009, 12:55 AM
أخوي بوحارب موضوع جميـــــــــــــل ومفيد ويستاهل المشاركة.........
بالنسبـــــــــة لتصميم الفله انا صممت بيتي بيدي أول شي اسكيتش فكرت كحاضر ومستقبل كم غرفه احتاج.....وبعدها سئلت أصحاب الخبرة للي ساكنيين بيوت كبار وعطوني نصايحهم وأضفت الناقص للفله......وبعدها سئلت أكثر من استشاري يسون لي أسكيتشات مع الاضافات الهندسيه والنواقص .....
هذا الكلام أخذ علي سنه وانا ادور وأسئل لين صفيت على هذا المخطط كالتالي:
أولا: تصميم المواقع......
مساحة الأرض 1200 متر مربع على شارع واحد يطل على الجنوب يعني شرق منزل جاري وشمال منزل جاري وغرب منزل جاري....
مساحة الفله 236 متر للدور الاول والثاني 236 متر المجموع 472 متر مربع
والملاحق 71 متر والمجلس 83 متر
المجموع الكلي 626 متر لمساحة البناء والمساحة المبنيه على الارض هي236+71+83=390 متر مربع وباقي المساحة من الارض هي.......
1200-390=810 متر فاضيه ولا طابوقه ولاحديده... خخخخ
وضع الفله لزيتها لجهة الغرب حيث تبعد عن جدار السور الغربي 2متر ورجعتها ورى جهة الشمال حيث تبعد عن الملاحق 2 متر من طرف الشمال هنا استقليت اكبر مساحة للارض......ليش لزيت للغرب لان ضوء الشمس بالشرق اي الشرقه مفيده للبيت صوب الشبابيك لكن الغروب او العصاري مرض وتكون عموديه على البيت وحرارة غير طبيعيه هذا بعز الصيف الواحد يحس فيه......
المجلس خليته بالجهه الشرقيه من دون شبابيك لا من الخلف شمالا ولا اليمين غربا وصاير بزاويه الارض شرقا مثل رقم 2 يعني معزول عن البيت تماما وشبابيكه على الشارع من الشرق والجنوب.....
هذا التوزيع بعد استشارات الشياب الله يطول بعمارهم الاجداد لهم خبره في وضع الجهات للبيوت ايام الطين والخيام وهم ادرى بالجو والتضاريس بالماضي.....:victory:
بالنسبه للفله يتكون الدور الارضي من ثلاث صالات مفتوحة بمساحه الاولى 4.5 في 8 والثانيه 4.5في 8 والثالثه 4.5 في 5.40 مطعمه بمغسله توأم يعني ثنين وحمام 2.8 في 2.4 للضيوف وغرفتين على الاطراف 5في4 مع دريس وحمام... ولوبي يم الدرج يخرج منه باب من جهة الشرق للحديقه وباب من اللوبي الاخر يحتوي على مخزن داخلي ومخرج من جهة الشمال للملاحق طبعا هذ غير الباب الرئيسي للفله جهة الجنوب...
ملاحظه هامة:انتبهوا لعرض الدرج الخريطة غير الواقع لازم يكون الدرج عريض مب ضيق يعني مايقل عن المتر وعشرين((1.2)):funny::funny::funny:
الدور الثاني نفس الغرفتين فوق على الاطراف 4 في 5.... يعني هنا يكون كل حمام تحته حمام وغرفتين بدون ادريس وحمام بمساحة 4في 4 وحدة منها داخله من ضمن السويت او الماستر.....كمتب خاص
الغرفه ال4في 4 يدامها صالة بمساحه 4.5 في 5 ويسارها بنتري اي مطبخ تحضيري مار باللوبي الي يم الدرج وحمام2.4 في2.8 مفتوح حيث يخدم صالة اليهال فوق مع الغرفه ال4في4 وضمن الغسيل الخاص مثلا لنشره بالسطح والحمام فوق اللوبي الي تحت وبعده اسويت له مدخل يتكون مثل ماقلت مكتب 4في4 وغرفتين مفتوحين على بعض بمساحة كل وحدة 4.5 في 5.4 يعني مجموع السويت 9في 5.4 طبعا بينهم قوس.....خخخ وحمام الماستر 4.5 في 2.8......
هنا المجموع غرفتين بالدور الارضي و الدور الثاني سويت ومكتب وثلاث غرف ......كلها 7 غرف...
الملاحق مطبخ 4في 6 ومخزن 3في3 وغرفة خادمه 4في4 وحمام 2.4 في 2.4 للخدامة وغسالة الملابس...
المجلس 5في 8.2 ومطعم 4في4 بينهم لوبي مفتوحين على بعض وبينهم حمام ومغاسل ثنين....
نرجع للارض خليت مساحة 175 متر حديقه مع ليتات والباقي بلاط وطبيلة للسيارات مشاهده الباب العود...
ان شاء الله تعم الفايدة للجميع......
تحياتي لبوحارب


90% من تصميمك نفس تصميم فيلتي :) ( يعنا احنا انحب بعض بدون مانعرف ) يا فلان :(

الوفي

حطيت النقاط على الحروف وايد الله يبارك فيك ويبارك لك في بيتكم ويجعله عامر على اهله باليمن والأمان :nice:

الحين تعال خلنا نتناقش شوي

كم اجمالي الغرف في الدور الثاني؟
وكم مساحة الغرف الماستر؟:telephone:

وترى الرقم عندي وبكلمك الكورس الجاي بس خلني اخلص من ال 1080 :weeping:

الـخـور
07-07-2009, 07:56 AM
صراحة موضوع قيم جدا ..

انا كنت افكر بفكرة ومادرى مدى تكلفتها

كنت افكر اسوي طابق تحت الارض يكون لبركة سباحة مثلا او لخدمات ..

وعندي الارض فيها عمق تقريبا متر يعني جذي جذاك الارض اما ادفنها او ازيد في حفرها

شورو علي .. علما بان الارض قريبه من البحر (قد يكون هناك صبخه )

هل السالفة تسوى والا مكلفة !!

بوحارب
07-07-2009, 10:22 AM
صراحة موضوع قيم جدا ..

انا كنت افكر بفكرة ومادرى مدى تكلفتها

كنت افكر اسوي طابق تحت الارض يكون لبركة سباحة مثلا او لخدمات ..

وعندي الارض فيها عمق تقريبا متر يعني جذي جذاك الارض اما ادفنها او ازيد في حفرها

شورو علي .. علما بان الارض قريبه من البحر (قد يكون هناك صبخه )

هل السالفة تسوى والا مكلفة !!

مرحبا الخور

فكرة البيزمنت جميلة جدا

بس دام ارضك قريبة من البحر وفيها عمق 1م انه انصحك تخلي مهندس يشوفها عشان

وعلى فكرة البيزمنت يكلف وايد :eek5: يعني حط في بالك سيولة زيادة عن المتوقعة :telephone:

اتمنى اني افدتك بشي:)

ANONYMOUS
07-07-2009, 12:35 PM
بوحارب..

موضوع عدد الغرف مع المساحه.. مختلفه من شخص لشخص..

مثلا بو ارض 1200.. و5 غرف.. يمكن يحب الحوش يكون فاضي يحط حدايق .. ومساحة الغرفه الوحده = مساحة غرفتين من غرف بو 7

يمكن ماعنده عيال يعني ماينجب.... ويشوف 5 غرف وايد..

اما بو 7 غرف.. ماعنده فلوس حق ارض كبيره.. وعياله عددهم يادوب على عدد الغرف..


يعني في اشياء .. خافيه.. والخافي اعظم


الانسان يشوف اولا.. وش الارض اللي عنده..

وش يحب يكون فيها..

كم عنده طفل.. وكم ناوي يجيب مستقبلا..

ويعمل حسابه يكثر غرف.. لان مافي امل ولده يلقى بيت بسهوله في المستقبل

يعني في عوامل وايد تتحكم في هالمواضيع

بس مايمنع ان الموضوع قميل وممكن يفتح عيون بعض الناس لأشياء غايبه عنهم

قناصه
07-07-2009, 01:02 PM
موضوع حلو ... ومفيد ..

عندي استفسار مادري ممكن حد منكم يساعدني .. ابي اسم شركه ترسم لي الخرايط ..سكيتش و 3d

عشان الواحد يتخيل صح..

حد عنده فكره عن هالنوعيه من المكاتب ... !!

بوحارب
07-07-2009, 11:38 PM
بوحارب..

ارحب سعر الدعم
موضوع عدد الغرف مع المساحه.. مختلفه من شخص لشخص..

مثلا بو ارض 1200.. و5 غرف.. يمكن يحب الحوش يكون فاضي يحط حدايق .. ومساحة الغرفه الوحده = مساحة غرفتين من غرف بو 7
بو 1200 م مهما وسع من داخل البيت راح يكون عنده حوش عود

لأنه الأرض كبيييرة وايد 40 * 40 :)



يمكن ماعنده عيال يعني ماينجب.... ويشوف 5 غرف وايد..
عاد اهني تختلف الحسبة وايد :telephone:

اما بو 7 غرف.. ماعنده فلوس حق ارض كبيره.. وعياله عددهم يادوب على عدد الغرف..


يعني في اشياء .. خافيه.. والخافي اعظم


الانسان يشوف اولا.. وش الارض اللي عنده..

وش يحب يكون فيها..

كم عنده طفل.. وكم ناوي يجيب مستقبلا..

ويعمل حسابه يكثر غرف.. لان مافي امل ولده يلقى بيت بسهوله في المستقبل

يعني في عوامل وايد تتحكم في هالمواضيع

بس مايمنع ان الموضوع قميل وممكن يفتح عيون بعض الناس لأشياء غايبه عنهم
مرورك الأجمل يا سعر الدعم

بس انت وشو التصميم اللي يعجبك مثلا؟


موضوع حلو ... ومفيد ..

عندي استفسار مادري ممكن حد منكم يساعدني .. ابي اسم شركه ترسم لي الخرايط ..سكيتش و 3d

عشان الواحد يتخيل صح..

حد عنده فكره عن هالنوعيه من المكاتب ... !!

مرحبا قناصه

شيكي مع مكتب شعاع للأستشارات الهندسية

بالتوفيق ولاهنتي على المرور:):)

الوفي
08-07-2009, 12:18 AM
90% من تصميمك نفس تصميم فيلتي :) ( يعنا احنا انحب بعض بدون مانعرف ) يا فلان :(

الوفي
(( أحبك اللـــــه فيما احببتنا فيه يالغالي )) غالي من زمان يابوحارب

حطيت النقاط على الحروف وايد الله يبارك فيك ويبارك لك في بيتكم ويجعله عامر على اهله باليمن والأمان :nice:
((اولا لانه موضوعك...وتستاهل اكثر....ثانيا أبي افيد الناس يابوحارب لوجه الله سو خير وقطه بحر )) وجزاك الله خير على الدعاء

الحين تعال خلنا نتناقش شوي

كم اجمالي الغرف في الدور الثاني؟
وكم مساحة الغرف الماستر؟:telephone:
بالنسبة لعدد الغرف للدور الاول غرفتين اما الثاني خمسة بس وحدة من الغرف داخله من ضمن السويت الي يحتوي على غرفتين كل وحده 4.5 في 5.4 مفتوحتين على بعض يعني وحدة لغرفة النوم الدريس يم الحمام والثاني يطل على مقدمه لها نوافذ مثل البرج شبه بلكونه بس مغطاه يعني ضميته داخل البيت بدل ماتكون مفتوحه ولها خمس درايش للمراقبه...خخخخ الاجمالي 9في 5.4 وفيه بعد غرفة داخل السويت بس لها باب غير المفتوحين على بعض.... حاليا بنستخدمها للاطفال الصغار يعني اخر العنقود لانه صعب تخليه لوحدة او عند الخدامة وهذا عندي مرفوض ومستقبلا مكتب للخزانة والكتب والنت وتنفع للزوج اذا يبي ينام ويبعد عن الازعاج والسهر خاصة اذا الواحد عنده دوام...خخخ
ملاحظة:فيه ناس انتقدوني بالنسبة للسويت لانه يحتوي على غرفتين مفتوحتين على بعض ومكتب ودريس وحمام ومقدمه مثل البلكونه....انا بالنسبة لي اشوف ان الزوجين لازم يكون لهم سويت خاص ولهم خصوصياتهم حتى الخدامة ماتوطوط فيه او الضيوف بعد الا المقربين من الاهل فلازم ينعزل عن الفله بباب رئيسي....هذا بعض الاشخاص نصحوني فيه بس الي برستيجهم عالي....يعني من اهل الخبره

وترى الرقم عندي وبكلمك الكورس الجاي بس خلني اخلص من ال 1080 :weeping:
أبشر فديت خشمك......وأنا بنتظارك يالغالي ان الله احيانا

الوفي
08-07-2009, 12:37 AM
بوحارب..

موضوع عدد الغرف مع المساحه.. مختلفه من شخص لشخص..

مثلا بو ارض 1200.. و5 غرف.. يمكن يحب الحوش يكون فاضي يحط حدايق .. ومساحة الغرفه الوحده = مساحة غرفتين من غرف بو 7

يمكن ماعنده عيال يعني ماينجب.... ويشوف 5 غرف وايد..

اما بو 7 غرف.. ماعنده فلوس حق ارض كبيره.. وعياله عددهم يادوب على عدد الغرف..


يعني في اشياء .. خافيه.. والخافي اعظم


الانسان يشوف اولا.. وش الارض اللي عنده..

وش يحب يكون فيها..

كم عنده طفل.. وكم ناوي يجيب مستقبلا..

ويعمل حسابه يكثر غرف.. لان مافي امل ولده يلقى بيت بسهوله في المستقبل

يعني في عوامل وايد تتحكم في هالمواضيع

بس مايمنع ان الموضوع قميل وممكن يفتح عيون بعض الناس لأشياء غايبه عنهم
anonymous كلامك كله جميل بس الي محدده لي فيه تعليق اول شي انا الحمدلله عندي 4 اطفال وان شاء الله يسيرون عشرة علشان يعبون الغرف...خخخ طبعا يختلف على سياسة رب الاسرة يعني انا عندي مرفوض الطفل يسكن الغرفة بروحه لازم مع اخوه او البنت معها اختها لا وغير هذا بدون مفتاح بتقولي اشلون يبدل يبدل الملابس الداخليه داخل الحمام والباقي عند الدريس يم اخوه او الاخت يم اختها وطبعا هنا تسهل المراقبة للاطفال .......
يعني عندي 5 غرف ضرب 2 = 10 اطفال مع اني ناوي على سته بس علشان نقدر نربيهم تربية صالحة....
بالنسبة للارض الفاضيه مب شرط حديقة او بركة وغيرها......عندك الاولاد بكرة بيتزوجون .وين بيسكن الله لايهينه يبني ملحق بالمكان الفاضي لانه هنا بدء يكون اسرة وله خصوصياته اكثر الي تزوجوا مارتاحوا الا على اقل تقدير ملحق يلمه ويلم اعياله...
هذا ولك مني احلى تحية....
تحياتي

ذهب
08-07-2009, 01:34 AM
تسلم يا خوي يا بو حارب والله موضوعك في الصميم بهذا انته اتنبه الغافل الي ماحط في باله الاخطاء اشلون يستغل مساحة ارضه وا المقاسات العشوائيه في الغرف وهذا شفناه واجد وبعد اشوي باسأل في بنياني الستثماري بصراحه تسلم

موضي قطر
08-07-2009, 09:31 AM
الله يوفق الجميع

ANONYMOUS
09-07-2009, 12:11 AM
anonymous كلامك كله جميل بس الي محدده لي فيه تعليق اول شي انا الحمدلله عندي 4 اطفال وان شاء الله يسيرون عشرة علشان يعبون الغرف...خخخ طبعا يختلف على سياسة رب الاسرة يعني انا عندي مرفوض الطفل يسكن الغرفة بروحه لازم مع اخوه او البنت معها اختها لا وغير هذا بدون مفتاح بتقولي اشلون يبدل يبدل الملابس الداخليه داخل الحمام والباقي عند الدريس يم اخوه او الاخت يم اختها وطبعا هنا تسهل المراقبة للاطفال .......
يعني عندي 5 غرف ضرب 2 = 10 اطفال مع اني ناوي على سته بس علشان نقدر نربيهم تربية صالحة....
بالنسبة للارض الفاضيه مب شرط حديقة او بركة وغيرها......عندك الاولاد بكرة بيتزوجون .وين بيسكن الله لايهينه يبني ملحق بالمكان الفاضي لانه هنا بدء يكون اسرة وله خصوصياته اكثر الي تزوجوا مارتاحوا الا على اقل تقدير ملحق يلمه ويلم اعياله...
هذا ولك مني احلى تحية....
تحياتي


هلا الشيخ..

ترى انا ماقصدتك بالكلام..

انا اتكلم بشكل عام..


وبالتوفيق ان اشاء الله..

الوفي
09-07-2009, 08:12 AM
هلا الشيخ..

ترى انا ماقصدتك بالكلام..

انا اتكلم بشكل عام..


وبالتوفيق ان اشاء الله..
خخخخخخخخ........لا يالغالي ادري انك تقصد بالعام بس اوضح لك سياستي بالتوزيع .....وعلشان تكون الصورة واضحة للقارئ وتعم الفائدة أكثـــــــــــر.....
عزيز وغالي يا anonymous
تحياتي لك يالغالي....

بوحارب
11-07-2009, 07:41 AM
[color="sandybrown"]أبشر فديت خشمك......وأنا بنتظارك يالغالي ان الله احيانا
بيض الله وجهك يالوفي :):)

المهم خلك متابع الموضوع معاي


تسلم يا خوي يا بو حارب والله موضوعك في الصميم بهذا انته اتنبه الغافل الي ماحط في باله الاخطاء اشلون يستغل مساحة ارضه وا المقاسات العشوائيه في الغرف وهذا شفناه واجد وبعد اشوي باسأل في بنياني الستثماري بصراحه تسلم
مرحبا براعي الذهب

تسلم على ردك الطيب وهذا المقصود من الموضوع :victory:


الله يوفق الجميع

مشكورة على المرور الجميل :)

*¤ بن قطر¤*
12-07-2009, 08:53 AM
العزيز بو حــــارب ,,,

جزاك الله خير على هذا الموضوع المفيد ... وجعل ربي يسلمك :victory:

راعي طموح
12-07-2009, 08:55 AM
موضوع حلو ... ومفيد ..

عندي استفسار مادري ممكن حد منكم يساعدني .. ابي اسم شركه ترسم لي الخرايط ..سكيتش و 3d

عشان الواحد يتخيل صح..

حد عنده فكره عن هالنوعيه من المكاتب ... !!


ادخلي هالموضوع و ان شاء الله بتلاقين اللي يسرج :)


راعي طموح

ROSE
12-07-2009, 08:55 AM
الله يجزيك الخير يابوحارب

متابعه للموضوع للاستفاده ان شاء الله

بوحارب
12-07-2009, 04:13 PM
العزيز بو حــــارب ,,,

جزاك الله خير على هذا الموضوع المفيد ... وجعل ربي يسلمك :victory:

الغالي بن قطر

نورت الموضوع اخوي الحبيب والله يجزاك بمثله يارب :):)

بوحارب
12-07-2009, 04:13 PM
ادخلي هالموضوع و ان شاء الله بتلاقين اللي يسرج :)


راعي طموح

منور الموضوع تاجرنا العزيز :)

بوحارب
12-07-2009, 04:16 PM
الله يجزيك الخير يابوحارب

متابعه للموضوع للاستفاده ان شاء الله

ويجزاج بمثله اختي روز

اذا فكرتي في اي يوم من الأيام في البنيان ما عليه الا الأستفسار من اخوج بوحارب:)

وماراح اقصر معاج بشي

:)

جهام
12-07-2009, 04:49 PM
مشكور يابوحارب على التنويه .والمساعدة

M O 7 A M M E D
14-07-2009, 12:05 AM
جزاك الله كل خير يا بوحروووووب ..

انت الخير والبركه ..

:)

الوفي
14-07-2009, 12:15 AM
بيض الله وجهك يالوفي :):)

المهم خلك متابع الموضوع معاي


:victory:



:)

متابع أخوي بوحارب.......وبصير المحامي بعد للموضوع......خخخ ويش تبي بعد حاظرين

بوحارب
14-07-2009, 12:31 AM
مشكور يابوحارب على التنويه .والمساعدة

العفو ومشكور على مرورك الطيب يالغالي :)


جزاك الله كل خير يا بوحروووووب ..

انت الخير والبركه ..

:)

ويجزاك بمثلة بوجاسم ونورت الموضوع والله :):)

بوحارب
14-07-2009, 12:36 AM
[SIZE="6"][COLOR="red"]
متابع أخوي بوحارب.......وبصير المحامي بعد للموضوع......خخخ ويش تبي بعد حاظرين

تسلم يالوفي :victory:

ورقــة أمــل
14-07-2009, 12:41 AM
موضوعك يحرر تدري ليش

لان في ناس يبون يبنون وماعندهم استطاعة :anger1:

يعني شسوي انا الحين اروح ابني لي بيت من التين :rolleyes2:

بوحارب
14-07-2009, 12:44 AM
موضوعك يحرر تدري ليش

لان في ناس يبون يبنون وماعندهم استطاعة :anger1:

يعني شسوي انا الحين اروح ابني لي بيت من التين :rolleyes2:

ههههههههههههههههههههه عادي فيه ناس وايد مثلج :(:)

بو الجوري
15-07-2009, 05:29 PM
هلا بو حروب :.. شخبارك ؟ :)
والله من زمان ما شاركت :( كله من الدوام اللي اقطعوا النت :anger1:
المهم خبرك اخوك بوالجوري :.. بيبني على بنك التنميه :nice: واخيرا :..

وابي اغير تصميم بيتي لان التصميم القديم الغرف فيه مساحتها 4.40 * 4 !!
وأحسهم صغاااار :.. وشو المساحه المناسبه للغرف ؟
انا افكر اسوي غرفتين بينهم حمام :.. وغرفه ماستر عاديه :.. وغرفه ماستر كبيره لي :victory:

طبعا غير الصالات اللي بسويها مفتوحه على بعض :.. ومجلس رجال برع وملحق :..

المهم :.. ابي اعرف مساحات الغرف :.. المناسبه :.. واخوك ما يحب الضيق :)
وبنفس الوقت على قد لحافك :.. :(

تحياتي لك يا بوحارب :..

بوحارب
15-07-2009, 05:49 PM
هلا بو حروب :.. شخبارك ؟ :)
هلا وغلا

بخير يسرك الحال وانت علومك؟ :)


والله من زمان ما شاركت :( كله من الدوام اللي اقطعوا النت :anger1:

وانه اقوووووول وينه الحلو ماعاد يشاركنا مثل قبل:(

المهم خبرك اخوك بوالجوري :.. بيبني على بنك التنميه :nice: واخيرا :..
مبروووك

وابي اغير تصميم بيتي لان التصميم القديم الغرف فيه مساحتها 4.40 * 4 !!
وأحسهم صغاااار :.. وشو المساحه المناسبه للغرف ؟
4*4.40 صغيره من قلب وماتأكل عيش كلش :omg:

انه اشوف الغرف الماستر تكون 6 * 5 وانت رايح فوق

هذا احسن حجم للغرف الماستر اما الغرف الثانية العادية

انه اشوف 4.5 في5 مناسب وهذا اقل شي :)


انا افكر اسوي غرفتين بينهم حمام :.. وغرفه ماستر عاديه :.. وغرفه ماستر كبيره لي :victory:

حلو التصميم بس خل المساحات مثل ما قلت لك فوق:)

طبعا غير الصالات اللي بسويها مفتوحه على بعض :.. ومجلس رجال برع وملحق :..


المهم :.. ابي اعرف مساحات الغرف :.. المناسبه :.. واخوك ما يحب الضيق :)
وبنفس الوقت على قد لحافك :.. :(

تحياتي لك يا بوحارب :..

حياك يالحبيب وحاظرين لك في اي وقت :)

سهم طويل الأجل
16-07-2009, 09:30 AM
موضوع قيم يا بوحارب
طبعاً حجم الغرف مهم واللي يحدد الحجم النظرة المستقبلية من عدد الأولاد والاحتياجات.
أنا بتكلم عن جزئية ثانية من واقع خبرة .. فاللي مقدم على بنيان لازم يحط في باله عدة اعتبارات منها :

# ارتفاع السقف : مب يقول لك المقاول الارتفاع 3 متر زين ،
ويوم تجي تشطب وينزل لك البنغالي الجبس مايصفالك إلا مترين ماتقوم إلا وراسك ضارب السقف :secret:

# نقاط الكهرباء : لازم تحط في خطتك عدل مدل وين مكان التلفزيون ومن وين بتطلع واير الدش ..
مب آخرتها اتوهق وتلاقي وايرات ممددة في كل مكان تقول ثعابين :omen2:

# الدرايش : مب تحط 60 ألف دريشة في كل طوفة :rolleyes2:
أولاً خساير ستاير ثانيا تخرب عليك أماكن الجلسات والسرير والأثاث :(

# المكيفات : لازم تعرف مكان المكيف مسبقاً ، يعني ماتخليه صاد كلللللش ولا يضربك لين تمرض .

# توزيع الأثاث : لازم يكون عندك تصور عن توزيع الأثاث يناسب التصميم اللي أنت حاطة
وماتطلع لك زوايا ميتة ماتقدر تستغلها في شي :anger1:

أتمنى أني ماشطحت برا المقصود وهذا اللي عندي حالياً وإن تذكرت شي بضيفه :victory:
تشااااااااااااو

بو الجوري
16-07-2009, 06:44 PM
يعطيك العافيه بو حارب واخوي طويل الاجل :..

انا شفت نماذج عالطبيعه :.. وقررت اسوي تقريبا مثل ماقلت الغرف العاديه مب اقل من 5*4.6
والماستر 6*5 تقريبا :.. وهذا غير الدرسنج رووم اللي في كل غرفه :.. عند الحمام :..
الله يعزكم وعلى طاري الحمام :.. هل 3*2.5 زين ؟ ومثل ماقلت انا قبل ماحب الضيق :)

وبخصوص المكيفات يا طويل الاجل :.. بقول حق الاستشاري :.. :)

إن شاء الله الأحد بروح عند الإستشاري وبعطيه التصميم اللي في بالي عشان يسويه :.. :victory:
والله يعين:.. ودعواتكم :.. :..

بوحارب انا بسوي مجلس خارجي وباب البيت الصغير بيدخلك على المجلس على طول :..
يعني ظهر المجلس عالبيت :.. سؤالي هو : يصير اسوي بابين صغار وباب عود للسيارات :..
والا لازم بس باب صغير وباب كبير ؟

تحياتي :..

بوحارب
17-07-2009, 01:15 PM
موضوع قيم يا بوحارب
طبعاً حجم الغرف مهم واللي يحدد الحجم النظرة المستقبلية من عدد الأولاد والاحتياجات.
أنا بتكلم عن جزئية ثانية من واقع خبرة .. فاللي مقدم على بنيان لازم يحط في باله عدة اعتبارات منها :

# ارتفاع السقف : مب يقول لك المقاول الارتفاع 3 متر زين ،
ويوم تجي تشطب وينزل لك البنغالي الجبس مايصفالك إلا مترين ماتقوم إلا وراسك ضارب السقف :secret:

# نقاط الكهرباء : لازم تحط في خطتك عدل مدل وين مكان التلفزيون ومن وين بتطلع واير الدش ..
مب آخرتها اتوهق وتلاقي وايرات ممددة في كل مكان تقول ثعابين :omen2:

# الدرايش : مب تحط 60 ألف دريشة في كل طوفة :rolleyes2:
أولاً خساير ستاير ثانيا تخرب عليك أماكن الجلسات والسرير والأثاث :(

# المكيفات : لازم تعرف مكان المكيف مسبقاً ، يعني ماتخليه صاد كلللللش ولا يضربك لين تمرض .

# توزيع الأثاث : لازم يكون عندك تصور عن توزيع الأثاث يناسب التصميم اللي أنت حاطة
وماتطلع لك زوايا ميتة ماتقدر تستغلها في شي :anger1:

أتمنى أني ماشطحت برا المقصود وهذا اللي عندي حالياً وإن تذكرت شي بضيفه :victory:
تشااااااااااااو

سهم طويل الأجل

اسعدتني واضحكتني وابهرتني بمشاركتك الطيبة والجميلة :shy:


لاهنت وتشااااااااا:eek5:ااااااو هههههههههه

بوحارب
17-07-2009, 01:21 PM
يعطيك العافيه بو حارب واخوي طويل الاجل :..

الله يعافيك

انا شفت نماذج عالطبيعه :.. وقررت اسوي تقريبا مثل ماقلت الغرف العاديه مب اقل من 5*4.6
والماستر 6*5 تقريبا :.. وهذا غير الدرسنج رووم اللي في كل غرفه :.. عند الحمام :..
الله يعزكم وعلى طاري الحمام :.. هل 3*2.5 زين ؟ ومثل ماقلت انا قبل ماحب الضيق :)
مساحة حلوة وااااااااااايد :)

غرفة الخدامة 3*2.5:(ههههههههههههه

وبخصوص المكيفات يا طويل الاجل :.. بقول حق الاستشاري :.. :)

إن شاء الله الأحد بروح عند الإستشاري وبعطيه التصميم اللي في بالي عشان يسويه :.. :victory:
والله يعين:.. ودعواتكم :.. :..

موفق خير بوالجوري والله يعينك على البنيان


بوحارب انا بسوي مجلس خارجي وباب البيت الصغير بيدخلك على المجلس على طول :..
يعني ظهر المجلس عالبيت :.. سؤالي هو : يصير اسوي بابين صغار وباب عود للسيارات :..
والا لازم بس باب صغير وباب كبير ؟
اذا تقصد انك تسوي باب صغير خاص بالمجلس فهذا الشي عادي

بس لازم يكون مرسوم في الخرايط

انه مسوي في بيتي 3 بيبان خارجية

باب كبير للسيارات
وحذاه باب لدخول هل البيت

وباب ثالث للجلس الخارجي

عاد بس نفس ما قلت لك لازم يكون في الخرايط:)

تحياتي :..

تحياتي لمن دمر حياتي بالجوري :)

بو الجوري
18-07-2009, 01:04 PM
يعطيك العافيه بو حارب :..
بس عندك فكره كم ياخذ الاستشاري على التصميم ؟
وهل يفرق المبلغ :.. اذا خليته يصمم من جديد أو أختار من عنده مع بعض التعديلات ؟
او اوديله مخطط جاهز ويعدلي عليه شوي ؟ ؟ ؟ شالاسعار بالعربي :)

لاني الصراحه بوديله المخطط القديم اللي طلعت عليه رخصه .. وجاهز ..
وبقوله يعدل عليه ؟ يعني مابيتعب نفسه ويصمم من جديد بس بيوسع وبيضيف ..


وسؤال ثاني لاهنت :) كم سعر البنيان يكلف الحين تقريباَ ؟ يعني مساحة البنا مع الملاحق = 500 تقريبا ؟

تحياتي يا غناتي :)

بوحارب
18-07-2009, 03:57 PM
يعطيك العافيه بو حارب :..
الله يعافيك قلبو

بس عندك فكره كم ياخذ الاستشاري على التصميم ؟
وهل يفرق المبلغ :.. اذا خليته يصمم من جديد أو أختار من عنده مع بعض التعديلات ؟
او اوديله مخطط جاهز ويعدلي عليه شوي ؟ ؟ ؟ شالاسعار بالعربي :)
اتوقع الأسعار ماتقل عن ال 8000 ونت رايح لل 20000

كل مكتب وله سعر هالأيام :anger1:

شوف موضوعي هذا وركز على مشاركة اخونا مدحوب قطر رقم 110 :victory:

http://qatarshares.com/vb/showthread.php?t=193442

لاني الصراحه بوديله المخطط القديم اللي طلعت عليه رخصه .. وجاهز ..
وبقوله يعدل عليه ؟ يعني مابيتعب نفسه ويصمم من جديد بس بيوسع وبيضيف ..
الأستشاريين يحبون يتعبون نفسهم عشان البيزات :)

وسؤال ثاني لاهنت :) كم سعر البنيان يكلف الحين تقريباَ ؟ يعني مساحة البنا مع الملاحق = 500 تقريبا ؟

تحياتي يا غناتي :)

صارلي فترة ماطلعت على اسعار البنيان

بس اتوقع لو تسأل اخونا راحة يمكن يفيدك اكثر مني

هو راعي شركة مقاولات واخبر مني في هالشي

وتحياتي لمن دمر مستقبلي :(

الـخـور
18-07-2009, 05:58 PM
موضوع قيم يا بوحارب
طبعاً حجم الغرف مهم واللي يحدد الحجم النظرة المستقبلية من عدد الأولاد والاحتياجات.
أنا بتكلم عن جزئية ثانية من واقع خبرة .. فاللي مقدم على بنيان لازم يحط في باله عدة اعتبارات منها :

# ارتفاع السقف : مب يقول لك المقاول الارتفاع 3 متر زين ،
ويوم تجي تشطب وينزل لك البنغالي الجبس مايصفالك إلا مترين ماتقوم إلا وراسك ضارب السقف :secret:

# نقاط الكهرباء : لازم تحط في خطتك عدل مدل وين مكان التلفزيون ومن وين بتطلع واير الدش ..
مب آخرتها اتوهق وتلاقي وايرات ممددة في كل مكان تقول ثعابين :omen2:

# الدرايش : مب تحط 60 ألف دريشة في كل طوفة :rolleyes2:
أولاً خساير ستاير ثانيا تخرب عليك أماكن الجلسات والسرير والأثاث :(

# المكيفات : لازم تعرف مكان المكيف مسبقاً ، يعني ماتخليه صاد كلللللش ولا يضربك لين تمرض .

# توزيع الأثاث : لازم يكون عندك تصور عن توزيع الأثاث يناسب التصميم اللي أنت حاطة
وماتطلع لك زوايا ميتة ماتقدر تستغلها في شي :anger1:

أتمنى أني ماشطحت برا المقصود وهذا اللي عندي حالياً وإن تذكرت شي بضيفه :victory:
تشااااااااااااو

صراحة نصائح من ذهب
بارك الله فيك

كاتم المواجع
21-07-2009, 12:53 AM
بوحارب لاهنت على هالموضوع المهم واكثر المقبلين على البنيان يغفلون عنه.....
والله يعين اللي اختاروا تصميم الاسكان مساحه الغرف صغيره وتصميم مش حاااالك
مو خساره تصمم بيتك على راحتك لو بــ 20000 الف ولا تاخذ تصميم توهق فيه طول عمرك
والحمد لله تو ماخلصنا من التصاميم بعد عناء والبنيان ان شاء الله قريب
وادعوا لي بالتوفيق

بو الجوري
21-07-2009, 11:09 PM
هلا أخوي بوحارب :.. شحالك :.. ؟

وأخوي كاتم المواجع والله انك صادق :.. انا يوم رحت عند الاستشاري :..
وراويته المخطط وقلتله ابغي اغيره :. ضحك قالي انت رابع واحد يغير هالمخطط :..

وصج شغل مش حالك :.. مادري ليش هالتصميم :.. واذا جيت تقول للرسام اللي فالاسكان وسع اشوي :..
يقولك لااااا ما يصير !!!! وحتى وانت تقوله جطلي ملحق ومجلس :..ما يقولك لا :.. لكن ماينصحك بالاحسن :.. !!!
تخيل فالمخطط القديم حاطلي المجلس الخارجي قدام الفيلا :.. يعني الواجهه التحتيه ضايعه :.. وبس بابين :.. واحد للمجلس وواحد للسيارات !!!

الله كريم :.. ومانصح اي واحد يبني على مخططهم :.. لانه الصراحه مايستاهل وبيتوهق عقب كم سنه :.. عشان يوسع :..

بوحروب الاسكتش بيجهز على يوم الاحد :.. وان شاء الله بيكون ترتييييييييييييب :)


تحياااااتي يا باباتي :telephone:

اسيرالدوحه
24-07-2009, 12:14 AM
السلام عليكم ...

اشكرك اخوي بوحارب على الموضوع القيم ...

انا الحمدلله بينت وخلصت ...

ودي اشارككم بملخص لتصميم بيتي ...

اولا مساحة الارض 1333 م مربع ...

وتقريبا مساحة البناء 800 متر مربع ..

الفيلا من طابقين وبنت هاوس ومطبخ خارجي ...

الطابق الارضي ... فيه صاله ... تقريبا 5 في 5.5 ,,, مفتوحة على منطقة الدرج ...

ثم مجلس 5.5 في 6 مع الحمام والمغاسل ... في منطقة المجلس مكتب ... 4 في 4 ...

ومجلس آخر مع مطعم مفتوحين على بعض 5.5 في 9 ...

وغرفة نوم مع حمام

الطابق الثاني في غرفتين مع حمام ... وغرفتين مع حمام ... وغرفة بحمام ... والغرفة الماستر مع جلسة مع غرفة ملابس ...
وصالة ...

البنت هاوس ... غرفة الخدامة مع الحمام ...

وغرفة الاوتي مع مخزن ....

الملحق الخارجي ... مطبخ 7 في 4 مع مخزن 2 في 4 ....

وغرفة الغسيل ... 2 في 4 ...

والحوش الفاضي ... سويت فيه حديقة ...

ملاحظة .. الارض على شارعين ... من ناحية الغرب والجنوب ... والفيلا مواجهة غرب ...

ولها مدخلين ... المدخل الرئيسي .. مواجه غرب .... والمدخل الفرعي ... من ناحية الشرق ... بجنب المطبخ ...

والفيلا فيها درجين ... درج .. تقدر تسميه رئيسي ورسمي ... يوديك لطابق الثاني فقط ...

ودرج اخر .. عند المدخل الفرعي ... يوديك لين الطابق الثاني والبنت هاوس ...

بخصوص ارتفاع السقف ... الارتفاع العادي هو 3.30 م ... انا لم التزم بهذا الارتفاع ...

رفعت السقف شوي ...

تصميم الطابق الثاني ... لا يتطابق مع الطابق الاول .... اللهم الا في مكان الحمامات ....

الملخص ... بيتي فيه ... 8 غرف نوم ... وصالتين ... ومجلسين ومكتب ....

والمساحات فالبيت لا هي صغيرة ولا كبيرة ...

وعندي 3 ابواب .... باب للسيارات .. جنبه باب صغير ناحية الجنوب ...

وباب صغير اخر ... ناحية الغرب ...

يعطيك العافية اخوي ...

اسيرالدوحه
24-07-2009, 12:19 AM
بخصوص الاستشاري ...

مرحلة اعداد خرايط البيت .... استغرقت عندي قرابة السنة ...

انا صراحة ... اخذت راحتي .... وحاولت قدر الامكان الاستفادة من جميع الفراغات الموجوده فالبيت ...

وحاولت تلافي اي عيوب مستقبلية للتصميم عند التنفيذ والبناء ....

الاسعار بالعادة ... تعتمد على تصنيف المكتب الاستشاري ...

المكاتب الجيدة ... راح تاخذ منك تقريبا 20 الف ريال ...

يمكن الاسعار رخصت الحين ...

طبعا هالمبلغ ماتدفعه مرة وحده على طووول ... ولكن يندفع خلال فترة التصميم ...

يعطيكم العافية ...

دهــن العود
24-07-2009, 05:13 AM
يعطيك العافيه اخوي اسير الدوحة

عندي سؤال تقدر تقول عليه فضول شووي

انت حطيت غرفة الاوتي في البنت هاوس،، وغرفة الغسيل في الملحق الخارجي !
احس مساافة بينهم مع ان المفروض يكونون جنب بعض !!!

بعدين فوق ماعندك بانتري او مطبخ صغير ؟؟ او اعتمادكم الرئيسي على المطبخ الخارجي ؟؟

بس ماشاء الله توزيع البيت حلوو

وجعلة عامر بذكر الله

:)

اسيرالدوحه
24-07-2009, 02:03 PM
يعطيك العافيه اخوي اسير الدوحة

عندي سؤال تقدر تقول عليه فضول شووي

انت حطيت غرفة الاوتي في البنت هاوس،، وغرفة الغسيل في الملحق الخارجي !
احس مساافة بينهم مع ان المفروض يكونون جنب بعض !!!

بعدين فوق ماعندك بانتري او مطبخ صغير ؟؟ او اعتمادكم الرئيسي على المطبخ الخارجي ؟؟

بس ماشاء الله توزيع البيت حلوو

وجعلة عامر بذكر الله

:)

الله يعافيك اخوي ويسلمك يا رب ...

الفكرة كانت ان غرفة الغسيل تكون خارج البيت ....

اما غرفة الاوتي فتكون بجانب غرفة الخادمة ...

لانه راح يكون اسهل لها ....

وبخصوص البانتري ... كان عندي نية اسوي واحد ...

وكنت بحطه فالطابق الثاني .. فالصالة اللي فوق ...


لكني وقت التنفيذ ...غيرت رأيي ...

واكتفينا بالمطبخ الخارجي ...


يعطيك العافية ....

ولا هنت ..

بوحارب
09-08-2009, 12:59 AM
كاتم المواجع

بوالجوري

اسير الدوحة

مشكورين على المرور اللي زاد الموضوع نووور

تحداني
09-08-2009, 02:53 AM
.. سؤال للاخ بو حارب ..

اخي كل ما يرسم خارطه بيته .. لا توافق عليه الحكومه ..
مع العلم ان قطعه الارض الذي يملكها في منطقه الخليج الغربي ..

وردهم يكون كالاتي .. قلل من المكيفات .. لانك تطالب بماهو غير قانون ..
فما الحل برأيك ..؟؟

ننتظر اجابه خبيرنا بو حارب ..


الله يسعدك يارب :)

بوحارب
09-08-2009, 03:02 AM
.. سؤال للاخ بو حارب ..

اخي كل ما يرسم خارطه بيته .. لا توافق عليه الحكومه ..
مع العلم ان قطعه الارض الذي يملكها في منطقه الخليج الغربي ..

وردهم يكون كالاتي .. قلل من المكيفات .. لانك تطالب بماهو غير قانون ..
فما الحل برأيك ..؟؟

ننتظر اجابه خبيرنا بو حارب ..


الله يسعدك يارب :)

اول مرة اسمع عن مخطط يرجع بسبب المكيفات الزايده:telephone:

الظاهر اخوج يبي يقلب البيت فريزر :)


الحل الله يسلمج يخلي في الغرف الصغيرة مكيف واحد وفي المجالس والصلات والغرف الماستر مكيفين

قبل فتره دخلت فيلا في الخليج الغربي وكانت متروووووسه مكيفات

كيف اسمحوا لهذا ولأخوج لا :telephone:

ويسعدج أن شاء الله

تحداني
09-08-2009, 03:06 AM
اول مرة اسمع عن مخطط يرجع بسبب المكيفات الزايده:telephone:

الظاهر اخوج يبي يقلب البيت فريزر :)


الحل الله يسلمج يخلي في الغرف الصغيرة مكيف واحد وفي المجالس والصلات والغرف الماستر مكيفين

قبل فتره دخلت فيلا في الخليج الغربي وكانت متروووووسه مكيفات

كيف اسمحوا لهذا ولأخوج لا :telephone:

ويسعدج أن شاء الله




.. لا يا بو حارب .. لكي اجعل الصوره امامك اكثر وضوحا ..
شوف الله يسلمك .. الوالد اشترى قطعه ارض هلاليه .. وعلى البحر ..
ومساحتها كبيره .. فقسمها .. اعطي قطعه لاخي ..
ونفس الارض قال بقسمها وببني عليها بيت وأأجرها ..

سارت الامور كذلك .. رسموا الخارطه .. وكانت خارطتين ..
على ان تكون الاولى لاخي والثانيه لابي ..

بعد الانتهاء من الرسم ..ذهبوا لاجراء باقي الاجراءات ..
قالت لهم الجه المسئوله .. من حقكم ان تقسموا الارض ..
ولكن ليس من حقكم ان توزعوا المكيفات .. والاضاءه ..
وان يتجاوز ذلك الحد المسموح ..

يعني على ما اعتقد القوه المسموحه او الحد المسموح والمتفق لبيت واحد ..
وليس لفلتين ..

فهمت الان سيدي الفاضل ..
اما الافريز .. والثلاجه .. لا ابدا ..


ننتظر اجابه خبيرنا بو حارب ..

بوحارب
09-08-2009, 03:13 AM
.. لا يا بو حارب .. لكي اجعل الصوره امامك اكثر وضوحا ..
شوف الله يسلمك .. الوالد اشترى قطعه ارض هلاليه .. وعلى البحر ..
ومساحتها كبيره .. فقسمها .. اعطي قطعه لاخي ..
ونفس الارض قال بقسمها وببني عليها بيت وأأجرها ..

سارت الامور كذلك .. رسموا الخارطه .. وكانت خارطتين ..
على ان تكون الاولى لاخي والثانيه لابي ..

بعد الانتهاء من الرسم ..ذهبوا لاجراء باقي الاجراءات ..
قالت لهم الجه المسئوله .. من حقكم ان تقسموا الارض ..
ولكن ليس من حقكم ان توزعوا المكيفات .. والاضاءه ..
وان يتجاوز ذلك الحد المسموح ..

يعني على ما اعتقد القوه المسموحه او الحد المسموح والمتفق لبيت واحد ..
وليس لفلتين ..

فهمت الان سيدي الفاضل ..
اما الافريز .. والثلاجه .. لا ابدا ..


ننتظر اجابه خبيرنا بو حارب ..

في هذي الحاله بيكون في الموضوع 1 من ال 2

يا اما المنطقة اللي فيها البيوت محددين لكل بيت عدد معين من المكيفات وهذا الشي صعبه

او ان قوة الكهربه في البيت ماتسمح لعدد كبير من المكيفات وبعد ماتوقع هالشي

خلي اخوج يشيك مع الكهربائي ويسئلة قوة الكهربه كم مكيف تتحمل !!!!!!

بالنسبة لي سويت كهربة بيتي لتتحمل اكثر من 45 مكيف

والبيت مافيه الا 18 مكيف :)

حيرتيني يا بنت :nice:

تحداني
09-08-2009, 03:17 AM
.. نعم هناك حد معين يجب الالتزام به ..
والمشكله الحد المسموح لذلك .. يجعل الشخص يتصبب عرقا ..

بيتكم فيه 81 مكيف ( ما شاء الله تبارك الرحمن ولا حول ولا قوه الا بالله ) ؟
؟ ولا فريجكم فيه 81 مكيف؟؟

سؤال آخر .. بيتكم قاعه افراح ؟؟ ام فيلا مواطن قطري متواضع ؟؟
سؤال اخير .. ولماذا حيرتك .. انها الحقيقه سيدي الفاضل ؟؟

..


الله يسعدك .. واشكرك على سعه صدرك ..
واهنيك على هذه المعلومات القيمه ..

شكرا لك ..:)

بوحارب
09-08-2009, 03:25 AM
.. نعم هناك حد معين يجب الالتزام به ..
والمشكله الحد المسموح لذلك .. يجعل الشخص يتصبب عرقا ..

بالعكس الدولة راعت جميع الجوانب في بيت المواطن وما قصرت معاه بشي


بيتكم فيه 81 مكيف ( ما شاء الله تبارك الرحمن ولا حول ولا قوه الا بالله ) ؟
؟ ولا فريجكم فيه 81 مكيف؟؟
هههههههههههههههههههههههههههههههه

ارجعي للمشاركة تم التعديل :shy:

سؤال آخر .. بيتكم قاعه افراح ؟؟ ام فيلا مواطن قطري متواضع ؟؟
هذا بيتي

وهو فيلا مواطن كيوت

واجرتها على واحد كيوت بعد :eek5:

سؤال اخير .. ولماذا حيرتك .. انها الحقيقه سيدي الفاضل ؟؟
لأني اول مرة اسمع عن فيلا ترفض بسبب المكيفات

والمعروف ان الفلل ترجع بسبب الأخطاء في التصاميم الهندسية والأخطاء في الأبعاد وغيره
..


الله يسعدك .. واشكرك على سعه صدرك ..
واهنيك على هذه المعلومات القيمه ..

شكرا لك ..:)

لاشكر على واجب ماسوينا شي الله يسلمج

أم وضحى
09-08-2009, 05:04 PM
ذكرتوني بأيام تصمييم البيت :weeping:

سنه وانا مع ابو العيال شيل وحط .. انا ابي شي وابو العيال مجننه المهندس يقوله مابينفعش دي ام وضحى عاوزه زي المسلسلات الكويتيه :rolleyes2: .. ويبيه ياخذ من التصامييم الجاهزه :anger1:

المهم .. تم تنفيذ تصميمي اللي ابيه لاقتناع ابو العيال به .. لاني راعيت فيه عدة جوانب :

- عدد الغرف يناسب عدد عيالنا
- مجلس نسائي له مدخل خاص به .. عشان ما اضيق على عيالي وابوهم .. يدخلون ويطلعون على كيفهم ..
- غرفة (سوني ون وتو وثري واكس بوكس ووي وكل هالخرابيط ) حق العيال
- الملحق الخارجي ورا البيت
- الحوش من قدام البيت فاضي .. لاني احب الحوش الكبير
- الطبيلات يكون مدخلهم من عند الملحق من ورا .. يعني مايكونون في وجه البيت في الحوش

عموما
- البيت عباره عن طابق ارضي فيه 3 صالات وغرفتين : وحده غرفة طعام والثانية غرفة العاب حق العيال ومجلس نسائي مع مطعمه والمغاسل الخاص به ..
- الطابق الثاني 4 غرف نوم حق العيال مع حماماتها .. بعضها مقاس 5×5 والبعض الاخر فرق بسيط 5,30 × 5 .. وغرفة ماستر رئيسيه مع جلسة بلكونه داخلية خاصة مع غرفة دريسينق روم 4×4 مع حمامها ( الله يعزكم )
وصالة بالنص فيها بنتري صغير ..
- البنت هاوس غرفة 5,30 × 5 مع حمامها ( الله يعزكم )
- الملحق الخارجي مطبخ 5×6 مع مخزن 5×5 مع غرفة خدامه 5×4 مع غرفة غسيل

والله يتممه على خير ونسكنه واحنا بصحة وعافية ..

السيل
09-08-2009, 10:27 PM
جميل جدا

لو كل واحد يحط تصميمه

بيصير اوضح من الشرح
وبيحصل انتقادات من الاعضاء .. يمكن كان غافل عنها

رب صورة تغني عن الف كلمة

بوحارب
10-08-2009, 06:05 AM
ذكرتوني بأيام تصمييم البيت :weeping:

سنه وانا مع ابو العيال شيل وحط .. انا ابي شي وابو العيال مجننه المهندس يقوله مابينفعش دي ام وضحى عاوزه زي المسلسلات الكويتيه :rolleyes2: .. ويبيه ياخذ من التصامييم الجاهزه :anger1:
مرحبا يا سميه المدام :)

انه بالنسبة لي سويت تصميم فلتي بدون ماستشير ام وضحه لأني مب فاضي حق عوار راس الحريم وأفكارهم اللي تخسر :)

المهم .. تم تنفيذ تصميمي اللي ابيه لاقتناع ابو العيال به .. لاني راعيت فيه عدة جوانب :
ما شاء الله عليج شديدهـ :eek5:

- عدد الغرف يناسب عدد عيالنا
حلو والأفضل تكون هناك غرفة زيادة للحالات الطارئة:waiting:

- مجلس نسائي له مدخل خاص به .. عشان ما اضيق على عيالي وابوهم .. يدخلون ويطلعون على كيفهم ..
حلو لما يكون مجلس الحريم منفصل عن ممرات البيت

على الأقل الواحد يقدر يتحرك براحته في الدخله والطلعه

زين سويتي:)

- غرفة (سوني ون وتو وثري واكس بوكس ووي وكل هالخرابيط ) حق العيال
ههههههههههههههههههههههههههههه :taunt:
وحق الكرك مرة وحده

- الملحق الخارجي ورا البيت
هذا الشي مفروغ منه من زمان
- الحوش من قدام البيت فاضي .. لاني احب الحوش الكبير
زين دام البيت من قدام فاضي عيل وش وضع الأرض من الجوانب؟

لا يكون ارضكم طوالية ؟ يعني فيها عمق كبير والعرض صغير!!


- الطبيلات يكون مدخلهم من عند الملحق من ورا .. يعني مايكونون في وجه البيت في الحوش
اها حلو موقع الأرض :)

عموما
- البيت عباره عن طابق ارضي فيه 3 صالات وغرفتين : وحده غرفة طعام والثانية غرفة العاب حق العيال ومجلس نسائي مع مطعمه والمغاسل الخاص به ..
- الطابق الثاني 4 غرف نوم حق العيال مع حماماتها .. بعضها مقاس 5×5 والبعض الاخر فرق بسيط 5,30 × 5 .. وغرفة ماستر رئيسيه مع جلسة بلكونه داخلية خاصة مع غرفة دريسينق روم 4×4 مع حمامها ( الله يعزكم )
وصالة بالنص فيها بنتري صغير ..
- البنت هاوس غرفة 5,30 × 5 مع حمامها ( الله يعزكم )
- الملحق الخارجي مطبخ 5×6 مع مخزن 5×5 مع غرفة خدامه 5×4 مع غرفة غسيل

ما شاء الله مساحات الغرف كبيرة :)

كم مساحة البنيان ؟
كم مساحة الأرض ؟

والله يتممه على خير ونسكنه واحنا بصحة وعافية ..

الله يتمم لكم على خير ان شاء الله وتسكنونه بأذنه ويجعله بيت عامر ياليمن والأيمان على اهلة

اشكرج ام وضيح على المشاركة القيمة

بوحارب
10-08-2009, 06:09 AM
جميل جدا

لو كل واحد يحط تصميمه

بيصير اوضح من الشرح
وبيحصل انتقادات من الاعضاء .. يمكن كان غافل عنها

رب صورة تغني عن الف كلمة

مرحبا عزيزي السيل

وضع التصميم فيه شي من التعب مثل التصوير والتعديل على الصور وعقب التحميل ....الخ

وبمشاركات الأخوان أن شاء الله راح تكون الأمور واضحه

تابعنا وفالك طيب:):)