فوافون..والضحك على الذقون!

[qatari1]

:shy:السلام عليكم ورحمة الله وبركاته...

دخلت على موقع فودافون لشراء خط هاتفي، وتجربة الشركة الجديدة المنافسة لكيوتل العزيزة التي بيننا وبينها عشرة عمر لا تنسى بسهولة!

ووضعت بعض الأرقام من اختياري للتعرف على الأسعار، ومقارنتها بأسعار كيوتل، وصدمت-في الواقع- للأسعار الفلكية للأرقام، وعجبت من تفكير بعض الشباب والفتيات السطحي التي يهتم بأمور تافهة كهذه، ويبذر أمواله، ويهدرها في رقم هاتف، بدلاً من أن يستغلها في مشروع أو مقصد هادف!

لكن قلت في نفسي، مالي ولهؤلاء النفر، ولأطلب رقماً مجانياً، ولا يهمني نوعية الرقم، أو سهولة حفظه أو تلقينه للآخرين في الأسواق والمجمعات!

أثناء البحث عن رقم عشوائي ظهر لي رقم الهاتف التالي:-

http://file14.9q9q.net/local/thumbnail/75515949/600x600.jpg

رقم ليس فيه من التميز أوالسهولة أي صلة، فقلت لم لا أطلب نفس الرقم من البحث العام، ولأرى ماذ يحدث!

وفعلاً ؛ ظهر لي الرقم، ولكن سعره 500 ريال!

http://file14.9q9q.net/local/thumbnail/75515949/600x600.jpg

فلماذا الضحك على الذقون يا فودافون، وهل هذه البداية أن تقومي باستغلال حب الناس والمجتمع للأرقام المتميزة، وتقومين-وأنتِ من الشركات الرائدة في العالم- بهذا الفعل المشين!

لكن عدت وقلت في نفسي، ما دام مثل هؤلاء التافهين والتافهات متهافتون على البحث عن تميز فارغ؛ من حق فودافون، وغيرها سلب أموالهم بلا رحمة!

[وطن]

ليش انزين
الموضوع كان واقعي

[وتبقى الدنيا حلوه]

شسالفة مايطلع لي شي :(

[qatari1]

ليش انزين
الموضوع كان واقعي


شسالفة مايطلع لي شي :(

تم التعديل:shy:

[وتبقى الدنيا حلوه]

اشووووه طلع

شركة استغلالية 100% اسعارهم مبالغ فيها

واللي يبط الجبد انهم وايد واثقين من نفسهم

يقولون سوو احتفال و طيروا نفخات كاتبين عليها وداعا كيوتل !!

و الله لا كيوتل و لا فودافون فيهم خير

[وطن]

أنا بعد دخلت لما جاني الباسوورد
اشوف ارقام نفس ارقامي اللي من كيوتل
على نفس الوزن بالضبط
وعلى 5000 وعلى 7000
وانا ماخذتهم من كيوتل على 500 ريال !!!

واللي ماخذته ببلاش
عندهم على 1500 !!!

طيب ليش !!

طبعا ما كنت مفكرة اخذ منهم أي رقم لاني مو محتاجه ارقام زياده
وكيوتل تغطيتهم بالنسبة لي اوكى
وخدماتهم زينه لا بأس لها

و من بعد ما شفت دخولهم بطمع
لا والف لا ما راح اخذ منهم ارقام

[lka]

قلنا عتيج الصوف ولا يديد البريسم

[قلب شاعر]

تعليقي البسيط ع فودافون ... وتجربتي الشخصيه ....

بلا شك اسعار فودافون فلكيه وخياليه وفوق المتوقع ...لكن كانت فيه شريحه من أرقام راحت بأسعار جدا مناسبه اللي يفهم في أرقام واسعارها ...

انا شريت 8 ارقام من فودافون ... وكلها فيها 4 اصفار لأني احب اصفار .....بأسعار انا اشوفها مناسبه لو راح تشتريه برع بتحصله بغالي فوق 15 الف وطالع وانا شريتهم بأقل من هاذا السعر بكثير...غير ان المشكله ما تقدر تحصله ومين اصلا راح يطلعه لك من كيوتل ....

الكل عارف كيوتل ما تحصل رقم مميز بسهوله لازم واسطه او عن طريق المدير...
والأرقام الموجوده في الشاشات المميزه كلها عاديه وماتسوى ال 500 رريال

ويكفي ان فودافون اعطت المشتري الحريه بأختيار رقمه حتى لو كان مبالغ فيه ...محد جابره يشتري لا يشتري اذا ماعجبه السعر ...مش احسن من كيوتل ترووح تترجاهم على رقم تبيغيه لأن يشبه رقم عندك او نفس رقم سيارات محد يعطيك الرقم وكأنك ماخذه ببلاش ..
وبعدين ومع احترامي الشديد لك يا خي صاحب الموضوع ...

الأرقام المميزه ...هوايه منتشره عندنا وعند كبار وصغار وعند كثير من الشباب ... وليست قله عقل او هدر للمال....كل واحد وعنده هوايه مفضله ,,,فيه من يحب السيارات القديمه ,,,, او السفر ,,,, الدراجات الناريه ... حب شراء الكترونيات ... او جمع العملات ,,,,وغيرها ...فلا نقلل من هوايات اخرين بأنها تافه او قله عقل ولا فيها مسؤليه من الشخص نفسه

وانت شخصيا قد تكون عندك هوايه وتخسر عليها فلوس بس غيرك يشوفها مضيعه للمال وهاكذا تسير الأمور بطبيعتها

[راعي القالات]

فودافون تعرض الاسعار بأسعار السوق كأنك تشتري من السوق مش من شركة اتصالات سعر تأسيس .
وما الومهم الصراحه دام في ناس تدفع ليش ما يستفيدون بالعكس رزق ومفتوح لهم في ناس ماتفكر وتدفع ليش ما اربح من وراهم ياخي
انسان يقول لك انا بدفع لك مليون ريال مقابل رقم تقول له لأ ؟ ادفع الله يكثر من امثالك

ولاتنسى رسوم الرخصة كم مليار يبون يعوضون بأي طريقة وماينلامون صراحه

[لله الحمد]

اخوي اي رقم انت تختاره حتى لو من كيوتل .. عليه فلوس

حتى لو كان مخربط


اخبر قبل خمس سنين اخترت رقم عادي .. بس داش خاطري

قال ادفع ميتين عليه .. على شان انت مختاره

مب السيستم اللي يختار لك ..



مب دفاع عن فودفون .. بس لانها عطت فرصه لناس كثير

ماعندهم واسطه في كيوتل .. بس عندهم فلوس

انهم يشترون ارقام مميزة



وسلام الله عليك

[حلاة الروح]

اخوي من القائمه في اختيار رقم مجاني ورسوم الاشتراك تبدأ من 160 على معتقد

القائمه تكون على اليمين

[المزن الرياني]

فودافون مستحيل تنافس كيوتل
والايام جايه وبنشوف البقاء لمن بالسوق
وطبعاً المستفيد الاول هو الزبون

[Sharshooooor]

اولا الرقم اللي اخترته لو عن طريق البحث المجاني لكان ببلاش
لكن انت اخوي اخترت الرقم نفسة يعني انت اللي تبيه وهم يدفعونك على اختيارك
ومثل ماقال اخونا العضو قبلي وانا اايدة الرأي
الجماعة فتحوا لنا المجال بدون اي واسطات وصدقني وايد ناس اشتروا ووصل العائد خرافي
تتوقع ليش؟
لان الناس كانوا في كبت كيوتل واحتكارها ومرة وحده وكأن الغشاء اللي ساد نظرهم انفتح والناس بدت تشتري بأي سعر مايهمها اي شي ولا ذل كيوطل
وهذ شركة ماغصبت الناس بالشراء بالعكس خلت المجال مفتوح ومنافسة نظيفة قدام كيوتل
والايام جاية وراح تعرفون فودافون وطريقة تسويقها
هذا رأيي واتمنى ان يعتبر رأي شخص حر بدون اي تعصبات

[البندرعقارات]

مشكوووووووووووووور

[همر]

للاسف اخوي قطري1 حسستني اني انسان تافه وهذا ظلم وافتراء

اي نعم في ناس تحب الارقام المميزه ومش غلط ولا عيب

كان المفروض تخص ان الغلط في المبالغه والاسراف والمفوشر وماتعمم

انا ماخذ رقم مميز من فودافون بـ1500 ريال وكنت مستعد ادفع فيه 10000 ريال من كيوتل لكن من اللي بيعطيك وجه في كيوتل اذا ماعندك واسطه!!!

ومارقمت فيه بنات ولا فوشرت ... اصير تافه في نظرك؟

ذكرتني بالهام بدر يوم الشباب يتصلون فيها يبون ساحة استعراض تقول انا مش فاهمه ليش الشباب يحبون هالخرابيط بدال ما يقرون ويتثقفون ومادري شنو...

القراءه هوايه بالنسبه لها وبالنسبه لبعض الشباب شي تافه... وفي النهايه كل يغني على ليلاه...

تدري وشو الحلو في الرقم المميز؟ اسمك ممكن يكون مطابق لاسم اي شخص لكن رقمك مثل البصمه... لك انت بروحك... :victory:

[م. عبدالعزيز]

متى بينزلون تعبئة وشحن ؟؟ مثل خدمه هلا

ولاهم مايعترفوون بهالنظام ؟

[F A W A Z]

فودافون في كل دول العالم مافكرت تبيع أرقام سبشل

إلا هني في قطر ..

الله المستعان

[سيزن]

ياااابن الحلال



هي جات على فودافون او كيوتل <( ماقصرت ضحك علينا)

في كل الجهات التي تسعي للربح فيه ضحك على الذقون

خذ عندك =

شركات السيارات ’ اسعار المواد الغذائيه ’ شركات التأمين ’ شركات المقاولات ......الخ

لا حسيب ولا رقيب .

[الامانه]

انا قلت امسك مينوني ابرك
اللي هو كيوتل

[نمر بن عدوان]

انا ماخذ رقم من فودافون عن طريق البحث المجاني وشكله مميز وبلاش .

ورقم ثاني متسلسل ورووعه بالف وخمسميه ولو فكيوتل مب اقل من 5000. بدون واسطه ولامحسوبيه .


الحين عندي واحد من لخطوط حاكه حك اتصالات ومايبي يخلص الرصيد لان الدقيقه تطلع علي ب20درهم بس .


الدفع بدون عوار راس كل شهر يخصمون علي 100ريال بس اوتوماتيك .ولو مشترك بخدمة 350 تطلع عليك الدقيقه ب18درهم بس.


وبعد هالاسعار والخدمات استغرب من الي ينتقد فودافون . وهذا وتوهم في بداية الطريق ومحاربين من كيوتل .

[Qt.1]

فودافون في كل دول العالم مافكرت تبيع أرقام سبشل

إلا هني في قطر ..

الله المستعان


انا بجاوبك لان فودافون قالو دام في ناس تشتري ارقام ومستعده اتبيع حتى اعضائها الداخليه علشان الرقم او حتى ياخذ قرض اهم شي ياخذ الرقم .... اهم شي الرقم نفس رقم السياره ونفس رقم الشاصي ونفس رقم القحفيه ونفس مواليده والخ.... ليش مانبيع الاارقام المميزه بفلوس في قطر واهم ضامنين مليون في % ان في فئه مريضه بالهمرض الله يبعدنا عنه عرفت ليش اخوي ....:nice: