ممكن نصيحتكم في الجامعات

[qatar.1995]

ارجو من يقدر ايقدم مساعده لا يبخل علينا

الى مجموعه 58% في الثانويه

والجامعه مش قابلينه والجامعات الى في قطر مسكره في وجهه اتصل هيئه التعليم الله يعطيهم الصحه قالو ماعندنا لك حل مجموعك ضعيف واقل شي فوق ؟؟؟؟

انتو عندكم حل راجعه المركز العربي الثقافي قالو الشهادات للقطرين غير معترف فيها

طقيت راسي قلت البحرين قالو مش معترف فيها

ليش مادري الناس الحين تدرس ب النت وتاخذ شهادات

وحنا انقول انتساب ايقولون لالالالالالالا


وحسرتي


الحل

[صوت الضمير]

الله يكون بعونك اخوي

ربعنا بالاردن وبمصر يدرسون هناك

اللي منتظم واللي انتساب

بس ماعندي علم اذا معترف فيها واذا لا

العنود

[تحداني]

... مساء الخير ..
.
.
بالفعل اخي الفاضل نسبتك لا تؤهلك للدراسه في احد الجامعات الموجوده في قطر ...
لو فكرت الدراسه في الخارج ..
لا تدرس بنظام الانتساب ابدا ابدا .. فالانتساب ممنوع منعا باتا ولدي اناس اعرفهم ..
يعانون من تصديق الشهادات ..وجاء الغاء الانتساب بقرار من مجلس الوزراء الموقر ..
.
.
اما الحل ..
1 / اذا استطعت اكمال الدراسه بانتظام فابحث عن جامعه عربيه او خليجيه تقبلك ..
2 / دراسه اللغه الانجليزيه لمده عام دراسي واحد فقط خارج البلاد وبعدها تحاول الحصول على قبول من احد الجامعات الاجنيه ( ومن المعروف ان الجامعات الاجنبيه لا تشدد كثيرا على النسب ...واذا حصلت على القبول من حقك الدراسه على حساب هيئه التعليم العالي ..)
.
.
3 / الحل الاخير ان تعيد الثانويه العامه ..صدقني يا اخي الفاضل راح تمر السنه بغمضه عين ..
والرجل بدون شهاده جامعيه هذه الايام صعبه ..ومتطلبات الحياه اصبحت كثيره وكل شئ في غلاء ..والابناء والزوجه والاسره ينتظرون الكثير ..
.
.
فكر والقرار راجع لك ..وانا تحت امرك ..
.
.
الله يوفقك يارب

[المتضرعه لله]

الله يكون بعونك

والله الانتساب مطالب به فئه كبيره من الشباب والشابات يبون يعدلون من معدلهم الدراسي ويحسنون من وضعهم الوظيفي حيث الشهاده صايره عائق بوجيهم ضد تطورهم وظيفيا

ياليت يفتحون لنا الانتساب

[تحداني]

... المتضرعه لله ..
.
.
آمين يارب ..لان الكثير من بناتنا ..
وشبابنا لديهم الرغبه لاكمال الدراسه

[ريم المدينة]

من قال ما تقدر تدخل اي جامعة؟؟

هات الايلز والسات واقدر تدش جامعات المدينة التعليمية او جامعة قهر..

تقدر تتأكد من ذي الشي بأنك تتصل في هالجامعات..

وبالتوفيق..

[صوت الضمير]

انا رحت جامعة قطر استفسر لاخوي جايب نسبه 64 وشهاده من 2003

واختي هالسنه جايبه 60

قالوا لي تجيب التوفل كامل والايلز كامل يعني 600 مني بجيبه مستحيل

وعقب بندرس حالته وبنشوف ؟؟

هذا كلامهم لي بالحرف الواحد ،،، وحتى ولو جبت التوفل ترا كل شي صار بالانجليزي

يعني مثل ماقال اخوي تحداني الزمن ادرس لغه انجليزيه....

السموحه رجعت للمره الثانيه

العنود

[qatari1]

أنا ضد نظام الانتساب لأن الكثيرين حصلوا بواسطته على شهادات جامعية، وهم لا يفقهون شيئاً، ولم يبذلوا أي مجهود، والبركة في الفلوس.

أخي الكريم..

كما قال الأخوان الحل هو في تعلم اللغة الإنجليزية سواءً في قطر أو في الخارج، والحصول على شهادة التوفل.
ثم الحصول على قبول من إحدى الجامعات الـ 250 المعترف بها من المجلس الأعلى للتعليم، ومن ثم الدراسو على حساب الدولة.

[المرسى الأخير]

الله يعينك ويعين شباب ووبنات معاك اخوي

والله يلطف بحالنا .. مادري ليش موقفين بوجه المواطنين لهالدرجة

انتساب .. معترف به للكل الا للمواطن

تعليم بإحدى الدول العربية .. معترف به للكل الا للمواطن

تعليم عن طريق الانترنت .. مش معترف فيه بالدولة مع انه ماشي بدول اوروبا وامريكا ومثل ماسمعت انه هالنوع من الدراسه صعب

تقطير في الوظايف .. يجيبون ناس بأجور خيالية من برع و بالقطرة قطرة مع المواطنين

والحمدالله على كل حال


عموما مثل ماذكرت الاخت انك اذا جبت التوفل/الايلز و السات تقدر تدرس بجامعة قطر، او تاخذ بعثه عالمجلس الاعلى بشرط حصولك على خطاب قبول من احدى الجامعات الاجنبية المعترف بها

او انك تنتظر لحد ماتفتح كلية المجتمع وتسجل فيها (انشالله يقبلون نسبتك)

تحياتي لك اخوي .. وخلك رافع راسك دوم :)

[دهــن العود]

أنا ضد نظام الانتساب لأن الكثيرين حصلوا بواسطته على شهادات جامعية، وهم لا يفقهون شيئاً، ولم يبذلوا أي مجهود، والبركة في الفلوس.

اخي الكريم اذا ما جربت لا تكلم انا دارس انتساب في جامعة بيروت والله اطلعت عيونا لين تخرجنا واللي ما يذاكر عدل والله ماينجح لو شيسوي و، كان معان ناس ممكن يدفعون اي مبلغ مقابل النجاح وكلهم يعيدون السنة مرة وثنتين ..

[بنت ابوها 19]

جامعة قطر
لغة نظام الموازي

ونظامهم الجديد
انه جيب التوفل والايلز
وادخل حتى لو بنسبة 50
بس من يقدر على التوفل والايلز ؟؟

بس عندنا واحد من هلي
جايب نسبته بعلمي
خمسين وشي
ويدرس الحين بمريكا

يعني عادي تقدر تكمل دراستك برع ياخوووي


وفي جامعة المجتمع
راح تفتح قريب
على شهر 1
تتبنى الي نسبهم نازله
وتاخذهم درسهم سنتين عقبها تبعثهم جامعة قطر
ويكون حالك من حال الطلاب
لكن مشكلة الجامعه كلمتهم وحده من ربعي
قالولها انه الاولويه بالتسجيل هذي السنه هم دفعة 2008_2009

والتسجيل راح يكون شهر 8



وربي يوفقك
انا نسبتي نفس نسبتك بالضبط
لكن للاسف ماقدرت حتى اعيد الثانويه لانه توقفت شهادتي ..

[qatar.1995]

الله يكون بعونك اخوي

ربعنا بالاردن وبمصر يدرسون هناك

اللي منتظم واللي انتساب

بس ماعندي علم اذا معترف فيها واذا لا

العنود



الله المستعاااااااان ياربي يتوفقون ويعتمدون شهادتهم

[qatar.1995]

... مساء الخير ..
.
.
بالفعل اخي الفاضل نسبتك لا تؤهلك للدراسه في احد الجامعات الموجوده في قطر ...
لو فكرت الدراسه في الخارج ..
لا تدرس بنظام الانتساب ابدا ابدا .. فالانتساب ممنوع منعا باتا ولدي اناس اعرفهم ..
يعانون من تصديق الشهادات ..وجاء الغاء الانتساب بقرار من مجلس الوزراء الموقر ..
.
.
اما الحل ..
1 / اذا استطعت اكمال الدراسه بانتظام فابحث عن جامعه عربيه او خليجيه تقبلك ..
2 / دراسه اللغه الانجليزيه لمده عام دراسي واحد فقط خارج البلاد وبعدها تحاول الحصول على قبول من احد الجامعات الاجنيه ( ومن المعروف ان الجامعات الاجنبيه لا تشدد كثيرا على النسب ...واذا حصلت على القبول من حقك الدراسه على حساب هيئه التعليم العالي ..)
.
.
3 / الحل الاخير ان تعيد الثانويه العامه ..صدقني يا اخي الفاضل راح تمر السنه بغمضه عين ..
والرجل بدون شهاده جامعيه هذه الايام صعبه ..ومتطلبات الحياه اصبحت كثيره وكل شئ في غلاء ..والابناء والزوجه والاسره ينتظرون الكثير ..
.
.
فكر والقرار راجع لك ..وانا تحت امرك ..
.
.
الله يوفقك يارب



تسلم والله تعرف صعبه سنه تعيد و سنه للغه مابغى شي من العمر

تسلم على ردك وعساك على القوه

[جمال النعيمي]

السلام عليكم

اسمع اخوي مظبوط

عيد السنة واحرص على ان تراجع نفسك كل اسبوعين من اتقانك للدروس و اختبار نفسك بلي فات و احرص على اختبارات الفصل مع الاجتهاد كل يوم دراسي داخل المدرسة و البيت

+ بالاضافة الى وضع خطه من اليوم في معهد سيلفون الموجود في الغرافه من الممكن ان بدات الان ان تقدر جيب التوفل بمعدل مقبول اذا ما كان اكثر

تحدي اخوي لابد منه لا ترضى بهذه الهزيمة اليوم انت عرفت قيمة المجموع والنسبة حاول قبل لا يفوت الوقت عليك

ان كان عندك عزم من داخلك صدقني راح تشوف شي انت ما كنت تعرفه عن نفسك

الان انت تحت هذا الوضع بل لا يكون وضع ضدك اجعله وضع تحدي بينك وبين نسبه و التوفل

ادفع نفسك الى تحدي كل انسان لديه طاقه لا تحركها الا رغبه واعتقد ان انت وصلت الى ان تكون رغبتك دخول جامعة قطر وان ان شاء الله ابشرك على 2010 شهر 7 حاصل على قبول وانت في غاية السعاده

توكل على الله

[المتضرعه لله]

أنا ضد نظام الانتساب لأن الكثيرين حصلوا بواسطته على شهادات جامعية، وهم لا يفقهون شيئاً، ولم يبذلوا أي مجهود، والبركة في الفلوس.

أخي الكريم..

كما قال الأخوان الحل هو في تعلم اللغة الإنجليزية سواءً في قطر أو في الخارج، والحصول على شهادة التوفل.
ثم الحصول على قبول من إحدى الجامعات الـ 250 المعترف بها من المجلس الأعلى للتعليم، ومن ثم الدراسو على حساب الدولة.

اخوي واللي يشتغل ويبي يحسن من مستواه ا لوظيفي ويبي يكمل وين يروح؟؟؟

يعطونا انتساب هنا بجامعات الدوحه ويشددون علينا بالامتحانات

كيف نوفق بين الدراسه والعمل ؟

[qatari1]

أنا ضد نظام الانتساب لأن الكثيرين حصلوا بواسطته على شهادات جامعية، وهم لا يفقهون شيئاً، ولم يبذلوا أي مجهود، والبركة في الفلوس.

اخي الكريم اذا ما جربت لا تكلم انا دارس انتساب في جامعة بيروت والله اطلعت عيونا لين تخرجنا واللي ما يذاكر عدل والله ماينجح لو شيسوي و، كان معان ناس ممكن يدفعون اي مبلغ مقابل النجاح وكلهم يعيدون السنة مرة وثنتين ..

لم أعمم، وقلت الكثيرين أي ليس كلهم!

مديرنا الموقر مثلاً خريج السودان، وهو لا يميز بين حرفي الظاء والضاد على سبيل المثال!

ولا يجيد اللغة الإنكليزية، وهناك موظفين تحته يجيدون 3 لغات، ومهندسين فهل هذا عدل؟!

[qatari1]

اخوي واللي يشتغل ويبي يحسن من مستواه ا لوظيفي ويبي يكمل وين يروح؟؟؟

يعطونا انتساب هنا بجامعات الدوحه ويشددون علينا بالامتحانات

كيف نوفق بين الدراسه والعمل ؟

يمكنك العمل لمدة سنتين بالحكومة، ثم تأخذين تفرغ كامل براتب إجمالي للدراسة في الخارج في جامعة معترف بها بشرط الحصول على قبول غير مشروط.

فما رأيك في هذا الحل؟!

[كلي أمل]

اخوي الله يعينك بس انا من رايي تعيد الثانويه وتجييب مجموع - شد حيلك والله يوفقك

[قطريه فديتني]

في جامعات تفتح كلاسات المسا ؟

انا ودي اكمل حاليا موظفه بس ماقدر اترك شغلي ونفس الوقت ابي ادرس شنو تقترحون علي ؟

ابي ادرس بزنس وين ممكن ادرس ؟ في اي جامعه برايكم ؟ انا نسبتي 76 % خريجة 2003

[eastqatar]

عندك خيار

كلية شمال الاطلنطي تقبل 60% في الميه

ولو اقل تشوف نسبة الرياضيات و الانجليزي اذا تجاوزت ال 60% ففرصتك زينه

واذا اقبلوك يعطونك تأسيس لغة انجليزية و رياضيات

وبعدها اذا خلصت بمعدل 3 و نص ممكن اتكمل بجامعة قطر او اذا حصلت قبول برع احسن و احسن

[قطريه فديتني]

انا دخلت شمال اطلنطي بس البيئه ماناسبتني

جامعات المدينة التعليمية يقبلوني؟ واي جامعه ممكن ادرس فيها بزنس؟ او اداة اعمال

[qatar.1995]

شكرا لكل من رد علي

انا شفت الموضوع انه ايهم نسبه كبيره وكنت متوقع اني الوحيد الى في هذي المشكله الله المستعان

الى طلعت منه في هذا الموضوع انه في ناس غير راغبين في الانتساب لانه ضعيف على رايهم

بس اعتقد انه خطاء يمكن ضعيف في للغه الانجليزيه لاكن الامتحان صعب وصعب تعديه الى اذا كنت مجتهد في ناس وايد بالقوه وماتوفقو وعادووووووووووو

وبعض الشباب وقف ماقدر ايكمل الدراسه لاسباب عده

1 - الضروف
2 - التكلفه
3 - صعوبه المنهج

هذا راي


الى يقراء رسالتي ايتذكره بعد سنه او سنتين


راااااااااايفتحون الدراسه بالانتساب

ويفتحوووون الدراسه ( عن بعد ) بانت

والايااااااااااااااااااام بينا ياهيئه التعليم

[استغفرالله]

انصحك تعيد الثانوية وتقوي نفسك من احين بالانجليزي

[qatar.1995]

فيه جديد بخصوص التسجيل بالجامعات الجديده

سمعت فيه جامعه تقبل النسبه البسيطه


فيه معلوووومات نقدر نستفيد منهااااااااا

[BURBERRY]

اخوي كلية شمال الاطلنطي تقبلك .. و قبلت واحد من الربع نتيجته 55% مع ان قانون القبول لازم 60% لكن قبلووه و درس فيها 4 سنين كورسات انجليزي و تخصص و تخرج هالسنه

بس عليك تسجل و تمتحن امتحان القبول و تحديد مستوى الانجليزي و الرياضيات .. اذا مستواك متوسط بيخلونك تدرس انجليزي في الكليه و بعدها تدرس تخصص ..

و الله يوفقك