ابغي نصيحة

[واقعية]

السلام عليكم و رحمة الله و بركاته


ابغي رأيكم في موضوع لي مع وحدة من صديقاتي:

هي عايشة مع عيالها الصغار في ملحق (( منفصلة عن زوجها ))
من فترة كانت تجيها وساوس بالليل فكانت تقول لي في الدوام بأن بالليل كانت تسمع حد يكلمها و تمر اوقات حتى عيالها بيكون وهم نايمين الى ان صارت ما تطفي القرأن من الغرفة اللي تنام فيها مع عيالها.
وهي كانت شاكة في احد من اقربائها انه يكون مسوي لها (( عمل )) لآنه طلب منها في مرات انها تخلط سائل مع اي شي تشربه لأنه مقري عليه .. بهدف انه ينصلح حالها.

المهم هي ما استجابت ولكن الحين تقول انها لقت كيس فيه مادة طايح وطبعا لما فتشت عرفت انه سحر بودرة لانها لقت نفس النوعية لما بحثت عنها في الانترنت..

المشكلة .. بأنها مش قادرة تتخلص منه .. كلمت شيخ و اتفقت انها تروح له بس حاسة ان في شي مانعها .. عرضت عليها اروح معاها بس هي ما تبي

لكن التأثير وصل ل حد التزامها بالدين .. فهي تقول بأنها صارت مش قادرة تلتزم بالصلاة و لا عارفه تتصرف .

ايش رايكم لو اكلم حد من اهلها يوديها لمطوع حتى لو ما تبي لأني خايفة عليها .

الى كل من يفكر ان يحل مشكلة حد بالسحر (( خافوا الله ))

تحياتي و بانتظار ارائكم
واقعية

[ام خوله]

لا اله الا الله
عليها اختي انها تقرا ايات الرقيه عن السحر
والي لقته لابد انه ايفكه شيخ
والله يصلح حالها

[بوعلي2]

وعليكم السلام ورحمة الله وبركاته

والله ماعرف شاقول لج

اذا بتفهمين كلامي بالحرف راح تطلعون بنتجه بأذن الله

ولكن اذا مكبرين كيد الشيطان فما راح تطلعون بنتيجه لو يقرى عليها مطوع الحرم

نبتدي بسم الله وعلى بركة الله

اولا اذا ثبت انه سحر فيجب اخلاء البيت من الصور المعلقه والتماثيل والاغاني والمزامير ومشاهدت المسلسلات وكل معصيه سواء كبيره او صغيره

ثانيا الانسان قوي مستحيل حد يقدر يمنعه من الصلاه الا اذا كانت نفسه ضعيفه ويلقي باللوم على السحر وعلى الشيطان لان كيد الشيطان ضعيف ويدخل من باب الوساوس

ثالثا يجب عليها انها تشغل سورة البقره يوميا سواءا متضايقه او مب متضايقه تسمعها بالقوووو وراح تزيد عليها اعراض الخوف والضيق والاختناق وماشابه من اعراض المس والسحر والعين هذا ان كان ثابت انه سحر وراح يبين مع الوقت هل ان كان مافيها سحر او وساوس الشيطان مع الاستمرار بقراءة سورة البقره وسماعها وقراءة الرقيه الشرعيه وسماعها وأذكار الصباح والمساء

وعلى فكره صدقيني ان المطوع ماراح ينفعها كثر ماهي راح تنفع نفسها ترقي نفسها بنفسها وتستمر ماتوقف لان مجرد توقف راح يرجع لها اقوى من قبل وهذا كلام لاغبار عليه

يوميا تقرى الرقيه الشرعيه وتنفث في ماء طاهر صالح للشرب وزيت زيتون وتدهن جسمها بالزيت كامل قبل النوم وتشرب الماي المقري فيه لين تحس انه بيطلع من فمها يعني تملي بطنها بالماي ويستحسن على الريج وبكل وقت مصرح متى ماضمت تشرب ماي

رابعا تدعي الله بالسجود ان الله يفك اسرها وقيدها ويشفيها من ماعلمت ومن ما لم تعلم سواء كان سحر او مرض عضوي او اي شي ضار

خامسا تطلع صدقات بنية الشفاء التام (داو مرضاكم بالصدقات)

وفترة العلاج مابين سبوعين الا 3 شهور ويوميا وراح ترتاح بأذن الله

والله لو مارد مايقوى على كلام الله راح يصغر ويضعف وينتهي مهما كانت قوة السحر او المس او العين او اي مرض روحي

وان شاء الله مايطلع فيها سحر وتكون ازمه بسيطه وتعدي

والله يشافيها ان شاء الله

ماوصيكم بـ سورة البقره => (تعلموا سورة البقرة فإن اخذها بركه وتركها حسرة ولا يستطيعها البطله)
والبطله هم السحره

والسموحه على القصور والله يشفيها يارب

اخوج : بوعلي

[ابوعلي]

اختي خليها تشغل سورة البقرة وبصفة مستمرة

في اربع أشرطة للرقية الشرعية في تسجيلات الفاروق وتواضب عليهم وان شاء الله يكون في تحسن

واذا كانت ما تقدر تروح لأحد المشايخ بالامكان ان أحد من محارمها من الثقات يجب شيخ لها بالبيت عن طريق ادارة المساجد بوزارة الاوقاف

والله يحفظها ويفرج عنها

[هذلان]

بدون نقاش .. خليها تقرا سوره البقره و حاولي تكونين معاها ... اذا ماقدرت كلش انها تواصل قرائتها هذا يعني سحر او انها بكت وهي تقراها يعني سحر و خل تقرا اذكار الصباح و المساء بعد صلاه الفجر و صلاه العصر.
و اذا ثبت انه سحر و هي متاكده من الشخص الي طلب تخلط ماده باي شي تشربه خل تبلغ اي حد من اهلها يتفاهمون وياه .
بالنسبه للمشايخ ما اقدر افيدج بشي مهم غير اني لا اتمنى انها تكون مسحوره ولكن اذا حد دلكم على مطوع يسكن في احد المناطق خارج الدوحه تقع في غرب قطر لا تروحون له
الله يفرج كربتها ولا يبلي المسلمين بهالامور

[واقعية]

اشكر لكم ردودكم
اهي عارفة باللي يصير معاها و عارفة الرقية الشرعية بس ما ادري ليش مستسلمة .. لما اسألها ليش ما تتصرفين ما ترد .. يمكن لأن ظروفها الاسرية صعبة .. مش موضوع سهل ان امور السحر تجي من اهلك اللي المفروض تتكل عليهم في مثل هالظروف. انا بس مش عارفة كيف الزمها انها ترمي السحر اللي لقته و تبدأ ترقي نفسها..