السااااااااااااااااااااحره....ساعدوني

[الحياة كلمه]

السلام عليكم
لو سمحتوا أبي أعرف شنو رايكم لانه موضوع خطير ويهمني
بوحده تتعامل بالسحر والمشكله انها جايه من بلد كل ابوهم سحره :secret:أكيد عرفتوها
وهذي الانسانه الله يهديها غريبه كل مايبنا طاري السحر عندها وعقوبته قالت أعوذ بالله انا مااعرف كيف الناس يقدرون يخربون بيوت الناس بهالطريقة (مايخافون من الله):omg:
وبعد فتره ترد اتقول انا سويت حق زوجي عمل بسيط عشان يترقى في شغله ،وسوت لوحده تكرهها سحر عشان ماتشتغل، وهذي المسكينه صار لها سنين تدور شغل ولا حصلت، وناويه تروح بعد فتره (:secret:) عشان اتسوي لها لانها ما حملت لحد الحين.
والمشكله زوجهامايرضى عليها بكلمه ويشوفها وحده جايه من عالم ثاني (بدى المفعول)
وهذا الكلام مايبته من عندي هي بنفسها اتقولنا.
واحنا الصراحه خايفين على نفسنا وعلى عيالنا وهي وايد قريبه من بيت هلي يعني تزورهم اسبوعيا واخاف اذا حطت احد في بالها اتسويله شي وتهدم حياته.
وهي تدري ان محد يطيقها فالبيت لان لما تدخل انحس انها شيطان دخل والعياذ بالله.
ابيكم تفيدوني لو بمكاني شنو ممكن تسوووووووووووووون:waiting:

لاتبخلون علينا بارائكم مثل ماعودتمونا دايما ياكل الاعضاء.

[الخفي]

ليش تخافين منها والحديث يقول (( قراءه سوره البقره وانها لاتستطيعها البطله او كما قال ))

والبطله هم السحره وهي من البطله وستكون حمايه من هاالساحره وامثالها

لاننا متى مالجئنا الى الله لن يضرنا احد

[usa_market]

اعتقد احسن شيء تشوفين احد الشيوخ المتخصصين في معالجة هاذي الامور و تاخذين راية و ممكن ايضأ لو عندك دليل تكلمي احد الظباط في الشرطة و لكن المشكلة بعدين اذا طلعت شراح تسوي فيكم ؟ يمكن ماعاد نشوفك في المنتدى؟

[الحياة كلمه]

جزاكم الله خير على ردودكم
سوسه اعوذ بالله منها

[وتبقى الدنيا حلوه]

الله يعينكم

[هداف]

ها الاشكال ذبحها حلال ! او سجن وابعاد لا ردها الله



والسحر من المحرمات الكفرية كما قال الله عز وجل في سورة البقرة:

وَمَا يُعَلّمَانِ مِنْ أَحَدٍ حَتّىَ يَقُولاَ إِنّمَا نَحْنُ فِتْنَةٌ فَلاَ تَكْفُرْ فَيَتَعَلّمُونَ مِنْهُمَا مَا يُفَرّقُونَ بِهِ بَيْنَ الْمَرْءِ وَزَوْجِهِ وَمَا هُم بِضَآرّينَ بِهِ مِنْ أَحَدٍ إِلاّ بِإِذْنِ اللّهِ وَيَتَعَلّمُونَ مَا يَضُرّهُمْ وَلاَ يَنفَعُهُمْ وَلَقَدْ عَلِمُواْ لَمَنِ اشْتَرَاهُ مَا لَهُ فِي الاَخِرَةِ مِنْ خَلاَقٍ وَلَبِئْسَ مَا شَرَوْاْ بِهِ أَنْفُسَهُمْ لَوْ كَانُواْ يَعْلَمُونَ


السحر من الجرائم الموبقات ومن المهلكات وقد قرنه رسول الله صلى الله عليه وسلم بالشرك في قوله (اجتنبوا السبع الموبقات، الشرك بالله والسحرو قتل النفس التي حرم الله الا بالحق وأكل الربا وأكل مال اليتيم والتولي يوم الزحف وقذف المحصنات المؤمنات الغافلات) فالساحر كافر يُقتل بالسحر ولا يستتاب بل يتحتم قتله كالزنديق، ولا يجوز شرعا الذهاب الى العرافين والسحرة والمشعوذين ولو لمجرد السؤال.

قال عليه الصلاة والسلام (من أتى عرافا فسأله عن شيء لم تقبل له صلاة أربعـين ليلة) فإن تجاوزنا السؤال الى الاعتقاد صدق فيـنا قول الرسول صلى الله عليه وسلم (من أتى كاهنا فصدقه بما يقـول فـقد برئ مما انـزل على محمد) فالإسلام حريص على ان يتنزه المسلم عن الخرافات والاوهام وان يسلك السبل المشروعة.




يعني هذه الساحره ملعونه وكافره

[قطريه ماركه]

اذا انتي متأكده .. بلغي عليها الجهات المختصه .. و بيبعدونها من البلاد ...

[خنور]

المفروض تبلغون عليها الشرطه ماتسكتون ولن يصيبك الا ماكتب الله لك , استغرب من طيبة بعض الناس

الموضوع خطير جدا السحر والسحره موجودين في كل زمان ومكان , المصطفي عليه الصلاة والسلام

امر بقتلهم ونحن لانطالب بنفيهم من البلاد لانهم يفسدون في الارض .

[العقيد]

ياختي بدون طلب مساعده روحي الجهات المختصه والعاصمه هم الي بيوجهونج لها وهم بيفيدونج . قعلا مواضيع غريبه

[PARIS]

عزيزتي كل يوم قبل المغرب شغلي سورة البقرة في البيت لين ماتخلص السورة وانشاالله بتعاف بيتكم

[sanad81]

المفروض تبلغون عليها الشرطه


روحي الجهات المختصه والعاصمه هم الي بيوجهونج لها وهم بيفيدونج .


بلغي عليها الجهات المختصه .. و بيبعدونها من البلاد ...

يا اخوان .. اختنا الله يعينها ما اشتكت من ساحرة تمارس السحر في قطر !! نصيحتكم تصلح لو كانت ممتهنه السحر داخل البلد..
بس هي تشتكي من وحده تمارسه في بلادها و تطلع بلاويها على الناس اللي حولها.. يعني الشرطة عندنا هني ماعندهم شي يسوونه و لا دليل يمسكونه ولا شي..



المصطفي عليه الصلاة والسلام امر بقتلهم ونحن لانطالب بنفيهم من البلاد لانهم يفسدون في الارض .

جزاك الله خير على الكلام الطيب .. امر نبينا عليه الصلاة والسلام أحق بالاتباع من ان نختصر و نقول ابعاد

الحياة كلمه ... عليكي بالبقــرة فهي علاج أكيد و بعد استشيري المشايخ المعتمدين من الأوقاف.. واحد منهم يصلي في بن عمران ورا حلاق 24 ساعة

[العقيد]

خلاص تتعوذ من بليس وتتوكل على الله وتقاطعها وكيد الله اقوى من كيد السحره .

[جليســــة القــــرآن]

حاسبي على ملابسكم .. الشعر .. أية أثر ..
ونصيحة مثل ما قالوا الأخوان عليك بقراءة البقرة وشغليها بعد .. وأقري آية الكرسي في ماي ورشيها في زوايا البيت ..

حاولوا تتخلصون منها بأية طريقة بس بدون ما تحس عشان ما تسوي شي ..

فالكم الخلاص منها وشرها ..

[القلب المؤمن]

والله انا لو مكانك ما اخليها حتى تدخل البيت ..

:eek5:

[هتـان قطر]

الحين هي الساحرة..والا تتعامل مع ساحرة..؟

اختي الامر خطير ..بس حتى لو اشتكيتي مافيه دليل اذا ما كانت هي الساحرة..؟

[رياني qtr]

بما انها تزوركم كل اسبوع اختي عزموها وقت المغرب واقري عليها المعوذات واية الكرسي وسورة البقرة واذا قدرتي تقرين عليها كم دعاء بعد يكون شي تمام وان شاءالله توب وبالتوفيق

[usa_market]

خلاص تتعوذ من بليس وتتوكل على الله وتقاطعها وكيد الله اقوى من كيد السحره .

و نعم باللة , لكن الرسول (ص) قال اعقلها و توكل مش بالطريقة الي انت تنصح فيها و بصراحة على هالنصيحة مفروض ينزلون رتبتك من عقيد الي عريف اول .

[القطو السمين]

اقري سورة البقرةوسورالتحصين ونفخي في ماء ونثريه عندزوايا ومداخل البيت وعلموا عليها الناس الي هي ساحرتهم ولاتخافون منها لايفلح الساحر حيث اتى

[" روح قطر "]

ياساتر وليش تدخلونها بيتكم وانتو تعرفون عنها هالشي

حسبي الله عليها وعلى اشكالها من شياطين الارض

بلغو عليها لاتدهوركم وابتعدو عنها وعن رفقتها

ولاتنسين أن الله بيحاسبكم على أستماعكم لها أنها سوت وفعلت فالراضى كالفاعل

أعوذو بالله منهم الله يحفظنا ويحفظ كل مسلم

بلغى الشرطة وهم راح يتصيدون لرجعتها من برى وبيفتشونها تفتيش ذاتى

ولو أكتشفو عندها شي بيطيرونها ورى الشمس

حسبي الله ونعم الوكيل

[ابن الجزيرة]

انا من رايي بطلوا وسوسة وشكوك واموركم سوف تكون عال العال


اما اذا استمريتوا على هذا النهج والمنوال وانتم المثقفين ورواد الشبكة العنكبوتية فلابد ان النسبة الاعظم سوف يكونوا مرضى بالشك والوسواس ولهذه تبعاتها ومخاطرها ومضاعفاتها

[صوت الضمير]

يمه @@

حسبي الله والنعم الوكيل عليها
الله يستر عليكم اختي منها
هذا اذا ابو عيالها ضرته كيف انتو ؟؟ لوتاخذ موقف الله يحفظكم من شره
مثل ماقالوا الاخوان شغلي صورة البقره
ولاتناقشينها واجد بذا الامور لانها مقتنعه باللي تسوي ،، وبعدين تحطك ببالها

الله يحفظكم من شرها

واللي مايخاف من ربه ,,,,,,,,,,تقعوا يسون اي شي

العنود

[ولـد الخليج]

عطني معلومات عنها وشوف شلون اوديها بستين داهية
بس خلال شهر واحد ماتشوفة في البلد

[أم هشام]

والله يا اختي احنا نعاني من نفس المشكله وهي زوجة عمي
والمشكله مثل ما قلتي نخاف لو حطت في بالها حد سوتله شي
شوفي اختي اللي ما يخاف ربنا خاف منه
بس بالنسبة لهالاشكال لاتخافي منه ابدا وعامليها عادي ولا تحسسينها بشي ولا تئذيها
لان اللي بخاف من شي يطلعلة
وعليك بالتوكل على الله والقران والدعاء
لان الله سبحانه وتعالى اللي مقدر الامور ويمشيها مو السحرة
وانا مثلا انعملي مرااااااااااات عديدة وعديدة جدا منها ومن غيرها سحر اني ما اتزوج ولكني تزوجت وعند ولد ولدته حديثا والحمد لله
فهذا دليل انهم ما يقدرون يغيرون شي من قدر الانسان اي نعم ممكن يكون في اذى ولكن كله بقضاء وقدر الله جل وعلا

[المتضرعه لله]

اتصلي بالعضيد وهم بيوجهونك وبشكل صح

عزيزتي واجبك حماية نفسك والمواطنين من شر هذه المراه التي تعثي بالارض فسادا

لا تخافي ولاتسكتي ولن يصير الا كل خير

[جهام]

الله معاكم ...

[نورالهدى]

أختي حاولوا تصرفوها عنكم
ولا اتعادونها
ولو إتغيروا بيتكم أفضل
وشلون اتقولكم سوت سحر إلا إنتم مشجعينها
ترى الله بيحاسبكم إن وقفتم جمبها
أو يكون شك بس
ترى حرام تظنون فيها إن بعض الظن إثم
وعلى العموم خذوا حذركم وفي دخولها وبعد خروجها من عندكم رشوا ماء مقري فيه
مذاب فيه ملح
وسورة البقره
والأفضل تقطعوها بالذوق

[بنت ابوها 19]

تحملو تاذونها قبل البلاغ عليها
ولادخلونها بيتكم لو شيصير
حاولو تصرفونها بطريقه ماتكون لكم كره في قلبها
عشان مايكون عندها ولا حتى شعره تقدر تسوي بها السحر

وحاسبو منها ودخلتكم للبيت وطلعتكم له
جيكو في شي مكتوت عند الباب رمل ولا ماي ولا سكر ولا ملح ولا اي شي مفتت
دققو وانتو طالعين وداشين

وعقب اذان المغرب شغلو سورة البقره
ولا حتى وانتو نيام شغلو سورة البقره بالصاله ونامو
ولا خلو حد عندكم بالبيت يقعد يوم يقرا سورة البقره بصوت عالي في نص البيت


وكل يوم صباح ولا اي وقت كل واحد منكم ياكل سبع تمرات
كما ورد بحديث الرسول عليه الصلاة والسلام(من تصبح سبع تمرات عجوة لم يضره ذلك اليوم سم ولا سحر)صدق رسول الله.

وافراد المنزل لازم دايم يكونون على وضوء لانه العبد المتوضي دايم هو اقل عرضه للسحر

والمحافظه على قيام الليل بعد تحفظ الشخص من السحر

هذي خبرتي البسيطه
وان عرفت شي بعد ان شاااء الله مراح ابخل عليج حبيبتي


الله يعينك ويحفظكم يارب

[سداوي&مدريدي]

لاتسكتون عنها لانها قاعده اتضر غيركم وممكن اتضركم في اي لحضه

وانا مع كلام أخوي العقيد بلغي العاصمه وخليهم ياخذون فيها أجراء

والله يستر عليكم

[الحياة كلمه]

الله يجزيكم كل خير
وهالكلام يجعله في ميزان حسناتكم
اللي قررت اسويه اني اعاملها عادي وانا مااقدر امنعها من البيت لانها ماخذه واحد من اهلي المقربين
وان شاء الله بلتزم بسورة البقرة في بيتي وبيت اهلي .
والله الحافظ وان شاء الله لوفكرت تسوي شي ينقلب عليها وعلى اهلها واشكالها.
مشكورين مره ثانيه وماقصرتوا............

[HEART_LION]

الموضوع غريب والردود اغرب فيه اشياء ماتدش العقل

الله يصلحنا واياكم

[بنت الاول]

بسم الله الذي لا يضر مع أسمه شي في الأرض ولا في السماء وهو السميع العليم ..... ثلاث مرات فجراً والمغرب ... وبإذن الله لايمسكِ سوء ...عن تجربة .....