تقييم الموظف القطري وتجاهله ؟؟

[راعي السهم الأول]

بسم الله الرحمن الرحيم

:deal:
تقييم الموظف القطري هل هو حكر على قطاع دون غيره يعني القطاعات الخاصه منتظمه بهالشي والحكوميه خبر خير أوالعكس صحيح
:this:
نبي نشوف كم واحد قاعد يتطبق معاه هالشي بجهة عمله من أعضاء
(( شبكة الأسهم القطريه ))

:nea:
عشان نعرف الخلل في من جهة العمل ولا شؤون التوظيف ولا الموظفين اللي عجبهم النظام لا حسيب ولا رقيب مع أن هالشي لصالحهم وفيه أولويات الشخص المناسب في المكان المناسب
:omen2:
و
مثل ما أنتم عارفين السنه مقسمه لثنى عشر شهر و تقسيمها بيكون إلى
:eek5:
تقييم ربع سنوي وهو كل ثلاث شهور
ثم نصف سنوي يشمل ست شهور
والسنوي ختام الأشهر جميعها ويرتكز على النصف سنوي
:spider:
والنقاط اللي يتم تلخيصها في هالتقييم هل هي من صالح الموظف وأساسيه ولا النفع منها يعود على الرؤساء بالقسم فقط
:D
يعني تساهم في تطوير الموظف بمعرفة نقاط الضعف ومعالجتها بالطريقه الصحيحه بتحويله لدورات تدريبيه ممنوحه من جهة العمل ويحصل على شهادة اجتياز تنفعه للمستقبل
ولا هي دوره والسلام نفعها مثل انعدام فائدتها
:rolleyes2:
التدرج الوظيفي يمر بمراحل والمراحل هذي أساسها المتابعة المستمرة والتقييم الدوري للعاملين بكل قطاع إذا كان في حق للموظف بتعميم هالشي بقرار من وزارة العمل على جميع الجهات ليش ما نساهم بهالشي اللي فيه منفعة الوطن والمواطن
:dance
الحلو فالتقييم أن الشخص يشوف جهده وتعبه لوين وصله ويعطيه دافع أن يبذل أقصى جهد عشان يقدم أعلى مستوى من المكافأه ويصير في تنافس بين العاملين ويحس بالأنجاز والتقدير
:weeping:
لكن لو تجاهل الشخص هالحق وجهة العمل قابلت هالشي بنفس اللامبالاه هني راح يصير
في برود وإتكاليه وتهاون فالعمل وضياع للحقوق

أبي أشوف رايكم بهالطرح
:polling:
من خلال ذكر

(( القطاع))
:nop:
هل هو خاص أم حكومي إذا فيها حرج للشخص لا يذكر الجهه يكتفي بالنوع

((التقييم ))
:looking:
هل هو سنوي أي كل آخر سنه فقط ولا مقسم ربع و نصف ثم سنوي

((التقدير))
:nea:
هل يحصل على

مكافأه ماليه
زياده على الراتب
درجه وظيفيه
شهادة تقدير
منحه لدوره تدريبيه
تجاهل

وووووووووووو

إذا في شي سقط سهوا ذكروني به

و
:shy:
جا دوركم

(( المواطن عين الوطن ))


تحياتي

[قطريه ماركه]

موضوع يبي تفااااعل ..

للرفــــع ..

[طارق]

القطري : لازم لما يجي تقييمه الشهري ,أقول الي في خاطره ولا يجامل
مثال : لما مديره غير القطري مايعطيه خطه تدريبيه محدده بفتره زمنيه , المفروض يقول أن الأخ قاطني صخر ,
مب يسكت ويخاف , لأن الأزرق على فكره يستغبيك ووقت الصج بطلع الأوراق الي انت وقعت عليها

الي بيتظر الأنصاف من غير أدله ( يحكم على نفسه بالفشل )

لاتوقع اي ورقه اذا كنت مش راضي عنها ( لاتجامل )
الازرق ترى مايعرف في الشغل رفجه أو عشره( تذكرو هالشيئ ياقطرين وأنسو سذاجه أهل القريه )

والله يعين

[moonبنتnight]

تقييم الإداء الموظفي 00 بدون رقابة في قطاع الحكومي 00 هو بيد أهواء ومحسوبيات مسؤول أو رئيس أو المدير 00 سواء أشتغلت ولا ما أشتغلت كل واحد 00 أنا أطلب تقييم الأداء بطلعت روح يعطوني تقييم ويزعلون بعد 00 يخافون يطلع التقييم يسوي بلبله يقوم الموظفين عليهم 00 ولي يحر تناقشهم ليش تقييم زفت ما يردون عليك يقولون ما يصير يأخذون تقدير 100% وعيني عينك مدير منزل مسؤول لكل ينزل محد على منه كرفت ولا طلعت روح في شغل ما يهم الأهم تقييم الأداء سري ما يطلع عليه الموظف ولا يوقع عليه 00 مع ِأن القانون ألزام مسؤولين يتم توقيع الموظف عليه 00 ولآسف الشديد يتم ترقيته على أعتماد تواقيع المدراء فقد دون نظر الموظف 00
وعندنا موظفين معزولين لايشتغلون ووفي ناس يعطونهم الشغل بقطارة 00 لان في أحتكار في شغل بين مسؤول 00 يعطي الاجنبي لانه ما يقوله شي قانوني ولا موقانوني ما تفرق معاهم 00 قطاع لا حسيب ولا رقيب 00

تقدير 00 مافي تقدير في قطاع الحكومي لان ما في رقابه عليه 00 لا مكافأت ولاتدريب ولا شيء 00 اذا قدمت أقتراح أنتسب لهم 00 وهم في صوره 00
وتقييم الاداء 2008م تقسم 3 مرات في سنة كل أربع شهور وآخر سنة يجمعونه في تقييم واحد 00 وعلاوة دورية لسنة2008م ما حسبوها لنا في زيادة 00
مشكلة تقييم الإداء مرتبط بالعلاوة الدورية بتكون نسبة في زيادة راتب 00 بالقانون الموارد البشرية الجديد 00 وأن شاء الله نشوف الرقابة الداخلية تكون مراقبة عليهم حتى تقضى على محسوبيات وإحتكار العمل وترفع أداء الموظف مهني 00

[قطريه فديتني]

يعتمد على المدير وذمته انا عن تجربه اشتغلت في مكانين

الاول قطاع خاص .. (( بنك ))

المديره قطريه وصج كانت حاكتني حك غير عن الاجانب وانا كنت اتذمر بس وقت التقييم كانت ماتقصر وتنصفني وطبعا المكافأة على هالتقييم تكون مكافأة ماليه بس للأسف تركت هذاك المكان وماعرفت قدره الا عقب مارحت لمكان ثاني

المكان الثاني اللي اشتغلت فيه بعد بنك

المديره ماتدري عنا ومزاجيه وماعندها ذمه ترقي بو عيون زرق وخضر واحنا بنات البلد واعيال البلد معطتهم اقل درجه وظيفيه والحين كملت سنه في هالمكان ولا شفت تقييم ولا غيره وكل ماسألت عنها حضرتها ماخذه اجازه ومسافره

الدنيا سايبه في هالمكان واذا هالاشكال حطوهم مدرا علينا ماظن القطريين بيتحركون من مكانهم ولا بيترقون ولا بيحصلون اي مكافأة

وان اشتكينا قالوا لنا معليه صبروا حاولوا تتناقشون وتصفون القلوب

والله منبطه جبدي ماعرف شقول الصراحه

[المرسى الأخير]

بصراحة غريب ان نسمع هالشي يصير لبعض الموظفين بالذات من مسؤولين قطريين يفترض انهم على قدر كبير من المسؤولية والذمة (مانلومهم اذا حطوا مسؤولين اجانب والله)

جميع قوانين العمل في العالم وفالدولة عندنا تضمن حق الموظف في مشاهدة ومناقشة تقييمه والاهداف المطلوب منه تحقيقها بشكل فردي مع مسؤوله المباشر لان فالاخير الانتاجية في العمل هو الهدف الرئيسي من ورا هالتقييم

انا والحمدالله المكان الي كنت فيه (مدرسة مستقله) كان من حقي مشاهدة تقييمي ومناقشته واقتراح سبل تطويري

الله يعينك اخوي ويعين ناس وايد معاك

[eveqatar]

دخلت على عشره سنوات ولم ارفع لان الواسطة تلعب دور

مديري الله يسامحه

يجيب ربعه من بره ويرفعهم وما عندهم خبره

الحين مر علي 4 سوبرفايرس وانا للحين في مكاني
9 سنوات ومليت والله مليت من الظلم الي يصير

[امل الحب]

(( القطاع))

هل هو خاص أم حكومي إذا فيها حرج للشخص لا يذكر الجهه يكتفي بالنوع

مممم اعتقد شبه حكومي.. بس بدون ذكر الجهة ..:)

((التقييم ))

هل هو سنوي أي كل آخر سنه فقط ولا مقسم ربع و نصف ثم سنوي

في تقييم كل 3 شهور مرة وفي تقييم في اخر السنة

((التقدير))

هل يحصل على

مكافأه ماليه
زياده على الراتب
درجه وظيفيه
شهادة تقدير
منحه لدوره تدريبيه
تجاهل

مممم

في مكأفاة مالية تعدل حسب التقييم اذا 3 من 5 يكون 3 اضعاف الراتب الاساسي
وهكذا ..

وفي بعد زيادة مثلا لو 3 من 5 يكون 3ونص% xالراتب الاساسي

الدورات التدريبية يحق لكل موظف قطري طلبها وحسب تقييم مديره تتم الموافقة يعني لو شخص منجز وملتزم تتم الموافقة على طول .. ولو له حركاات وعدم التزام ينتظرون عليه شوي..

يحق للشخص معرفة تقييمه واسباب الضعف .. ويمكن مناقشة الموضوع في وجود المدير او طلب الموظف عدم وجوده ..وطبعا هالشي للكل ويتم تحديد اوقات ومواعيد له للكل ..

هذا كل شي عندنا ^_^

[عاشق الشهادة]

لي رجعه

[moonبنتnight]

حمدالله 00 زين والله أن اسمع واحد على الأقل منصوف 00
الله يهديهم لصالح الوطن والمواطن 00

[وتبقى الدنيا حلوه]

انا في بنك

تقين السنة اللي راحت ظلموناااااااااااااااااااااااااا

حسبي الله ونعم الوكيل << معصبه

[ام الذيب]

السلام عليكم

أنا في قطاع خاص ومديري قطري لكن أنواع الظلم أشوفه على يده ،، لاتقييم نفس الناس ولا درجات ولا شي طيب يطلع منه ،،

التقييم يروح للمتسيبين واللي يغيبون أكثر من مايداومون والشغل مترااااكم وهو خبر خيييير ،، بس وقت التقييم هم أحسن وأفضل الموظفين عنده ولا يعطونهم شهادات تقدير طيب على شنو التقدير !! على الغياب ولا الشغل اللي مايدرون عنه !!

والتقييم يصير ويتوقع منهم ويتطرش قبل مااشوفه وان حاججته قال خلاص طرشناه والسنه اليايه اذا مامت بااحسن تقييمج ،، قمممممة القهر :anger1:

المفروض من 5 سنين يعطيني درجة وهو نايم في العسل مايدري اصلاً اني ماخذت هالدرجة وعلى كلامه يحسبني خذتها من زمان ولو اني مادخلت عليه وكلمته جان ماصحى من نومته ،، وبعد كل هذا يقول لاحد يروح يشتكي في وطني الحبيب صباح الخير ،، اول مره اشوف مدير مايدري عن موظفينه وهم اصلا على أي درجة ،،

حسبي الله ونعم الوكيل عيال البلد ولاعبين فينا لعبة عيل اش خلوا للاجانب ،،

مايدري ان دعوة المظلوم مُستجابة مااقول الا الله على كل ظالم وان شاءالله حقي مب مضيعه ،،

البعض منهم ظالم ومب كلهم لأن مروا علي مدرا مهما تكلمت عنهم ماراح اوفيهم حقهم في تعاملهم مع موظفينهم ومايظلمون حد الله يذكرهم بالخير ويوفقهم وين ماكانوا ،،

[Zekreet]

شاكر لك عالموضوع وحبيت أعلق عالموضوع:telephone:

(( القطاع))

شبه حكومي

((التقييم ))

سنوي

((التقدير))

يحصل على مكافأه ماليه + زياده على الراتب الأساسي بنسبه معينه حسب الأداء

طبعا كله راجع لأداء الشخص يعني بدل الزيادات ممكن انذار ويتم تحت المراقبه لمدة ست شهوروبعدها ممكن طرد :secret:

بشكل عام يعتبر نظام نوعا ما منصف ولو أن به الكثير من الأمور التي تحكمه مثل ميزانيات الأقسام ونوع الأداره وماذا تعني بالضبط درجات التقييم وكم شخص حصل على نفس التقييم ليتم المقارنه فيما بينهم .....

[محمد2]

انا اشتغل من 25 سنة وخريج جامعة من اول ما تعينت في الوزارة اللي اشتغل فيها حتى الحين . ومع ألأسف الشديد لا ترقية ولا كتاب شكر ولا حتى صرة جت طرشوه لي حتى يطيبون خاطري . وناس جت ودربتهم وصاروا مدراء ورؤساء أقسام وانا مزروع مكاني لا نقل انتقلت ولا ترقية اترقيت (اللهم العلاوات الدورية اللي كنت آخذها سنويا وهذه طبعا بدون منة وفضل من اي مسؤول او مدير . لأن هذة العلاوات للكل . للعلم اني مب من الموظفيين المتسيبين اللي ما يداومون او اللي ما ينتجون بشهادة مدرائي ورؤسائي بلفيد لكن بعد اظلموني ووصلوا الى مناصبهم عن طريق احنا الموظفين . لأنهم كانوا يشوفونا نشتغل ونكرف وكانوا ينفخونا بكلمتين طيبين وحلوين منهم واحنا نشطط ونكرف اكثر على امل ان روؤسانا ومدراءنا الزبالة يكافئوناو ويعطونا ترقية اوكتاب شكر . لكن شاقول - الله ياخذ الحق من كل ظالم ويا ظالم لك يوم انشاالله)

[راعي السهم الأول]

موضوع يبي تفااااعل ..

للرفــــع ..


:)

شكرا على الرفع

وووو

تحياتي

[moonبنتnight]

في مقال بجريدة الراية

تتكلم فيه الكاتبة فريدة العبيدلي 00
لماذا بتاريخ 14/7/2009م
عن اللجوء للدسائس والمكائد الخفية 00
وبصراحة مقال تنتقد فيه الاساليب الملتوية في التعبير الموظف عن وضعه وإعتباراتها ظاهرة سلبية 00

ما عرفت وين أحصل المقال 00 كان تعبير صريح لما يدور في الواقع 00 ودليل على أهتمام الكثير بالمنتديات لقراءة المواضيع التي تهم الوطن والمواطن 00

[moonبنتnight]

ما شوف تعليق 00 هل أصبح الأمر واضح وضوح الشمس 00 وأصبحت ظاهرة مسؤولين ومدراء يستخدمون الاساليب الملتوية للموظف قطري أبن بلدهم ويحاربونه أذا قام بواجبه على أكمل وجه ويكافؤنهم بتقييم الإداء ينتقص من حقه 00 حتى لا يترقى أو يستفيد من مهنته وتم مجمده 00محلك سر 00

بصراحة موضوع مهم جداً 00 ويترتب عليه مصير موظف وخاصة أذا مس جزء من راتبه 00 والله يعطيه العافية راعي السهم الأول على طرحه للموضوع 00 لأنه جزء مهم جداً في القانون الموارد البشرية 00 يتعقل بالأمن الوظيفي واحساس بالاستقرار وشعور بالعدلة أذا وجد من يراقب هؤلاء الذي لا يخافون الله في موظفينهم 00

[محمد2]

احنا ما بهدلتنا شي في هاالبلد الا الواو(الواسطة ) الخايسة
لأن اللي له حق بالقانون حقة ضايع ما محصلة واللي ماله حق ياخذة بالواسطة غصب عنا

[معيذر جنوب]

انا اشتغل من 25 سنة وخريج جامعة من اول ما تعينت في الوزارة اللي اشتغل فيها حتى الحين . ومع ألأسف الشديد لا ترقية ولا كتاب شكر ولا حتى صرة جت طرشوه لي حتى يطيبون خاطري . وناس جت ودربتهم وصاروا مدراء ورؤساء أقسام وانا مزروع مكاني لا نقل انتقلت ولا ترقية اترقيت (اللهم العلاوات الدورية اللي كنت آخذها سنويا وهذه طبعا بدون منة وفضل من اي مسؤول او مدير . لأن هذة العلاوات للكل . للعلم اني مب من الموظفيين المتسيبين اللي ما يداومون او اللي ما ينتجون بشهادة مدرائي ورؤسائي بلفيد لكن بعد اظلموني ووصلوا الى مناصبهم عن طريق احنا الموظفين . لأنهم كانوا يشوفونا نشتغل ونكرف وكانوا ينفخونا بكلمتين طيبين وحلوين منهم واحنا نشطط ونكرف اكثر على امل ان روؤسانا ومدراءنا الزبالة يكافئوناو ويعطونا ترقية اوكتاب شكر . لكن شاقول - الله ياخذ الحق من كل ظالم ويا ظالم لك يوم انشاالله)

25 سنة ماشاء الله تبارك الرحمن

لا تقول أنك لا زلت موظف

يعني أنت اللحين المفروض تكون مدير ادارة

أو رئيس قسسسسسم على أقل تقدير

[محمد2]

25 سنة ماشاء الله تبارك الرحمن

لا تقول أنك لا زلت موظف

يعني أنت اللحين المفروض تكون مدير ادارة

أو رئيس قسسسسسم على أقل تقدير

اي والله هاي . اللي مفروض اكون على قولتك خوي ومثل ما اشوفه انا لأن اللي كانوا معاي في الشغل اوتخرجنا مع بعضنا . لكن شاأقول ألاالله ياخذ حقي من اللى اظلموني وادعي ان الله ياخذ حقي منهم باسرع وقت لأن صبري نفذ وما اقدر اصبر اكثر من 25 سنة عمل وجد واجتهادعلى امل احصل منصب في يوم من الأيام